ပြည်တွင်းကုန်သွယ်မှုသတင်း

မြန်မာနိုင်ငံတွင် (၁၂)လ ရာသီစက်ဝန်းအလိုက် ပန်းကလေးများ ပွင့်တတ်ပါသည်။ တန်ခူးလရာသီပန်းပိတောက်ပန်း၊ကဆုန်လရာသီပန်း ၊စကားဝါပန်း၊ နယုန်လရာသီပန်းစံပယ်ပန်း၊ ဝါဆိုလရာသီပန်းပုန်းညက်ပန်း၊ဝါခေါင်လရာသီပန်းခတ္တာပန်း၊တော်သလင်းလရာသီပန်းရင်းမာပန်း၊သီတင်းကျွတ်လကြာပန်း၊တန်ဆောင်မုန်းလခဝဲပန်း၊နတ်တော်လသဇင်ပန်း၊ပြာသိုလခွာညိုပန်း၊ တပို့တွဲလပေါက်ပန်း၊ တပေါင်းလသရဖီပန်း ဟူ၍ ရာသီစက်ဝန်းအလိုက် ပွင့်သောပန်းများရှိသည်။ မြန်မာနိုင်ငံသည်လှပသော တောတောင်ရေမြေ သဘာဝအလှကို ပိုင်ဆိုင်ထားပါသည်။ ရင်းမာပန်းသည်မွှေးသောယဉ်သော ပန်းဖြစ်သည်။ ရင်းမာပင်သည် အပင်ကြီးမျိုးဖြစ်ပြီး အကိုင်းအခတ်များတွင် အမွေးနုများ ဖုံးထားပြီး၊အရွက်တွေက ရွက်ပေါင်းဖြစ်သည်။ ရင်းမာပန်းခိုင်လေးများသည် ထိပ်ထွက်ကြားထွက်ဖြစ်သည်။ ရင်းမာပန်းအရောင်သည် ဝါစိမ်းအရောင်ဖြစ်သည်။ သင်းပျံ့ပျံ့မွှေးရနံ့ကို ပိုင်ဆိုင်ထားသည်။ ရင်းမာပန်း၏ ထူးခြားမှုမှာ ဝတ်ဆံဖိုများသည်။ ရင်းမာပန်းပင်များ၏ အသားကို အိမ်ဆောက်ရာတွင်လည်း အသုံးပြုကြသည်။ ရင်းမာခေါက်ကို အနာမျိုးစုံဖန်ဆေးရည်အဖြစ် ရှေးယခင်က အသုံးပြုကြသည် ဟု သိရသည်။ ရင်းမာပင်သည် သဘာဝအလေ့ကျပေါက်ပင်ဖြစ်ပြီး ယခုအခါ တွေ့မြင်ရရှားပါးနေသည်။ ပဲခူးရိုးမ၊ ကသာ၊မြစ်ကြီးနား၊ ရန်ကုန်၊တောင်ငူ ၊ ရှမ်း၊ စစ်ကိုင်း၊မန္တလေးတိုင်း တို့တွင် ပေါက်ရောက်ရှင်သန်ကြသည်။ တိုးတက်လာသည့်ခေတ်နှင့်အညီ (၁၂)ရာသီပွင့်သောပန်းများ မည်သို့ပင်ပေါများစေကာမူ ရာသီစက်ဝန်းပန်းဖြစ်သည့် တော်သလင်းလ၏ ရာသီပန်း ရင်းမာပန်းများကို ရှေးမူမပျက် စိုက်ပျိုးသင့်ပါသည်။ ရောင်းအားဝယ်အားနည်းပါးနေပြီး ရင်းမာပန်းပျိုးပင်တစ်ပင်လျှင် (၅၀၀၀/၈၀၀၀)ကျပ်ဖြင့် ရောင်းချလျှက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။ DOCA(မန္တလေး)

စပယ်ပန်းရနံ့က စိတ်ကိုကြည်လင်အေးမြစေပြီး စိတ်ဖိစီးမှုကို လျော့နည်းစေပါသည်။ စပယ်ပန်း၏ အဓိပ္ပါယ်သည် “ချစ်ခြင်းမေတ္တာ” ကို ကိုယ်စားပြုပါသည်။ ကျေးဇူးတင်ကြောင်း ဖော်ပြရန်နှင့် ကံကောင်းစေရန် တောင်းဆုပြုရန် စပယ်ပန်းကို ရွေးချယ်ကြသည်။ စပယ်ပန်းၑ နှင်းလိုဖြူဆွတ်တဲ့ အရောင်၊ မွှေးပျံ့ချိုမြိ်န်တဲ့ ရနံ့၊ လှပတဲ့ပန်းပွင့်ပုံစံ တွေကြောင့် “JASMINE “ ဘုရားသခင်ထံမှ လက်ဆောင် ဟု အဓိပ္ပာယ်ရပါသည်။အဖြူစင်ဆုံးပန်းစပယ်ကုံးလေးတွေရဲ့ ရနံ့က မွှေးပြန့်သင်းကြိုင် လှပါသည်။ ပန်းလေးတွေက အလွန်လှပ တင့်တယ်လှပေသည်။ အဖြူရောင်အဆင်းရှိပြီး ရနံ့မွှေး၍ ဂုဏ်သတင်းကြီးသော ပန်းမျိုးဖြစ်ပါသည်။ စပယ်ကြက်ရုံး၊ စပယ်အိုးပုတ်၊ အပွင်းကြီး ဘိတ်စပယ် ဟူ၍ ရှိပါသည်။ စပယ်ပန်းသည် တန်ခူးလလောက်ကတည်းက ပန်းစပွင့် တတ်ပြီး (၂)ပြန်(၃)ပြန် ပွင့်သောကြောင့် ယခုအချိန်ထိ ဈေးကွက်ရှိဆဲ ဖြစ်ပါသည်။ စပယ်ပန်းကလေးများကို သီကုံး၍ ဈေးကွက်သို့ တင်ပို့ရောင်းချကြပြီး လူကြိုက်များ၍ ဝယ်ယူမှုများသော ပန်းကလေးများ ဖြစ်ပါသည်။ ဘုရားလှူရန်နှင့် အမျိုးသမီးများ ခေါင်းတွင် ပန်ဆင်ရန်အတွက် အရောင်းသွက်လှပါသည်။ စပယ်ပန်းပင်သည် တစ်ခါစိုက်ထားလျှင် အခါခါခူးယူရသော ကြာရှည်ခံ အပင်တစ်မျိုးဖြစ်သည်။ မိမိအိမ်ခြံဝန်းအတွင်း ပန်းအိုးနှင့် စိုက်ပျိုးကြသလို စီးပွားဖြစ် ခြံနှင့် စိုက်ပျိုးသူများလည်း ရှိပါသည်။ တိုးတက်လာတဲ့ခေတ်နှင့်အညီ ဖုန်းလေးတစ်ချက် ဆက်လိုက်ရုံဖြင့် အိမ်တိုင်ရာရောက် ပို့ဆောင်ရောင်းချမှုများလည်း ရှိလာပါသည်။ စပယ်ပန်းပျိုးပင်တစ်ပင်လျှင် (၁၀၀၀/၂၀၀၀/၃၀၀၀) ကျပ်ဖြင့် ရောင်းချလျက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။ DOCA(မန္တလေး)

အိမ်များတွင် ကုတင်များပေါ်၌ ခင်းပြီးအိပ်စက်ရန်အတွက် ဖျာအမျိုးမျိုး ရောင်းချလျက်ရှိ ကြပါသည်။ ယခုအခါတွင် ဈေးကွက်၌ ပလပ်စတစ်ဖျာ၊ ဝါးဖျာနှင့် သင်ဖြူးဖျာဟူ၍ အမျိုးမျိုးရှိကြ သော်လည်း ရာသီကိုလိုက်၍ အပူအအေး ချိန်ညှိပေးနိုင်သည့် သင်ဖြူးဖျာများမှာ ဈေးကွက်တွင် လူကြိုက်များလျှက်ရှိပါသည်။ သင်ဖြူးဖျာများကို တံတားဦးမြို့နယ်ရှိရွာများဖြစ်သော ငါးရာပြား၊ ကျီးပင်၊ လက်ဆောင်ယူ ရွာများတွင် ကိုယ်တိုင်ရက်လုပ်ကြကြောင်း သိရှိရပြီး ကုန်ကြမ်းဖြစ်သည့် သင်လျှော်များကို ဧရာဝတီ တိုင်းဒေသကြီး၊ ပန်းတနော်ဒေသမှ အဓိကစုဆောင်းရရှိကြောင်းလည်း သိရှိရပါသည်။ သင်ဖြူးဖျာများရောင်းချရာတွင် (၇‘×၆‘)ဆိုဒ် သင်ဖြူးဖျာ (၁)ချပ်လျှင် (၇၀,၀၀ဝိ/-)ကျပ်၊ (၆‘×၅‘) ဆိုဒ်သင်ဖြူးဖျာ (၁)ချပ်လျှင် (၅၂,၀၀ဝိ/-)ကျပ်၊ (၆ ၁/၂ ×၅ ၁/၂) ဆိုဒ် သင်ဖြူးဖျာ (၁) ချပ်လျှင် (၆၂,၀၀ဝိ/-)ကျပ် နှင့် (၆‘×၃‘) ဆိုဒ် သင်ဖြူးဖျာတစ်ချပ်လျှင် (၂၅,၀၀ဝိ/-)ကျပ်နှုန်းဖြင့် ရောင်းချကြောင်း သိရှိရပါသည်။ သင်ဖြူးဖျာများကို မန္တလေးမြို့သို့ အဓိကတင်ပို့ရောင်းချကြောင်းသိရှိရပြီး ကုန်ကြမ်း ဝယ်ယူရသည့် ဈေးအပေါ် မူတည်၍ ဈေးနှုန်းအပြောင်းအလဲရှိကြောင်းသိရှိရပါသည်။ DOCA(မန္တလေး)

ကျောက်ဆည်မြို့နယ်တွင် အခြေခံစားသောက်ကုန်များအား သက်သောဈေးနှုန်းဖြင့် ဝယ်ယူရရှိနိုင်ရေးအတွက် ခရိုင်/ မြို့နယ်စီမံအုပ်ချုပ်ရေးအဖွဲ့၊ မြို့နယ်စည်ပင်သာယာရေး အဖွဲ့နှင့် ခရိုင် စားသုံးသူရေးရာဦးစီးဌာနတို့ ပူးပေါင်းစီစဉ် ရောင်းချပေးခဲ့ကြောင်း သိရပါသည်။ ဇူလိုင်လ(၆)ရက်နေ့တွင် ကျောက်ဆည်မြို့နယ်၊ ပြည်သူ့ဆေးရုံဝန်းအတွင်း၌ အခြေခံစား သောက်ကုန်များဖြစ်သော ဝက်သားတစ်ပိဿာလျှင်(၂၅၀၀၀/-)ကျပ်၊ အမဲသား တစ်ပိဿာ လျှင်(၂၅၀၀၀/-)ကျပ်၊ ဆိတ်သားတစ်ပိဿာလျှင်(၂၈၀၀၀/-)ကျပ်၊ ကြက်သား တစ်ပိဿာလျှင်(၂၀၀၀၀/-)ကျပ်၊ စားသုံးဆီတစ်ပိဿာလျှင် (၇၂၀၀/-) ကျပ်တို့ဖြင့် ရောင်းချပေးခဲ့ပြီး ပြည်သူများ သက်သာသောဈေးနှုန်းဖြင့် ဝယ်ယူစားသုံးနိုင်ရေးအတွက် အပတ်စဉ် တနင်္ဂနွေနေ့တိုင်း ဆက်လက်ရောင်းချပေးသွားမည်ဖြစ်ကြောင်း သိရှိရသည်။ DOCA(မန္တလေး)

မန္တလေးတိုင်းဒေသကြီး၊ ကျောက်ဆည်ခရိုင်သည် စိုက်ပျိုးရေးကိုအဓိကထား လုပ်ကိုင်သော ဒေသ တစ်ခုဖြစ်သည့်အလျောက် သီးနှံမျိုးစုံစိုက်ပျိုးဖြစ်ထွန်းလျက်ရှိရာ ၎င်း သီးနှံများအနက် ပဲစဉ်းငုံသီးနှံကို ၂၀၂၅-၂၀၂၆ ဘဏ္ဍာနှစ်၊ ကျောက်ဆည်မြို့နယ်တွင် (၂၄၇) ဧက စိုက်ပျိုးပြီးစီးပြီဖြစ်ကြောင်း သက်ဆိုင်ရာ ဌာန၏ စာရင်းများအရသိရှိရသည်။ ပဲစဉ်းငုံ သီးနှံကို မေလနှင့် ဇွန်လတွင်စတင်စိုက်ပျိုးပြီး ဖေဖော်ဝါရီလနှင့်မတ်လတွင် စတင် ထွက်ပေါ်မည်ဖြစ်ကြောင်း၊ ပဲစဉ်းငုံစိုက်ပျိုးမှု (၁)ဧက ကုန်ကျစရိတ် အနေဖြင့် မျိုး၊ သွင်း အားစု၊ လုပ်သားခအပါအဝင် စုစုပေါင်း(၃၀၀၀၀၀/-)ကျပ်ခန့်ကုန်ကျကြောင်း၊ အများဆုံး စိုက်ပျိုးသောမျိုးများမှာ ကြေးနီရောင် တဘက်လှဲမျိုး၊ ရွှေဝါရောင် လုံးသေးဒင်္ဂါးမျိုးများကို အများဆုံးစိုက်ပျိုးကြကြောင်း၊ တောင်သူများသည် ပဲစဉ်းငုံမျိုးကို မိမိစိုက်ခင်းမှ မျိုးချန်ပြီး စိုက်ပျိုးမှုရှိသလို စိုက်ပျိုးချိန်ရောက်မှ ပွဲရုံများမှ ဝယ်ယူ၍ စိုက်ပျိုးကြကြောင်း၊ ယခင်နှစ် ပဲစဉ်းငုံဈေးအနေဖြင့် (၁)တင်းလျှင်(၁၀၈၀၀၀/-)ကျပ် ဈေးနှုန်းရှိခဲ့ပြီး အထွက်နှုန်းအနေဖြင့် (၁၀-၁၁)တင်းခန့်ထွက်ရှိခဲ့ကြောင်း၊ တစ်ဧကအကျိုးအမြတ်အနေဖြင့် (၇၈၀၀၀၀/-)ကျပ် ဝန်းကျင်ခန့် မြတ်ခဲ့ကြောင်း ယခုအချိန်တွင် ပဲစဉ်းငုံများထွက်ရှိခြင်း မရှိသေးသော်လည်း ဈေးနှုန်းအနေဖြင့် (၁)တင်းလျှင် (၈၈၀၀၀/-)ကျပ် ဈေးနှုန်းများဖြင့် အရောင်းအဝယ်ဖြစ် နေကြောင်း တောင်သူများမှ ကျောက်ဆည်မြို့ပေါ်ရှိ ပွဲရုံများသို့ သွားရောက်ရောင်းချကြ ကြောင်း ပွဲရုံများမှတစ်ဆင့် မန္တလေး၊ ရန်ကုန်မြို့များသို့ တင်ပို့ရောင်းချကြကြောင်း ပဲစဉ်းငုံ ထွက်ပေါ်ချိန်တွင် အထွက်နှုန်းနှင့် ဈေးနှုန်းကောင်းမွန်ပါက အကျိုးအမြတ်များ ပိုမိုရရှိနိုင် မည်ဖြစ်ကြောင်း ပဲစဉ်းငုံစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။ DOCA(မန္တလေး)