ပြည်ပကုန်သွယ်မှုသတင်းများ

       ဗီယက်နမ်ပင်လယ်စာသည် စင်ကာပူဈေးကွက်တွင် တည်ရှိမှုအားကောင်းနေပြီး ထိုဝယ်လိုအားမြင့်မားသည့် ဈေးကွက်တွင် အဓိကထုတ်ကုန်များမှာ ထိပ်တန်းဈေးကွက်ဝေစုကို ထိန်းသိမ်းထားလျက်ရှိကြောင်း သိရပါသည်။ စင်ကာပူ၏ စာရင်းအင်းနှင့်ကော်ပိုရိတ်စည်းမျဉ်း အာဏာပိုင်အဖွဲ့ထံမှ အချက်အလက်အရ ၂၀၂၅ ခုနှစ်၏ ပထမ ၉ လတွင် စင်ကာပူသည် အမေ ရိကန်ဒေါ်လာ ၆၈.၂ သန်းတန်ဖိုးရှိသောပင်လယ်စာကို ဗီယက်နမ်ထံမှတင်သွင်းခဲ့ပြီး ၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၁၄.၅ ရာခိုင်နှုန်းမြင့်တက်ခဲ့ကာ စုစုပေါင်းတင်သွင်းမှုတန်ဖိုး၏ ၁၀.၂ ရာခိုင်နှုန်းရှိကြောင်း သိရပါသည်။ ဗီယက်နမ်သည် မလေးရှားနှင့် အင်ဒိုနီးရှားတို့၏နောက် စင်ကာပူသို့ တတိယမြောက်အကြီးမားဆုံးပင်လယ်စာတင်ပို့သူအဖြစ် ရပ်တည်နေကြောင်း သိရပါသည်။ ဗီယက်နမ် ပင်လယ်စာအမျိုးအစားများအကြား အေးခဲထားသောငါးအသားပြားနှင့် ကင်ထားသောငါးအသားပြားတို့မှာ စင်ကာပူဒေါ်လာ ၄၅.၄ သန်းဖြင့် တင်သွင်းမှုတန်ဖိုးအမြင့်ဆုံးဖြစ်ကြောင်း သိရပါသည်။ အခြားသိသာထင်ရှားသည့် ပို့ကုန်အုပ်စုများတွင် ပြုပြင်ထားသောနှင့် မပြုပြင်ထားသောကမာနှင့် ခရုတို့ပါဝင်ပြီး စုစုပေါင်းတင်သွင်းမှုတန်ဖိုး စင်ကာပူဒေါ်လာ ၂၀ သန်း နှင့် ၁၀.၁ သန်းအသီးသီးရှိကြောင်း သိရပါသည်။ စင်ကာပူရှိဗီယက်နမ်ကုန်သွယ်‌ရေးရုံးက စင်ကာပူ၏ ပင်လယ်စာတင်သွင်းမှုဈေးကွက်သည် ဆက်လက်တည်ငြိမ်နေပြီး ဗီယက်နမ်သည် ငါးအသားပြားကင်နှင့် အသားတို့တွင် ၎င်းတို့၏အားကောင်း‌စွာတည်ရှိနေမှုကို ဆက်လက်ထိန်းထားနိုင်ကြောင်း ပြောကြားခဲ့ပါသည်။ သို့သော် ခရုနှင့်ကမာတွင်မူ ဗီယက်နမ်တင်ပို့သူများသည် မလေးရှားနှင့် အင်ဒိုနီးရှားသာမက တရုတ်၊ ဂျပန်နှင့် အိန္ဒိယတို့ထံမှ ပြင်းထန်သောယှဉ်ပြိုင်မှုနှင့် ဆက်လက်ရင်ဆိုင်ရနိုင်ကြောင်း သိရပါသည်။ အာဏာပိုင်များ၏အဆိုအရ ယခုနှစ်၏ ပထမ ၉ လ တွင် စင်ကာပူ၏ စုစုပေါင်းပင်လယ်စာတင်သွင်းမှုမှာ စင်ကာပူဒေါ်လာ ၈၇၀ သန်းတန်ဖိုးအထိ ရောက်ရှိခဲ့ပြီး ၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၃.၇ ရာခိုင်နှုန်းမြင့်တက်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

           အင်ဒိုနီးရှားအစိုးရ၏ စားနပ်ရိက္ခာဖူလုံရေး ကြိုးပမ်းမှုတစ်စိတ်တစ်ပိုင်းအနေဖြင့် ယခုဘဏ္ဍာနှစ်အတွင်း တည်ဆောက်ဆဲ ဆည် ၁၅ ခု ပြီးစီးရန် အင်ဒိုနီးရှား ပြည်သူ့လုပ်ငန်း ဝန်ကြီးဌာနက အောက်တိုဘာ ၂၃ ရက်၌ အရှိန်မြှင့် ဆောင်ရွက်လျက်ရှိသည်။ ရေကာတာတည်ဆောက်ရေးနဲ့ ရေရှည်အကျိုးရှိစေဖို့ ဆည်မြောင်းကွန်ရက်များ ပြန်လည်ထူထောင်ရေးနဲ့ လက်တွဲဆောင်ရွက်ရမယ်လို့ ပြည်သူ့ဆောက်လုပ်ရေးဝန်ကြီး Dody Hanggodo က ပြောကြားခဲသည်။ "ရေကာတာ တည်ဆောက်မှုမှာ ဆက်သွယ်ရေးလမ်းကြောင်းများနှင့် ဆည်မြောင်းကွန်ရက်များ ဖွံ့ဖြိုးတိုးတက်မှုနှင့် အတူ လိုက်ပါဆောင်ရွက်ရမည်ဖြစ်ကြောင်း ရေရှည်တည်တံ့သော ရေပေးဝေမှုနှင့်အတူ လယ်ယာကုန်ထုတ်စွမ်းအားကို မြှင့်တင်နိုင်ပြီး လယ်သမားများ၏ သက်သာချောင်ချိရေးကို မြှင့်တင်ပေးမည်ဖြစ်ကြောင်း Dody က ပြောကြားခဲ့သည်။ ဆည် ၁၅ ဆည်တည်ဆောက်မှုမှာ ၂၀၂၉ ခုနှစ် မတိုင်မီ ပြီးစီးရန် ရည်မှန်းထားကြသည်။ လုပ်ငန်းလည်ပတ်ပြီးသည်နှင့် တမံများသည် ဆည်မြောင်းဝန်ဆောင်မှုဧရိယာ ၁၈၄,၅၁၅ ဟက်တာမှ ၂၆၃,၀၅၅ ဟက်တာအထိ တိုးချဲ့ကာ စုစုပေါင်း စိုက်ပျိုးဧရိယာ ၂၇၇,၇၇၅ ဟက်တာမှ ၄၈၃,၁၆၃ ဟက်တာအထိ တိုးလာမည်ဖြစ်သည်။ ပိုမိုကောင်းမွန်သော ရေသွင်းစိုက်ပျိုးခြင်းဖြင့် သီးနှံထွက်ရှိမှုမှာ နှစ်စဉ် တန်ချိန် ၁.၄ သန်းမှ တန်ချိန် ၂.၃၄ သန်းအထိ တိုးလာမည်ဟုလည်း ခန့်မှန်းထားကြကြောင်း သိရှိရပါသည်။

Source : Xinhua                                                                                   

DOCA(ရန်ကုန်)

        ရုရှားရေနံကုမ္ပဏီများအပေါ် အမေရိကန်၏ ပိတ်ဆို့အရေးယူမှုအသစ်သည် ရုရှားနိုင်ငံ၏ စီးပွားရေးကို သိသိသာသာ ထိခိုက်မည်မဟုတ်ကြောင်း ရုရှားသမ္မတ ဗလာဒီမာပူတင်က အောက်တိုဘာလ ၂၃ ရက်နေ့တွင် ပြောကြားခဲ့ကြောင်း သိရသည်။

          ပိတ်ဆို့အရေးယူမှုများသည် ရုရှားအပေါ် ဖိအားပေးရန် ကြိုးပမ်းမှုဖြစ်ပြီး ရုရှား-အမေရိကန် ဆက်ဆံရေးကို ခိုင်မာစေခြင်းမရှိကြောင်း ပူတင်ကပြောကြားခဲ့ကြောင်း သိရသည်။

         ရုရှားသမ္မတ ဒေါ်နယ်ထရန့်နှင့် တွေ့ဆုံရန် စီစဉ်ထားမှုကို ဖျက်သိမ်းလိုက်ကြောင်း အောက်တိုဘာလ ၂၂ ရက်နေ့တွင် ပြောကြားခဲ့သည့် အမေရိကန်သမ္မတ ဒေါ်နယ်ထရန့်၏ ဆောက်ရွက်ချက်အပေါ် မှတ်ချက်ပေးရာတွင် ရုရှားသမ္မတက ဆက်လက်ဆွေးနွေးရန် အမြဲတမ်းထောက်ခံကြောင်း ပြောကြားခဲ့ကြောင်း သိရသည်။

         ကြိုတင်ပြင်ဆင်မှုမရှိဘဲ ရုရှား-အမေရိကန် ထိပ်သီးအစည်းအဝေးကို ချဉ်းကပ်ခြင်းသည် အမှားအယွင်းတစ်ခုဖြစ်ကြောင်း ၎င်းက ပြောကြားခဲ့သည်။ ယူကရိန်းတွင် အပစ်အခတ်ရပ်စဲရေး ချက်ချင်းသဘောတူရန် မော်စကိုအား ဖိအားပေးရန်အတွက် ရုရှား၏ အကြီးဆုံး ရေနံထုတ်လုပ်သူ Rosneft နှင့် Lukoil တို့ကို အမေရိကန်ဘဏ္ဍာရေးဌာနက ဗုဒ္ဓဟူးနေ့တွင် ပိတ်ဆို့အရေးယူရန် ကြေညာခဲ့ကြောင်း သိရှိရပါသည်။

Source : Xinhua                                                                                   

DOCA(ရန်ကုန်)

          ကမ္ဘောဒီးယားနိုင်ငံသည် အီး-စီးကရက်နှင့် ရှီရှာများကို တားမြစ်ပိတ်ပင်လိုက်ကြောင်း အောက်တိုဘာ ၂၂ ရက်၌ ကမ္ဘောဒီးယားနိုင်ငံမှ လူမှုဖူလုံရေးနှင့် လူငယ်များ၏ ကျန်းမာရေးကို ကာကွယ်ရန်ရည်ရွယ်၍ ထုတ်ပြန်ခဲ့သည်။ အင်္ဂါနေ့ရက်စွဲဖြင့် မီဒီယာသို့ ထုတ်ပြန်သည့် ညွှန်ကြားချက်တွင် ရှီရှာနှင့် အီး-စီးကရက်ကို ကျယ်ကျယ်ပြန့်ပြန့် သုံးစွဲလာသည်ကို အစိုးရက သတိပြုမိပြီးနောက် တားမြစ်ချက် ထွက်ပေါ်လာခြင်းဖြစ်သည်ဟု ဆိုသည်။ တင်သွင်း၊ ဖြန့်ဖြူးခြင်း၊ ရောင်းချခြင်း၊ ကြော်ငြာခြင်း၊ အသုံးပြုခြင်း၊ လက်ဝယ်ထားရှိခြင်း၊ ထုတ်လုပ်ခြင်းနှင့် သောက်သုံးခြင်းတို့အတွက် ပုံစံအားလုံးတွင် တားမြစ်ထားကြောင်း Hun Manet မှ ပြောကြားခဲ့သည်။ အစိုးရနှင့်ပုဂ္ဂလိက ကျောင်းများ၊ ဆရာအတတ်သင်ကျောင်းများ၊ အဆောင်များ၊ ရပ်ရွာသင်ကြားရေးစင်တာများ၊ အားကစားခန်းမများနှင့် အားကစားဆိုင်ရာအဆောက်အအုံများ အနီးတစ်ဝိုက်တွင် အီး-စီးကရက်နှင့် ရှီရှာအတွက် အီလက်ထရွန်းနစ်ပစ္စည်းများနှင့် ဓာတုပစ္စည်းများ အသုံးပြုမှု တားမြစ်ရန် ပညာရေးဝန်ကြီးဌာနကို ညွှန်ကြားထားသည်။ အရှေ့တောင်အာရှနိုင်ငံသည် ရှီရှာနှင့် အီး-စီးကရက်များ တင်သွင်းခြင်း၊ ရောင်းချခြင်းနှင့် အသုံးပြုခြင်းကို ၂၀၁၄ ခုနှစ်တွင် ပထမဆုံးတားမြစ်ခဲ့သည်။ အီး-စီးကရက်နှင့် ရှီရှာများသည် သုံးစွဲသူများ၏ ကျန်းမာရေးကို ဆိုးရွားစွာ ထိခိုက်စေကြောင်း ကျန်းမာရေးဝန်ကြီးဌာနက သတိပေးထားပြီး အီးစီးကရက်များတွင် စီးကရက်ထက် ကျန်းမာရေးကို ပိုမိုဆိုးရွားစွာ ထိခိုက်စေနိုင်သည့် နီကိုတင်းပါဝင်မှု မြင့်မားကြောင်းနှင့် အဆိုပါထုတ်ကုန်များကို ဆေးခြောက်နှင့် အခြားဆေးများနှင့် အသုံးပြုထားသော်လည်း shisha တွင် အဆိပ်အတောက်များ ပါဝင်နေကြောင်း သတိ‌ပေးချက်ထုတ်ပြန်ထားသည်။ အဆိုပါ ထုတ်ကုန်များသည် ပြင်းထန်သော အဆုတ်ရောဂါ၊ အဆုတ်ကင်ဆာ၊ နှလုံးရောဂါ၊ ဦးနှောက်ဖွံ့ဖြိုးမှုကိုပျက်စီးစေခြင်း၊ လမစေ့ဘဲ ကလေးမွေးဖွားခြင်း၊ မျိုးမအောင်ခြင်း၊ အစာအိမ်ကင်ဆာနှင့် ဆီးအိမ်ကင်ဆာတို့ကို ဖြစ်စေနိုင်ကြောင်း ဝန်ကြီးဌာနကဆိုကြောင်း သိရှိရပါသည်။

Source : Xinhua                                                                                   

DOCA(ရန်ကုန်)

         အာဂျင်တီးနားမှ အမဲသားတင်သွင်းရန် အမေရိကန်သမ္မတ ဒေါ်နယ်ထရန့်၏ အကြံပြုချက်ကို အမေရိကန်နွားထုတ်လုပ်သူများ ပြင်းပြင်းထန်ထန် ကန့်ကွက်ကြောင်း ထုတ်ဖော်ပြောဆိုလိုက်သည်။ အမေရိကန်ပြည်ထောင်စုသည် အာဂျင်တီးနားမှ အမဲသားအချို့ကို ဝယ်ယူနိုင်သည်ဟု ထရမ့်က အောက်တိုဘာလ ၁၉ ရက်နေ့တွင် သတင်းထောက်များအား ပြောကြားခဲ့ပြီး အဆိုပါ လှုပ်ရှားမှုသည် နိုင်ငံ၏အမဲသားစျေးနှုန်းများကို ကျဆင်းစေပြီး အလွန်ကောင်းမွန်သောမဟာမိတ်နိုင်ငံ ဖြစ်လာစေကြောင်း ပြောကြားခဲ့သည်။ တနင်္လာနေ့တွင် ထုတ်ပြန်သည့် သတင်းထုတ်ပြန်ချက်တွင် နွားအမဲ သားအသင်း (NCBA) မှ အဆိုပါ တင်သွင်းမှုသည် ပြည်တွင်း ကျွဲနွားထုတ်လုပ်သူများကို ထိခိုက်နိုင်ပြီး လွတ်လပ်သော စျေးကွက်စည်းမျဉ်းများကို အနှောင့်အယှက်ဖြစ်စေကြောင်း သတိပေးထားသည်။ NCBA ၏ လယ်သမားများနှင့် မွေးမြူရေးသမားများသည် စားသုံးသူများအတွက် ဈေးနှုန်းနိမ့်ကျစေရန် အာဂျင်တီးနား အမဲသားကို ပိုမိုတင်သွင်းရန် များစွာသော စိုးရိမ်ပူပန်မှုများ ရှိနေသည်ဟု NCBA အမှုဆောင်အရာရှိချုပ် Colin Woodall က ပြောကြားခဲ့သည်။ လွန်ခဲ့သည့်ငါးနှစ်အတွင်း အာဂျင်တီးနားနိုင်ငံသည် အမေရိကန်ဈေးကွက်သို့ အမဲသား ကန်ဒေါ်လာ ၈၀၁ သန်းကျော် ရောင်းချခဲ့ပြီး အမေရိကန်သည် အာဂျင်တီးနားသို့ အမေရိကန်အမဲသား ကန်ဒေါ်လာ ၇ သန်းကျော်သာ ရောင်းချခဲ့ရကြောင်း Woodall က ပြောကြားခဲ့သည်။ စျေးကွက်ကို ဝင်ရောက်စွက်ဖက်ခြင်းထက် စျေးကွက်ကို လုပ်ကိုင်ခွင့်ပေးရန် သမ္မတ Trump နှင့် ကွန်ဂရက်အဖွဲ့ဝင်များကို ၎င်းတို့ တောင်းဆိုထားကြောင်း NCBA မှ ပြောကြားခဲ့သည်။ Nebraska မှ ရီပတ်ဘလီကန် အထက်လွှတ်တော်အမတ် Deb Fischer က အဆိုပြုချက်သည် အမေရိကန် နွားမွေးမြူသူများကို ထိခိုက်စေမည်ဖြစ်ပြီး စားသုံးသူဈေးနှုန်းကိုလျှော့ချရန် ပျက်ကွက်ကြောင်း သတိပေးခဲ့သည်။ အမေရိကန် အလုပ်သမား စာရင်းအင်းဗျူရို၏ အဆိုအရ အမေရိကန်နိုင်ငံရှိ အမဲသား ပျမ်းမျှစျေးနှုန်းသည် ယခုနှစ်သြဂုတ်လတွင် တစ်ပေါင်လျှင် အမေရိကန်ဒေါ်လာ ၆.၃၂ ဒေါ်လာအထိ စံချိန်တင်မြင့်တက်ခဲ့ပြီး ၂၀၂၀ ခုနှစ် ဖေဖော်ဝါရီလထက် ၅၁ ရာခိုင်နှုန်း မြင့်မားခဲ့ကြောင်းသိရသည်။ မိုးခေါင်ခြင်း၊ အစာစားစရိတ် မြင့်မားခြင်းနှင့် ကုန်သွယ်မှုအနှောင့်အယှက်တို့ကြောင့် အမေရိကန် နွားများနည်းပါးလာကာ  အမဲသားဈေးနှုန်း မြင့်တက်လာရခြင်းဖြစ်ကြောင်း ဒေသတွင်း မီဒီယာများက ဖော်ပြခဲ့သည်။ အမဲသားတင်သွင်းမှု တိုးမြှင့်ခြင်းဖြင့် အာဂျင်တီးနား၏ စီးပွားရေးနှင့် ၎င်း၏သမ္မတ Javier Milei အား ထောက်ပံ့ရန် ထရမ့်က ကြိုးပမ်းလျက်ရှိကြောင်း အချို့သော အစီရင်ခံစာများက ဖော်ပြခဲ့ကြောင်း သိရှိရပါသည်။

Source : Xinhua                                                                                   

DOCA(ရန်ကုန်)