ပြည်တွင်းကုန်သွယ်မှုသတင်း

    ဆိပ်ဖြူမြို့ ကြက်သွန်နီအရောင်းအဝယ် ဖြစ်လျက်ရှိသော ကုန်စည်ဒိုင်နှင့် ပွဲရုံများတွင် ၂၀၂၃ခုနှစ် ဇွန်လ (၁)ရက် မှ (၇)ရက်နေ့ထိ (ပထမပတ်)အတွင်း ကြက်သွန်နီများ တစ်ရက်လျှင် ပျမ်းမျှကုန်ချိန် ပိဿာ (၄)သောင်းခန့်၊ (၁)ပတ်အတွင်း စုစုပေါင်း ပိဿာ(၂)သိန်းခွဲခန့် ဈေးကွက်သို့ဝင်ရောက် အရောင်းအဝယ်ဖြစ်လျက်ရှိကြောင်း သိရှိရသည်။

     ဇွန်လ(ပထမ)ပတ်အတွင်း ကြက်သွန်နီ(၁)ပိဿာဈေးနှုန်းမှာ အမြင့်ဈေး ထိပ်စ (ရှယ်) ကျပ် (၂၀၂၅ မှ ၁၉၀၀)၊ အလတ်စ ကျပ်(၁၈၅၀ မှ ၁၈၀၀)၊ အနိမ့်ဈေး ကျပ်( ၁၇၀၀ မှ  ၁၆၂၅) ဈေးနှုန်း အသီးသီးဖြင့် အရောင်းအဝယ်ဖြစ်ခဲ့ပါသည်။ ယခင်(၁)ပတ်တွင် ကြက်သွန်နီ ထိပ်စအမြင့်ဆုံး ဈေးမှာ (၁)ပိဿာလျှင် ကျပ်(၁၉၀၀)ဈေးနှုန်းဖြင့် အရောင်းအဝယ်ဖြစ်ခဲ့၍ ယခု(၁)ပတ်တွင် ထိပ်စ (ရှယ်) ကျပ်(၁၂၅)၊ အလတ်စနှင့် အနိမ့်စတို့မှာ ကျပ်(၁၀၀)စီခန့် ဈေးမြင့်တက်၍ အရောင်းအဝယ် ဖြစ်ခဲ့ပါသည်။

     ဆိပ်ဖြူမြို့မှ ကြက်သွန်နီများကို အခြားတိုင်းဒေသကြီးများသို့ စီးထွက်မှုမှာ ရန်ကုန်ဘုရင့် နောင်ပွဲရုံနှင့် မြဝတီဝယ်လက်မှတစ်ဆင့် ဗီယက်နမ်နိုင်ငံသို့ အများဆုံးကုန်စည်စီးဆင်းလျက်ရှိကြောင်း ကုန်စည်ဒိုင်ဈေးကွက်မှ သိရှိရသည်။ ယခုဇွန်လ(ပထမ)ပတ်အတွင်း ကြက်သွန်နီ စုစုပေါင်း ပျမ်းမျှပိဿာ(၂)သိန်းခွဲခန့်၊ (၈၃၃၂)အိတ်၊ တန်ချိန်(၄၀၈)ခန့် ကုန်စည်စီးဆင်းခဲ့ကြောင်း ဈေးကွက်မှ သိရှိရသည်။

     ဆိပ်ဖြူမြို့ ပတ္တမြားဈေးအတွင်းရှိ ဈေးတန်းများတွင် ကြက်သွန်နီ အရွယ်အစား အရည်အသွေးလိုက်၍ (၁)ပိဿာလျှင် လက်လီဈေး ကျပ်(၂၄၀၀ မှ ၁၇၀၀)ဈေးဖြင့် အရောင်းအဝယ်ဖြစ်ကြောင်း သိရှိရသည်။

DOCA(မကွေး)

    ပခုက္ကူကုန်စည်ဒိုင်တွင် ပခုက္ကူဒေသမှ စိုက်ပျိုးထွက်ရှိသော ပဲစဉ်းငုံနီ၊ ကုလားပဲ၊ မတ်ပဲ၊ ပဲယင်း၊ စွန်တာနီ၊ ပဲလွန်းပြာနှင့် အခြားပဲမျိုးစုံများ အရောင်းအဝယ်ဖြစ်နေပါသည်။ ယခုတစ်ပတ် (၁.၆.၂၀၂၃)ရက်နေ့မှ (၇.၆.၂၀၂၃)ရက်နေ့ထိ  အရောင်းအဝယ်ဖြစ်နေသော ပဲဈေးနှုန်းများမှာ ပဲစဉ်းငုံနီ တစ်တင်းလျှင် ကျပ်(၉၅၇၀၀-၉၆၀၀၀-၁၀၄၈၀၀)၊ ကုလားပဲ ဝါလုံးကြိး(929) တစ်တင်းလျှင် ကျပ်(၈၂၀၀၀- ၈၂၅၀၀-၈၃၇၀၀)၊ ကုလားပဲဖြူလုံး(HL)တစ်တင်းလျှင် ကျပ်(၈၅၀၀၀-၈၆၀၀၀)၊ ပဲတီစိမ်းကြီးမှာ အရည်အသွေးပေါ်မူတည်ပြီး တစ်တင်းလျှင် ကျပ်(၄၅၀၀၀-၅၉၀၀၀)၊  ပဲဇီးကွက် တစ်တင်းလျှင် ကျပ်(၄၈၀၀၀-၄၉၀၀၀-၅၀၀၀၀)၊ ပြောင်းဖူးစေ့(CP) တစ်တင်းလျှင် ကျပ်(၁၉၇၀၀-၁၉၈၀၀-၂၀၀၀၀)၊ မန်ကျည်းတောင့် တစ်ပိဿာလျှင် ကျပ်(၉၄၀-၉၅၀-၉၆၀)၊ အညာဒေသထွက် ထန်းလျက်မှာ အမျိုးအစားလိုက်၍ တစ်ပိဿာလျှင် ကျပ်(၂၇၀၀-၂၇၅၀)ဖြင့် ဥပုသ်နေ့မှလွဲ၍ နေ့စဉ်ကုန်စည်ဒိုင်တွင် အရောင်းအဝယ်ဖြစ်နေပါသည်။

    ယခုတစ်ပတ်၏ အရောင်းအဝယ်ဖြစ်မှု အိတ်ရေမှာ ပဲစဉ်းငုံနီ (၈၀၀)အိတ်၊ ကုလားပဲ ဝါလုံးကြီး(929) (၃၀၀)အိတ်၊ ပဲတီစိမ်းကြီး (၁၅၀၀)အိတ်၊  ပဲဇီးကွက် (၃၀၀)အိတ်၊ ပြောင်းဖူးစေ့ (CP) (၅၀၀)အိတ်နှင့်  မန်ကျည်းတောင့်  ကုန်ချိန်(၁၈၀၀၀)ကျော်  အရောင်းအဝယ်ဖြစ်နေပြီး တင်ပို့မှုအနေဖြင့် ရန်ကုန်၊မန္တလေးနှင့် တရုတ်၊ အိန္ဒိယနိုင်ငံများသို့ တင်ပို့နေကြောင်း ကုန်သည်များထံမှ သိရှိရပါသည်။

DOCA(မကွေး)

   ပဲမျိုးစုံစိုက်ပျိုးထုတ်လုပ်ရာတွင် မတ်ပဲသည် မြန်မာနိုင်ငံအတွက် အရေးပါသောပဲတစ်မျိုးဖြစ်သည်။ မတ်ပဲကို အစိုဓာတ်နှင့် မြေဆီလွှာအာဟာရအနည်းငယ်သာရှိသော မြေများတွင်လည်းစိုက်ပျိုးနိုင်သည်။ မတ်ပဲတွင် ဗိုက်တာမင်၊ ပရိုတင်း၊ သတ္တုဓာတ် စသည့်တို့ အမြောက်အများပါဝင်သောကြောင့် လူသားတို့အတွက် အာဟာရတန်ဖိုးမြင့်မားသည်ဟုဆိုနိုင်သည်။ မတ်ပဲကို များသော အားဖြင့် ဆောင်းတွင်းပိုင်းတွင် ပိုမိုစိုက်ပျိုးကြပြီး မိုးတွင်းပိုင်းတွင် အနည်းငယ်စိုက်ပျိုးကြပါသည်။  နိုင်ငံခြားဈေးကွက်ရှိသောသီးနှံလည်းဖြစ်သည်။

   မတ်ပဲသီးနှံကို စစ်ကိုင်းတိုင်းဒေသကြီးအတွင်း စိုက်ပျိုးမှုများပြားပြီး (၂၀၂၂-၂၀၂၃) ဘဏ္ဍာနှစ်လျာထားချက်မှာ မိုး ၉,၃၂၆ဧက၊ ဆောင်း ၁၆၃,၂၅၄ဧက၊ စုစုပေါင်းဧက  ၁၇၂,၅၈၀ဧကရှိပြီး ၂၀၂၃ခုနှစ်၊ ရာသီကုန်ကာလအထိ မိုး ၈,၉၇၈ဧက၊ ဆောင်း ၁၆၄၃၆၉ဧက၊ စုစုပေါင်း ၁၇၃၃၄၇ဧကစိုက်ပျိုးခဲ့ရာမှ ၁၇၃,၃၃၃ဧကရိတ်သိမ်းနိုင်ခဲ့ပါကြောင်း၊ မတ်ပဲသီးနှံကို ရေဦးခရိုင်တွင် ၅၅,၄၆၀ဧက၊ ကန့်ဘလူခရိုင်တွင် ၅၀,၂၆၇ဧက၊ စစ်ကိုင်းခရိုင်တွင် ၁၉,၃၆၆ဧက၊ ရွှေဘိုခရိုင်တွင် ၁၅,၇၉၁ဧက၊ ယင်းမာပင်ခရိုင်တွင် ၁၀,၇၇၂ဧက၊ မုံရွာခရိုင်တွင် ၈,၂၅၉ဧကနှင့် ကျန်ခရိုင်များတွင် ၁၃,၄၁၈ဧက၊ စုစုပေါင်း ၁၇၃,၃၃၃ဧကရိတ်သိမ်းပြီးဖြစ်ကြောင်း စစ်ကိုင်းတိုင်းဒေသကြီး၊ စိုက်ပျိုးရေးဦးစီးဌာန၏စာရင်းများအရ သိရှိရပါသည်။

  ယခင်နှစ် ကာလတူအချိန်၌ မတ်ပဲသုံးတင်းဝင်တစ်အိတ်လျှင် ငွေကျပ်၁၄၄,၀၀၀ရှိခဲ့ရာ ယခုနှစ် လက်ရှိအချိန်တွင် ငွေကျပ်၂၄၀,၀၀၀ပေါက်ဈေးရှိပါကြောင်း၊ မတ်ပဲ (၁) ဧကကုန်ကျစရိတ် အနေဖြင့် ၃၈၁,၅၀၀ကျပ်ကုန်ကျပါကြောင်း၊ (၁) ဧကအထွက်တင်း (၁၆) တင်းထွက်ရှိပါသဖြင့် လက်ရှိ၌ (၁) တင်းပေါက်ဈေးလျှင် ၈၀,၀၀၀ကျပ်ဈေးရရှိသဖြင့် (၁) ဧကဝင်ငွေအနေဖြင့် ၁,၂၈၀,၀၀၀ကျပ်ရရှိသဖြင့် (၁) ဧကအကျိုးအမြတ်အနေဖြင့် (၉) သိန်းခန့်ရရှိသဖြင့် တောင်သူများအတွက် တွက်ခြေကိုက်သည့်သီးနှံတစ်မျိုးဖြစ်ကြောင်း ဆူးလေကုန်းကျေးရွာ၊ ကျွန်းသာယာကျေးရွာနှင့် ကျက်သွန်ဈေးကျေးရွာများရှိ တောင်သူများထံမှ သိရှိရပါသည်။ မတ်ပဲကို ခွဲခြမ်းပြုလုပ်၍ မတ်ပဲဘယာကြော်၊ အပင်ပေါက်ဖောက်၍ မတ်ပဲပင်ပေါက်၊ ၎င်းအပင်ပေါက်ကို အချဉ်တည်၍ ပဲပင်ချဉ်အဖြစ် အမျိုးမျိုးပြုလုပ်ရောင်းချနေရခြင်းကြောင့် ပြည်တွင်းဈေးကွက်သာမက နိုင်ငံခြားဈေးကွက်ရှိသောသီးနှံဖြစ်သည့်အတွက် ကာလမရွေး ဈေးကွက်ဝယ်လိုအားရှိနေပြီး ဈေးကောင်းရနေသောမတ်ပဲသီးနှံကို ပိုမိုစိုက်ပျိုးလာပါကြောင်း တောင်သူအများထံမှ လေ့လာသိရှိရပါသည်။

DOCA(စစ်ကိုင်း)       

   ၂၀၂၃ ခုနှစ် ဇွန်လ ဒုတိယအပတ်အတွင်း ကန့်ဘလူ၊ ကျွန်းလှမြို့နယ်တွင် အခြေခံစားကုန်များဖြစ်သော ရွှေဘိုပေါ်ဆန်း တစ်ပြည် (၄၅၀၀)ကျပ်၊ ဧရာမင်း တစ်ပြည် (၃၈၀၀)ကျပ်ဖြင့် ယခင် အပတ်တိုင်း တည်ငြိမ်လျက်ရှိကာ အရောင်းအဝယ် ဖြစ်လျှက်ရှိသည်။ ကြက်သွန်နီ မြစ်သား အမျိုးအစား လက်လီဈေးမှာ(အကြီး)တစ်ပိသာ(၃၀၀၀)ကျပ် ၊ (အလတ်) တစ်ပိသာ(၂၅၀၀)ကျပ် ၊ (အသေး) တစ်ပိသာ (၂၃၀၀)ကျပ် ယခင်အပတ်အတိုင်း တည်ငြိမ်ပြီး အရောင်းအဝယ်ဖြစ်လျက်ရှိသည်။ ကြက်သွန်ဖြူ လက်လီ ဈေးမှာ(ဗမာ)အလုံးကြီး တစ်ပိသာ (၈၀၀၀)ကျပ် ကြက်သွန်ဖြူ လက်လီဈေးမှာ (ဗမာ) အလုံးသေး တစ်ပိသာ (၆၅၀၀)ကျပ် ၊ ကြူကုတ် တစ်ပိသာ (၈၀၀၀)ကျပ် ယခင်အပတ်အတိုင်း တည်ငြိမ်လျက် ရှိပါသည်။ ဂျင်း တစ်ပိသာ (၁၂၀၀၀)ကျပ် ဖြစ်နေပြီး ယခင်အပတ်ထက် (၇၀၀၀)ကျပ် မြင့်တက်လျက်ရှိပါသည်။ ငရုတ်သီးခြောက် (၂၀၀၀၀)ကျပ် ယခင်အပတ်အတိုင်း တည်ငြိမ်လျက်ရှိပါသည်။ အာလူး တစ်ပိသာ  (၃၀၀၀)ကျပ် ယခင်အပတ်အတိုင်း တည်ငြိမ်ပြီး အရောင်းအဝယ်ဖြစ်လျက်ရှိပါသည်။

   ငရုတ်သီးစိမ်း တစ်ပိသာ (၄၀၀၀)ကျပ်  ယခင်အပတ်အတိုင်း တည်ငြိမ်လျက်ရှိပါသည်။ ခရမ်းချဉ်သီး တစ်ပိသာ (၁၈၀၀)ကျပ် ဖြစ်နေပြီး ယခင်အပတ်ထက် အနည်းငယ်မြင့် တက်လျက်ရှိ၊ ခရမ်းသီး  တစ်ပိသာ (၂၀၀၀) ကျပ် ယခင်ဈေးအတိုင်း တည်ငြိမ်လျက်ဖြင့် အရောင်းအဝယ်ဖြစ်လျက် ရှိပါသည်။  ပန်းဂေါ်ဖီ တစ်ပွင့်  (၁၈၀၀) ကျပ် ၊ ဂေါ်ဖီထုတ် တစ်ထုတ်လျှင်(၂၅၀၀)ကျပ် ယခင်အထက် (၅၀၀)ကျပ် မြင့်တက်လျှက်ရှိကြောင်း၊ ခါကြက်ဥ(တရုတ်) တစ်ပိသာာလျှင် (၅၀၀၀)ကျပ် ၊ ခါကြက်ဥ (ဗမာ) တစ်ပိသာလျှင် (၃၀၀၀)ကျပ် ယခင်အပတ်အတိုင်း တည်ငြိမ်နေကြောင်း၊ သံပုရာသီး တစ်လုံးလျှင် (၂၀၀) ကျပ် မှ (၃၀၀) ကျပ် ၊ ကန်ဇွန်းရွက် တစ်စည်းလျှင် (၁၀၀) ကျပ် နှုန်းဖြင့် အရောင်းအဝယ် ဖြစ်နေပြီး  ကုန်ဈေးနှုန်းများ အနည်းငယ်မြင့်တက်လာကြောင်း ဈေးသည်တစ်ဦးထံမှ သိရှိရပါသည် ။

    ကြက်ဥ လက်လီဈေးနှုန်းမှာ (အကြီး)တစ်လုံး (၃၀၀)ကျပ်၊ (အသေး)တစ်လုံး (၂၅၀) ကျပ် ၊ ဘဲဥ တစ်လုံး (၃၅၀)ကျပ်ရှိသည် ။  ကန့်ဘလူ၊ ကျွန်းလှမြို့တို့၏ အသား /ငါး ဈေးနှုန်းများမှာ ကြက်သား(cp) (၁၂၀၀၀ )ကျပ် မှ (၁၄၀၀၀) ကျပ် ၊ ကြက်သား(ဗမာ) (၁၈၀၀၀ )ကျပ် မှ (၂၀၀၀၀) ကျပ် ၊ ဝက်သား တစ်ပိသာ (၁၈၀၀၀) ကျပ် မှ (၂၂၀၀၀) ကျပ် ၊ အမဲသာ တစ်ပိသာ (၁၁၀၀၀) ကျပ်မှ (၁၄၀၀၀) ကျပ် ယခင်မေလ နောက်ဆုံးအပတ်အတိုင်း ကြက်သား၊ ဝက်သား၊ အမဲသား ဈေးများမှာ တည်ငြိမ်လျက်ရှိပြီး၊ ငါးကြင်းအကောင်လိုက်နှင့် ငါးကြင်းခုတ်သားဈေးမှာ တစ်ပိသာ (၉၅၀၀) ကျပ် မှ (၁၆၀၀၀) ကျပ်၊ တီလားဗီးယားငါး တစ်ပိသာ (၆၀၀၀) ကျပ် မှ (၈၀၀၀) ကျပ်ဖြင့်  ငါးဈေးများမှာ ယခင်အပတ်ထက် အနည်းငယ်မြင့်တက်လျက်ရှိပြီး အရောင်းအဝယ်နေကြောင်း သိရပါသည်။

     စားသုံးဆီဈေးနှုန်းမှာ မြေပဲဆီသန့် တစ်ပိသာလျှင် (၁၄၀၀၀)ကျပ် မြေပဲဆီဈေးနှုန်းဟာ ယခင်အပတ်များနှင့်အတူ ဈေးတည်ငြိမ်လျက်ရှိပါသည်။ စားအုံးဆီ တစ်ပိသာလျှင် (၆၇၀၀)ကျပ်၊ ဆယ်ပိသာ တစ်ပုံးလျှင် (၆၆၀၀၀)ကျပ်  ယခင်အပတ်ထက် တစ်ပိသာ (၁၀၀၀)ကျပ်မြင့်တက်ကာ အရောင်းအဝယ်ဖြစ်နေကြောင်း ဈေးသည်တစ်ဦးထံမှ သိရသည်။

DOCA(စစ်ကိုင်း)

    မုံရွာမြို့၊ ချင်းတွင်းရတနာစျေး၌  ရောင်းချနေသောပုစွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်ကြောင်း သိရပါသည်။ ပုစွန်၊ ငါးခြောက်စျေးနှုန်းများမှာ ဝင်ရောက်သည့်ဒေသအ‌ပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိပါသည်။

     ယခု ၂၀၂၃ခုနှစ်၊ ဇွန်လ၊ ဒုတိယအပတ်တွင် ရောင်းချနေသောဈေးနှုန်းများမှာ ပုစွန်ခြောက် (၁) ပိဿာလျှင် ကျပ် (၆၅၀၀၀) မှ ကျပ် (၈၅၀၀၀)၊ ငါးရံ့ခြောက် (၁) ပိဿာလျှင် ကျပ် (၅၅၀၀၀ မှ ၈၀၀၀၀)၊ ငါးပုတ်လုံးခြောက် (၁) ပိဿာလျှင် ကျပ် (၁၆၀၀၀ မှ ၁၈၅၀၀)၊  ငါးပုတ်သင် (၁) ပိဿာလျှင် ကျပ် (၁၅၀၀၀ မှ ၁၆၀၀၀)၊ အာဗြဲခြောက် (၁) ပိဿာလျှင် ကျပ် (၂၀၀၀၀ မှ ၂၂၀၀၀)၊ ငါးကျည်းခြောက် (၁) ပိဿာလျှင် ကျပ် (၃၅၀၀၀ မှ ၄၅၀၀၀)၊ ငါးနီတူခြောက် (၁) ပိဿာလျှင် ကျပ် (၁၂၀၀၀ မှ ၁၄၀၀၀)၊ ငါးဖန့်ဝိုင်း (ငါးပိကောင်) (၁) ပိဿာလျှင် ကျပ် (၁၅၀၀၀ မှ ၁၇၅၀၀) ရှိကြောင်း ချင်းတွင်းရတနာဈေးတွင်ရောင်းချနေသော ငါးခြောက်ကုန်သည်များထံမှ သိရပါသည်။

DOCA(စစ်ကိုင်း)