ပြည်ပကုန်သွယ်မှုသတင်းများ

         မက္ကဆီကိုအစိုးရသည် စားသုံးမှုလျှော့ချရန်နှင့် အဝလွန်ခြင်းကို တိုက်ဖျက်ရန် ကြိုးပမ်းမှု တစ်စိတ်တစ်ပိုင်းအနေဖြင့် သကြားပါသောအချိုရည်များအပေါ် အခွန်တိုးကောက်ရန် တွန်းအားပေးလျက်ရှိသည်။ မက္ကဆီကို ကျန်းမာရေးအာဏာပိုင်များ၏ အဆိုအရ နိုင်ငံသည် လူတစ်ဦးလျှင် သကြားပါသော အချိုရည် ဂါလံ ၄၄ ဂါလံ နှစ်စဉ် ပျမ်းမျှ သောက်သုံးမှုမှတ်တမ်းရှိပြီး ၎င်းသည်ကမ္ဘာ့ အမြင့်ဆုံးနှုန်းထားများထဲမှ တစ်ခုဖြစ်ပြီး အရွယ်ရောက်ပြီးသူ ၃၈.၉ ရာခိုင်နှုန်းသည် အဝလွန်သူများ အဖြစ်သတ်မှတ်ထားသည်။ မကြာသေးမီက အောက်လွှတ်တော်မှ အတည်ပြုခဲ့သော အစိုးရအဆိုပြုချက်တွင် သကြားပါသော အချိုရည်များအတွက် ထုတ်လုပ်မှုနှင့် ဝန်ဆောင်မှုများဆိုင်ရာ အထူးအခွန်နှုန်းထားကို တစ်လီတာလျှင် ၂၁ ဆင့်ခန့် တိုးပေးခဲ့သည်။ ဆီးချိုရောဂါ၊ အဝလွန်ခြင်းနှင့် နှလုံးသွေးကြောဆိုင်ရာ ရောဂါများကို တိုက်ဖျက်ရန် ရည်ရွယ်သည့် ပြည်သူ့ကျန်းမာရေး အစီအစဉ်များသို့ အပိုဝင်ငွေရရှိမည်ဖြစ်ကြောင်း၊ ရည်ရွယ်ချက်မှာ ငွေရှာရန်မဟုတ်ဘဲ စားသုံးမှုကို လျှော့ချရန်ဖြစ်ကြောင်း Sheinbaum က ဆိုသည်။ မက္ကဆီကိုသည် သကြားပါသော အချိုရည်များကို တစ်လီတာလျှင် ၅.၅ ဆင့် အထူးအခွန်စည်းကြပ်ထားစဉ် ၂၀၁၄ ခုနှစ်ကတည်းကကောက်ခံရရှိသော ရန်ပုံငွေများထဲသို့ ထပ်လောင်းထည့်ဝင်မည့် ဝင်ငွေ ဒေါ်လာ ၂.၂၅ ဘီလီယံကျော်ကို ဘဏ္ဍာရေးဝန်ကြီးဌာနက စီမံဆောင်ရွက်လျက်ရှိသည်။ ဤ "ကျန်းမာရေးအခွန်" အတွက် အတည်ပြုမှုလုပ်ငန်းစဉ်၏ တစ်စိတ်တစ်ပိုင်းအနေဖြင့် မက္ကဆီကို အစိုးရသည် ထုတ်ကုန်ပြုပြင် ပြောင်းလဲမှုနှင့် စျေးကွက်ရှာဖွေရေးဆိုင်ရာ တာဝန်ယူမှုဆိုင်ရာ ကတိကဝတ်များပါဝင်သော အချိုရည်လုပ်ငန်းနှင့် သဘောတူညီချက်တစ်ရပ်ကို ရရှိခဲ့သည်။ ကုမ္ပဏီများသည် ၂၀၂၇ ခုနှစ် အောက်တိုဘာလတွင် ၎င်းတို့၏ ထုတ်ကုန်များ၏ ၇၀ ရာခိုင်နှုန်းတွင် သကြားပါဝင်မှုကို ၃၀ ရာခိုင်နှုန်းလျှော့ချရန်၊ ကလေးများအတွက် ရည်ရွယ်သော ကြော်ငြာများကို ဖယ်ရှားရန်နှင့် နှစ်လီတာနှင့် သုံးလီတာအရွယ်အစားကဲ့သို့သော ပုလင်းကြီးများကို အရောင်းမြှင့်တင်ခြင်းကို ကန့်သတ်ရန် သဘောတူညီခဲ့ကြသည်။ National Action Party ၏ စီးပွားရေးညှိနှိုင်းရေးမှူး Héctor Saúl Téllez က အဆိုပါအစီအမံများသည် ကျန်းမာရေးအခွန်များ မဟုတ်သော်လည်း ရှင်းလင်းသောဘဏ္ဍာရေး ရည်မှန်းချက်ဖြင့် ရိုးရိုးရှင်းရှင်း ကောက်ခံခြင်းဖြစ်ကြောင်း El Heraldo က ပြောကြားခဲ့သည်။ အသေးစား လုပ်ငန်းရှင်များကလည်း စိုးရိမ်ကြောင်းဖော်ပြကြသည်။ သမ္မတမှမကြေငြာမီရက်ပိုင်းအလိုတွင် ပြည်သူ့ကျန်းမာရေး ကျွမ်းကျင်သူ ၁၀၀၀ ကျော်က အဆိုပါ ပဏာမခြေလှမ်း အတွက်ထောက်ခံကြောင်း ထုတ်ဖော်ပြောဆိုခဲ့ကြ ကြောင်း သိရှိရပါသည်။

Source: Yahoo                                                                               

DOCA (ရန်ကုန်)

           တရုတ်နိုင်ငံသည် အီသီယိုးပီးယားနိုင်ငံမှ ကော်ဖီများအား အများဆုံးတင်သွင်းလျက်ရှိသော ထိပ်တန်းနိုင်ငံများထဲမှ တစ်နိုင်ငံအဖြစ် ပါဝင်လျှက်ရှိပြီး လွန်ခဲ့သည့် ၂ နှစ်က အီသီယိုးပီးယား ကော်ဖီတင်သွင်းသော နိုင်ငံများ၏ စာရင်းတွင် အဆင့် (7) နေရာမှ အဆင့် (4) နေရာသို့မြင့်တက်လာခဲ့ကြောင်း အီသီယိုးပီးယား ကော်ဖီနှင့် လက်ဖက်ရည် အာဏာပိုင်အဖွဲ့မှ လက်ထောက်ညွှန်ကြား ရေးမှူးချုပ်ဖြစ်သူ Shafi Umer ၏ ပြောကြားချက်အရသိရသည်။ ဇူလိုင်လ ၈ ရက်နေ့ကစတင်သော လက်ရှိ အီသီယိုးပီးယားနိုင်ငံ၏ ဘဏ္ဍာနှစ်၏ ပထမသုံးလ ပတ်အတွင်း အီသီယိုးပီးယားနိုင်ငံမှ တရုတ်နိုင်ငံသို့ ကော်ဖီတန်ချိန် ၉၄၇၀ နီးပါးတင်ပို့ခဲ့ပြီး အမေရိကန်ဒေါ်လာ ၆၅.၄၉ သန်းရရှိခဲ့သည်။ လက်ရှိဘဏ္ဍာနှစ်၏ ပထမသုံးလပတ်အတွင်း တရုတ်နိုင်ငံသို့ ကော်ဖီတင်ပို့မှုမှရရှိသော ဝင်ငွေသည် ယမန်နှစ် ပထမသုံးလပတ်က ရရှိသောဝင်‌ငွေနှင့် နှိုင်းယှဉ်ပါက ခုနှစ်ဆနီးပါး တိုးလာကြောင်း သိရသည်။ ထိုသို့ တရုတ်နိုင်ငံအား ကော်ဖီတင်ပို့မှု မြင့်တက်လာရခြင်းမှာ အော်ဂဲနစ်ကော်ဖီများကိုသာ တင်ပို့ခြင်းနှင့် အရည်အသွေးမြင့်မားသော ကော်ဖီများအတွက် တရုတ်စားသုံးသူများ၏ တိုးပွားလာသော ဝယ်လိုအားကို ဖြည့်ဆည်းပေးနိုင်သည့် ပိုမိုကောင်းမွန်သော ဝန်ဆောင်မှုများကြောင့်ဖြစ်ကြောင်း Shafi Umer က ပြောကြားခဲ့သည်။ ဂျာမနီ၊ ဆော်ဒီအာရေးဗီးယားနှင့် ဘယ်လ်ဂျီယံနိုင်ငံတို့သည် ပြီးခဲ့သော သုံးလတာကာလအတွင်း အီသီယိုးပီးယားနိုင်ငံ၏ ကော်ဖီတင်ပို့မှုအတွက် ထိပ်တန်း နိုင်ငံများအဖြစ် ဆက်လက်တည်ရှိနေပြီး ၎င်းတို့၏ နောက်တွင် တရုတ်၊ အမေရိကန်၊ တောင်ကိုရီးယား၊ အာရပ်စော်ဘွားများပြည်ထောင်စု၊ ဂျပန်၊ အီတလီနှင့် ရုရှားနိုင်ငံတို့က အကြီးဆုံးစျေးကွက် ခုနှစ်ခုအဖြစ်တည်ရှိကြောင်း အီသီယိုးပီးယား အာဏာပိုင်များ၏ အချက်အလက်များအရ သိရှိရပါသည်။

Source: Xinhua                                                                              

DOCA (ရန်ကုန်)

          အမေရိကန်သမ္မတ Donald Trump ၏ ဒေသတွင်းပထမဆုံးလာရောက် လည်ပတ်နေစဥ်အတွင်းတွင် အမေရိကန်နိုင်ငံသည် ဗီယက်နမ်နိုင်ငံနှင့် ကုန်သွယ်ရေးသဘောတူညီချက် အ‌သေးစိတ်အချက်အလက်များကို အောက်တိုဘာလ ၂၆ ရက်နေ့တွင် ထုတ်ပြန်ကြေညာခဲ့ကြောင်း သိရပါသည်။ အရေးကြီးသော အသေးစိတ်အချက်အလက်များကို မဆုံးဖြတ်ရသေးသော်လည်း ၎င်းထုတ်ပြန်ကြေညာချက်သည် ဇူလိုင်လတွင် ကြေညာခဲ့သော ၂၀ ရာခိုင်နှုန်း အခွန်ကောက်ခံမည်ဟု ကြေညာချက်အပြီး နောက်ပိုင်းတွင် Trump အုပ်ချုပ်ရေးအဖွဲ့မှ ထုတ်ပြန်သည့် ပထမဆုံးဖြစ်ကြောင်း သိရပါသည်။ အဆိုပါကြေညာချက်သည် အရှေ့တောင်အာရှနိုင်ငံများ ညီလာခံအား လက်ခံကျင်းပသည့် မလေးရှားနိုင်ငံတွင် အမေရိကန်သမ္မတ Donald Trump ၏ လည်ပတ်မှုအပြီးတွင် ထွက်ပေါလာခြင်းဖြစ်ကြောင်း သိရပါသည်။ အမေရိကန်နိုင်ငံ ခေါင်းဆောင်များသည် ကမ္ဘောဒီးယားနိုင်ငံနှင့် မလေးရှားနိုင်ငံတို့နှင့် ကုန်သွယ်ရေးသဘောတူညီမှုကို လက်မှတ်ရေးထိုးခဲ့ကြောင်းနှင့် ထိုင်းနိုင်ငံ သဘောတူညီချက်ဘောင်အတွက် လက်မှတ်ရေး ထိုးခဲ့ကြောင်း သိရပါသည်။ ဗီယက်နမ်အစိုးရက ဝန်ကြီးချုပ် Minh Chinh သည် အမေရိကန် သမ္မတ Donald Trump နှင့် အစည်းအဝေးပြင်ပတွင် အကျဥ်းချုပ်တွေ့ဆုံခဲ့ပြီး ဗီယက်နမ်နိုင်ငံသို့ လာရောက်လည်ပတ်ရန် ဖိတ်ခေါ်ခဲ့ကြောင်း ထုတ်ပြန်ကြောချက်တွင် ပြောကြားခဲ့ပါသည်။ ကော်ဖိနှင့်ပတ်သက်သည့်ထုတ်ကုန်များ၊ အင်္ကျီမှစ၍ ကားအင်ဂျင်အစိတ်အပိုင်းများအထိ ရောင်းချသည့် ကမ္ဘာ့အကြီးဆုံးတင်ပို့သည့်နိုင်ငံဖြစ်သော ဗီယက်နမ်နိုင်ငံသည် အစောပိုင်းတွင် အမေရိကန်နိုင်ငံမှ အခွန် ၄၆ ရာခိုင်နှုန်းတိုးမြှင့်ကောက်ခံခြင်းကို ခံခဲ့ရသော်လည်း နောက်ပိုင်းတွင် အမေရိကန်နိုင်ငံမှ ဇူလိုင်လမှစတင်၍ အခွန် ၂၀ ရာခိုင်နှုန်းသာ အခွန်များကို လျော့ချကောက်ခံခြင်း ခံရသော်လည်း ၎င်း၏ အိမ်နီးချင်းနိုင်ငံများဖြစ်သော အင်ဒိုနီးရှားနိုင်ငံ၊ မလေးရှားနိုင်ငံ၊ ဖိလစ်ပိုင်နိုင်ငံနှင့် ထိုင်းနိုင်ငံများထက် ၁ ရာခိုင်နှုန်းများနေကြောင်း သိရပါသည်။ အမေရိကန်နိုင်ငံ၏ ထုတ်ပြန်ချက်အရ ဗီယက်နမ်နိုင်ငံသည် အမေရိကန်နိုင်ငံ မော်တော်ကားများစံနှုန်း အသိအမှတ်ပြုရေး၊ အမေရိကန်နိုင်ငံ ဆေးဝါးနှင့် ဆေးဘက်ဆိုင်ရာ ပစ္စည်းများအတွက် တင်သွင်းမှုစည်းမျဥ်းများ ပယ်ဖျောက်ရေးနှင့် အပြည်ပြည်ဆိုင်ရာ ဉာဏ်ပညာဖြင့် ဖန်တီးထား သော မူပိုင်ခွင့် ကတိကဝတ်များဖြည့်ဆေးရေးများအတွက် သဘောတူညီခဲ့ကြောင်း သိရပါသည်။ အဆိုပါ အမေရိကန်နိုင်ငံနှင့် ဗီယက်နမ်နိုင်ငံတို့သည် ဒစ်ဂျစ်တယ်ကုန်သွယ်ရေး၊ ဝန်ဆောင်မှုများနှင့် ရင်းနှီးမြှုပ်နှံမှုများနှင့် ပတ်သက်သည့် ကတိကဝတ်များကို ယခုလာမည့် ရက်သတ္တပတ်အတွင်း အဆုံးသတ်ဆွေးနွေးတော့မည်ဖြစ်ကြောင်း သိရှိရပါသည်။

Source: The Edge Malaysia                                                        

DOCA (ရန်ကုန်)

              မော်စကိုမြို့၏ ဝင်ငွေလမ်းကြောင်းကို ချုပ်ကိုင်ရန် ရုရှားနိုင်ငံမှ ရေနံထုတ်လုပ်သူ ၂ ဦးအား အမေရိကန်နိုင်ငံမှ ပိတ်ပင်မှုများပြုလုပ်အပြီးတွင် အိန္ဒိယနိုင်ငံမှ ရေနံသန့်စင်ရေး လုပ်ငန်းရှင်များသည် ရုရှားနိုင်ငံမှ ရေနံတင်သွင်းမှုကို သိသိသာသာလျော့ချရန် အသင့်ရှိကြောင်း စက်မှု သတင်းရင်းမြစ်များက အောက်တိုဘာလ ၂၃ ရက်နေ့တွင် ပြောကြားခဲ့ပါသည်။ အိန္ဒိယနိုင်ငံသည် ၂၀၂၂ ခုနှစ်တွင် မော်စကိုမှ တစ်ရက်လျှင် ရေနံစည်ပေါင်း ၁.၇ သန်းခန့်တင်သွင်းခဲ့ပြီး ရုရှားနိုင်ငံ၏ ပင်လယ်ဖြတ်ရေနံအများဆုံး ဝယ်ယူသည့်နိုင်ငံ ဖြစ်လာခဲ့ပါသည်။ ရုရှားနိုင်ငံမှ ရေနံများသည် အမေရိကန်နိုင်ငံအတွက် အိန္ဒိယနိုင်ငံနှင့် ကာလကြာ ကုန်သွယ်ရေးဆွေးနွေးမှုတွင် ကတိကအောက်ဖြစ်စေသည့် အကြောင်းအရင်းဖြစ်ပြီး အိန္ဒိယနိုင်ငံမှ ကုန်ပစ္စည်းများအပေါ် အခွန် ၅၀ ရာခိုင်နှုန်းတိုးမြှင့်ကောက်ခံခြင်းသည် ရုရှားနိုင်ငံမှ ရေနံများဝယ်ယူမှုအပေါ် လက်တုံ့ပြန်ခြင်းဖြစ်ကြောင်း သိရပါသည်။ အိန္ဒိယနိုင်ငံ၏ ရေနံစည်ထိပ်သီးဝယ်ယူသည့် ပုဂ္ဂလိကပိုင်ကုမ္ပဏီဖြစ်သည့် RELI.NS သည် ရုရှားရေနံစိမ်း တင်သွင်းမှုကို တစ်ဝက်ခန့်လျော့ချ မည်ဖြစ်ကြောင်း သိရပါသည်။ အောက်တိုဘာလ ၂၂ ရက်နေ့တွင် အမေရိကန်သမ္မတ Donald Trump သည် Russia နိုင်ငံမှ ရေနံထုတ်လုပ်သည့် ကုမ္ပဏီ ၂ ခုဖြစ်သော Lukoil LKOH.MM နှင့် Rosneft ROSN.MM တို့အား ပိတ်ပင်မှုများ ပြုလုပ်ခဲ့ကြောင်း သိရပါသည်။ အိန္ဒိယနိုင်ငံမှ ရေနံသန့်စင်သူများသည် ရုရှားနိုင်ငံမှ ရေနံများကို ဝယ်ယူရာတွင် ပွဲစားများမှ တစ်ဆင့်ဝယ်ယူရသဖြင့် Rosneft နှင့် Lukoil ကုမ္ပဏီများမှ ဝယ်ယူမှုနည်းပါးကြောင်း သိရပါသည်။ Gujarat ပြည်နယ်အနောက်ပိုင်း Jamnagar တွင် ကမ္ဘာ့အကြီးဆုံးရေနံသန့်စင်သည့် အဆောက်အဦအား လည်ပတ်နေသည့် Reliance သည် ရုရှားနိုင်ငံ Rosneft ထံမှ ရေနံစည်ပေါင်း ၅၀၀၀၀၀ ခန့် ဝယ်ယူရန် ကာလကြာသဘောတူညီမှုရှိခဲ့ကြောင်းနှင့် အဆိုပါ ရေနံသန့်စင်သည့် ကုမ္ပဏီသည် ပွဲစားများမှတစ်ဆင့် ရုရှားနိုင်ငံမှ ရေနံများကို ဝယ်ယူလျက်ရှိကြောင်း သိရှိရပါသည်။

Source: The Daily Star                                                              

DOCA (ရန်ကုန်)

          ဗီယက်နမ်သည် ၂၀၂၅ ခုနှစ်အစမှ အောက်တိုဘာလ ၁၅ ရက်နေ့အထိတွင် ဆန်တန်ချိန် ၇ သန်းကျော်တင်ပို့ခဲ့သော်လည်း ပို့ကုန်လုပ်ငန်းရှင်များမှ ဝယ်ယူမှုနှေးကွေးသောကြောင့် ပြည်တွင်းစပါးနှင့် ဆန်ဈေးနှုန်းများကျဆင်းခဲ့ကြောင်း ဗီယက်နမ်အစားအစာအသင်း VFA) ၏အဆိုအရ သိရပါသည်။ နိုင်ငံသည် အမေရိကန်ဒေါ်လာ ၃.၅၉ ဘီလီယံတန်ဖိုးရှိသော ဆန်တန်ချိန် ၇.၀၂ သန်း တင်ပို့ခဲ့ကာ ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ပမာဏတွင် ၄.၄ ရာခိုင်နှုန်းနှင့် တန်ဖိုးတွင် ၂၁.၉ ရာခိုင်နှုန်း ကျဆင်းခဲ့ကြောင်း VFA အချက်အလက်များက ဖော်ပြခဲ့ပါသည်။ အောက်တိုဘာလ စတုတ္ထမြောက်ရက်သတ္တပတ်တွင် 5% broken jasmine ဆန်ကို တစ်တန်လျှင် အမေရိကန်ဒေါ်လာ ၄၂၀ မှ ၄၃၅ ကြားရောင်းချရန် ကမ်းလှမ်းခဲ့ပြီး ၂ လဆက်တိုက်ကျဆင်းခဲ့ကြောင်း သိရပါသည်။ ဟိုချီမင်းမြို့တော်ရှိကုန်သည်တစ်ဦးက ပြည်ပဝယ်လိုအားနည်းပါးမှုကြောင့် များစွာသောပို့ကုန်လုပ်ငန်းရှင်များက စပါးဝယ်ယူမှု နှေးကွေးခဲ့ခြင်းက ပြည်တွင်းကုန်သွယ်ရေးကို ဆက်လက်ငြိမ်သက်စေခဲ့ကြောင်း ပြောကြားခဲ့ပါသည်။ ပြည်တွင်း ဈေးကွက်တွင် jasmine စပါးကို တစ်ကီလီုဂရမ်လျှင် ၅၃၇၉ ဗီယက်နမ်ဒေါင်နှင့် ကုန်သွယ်လျက်ရှိကြောင်း သိရပါသည်။ သာမန်စပါးဈေးနှုန်းမှာ တစ်ကီလိုဂရမ်လျှင် ၅၁၆၁ ဗီယက်နမ်ဒေါင်ဖြင့် ၄၆ ဗီယက်နမ် ဒေါင်မြင့်တက်ခဲ့ကြောင်း VFA ၏ အဆိုအရသိရပါသည်။ An Giang ပြည်နယ် စိုက်ပျိုးမွေးမြူရေးနှင့် သဘာဝပတ်ဝန်းကျင်ဦးစီးဌာနက စပါးဈေးနှုန်းများသည် အမျိုးအစားအပေါ်မူတည်၍ တစ်ကီလိုဂရမ်လျှင် ၄၈၀၀ မှ ၅၉၀၀ ဗီယက်နမ်ဒေါင်ကြားတွင် ရပ်တည်နေကြောင်းနှင့် ပြည်နယ်၏ လက်လီဆန်ဈေးနှုန်းမှာ တစ်ကီလိုဂရမ်လျှင် ၁၂၀၀၀ မှ ၂၂၀၀၀ ဗီယက်နမ်ဒေါင်ကြားဖြစ်ကြောင်း တင်ပြခဲ့ပါသည်။ ထုတ်လုပ်မှုအပိုင်းတွင် စိုက်ပျိုးမွေးမြူရေးနှင့် သဘာဝပတ်ဝန်းကျင် ဝန်ကြီးဌာနက မဲခေါင်ဒယ်တာပြည်နယ်များသည် ၂၀၂၅ ခုနှစ် နွေရာသီ-ဆောင်းဦးရာသီ ‌ကောက်ရိတ်သိမ်းရာသီတွင် ဟတ်တာ ၁.၂၄ သန်းနီးပါးစိုက်ပျိုးခဲ့ပြီး ရိတ်သိမ်းမှု ပြီးမြောက်ပါက အထွက်နှုန်း တစ်ဟတ်တာလျှင် ၆.၀၆ သန်းရှိကာ  ခန့်မှန်းစပါးတန်ချိန် ၇.၅၁ သန်းနှင့် ညီမျှကြောင်း သိရပါသည်။ ဆောင်းဦးရာသီ-ဆောင်းရာသီကောက်ရိတ်သိမ်းရာသီအတွက်မူ  စပါးစိုက်ခင်း ၇၆၃၀၀၀ ဟတ်တာစိုက်ပျိုးပြီးဖြစ်ကြောင်း သိရပါသည်။

Vietnam Plus                                                                            

DOCA (ရန်ကုန်)