ပြည်ပကုန်သွယ်မှုသတင်းများ

          ဘင်္ဂလားဒေ့ရှ်နိုင်ငံသည် ပြည်တွင်း စားနပ်ရိက္ခာဈေးကွက်၏ လိုအပ်ချက်များကို ဖြည့် ဆည်းနိုင်ရေးနှင့် ဈေးကွက်တည်ငြိမ်စေရေးအတွက် ဗီယက်နမ်နိုင်ငံမှ ဆန်ဖြူတန်ချိန် ၁၀၀၀၀၀ ကို တင်သွင်းရန် စာချုပ်ချုပ်ဆိုခဲ့ကြောင်း သိရပါသည်။

          ဆန်ပို့ကုန်များအတွက် ဗီယက်နမ်တောင်ပိုင်း စားသောက်ကုန်ကော်ပိုရေးရှင်း (Vinafood II) မှ ထောက်ပံ့ပေးသွင်းမည်ဖြစ်ကြောင်း ဗီယက်နမ်စားသောက်ကုန်အသင်း၏ ပြောကြားချက် အရ သိရသည်။ ဆန်ဖြူတစ်တန်၏ ရောင်းဈေးမှာ ၄၇၄.၂၅ အမေရိကန်ဒေါ်လာနှုန်း သတ်မှတ် ထားပြီး ပုံမှန်အားဖြင့် နိုင်ငံတကာဈေးကွက်ရှိ ဆန်ဖြူဈေးနှုန်းထက် ပိုမိုသည်ဟု VietnamNet သတင်းဌာနက ဖော်ပြခဲ့သည်။

          ဘင်္ဂလားဒေ့ရှ် စားနပ်ရိက္ခာဝန်ကြီးဌာန၏ ဝယ်ယူရေး အဆိုပြုချက်ကို ဇန်နဝါရီ ၂၈ ရက် နေ့တွင် ဒါကာရှိ ဘင်္ဂလားဒေ့ရှ် ပြည်သူ့ဝယ်ယူရေး အာဏာပိုင်အဖွဲ့က အတည်ပြုခဲ့ပြီး လာမည့် သွင်းကုန်လုပ်ငန်းများအတွက် လမ်းဖွင့်ပေးခဲ့ခြင်းဖြစ်ကြောင်း၊  ဗီယက်နမ်ထံမှ ဆန်ဖြူ အမြောက် အမြား တင်သွင်းမှုသည် ဘင်္ဂလားဒေ့ရှ်၏ စားသောက်ကုန်ဈေးနှုန်းတည်ငြိမ်ရေး မဟာဗျူဟာ၌ တစ်စိတ်တစ်ပိုင်းပါဝင်ကြောင်း၊ အထူးသဖြင့် ဖေဖော်ဝါရီလ၌ စတင်ခဲ့သည့် အစိုးရ၏ လွတ်လပ် စွာ ဈေးကွက်တင်ရောင်းချမှု (Open Market Sales - OMS) အစီအစဉ်အရ အကောင်အထည်ဖော် ဆောင်ရွက်ခြင်းဖြစ်ကြောင်း သိရပါသည်။

          အဆိုပါ အစီအစဉ်အရ အစိုးရသည် မြို့တော်ဒါကာနှင့် လုပ်သားအင်အား အသုံးပြုမှု မြင့်မားသည့် ဒေသများ အပါအဝင် နိုင်ငံတဝှမ်းတွင် ဖြန့်ဖြူး‌ရေးစင်တာပေါင်း ၉၀၆ ခုမှ နေ့စဉ် ဆန် ၉၀၇ တန်ခန့်ကို ဖြန့်ဝေသွားမည် ဖြစ်ပါသည်။ ဆန်တစ်ကီလိုဂရမ်လျှင် ၃၀ တာကာနှုန်း (တစ်တန် လျှင် ၂၄၃ အမေရိကန်ဒေါ်လာခန့်) ဖြင့် ရောင်းချမည်ဖြစ်ပြီး ၀င်ငွေနည်းသော ပြည်သူများအတွက် မရှိမဖြစ်လိုအပ်သော စားနပ်ရိက္ခာများကို သက်သာသည့်ဈေးနှုန်းဖြင့် ဝယ်ယူနိုင်မည်ဖြစ်ကြောင်း သိရပါသည်။

          ဘင်္ဂလားဒေ့ရှ်သည် တောင်အာရှဒေသအတွင်း အကြီးမားဆုံး ဆန်ထုတ်လုပ်သည့်နိုင်ငံ များအနက် တစ်ခုအပါအဝင်ဖြစ်သော်လည်း ၀ယ်လိုအားနှင့် ရောင်းလိုအား မျှတမှုရှိစေရန်အတွက် အချို့သော အချိန်ကာလများတွင် ဆန်တင်သွင်းရန် လိုအပ်လျက်ရှိနေဆဲဖြစ်သည်။ ၂၀၂၃ ခုနှစ် တွင် ဘင်္ဂလားဒေ့ရှ်သည် အိန္ဒိယ၊ ထိုင်း၊ ဗီယက်နမ်နှင့် မြန်မာနိုင်ငံတို့မှ ဆန်တန်ချိန် ၂ သန်းခန့်ကို တင်သွင်းခဲ့ကြောင်း သိရပါသည်။

          ဗီယက်နမ်နိုင်ငံမှ ဘင်္ဂလားဒေ့ရှ်နိုင်ငံသို့ ဆန်တန်ချိန် ၁၀၀၀၀၀ တင်ပို့မှုသည် ကမ္ဘာ့ ဈေးကွက်တွင် ဗီယက်နမ်ဆန်၏ ရပ်တည်မှု ခိုင်မာလျက်ရှိခြင်းကို  ထပ်လောင်း အတည်ပြုခြင်း ဖြစ်သည်။ ဗီယက်နမ်နိုင်ငံ အနေဖြင့် ပို့ကုန်စံနှုန်းများနှင့်ကိုက်ညီသော အရည်အသွေးမြင့်ဆန် များ စိုက်ပျိုးရန်နှင့် ဗီယက်နမ်ဆန်၏ စီးပွားရေးတန်ဖိုးကို မြှင့်တင်ရန်လည်း လယ်သမားများအား တွန်းအားပေး လုပ်ဆောင်လျက်ရှိကြောင်း သိရပါသည်။

Source: The Business Standard, 22 Feb 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ထိုင်းနိုင်ငံ၌ စပါးတစ်တန်လျှင် အနည်းဆုံး ထိုင်းဘတ် ၁၀၀၀၀ မှ ၁၂၀၀၀ အထိဈေးနှုန်း အာမခံချက်ပေးရန် ထိုင်းစိုက်ပျိုးရေးလုပ်ငန်းရှင်များအသင်းက ဖေဖော်ဝါရီ ၂၁ ရက်၊ သောကြာနေ့ တွင် ကြေညာချက်တစ်စောင်ထုတ်ပြန်လျက် အစိုးရထံသို့ တောင်းဆိုခဲ့ပါသည်။

          အဆိုပါအသင်း၏ ဥက္ကဋ္ဌဖြစ်သူ Pramote Charoensilp က အမျိုးသားဆန်စပါး မူဝါဒနှင့် စီမံခန့်ခွဲရေးကော်မတီ လက်အောက်ရှိ ဆပ်ကော်မတီအနေဖြင့် စပါးဈေးနှုန်းကျဆင်းမှုနှင့် ပတ် သက်ပြီး ကိုင်တွယ်ဖြေရှင်းနေသည့် အစီအမံများအား ပြန်လည်သုံးသပ်သင့်ကြောင်း တိုက်တွန်း ခဲ့သည်။

          စပါးထွက်ရှိခြင်း မရှိသည့် အချိန်ကာလတိုင်‌အောင် စပါးရောင်းချမှုများကို ဆိုင်းငံ့ထားနိုင် ရေးအတွက် ချေးငွေများထုတ်ပေးခြင်း၊ လယ်သမားများ၏ စပါးရောင်းချမှုကို အထောက်အပံ့ပြု ရန် ပြည်တွင်း ဈေးကွက်တင်ရောင်းချမှု နည်းလမ်းများ တိုးမြှင့်ခြင်းနှင့် ဆန်စပါးလုပ်ငန်းရှင်များ သို့ နစ်နာကြေးထောက်ပံ့ငွေများ ပေးအပ်ခြင်းတို့ အပါအဝင် ဘတ်ငွေ ၁.၈၉ ဘီလီယံတန်ဖိုးရှိ သော အစီအမံများကို ယင်းဆပ်ကော်မတီက မကြာသေးမီက စတင်ချမှတ်ဆောင်ရွက်ခဲ့အပြီး  ယခုကဲ့သို့ မှတ်ချက်များပေါ်ထွက်လာခြင်းဖြစ်ပါသည်။

          အဆိုပါအသင်း၏ ဂုဏ်ထူးဆောင်အကြံပေးဖြစ်သူ Kriengsak Tapananon က ၎င်း အစီ အမံများသည် တောင်သူများ၏လိုအပ်ချက်နှင့် ကိုက်ညီမှုမရှိကြောင်းနှင့် ထိုကဲ့သို့သော အစီအစဉ် များကြောင့် အကျင့်ပျက်ခြစားမှုနှင့် ဘဏ္ဍာရေးဆိုင်ရာ ထိခိုက်မှုများဖြစ်ပေါ်လာနိုင်ကြောင်း ဝေဖန်ထောက်ပြခဲ့ပါသည်။

          တောင်သူများ၏ အောက်ဖော်ပြပါ တောင်းဆိုချက်များကို ဖြည့်ဆည်းဆောင်ရွက်သင့် ကြောင်း ထိုင်းစိုက်ပျိုးရေးလုပ်ငန်းရှင်များအသင်းက အကြံပြုဖော်ပြထားပါသည်-

(က)    အစိုဓာတ် ၁၅ ရာခိုင်နှုန်းပါဝင်သည့် စပါးတစ်တန်လျှင် အနည်းဆုံး ဘတ် ၁၂၀၀၀ နှုန်းနှင့် အစိုဓာတ် ၂၅ ရာခိုင်နှုန်းပါဝင်သော စပါးတစ်တန်လျှင် အနည်းဆုံး ဘတ် ၁၀၀၀၀ နှုန်းဖြင့် စပါးဈေးနှုန်းအာမခံချက် အစီအစဉ်ထားရှိရေး စဉ်းစားပေးရန်၊

(ခ)     ရိတ်သိမ်းပြီးနောက် ကြွင်းကျန်သော စွန့်ပစ်ကောက်ရိုးများအား မီးရှို့ခြင်း မပြုသည့် အပေါ် စိုက်ဧရိယာ တစ်ရိုင်လျှင် ဘတ် ၅၀၀ ပေးအပ်ရေး စဉ်းစားပေးရန်၊

(ဂ)     စပါးစိုက်ပျိုးရေးအတွက် သွင်းအားစုများဖြစ်သည့် ဓာတ်မြေဩဇာ၊ ပိုးသတ်ဆေး နှင့် စက်မောင်းဆီတို့ကို ထိန်းကျောင်း‌ပေးရန်၊

(ဃ)    ရေကြီးနစ်မြုပ်ခြင်းကို လျှော့ချနိုင်ရန် ၎င်းတို့၏ လယ်ယာမြေများကို အသုံးပြုရ ခြင်းအပေါ် လယ်သမားများအား နစ်နာမှု လျော်ကြေးပေးအပ်နိုင်ရေး စည်းမျဉ်း စည်းကမ်းများ ရေးဆွဲဆောင်ရွက်သွားရန်၊

(င)     ထုတ်လုပ်မှုကုန်ကျစရိတ်ကို ကာမိစေရန်အတွက် တစ်ရိုင်လျှင် ဘတ် ၁၀၀၀၀ နှုန်း ဖြင့် စပါးအထွက်နှုန်းတိုးတက်စေမည့် စီမံကိန်းများဆောင်ရွက်သွားရန်။

          အစိုးရအနေဖြင့် ကူညီထောက်ပံ့သည့် အစီအစဉ်များအားလုံးကို လယ်သမားများအားလုံး က တန်းတူညီမျှစွာ ခံစားခွင့်ရရှိအောင် ဆောင်ရွက်ပေးသင့်ကြောင်း Mr. Kriengsak က ပြောကြား ခဲ့ပါသည်။

Source: Nation Thailand, 21 Feb 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          မလေးရှားစားအုန်းဆီကြမ်း၏ စံပြုဈေးနှုန်းများ မြင့်တက်လာခြင်းကြောင့် အိန္ဒိယနိုင်ငံရှိ စားသုံးဆီ ပြန်လည်ပြုပြင်သန့်စင်ရေးလုပ်ငန်းရှင်များသည် ၂၀၂၅ ခုနှစ်၊ မတ်လ မှ ဇွန်လအတွင်း သင်္ဘောတင်ပို့ဆောင်‌ရန် စီစဉ်ထားရှိသည့် စားအုန်းဆီကြမ်း တန်ချိန် ၇၀၀၀၀ အတွက် ကုန် အဝယ် အမှာစာများကို ပယ်ဖျက်ခဲ့သည်ဟု ကုန်သွယ်ရေးအရင်းအမြစ်လေးခု၏ ပြောကြားချက် အရ သိရှိရကြောင်း Free Malaysia Today သတင်းဌာနက ၂၀-၂-၂၀၂၅ ရက်နေ့တွင် ဖော်ပြ ထားသည်။

          မလေးရှား စားအုန်းဆီ ကြိုတင်အရောင်းအဝယ် ဈေးနှုန်းများသည် ရက်သတ္တလေးပတ် အတွင်း ၁၁ ရာခိုင်နှုန်း ကျော် မြင့်တက်လာပြီးနောက် ကမ္ဘာ့စားအုန်းဆီ အများဆုံးတင်သွင်းသည့် အိန္ဒိယမှ ဆီသန့်စင်ရေးလုပ်ငန်းရှင်များက ဖေဖော်ဝါရီ ၂၀ ရက်နေ့တွင် ဝယ်ယူရန်ပယ်ဖျက်သည့် စားအုန်းဆီကြမ်း တန်ချိန် ၄၀၀၀၀ အပါအဝင် လွန်ခဲ့သည့်သုံးရက်တာအတွင်း၌ ဆီတန်ချိန် အရေ အတွက်များစွာကို ဝယ်ယူတင်သွင်းရန်မှာယူမှု ပယ်ဖျက်ခဲ့ကြောင်း ဖော်ပြထားသည်။

          အိန္ဒိယမှ စားအုန်းဆီ အဝယ်အမှာစာများ ပယ်ဖျက်လိုက်ခြင်းက မလေးရှား စားအုန်းဆီ၏ ဈေးနှုန်းမြင့်တက်မှုကို အကန့်အသတ် ဖြစ်စေနိုင်သော်လည်း အချို့သော ဆီသန့်စင်ရေး လုပ်ငန်း ရှင်များက ပဲပုပ်ဆီဘက်သို့ ပြောင်းလဲမှာယူသောကြောင့် ပဲပုပ်ဆီဈေးနှုန်းအပေါ် အထောက်အပံ့ ဖြစ်စေနိုင်သည်ဟု သတင်းစာရှင်းလင်းပွဲတစ်ခုတွင် အမည်မဖော်လိုသူ ကုန်သည်တစ်ဦးက ပြော ဆိုခဲ့ခြင်းဖြစ်ကြောင်း သိရသည်။

          မတ်လအတွင်း သင်္ဘောတင်ပို့ဆောင်‌ရန် စီစဉ်ထားရှိမှုကို ပယ်ဖျက်ခဲ့သော အိန္ဒိယ အရှေ့ ဘက်ကမ်းရိုးတန်းဒေသရှိ ဆီသန့်စင်ရေးလုပ်ကိုင်သူ ဝယ်လက်တစ်ဦးက အိန္ဒိယနိုင်ငံတွင် ဆီ ပြန်လည်ပြုပြင် သန့်စင်မှုလုပ်ငန်းမှ အကျိုးအမြတ်သည် အနုတ်လက္ခဏာဆောင် အရှုံးပေါ်ခြင်း နှင့် ပြည်ပ စားအုန်းဆီဈေးနှုန်း ကြီးမြင့်လျက်ရှိခြင်းတို့ကြောင့် ဝယ်ယူထားသူများအနေဖြင့် တင်သွင်းခြင်းမပြုတော့ဘဲ မူလကုန်ရောင်းသူထံ ပြန်လည်ရောင်းချခြင်းကို ဆောင်ရွက်လာကြ ကြောင်း၊ ယင်းသို့ ဖြစ်ရပ်က အကျိုးအမြတ်ရရှိမှုကို ခိုင်မာစေကြောင်း ပြောဆိုပါသည်။

          စျေးနှုန်းအပေါ် အလေးထားဝယ်ယူလေ့ရှိသော အာရှဒေသ ဝယ်လက်များသည် ကုန်ကျ စရိတ် သက်သာပြီး သင်္ဘောတင်ပို့ဆောင်ချိန် မြန်ဆန်ခြင်းကြောင့် ပုံမှန်အားဖြင့် စားအုန်းဆီ အပေါ် မှီခိုကြရသည်။ သို့သော်လည်း မကြာသေးမီက ဈေးနှုန်းမြင့်တက်မှုကြောင့် စားအုန်းဆီ သည် ကမ္ဘာ့ဈေးကွက်၌ ပဲပုပ်ဆီထက်ကျော်လွန်ပြီး ပရီမီယံဈေးနှုန်းအဆင့်သို့ ရောက်ရှိခဲ့သည်။

          ၂၀၂၅ ခုနှစ်၊ ဖေဖော်ဝါရီမှ မတ်လအတွင်း အိန္ဒိယသို့ ပဲပုပ်ဆီ များစွာဝင်ရောက်လာပြီး စားအုန်းဆီထက်လည်း ဈေးသက်သာခြင်းကြောင့် ဆီသန့်စင်သည့်လုပ်ငန်းရှင်များက စားအုန်းဆီ ဝယ်ယူမှုများကို ပယ်ဖျက်ကာ ပဲပုပ်ဆီသို့ ပြောင်းလဲလုပ်ဆောင်ရန် တွန်းအားပေးလာကြောင်း Sunvin Group ၏ အမှုဆောင်အရာရှိချုပ် Mr. Sandeep Bajoria က ပြောကြားခဲ့သည်။

          ကမ္ဘာတစ်ဝန်းသို့ ကုန်သွယ်ရောင်းဝယ်နေသည့် မွမ်ဘိုင်းမြို့ အခြေစိုက် ကုန်သည်တစ်ဦး ကလည်း စားအုန်းဆီ ဝယ်သူများနှင့် ရောင်းချသူများသည် စာချုပ်များကို ပယ်ဖျက်ရန် အပြန် အလှန် သဘောတူညီချက်ထားရှိကြကြောင်း၊ ဝယ်ယူသူများသည် လက်ရှိစျေးကွက်၌ ဖြစ်ပေါ်နေ သော ဈေးနှုန်းအောက် အနည်းငယ်လျော့နည်းသော စားအုန်းဆီ အဝယ်စာချုပ်များကို ပယ်ဖျက် ဆောင်ရွက်ခြင်းဖြစ်ကြောင်း ပြောကြားခဲ့သည်။

          ၂၀၂၅ ခုနှစ်၊ မတ်လအတွင်း သင်္ဘောတင်ပို့ဆောင်ရမည့် စားအုန်းဆီကြမ်း တစ်တန်၏ ကိုင်တွယ်ထိန်းသိမ်းခ၊ အာမခံကြေးနှင့် သယ်ယူပို့ဆောင်စရိတ်များ ပါဝင်သည့် အိန္ဒိယဆိပ်ကမ်း အရောက် CIF ဈေးနှုန်းမှာ အမေရိကန်ဒေါ်လာ ၁၂၁၀ ခန့်ဖြင့် ကမ်းလှမ်းထားပြီး ပြီးခဲ့သည့် လတွင်မူ စားအုန်းဆီကြမ်း CIF တစ်တန်လျှင် အမေရိကန်ဒေါ်လာ ၁၁၂၀ မှ ၁၁၃၀ ဝန်းကျင်ခန့် သာရှိကြောင်း နှိုင်းယှဉ်ဖော်ပြထားသည်။

          ဆီပြန်လည်သန့်စင်သူများသည် ဈေးနှုန်းပိုမိုသက်သာသော ပဲပုပ်ဆီကို ပြောင်းလဲရွေးချယ် လာကြသဖြင့် အိန္ဒိယ၏ စားအုန်းဆီတင်သွင်းမှုသည် ယခင်လနှင့် နှိုင်းယှဉ်ပါက ၂၀၂၅ ခုနှစ် ဇန်နဝါရီလတွင် ၄၅ ရာခိုင်နှုန်း လျော့နည်းလျက် ၂၇၅၂၄၁ မက်ထရစ်တန်အထိ ကျဆင်းခဲ့ပြီး ၁၄ နှစ်ခန့်အတွင်း အနိမ့်ဆုံးပမာဏဖြစ်ကြောင်း သိရှိရပါသည်။

          အိန္ဒိယနိုင်ငံ အနေဖြင့် ပြည်တွင်းဆီထွက်သီးနှံ စိုက်ပျိုးထုတ်လုပ်သော တောင်သူများကို အထောက်အပံ့ပြုနိုင်ရေးအတွက် ပြည်ပမှ စားအုန်းဆီ တင်သွင်းမှုအပေါ် ကောက်ခံသည့် သွင်းကုန် အခွန်နှုန်းထားကို တိုးမြှင့်သတ်မှတ်ဖွယ်ရှိသည်ဟု ထင်ကြေးပေးပြောကြားချက်များ ထွက်ပေါ်လာခြင်းက ဆီသန့်စင်ရေးလုပ်ငန်းရှင်များအား စားအုန်းဆီကြမ်း အရောင်းအဝယ် စာချုပ်များနှင့် ကြိုတင်မှာယူမှုများ ပယ်ဖျက်လာစေရန် တွန်းအားပေးလျက်ရှိသည်ဟု နယူးဒေလီ အခြေစိုက် ကုန်သည်တစ်ဦးက ပြောဆိုခဲ့ကြောင်း သတင်းရရှိပါသည်။

Source: Free Malaysia Today, 20-02-2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          မြန်မာနိုင်ငံသည် ၂၀၂၄-၂၅ ဘဏ္ဍာနှစ် ပထမ ၁၀ လပတ်တွင် နိုင်ငံခြားတိုက်ရိုက်ရင်းနှီး မြှုပ်နှံမှု အမေရိကန်ဒေါ်လာ ၆၅၆.၁၅ သန်းကို ဆွဲဆောင်နိုင်ခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DDCA) က ဖေဖော်ဝါရီ ၂၄ ရက်နေ့က ထုတ်ပြန်သည့် စာရင်းများအရသိရသည်။

          ၂၀၂၄ ခုနှစ် ဧပြီလ ၁ ရက်နေ့မှ ၂၀၂၅ ခုနှစ် ဇန်နဝါရီလ ၃၁ ရက်နေ့အထိ မြန်မာနိုင်ငံ ရင်းနှီး မြှုပ်နှံမှု ကော်မရှင်က နိုင်ငံခြားရင်းနှီးမြှုပ်နှံမှု လုပ်ငန်း ၅၂ ခုကို အတည်ပြုခဲ့ကြောင်း DDCA ၏ အချက်အလက်များအရသိရသည်။

          အဆိုပါကာလအတွင်း ရေနံနှင့်သဘာဝဓာတ်ငွေ့ ကဏ္ဍသည် ဒေါ်လာ ၃၅၇.၀၄ သန်းဖြင့် FDI အများဆုံးဆွဲဆောင်နိုင်ခဲ့ပြီး ထုတ်လုပ်မှုကဏ္ဍတွင် ဒေါ်လာ ၁၄၈.၁၆၄ သန်း၊ သယ်ယူပို့ဆောင်ရေး နှင့်ဆက်သွယ်ရေးကဏ္ဍမှ ကန်‌ဒေါ်လာ ၈၇.၇၁ သန်းဖြင့် အသီးသီး ဆွဲဆောင်နိုင်ခဲ့သည်။

          စင်္ကာပူ၊ တရုတ်နှင့်ထိုင်းနိုင်ငံတို့သည် မြန်မာနိုင်ငံတွင် အများဆုံးရင်းနှီးမြှုပ်နှံသူများဖြစ် ကြောင်း စာရင်းအင်းများတွင်ဖော်ပြချက်အရသိရသည်။

DOCA(ရန်ကုန်)

ဥရောပကော်မရှင်သည် ဒရက်စဒင်တွင် Infineon တစ်ပိုင်းလျှပ်ကူးပစ္စည်း ထုတ်လုပ်သည့် စက်ရုံအသစ်တည်ဆောက်ရန်အတွက် ဂျာမနီနိုင်ငံအကူအညီ ယူရိုသန်း ၉၂၀ (အမေရိကန်ဒေါ်လာ ၉၆၆ သန်း) ကို ဖေဖော်ဝါရီ ၂၇ ရက်နေ့တွင် အတည်ပြုခဲ့သည်။ ကုန်ထုတ် စက်ရုံအသစ်သည် ဥရောပ သမဂ္ဂ (EU) သို့ လိုက်လျောညီထွေရှိသော ထုတ်လုပ်မှုစွမ်းရည်ကို ယူဆောင်လာမည်ဖြစ်ပြီး၊ ထို့ကြောင့် တစ်ပိုင်းလျှပ်ကူးနည်းပညာများတွင် ဥရောပ၏ ထောက်ပံ့မှု၊ ခံနိုင်ရည်နှင့် နည်းပညာဆိုင် ရာကိုယ်ပိုင်အုပ်ချုပ်ခွင့်တို့ကို ခိုင်မာစေကြောင်း ကော်မရှင်က ထုတ်ပြန်ချက်တွင် ဖော်ပြထားသည်။

          စက်ရုံသစ်တွင် စုစုပေါင်း ရင်းနှီးမြှုပ်နှံမှုသည် ၂၀၃၁ ခုနှစ်တွင် ၎င်း၏ စွမ်းဆောင်ရည် ပြည့်မီမည့် ယူရို ၃.၅ ဘီလီယံအထိရှိမည်ဖြစ်သည်။ စက်ရုံသည် အီလက်ထရွန်းနစ်စနစ်များတွင် ထိန်းချုပ်ရန် အတွက် အသုံးပြုသည့် သီးခြားပါဝါနည်းပညာများအပြင် analog နှင့် ဒစ်ဂျစ်တယ်ကြားကွာဟချက်ကို ပေါင်းကူးရန်အတွက် လိုအပ်သော analog/mixed-signal ပေါင်းစပ်ဆားကစ်များကိုထုတ်လုပ် မည်ဖြစ်သည်။ တစ်ပိုင်းလျှပ်ကူးကိရိယာများကို စက်မှုလုပ်ငန်း၊ မော်တော်ယာဥ်နှင့် လူသုံးကုန်ဆိုင်ရာ အသုံးချမှုများတွင် အသုံးပြု မည်ဖြစ်သည်။ မကြာသေးမီက လေ့လာမှုများအရ ဥရောပသည် တစ်ပိုင်းလျှပ်ကူးကိရိယာများ အပါအဝင် အရေးပါသော နည်းပညာအားလုံးနီးပါးတွင် တရုတ်နှင့် အမေရိကန်တို့ထက် နောက်ကျနေခဲ့သည်။ အီးယူသည် လာမည့်နှစ်များတွင် ဤကွာဟချက်ကို ပေါင်းကူးရန် မျှော်လင့်ထားသည်။ ကော်မရှင်သည် အီတလီရှိ STMicroelectronics ၏ SiC အဆောက်အအုံနှစ်ခု၊ STMicroelectronics နှင့် GlobalFoundries အတွက် ပြင်သစ်အကူအညီ ပေးရေးအစီအမံ၊ European Semiconductor Manufacturing Company အတွက် ဂျာမန်တိုင်းတာ ချက်နှင့် Silicon Box ၏အဆင့်မြင့်ထုပ်ပိုးမှုနှင့် စမ်းသပ်ခြင်းစက်ရုံအတွက် အီတလီတိုင်းတာမှုတစ်ခု ကို ယခင်ကအတည်ပြုခဲ့သည်။

DOCA(ရန်ကုန်)