ပြည်တွင်းကုန်သွယ်မှုသတင်း

          ရှမ်းပြည်နယ်(တောင်ပိုင်း)ဈေးကွက်တွင်  ဈေးကွက်ဝင်သီးနှံဖြစ်တဲ့ ငွေနှင်းမှိုစိုက်ပျိုး ထွက်ရှိမှုနှင့် ဈေးကွက်အခြေအနေများကို  ကွင်းဆင်းလေ့လာခဲ့ပါတယ်။ ဟိုပုံးမြို့နယ်ရှိ ငွေနှင်းမှို အထုပ်ရေ (၅၀၀)ခန့်စိုက်ပျိုးထုတ်လုပ်သူနှင့်တွေ့ဆုံ၍  စိုက်ပျိုးထုတ်လုပ်မှုအခြေအနေများ မေးမြန်း ဆွေးနွေးခဲ့ပါတယ်၊ ငွေနှင်းမှိုစိုက်ပျိုးနည်းမှာ မှိုထုပ်များကို အစီအရီထား၍စိုက်ပျိုးပြီး အချို့မှာ စင်များဖြင့် စိုက်ပျိုးကြတယ်လို့လဲသိရပါတယ်၊ မှိုမျိုးထုပ်မှာ တစ်ထုပ်လျှင်(၅၀ဝိ/- ၆၀ဝိ/-)ခန့် ဈေးရှိ ပါတယ်၊ မှိုမျိုးထုပ်များကို နေ့စဉ်ရေဖျန်းပေးရပါတယ်၊ တစ်ရက်လျှင် ရေ(၄)ကြိမ်ခန့် (ရာသီဥတု အေးလျှင်) ရေဖျန်းပေးရပြီး ရာသီဥတုပူလျှင် တစ်ရက်ကို(၇)ကြိမ်ခန့် ရေဖျန်းပေးရပါတယ်၊ စိုက်ပျိုးပြီး (၁၅)ရက်ခန့်တွင် စင်ခူးဆွတ်နိုင်ပြီး (၂၃/၂၄)ရက်နေ့ထိ ခူးဆွတ်နိုင်ပါတယ်၊ (၁၅)ရက်နှင့် ရက်(၂၀) ကြားတွင် ခူးပါက မျိုးထုပ်(၅၀၀)ကို မှိုပိဿာ(၂၂)ပိဿာခန့်ထွက်တယ်လို့သိရပါတယ်၊ ခူးဆွတ်ပြီး မှိုထုပ်များကိုလည်း ရေမဝင်အောင် ဂရုစိုက်ရပါတယ်၊ ရေဝင်၍မရပါ၊ မျိုးထုပ်(၅၀၀)စိုက်လျှင် မျိုးထုပ် တစ်ထုပ်နှင့် တစ်ထုပ်မှာမတူ၍ အထုပ်(၅၀၀)လုံးမှိုမထွက် ဟုလည်းသိရှိရပါတယ်၊ ရာသီဥတုပူလျှင်လည်း မှိုလေးများခြောက်သွားသဖြင့် အေးအောင်ထားပေးရပါတယ်၊ မှိုစိုက်ပျိုးရန်လိုအပ်သည့် အပူချိန် မှာ (25 HC) ရှိရန်လိုအပ်သည်ဟုသိရှိရပါတယ်၊ မှိုကို သတ်သတ်လွတ်စားသုံးသူများ အများဆုံးစားသုံး ကြပါတယ်၊ မှိုကို မှန်မှန်စားသုံးခြင်းဖြင့် ကင်ဆာရောဂါ အခွင့်အလမ်းမဖြစ်ပေါ်နိုင်ကြောင်းနှင့် ငွေနှင်းမှို အခြောက်တွင် အသားဓါတ်(၄၇.၉၃%) ပါဝင်ကြောင်းလည်း လေ့လာသိရှိရပါတယ်၊ Organic သီးနှံဖြစ်သောကြောင့် ပြည်ပသို့တင်ပို့နိုင်ခြင်းမရှိသေးသော်လည်း ပြည်တွင်းစားသုံးမှုမြှင့်တက်လာတဲ့ဈေးကွက် ဝင်သီးနှံတစ်မျိုးဖြစ်ပါတယ်၊ ငွေနှင်းမှိုတစ်ပိဿာဈေးနှုန်းမှာ လက်ကားဈေးတစ်ပိဿာလျှင် (၃၅၀ဝိ/-) ရှိပြီး လက်လီတစ်ပိဿာလျှင် (၅၀၀ဝိ/- ၅၅၀ဝိ/-)ခန့်ဖြင့် အရောင်းအဝယ်ဖြစ်နေကြောင်း သိရှိရပါတယ်။

DOCA(ရှမ်း)

            မွန်ပြည်နယ်သည် မြန်မာနိုင်ငံတွင် တတိယဆားအများဆုံးထုတ်လုပ်သည့် နေရာတစ်ခု ဖြစ်သည်။ ဆားကွင်းဖော်သည့်လုပ်ငန်းများကို သံဖြူဇရပ်မြို့နယ်ရှိ ပင၊ စက်စဲနှင့် ပေါင်မြို့နယ် ထန်းပေါင်ချောင်းတို့တွင် အဓိကလုပ်ကိုင်ကြသည်။ ယခင်က ဆားကြမ်းများကို စစ်တောင်းစက္ကူစက်၌ ကုန်ကြမ်းအဖြစ်အသုံးပြုခဲ့ကြပြီး နာဂစ်မုန်တိုင်းဖြစ်ပွားပြီး နောက်ပိုင်းတွင် စစ်တောင်းစက္ကူစက် လည်ပတ်မှုလည်းရပ်နားသွားခဲ့သဖြင့် ဆားကြမ်းအသုံးပြုမှုနည်းသွားပြီး ဆားကွင်းမှထွက်ရှိသော ဆားများကို စားသုံးသူဈေးကွက်ထဲသို့ရောက်ရှိလာပြီး ဒေသတွင်း စားသုံးမှုအပြင် တနင်္သာရီတိုင်း မြိတ်၊ ထားဝယ်ဘက်သို့ တင်ပို့ရကြောင်း၊ နာဂစ်ဖြစ်ပွားပြီနောက်ပိုင်း မြိတ်၊ ထားဝယ်တို့တွင် ငါးခြောက်များပြုလုပ်ခြင်းနည်းပါးလာပြီး ဖမ်းမိသည့် ငါး၊ ပုဇွန်များကို အအေးခန်းစက်ရုံသို့ ပို့ကြသဖြင့် ယခုအခါ တနင်္သာရီတိုင်းသို့ တင်ပို့မှုနည်းပါးသွားကြောင်း သိရှိရသည်။

           ပြီးခဲ့နှစ် နိုဝင်ဘာလအတွင်း မွန်ပြည်နယ်ကထွက်ရှိသော နေလှမ်းဆားကြမ်းတစ်ပိဿာမှာ (၁၃၀) ကျပ်ဝန်းကျင်ပေါက်ခဲ့တဲ့အတွက် ဆားတောင်သူတွေအနေနဲ့က ဈေးကောင်းရတယ်လို့ ဆိုကြပါသည်။ ၂၀၂၁-၂၀၂၂ ခုနှစ်၊ မွန်ပြည်နယ် နေလှမ်းဆားရာသီတွင် လိုင်စင်တင်ထားသည့် ဆားကွင်းဧကပေါင်း (၄၂၄၁.၉၀) ရှိပြီး ဆားကြမ်း တန်ချိန် (၄၂၅၀၁၀) လျားထားကြောင်း မွန်ပြည်နယ် ဆားလုပ်ငန်းဦးစီးဌာနမှ သိရှိရပါသည်။ သို့သော်လည်း ယခုနှစ် ဒီဇင်ဘာလပိုင်းကစလို့ ဆားကွင်းအတွင်း နေလှမ်းဆားအသစ်များကို ကျုံယူနေပြီဖြစ်လို့ မကြာမီ ဈေးကွက်ထဲကို ဆားအသစ်တွေရောက်ရှိလာပါတော့မည်။ ဈေးကွက်ထဲ ဆားအသစ်တွေရောက် လာတော့မည်ဆိုလျှင် ဆားကြမ်းဈေးနှုန်းက ပြန်ကျလာနိုင်တယ်လို့လဲ ခန့်မှန်းပြောဆိုတာတွေလဲ ကြားသိရပါသည်။

          ၁၉၇၀ ခုနှစ်ခန့်တွင် စစ်တောင်းစက္ကူစက်အတွက် ပေါင်၊ ပငနှင့် စက်စဲတို့တွင် ဆားကွင်းဖော်ခြင်းလုပ်ငန်းများ လုပ်ဆောင်ခဲ့ကြောင်း၊ သို့ရာတွင် ၂၀၀၈ ခုနှစ် နာဂစ်ဖြစ်ပြီးနောက်ပိုင်းတွင် စစ်တောင်းစက္ကူစက်ရပ်နားသွားသဖြင့် ဆားကြမ်းများကို စက်မှုကုန်ကြမ်းအဖြစ် သုံးစွဲမှုနည်းသွားကြောင်း သံဖြူဇရပ်မြို့နယ်၊ ပင ကျေးရွာမှ ဆားတောင်သူ ဦးနိုင်ဟုက ပြောကြားခဲ့ပါသည်။ ၎င်းကဆက်လက်၍ အဆိုပါ စက္ကူစက်အတွက် ဆားကြမ်းတန်ချိန် (၁၈၀၀) ခန့်ပို့ပေးရကြောင်း၊ ထို့ပြင် တနင်္သာရီဘက်က မြိတ်နှင့် ထားဝယ်တို့တွင် ရေခူဖမ်းခြင်း၊ ငါးခြောက်လုပ်ခြင်း၊ ငါးပိလုပ်ခြင်း၊ ကင်းမွန်ထည့်ခြင်းတို့အတွက် မွန်ပြည်နယ်မှ ဆားများကို တစ်နှစ်လျှင် ပိဿာချိန် ရာဂဏန်းနီးပါး ပို့ဆောင်ပေးရကြောင်း၊ သို့ရာတွင် နာဂစ်ဖြစ်ပွားပြီးနောက်ပိုင်း မြိတ်၊ ထားဝယ်ဘက်တွင် ငါးခြောက်လှန်းခြင်းနည်းသွားပြီး အအေးခန်းစက်ရုံမျာ တည်ဆောက်လာကြကာ ဖမ်းမိသော ငါး၊ ပုဇွန်များကို အအေးခန်းစက်ရုံသို့ ပို့ဆောင်ကြကြောင်း၊ ထို့ကြောင့် နောက်ပိုင်းတွင် တနင်္သာရီတိုင်းဘက်သို့ ဆားတင်ပို့မှု မရှိသလောက်နည်းသွားကြောင်း၊ စစ်တောင်းစက္ကူစက် ရပ်နားသွားသည့်အပြင် မြိတ်၊ ထားဝယ်ဘက်ပါ တင်ပို့မှုနည်းသွားသဖြင့် ဆားကွင်းမှာ ထွက်သမျှ ဆားများသည် ပြည်နယ်အတွင်း စားသုံးသူဈေးကွက်ကိုသာ ဦးတည်နေရကြောင်း ဦးနိုင်ဟုက ပြောကြားခဲ့ပါသည်။

       လွန်ခဲ့သည့် ဆားရာသီ (၂၀၂၀ နိုဝင်ဘာလ မှ ၂၀၂၁ ဧပြီလကုန်ထိ) တွင် Covid -19 ကာလ စီးပွားရေးကြပ်တည်းခြင်း၊ ဘဏ်မှ ငွေထုတ်ရာတွင် ခက်ခဲခြင်းတို့ကြောင့် ဆားတောင်သူများ အရှုံးနှင့် ရင်ဆိုင်ခဲ့ရပြီး ဆားကြမ်းဈေး တစ်ပိဿာ (၅၃) ကျပ်ထိ ထိုးကျသွားကြောင်း၊ ထို့ပြင် ရာသီဥတုမှာ လာနီညာရာသီဥတုကြောင့် မိုးအဆက်မပြတ်ရွာသွန်းပြီး ဆားများ အရည်ပျော်ခြင်းကြောင့် ဆားကွင်းမှ ဆားကျုံးရာတွင် တစ်နှစ်လျှင် (၁၄) ကြိမ်ခန့်ကျုံးရသော ဆားကွင်းများသည် (၈) ကြိမ်ခန့်သာ ကျုံးလိုက်ရပြီး ဆားများ ပျက်စီးခဲ့ရကြောင်း၊ ဈေးနှုန်းအနေဖြင့်လည်း (၅၃) ကျပ်မှ (၆၀) ကျပ်ခန့်သာ ရရှိသဖြင့် ဆားတောင်သူများ အရှုံးကြီးရှုံးကြကြောင်း ဆားတောင်သူတစ်ဦးက ပြောကြားခဲ့သည်။

         ဆားဈေးကွက်တည်ငြိမ်ရေးနဲ့ပတ်သက်လို့ ယခင်စက်မှုကုန်ကြမ်းအဖြစ် ထုတ်လုပ်နိုင်ရန် ကြိုးစားခဲ့ကြသော်လည်း စက်ရုံများပိတ်သိမ်းမှု၊ ရပ်ဆိုင်းမှုများကြောင့် ဆားကြမ်းထွက်သော်လည်း ဈေးကောင်းမရသည့် အခြေနေများနှင့်ရင်ဆိုင်ခဲ့ရကြောင်း၊ ထိုကြောင့် လက်ရှိထွက်ရှိနေသည့် ဆားကြမ်းများထက် အရည်အသွေးပိုမိုကောင်းမွန်သည့် ဆားများထုတ်လုပ်ကာ ပြည်တွင်းအပြင် ပြည်ပဈေးကွက်များကိုလဲ ရှာဖွေနိုင်ရန်လိုအပ်ကြောင်းနှင့် သို့မှသာ မွန်ပြည်နယ်ထွက် နေလှမ်း ဆားကြမ်းဈေးကွက် တည်ငြိမ်နိုင်မည်ဖြစ်ကြောင်း ဆား‌တောင်သူတွေရဲ့ပြောကြားချက်အရ သိရှိခဲ့ပါသည်။ ဆားကြမ်းဈေးကွက်တည်ငြိမ်ရေးအတွက် စက်မှုကုန်ကြမ်းအဖြစ်သုံးစွဲရန် ထုတ်လုပ်လိုသော်လည်း အသုံးပြုမယ့် စက်ရုံတွေကမရှိလေတော့ အရည်အသွေးမြှင့် ကုန်ချောအဖြစ်ထုတ်လုပ်ပြီး ဈေးကွက်ရှာဖွေနိုင်ကြမှသာလျှင် ဆားဈေးကွက် အခြေအနေတစ်ခုအထိ တည်ငြိမ်လာမည်ဖြစ်ကြောင်း အကြံပြုရေးသားလိုက်သည်။

DOCA(မွန်)

            အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ မေလ (၂၇)ရက်နေ့မှ ဇွန်လ (၂)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက် ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် ၁ပိဿာလျှင် ကျပ် ၈၀၀ မှ ၁၂၀၀ အတွင်း၊ ဂေါ်ဖီထုပ် တစ်ထုပ်လျှင် ကျပ် ၅၀၀ မှ ၈၀၀ အတွင်း၊ ပန်းဂေါ်ဖီ တစ်ထုပ်လျှင် ကျပ် ၃၀၀ မှ ၉၀၀ အတွင်း၊ အာလူး ၁ပိဿာလျှင် ကျပ် ၁၀၀၀ မှ ၁၇၀၀ အတွင်း၊ မုန်လာဥနီ ၁ပိဿာလျှင် ကျပ် ၁၀၀၀ မှ ၂၀၀၀ အတွင်း၊ ရွှေဖရုံသီး ၁လုံးလျှင် ကျပ် ၁၀၀၀ မှ ၄၀၀၀ အတွင်း၊ ဗူးသီး ၁လုံးလျှင် ကျပ် ၆၀၀ မှ ၁၅၀၀ အတွင်း၊ မုန်ညှင်း(ထုပ်) ၁ပိဿာလျှင် ကျပ် ၈၀၀ မှ ၁၃၀၀ အတွင်း၊ ကြက်သွန်နီ(ဆိပ်ဖြူ)ကျပ် ၅၀၀ မှ ၉၀၀ အတွင်း၊ ကြက်သွန်ဖြူ(ရှမ်း) ၁ပိဿာလျှင် ၁၅၀၀ မှ ၃၆၀၀ အတွင်း၊ ကြက်သွန်ဖြူ(ကြူကုတ်) ၁ပိဿာလျှင် ကျပ် ၃၀၀၀ မှ ၄၅၀၀ အတွင်း၊ ချင်း ၁ပိဿာလျှင် ကျပ် ၈၀၀ မှ ၁၀၀၀ အတွင်း၊ ချဉ်ပေါင်ရွက် ၁စီးလျှင် ကျပ် ၅၀ မှ ၁၀၀ အတွင်း၊ ခရမ်းသီး(ရှည်) ၁ပိဿာလျှင် ကျပ် ၁၀၀၀ မှ ၁၅၀၀ အတွင်း၊ သံပရာသီး ၁လုံးလျှင် ကျပ် ၂၀ မှ ၁၀၀ အတွင်း၊ ငရုတ်သီးစိမ်း (ကျောက်စိမ်း) ၁ပိဿာလျှင် ၁၀၀၀ မှ ၁၄၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၂၅၀၀ မှ ၃၅၀၀ အတွင်း ဖြစ်ကြောင်း သိရှိရပါတယ်။ တညင်းကုန်း လက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၁၉၆၃၀၀)ကျော်၊ ခရမ်းသီး(ရှည်)(ပိဿာ)(၁၅၀၆၆)ကျော်၊ ဗူးသီးအလုံး ပေါင်း (၂၂၈၀)ကျော်၊ ရွှေဖရုံသီးအလုံးပေါင်း (၇၇၆၅)ကျော်၊ ဂေါ်ဖီထုပ်ပေါင်း (၃၇၀၀၀)ကျော်၊ ပန်းဂေါ်ဖီ ထုပ်ပေါင်း (၁၉၈၀၀)ကျော်၊ မုန်ညှင်းထုပ်(ပိဿာ)ပေါင်း (၁၁၇၈၅)ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

           ဆိပ်ဖြူမြို့နယ်သည် မကွေးတိုင်းဒေသကြီး၊ ပခုက္ကူခရိုင်အတွင်းတွင်ရှိပြီး ကြက်သွန်နီ ဆောင်းစိုက်/ပင်စိုက်ကို စိုက်ဧကအများဆုံး စိုက်ပျိုးထုတ်လုပ်ပြီး ရောင်းဝယ်ဖောက်ကားလျက်ရှိပါသည်။ ကြက်သွန်နီစိုက်တောင်သူနှင့် စိုက်ဧကနှစ်စဉ်များပြားသော်လည်း ကြက်သွန်နီ (အနှံယူ မျိုးစေ့) စိုက်ပျိုးတောင်သူနည်းပါးပြီး စိုက်ဧကမှာလည်းနည်းပါးကြောင်း၊ ယခုနှစ် ဆိပ်ဖြူမြို့နယ် ရွာသစ်ကျေးရွာတွင် ကြက်သွန်(အနှံယူ)စိုက်တောင်သူ(၂၅)ဦးခန့်ရှိပြီး၊ (၅)ဧကခန့်စိုက်ပျိုးထားရှိ ကြောင်း၊ ရွှေဖလား(ထိပ်မောက်)အခွံထူ(ဒေသမျိုး)ကိုသာ စိုက်ပျိုးပြီး ကိုင်းကျွန်းမြေမာများတွင် အများဆုံး စိုက်ပျိုးကြောင်း တောင်သူမှတစ်ဆင့် သိရှိရပါသည်။

          ကြက်သွန်နီ(အနှံယူ) (၁)ဧကစိုက်ပျိုးလျှင် ကြက်သွန်နီ(အလတ်စ)ပိဿာ(၃၅၀)ခန့်ဝယ်ယူ စိုက်ပျိုးရကြောင်း၊ (၁)ပိဿာလျှင်(၂၀၀)ကျပ်ခန့်ဝယ်ယူစိုက်ပျိုးခဲ့ရပြီး ယခင်နှစ်စိုက်ပျိုးချိန်တွင် (၁)ပိဿာလျှင် (၈၀၀)ကျပ်ဈေးနှုန်းဖြင့် ဝယ်ယူစိုက်ပျိုးခဲ့ရကြောင်း၊ ကြက်သွန်ဥမျိုးဈေးနှုန်းအပေါ် မူတည်ပြီး ကုန်ကျစရိတ်အနည်းအများ ကွာခြားကြောင်း၊ ဒီဇင်ဘာလတွင်စတင်စိုက်ပျိုးပြီး မတ်လတွင် ပွင့်နှံများကို ဆွတ်ခူးရိတ်သိမ်းကြောင်း၊ ကိုင်းကျွန်းမြေသားအမာများတွင် စိုက်ပျိုးခြင်းဖြစ်ပြီး ရေသွင်းစိုက်ပျိုးရသော သီးနှံတစ်မျိုးဖြစ်ကြောင်း၊ စိုက်ပျိုးချိန်မှစတင်ပြီး ရိတ်သိမ်းချိန်အထိ ရေ(၅) ကြိမ်ခန့်သွင်းရကြောင်း၊ ရေသွင်းအကြိမ်တိုင်း ရေမသွင်းခင်ရှေ့က မှိုဆေး၊ ပိုးသတ်ဆေး၊ အားဆေးများပက်ဖြန်းခြင်း၊ သွင်းအားစုအနေဖြင့် နွားချေးမှုန့်၊ နှမ်းဖတ်၊ ပဲဖတ်အမှုန့်များကို ပက်ဖြန်းခြင်းဖြင့် အပင်ကြီးထွားပြီး အထွက်နှုန်းကောင်းမွန်စေကြောင်း သိရှိရပါသည်။

         စိုက်ပျိုးထွက်ရှိမှုမှာ ကြက်သွန်နီ(အနှံယူမျိုးစေ့) (၁)ဧကလျှင် ကြက်သွန်နီ ပိဿာ(၃၅၀)ခန့် စိုက်ပျိုးကြောင်း၊ (၁)ပိဿာစိုက်ပျိုးလျှင် မျိုးစေ့(၂)ဗူးခန့်ထွက်ရှိကြောင်း၊ (၁)ဧကစိုက်ပျိုးလျှင် ပျမ်းမျှမျိုးစေ့ (၅)တင်းခန့် ထွက်ရှိကြောင်း သိရှိရပါသည်။ ပြန်လည်ရောင်းချဖြန့်ဖြူးရာတွင် ဆိပ်ဖြူမြို့နယ်ဒေသတွင်းရှိ ကြက်သွန်နီချောင်းစိုက်/ပင်စိုက်၊ လယ်ကွက်မြေသား ပင်စိုက်တောင်သူများမှ ကြက်သွန်စိုက်ပျိုးရန်အတွက် မျိုးစေ့များ ဝယ်ယူခြင်းနှင့် စလင်းမြို့နယ်ဒေသတွင်းနှင့် နီးစပ်ရာ မြို့နယ်များရှိ ပွဲစားများမှ လာရောက်ဝယ်ယူကြောင်း၊ ဈေးနှုန်းဈေးကွက်အနေဖြင့် ကြက်သွန်နီရောင်းဈေး အနိမ့်အမြင့်ပေါ်တွင် မူတည်ပြီး မျိုးစေ့ဈေးကွက် ကောင်းမွန်ကြောင်း၊ ယခင်နှစ်များတွင် ကြက်သွန်နီမျိုးစေ့(၁)ပြည်လျှင် (၃၅၀၀၀ မှ ၂၅၀၀၀)ကျပ်အထိ ဈေးနှုန်းများဖြင့် အရောင်းအဝယ်ဖြစ်ခဲ့ပြီး မျိုးစေ့(၁)တင်းလျှင် ကျပ်(၄)သိန်းဝန်းကျင်ခန့် အရောင်းအဝယ်ဖြစ်ခဲ့ကြောင်း၊ (၂၀၂၀-၂၀၂၁) ဘဏ္ဍာနှစ်တွင် ကြက်သွန်နီ မျိုးစေ့ (၁)ပြည်(၁၀၀၀၀)ကျပ်၊ (၁)တင်းလျှင် (၁)သိန်း၆သောင်းကျပ်ဖြင့် အရောင်းအဝယ်ဖြစ်ခဲ့ကြောင်း၊ မျိုးစေ့ဈေးနှုန်းများ ကျဆင်းသွားရခြင်းမှာ ယခင်(၂)နှစ်ခန့်က ကြက်သွန်နီဈေးနှုန်းများ (၂၀၀)ကျပ်ထိ ဈေးနှုန်းကျဆင်းသွားခြင်းကြောင့် အရှုံးပေါ်မှုများ၍ စိုက်ပျိုးတောင်သူနှင့် စိုက်ဧကများလျော့နည်းသွားခြင်း၊ ကြက်သွန်နီမျိုးစေ့များ ဝယ်သူမရှိသလောက်နည်းပါး၍ မျိုးစေ့အရောင်းအဝယ်မဖြစ်ခြင်းကြောင့် ဈေးနှုန်းများကျဆင်းသွားခြင်းဖြစ်ကြောင်း၊ ကြက်သွန်နီအရောင်းအဝယ်ဖြစ်မှု ဈေးနှုန်းအတက်အကျပေါ်  မူတည်ပြီး မျိုးစေ့ဈေးကွက်မှာလည်း အပြောင်းအလဲရှိကြောင်း၊ ယခုနှစ်ကြက်သွန်နီသီးနှံပေါ်ချိန် ဈေးနှုန်းဈေးကွက်ကောင်းပြီး ဈေးနှုန်းများမြင့်တက်လာပါက ကြက်သွန်နီမျိုးစေ့ ဈေးနှုန်းလည်းကောင်းလာမည်ဖြစ်ကြောင်း၊ ကြက်သွန်အနှံယူစိုက်ခင်းများ၏ တစ်ဧကကြက်သွန်ဥ အထွက်နှုန်းမှာ မျိးစေ့ယူစိုက်ခင်းဖြစ်၍ အလေအလွင့်များပြီး ကြက်သွန်ဥတွင် အနှံအူတိုင်များပါ ရှိပြီး ကျစ်လစ်သိပ်သည်းမှုမရှိ၍ အလေးချိန် လျော့နည်းခြင်းကြောင့် ကြက်သွန်နီပိဿာ (၁၀၀၀) ဝန်းကျင်ခန့်သာ ထွက်ရှိကြောင်း၊ အနှံများကိုဆွတ်ခူးပြီး ကျန်ရှိသောကြက်သွန်ဥများကို ပြန်လည်တူးဖော်ရာတွင် ဝင်ငွေနှင့်ကုန်ကျစရိတ်မမျှတမှုကြောင့် တူးဖော်ခြင်းမရှိဘဲ အလုပ်သမားများမှ တူးဖော်ယူပြီး ကြက်သွန်များကို ကြက်သွန်ကြော်လုပ်ငန်း၊ အကြော်ဖိုများသို့ တစ်ပိဿာလျှင် (၂၀၀)ကျပ်ဖြင့် ရောင်းချရကြောင်း သိရှိရပါသည်။   

       ကြက်သွန်နီမျိုးစေ့(အနှံယူ)(၁)ဧကစိုက်ပျိုးလျှင် မျိုးဥဝယ်ယူခ၊ မြေပြုပြင်ခ၊ နွားချေး၊ အာမို၊ မြေဩဇာမျိုးဝယ်ယူခ၊ ရေသွင်းခ၊ အလုပ်သမားငှားရမ်းခ စုစုပေါင်း(၇)သိန်းကျပ်ခန့် ကုန်ကျပြီး ယခုနှစ်တွင် မျိုးစေ့(၁)ပြည်(၂၅၀၀၀)ကျပ်၊ (၁)တင်းလျှင်(၄)သိန်းကျပ်ဖြင့် ရောင်းချရပါက (၁)ဧက ဝင်ငွေမှာ သိန်း(၂၀)ကျပ်ခန့်ရရှိ၍ အကျိုးအမြတ်အနေဖြင့် (၁၃)သိန်းခန့်ရရှိကြောင်း စိုက်တောင်သူ ၏ ပြောကြားချက်အရ သိရှိရပါသည်။ တောင်သူများအနေဖြင့် ကြက်သွန်နီ(အနှံယူ)စိုက်ခင်းများကို တစ်ပိုင်တစ်နိုင်သာ စိုက်ပျိုးကြပြီး ဈေးကွက်စီးပွားဖြစ် ဧကအများအပြားစိုက်ပျိုးမှုနည်းပါးရခြင်းမှာ မျိုးစေ့ပေါ်ချိန်စောသော်လည်း ပြန်လည်ရောင်းချချိန်နောက်ကျ၍ ငွေပေါ်ချိန် နောက်ကျခြင်း ကြောင့် တောင်သူများမှာ စိုက်ပျိုးမှုနည်းပါးကြောင်း၊ ယခုနှစ်တွင် ကြက်သွန်ဈေးကွက်(၁)ပိဿာ လျှင်(၇၀၀)ကျပ်ဝန်းကျင်ခန့် ဈေးနှုန်းရှိ၍ ယခင်နှစ်ထက် ဈေးနှုန်းသိသိသာသာ မြင့်တက်လာ၍ ကြက်သွန်မျိုးစေ့ ဈေးနှုန်းများလည်း မြင့်တက်လာနိုင်မည်ဟု ထင်ရကြောင်း၊ ကြက်သွန်မျိုးစေ့ ဝယ်လိုအားကောင်း၍ ဈေးကွက်ကောင်းလျှင် စိုက်ပျိုးတောင်သူများအနေဖြင့် ယခင်နှစ်များထက် တိုးချဲ့စိုက်ပျိုးလာနိုင်မည်ဖြစ်ကြောင်း  ကုန်သည်လုပ်ငန်းရှင်တစ်ဦး၏ ပြောကြားချက်အရ သိရှိရပါသည်။

DOCA(မကွေး)

              မေ ၃၀ ရက် မုံရွာကုန်စည်ဒိုင်၏ ကုန်စည်ဈေးနှုန်းပေါက်ဈေးများမှာ ဂျုံဖြူ (၁)တင်း ကျပ် ၄၄၀၀၀၊ ဂျုံအထွက်တိုး (၁)တင်းကျပ် ၃၉၀၀၀၊ 929(ကုလားပဲ) (၁)တင်းကျပ် ၄၆၀၀၀၊ ထိုင်ဝမ်(ကုလားပဲ) (၁)တင်း ကျပ် ၄၅၀၀၀၊ V2 (ကုလားဖြူလုံးကြီး) (၁)တင်း ကျပ်၄၉၀၀၀၊ ပဲစဉ်းငုံ (၁)တင်း ကျပ် ၄၂၂၀၀၊ ပဲတီစိမ်းကြီး(သစ်) (၁)တင်း ကျပ် ၄၆၀၀၀၊ ပဲတီစိမ်းသေး(သစ်) (၁)တင်း ကျပ် ၃၉၀၀၀၊ ပဲကြီး (၁)တင်း ကျပ် ၆၄၀၀၀၊ ပဲနီရိုးရိုး (၁)တင်း ကျပ် ၄၄၀၀၀၊ ပဲနီကြား (၁)တင်း ကျပ်၄၆၅၀၀၊ ပဲလွန်းပြာ (၁)တင်း ကျပ်၂၈၀၀၀၊ ပဲလွန်းဖြူ (၁)တင်း ကျပ် ၃၀၀၀၀၊ ပဲပုတ် (၁)တင်း ကျပ်၆၀၀၀၀၊ မတ်ပဲ (၁)တင်း ကျပ် ၄၆၀၀၀၊ ပဲယင်းဝါကြီး (၁)တင်း ကျပ် ၄၂၀၀၀၊ ပုဂံပဲ (၁)တင်း ကျပ်၆၀၀၀၀၊ ထောပတ်ပဲ (၁)တင်း ကျပ် ၄၀၅၀၀၊ မြေထောက်ပဲ (၁)တင်း ကျပ် ၅၄၀၀၀၊ နှမ်းဖြူ (၁)တင်း ကျပ်၅၂၀၀၀၊ နှမ်းနက် (၁)တင်း ကျပ်၆၅၀၀၀၊ နှမ်းညို (၁)တင်း ကျပ် ၅၁၀၀၀၊ နှမ်းနီ (၁)တင်း ကျပ် ၅၁၀၀၀ ၊ ပြောင်းဖူး စီပီ (၁)တင်း ကျပ် ၁၈၀၀၀၊ ပြောင်းနီ (၁)တင်း ကျပ်၁၂၀၀၀ အသီးသီး ဖြစ်ပေါ်နေကြောင်း သိရသည်။

            ဧပြီလ၏ ဈေးနှုန်းနှင့်နှိုင်းယှဉ်ပါက ဂျုံဖြူ (၁)တင်း ကျပ် ၇၀၀၀၊ ဂျုံအထွက်တိုး (၁)တင်းကျပ် ၆၀၀၀၊ ထိုင်ဝမ်(ကုလားပဲ) (၁)တင်း ကျပ် ၄၀၀၀၊ V2 (ကုလားဖြူလုံးကြီး) (၁)တင်း ကျပ်၄၅၀၀၊ 929(ကုလားပဲ) (၁)တင်းကျပ် ၄၅၀၀၊ ပဲစဉ်းငုံ (၁)တင်း ကျပ် ၅၀၀၊ ပဲတီစိမ်းကြီး(သစ်) (၁)တင်း ကျပ် ၁၅၀၀၊ ပဲတီစိမ်းသေး(သစ်) (၁)တင်း ကျပ် ၂၀၀၀၊ ပဲကြီး (၁)တင်း ကျပ် ၂၀၀၀၊ ပဲနီရိုးရိုး (၁)တင်း ကျပ် ၂၀၀၀၊ ပဲနီကြား (၁)တင်း ကျပ်၄၀၀၀ ၊ပဲပုတ် (၁)တင်း ကျပ်၁၀၅၀၀၊ ပုဂံပဲ (၁)တင်း ကျပ်၁၅၀၀၊ ထောပတ်ပဲ (၁)တင်း ကျပ် ၅၀၀၊ မြေထောက်ပဲ (၁)တင်း ကျပ် ၆၀၀၀၊ ပဲယင်းဝါကြီး (၁)တင်း ကျပ် ၂၀၀၀ ခန့် ဈေးများတက်နေပြီး ပဲလွန်းပြာ ၊ပဲလွန်းဖြူ ၊မတ်ပဲ ၊ပြောင်းနီ ပဲများ ဈေးငြိမ်နေ၍ နှမ်းဖြူ (၁)တင်း ကျပ်၈၀၀၀၊ နှမ်းနက် (၁)တင်း ကျပ်၅၀၀၀၊ နှမ်းညို (၁)တင်း ကျပ် ၁၀၀၀၊ နှမ်းနီ (၁)တင်း ကျပ် ၁၀၀၀ ၊ ပြောင်းဖူး စီပီ (၁)တင်း ကျပ် ၁၂၀၀ခန့်ကျဆင်းနေကြောင်း သိရသည်။

DOCA(စစ်ကိုင်း)