ပြည်တွင်းကုန်သွယ်မှုသတင်း

   မိတ္ထီလာခရိုင်တွင် ကြက်သွန်နီစျေးကောင်းသဖြင့် စိုက်ပျိုးသည့် စရိတ်တတ်နိုင်သည့် တောင်သူများမှာ ဆောင်းကြက်သွန်နီကို အစောပိုင်းစိုက်ပျိုးလာကြပါသည်။ အစောပိုင်း စိုက်ပျိုးသောကြက်သွန်နီမှာ ယခု ဖေဖော်ဝါရီလကုန်ပိုင်းတွင် ထွက်ရှိလာပါသည်။ ယခင်ပုံမှန်စိုက်ရာသီအနေနှင့် မန္တလေးတိုင်းဒေသကြီးအတွင်း မြစ်သားကြက်သွန်နီမှာ မတ်လအတွင်း ရိတ်သိမ်းလေ့ရှိရာ ၎င်းကာလမှာ မိုးကြက်သွန်နီကုန်ချိန်ဖြစ်၍ ဆောင်းကြက်သွန်နီမထွက်ရှိသေးဘဲ အရည်အသွေးမှာလည်း ကောင်းမွန်ခြင်းကြောင့် စျေးကောင်းရရှိကြပါသည်။ မိတ္ထီလာခရိုင်အနေနှင့် ဆောင်းကြက်သွန်နီမှာ ဧပြီလတွင် ပုံမှန်ထွက်ရှိပြီးဖြစ်၍ ထွက်ရှိဒေသစုံမှ ကုန်ဝင်များခြင်းကြောင့် စျေးကွက်တွင် စျေးကောင်းမရဘဲ တောင်သူအကျိုးအမြတ်နည်းလေ့ရှိပါသည်။

      ယခုအခါ တောင်သူများအနေနှင့် သတင်းအချက်အလက်နည်းပညာများရရှိလာရာ ကြက်သွန်နီစိုက်တောင်သူအချို့မှာ အပင်၊ ဥအားဆေးများ သုံး၍စိုက်ပျိုးလာကြပါသည်။ ယခင်က မိရိုးဖလာနည်းနှင့် စိုက်လျှင်တစ်ဧက (၃၅၀၀) ပိဿာဝန်းကျင်သာထွက်ရှိခဲ့သော်လည်း ယခုအခါ တစ်ဧက နှစ်ဆထိ တိုးမြှင့်ထွက်ရှိလာပါသည်။ ထိုသို့ အထွက်နှုန်းမြှင့်လာခြင်းမှာ ကြက်သွန်နီမှာ ယခင်ထက် သုံးလေးဆထိ ကြီးထွားလာခြင်းကြောင့်ဖြစ်ကြောင်း သိရှိရပါသည်။

DOCA(မန္တလေး)

     မကွေးတိုင်းဒေသကြီးသည် “မြန်မာနိုင်ငံ၏ ဆီအိုးကြီး”ဟု တင်စားရလောက်အောင် ဆီထွက်သီးနှံများဖြစ်သော နှမ်းနှင့်မြေပဲတို့အား အဓိကထားစိုက်ပျိုးကြသော်လည်း စပါးကို မကွေးမြို့နယ်အနေဖြင့် (၂၃၂၅)ဧကသာ စိုက်ပျိုးသဖြင့် စားနပ်ရိက္ခာအတွက် ဆန်ဖူလုံမှုမရှိ၍ စပါးအဓိကစိုက်ပျိုးထွက်ရှိရာ အခြားတိုင်း/ပြည်နယ်များမှ တင်သွင်းရကြောင်း သိရှိရပါသည်။

    ၂၀၂၃ခုနှစ်၊ ဖေဖော်ဝါရီလအတွင်း စပါးအဓိကစိုက်ပျိုးထွက်ရှိသည့် ဧရာဝတီတိုင်းမှ ဆန် (၂၈၃၇၃)အိတ်၊ မန္တလေးတိုင်းမှ (၂၂၈၀)အိတ်၊ ရန်ကုန်တိုင်းမှ (၂၅၅၅)အိတ်၊ စစ်ကိုင်းတိုင်းမှ (၂၂၅၇)အိတ်၊ ရခိုင်ပြည်နယ်မှ (၆၀၀)အိတ်၊ ပဲခူးတိုင်းမှ (၃၃၀)အိတ်၊ စုစုပေါင်း(၃၆၃၉၅)အိတ်/(၁၈၁၉.၇၅)တန်စီးဝင်ခဲ့ကြောင်းနှင့် ဒေသတွင်းအရောင်းအဝယ်ဖြစ်နေသော ဆန်စျေးနှုန်းများမှာ ဧရာပဒေသာ(ပွင့်ဖြူ)(အဟောင်း) (၂၄)ပြည်ပါတစ်အိတ်လျှင် ကျပ်(၇၃၀၀၀-၇၅၀၀၀)၊ အသစ်တစ်အိတ်လျှင် ကျပ်(၇၀၀၀၀-၇၃၀၀၀)၊ ဧရာပဒေသာ(မြောင်းမြ)(၂၄)ပြည်ပါတစ်အိတ်လျှင် ကျပ်(၆၀၀၀၀-၆၅၀၀၀)၊ ပေါ်ဆန်းမွှေး(ရွှေဘို)(၂၄)ပြည်ပါတစ်အိတ်လျှင် ကျပ်(၈၂၀၀၀-၈၅၀၀၀)၊ ပေါ်ဆန်းမွှေး(မြောင်းမြ)(၂၄)ပြည်ပါတစ်အိတ်လျှင် ကျပ်(၇၀၀၀၀-၇၅၀၀၀)၊ မနောသုခ(မြောင်းမြ)(၂၄)ပြည်ပါတစ်အိတ်လျှင် ကျပ်(၅၅၀၀၀-၅၈၀၀၀)နှင့် ဖန်သီး(၂၄)ပြည်ပါတစ်အိတ်လျှင် ကျပ်(၆၀၀၀၀-၆၃၀၀၀)တို့ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(မကွေး)

    မန္တလေးတိုင်းဒေသကြီး ၊ ကျောက်ဆည်ခရိုင်အတွင်းရှိ တောင်သူများအနေဖြင့် စပါးကိုအဓိက ထားစိုက်ပျိုးကြသော်လည်း စားဖိုဆောင်သီးနှံတစ်မျိုးဖြစ်သော နနွင်းသီးနှံကို ယာမြေများတွင် အများဆုံး စိုက်ပျိုးကြပါသည် ။ ကျောက်ဆည်ခရိုင်တွင် ၂၀၂၁ - ၂၀၂၂ ဘဏ္ဍာနှစ်တွင် နနွင်းစိုက် ဧက(၂၅၁၈)ဧက စိုက်ပျိုးနိုင်ခဲ့ပြီး ၂၀၂၂-၂၀၂၃ခုနှစ်တွင်(၂၃၅၈)ဧက စိုက်ပျိုးခဲ့ကြောင်း၊ ကျောက်ဆည်မြို့နယ်တွင်(၅၀၆)ဧက၊ စဉ့်ကိုင်မြို့နယ်တွင်(၂၆)ဧက ၊ မြစ်သားမြို့နယ်တွင် (၁၂၄၉)ဧက၊ စုစုပေါင်း (၁၇၁၈)ဧကရိတ်သိမ်းနိုင်ခဲ့ကြောင်းကို သက်ဆိုင်ရာဌာန၏ စာရင်းများအရ သိရှိရပါသည်။ယခင်နှစ်ထက် သွင်းအားစုများ၏ စျေးနှုန်းမြှင့်တက်လာမှုကြောင့် နနွင်းစိုက် ဧကများလျော့နည်းလာကြောင်း သိရှိရပါသည်။ နနွင်းသီးနှံသည် ဧပြီ ၊ မေလများတွင် စတင်စိုက်ပျိုး ကြ၍ သဲနုန်းမြေကိုပိုမိုနှစ်သက်ပြီး အခြားသီးနှံများကဲ့သို့ မြေပြင်ပြီး ဘောင်ဖြင့်စိုက်ပျိုးရကြောင်း ၊ စိုက်ပျိုးပြီး(၄)လအကြာတွင် အဖူးအပွင့်များ စတင်ဖူးပွင့်ကြောင်း ၊ နနွင်းဖူးများကို စျေးကွက်တွင် ရောင်းချပါက မိသားစုအပိုဝင်ငွေများ ရရှိသည့်အပြင် နှမ်းသီးနှံနှင့် ပဲတီစိမ်းသီးနှံများကိုလည်း သီးညှပ်အဖြစ် စိုက်ပျိုးကြကြောင်း ၊ နနွင်းကို ဇန်နဝါရီနှင့် ဖေဖော်ဝါရီလများတွင် စတင်တူးဖော်ပြီး (၁)ဧက ကုန်ကျစရိတ်အနေဖြင့် (၁၆၀၀၀၀၀/-)ကျပ်ခန့် ကုန်ကျကြောင်း ၊ စိုက်ပျိုးရာတွင် မျိုးအနေဖြင့် နနွင်းဂေါင်း သို့မဟုတ် နနွင်းတက် များကိုသာ စိုက်ပျိုးကြကြောင်း ၊ နနွင်းဂေါင်းဖြင့် စိုက်ပျိုးလျှင် (၁)ဧက(၁၀၀)တင်း ကုန်ကျပြီး၊နနွင်းတက်ဖြင့် စိုက်ပျိုးလျှင် (၁)ဧကလျှင် (၅၀)တင်းကုန်ကျကြောင်း၊ နနွင်းမျိုးစျေးနှုန်းအနေဖြင့် နနွင်းဂေါင်း (၁)တင်းလျှင်(၄၅၀၀/-)ကျပ် ၊ နနွင်းတက် (၁)တင်းလျှင် (၇၂၀၀/-)ကျပ်ပေးရကြောင်း ၊ အထွက်နှုန်းအနေဖြင့် (၁)ဧကလျှင် နနွင်းတက်အစို လှည်း(၁၂) စီးခန့်ထွက်ရှိကြောင်း ၊ ၄င်းနနွင်းတက်အစို လှည်း(၁၂)စီးအား ပြုတ်ပြီးအခြောက်လှန်းပါက နနွင်းတက် (၇၀၀-၈၀၀)ပိဿာခန့် ထွက်ရှိကြောင်း သိရှိရပါသည် ။ စျေးနှုန်းအနေဖြင့် နနွင်းတက် အစိုလှည်း(၁)စီးလျှင် ယခင်နှစ်တွင်(၁၅၀၀၀၀/-)ကျပ် ၊ ယခုနှစ်တွင်(၂၂၀၀၀၀/-)ကျပ် ၊ နနွင်းတက် အခြောက်(၁)ပိဿာလျှင် ယခင်နှစ်တွင်(၂၅၀၀/-)ကျပ်၊ယခုနှစ်တွင်(၃၆၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေပြီး နနွင်းတက်(၁)ပိဿာကြိတ်လျှင် နနွင်းမှုန့်(၁)ပိဿာရရှိပြီး ကြိတ်ခအနေဖြင့် (၁၀၀၀)ကျပ်ပေးရကြောင်း ၊ နနွင်းမှုန့်(၁)ပိဿာစျေးနှုန်းမှာ (၈၀၀၀/-)ကျပ်စျေးရှိကြောင်း ၊ တောင်သူများအနေဖြင့် ယခင်နှစ်ထက် စျေးနှုန်းပိုမိုရရှိခဲ့ပြီး (၁)ဧက အကျိုးအမြတ်အနေဖြင့် (၁၀၀၀၀၀၀/-)ကျပ်ခန့်ရရှိကြောင်း တောင်သူတစ်ဦး၏ပြောပြချက်အရ သိရှိရပါသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ နှင့်အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံ လက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

    ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၃ ခုနှစ်၊ မတ်လ ၁၃ ရက်နေ့ မှ မတ်လ ၁၉ ရက်နေ့အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄၆၃၅ ကျပ် ဖြစ်ကြောင်း ထုတ်ပြန်ကြေညာထားပါသည်။

   ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

   အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

    ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင် (၁၄)ဆိုင်ဖွင့်လှစ်ရောင်းချလျက်ရှိရာ စက်သုံးဆီဈေးနှုန်းများသည် ယခင်အပတ်များထက် မြင့်တက်လျက်ရှိပါကြောင်း တွေ့ရပါသည်။ စက်သုံးဆီလက်လီဈေးနှုန်းများမှာ ၂၀၂၃ခုနှစ်၊ မတ်လပထမပတ်အတွင်း ဒီဇယ်(ရိုးရိုး)တစ်လီတာလျှင် (၂၂၇၅) ကျပ်၊ ဒီဇယ်(ပရီမီယမ်)တစ်လီတာလျှင် (၂၃၅၅) ကျပ်၊ ဓာတ်ဆီ(92)တစ်လီတာလျှင် (၂၁၉၀) ကျပ်၊ဓာတ်ဆီ(95) တစ်လီတာလျှင် (၂၂၆၅) ကျပ်တို့ဖြင့် ရောင်းချခဲ့ပါကြောင်း၊ ယခုမတ်လ ဒုတိယပတ်အတွင်း ဒီဇယ်(ရိုးရိုး)တစ်လီတာလျှင် (၂၃၅၀) ကျပ်၊ ဒီဇယ်(ပရီမီယမ်)တစ်လီတာလျှင် (၂၄၃၀) ကျပ်၊ ဓာတ်ဆီ(92)တစ်လီတာလျှင် (၂၃၀၀) ကျပ်၊ဓာတ်ဆီ(95) တစ်လီတာလျှင် (၂၃၇၅) ကျပ်တို့ဖြင့် ရောင်းချလျက်ရှိပါကြောင်း၊ ယခုမတ်ဒုတိယပတ်နှင့် ယခင်မတ်လပထမပတ်အတွင်း ဖြစ်ပေါ်နေသောစက်သုံးဆီဈေးနှုန်းများအား နှိုင်းယှဉ်ကြည့်လျှင် ဒီဇယ်(ရိုးရိုး)တစ်လီတာလျှင် (၂၅) ကျပ်၊ ဒီဇယ် (ပရီမီယမ်)တစ်လီတာလျှင် (၇၅) ကျပ်၊ ဓာါတ်ဆီ(92)တစ်လီတာလျှင် (၁၁၀) ကျပ်နှင့် ဓာတ်ဆီ(95)တစ်လီတာလျှင် (၁၁၀) ကျပ်အထိ ဈေးနှုန်းများမြင့်တက်လျက်ရှိပါကြောင်း သတင်းရရှိပါသည်။

DOCA(ကယား)