ပြည်တွင်းကုန်သွယ်မှုသတင်း

     ဖေဖော်ဝါရီလ တတိယပတ်တွင် မင်းဘူးမြို့၊ မြို့မဈေးအတွင်း ရောင်းချလျက်ရှိသောကြက်သွန်နီ(သစ်)ဈေးနှုန်းမှာ (၁)ပိဿာလျှင် ကျပ်(၁၃၀၀)ဖြစ်ပြီး စတုတ္ထပတ်တွင် ကျပ်(၁၂၀၀)ဖြစ်၍ ဈေးနှုန်းအနည်းငယ်ကျလာပါကြောင်း၊ ကြက်သွန်နီများကို မဲဇလီ(ပွင့်ဖြူ)၊ စလင်း၊ ဆင်ဖြူကျွန်းမြို့၊ ပင်းချောင်း (ရေနံချောင်း) မြို့နယ်များမှ ဝယ်ယူရောင်းချလျက်ရှိပါကြောင်းနှင့် စားဖိုဆောင်သီးနှံများအနေဖြင့် ကြက်သွန်ဖြူ(ကြူကုတ်) ၁ ပိဿာလျှင် ကျပ်(၄၂၀၀)၊ ကြက်သွန်ဖြူ (ဗမာ) (၁)ပိဿာလျှင် ကျပ် (၆၀၀၀)၊ အာလူး(၁)ပိဿာလျှင် ကျပ် (၂၃၀၀ မှ ၂၄၀၀)၊ ငရုတ်ခြောက်ရှည်(၁)ပိဿာလျှင် ကျပ် (၁၃၀၀၀)၊ မန်ကျည်းသီးမှည့်(၁)ပိဿာလျှင် ကျပ်(၄၂၀၀)၊ ဆားကြမ်း(၁)ပိဿာလျှင် ကျပ် (၅၀၀)၊ ကြက်ဥ(၁)လုံးလျှင် ကျပ်(၂၅၀)ဖြစ်ပြီး ဈေးနှုန်းအနည်းငယ်တက်နေကြောင်း ဈေးသည်တစ်ဦးထံမှ သိရပါသည်။

     စားသုံးဆီများအနေဖြင့် နှမ်းဆီ(၁)ပိဿာလျှင် ကျပ်(၁၁၅၀၀)၊ ပဲဆီ(၁)ပိဿာလျှင် ကျပ်(၁၁၅၀၀) စားအုန်းဆီ(၁)ပိဿာလျှင် ကျပ်(၇၀၀၀) ဖြစ်၍ စားသုံးဆီဈေးနှုန်းများမှာ ဈေးနှုန်းအနည်းငယ်မြင့်တက်လာကြောင်း သတင်းရရှိပါသည်။

DOCA(မကွေး)

  စစ်ကိုင်းတိုင်းဒေသကြီး၊ မုံရွာမြို့နယ်တွင် ကွမ်းကို မိမိတို့အိမ်ခြံဝင်းအတွင်း တစ်နိုင်တစ်ပိုင်အနေဖြင့်လည်းကောင်း၊ အပိုဝင်ငွေရရှိရန်အတွက်လည်းကောင်း စိုက်ပျိုးကြကြောင်းနှင့် ကွမ်းကို ဆောင်းစိုက်နှင့် မိုးစိုက်ဟူ၍ နှစ်မျိုးခွဲစိုက်ပျိုးကြပြီး မိုးစိုက်သည် ပိုးကျလွယ်သည့်အတွက် အစိုက်နည်းပြီး ဆောင်းစိုက်ကိုသာ ပိုမိုစိုက်ပျိုးကြကြောင်း သိရသည်။

  ကွမ်းပင်များကို  ဝါဆိုလ(ဇွန်လ)တွင် စိုက်ပျိုးကြပြီး ကွမ်းပျိုးပင် တစ်ပင်လျှင် ကျပ်(၄၀၀-၅၀၀)ပေးဝယ်ရပြီး တစ်ဧကလျှင် ကွမ်းပင် (၃၀၀၀)ခန့် စိုက်ပျိုးရကြောင်း၊ စိုက်ပျိုးပြီး လေးလခန့်အရွယ်တွင် ခူးဆွတ်နိုင်ပြီး အစမ်းခူးသည့် အချိန်တွင် ပိဿာ(၄၅-၅၀)ထွက်ရှိကာ တစ်နှစ်ကျော်လျှင် အထွက်နှုန်းတိုးလာပြီး ပိဿာ(၂၀၀-၂၅၀)အထိထွက်ရကြောင်း၊ မြေပြုပြင်ခြင်း၊ မျိုး၊ စိုက်ပျိုးခြင်း၊ သွင်းအားစုနှင့် လုပ်သားခများအပါအဝင် ကွမ်းအပင်ရေ ၁၀၀၀ ခန့် စိုက်ပျိုးထုတ်လုပ်မှု ကုန်ကျ စရိတ်မှာ ကျပ် ၁၅ သိန်းခန့် ကုန်ကျပြီး မြေဆီမြေသားကောင်းမွန်မှုနှင့် ဂရုစိုက်မှုပေါ်မူတည်၍ ကွမ်းသက်တမ်း ( သုံးနှစ်မှ ခုနှစ်နှစ်အထိ )ကြာမြင့်သောကြောင့် အကျိုးအမြတ်အနေဖြင့် ငွေကျပ် သိန်း ၃၀ နှင့်အထက်ရရှိကြောင်း သိရှိရပါသည်။

  မုံရွာမြို့နယ် ကွမ်းဈေးကွက်အနေဖြင့် ဇန်နဝါရီ စတုတ္ထအပတ်တွင် ကွမ်းတစ်ပိဿာလျှင် ကျပ်(၁၀၀၀၀-၁၁၀၀၀) ဈေးရရှိပြီး ယခု ဖေဖော်ဝါရီ စတုတ္ထအပတ်တွင် အရည်အသွေးအပေါ် မူတည်ပြီး တစ်ပိဿာလျှင် ကျပ်(၂၅၀၀-၅၀၀၀)ဖြင့်သာ ရောင်းချရမှုမှာ ဆောင်းအကုန်နွေအကူးတွင် အထွက်နှုန်းပိုမိုများလာခြင်း၊ ဈေးကွက်အတွင်း ကုန်ဝင်ရောက်မှုများပြားခြင်းကြောင့် ဈေးနှုန်း သိသိသာသာကျဆင်းခြင်းဖြစ်ကြောင်း ကွမ်းစိုက်တောင်သူများ တောင်သူများထံမှ စုံစမ်းသိရှိရပါသည်။

DOCA(စစ်ကိုင်း)                                                                      

     စီးပွား‌‌ရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများအပြင် အခြေခံစားကုန်ဈေးနှုန်းများကို အပတ်စဉ် မေးမြန်း တင်ပြလျက်ရှိရာ ရွှေဘိုမြို့တွင် စားသုံးဆီဈေးနှုန်းများ အနည်းငယ်မြင့်တက် လျက်ရှိကြောင်း စားသုံးဆီအရောင်းဆိုင်များမှ သိရှိရပါသည်။

       ရွှေဘိုမြို့ပေါ်တွင် စားသုံးဆီ လက်လီ/လက်ကား ရောင်းချသောဆိုင် (၁၂)ဆိုင်ရှိပြီး ဖေဖော်ဝါရီလ တတိယပတ်တွင် စားအုန်းဆီ တစ်ပိဿာ (၆၈၀၀)ကျပ်၊ ပဲဆီသန့် တစ်ပိဿာ (၁၃၀၀၀)ကျပ်၊ နှမ်းဆီသန့်တစ်ပိဿာ (၁၃၀၀၀)ကျပ်ဖြင့် အရောင်းအဝယ် ဖြစ်ခဲ့ပြီး၊ ယခု ဖေဖော်ဝါရီလ စတုတ္ထပတ်တွင် စားအုန်းဆီ တစ်ပိဿာ (၇၄၅၀)ကျပ်၊ ပဲဆီသန့် တစ်ပိဿာ (၁၃၅၀၀)ကျပ်၊ နှမ်းဆီသန့်တစ်ပိဿာ (၁၃၀၀၀)ကျပ်ဖြင့် အရောင်းအဝယ်ဖြစ်နေသဖြင့် ယခင်ပတ်နှင့် ယခုပတ် စားသုံးဆီ တစ်ပိဿာဈေးနှုန်း နှိုင်းယှဉ်ကြည့်ပါက စားအုန်းဆီ တစ်ပိဿာလျှင် (၆၅၀)ကျပ်၊ ပဲဆီသန့် တစ်ပိဿာလျှင် (၅၀၀)ကျပ်ဖြင့် အသီးသီး ဈေးနှုန်း အနည်းငယ် မြင့်တက်လျက်ရှိပြီး နှမ်းဆီသန့်ဈေးနှုန်းမှာ ယခင်ပတ်နည်းတူ ဈေးနှုန်း တည်ငြိမ်လျက်ရှိကြောင်း  စားသုံးဆီလက်ကားဆိုင်များမှ သတင်းရရှိသည်။

DOCA(စစ်ကိုင်း)

           စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်ချက်ဖြင့် စစ်ဆေးရေးအရာရှိ ဦးဆောင်သော ဈေးကွက်စောင့်ကြည့်စစ်ဆေးရေးအဖွဲ့သည် ၂၀၂၃ ခုနှစ် ဖေဖော်ဝါရီလ ( ၂၁ ) ရက်နေ့ ၊ နံနက် (၁၀း၀၀) အချိန်တွင် မိတ္ထီလာမြို့ပေါ်ရှိ ဆေးဆိုင်များတွင်ရောင်းချနေသော ဆေးဝါးများကိုစျေးနှုန်းမြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း၊ စျေးကစားရန်ရည်ရွယ်၍ သိုလှောင်ခြင်းမပြုရန်ကိုလည်းကောင်း၊ စားသုံးသူကာကွယ်ရေးဥပဒေအရ တရားမဝင်ဆေးဝါးများ၊ အတုအပနှင့်အရည်အသွေးနိမ့်ဆေးဝါးများရောင်းချခြင်းမပြုရန်ကိုလည်းကောင်း၊ ဆေးပစ္စည်းများနှင့်အထောက်အကူပြုပစ္စည်းများပြတ်လပ်မှုမရှိစေရေး၊ သတ်မှတ်အရည်အသွေးနှင့်စျေးနှုန်းမှန်ကန်မှုရှိစေ‌ရေးတို့အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          ထိုသို့စစ်ဆေးရာတွင် ဆေးဆိုင်များတွင် ဆေးဝါးပြတ်လပ်မှုမရှိခြင်း၊ ဆေးစျေးနှုန်းမှာ အခြားကုန်စည်များနည်းတူ အတိုင်းအတာတစ်ခုထိမြင့်တက်လာသော်လည်း စျေးကစားရန်ရည်ရွယ်ချက်ဖြင့် သိုလှောင်ခြင်း၊ တရားမဝင်ဆေးဝါးများ ရောင်းချမှုမရှိကြောင်းတွေ့ရှိရ၍ အရောင်းဆိုင်လုပ်ငန်းရှင်များအား ကုန်စည်များကိုစျေးကွက်အတွင်း စျေးနှုန့်မြှင့်တင်ရောင်းချခြင်း၊ ဖြန့်ဖြူးခြင်း (သို့မဟုတ်) စျေးကစားရန်ရည်ရွယ်ချက်ဖြင့်  သိုလှောင်ခြင်းများ ဆောင်ရွက်နေသည်ကို စိစစ်တွေ့ရှိပါက စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာ အမှတ် ၂၁/၂၀၂၀ အရဆေးဝါးများကိုအ‌ရေးကြီးကုန်စည်အဖြစ်သတ်မှတ်လိုက်သဖြင့် အ‌ရေးကြီးကုန်စည်နှင့်ဝန်ဆောင် မှုဥပဒေ ပုဒ်မ ၅ အရအ‌ရေးယူခြင်းခံရမည်ဖြစ်ကြောင်း ရှင်းလင်းပြောကြားခဲ့ပါသည်။

DOCA(မန္တလေး)

    တနင်္သာရီတိုင်းဒေသကြီးသည် ရော်ဘာနှင့်  သီဟိုဠ်များကို အဓိကထား စိုက်ပျိုးလျက်ရှိရာ  ရော်ဘာစိုက်ပျိုးသည့်ဧရိယာမှာ (၃၅၁၇၇၇)ဧက၊ အစေးလှီး ဧရိယာမှာ (၂၀၂၇၁၉)ဧက၊ အထွက်နှုန်းမှာ (၅၂၀.၂၁)ပေါင်နှင့် တစ်နှစ်စာပျှမ်းမျှ အထွက်နှုန်းမှာ (၄၇၈၃၄) မက်ထရစ်တန် ရှိပါသည်။

    မှိုင်းခံရော်ဘာတွင်  RSS-1၊ RSS-2၊ RSS-3၊ RSS-4၊ RSS-5 ဟူ၍ အဆင့်သတ်မှတ်ချက် (၅ ) မျိုးရှိရာ ယခုလက်ရှိ တနင်္သာရီတိုင်းဒေသကြီးအတွင်းတွင် RSS-3 နှင့် RSS-5ဟူ၍ ( ၂ ) မျိုးသာ အဓိက အရောင်းအဝယ်ဖြစ်လျက်ရှိပါသည်။

   ယခုအပတ်   ရော်ဘာစျေးနှုန်းမှာ RSS-3 တစ်ပေါင်လျှင် ကျပ် ၁၃၅၀ နှုန်း၊ RSS-5 တစ်ပေါင်လျှင် ကျပ် ၁၂၅၀ နှုန်း ပေါက်ဈေး ရှိပြီး RSS-3 သည် RSS-5 ထက် အပြစ်အနာ ဆာကင်းသောကြောင့် ဈေးကောင်းပိုရလျက်ရှိကြောင်း သိရှိရပါသည်။ သီဟိုစေ့တွင် အခွံမချွတ်ရသေးသောအပင်မှ ဆွတ်ခူးသော အသီးအကြမ်းစျေးနှင့် အခြောက်လှန်းသန့်စင်ပြီး အချောစျေးဟူ၍ စျေးနှုန်း (၂)မျိုးရှိပြီး ယခု ​ဖေဖော်ဝါရီလတွင် သီဟိုဠ်စေ့စျေးနှုန်းမှာ သီဟိုစေ့အကြမ်း တစ်ပိဿာလျှင် ၅၀၀၀ ကျပ်ရှိပြီး သီဟိုစေ့အချော တစ်ပိဿာလျှင် ၃၂၀၀၀ ကျပ်ဖြစ်ကြောင်း ကုန်သည်တစ်ဦးထံမှ သိရှိရပါသည်။

  တနင်္သာရီတိုင်းဒေသကြီး ထားဝယ်တွင် ရော်ဘာစျေးနှုန်းအနေဖြင့် ယခင်အပတ်နှင့်နှိုင်းယှဉ်ပါက စျေးနှုန်းတည်ငြိမ်လျက်ရှိပြီး သီဟိုဠ်စေ့စျေးနှုန်းမြင့်တက်လျက်ရှိရာ ရော်ဘာကို ကော့သောင်းနှင့် ထိုင်းဖက်သို့ အများဆုံး တင်ပို့လျက်ရှိကြောင်းနှင့်  ယခုအခါ  သယ်ယူပို့ဆောင်ခ ထားဝယ်မှ ကော့သောင်းသို့ (ကားခ) တစ်တန်လျှင် (၁၈၀၀၀၀−၂၀၀၀၀၀)ကျပ်နှုန်းရှိကြောင်း စုံစမ်းသိရှိရသည်။

DOCA(တနင်္သာရီ)