ပြည်တွင်းကုန်သွယ်မှုသတင်း

    သလဲသီးကို ရုက္ခဗေဒအမည်အရ Pomegranate ဟုခေါ်ဆိုပြီး သလဲပင်ကို လွန်ခဲ့သောနှစ်ပေါင်းများစွာကတည်းက မြေထဲပင်လယ်ဒေသတွင် စတင်စိုက်ပျိုးခဲ့ကြပါသည်။ သလဲသီးကိုလည်း ဆေးဖက်ဝင်သစ်သီးဝလံအနေဖြင့် စားသုံးခဲ့ကြပါသည်။ သလဲပင်၏ ပင်စည်သည်ကိုင်းဖြာမှုရှိပြီး သေးငယ်သောဆူးများလည်း ရှိပါသည်။ လွန်းပုံသဏ္ဍာန် အရွက်များရှိပါသည်။ ရွက်ထိပ်ချွန်ပြီး အနီရောင်ပန်းပွင့်များလည်း ပွင့်ပါသည်။ သလဲသီးတွင် အမျှင်ဓါတ်၊ရေဓါတ်နဲ့ ကျန်းမာရေးကိုအကျိုးပြု အထောက်ကူပေးတဲ့ ဒြပ်ပေါင်းများစွာပါ ဝင်ပါသည်။ သလဲသီးတွင် ဗီတာမင်ဘီ၊စီ၊အီး၊ကေနဲ့သံဓါတ်၊ပိုတက်ဆီယမ်ဓါတ်စတဲ့ ဗီတာမင်နဲ့ သတ္ထုဓါတ်များစွာလည်း ပါရှိပါသည်။ သလဲသီးတွင် ကင်ဆာရောဂါဖြစ်ပွား နိုင်ခြေကိုလျှော့ချနိုင်ခြင်းနှင့် သလဲသီးတွင် Antioxidant (ခေါ်) ဓါတ်တိုးဆန့်ကျင်ပစ္စည်းတွေများစွာပါသည်။ သလဲသီးသည်သွေးကြောမှတစ်ဆင့် ကင်ဆာဆဲလ်များဆီသို့ ထောက်ပံ့နေသည် အာဟာရဓာတ်များကို ဖြတ်တောက်ခြင်းအားဖြင့် ကင်ဆာဆဲလ်တွေပွားများမှု ပျံ့နှံ့မှုကို လျှော့ချပေးပါသည်။                                   သလဲသီးအစေ့အရောင်နီရဲနေခြင်းဟာ Polyphenol ဆိုတဲ့ ဓာတ်ပစ္စည်းကြောင့် ဖြစ်ပါသည်။ အဆိုပါဓာတ်ပစ္စည်းသည် အာနိသင်ကောင်းမွန်သော ဓာတ်တိုးဆန့်ကျင်ပစ္စည်းပါဝင်သောကြောင့် သလဲသီးဖျော်ရည်သည် အခြားအသီးဖျော်ရည်များထက် ဓာတ်တိုး ဆန့်ကျင်ပစ္စည်း ပါဝင်မှုအတော်များပါသည်။  သလဲသီးသည်ဝိုင်နီနှင့် green tea ထက် ဓာတ်တိုးဆန့်ကျင်ပစ္စည်းသုံးဆပိုမိုပါဝင်ပြီး သလဲသီးတွင်ပါဝင်‌သော ဓာတ်တိုးဆန့် ကျင်ပစ္စည်းများကြောင့် ခန္ဓာကိုယ့်၏ဆဲလ်များအား ထိခိုက်ပျက်စီးခြင်းမဖြစ်အောင် ကာကွယ်ပေးပါသည်။ သလဲသီးတွင်အဆစ်ရောင်ခြင်းကိုသက်သာစေခြင်း၊ နှလုံးရောဂါဖြစ်နိုင် ခြေကို လျော့နည်းစေခြင်း၊ သွေးပေါင်ချိန်ထိန်းနိုင်ခြင်း၊ ဗီတာမင်စီကြွယ်ဝခြင်း၊ သလဲသီးကို ပုံမှန်စားသုံးပါကစိတ်ဖိစီးမှုများသည် အခါထွက်တက်သည် ခန္ဓာကိုယ်အတွက်ကောင်း ကျိုးမပေးသည် ကော်တီဇော ဆိုသည်ဟော်မုန်းပမာဏကို နည်းပါးစေပါသည်။ ထိုအပြင် ဝမ်းကိုက်ရောဂါနှင့် ဝမ်းလျှောရောဂါကို ဖြစ်စေနိုင်သည် ပိုးများကိုပါသေစေနိုင်သော အာနိသင်ရှိပြီး သန်ကျစေတဲ့အာနိသင်ပါရှိပါသည်။ သလဲသီးကိုဆီးချိုရောဂါရှိသူများပါစားသုံးနိုင်ပါသည်။ သလဲသီးဖျော်ရည်မှာပါဝင်‌သော ဓာတ်တိုးဆန့်ကျင်ပစ္စည်းများသည် အယ်လ်ဇိုင်းမားရောဂါ ဖြစ်ပွားခြင်းကိုသက်သာစေပြီး မှတ်ဉာဏ်ချို့ယွင်းခြင်းမဖြစ်အောင်လည်း ကာကွယ်ပေးနိုင်သည်ဟုသိရပါသည်။ သုတေသန တွေ့ရှိချက်တခုအရ သလဲသီးဖျော်ရည်( ၈ )အောင်စကို နေ့စဉ်သောက်ပေးပါကသင်ယူမှုစွမ်းရည်နှင့် မှတ်ဉာဏ်ပိုင်းဆိုင်ရာတွင် တိုးတက်လာစေနိုင်သည်ဟု သိရပါသည်။ သလဲသီးသည်အရသာရှိသည်အပြင် အကျိုးကျေးဇူများစွာပါရှိ သောအသီးလည်းဖြစ်ပါသည်။ သလဲသီးသည် နှလုံးအားကောင်းစေပြီး လူခန္ဓာကိုယ်တွင်ရောဂါဖြစ်နိုင်ချေကို လျော့ချပေးတာအထိ အသုံးဝင်မှုများစွာရှိသည်အတွက် သလဲသီးကို လူတော်တော်များ ကြိုက်နှစ်သက်သောအသီးဖြစ်ပါသည်။ သလဲသီးသည် ကျန်းမာရေး အကျိုးကျေးဇူးများအပြင် အသားရေအတွက်လည်း အစွမ်းထက်တဲ့အသီးဖြစ်ပါသည်။ အသားရေကို လှပတင်းရင်းစေသည့်အပြင် အိုမင်းရင့်ရော်မှုကို နှေးကွေးအောင်လုပ်နိုင်ပါသည်။ သလဲသီးကိုအသားရေပြဿနာတွေ အဆုံးသတ်သွားစေဖို့အတွက် အသားရေထိန်းသိမ်းနည်းအဖြစ် အသုံးပြုနိုင်ပါသည်။ ထိုကြောင့် သလဲသီးတွင် ခန္ဓာကိုယ့်အတွက် အထောက်အကူပြုနိုင်သောကောင်းကျိုးများစွာရရှိနိုင်သောကြောင့် သလဲသီးကို စားသုံးပေးရန် လိုအပ်ပါသည်။

DOCA(ကယား)

      ညောင်ဖူးဆိုသည်မှာ ကန့်ဘလူ၊ ကျွန်းလှ ဒေသတွင်မှ မဟုတ်ပဲ ဒေသတိုင်းနှင့်လူတိုင်း အထွေအထူးပြောပြစရာမလိုဘဲ မြင်ဘူးပြီး ရင်းနှီးပြီးသားလည်းဖြစ်ပါသည်။ လူများစားရတဲ့ ညောင်ပင်မှာဆိုရင် ညောင်ချိုပင်နှင့် ညောင်ချဉ်ပင်ဆိုပီး(၂)မျိုးရှိရာမှာ ညောင်ချိုပင်မှ ထွက်ရှိသော အဖူးနုနုထွတ်ထွထ်လေးတွေကို လူအများကခူးပြီး ရေနွေး ပွက်ပွက်ဆူ မှာထည့်ပြုတ်ကာ ခရမ်းချဉ်သီးငပိဆီချက်၊ မြေပဲဆံထောင်း၊ နှမ်းထောင်း၊ ကြက်သွန်ကြော်တို့နဲ့ သုပ်စားကြသလို ငပိရည် နဲ့ တို့စရာအဖြစ်လည်း စားကြပါသည်။ ညောင်ချည်ဖူးသည် ချည်ရည်ကျို၍သာ စားကြတာဖြစ်ပါသည်။ ယခုအချိန်ရာသီတွင် ညောင်ချိုဖူးလေးများ စတင်ထွက်လာပြီ ဖြစ်သဖြင့် ညောင်ချိုဖူး နုနုလေးများကို ခူးဆွတ်ပြီး ဈေးကွက်အတွင်း ရောင်းချရာတွင် ရာသီပေါ်ပင်စာလေး ဖြစ်သဖြင့် ဈေးကောင်းရောင်းရပြီး မိသားစုဝင်ငွေ ရရှိနေကြပါသည်။ ညောင်ချိုဖူး နုနုလေးများကိုပြုတ် ရေညစ်ပြီး (၁၀)ကျပ်သားခန့် အလုံးလေး တစ်လုံးလျှင် ကျပ်(၃၀၀)နှင့် (၂)လုံးလျှင်ကျပ်(၅၀၀)နှုန်း၊ တပိဿာလျှင် ကျပ်(၂၅၀၀)နှုန်းဖြင့်  အရောင်းအဝယ်ဖြစ်နေကြောင်း ဈေးသည်တစ်ဦးထံမှ သိရှိရပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့် ကုန်စည်ဒိုင်များ ဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များ ပိုမိုခိုင်မာအားကောင်းလာစေရေး ပူးပေါင်း ဆောင်ရွက်လျက်ရှိပါသည်။ ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန် စာရင်းတို့ကိုလည်း အပတ်စဉ်၊ လစဉ်တင်ပြလျက်ရာ ဧပြီလ၊ ပထမပတ်အတွင်း အရောင်းအဝယ် ဖြစ်သည့်သီးနှံနှင့် ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ပါသည်။

     ရွှေဘိုမြို့ ပဲ၊ နှမ်း ကုန်စည်ဒိုင်တွင် ဒီဇင်ဘာလနောက်ဆုံးပတ်မှစတင်၍ ပဲစဉ်းငုံများ စတင် အရောင်းအဝယ်ဖြစ်ခဲ့ပြီး ဧပြီလ(ပထမပတ်)အထိ အရောင်းအဝယ်ဖြစ်လျက်ရှိကြောင်း၊ ဧပြီလ(ပထမပတ်)၌ ပဲစဉ်းငုံနီတစ်တင်းလျင်(၇၅၀၀ဝိ/-)ဖြင့် အရောင်းအဝယ်ဖြစ်ခဲ့ပြီး အရောင်းအဝယ်ဖြစ်မှုမှာ (၃၀၀)တင်း/ (၁၀)တန်ဖြစ်ကြောင်း၊ ယခင်နှစ်ကာလတူ၌ ပဲစဉ်းငုံနီ အရောင်းအဝယ်ဖြစ်ခြင်းမရှိကြောင်း၊ ယခင်အပတ်တွင်လည်း ပဲစဉ်းငုံနီတစ်တင်းလျှင်(၇၅၀၀ဝိ/-) ပေါက်ဈေးရှိခဲ့သဖြင့် ယခင်အပတ်နှင့် ယခုအပတ် အရောင်းအဝယ်ဖြစ်သည့် ဈေးနှုန်းတူညီသဖြင့် ဈေးငြိမ်၍ အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

       မုံရွာမြို့ သီရိရတနာစျေးရှိ သစ်သီးဝလံများမှာ ရှမ်းပြည်နယ်၊ တောင်ကြီး၊ မြစ်ကြီးနား၊ သီပေါ၊  စစ်ကိုင်း၊ ပြင်ဦးလွင်စသည့် ဒေသတွင်းတို့မှ အသီးသီးဝင်ရောက်လျက်ရှိကြောင်း သိရပါသည်။

      ယခုဧပြီလ ပထမအပတ်တွင် ရွှေလိမ္မော်(၁)ပိဿာလျှင် ကျပ်(၇၀၀၀မှ ၈၀၀၀)ကြား၊ ပျားလိမ္မော်(၁)ပိဿာလျှင် ကျပ်(၆၅၀၀မှ ၈၀၀၀)ကြား၊ လိမ္မော်(ရိုးရိုး) (၁)ပိဿာလျှင် ကျပ်(၄၀၀၀မှ ၆၀၀၀) ကြား၊ စတော်ဘယ်ရီ(၁)ပိဿာလျှင် ကျပ်(၇၅၀၀မှ ၈၅၀၀)ကြား၊  ပန်းသစ်တော် (၁)လုံး လျှင် ကျပ်(၁၅၀၀မှ ၂၅၀၀)ကြား၊ ပန်းသီး (၁)လုံးလျှင် ကျပ်(၇၀၀မှ ၁၅၀၀)ကြား၊ ထောပတ်သီး (၁)လုံးလျှင် ကျပ်(၅၀၀ မှ ၁၅၀၀)ကြား၊ ကျွဲကောသီး (၁)လုံးလျှင် ကျပ်(၁၀၀၀မှ ၁၅၀၀)ကြား၊ တယ်သီး (၁)လုံးလျှင် ကျပ်(၈၀၀မှ ၁၀၀၀)ကြား၊ သခွားမွှေး (၁)လုံးလျှင် ကျပ်(၂၀၀၀မှ ၃၅၀၀)ကြား၊ ဖရဲသီး(ကြီး) (၁)လုံးလျှင် ကျပ်(၂၅၀၀မှ ၃၅၀၀)ကြား၊ ဖရဲသီး(သေး) (၁)လုံးလျှင် ကျပ်(၁၀၀၀မှ ၁၅၀၀)ကြား၊ နာနတ်သီး (၁)လုံးလျှင် ကျပ်(၁၀၀၀မှ ၁၅၀၀)ကြား၊ နှင်းသီး(၁)ပိဿာလျှင် ကျပ်(၅၀၀၀မှ ၇၀၀၀)ကြား၊ နဂါးမောက်သီး (၁)လုံးလျှင် ကျပ်(၈၀၀မှ ၁၅၀၀)ကြား၊ ငှက်ပျောသီးဖီးကြမ်း တစ်ဖီးလျှင် (၁၀၀၀)ကျပ်၊ ငှက်ပျောသီးမွှေး တစ်ဖီးလျှင် (၁၃၀၀)ကျပ်၊ စပျစ်သီး (၁)ပိဿာလျှင် ကျပ်(၈၀၀၀မှ ၁၂၀၀၀)ကြားဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ရွှေဘိုခရိုင်၊ ဝက်လက်မြို့နယ်၏ ဧပြီလ၊ ပထမပတ်တွင် ဖြစ်ပေါ်နေသော စပါး/ဆန်ဈေးနှုန်းများမှာ ရွှေဘိုပေါ်ဆန်း စပါးတင်း(၁၀၀)လျှင် (၂၃၀၀၀၀ဝိ/-) ကျပ်ရှိပြီး၊ ဆန်ဈေးနှုန်းမှာ (၂၄)ပြည် (၁)အိတ်လျှင်(၈၀၀၀ဝိ/-)ကျပ်၊  ဧရာမင်းစပါးဈေးနှုန်းမှာ တင်း(၁၀၀)လျှင် (၁၈၅၀၀၀ဝိ/-)ကျပ် ရှိပြီး ဆန်ဈေးနှုန်းမှာ (၂၄)ပြည် (၁)အိတ်လျှင် (၈၀၀၀ဝိ/-) ကျပ် ရှိကြောင်း၊ ယခင်မတ်လ (စတုတ္တပတ်) စပါး/ဆန်ဈေးနှုန်းများမှာ ရွှေဘိုပေါ်ဆန်း စပါးတင်း(၁၀၀)လျှင် (၂၂၀၀၀၀ဝိ/-)ကျပ်ဆန်ဈေးနှုန်းမှာ (၂၄)ပြည် (၁)အိတ်လျှင် (၈၀၀၀ဝိ/-)ကျပ်၊ ဧရာမင်းစပါးဈေးနှုန်းမှာ တင်း(၁၀၀)လျှင် (၁၈၀၀၀၀ဝိ/-)ကျပ် ရှိပြီး ဆန်ဈေးနှုန်းမှာ (၂၄)ပြည် (၁)အိတ်လျှင် (၇၅၀၀ဝိ/)ကျပ်ရှိကြောင်း၊ ယခင်အပတ်နှင့်  နှိုင်းယှဉ်လျှင် ယခုအပတ်တွင် ရွှေဘိုပေါ်ဆန်း စပါးတင်း(၁၀၀)လျှင် (၁၀၀၀၀ဝိ/-) ကျပ်၊ ဆန်ဈေးနှုန်းမှာ ဈေးအတက်/အကျမရှိဘဲ (၈၀၀၀ဝိ/-) ကျပ်ဖြင့် ဈေးငြိမ်နေပြီး ဧရာမင်းစပါးဈေးနှုန်းမှာ တင်း(၁၀၀)လျှင် (၅၀၀၀ဝိ/-)ကျပ်နှင့် ဆန်(၁)အိတ်လျှင် (၅၀၀ဝိ/-)ကျပ် ခန့်မြင့်တက်လျက်ရှိကြောင်း ဒေသခံဆန်စက်လုပ်ငန်းရှင်နှင့် ချိတ်ဆက်မေးမြန်းမှုအရ သတင်းရရှိပါသည်။

DOCA(စစ်ကိုင်း)