ပြည်တွင်းကုန်သွယ်မှုသတင်း

      ပဲခူးတိုင်းဒေသကြီး၊ တောင်ငူခရိုင်တွင် သကြားစက်(၄)လုံးရှိပါသည်။ ယခုနှစ် ကြံရာသီတွင် ယင်းသကြားစက် (၄)လုံးမှ ကြံတန်ချိန် ၃၀၅၀၀၀ ဝယ်ယူကြိတ်ခွဲနိုင်ရေးဆောင်ရွက်လျက်ရှိရာ ယခုအခါတွင် လျာထားချက်အတိုင်း ပြည့်မီအောင် ကြိတ်ခွဲနိုင်ခဲ့ပြီးဖြစ်ပါသည်။

            ရေတာရှည်မြို့နယ် အောင်ချမ်းသာသကြားစက်သည် ကြံတောင်သူများအား ကြံတစ်တန်  လျှင် စိုက်စရိတ် ၃၀၀၀၀၀ ကျပ် ထုတ်ချေးပေးခဲ့ပြီး ကြံတန်ချိန် ၆၅၀၀၀ ဝယ်ယူကြိတ်ခွဲနိုင်ခဲ့ပါ သည်။ ရေတာရှည်မြို့နယ်၊ မြို့လှသကြားစက်မှာ ကြံတောင်သူများအား စိုက်စရိတ်ကြိုတင်ငွေ ထုတ်ပေးထားခြင်းမရှိဘဲ စက်အရောက်ငွေချေစနစ်ဖြင့် ကြံတန်ချိန် ၁၂၀၀၀၀ ကို ဝယ်ယူကြိတ်ခွဲနိုင်ခဲ့ပါသည်။ ၎င်းစက်များမှ ကြံများအား စက်ရုံအရောက်ဈေး ၈၅၀၀၀ ကျပ်ဖြင့် ဝယ်ယူခဲ့ပါသည်။

            အုတ်တွင်းမြို့နယ် ဗောဓိကုန်းသကြားစက်နှင့် ဖြူးမြို့နယ် ဇေယျဝတီသကြားစက်တို့မှာ ကြံစိုက်ကာလက ကြံတောင်သူများအား ထွန်ယက်ချိန်တွင် တစ်ဧက ၂၅၀၀၀၀ ကျပ်နှင့် ဘောင်လုံးချိန်တွင် ၁၀၀၀၀၀ ကျပ်၊ စုစုပေါင်း ၃၅၀၀၀၀ ကျပ်ထုတ်ပေးခဲ့ပါသည်။ ဗောဓိကုန်းသကြားစက်မှ ကြံတန်ချိန် ၇၀၀၀၀၊ ဇေယျဝတီသကြားစက်မှ ကြံတန်ချိန် ၅၀၀၀၀ တို့ကို စက်ရုံအရောက်ဈေး တစ်တန်လျှင် ၈၅၀၀၀ ကျပ်၊ ကွင်းဈေး တစ်တန်လျှင် ၆၇၀၀၀ ကျပ်ဖြင့် ဝယ်ယူခဲ့ပါသည်။

           ကြံတန် ၁၀၀ ကြိတ်လျှင် သကြား ၉.၃၃ တန်မှ ၉.၅၀ တန်ခန့်အထိ ထွက်ရှိကြောင်း သိရပြီး သကြားစက်များမှ ကြိတ်ခွဲထွက်ရှိသော သကြားများကို ကုမ္ပဏီများသို့ တင်ဒါစနစ်ဖြင့် ရောင်းချပေးကြောင်း သိရှိရပါသည်။

DOCA(ပဲခူး)

       ဖြူးမြို့၊ ဘူတာမြောက်ရပ်ကွက်၊ ထန်းကုန်းလမ်းတွင် ထင်းအစားထိုး လောင်စာတောင့်လုပ်ငန်း လုပ်ကိုင်သော လုပ်ငန်းရှင်ရှိပါသည်။ ပါရမီလောင်စာတောင့်လုပ်ငန်းသည် ၎င်းတို့ မိသားစုပိုင် ပါရမီဆန်စက်မှ ထွက်ရှိသောစပါးခွံများဖြင့် လောင်စာတောင့်များ ထုတ်လုပ်ခြင်းဖြစ်ပါသည်။

          လောင်စာတောင့် ထုတ်လုပ်ရာတွင် စပါးခွံတစ်ဆနှင့် လွှစာမှုန့် တစ်ဆခွဲကိုရော၍ လောင်စာတောင့်ထုတ်သည့် စက်ထဲသို့ ထည့်ရပါသည်။ ထွက်ရှိလာသော လောင်စာတောင့်များကို မီးသွေးဖိုထဲထည့်ပြီး မီးသွေးဖြစ်အောင် ပြုလုပ်ရပါသည်။

      တစ်နေ့လျှင် အလုပ်သမား ၆ ဦးဖြင့် စပါးခွံ လောင်စာတောင့် ပိဿာ ၆၀၀ ထုတ်လုပ် နိုင်ပါသည်။ သို့ဖြစ်၍ တစ်နေ့လျှင် ကုန်ကြမ်းဖြစ် စပါးခွံ ပိဿာ ၆၀၀ နှင့် လွှစာမှုန့် ပိဿာ ၉၀၀ အသုံးပြုရပါသည်။ လွှစာမှုန့် ၁၀ ပိဿာ တစ်အိတ်လျှင် ၁၂၅၀ ကျပ်ဖြင့်ဝယ်ယူရပြီး စပါးခွံတစ် ပိဿာအတွက် ကုန်ကျစရိတ်မှာ ၃၀၀ ကျပ်ခန့်ရှိပါသည်။ လုပ်သားတစ်ဦးအတွက် တစ်နေ့လုပ်ခမှာ ၉၀၀၀ ကျပ်ဖြစ်ပါသည်။

        ထွက်ရှိလာသော လောင်စာတောင့်များကို ၆ ပိဿာပါ စက္ကူပုံးဖြင့်ထုပ်ပိုးပြီး တစ်ထုပ်လျှင် ၈၅၀၀ ကျပ်နှုန်းဖြင့် ဖြူးမြို့အတွင်း ဖြန့်ဖြူးရောင်းချလျက်ရှိကြောင်း စပါးခွံလောင်စာတောင့်  ထုတ်လုပ်သူလုပ်ငန်းရှင်၏ ပြောပြချက်အရ သိရှိရပါသည်။

DOCA(ပဲခူး)

      တောင်ငူမြို့ အရှေ့ကျုံးပတ်လမ်းရှိ သစ်သီးဆိုင်များတွင် လိမ္မော်သီး လက်လီဈေး ၂၅ ကျပ်သားလျှင် ၂၀၀၀ကျပ် ၊ ၁ပိဿာ ဈေး ၇၀၀၀ကျပ် ၊ စပျစ်သီး အလုံးသေး လက်လီဈေး ၂၅ ကျပ်သား ၂၀၀၀ကျပ် ၊ ၁ပိဿာဈေး ၇၀၀၀၊ စပျစ်သီး အကြီးအလုံးလှ ၂၅ကျပ်သားလျှင် ၂၅၀၀ကျပ် နှင့် ၁ပိဿာဈေး ၉၀၀၀ကျပ်၊ စတော်ဘယ်ရီသီး ၂၅ ကျပ်သား ၂၀၀၀ကျပ်၊ ၁ ပိဿာဈေး ၇၀၀၀ ကျပ် နှင့် အသင့်ထုပ်ပိုးထားသော ပလတ်စတစ် ၁ဗူးလျှင် ၈၀၀ ကျပ် ဈေးနှုန်းဖြင့် ရောင်းချလျက်ရှိကြောင်း သိရှိရပါသည်။

       သခွားမွှေးသီး ၁ လုံးလျှင် ၃၀၀၀ ကျပ်၊ ရှမ်းပြည် နာနတ်သီး ၁လုံးလျှင် အကြီး၊ အလတ်၊ အသေး ၁၀၀၀၊ ၁၅၀၀၊ ၂၀၀၀ ကျပ်ရှိကြောင်းနှင့် ပန်းသစ်တော် ၁လုံးလျှင် ၃၀၀၀၊ ၃၅၀၀ ကျပ်ခန့် ဖြင့် ပုံမှန်အတိုင်း ရောင်းဝယ်ဖောက်ကားလျက်ရှိနေကြာင်း သိရှိရပါသည်။

DOCA(ပဲခူး)

     ပြည်ခရိုင်၊ ပေါက်ခေါင်းမြို့နယ်တွင် မုန်လာဥနီများ စိုက်ပျိုးထားရှိပြီး ကုန်ကျစရိတ် အကျိုးအမြတ်အား သိရှိနိုင်ပါရန် ကွင်းဆင်းလေ့လာခဲ့ပါသည်။

   စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် ဝန်ထမ်းများ သည် (၆.၄.၂၀၂၃) ရက်နေ့၊ နံနက် (၁၀:၃၀) အချိန်တွင် သဖန်းချိုအုပ်စု၊ လေးကြီးကျေးရွာရှိ မုန်လာဥနီစိုက်ပျိုးသူ ဦးဘိုးမီနှင့် တွေ့ဆုံပြီးမေးမြန်းရာ မုန်လာဥနီကို စက်တင်ဘာလတွင် စိုက်ပျိုးပြီး ဒီဇင်ဘာလတွင် စတင်ထွက်ရှိသည်ဟု သိရှိရပါသည်။ မုန်လာဥနီအပင်သည် (၂)နှစ်ခံ အပင်မျိုးဖြစ်၍ နှစ်ရာသီအသက်ရှင်နေသော အပင်တစ်မျိုးဖြစ်ပါသည်။ ၎င်းသည် မုန်လာဥနီကို တစ်ဧကစိုက်ပျိုး ထားရှိပြီး စိုက်ပျိုးသည့်အခါ မျိုးစေ့ကိုသာစိုက်ပျိုးကြောင်း သိရှိရပါသည်။ တစ်ဧကလျှင် မျိုးစေ့ကို စိုက်ပျိုးကြပါသည်။ တစ်ဧကလျှင် မျိုးစေ့(၃)ထုပ်ကုန်ပြီး စိုက်ပျိုးထုတ်လုပ် ကုန်ကျစရိတ်မှာ (၄၃၂၀၀၀) ကျပ်ခန့် ကုန်ကျသည်ဟု သိရှိရပါသည်။ မုန်လာဥနီ တစ်ဧကလျှင် အထွက်ပိဿာချိန် (၁၀၀၀)ခန့် ထွက်ရှိပြီး ရောင်းဈေးမှာ တစ်ပိဿာလျှင် (၂၅၀၀)ကျပ်နှင့် (၃၀၀၀)ကျပ် အထိ အရောင်းအဝယ်ဖြစ်လျက်ရှိပါသည်။ ထို့ကြောင့် တစ်ဧကစိုက်ပျိုးမှု၏ အသားတင်အကျိုးအမြတ်မှာ (၂၀)သိန်း ခန့် ရရှိသည်ဟု သိရှိရပါသည်။

      မုန်လာဥနီသည် သစ်သီးဝလံအုပ်စုထဲတွင် ပါဝင်ပြီး လူအများ စားသုံးမှုများသဖြင့် ဧကများစွာ တိုးချဲ့ စိုက်ပျိုးလျှင် ဝင်ငွေများစွာရရှိပြီး အကျိုးအမြတ်လည်း ပိုမိုရရှိနိုင်မည်ဖြစ်ပါသည်။ ပေါက်ခေါင်းဒေသမှ ထွက်ရှိသော မုန်လာဥအနီများကို ဒေသတွင်းဈေးများနှင့် ပေါင်းတလည်နှင့် ပြည်မြို့ဈေးများသို့ တင်ပို့ရောင်းချကြောင်း သိရှိရပါသည်။

DOCA(ပဲခူး)

      တောင်ငူမြို့ မြို့မဈေးကြီးနှင့် ညောင်ပင်ဈေးများသို့ တောင်ငူမြို့နှင့်အနီးတဝိုက်မှ ဒေသထွက် ငှက်ပျောသီးများ ဝင်ရောက်လျက်ရှိပါသည်။ ယခုအချိန်ကာလသည် မြန်မာ့ဓလေ့ထုံးတမ်း အစဉ်အလာအရ အလှူပွဲများစည်ကားသိုက်မြိုက်စွာ ပြုလုပ်ကြရာ အလှူတွင် မပါမဖြစ်သော ဘုရားပွဲ၊ နတ်ပွဲများတွင် အဓိကပါဝင်သည့် ရခိုင်ငှက်ပျောသီးသည် ယခင်က တစ်ဖီးလျှင် ၃၀၀ ကျပ် မှ ၄၀၀ ကျပ်အထိသာရှိရာမှာ ယခုအခါတွင် တစ်ဖီးလျှင် ၇၀၀ ကျပ်မှ ၈၀၀ ကျပ်အထိပေးရပြီး အလုံးလှ၍ အနာလွတ်လျှင် တစ်ဖီး ၁၀၀၀ ကျပ်အထိ ဈေးကောင်းရပါသည်။

   အခြားငှက်ပျောသီးများဖြစ်သော သီးမွှေးမှာ တစ်ဖီးလျှင် ၂၀၀၀ ကျပ်မှ ၂၅၀၀ ကျပ်အထိ၊ ဖီးကြမ်းမှာ တစ်ဖီးလျှင် ၁၅၀၀ ကျပ်မှ ၂၀၀၀ ကျပ်အထိ၊ ရွှေနီမှာ တစ်ဖီးလျှင် ၂၅၀၀ ကျပ်မှ ၃၅၀၀ ကျပ်အထိ ဈေးအသီးသီးရှိပြီး ယခင်ကာလကထက် အရောင်းအဝယ်ကောင်းကြောင်း ညောင်ပင်ဈေးရှိ ငှက်ပျောသီးရောင်းချသူတစ်ဦးထံမှ သိရှိရပါသည်။

DOCA(ပဲခူး)