Main menu

ပြည်ပကုန်သွယ်မှုသတင်းများ

Powered by Drupal

ပင်လယ်ကွေ့နိုင်ငံများနှင့် လွတ်လပ်သောကုန်သွယ်ရေးသဘောတူညီချက်ဆွေးနွေးမှု ပြန်လည်စတင်မည့်ထိုင်းနိုင်ငံ

ပြည်ပကုန်သွယ်မှုသတင်းများ

          ထိုင်းနိုင်ငံသည် ကုန်သွယ်‌ရေး၊ ခရီးသွားကဏ္ဍနှင့် ရင်းနှီးမြှုပ်နှံမှု မြှင့်တင်ရန်အတွက် ပင်လယ်ကွေ့နိုင်ငံများနှင့် လွတ်လပ်သောကုန်သွယ်ရေးသဘောတူညီချက်(FTA) ညှိနှိုင်း ဆွေးနွေးမှုများ ပြန်လည်စတင်မည်ဟု သိရပါသည်။ ထိုင်းနိုင်ငံကုန်သွယ်ရေးကိုယ်စားလှယ် များ၏ ဥက္ကဌဖြစ်သူ Nalinee Taveesin က ပင်လယ်ကွေ့နိုင်ငံများသည် အရှေ့အလယ်ပိုင်း ဒေသတွင် ထိုင်းနိုင်ငံ၏ အရေးကြီးဆုံးဈေးကွက်အဖြစ် ကိုယ်စားပြုကြောင်း ပြောကြားခဲ့ပါ သည်။ လွန်ခဲ့သည့်နှစ်တွင် နှစ်ဖက်အပြန်အလှန်ကုန်သွယ်မှုသည် အမေရိကန်ဒေါ်လာ ၃၆ ဘီလီယံ ရှိကြောင်းသိရပါသည်။ ဖေဖော်ဝါရီလ ၁၉ ရက်နေ့တွင် Ms Nalinee သည် ပင်လယ် ‌ကွေ့ပူးပေါင်းဆောင်ရွက်ရေးအသင်း(GCC) ၏ အတွင်းရေးမှူးချုပ်ဖြစ်သူ Jasem Mohamed Albudaiwi နှင့်တွေ့ဆုံဆွေးနွေးခဲ့ကြောင်း သိရပါသည်။ နှစ်ဖက်စလုံးသည် ထိုင်းနှင့် GCC အနေဖြင့် ရှု့ထောင့်ပေါင်းစုံတစ်လျှောက် အနီးကပ်ဆက်ဆံရေးဝေမျှရန်နှင့် ကျွမ်းကျင်မှုများ ဖလှယ်ကြရန်သဘောတူခဲ့ကြကြောင်း သိရပါသည်။ Ms Nalinee က ထိုင်းနှင့် GCC သည် ခရီးသွားကဏ္ဍ အထူးသဖြင့် ကျန်းမာရေးခရီးသွားကဏ္ဍ၊ အစားအစာဖူလုံရေးနှင့် Soft power အစရှိသည့် ထိုင်းနိုင်ငံကကျွမ်းကျင်မှုအားကောင်းသည့် ဧရိယာများတွင် ပူးပေါင်း ဆောင်ရွက်ရန် အဓိကထားသင့်သည်ဟု အဆိုပြုခဲ့ကြောင်း သိရပါသည်။ နှစ်ဖက်စလုံးသည် FTA ညှိနှိုင်းဆွေးနွေးခြင်းအတွက် လုပ်ငန်းစဉ်များနှင့် အခွင့်အလမ်းများ အထူးသဖြင့် MoU ရေးထိုးနိုင်ရေးနှင့်ပတ်သတ်၍ ဆွေးနွေးခဲ့ကြကြောင်း သိရပါသည်။ Ms Nalinee သည် အစားအစာလုပ်ငန်းနယ်ပယ်မှ အများပြည်သူနှင့် ပုဂ္ဂလိကကဏ္ဍမှ ကိုယ်စားလှယ်များ ပါဝင်သည့်အဖွဲ့ကိုဦးဆောင်၍ ဆော်ဒီအာရေဗျနိုင်ငံ၏ အကြီးမားဆုံးလက်လီဆိုင်ခွဲများ ဖွင့်လှစ်ထားသည့် Othaim Supermarket မှတာဝန်ရှိသူများနှင့်တွေ့ဆုံခဲ့ကြောင်း သိရပါသည်။ ထို Supermarket လုပ်ငန်းသည် ဆော်ဒီမှစားသုံးသူများအတွက် အရည် အသွေးမြင့်သော ကုန်ပစ္စည်းများနှင့် အစားအစာများ ရောင်းချရာအချက်အချာဖြစ်ကြောင်း သိရပါသည်။ ဆွေးနွေးမှုများအတွင်း Othaim Supermarket ကထိုင်းထုတ်ကုန်များ အထူး သဖြင့် အသင့်စားအစားအစာများ၊ ပြောင်းနှင့် တူနာအပေါ် တင်သွင်းရန်စိတ်ဝင်စားမှု ပြသ ခဲ့ကြောင်း သိရပါသည်။

DOCA(ရန်ကုန်)

ထိုင်းနှင့်ဘူတန်လွတ်လပ်သောကုန်သွယ်ရေးသဘောတူညီချက်ဆွေးနွေးမှုပြီးပြတ်

ပြည်ပကုန်သွယ်မှုသတင်းများ

          ထိုင်းနှင့်ဘူတန်တို့သည် ဖေဖော်ဝါရီလ ၁၇ မှ ၁၉ ထိ ဘန်ကောက်မြို့တွင် ကျင်းပ ခဲ့သည့် လွတ်လပ်သောကုန်သွယ်ရေးသဘောတူညီချက်(FTA) အတွက် စတုတ္ထအကြိမ် မြောက် ဆွေးနွေးမှုပြီးပြတ်ခဲ့ပြီဖြစ်ကြောင်း သိရပါသည်။ ထိုင်းနိုင်ငံ စီးပွားကူးသန်းဝန်ကြီး Pichai Naripthaphan က နှစ်နိုင်ငံကြားဆွေးနွေးမှုသည် ကိုးလကျော်အကြာတွင် အဆုံးသတ်နိုင်ခဲ့ကြောင်း ပြောကြားခဲ့ပါသည်။ ထို FTA သည်ထိုင်းနိုင်ငံ၏ ၁၇ ခုမြောက် ကုန်သွယ်ရေးသဘောတူညီချက်ဖြစ်ခဲ့ပြီး Mr Pichai တာဝန်ယူသည့်ကာအတွင်း ဒုတိယ အကြိမ်မြောက်ဖြစ်ကြောင်း သိရပါသည်။ နှစ်နိုင်ငံစလုံးသည် ထို FTA ကို ဧပြီလ ၂ ရက်နေ့မှ ဧပြီလ ၄ ရက်နေ့ထိ ထိုင်းနိုင်ငံကအိမ်ရှင်အဖြစ်ကျင်းပမည့် Bimstec Leader’s Summit တွင် လက်မှတ်ရေးထိုးရန် စီစဉ်ထားကြောင်း သိရပါသည်။ ထိုသဘောတူညီချက်သည် အဓိကအားဖြင့် ကုန်စည်ကုန်သွယ်ရေးနှင့် စီးပွားရေးပူးပေါင်း‌ဆောင်ရွက်မှု မြှင့်တင်ရေးကို အဓိကထားကြောင်း သိရပါသည်။ ဘူတန်သည် မော်တော်ကားများ၊ စိုက်ပျိုးမွေးမြူရေးကုန် ပစ္စည်းများ၊သစ်သီးခြောက်နှင့် အသင့်စားခေါက်ဆွဲခြောက်ပါဝင်သည့် ပြုပြင်ထုတ်လုပ်ထား သည့်အစားအစာများ၊ အဝတ်အထည်များ၊ ဓာတုပစ္စည်းများနှင့် လျှပ်စစ်ပစ္စည်းများပါဝင် သည့် များစွာသောထိုင်းထုတ်ကုန်များကို တင်သွင်းရန် စိတ်ဝင်စားမှုကို ပြသခဲ့ကြောင်း သိရ ပါသည်။ FTA သည် ခရီးသွားကဏ္ဍ၊ စိုက်ပျိုးမွေးမြူရေး၊  လုပ်သားထုလေ့ကျင့်ရေးနှင့် ပြည့်ဖြိုးမြဲစွမ်းအင် အစရှိသည့် ကဏ္ဍများတွင် ပူးပေါင်းဆောင်ရွက်မှုအားကောင်းရန် ရည်ရွယ်ကြောင်း သိရပါသည်။ Mr Pichai က ဘူတန်သည် ထိုင်းပို့ကုန်များအတွက် ရေရှည် အာမခံချက်ရှိသော ဈေးကွက် ဖြစ်ကြောင်း ပြောကြားခဲ့ပါသည်။ နိုင်ငံသေးငယ်သော်လည်း ဘူတန်၏စီးပွားရေးသည် သိသာစွာကြီးထွားမှုအလားအလာရှိပြီး ၎င်းတို့၏စားသုံးသူများက လည်း အရည်အသွေး ပြည့်မီသော ထိုင်းထုတ်ကုန်များကို ဦးစားပေးမှုပြသနေကြောင်း သိရပါသည်။ FTA လက်မှတ်ရေးထိုးခြင်းအတွက် ဆက်လက်ပြင်ဆင်ရန် ထိုင်းနိုင်ငံကုန်သွယ်ရေး ညှိနှိုင်းဆွေးနွေးမှုဦးစီးဌာနသည် များစွာသောကဏ္ဍများထံမှ အချက်အလက်များစုစည်းကာ မတ်လတွင် အစည်းအဝေးများကျင်းပရန် စီစဉ်ထားကြောင်း သိရပါသည်။ ထိုမှတစ်ဆင့် ခွင့်ပြုချက်ရရှိရန် အထက်လွှတ်တော်သို့ တင်ပြမည်ဟု သိရပါသည်။ ၂၀၂၄ ခုနှစ်တွင် နှစ်နိုင်ငံကြားအပြန်အလှန်ကုန်သွယ်မှုသည် ဘတ် ၄၆၀ မီလီယံရှိပြီး ထိုင်းနိုင်ငံကဘူတန် သို့တင်ပို့မှုမှာ ဘတ် ၄၅၇ မီလီယံ ရှိကာ ပြန်လည်တင်သွင်းမှုမှာ ဘတ် ၃.၄၇ မီလီယံ ရှိကြောင်း သိရပါသည်။ အဓိကထိုင်းပို့ကုန်များတွင် မော်တော်ယာဉ်များ၊ အသင့်စားအစား အစာများ၊ လျှပ်စစ်ပစ္စည်းများနှင့် ပြုပြင်ထုတ်လုပ်ထားသည့် သစ်သီးများပါဝင်သည်ဟု သိရ ပါသည်။ ဘူတန်ထံမှအဓိကသွင်းကုန်များတွင် ဟင်းသီးဟင်းရွက်များ၊ သစ်သီးများ၊ သစ်ထုတ်ကုန်များနှင့် ဆော်ဒါနှင့်ဘိလပ်ရေအစရှိသည့် အဖျော်ယမကာတို့ပါဝင်ကြောင်း သိရပါသည်။

DOCA(ရန်ကုန်)

အမေရိကန်ဈေးကွက်သို့ red snapper ပင်လယ်ငါးတင်ပို့မှုအရှိန်မြှင့်တင်ရန် အင်ဒိုနီးရှားကြိုးပမ်း

ပြည်ပကုန်သွယ်မှုသတင်းများ

          အင်ဒိုနီးရှားနိုင်ငံသည် အမေရိကန်ဈေးကွက်သို့ red snapper ပင်လယ်ငါး တင်ပို့မှု အရှိန်မြှင့်တင်ရန် ရည်ရွယ်ထားကြောင်း အမေရိကန်နိုင်ငံဆိုင်ရာ အင်ဒိုနီးရှားကုန်သွယ်ရေး သံမှူး Ranitya Kusumadewi ၏ အဆိုအရ သိရပါသည်။ သံမှူးသည် အင်ဒိုနီးရှား၏ ပင်လယ်စာတင်ပို့မှုတိုးချဲ့ရန်အတွက် အခွင့်အလမ်းမျာကိုဆွေးနွေးရန် မေရီလင်းပြည်နယ် ကိုလမ် ဘီယာမြို့တွင် ပင်လယ်စာထုတ်ကုန်တင်သွင်းသည့်လုပ်ငန်းဖြစ်သည့် Charoen Pokphand Foods (CPF) နှင့် တွေ့ဆုံခဲ့ကြောင်း သိရပါသည်။ ထိုအစည်းအဝေးအတွင်း သံမှူးသည် အမေရိကန်ဈေးကွက်အတွင်း ပင်လယ်စာထုတ်ကုန်များအတွက် ဝယ်လိုအား ကြီးထွားလာမှုကို အသားပေးပြောကြားခဲ့ကြောင်း သိရပါသည်။ CPF အစရှိသည့် သွင်းကုန် လုပ်ငန်းများသည်လည်း ထုတ်ကုန်အမျိုးအစားကွဲပြားစွာ တင်သွင်းမှုမြင့်တက်လာကြောင်း သိရပါသည်။ ကုမ္ပဏီသည် တူနာ၊ ကင်းမွန်နှင့် တီလားပီးယားငါးအစရှိသည့် အခြား ထုတ်ကုန်များ အား အမျိုးအစားကွဲပြားစွာ တင်သွင်းလျှက်ရှိကြောင်း သိရပါသည်။ red snapper အတွက် CPF ၏ဝယ်လိုအားသည် ပျမ်းမျှတစ်လလျှင် ကွန်တိန်နာ ၂၀ ပတ်လည် ရှိကြောင်း သိရပါသည်။ ထိုသို့ကနဦးတင်ပို့နိုင်ပါက ထိုငါးအတွက် နှစ်စဉ် ခန့်မှန်းအမေရိကန် ဒေါ်လာ ၂.၅ သန်း ရရှိမည်ဟု သိရပါသည်။ သံမှူးက အင်ဒိုနီးရှားသည် CPF နှင့်မိတ်ဆက် ပေးနိုင်ရန်အတွက် အလာအလာရှိသော ရောင်းချသူများကိုစုစည်းရာ သက်ဆိုင်ရာလုပ်ငန်း ရှင်များနှင့်လုပ်ကိုင်သွားမည်ဟု သိရပါသည်။ တင်ပို့မှုတိုးချဲ့ရန်အလားအလာနှင့်ပတ်သတ်၍ ဆွေးနွေးချင်အပြင် အင်ဒိုနီးရှားတင်ပို့သူများသည် တူနာ၊ Grouper ငါး၊ တီလားပီးယားငါးနှင့် ကင်းမွန်အစရှိသည့် အခြားပင်လယ်စာထုတ်ကုန်များတင်ပို့နိုင်ရန် အခွင့်အလမ်းများကို ရှာဖွေသွားမည်ဟု သိရပါသည်။ ၂၀၂၄ ခုနှစ်တွင် အမေရိကန်သည် အမေရိကန်ဒေါ်လာ ၂၁ ဘီလီယံဖြင့် ကမ္ဘာ့အကြီးဆုံးရေထွက်ကုန်တင်သွင်းသည့်နိုင်ငံဖြစ်ကြောင်း သိရပါသည်။ အမေရိကန်ကအဓိကတင်သွင်းသည့်ရေထွက်ကုန်များမှာ ပုဇွန်၊ ဆယ်မွန်၊ တူနာနှင့် အဖြူရောင်ငါးတို့ဖြစ်ကြောင်း သိရပါသည်။ တစ်ချိန်တည်းမှာပင် အင်ဒိုနီးရှားသည် အမေ ရိကန်ဒေါ်လာ ၁.၁၅ ဘီလီယံဖြင့် အမေရိကန်၏ ၇ မြောက်အကြီးမားဆုံးတင်သွင်းသည့် နိုင်ငံဖြစ်ကြောင်း သိရပါသည်။ အမေရိကန်သို့အဓိကရေထွက်ကုန်တင်ပို့သည့် နိုင်ငံများတွင် ချီလီကဦးဆောင်နေပြီး ၎င်း၏နောက်တွင် ကနေဒါ၊ အိန္ဒိယ၊ အီကွေဒေါနှင့်နော်ဝေတို့ ရပ်တည်နေကြောင်း သိရပါသည်။

DOCA(ရန်ကုန်)

စင်ကာပူ၏ ၉ ခုမြောက်အကြီးမားဆုံး ကုန်သွယ်ရေးမိတ်ဖက်ဖြစ်လာသည့် ဗီယက်နမ်

ပြည်ပကုန်သွယ်မှုသတင်းများ

          ဇန်နဝါရီလတွင် ဗီယက်နမ်သည် စင်ကာပူ၏ ၉ ခုမြောက်အကြီးမားဆုံး ကုန်သွယ် ရေးမိတ်ဖက်ဖြစ်လာပြီး နှစ်နိုင်ငံအပြန်အလှန်ကုန်သွယ်မှုမှာ စင်ကာပူဒေါ်လာ ၃.၃၉ ဘီလီယံရှိကာ ၂၀၂၄ ခုနှစ် ဇန်နဝါရီလထက် ၁၆.၈၃ ရာခိုင်နှုန်း မြင့်တက်ခဲ့ကြောင်း နောက်ဆုံးကုန်သွယ်ရေးအချက်အလက်များအရ သိရပါသည်။ စင်ကာပူ၏ကော်ပိုရိတ်စီမံခ န့်ခွဲရေးအေဂျင်စီထံမှအချက်အလက်များအရ ဇန်နဝါရီလတွင် စင်ကာပူ၏ စုစုပေါင်း ကုန်သွယ်မှုတန်ဖိုးသည် စင်ကာပူဒေါ်လာ ၁၁၄.၁၅ ဘီလီယံရှိပြီး ၂၀၂၄ ခုနှစ် ဇန်နဝါရီလထက် ၆.၇၅ ရာခိုင်နှုန်းမြင့်တက်ခဲ့ကြောင်း သိရပါသည်။ တင်ပို့မှုတန်ဖိုးမှာ စင်ကာပူဒေါ်လာ ၅၉.၄ ဘီလီယံဖြင့် ၂.၉၇ ရာခိုင်နှုန်းမြင့်တက်ခဲ့ပြီး တင်သွင်းမှုမှာ စင်ကာပူ ဒေါ်လာ ၅၄.၇၅ ဘီလီယံဖြင့် ၁၁.၁၇ ရာခိုင်နှုန်းမြင့်တက်ခဲ့ကြောင်း သိရပါသည်။ စင်ကာပူ၏ ထိပ်တန်းကုန်သွယ်ရေးမိတ်ဖက်များတွင် ထိုင်ဝမ်၊ မလေးရှား၊ တရုတ်နှင့် အမေရိကန် တို့ပါဝင်ပြီး အပြန်အလှန်ကုန်သွယ်မှုမှာ စင်ကာပူဒေါ်လာ ၁၄.၉ ဘီလီယံ၊ စင်ကာပူဒေါ်လာ ၁၃.၂ ဘီလီယံ၊ စင်ကာပူဒေါ်လာ ၁၂.၈ ဘီလီယံနှင့် စင်ကာပူဒေါ်လာ ၁၁.၂၁ ဘီလီယံ အသီးသီး ရှိကြောင်း သိရပါသည်။ ဗီယက်နမ်သည် စင်ကာပူဒေါ်လာ ၂.၅၆ ဘီလီယံဖြင့် စင်ကာပူ၏ ၈ ခုမြောက်အကြီးမားဆုံးတင်ပို့ရာဈေးကွက်ဖြစ်ပြီး ပြန်လည်တင်သွင်းမှုမှာ စင်ကာပူဒေါ်လာ ၇၉၄ သန်းဖြင့် စင်ကာပူ၏ ၁၅ ခုမြောက်အကြီးမားဆုံး တင်သွင်းရာ ဈေးကွက်ဖြစ်ကြောင်း သိရပါသည်။  စက်ပစ္စည်း၊ မိုဘိုင်းဖုန်းများနှင့် အစိတ်အပိုင်းများ( ၄၆.၀၂ ရာခိုင်နှုန်း)၊ ဓာတ်ပေါင်းဖိုများ၊ဘွိုင်လာများနှင့် အစိတ်အပိုင်းများ( ၄၇ ရာခိုင်နှုန်း) နှင့် မှန်ထုတ်ကုန်များ( ၅၈.၉၁ ရာခိုင်နှုန်း) ပါဝင်သည့် စင်ကာပူသို့ ဗီယက်နမ်၏ အဓိကပို့ကုန်များမှာ သိသာထင်ရှားစွာကြီးမားခဲ့ကြောင်း သိရပါသည်။ အခြား သိသာထင်ရှား စွာ မြင့်တက်ခဲ့သည့် ပို့ကုန်များတွင် ဓာတ်ခွဲခန်းနှင့်စမ်းသပ်ခန်းသုံးပစ္စည်းများ၊ ဆေးပစ္စည်း များနှင့် ဆန်တို့ပါဝင်ကြောင်း သိရပါသည်။ တစ်ချိန်တည်းမှာပင် စက်ပစ္စည်းနှင့် အစိတ်အပိုင်းများ(၉.၃၃ ရာခိုင်နှုန်း)၊ ရေနံထွက်ကုန်များ( ၁၀၇.၈၇ ရာခိုင်နှုန်း)နှင့် ဆေးဝါး များ(၉၆ ရာခိုင်နှုန်း) အစရှိသည့် စင်ကာပူမှ ဗီယက်နမ်သို့ အဓိကပို့ကုန်များသည်လည်း သိသာထင်ရှားစွာ ကြီးထွားခဲ့ကြောင်း သိရပါသည်။ လွန်ခဲ့သည့်နှစ်တွင် ဗီယက်နမ်သည် စင်ကာပူ၏ ၁၁ ခုမြောက်အကြီးမားဆုံးကုန်သွယ်‌ရေးမိတ်ဖက်ဖြစ်ကြောင်း သိရပါသည်။

DOCA(ရန်ကုန်)

 

ဗီယက်နမ်ထံမှဆန်ဖြူ တန် ၁၀၀၀၀၀ တင်သွင်းမည့်ဘင်္ဂလားဒေ့ရှ်

ပြည်ပကုန်သွယ်မှုသတင်းများ

          အစိုးရနှစ်ရပ်ကြားပူးပေါင်းဆောင်ရွက်ရေးသဘောတူညီချက်အောက်တွင် ဘင်္ဂလား ဒေ့ရှ်သည် ဗီယက်နမ်ထံမှ ဆန်ဖြူ တန် ၁၀၀၀၀၀ တင်သွင်းမည်ဟု သိရပါသည်။ ရောင်းချမည့်ဈေးနှုန်းမှာ တစ်တန်လျှင် အမေရိကန်ဒေါ်လာ ၄၇၄.၂၅ ဖြစ်ပြီး ဆန်ဖြူအတွက် ပုံမှန်နိုင်ငံတကာဈေးနှုန်းထက် မြင့်မားခြင်းက ဗီယက်နမ်ဆန်၏ အရည်အသွေးတည်ငြိမ်မှု နှင့် အားကောင်းသောတည်ရှိမှုကို ရောင်ပြန်ဟပ်နေကြောင်း သိရပါသည်။ ဗီယက်နမ်ထံမှ ဆန်ဖြူ အကြီးစားတင်သွင်းမှုသည် အစာအစာဈေးနှုန်းများတည်ငြိမ်စေရေး ဘင်္ဂလားဒေ့ရှ် ၏ မဟာ ဗျူဟာတစ်စိတ်တစ်ပိုင်းဖြစ်ကြောင်းနှင့် အထူးသဖြင့် ဖေဖော်ဝါရီလတွင် စတင် အကောင် အထည်ဖော်သည့် ၎င်းတို့၏ တံခါးဖွင့်ဈေးကွက်ရောင်းချမှု ပရိုဂရမ်ကြောင့် ဖြစ်ကြောင်း သိရပါသည်။ ထိုအစီအစဉ်အောက်တွင် အစိုးရသည် နေ့စဉ်ဆန်တန်ချိန် ၉၀၇ တန်ကို နိုင်ငံတစ်ဝှမ်းရှိ စင်တာ ၉၀၆ ခုမှတစ်ဆင့် မြို့တော်ဒါကာအပါအဝင် အဓိကမြို့ကြီး များနှင့် လုပ်သားထုများပြားသောဒေသများတွင် ဖြန့်ဖြူးမည်ဟုသိရပါသည်။ ဆန်ကို ဝင်ငွေ နည်းပါးသောလူများ ဝယ်ယူနိုင်သောဈေးနှုန်းဖြစ်သည့် တစ်တန်လျှင် အမေရိကန် ဒေါ်လာ ၂၄၃ ခန့်ဖြင့် ရောင်းချမည်ဟု သိရပါသည်။ ဘင်္ဂလားဒေ့ရှ်သည် တောင်အာရှ၏ အကြီးမားဆုံး ဆန်ထုတ်လုပ်သူများထဲမှ တစ်ခုဖြစ်ပါသည်။ သို့သော် နိုင်ငံသည် ရောင်းလိုအားနှင့် ဝယ်လိုအားတည်ငြိမ်စေရန်အတွက် ဆန်တင်သွင်းရန် လိုအပ်နေကြောင်း သိရပါသည်။ ၂၀၂၃ ခုနှစ်တွင် ဘင်္ဂလားဒေ့ရှ်သည် ဆန်တန်ချိန် ၂ သန်း နီးပါးကို အိန္ဒိယ၊ ထိုင်း၊ ဗီယက်နမ်နှင့် မြန်မာပါဝင်သည့် နိုင်ငံများထံမှ တင်သွင်းခဲ့ကြောင်း သိရပါသည်။ ဆန်တန်ချိန် ၁၀၀၀၀၀ တင်ပို့မှုသည် ကမ္ဘာ့ဈေးကွက်တွင် ဗီယက်နမ်ဆန်အတွက် အားကောင်းသောတည်ရှိမှုကို သေချာမှုပြခဲ့ခြင်းဖြစ်ကြောင်း သိရပါသည်။ ထို့ပြင် လယ်သမားများကိုလည်း တင်ပို့သည့် စံနှုန်း နှင့် ကိုက်ညီသည့် အရည်အသွေးမြင့်မားသော ဆန်စိုက်ပျိုးရန်နှင့် ဗီယက်နမ်ဆန်၏ စီးပွားရေး တန်ဖိုးမြှင့်တင်ရန် တွန်းအားပေးနိုင်ခဲ့ ကြောင်း သိရပါသည်။ လတ်တလောနှစ်များအတွင်း ဗီယက်နမ်သည် ထုတ်ကုန်အရည် အသွေး မြှင့်တင်ရန် သိသာစွာအဆင့်မြှင့်တင်ခြင်း၊ တင်ပို့ရာဈေးကွက်များကွဲပြားခြင်းနှင့် ထောက်ပံ့မှုကွင်းဆက်မြှင့်တင်ခြင်းတို့ ပြုလုပ်ခဲ့ကြောင်း သိရပါသည်။ ပိုမိုကောင်းမွန်သော အရည်အသွေးနှင့် မြင့်မားသောအထွက်နှုန်းနှင့် ဆန်မျိုးစုံတို့ သည် ဗီယက်နမ်အား ထိုင်းနှင့် အိန္ဒိယပါဝင်သည့် အဓိက ဆန်တင်ပို့သည့်နိုင်ငံများနှင့် ယှဉ်ပြိုင်နိုင်ရန် ကူညီပေးနိုင်မည်ဟု သိရပါသည်။ ဘင်္ဂလားဒေ့ရှ်အပြင် ဗီယက်နမ်သည် တရုတ်၊ ဖိလစ်ပိုင်၊ အင်ဒိုနီးရှားနှင့် များစွာသောအာဖရိကနိုင်ငံများပါဝင်သည့် အခြားဈေးကွက်များ၏ အဓိကဆန်တင်ပို့သူ ဖြစ်ကြောင်း သိရပါသည်။ ၂၀၂၄ ခုနှစ်တွင် ဗီယက်နမ်သည် ဆန်တန်ချိန် ၈ သန်းတင်ပို့ရာမှ ဝင်ငွေ အမေရိကန်ဒေါ်လာ ၅ ဘီလီယံ ရရှိခဲ့ကြောင်း သိရပါသည်။

DOCA(ရန်ကုန်)

Air Cambodia သည် ထိုင်းနိုင်ငံသို့ အသွားအပြန်ဝန်ဆောင်မှုကို စတင်ခဲ့

ပြည်ပကုန်သွယ်မှုသတင်းများ

          နိုင်ငံတော်လေကြောင်းလိုင်း Air Cambodia သည် Air Bus 320 321 လေယာဉ်ကို အသုံးပြု၍ ပထမဆုံးအသွားအပြန်ခရီးသည် ၃၀၀ ကျော်ကို ၁၇-၂-၂၀၂၅ ရက်နေ့တွင်စတင် ပျံသန်းခဲ့ပြီး ထိုင်းနိုင်ငံသို့ နေ့စဉ်ပျံသန်းမှုဝန်ဆောင်မှုအသစ်ကို စတင်ဖွင့်လှစ်ခဲ့သည်။ Air Cambodia ၏ ဒုတိယဥက္ကဋ္ဌ နှင့် အမှုဆောင်အရာရှိချုပ် Zhan David မှ Air Cambodia သည် လေယာဉ်အသုံးပြုမှု သိသိသာသာတိုးတက်ကောင်းမွန်လာပြီး ၎င်းတို့၏လုပ်ငန်း လမ်းကြောင်းကွန်ရက်ကို တိုးချဲ့ခဲ့ခြင်းဖြစ်ကြောင်းပြောကြားခဲ့သည်။ ကုမ္ပဏီသည် လုံခြုံမှု ရှိပြီး သက်တောင့်သက်သာရှိသော လေကြောင်းခရီးသွားလာရေးဝန်ဆောင်မှုများကို အမြဲတမ်း ဆောင်ရွက်ပေးခဲ့ကြောင်း Zhan David ကဆက်လက်ပြောကြားခဲ့သည်။ Air Cambodia သည် ၎င်း၏ ပြည်တွင်းနှင့်နိုင်ငံတကာ လေကြောင်းဝန်ဆောင်မှုကွန်ရက်ကို စဉ်ဆက်မပြတ် တိုးချဲ့သွားရန်စီစဉ်နေကြောင်းနှင့်လေကြောင်းလိုင်းသည် ၂၀၂၄ ခုနှစ်တွင် လေယာဉ်အသစ် ၃ စင်းကိုဝယ်ယူနိုင်ခဲ့ကြောင်းပြောကြားခဲ့သည်။ ထို့အပြင် Air Cambodia သည် လေကြောင်း ခရီးသွားလာမှု လိုအပ်ချက်ကြီးထွားလာခြင်းနှင့် ကမ္ဘောဒီးယားနိုင်ငံ၏ လေကြောင်းကဏ္ဍ ကြီးထွားလာမှုတို့ကြောင့် ၂၀၂၆ ခုနှစ်ဝန်းကျင်တွင်  နိုင်ငံတကာလမ်းကြောင်းများ စတင် ပြေးဆွဲရန် အစီအစဉ်ဖြင့် ဂျပန်၊ တောင်ကိုရီးယားနှင့် အခြားနိုင်ငံခြား ခရီးစဉ်များကို အမြန်ဆုံး စတင်ပျံသန်းရန် စီစဉ်လျက်ရှိသည်။ ကမ္ဘောဒီးယားနိုင်ငံတကာ လေဆိပ် (၃) ခုမှ ခရီးသည် စုစုပေါင်း ၆.၂ သန်းကို စံချိန်တင်ဝန်ဆောင်မှုများပေးခဲ့ကြောင်းနိုင်ငံခြားဝန်ကြီးရုံး၊ လေကြောင်း ပို့ဆောင်ရေးရုံး (SSCA) ၏ အစီရင်ခံစာအရ သိရသည်။

DOCA(ရန်ကုန်)

အထူးစီးပွားရေးဇုန်များတွင် ရင်းနှီးမြှုပ်နှံမှုအခွင့်အလမ်းများရှာဖွေကြရန် MoC ဝန်ကြီး တိုက်တွန်း

ပြည်ပကုန်သွယ်မှုသတင်းများ

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီး Cham Nimul က ၎င်း၏ ဩစတြေးလျသို့ တရားဝင်ခရီးစဉ်အတွင်း ကမ္ဘောဒီးယားအထူးစီးပွားရေးဇုန်များတွင် ရင်းနှီး မြှုပ်နှံမှုအခွင့်အလမ်းများရှာဖွေကြရန် ဩစတြေးလျလုပ်ငန်းရှင်များကို တိုက်တွန်းခဲ့သည်။ Cham Nimul က ဩစတြေးလျနိုင်ငံ၊ နိုင်ငံခြားရေးနှင့် ကုန်သွယ်မှုဝန်ကြီး ဌာနရှိ အရှေ့တောင် အာရှဒေသနှင့် ပြည်မကြီး၏ လက်ထောက်အတွင်းဝန် Robyn Mudie နှင့် တွေ့ဆုံစဉ် နှစ်ဖက်ကုန်သွယ်မှု၊ ဒစ်ဂျစ်တယ်အသွင်ကူးပြောင်းရေး၊ လူစွမ်းအားအရင်းအမြစ်တည်ဆောက် ရေး၊ အင်ဒို-ပစိဖစ်ဒေသ၏ အနာဂါတ်နှင့် ကျား/မ တန်းတူညီမျှရေးအပါအဝင် အဓိက အကြောင်းအရာများကို ဆွေးနွေးခဲ့ကြသည်။ ထို့အပြင် နိုင်ငံတကာကုန်သွယ်မှု၊ အာဆီယံ ဈေးကွက်နှင့်ပတ်သက်သည့် အကြောင်းအရာများစွာကိုလည်း အမြင်ခြင်းဖလှယ် ဆွေးနွေးခဲ့ကြ သည်။ ဥပဒေအခြေခံမူများကိုအခြေခံ၍ နိုင်ငံစုံကုန်သွယ်မှုစနစ်ကို အကောင်အထည်ဖော်ရန် အလေးပေးဆွေးနွေးခဲ့ကြသည်။ Cham Nimul နှင် ဩစတေးလျနိုင်ငံ၊ ကုန်သွယ်ရေး လက်ထောက်ဝန်ကြီး  Tim Ayres နှင့်သီးခြားတွေ့ဆုံခဲ့ပြီး နှစ်နိုင်ငံကုန်သွယ်မှု၊ ဆက်ဆံရေးနှင့် ပူးပေါင်းဆောင်ရွက်မှုအားကောင်းစေရန် အခွင့်အလမ်းများကို ဆွေးနွေးခဲ့ကြသည်။ နှစ်ဖက်လုံးမှ ကမ္ဘောဒီးယားဆန်၏ အရည်အသွေးနှင့်အလားအလာများအပြင် လူ့စွမ်းအား အရင်းအမြစ်ဖွံ့ဖြိုးတိုးတက်ရေး၊ ပညာရေးနှင့်ကျွမ်းကျင်မှုသင်တန်းများနှင့် ကျန်းမာရေး စောင့်ရှောက်မှု တို့နှင့်စပ်လျဉ်း၍ ကမ္ဘောဒီးယားနိုင်ငံတွင် ဩစတြေးလျရင်းနှီးမြှုပ်နှံမှုများ  တိုးလာမည့် အလားအလာများကို ဆွေးနွေးခဲ့ကြသည်။

DOCA(ရန်ကုန်)

တောင်အာဖရိကသို့ ဆန်တန်ချိန် ၃ သိန်းတင်ပို့ရန် စာချုပ်ချုပ်ဆိုမည်ဟု ထိုင်းဝန်ကြီးပြောကြား

ပြည်ပကုန်သွယ်မှုသတင်းများ

          ထိုင်းနိုင်ငံအနေဖြင့် တောင်အာဖရိကနိုင်ငံသို့ တန်ဖိုးအားဖြင့် ဘတ်ငွေ ၅.၂၅ ဘီလီယံ (ဒေါ်လာ ၁၅၆ သန်း) ရှိသော ဆန်တန်ချိန် ၃၀၀၀၀၀ ကို တင်ပို့ရန်အတွက် ရှေ့လာမည့်လအတွင်း စာချုပ်ချုပ်ဆိုသွားမည်ဖြစ်သည်ဟု ထိုင်းကူးသန်းရောင်းဝယ်ရေးဝန်ကြီး Pichai Naripthaphan က ဖေဖော်ဝါရီ ၁၈ ရက်နေ့တွင် ပြောဆိုခဲ့ကြောင်း ရိုက်တာသတင်းဌာနက ဖော်ပြပါသည်။

          အလားတူ ပြည်တွင်း၌ ပိုလျှံလျက်ရှိသော ဆန်လက်ကျန်ပမာဏကို လျှော့ချနိုင်ရန် အတွက် တရုတ်နိုင်ငံသို့ ဆန်မက်ထရစ်တန်ချိန် ၂၈၀၀၀၀ ကိုလည်း တင်ပို့ရောင်းချနိုင်ရေး ထိုင်း အစိုးရက စေ့စပ်ညှိနှိုင်း ဆွေးနွေးလျက်ရှိသည်ဟု ထိုင်းကူးသန်းရောင်းဝယ်ရေး ဝန်ကြီးဌာန၏ ထုတ်ပြန်ချက်တွင် ဖော်ပြထားပါသည်။

Source: Reuters, 18 Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဇီဝဒီဇယ် ၅၀ ရာခိုင်နှုန်း အစီအစဉ် ၂၀၂၆ ခုနှစ်၌ ဖော်ဆောင်နိုင်ရန် အင်ဒိုနီးရှား လေ့လာနေ

ပြည်ပကုန်သွယ်မှုသတင်းများ

          အင်ဒိုနီးရှားနိုင်ငံအနေဖြင့် ဇီဝဒီဇယ်ဆီတွင် စားအုန်းဆီ ၅၀ ရာခိုင်နှုန်းအထိ ပါဝင်ရောစပ် ၍ အသုံးပြုရေးကို အကောင်အထည်ဖော်ဆောင်နိုင်မည့် အခြေအနေနှင့် လေယာဉ်ဆီ၌ စားအုန်း ဆီ ၃ ရာခိုင်နှုန်း ရောစပ်သုံးစွဲနိုင်မည့် အလားအလာတို့ကို လေ့လာဆန်းစစ်လျက်ရှိသည်ဟု စွမ်းအင်ဝန်ကြီးဌာနမှ အကြီးတန်းအရာရှိ Eniya Listiani Dewi က ဖေဖော်ဝါရီ ၁ ရက်နေ့၌ လွှတ်တော်အမတ်များသို့ ရှင်းလင်းပြောဆိုခဲ့သည်။

          ကမ္ဘာ့အကြီးမားဆုံး စားအုန်းဆီထုတ်လုပ်သည့် အင်ဒိုနီးရှားနိုင်ငံသည် ယခုနှစ်တွင် ဇီဝ ဒီဇယ်ဆီ၌ စားအုန်းဆီ ရောစပ်သုံးစွဲမှုကို ၃၅ ရာခိုင်နှုန်းမှ ၄၀ ရာခိုင်နှုန်းသို့ မဖြစ်မနေ မြှင့်တင် သုံးစွဲသည့် B40  အစီအစဉ်ကို ဆောင်ရွက်ခဲ့သည်။

          နိုင်ငံ၏ မဖြစ်မနေဖော်ဆောင်မည့် ဇီဝဒီဇယ်ဆီ အစီအစဉ်အား အထောက်အပံ့ပေးရန် အတွက် အစိုးရသည် ဆီအုန်းစိုက်ခင်းရန်ပုံငွေ ရူပီးယား ၃၅.၄၇ ထရီလီယံ (ဒေါ်လာ ၂.၂ ဘီလီယံ) ကို ခွဲဝေပေးမည်ဖြစ်ကြောင်း၊ ယခုနှစ်တွင် ရောင်းချမည့် ဇီဝဒီဇယ်ဆီ ကီလိုလီတာပေါင်း ၁၅.၆၂ သန်း၏ ထက်ဝက်ခန့်အတွက် အစိုးရက အထောက်အပံ့ပေးလိမ့်မည်ဖြစ်ကြောင်း Eniya Listiani Dewi က ပြောကြားခဲ့သည်။

Source: Reuters, 18 Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

၂၀၂၅ ခုနှစ်၌ စားအုန်းဆီထုတ်လုပ်မှု အသင့်အတင့် တိုးတက်မည်ဟု CPOPC ကောင်စီ ခန့်မှန်း

ပြည်ပကုန်သွယ်မှုသတင်းများ

          မလေးရှား၊ အင်ဒိုနီးရှား၊ ဟွန်ဒူးရပ်စ် နှင့် ပါပူဝါနယူးဂီနီနိုင်ငံတို့၌ ၂၀၂၅ ခုနှစ် စားအုန်းဆီ ထုတ်လုပ်မှုသည် ၂၀၂၄ ခုနှစ်နှင့်နှိုင်းယှဉ်ပါက အသင့်အတင့်တိုးတက်လာမည်ဟု စားအုန်းဆီ ထုတ်လုပ်သောနိုင်ငံများကောင်စီ (CPOPC) က ခန့်မှန်းထားကြောင်း The Star သတင်းဌာနက ဖေဖော်ဝါရီလ ၁၄ ရက်နေ့တွင် ဖော်ပြထားသည်။

          CPOPC ၏ စားအုန်းဆီစျေးကွက် နှစ်ပတ်လည် အစီရင်ခံစာနှင့် ၂၀၂၅ ခုနှစ်အတွက် အလားအလာ ခန့်မှန်းချက်တွင် အင်ဒိုနီးရှား၏ စားအုန်းဆီထုတ်လုပ်မှုမှာ ပြန်လည်ကောင်းမွန် လာမည်ဟု မျှော်လင့်ထားသော်လည်း အထွက်ပမာဏ တိုးတက်မှုရပ်တန့်ခြင်းနှင့် အထွက်နှုန်း ကျဆင်းခြင်း၊ ဆီအုန်းအပင်အိုများနှင့် သီးနှံမဖြစ်ထွန်းသော ဆီအုန်းပင်အရေအတွက် တိုးတက် များပြားလာခြင်းနှင့် ဆီအုန်းပြန်လည်စိုက်ပျိုးမှု နည်းပါးခြင်းတို့ကြောင့် စားအုန်းဆီထုတ်လုပ်မှု အသင့်အတင့်သာ တိုးတက်လာနိုင်ဖွယ်ရှိမည်ဖြစ်ကြောင်း CPOPC က မှတ်ချက်ပြုဖော်ပြခဲ့သည်။

          ၂၀၂၄ ခုနှစ်၏ နောက်ဆုံးသုံးလပတ်တွင် ကြုံတွေ့ရသည့် စိုစွတ်သော ရာသီဥတု အခြေ အနေများ၊ ၂၀၂၅ ခုနှစ်၌ မုတ်သုံရာသီဥတုနှင့် အားပျော့သော လာနီညာဖြစ်စဉ်တို့ အပါအဝင် ဒေသတွင်းရာသီဥတု ပြောင်းလဲမှုဖြစ်စဉ်များနှင့် ၂၀၂၅ ခုနှစ် မတ်မှ မေလ အတွင်း ပေါ်ပေါက်နိုင် ခြေရှိသည့် အယ်လ်နီညိုဖြစ်စဉ်ပျက်ပြယ်မှုများက စားအုန်းဆီ ထုတ်လုပ်မှုအပေါ် သက်ရောက်မှုရှိ နိုင်ကြောင်း သိရပါသည်။

          ၂၀၂၅ ခုနှစ်တွင် စားအုန်းဆီထုတ်လုပ်မှုနှင့် အထွက်နှုန်းကို ဆုံးဖြတ်ရာတွင် ရာသီဥတု အခြေအနေ မရေရာမသေချာမှုများသည် အရေးကြီးသောအခန်းကဏ္ဍမှ ပါဝင်လိမ့်မည်ဟု CPOPC က ဆိုသည်။ ဝယ်လိုအားဘက်တွင်မူ အင်ဒိုနီးရှား၌ စားအုန်းဆီကို အချိုးကျ ရောနှော အသုံးပြု သည့် ဇီဝဒီဇယ်အစီအစဉ်အတွက် ပြည်တွင်းအသုံးပြုမှုမြင့်မားလာခြင်းကြောင့် ယခု ၂၀၂၅ ခုနှစ် တွင် စားအုန်းဆီဝယ်လိုအား အားကောင်းမည်ဟု မျှော်လင့်ကြောင်း၊ တရုတ်နှင့် အိန္ဒိယကဲ့သို့ အဓိက စားအုန်းဆီတင်သွင်းသူနိုင်ငံများက ပြန်လည်ဝယ်ယူသိုလှောင်မှုပြုလာနိုင်ခြင်းနှင့် နေကြာ ဆီကဲ့သို့ အခြားသောဟင်းသီးဟင်းရွက်ဆီများ ရောင်းလိုအားမှာ အကန့်အသတ်ရှိနေခြင်းတို့က စားအုန်းဆီ ဝယ်လိုအားကို ပိုမိုအားကောင်းလာစေနိုင်ကြောင်း CPOPC က ဖော်ပြထားသည်။

          အာဆီယံနိုင်ငံများအပါအဝင် အာရှဒေသရှိ အဓိကတင်သွင်းသည့်နိုင်ငံများနှင့် အာဖရိက ဒေသ အထူးသဖြင့် အီဂျစ်၊ ကင်ညာနှင့် နိုင်ဂျီးရီးယား နိုင်ငံများတွင် ၀ယ်လိုအား တိုးတက်လာ ခြင်းကြောင့် စားအုန်းဆီ ၀ယ်လိုအား ဆက်လက်တိုးလာမည်ဟု မျှော်လင့်ထားသည်။ စားအုန်းဆီ သည် ၂၀၂၅ ခုနှစ်တွင် ကောင်းမွန်သော ကုန်သွယ်ရောင်းဝယ်သည့် ကုန်စည်အဖြစ် ဆက်လက် တည်ရှိနေမည်ဖြစ်ပြီး ပဲပုပ်ဆီထက် ပရီမီယံဈေးနှုန်းဖြင့် ဆက်လက်ရောင်းချနိုင်မည်ဟု CPOPC က အပြုသဘောဆောင် ပြောကြားထားပါသည်။

          ထို့ကြောင့် ၂၀၂၅ ခုနှစ် ပထမသုံးလပတ်တွင် စားအုန်းဆီ တစ်တန်လျှင် အမေရိကန် ဒေါ်လာ ၁၀၀၀ မှ ၁၂၀၀ အတွင်း ဈေးနှုန်းဘောင်အတွင်း ကုန်သွယ်ရောင်းဝယ်နိုင်မည်ဟု ခန့်မှန်း ထားကြောင်း၊  သို့သော်လည်း စားအုန်းဆီဈေးနှုန်းများသည် ဆီမုန်ညှင်းစေ့နှင့် နေကြာစေ့ တို့ အတွက် ရာသီအလိုက် အထွက်နှုန်းမြင့်မားသော ထုတ်လုပ်မှုစက်ဝန်းကာလနှင့် ရိတ်သိမ်း ရာသီ ကာလတို့ ကျရောက်သည့် ၂၀၂၅ ခုနှစ် ဒုတိယနှစ်ဝက်တွင် အရောင်းအ၀ယ် နည်းပါးနိုင်မည်ဟု မျှော်လင့်ရကြောင်း CPOPC က အစီရင်ခံ ဖော်ပြထားသည်ကို တင်ပြလိုက်ရပါသည်။

Source: The Star, Friday, 14th Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

Pages

Subscribe to RSS - ပြည်ပကုန်သွယ်မှုသတင်းများ