ပြည်ပကုန်သွယ်မှုသတင်းများ

         ဖိလစ်ပိုင်နိုင်ငံ၏ ကုန်ထုတ်လုပ်မှု ကဏ္ဍသည် ပြည်တွင်းဝယ်လိုအား ပိုမိုခိုင်မာလာမှုကြောင့် မေလတွင် ပြန်လည်ဦးမော့လာခဲ့ကြောင်း သိရပါသည်။ ဆက်တိုက်ဖြစ်ပေါ်နေသော ထောက်ပံ့ပို့ဆောင်ရေး ကွင်းဆက်ပြတ်တောက်မှုများနှင့် ကုန်ကျစရိတ် မြင့်မားလာမှုများက လုပ်ငန်းကဏ္ဍအပေါ် ဆက်လက်ဖိစီးနေဆဲဖြစ်ကြောင်း သိရပါသည်။

          S&P Global က ဇွန်လ ၁ ရက်နေ့တွင် ထုတ်ပြန်ခဲ့သည့် အချက်အလက်များအရ နိုင်ငံ၏ ဝယ်ယူမှုမန်နေဂျာများ ညွှန်းကိန်း (PMI) သည် ဧပြီလရှိ ၄၈.၃ မှ မေလတွင် ၅၀.၈ သို့ မြင့်တက်လာခဲ့ပြီး ပြန်လည်တိုးတက်လာမည့် အလားအလာကို ပြသနေကြောင်း သိရပါသည်။ PMI ညွှန်းကိန်း ၅၀ အထက်ရှိခြင်းသည် ကဏ္ဍတိုးချဲ့လာခြင်းကိုဖော်ပြပြီး အဆိုပါအဆင့်အောက် ရောက်ရှိခြင်းမှာ ကျဆင်းခြင်းကို ညွှန်ပြနေကြောင်း သိရပါသည်။

          အဆိုပါ တိုးတက်ကောင်းမွန်လာခြင်းမှာ အဓိကအားဖြင့် ပြည်တွင်းဝယ်ယူသူများထံမှ အမှာစာအသစ်များ တိုးပွားလာခြင်းကြောင့်ဖြစ်ပြီး ယင်းက ထုတ်လုပ်သူများအား ကုန်ထုတ်လုပ်မှု ပိုမိုမြှင့်တင်ရန် လှုံ့ဆော်ပေးခဲ့ကြောင်း သိရပါသည်။ လုပ်ငန်းများသည် ပြည်တွင်းစျေးကွက်ရှိ ပိုမိုခိုင်မာလာသော ဝယ်လိုအားအခြေအနေများကို တုံ့ပြန်ဆောင်ရွက်ခဲ့ကြရာ ကုန်ထုတ်လုပ်မှုပမာဏမှာ သုံးလတာကာလအတွင်း အမြန်ဆုံးနှုန်းဖြင့် တိုးတက်လာခဲ့ပါသည်။

          သို့သော်လည်း အဆိုပါ ပြန်လည်ဦးမော့လာမှုသည် ပြည်ပရောင်းအားတွင်မူ ထင်ဟပ်နေခြင်းမရှိကြောင်း သိရပါသည်။ ပို့ကုန်အမှာစာများသည် ၂၀၂၀ ပြည့်နှစ်၊ ဇူလိုင်လ နောက်ပိုင်း အဆိုးရွားဆုံးနှုန်းဖြင့် ကျဆင်းသွားခဲ့ရာ တိုးတက်မှုမှာ ပြည်တွင်းဝယ်လိုအား အပေါ်တွင်သာ အဓိက မှီခိုနေရဆဲဖြစ်ကြောင်း သိရပါသည်။

        အရှေ့အလယ်ပိုင်းပဋိပက္ခနှင့် ဆက်စပ်နေသော အနှောင့်အယှက်များက ကမ္ဘာ့ရေကြောင်း ကုန်သွယ်ရေးလမ်းကြောင်းများကို ဆက်လက်သက်ရောက်နေသဖြင့် ပစ္စည်းရောက်ရှိချိန် ကြာမြင့်မှုမှာ ၁၈ လနီးပါးကာလအတွင်း အဆိုးရွားဆုံးအဆင့်များထဲမှ တစ်ခုသို့ ရောက်ရှိသွားခဲ့ကြောင်း သိရပါသည်။

          တစ်ချိန်တည်းမှာပင် ကုန်ထုတ်လုပ်သူများသည် ငွေကြေးဖောင်းပွမှု မြင့်မားနေခြင်းကြောင့် လုပ်ငန်းလည်ပတ်မှုစရိတ်များ ပိုမိုကြီးမားလာခြင်းနှင့် ရင်ဆိုင်ခဲ့ရပြီး ယင်းက အမြတ်အစွန်းအပေါ် ဖိအားများဖြစ်စေခဲ့ကြောင်း သိရပါသည်။ လုပ်ငန်းခွင်များက ဝန်ထမ်းအင်အားကို ဆက်လက်လျှော့ချခဲ့ကြသဖြင့် စက်ရုံအလုပ်အကိုင်ခန့်အပ်မှုမှာ နှစ်နှစ်တာကာလအတွင်း အဆိုးရွားဆုံး ကျဆင်းမှုကိုပြသခဲ့ပြီး အလုပ်သမားစျေးကွက် အခြေအနေများလည်း အားနည်းသွားခဲ့ကြောင်း သိရပါသည်။ ကုန်ထုတ်လုပ်မှုလုပ်ငန်းများ ပြန်လည်တိုးတက်လာသော်လည်း စီးပွားရေးပညာရှင်များက နောက်ဆုံးရရှိသော PMI ညွှန်းကိန်းကို အပြည့်အဝ ပြန်လည်ဦးမော့လာခြင်းအဖြစ် မကောက်ချက်ချရန် သတိပေးထားကြကြောင်း သိရပါသည်။

           Ateneo de Manila တက္ကသိုလ်မှ စီးပွားရေးပညာရှင် Leonardo Lanzona က ဤအချက်အလက်များသည် ရေရှည်တည်တံ့သော တိုးချဲ့မှုထက် တည်ငြိမ်မှုရှိလာခြင်းကိုသာ ပိုမိုညွှန်ပြနေကြောင်း ပြောကြားခဲ့ပါသည်။ ၎င်းက PMI တွက်ချက်မှုများသည် ကုန်ပစ္စည်းပေးပို့မှု နှောင့်နှေးကြန့်ကြာခြင်းများအပေါ် လွှမ်းမိုးမှုရှိနိုင်ကြောင်း၊ ယင်းက စီးပွားရေးအခြေအနေများ စိန်ခေါ်မှုရှိနေဆဲဖြစ်သော်လည်း ပင်မညွှန်းကိန်းကို လုပ်ကြံဖန်တီး၍ မြင့်တက်စေနိုင်ကြောင်း ထောက်ပြခဲ့ကြောင်း သိရပါသည်။

         သို့သော်လည်း ယုံကြည်စိတ်ချရသော ပြန်လည်ဦးမော့မှုတစ်ခု ဖြစ်ပေါ်လာရန်အတွက် အမှာစာအသစ်များ စဉ်ဆက်မပြတ် တိုးတက်လာခြင်း၊ ဝန်ထမ်းအသစ်များ ပြန်လည်ခန့်အပ်လာခြင်းနှင့် ကုန်ကျစရိတ် ဖိအားများလျော့ပါးသွားခြင်း အပါအဝင် ပိုမိုကျယ်ပြန့်သော တိုးတက်ကောင်းမွန်မှုများ လိုအပ်လိမ့်မည်ဖြစ်ကြောင်း Lanzona က အထူးအလေးပေး ပြောကြားခဲ့ကြောင်း သိရှိရပါသည်။

Source: CDM                                                                             

DOCA (ရန်ကုန်)

         စီးပွားရေးပညာရှင်များက ကမ္ဘာ့ကုန်သွယ်ရေးအခြေအနေ တိုးတက်လာမှုနှင့် အီလက်ထရွန်နစ် အစိတ်အပိုင်းများတင်ပို့မှု ဆက်လက်အားကောင်းနေခြင်းကြောင့် ထိုင်းနိုင်ငံ၏ ၂၀၂၆ ခုနှစ် ပို့ကုန်တိုးတက်မှုခန့်မှန်းချက်ကို မြှင့်တင်လိုက်ကြောင်း သိရပါသည်။ တစ်ဖက်တွင်လည်း ရေနံဈေးနှုန်း မြင့်မားနေခြင်းကြောင့် သွင်းကုန်တိုးတက်မှုနှုန်းမှာ ပို့ကုန်ထက် ပိုမိုမြန်ဆန်လာမည်ဟုလည်း ခန့်မှန်းထားကြောင်း သိရပါသည်။ အမေရိကန်-အီရန် ပဋိပက္ခနှင့် ပတ်သက်သည့် မသေချာမရေရာမှုများ မြင့်မားနေသော်လည်း Siam Commercial Bank Economic Intelligence Center (EIC) က ယခုနှစ်အတွက် ပို့ကုန်တိုးတက်မှု ခန့်မှန်းချက်ကို ယခင် ၀.၅ ရာခိုင်နှုန်းမှ ၇.၈ ရာခိုင်နှုန်းအထိ မြှင့်တင်လိုက်ကြောင်း သိရပါသည်။ EIC ၏ ထုတ်ပြန်ချက်အရ ယခုနှစ်ပထမလေးလအတွင်း ပို့ကုန်တန်ဖိုးသည် ယခင်နှစ်တူညီသည့်ကာလထက် ၁၈.၉ ရာခိုင်နှုန်း မြင့်တက်ခဲ့ပြီး ခန့်မှန်းချက်များကို ဆက်တိုက်ကျော်လွန်ခဲ့ကြောင်း သိရပါသည်။ အထူးသဖြင့် အီလက်ထရွန်နစ်ပစ္စည်းများတင်ပို့မှုမှာ ဧပြီလအတွင်း ယခင်နှစ်ထက် ၆၅ ရာခိုင်နှုန်း မြင့်တက်ခဲ့ပြီး ပထမလေးလအတွင်း စုစုပေါင်း တိုးတက်မှုနှုန်းမှာ ၅၇ ရာခိုင်နှုန်းအထိ ရှိခဲ့ကြောင်း သိရပါသည်။ EIC ၏အဆိုအရ ကမ္ဘာ့ကုန်သွယ်ရေးအဖွဲ့အစည်း(WTO) နှင့် နိုင်ငံတကာငွေကြေးရန်ပုံငွေအဖွဲ့(IMF) တို့ကလည်း ကမ္ဘာ့ကုန်သွယ်ရေး တိုးတက်မှုခန့်မှန်းချက် ကို ၀.၅ ရာခိုင်နှုန်းမှ ၁.၉ ရာခိုင်နှုန်းနှင့် ၂.၆ ရာခိုင်နှုန်းမှ ၂.၈ ရာခိုင်နှုန်းသို့ အသီးသီး မြှင့်တင်ထားကြကြောင်း သိရပါသည်။ WTO က အာရှဒေသတွင် အထူးသဖြင့် ဉာဏ်ရည်တု (AI) နှင့်ဆက်စပ်သည့်ပစ္စည်းများကုန်သွယ်မှု ဆက်လက်တိုးတက်မည်ဟု မျှော်မှန်းထားပြီး အမေရိကန်၏ သွင်းကုန်အခွန်စည်းကြပ်မှုများကြောင့်ဖြစ်ပေါ်မည့် ထိခိုက်မှုသည် ယခင်ခန့်မှန်းထားသလောက် မပြင်းထန်ကြောင်း ဖော်ပြခဲ့ပါသည်။ EIC က “ကမ္ဘာ့အီလက်ထရွန်နစ်လုပ်ငန်းကဏ္ဍ ပြန်လည်တိုးတက်လာမှုနှင့် ဒေတာစင်တာများတွင် ရင်းနှီးမြှုပ်နှံမှုများ ဆက်လက်တိုးပွားလာခြင်းကြောင့် ထိုင်းနိုင်ငံ၏ အီလက်ထရွန်နစ်ပို့ကုန်များသည် အနီးကပ်ကာလအတွင်း ဆက်လက်အားကောင်းမည်” ဟု သုံးသပ်ထားကြောင်း သိရပါသည်။ အီလက်ထရွန်နစ်ပို့ကုန်သည် ၂၀၂၅ ခုနှစ်တွင် ထိုင်း၏စုစုပေါင်းပို့ကုန်၏ ၂၁ ရာခိုင်နှုန်းခန့်ကို ကိုယ်စားပြုထားကြောင်း သိရပါသည်။ တစ်ဖက်တွင် EIC သည် ယခုနှစ်သွင်းကုန်တိုးတက်မှုခန့်မှန်းချက်ကို ၉ ရာခိုင်နှုန်းမှ ၁၅.၈ ရာခိုင်နှုန်းအထိ မြှင့်တင်ခဲ့ကြောင်း သိရပါသည်။ ၎င်းမှာ ပထမလေးလအတွင်း သွင်းကုန်တိုးတက်မှု ၃၅.၇ ရာခိုင်နှုန်းအထိရှိခဲ့ပြီး ကုန်ကြမ်းများ၊ တစ်ဝက်ပြီးစီးကုန်ပစ္စည်းများနှင့် ရင်းနှီးမြှုပ်နှံမှုဆိုင်ရာ စက်ပစ္စည်းများ တင်သွင်းမှုမြင့်တက်ခဲ့ခြင်းကြောင့် ဖြစ်ကြောင်း သိရပါသည်။ အခြားသုတေသနအဖွဲ့ဖြစ်သော Kasikorn Research Center (K-Research) ကလည်း ယခုနှစ် ပို့ကုန်တိုးတက်မှုကို ၈.၂ ရာခိုင်နှုန်းအထိရှိမည်ဟု မျှော်မှန်းထားပြီး ယခင်က ၁ ရာခိုင်နှုန်းကျော်သာ တိုးတက်မည်ဟု ခန့်မှန်းခဲ့ကြောင်း သိရပါသည်။ K-Research မှ သုတေသီ Palitchaya Ritsuk က “အမေရိကန်က Section 301 ကို အသုံးပြုလာနိုင်သည့် အန္တရာယ်ကို ထည့်သွင်းစဉ်းစားထားသော်လည်း အီလက်ထရွန်နစ်ကဏ္ဍ၏ အားကောင်းမှုကြောင့် ပို့ကုန်ခန့်မှန်းချက်ကို မြှင့်တင်ခဲ့ခြင်းဖြစ်သည်” ဟု ပြောကြားခဲ့ပါသည်။ ထို့ပြင် အရှေ့အလယ်ပိုင်းဒေသသို့ပို့ကုန်များမှာလည်း ယခင်နှစ်တူညီသည့်ကာလထက် ၁၉.၃ ရာခိုင်နှုန်း မြင့်တက်ခဲ့ပြီး ဒေသတွင်း လုံခြုံစိတ်ချရသည့်ရင်းနှီးမြှုပ်နှံမှုအဖြစ် ရွှေဝယ်လိုအား မြင့်တက်လာခြင်းကြောင့် ရွှေတင်ပို့မှုများ မြင့်တက်ခဲ့ကြောင်း ၎င်းက ပြောကြားခဲ့ပါသည်။ K-Research သည် ၂၀၂၆ ခုနှစ်အတွက် သွင်းကုန်တိုးတက်မှု ခန့်မှန်းချက်ကို ၁၃.၉ ရာခိုင်နှုန်းတွင် ဆက်လက်ထားရှိခဲ့ပြီး ပို့ကုန်နှင့် ပြည်တွင်းရင်းနှီးမြှုပ်နှံမှု တိုးတက်မှုများက အဓိကမောင်းနှင်မည်ဟု ခန့်မှန်းထားကြောင်း သိရပါသည်။ တစ်ချိန်တည်းမှာပင် Maybank ကလည်း ယခုနှစ် ထိုင်းပို့ကုန်တိုးတက်မှုကို ၁၈ ရာခိုင်နှုန်းအထိရှိမည်ဟု ခန့်မှန်းထားကြောင်း သိရပါသည်။ ၎င်းမှာပထမလေးလအတွင်း အလွန်ကောင်းမွန်သော စွမ်းဆောင်ရည်နှင့် အီလက်ထရွန်နစ်ပစ္စည်းများအတွက် ဝယ်လိုအားဆက်လက်မြင့်တက် နေခြင်းကြောင့်ဖြစ်ကြောင်း သိရပါသည်။ Maybank ၏ ခန့်မှန်းချက်အရ စက်မှုကဏ္ဍ ရင်းနှီးမြှုပ်နှံမှုများ အားကောင်းနေခြင်းကြောင့် ရင်းနှီးမြှုပ်နှံမှုဆိုင်ရာ စက်ပစ္စည်းများနှင့် ထုတ်လုပ်ရေးလိုအပ်ချက်များ မြင့်တက်လာမည်ဖြစ်ပြီး ယခုနှစ် သွင်းကုန်တိုးတက်မှုမှာ ၂၅ ရာခိုင်နှုန်းအထိ မြင့်တက်နိုင်ကြောင်း သိရှိရပါသည်။

Bangkok Post                                                                           

DOCA (ရန်ကုန်)

         ကမ္ဘာ့စွမ်းအင်ဈေးနှုန်းများ မြင့်တက်လာခြင်းနှင့် အရှေ့အလယ်ပိုင်းဒေသရှိ ပထဝီနိုင်ငံရေး တင်းမာမှုများကြောင့် မသေချာမရေရာမှုများ ဖြစ်ပေါ်နေသည့်အတွက် ဘက်ထရီသုံးလျှပ်စစ်ကားများ (BEVs) အပေါ် ဝယ်လိုအားဆက်လက်မြင့်တက်လာမည်ဟု Mercedes-Benz (Thailand) က မျှော်လင့်ထားကြောင်း သိရပါသည်။ Mercedes-Benz (Thailand) ၏ ဥက္ကဋ္ဌနှင့် အမှုဆောင်အရာရှိချုပ် Christian Schell က ၂၀၂၆ ခုနှစ် ပထမသုံးလပတ်အတွင်း ထိုင်းနိုင်ငံ၌ Mercedes-Benz ကားအသစ်မှတ်ပုံတင်မှု စုစုပေါင်း ၁,၉၄၉ စီးရှိခဲ့ပြီး passenger နှင့် commercial သုံးယာဉ်များရောင်းအားမှာ ၁,၃၀၄ စီး ရှိခဲ့ကြောင်း ပြောကြားခဲ့ပါသည်။ ၎င်း၏ အဆိုအရ ရေနံစိမ်းဈေးနှုန်းများ မြင့်တက်လာနိုင်ခြေရှိခြင်းနှင့် အရှေ့အလယ်ပိုင်းဒေသ မတည်ငြိမ်မှုများကြောင့် စားသုံးသူများသည် လျှပ်စစ်ကားများကို ပိုမိုစိတ်ဝင်စားလာကြောင်း သိရပါသည်။ မော်တော်ယာဉ်လုပ်ငန်း လေ့လာသုံးသပ်သူများကလည်း လောင်စာဆီဈေးနှုန်း မြင့်တက်လာခြင်းသည် ကားဝယ်ယူရန်စဉ်းစားနေသူများကို BEV များဘက်သို့ ဦးတည်လာစေကြောင်း သဘောတူညီကြပါသည်။ သို့သော် ထိုင်းနိုင်ငံ၏ မော်တော်ယာဉ်လုပ်ငန်းကဏ္ဍသည် ကမ္ဘာ့ပွားရေးမရေရာမှုများ၊ အိမ်ထောင်စုကြွေးမြီမြင့်မားနေမှုနှင့် ပြည်တွင်းစီးပွားရေးတိုးတက်မှု နှေးကွေးနေခြင်းကြောင့် စားသုံးသူများ၏ ဝယ်ယူရန်ဆုံးဖြတ်ချက်များ နောက်ကျနေမှု စသည့် စိန်ခေါ်မှုများကို ဆက်လက်ရင်ဆိုင်နေရကြောင်း သိရပါသည်။ Mercedes-Benz (Thailand) ၏ ထုတ်ပြန်ချက်အရ ၂၀၂၆ ခုနှစ် Bangkok International Motor Show 2026 တွင် ရောင်းအားသည် ယခင်နှစ်က ၈၇၀ စီးမှ ယခုနှစ် ၂,၁၁၁ စီးအထိ မြင့်တက်လာခဲ့ပြီး ၁၄၀ ရာခိုင်နှုန်း မြင့်တက်ခဲ့ကြောင်း သိရပါသည်။ Schell က ထိုပမာဏသည် ခုနစ်နှစ်အတွင်း အမြင့်ဆုံးစံချိန်ဖြစ်ပြီး ၂၀၁၉ ခုနှစ်နောက်ပိုင်း ပထမဆုံးအကြိမ်အဖြစ် အစီးရေ ၂,၀၀၀ ကျော် ရောင်းချနိုင်ခဲ့ခြင်း ဖြစ်ကြောင်းနှင့် ၂၀၂၆ ခုနှစ်သည် BEV ရောင်းအားအတွက် စံချိန်တင်နှစ်တစ်နှစ် ဖြစ်လာမည်ဟု မျှော်လင့်ကြောင်း ပြောကြားခဲ့ပါသည်။ ကမ္ဘာတစ်ဝန်းတွင် Mercedes-Benz သည် ၂၀၂၆ ခုနှစ် ပထမသုံးလပတ်အတွင်း ဗန်ကားများအပါအဝင် စုစုပေါင်း အစီးရေ ၄၉၉,၇၀၀ စီး ရောင်းချခဲ့ပြီး BEV ရောင်းအားမှာ နှစ်ဆဂဏန်းနှုန်းဖြင့် တိုးတက်ခဲ့ကြောင်း သိရပါသည်။ ဥရောပဈေးကွက်တွင်လည်း BEV ဝယ်လိုအား ၁၀၇ ရာခိုင်နှုန်းအထိ မြင့်တက်ခဲ့ပြီး CLA၊ GLC နှင့် GLB စသည့်မော်ဒယ်သစ်များအပေါ် ဈေးကွက်တုံ့ပြန်မှု ကောင်းမွန်ခဲ့ခြင်းကြောင့်ဖြစ်ကြောင်း သိရပါသည်။ ကုမ္ပဏီသည် ၂၀၂၅ ခုနှစ်မှ ၂၀၂၇ ခုနှစ်အတွင်း BEV များနှင့် နည်းပညာမြင့် ဟိုက်ဘရစ် အင်ဂျင်သုံး မော်တော်ယာဉ်များအပါအဝင် မော်ဒယ်သစ် ၄၀ ကျော်ကို မိတ်ဆက်သွားရန် စီစဉ်ထားကြောင်း သိရပါသည်။ ကုမ္ပဏီ တည်ထောင်သည့် နှစ် ၁၄၀ ပြည့် အထိမ်းအမှတ်အဖြစ် Mercedes-Maybach S 580 e Night Series ကို ထိုင်းနိုင်ငံတွင် မကြာသေးမီက မိတ်ဆက်ခဲ့ပြီး ဈေးနှုန်း ဘတ် ၁၄ သန်း သတ်မှတ်ထားကာ အစီးရေ ၁၆ စီးသာ ရောင်းချသွားမည်ဖြစ်ကြောင်း သိရပါသည်။ တစ်ဖက်တွင်လည်း ထိုင်းနိုင်ငံစက်မှုလုပ်ငန်းအဖွဲ့ချုပ်က မော်တော်ယာဉ် အပိုပစ္စည်း ထုတ်လုပ်သူများအား ဈေးနှုန်းတိုးမြှင့်မှုများကို ရွှေ့ဆိုင်းထားရန် တိုက်တွန်းထားပြီး ကုန်ကျစရိတ် မြင့်တက်လာခြင်းသည် ထုတ်လုပ်မှုစွမ်းရည်နှင့် ကားဈေးနှုန်းများအပေါ် ပြင်းထန်စွာထိခိုက်နိုင်ကြောင်း သတိပေးထားပါသည်။ အရှေ့အလယ်ပိုင်း ပဋိပက္ခများကြောင့် ကုန်ကြမ်းဈေးနှုန်းများ မြင့်တက်လာသဖြင့် အပိုပစ္စည်း ထုတ်လုပ်သူများသည် ထုတ်ကုန်ဈေးနှုန်းများကို ပြင်ဆင်ရန်လိုအပ်နေကြောင်း သိရပါသည်။ သို့သော် Schell က Mercedes-Benz (Thailand) အနေဖြင့် ပေးသွင်းသူများနှင့် ထိုကိစ္စအပေါ် ဆွေးနွေးခြင်းမရှိသေးကြောင်း ပြောကြားခဲ့ပြီး ပြည်တွင်းမိတ်ဖက်လုပ်ငန်းများကို ရေရှည်ဆက်လက် ပံ့ပိုးသွားမည်ဟု အလေးပေး ပြောဆိုခဲ့ပါသည်။ ၎င်းတို့၏ထုတ်လုပ်မှုမှာ ပြည်တွင်းထုတ်ပစ္စည်းအသုံးပြုမှု ၅၀ ရာခိုင်နှုန်းကျော် ပါဝင်သည့်အတွက် ထိုင်းကုမ္ပဏီများကို ဆက်လက်ပံ့ပိုးသွားမည်ဖြစ်ကြောင်း Schell က ပြောကြားခဲ့သည်ဟု သိရှိရပါသည်။

Bangkok Post                                                                           

DOCA (ရန်ကုန်)

           ကမ္ဘောဒီးယားနိုင်ငံ ဖွံ့ဖြိုးတိုးတက်ရေးကောင်စီ (CDC) က ၂၇-၆-၂၀၂၆ ရက်နေ့တွင်  တောင်ကိုရီးယားနိုင်ငံမှ ရင်းနှီးမြှုပ်နှံသူများအား ကမ္ဘောဒီးယားနိုင်ငံ၏ စိုက်ပျိုးရေးစက်မှုကဏ္ဍ၊ အထူးသဖြင့် သီဟိုဠ်စေ့ထုတ်လုပ်ခြင်းနှင့် ဆန်ပြုပြင်ထုတ်လုပ်ခြင်း ကဏ္ဍတို့တွင် ရင်းနှီးမြှုပ်နှံမှု အခွင့်အလမ်းများကိုရှာဖွေရန် တိုက်တွန်းခဲ့သည်။ CDC ၏ အထွေထွေအတွင်းရေးမှူး Chea Vuthy နှင့် ကိုရီးယားသမ္မတနိုင်ငံ အင်ချွန်းကုန်သည်နှင့် စက်မှုလုပ်ငန်း (ICCI) ၏ ဥက္ကဋ္ဌ Park Joo Bong ဦးဆောင်သော စီးပွားရေးကိုယ်စားလှယ်အဖွဲ့တို့ ကမ္ဘောဒီးယားနိုင်ငံ၊ ဖနွမ်းပင်မြို့တွင် တွေ့ဆုံစဉ် တိုက်တွန်းခဲ့ခြင်းဖြစ်သည်။ ကိုယ်စားလှယ်အဖွဲ့အား ကြိုဆိုရာတွင် Vuthy က ကမ္ဘောဒီးယားနှင့် တောင်ကိုရီးယားနှစ်နိုင်ငံအကြား ပူးပေါင်းဆောင်ရွက်မှု တည်ငြိမ်စွာ တိုးတက်မှုအပေါ်ကျေနပ်အားရကြောင်း ပြောကြားခဲ့ပြီး လက်ရှိခရီးစဉ်သည် နှစ်နိုင်ငံအကြား ယုံကြည်မှုတိုးလာစေရန်နှင့် ကိုရီးယားနိုင်ငံမှ ရင်းနှီးမြှုပ်နှံသူများ သိသာထင်ရှားစွာ တိုးတက်လာစေရန် ရည်မှန်းထားကြောင်း ပြောကြားခဲ့သည်။ ရင်းနှီးမြှုပ်နှံမှုများကို လေ့လာရာတွင် Vuthy က ရော်ဘာပြုပြင်ထုတ်လုပ်ရေးကဏ္ဍ၏ ခိုင်မာသောတိုးတက်မှုများ အလေးပေးပြောကြားခဲ့ပြီး ပြည်တွင်း တာယာထုတ်လုပ်ရေးလုပ်ငန်းများတွင် တိုးမြင့်လာသော ဝယ်လိုအားကို ထောက်ပံ့ရန်အတွက် အကျိုးကျေးဇူးများစွာရရှိရန် ရင်းနှီးမြှုပ်နှံမှုများပိုမိုလိုအပ်ကြောင်း ထပ်လောင်းပြောကြားခဲ့သည်။ ရော်ဘာပြုပြင်ထုတ်လုပ်ရေးအပြင် သစ်လုပ်ငန်းတွင်လည်း ရင်းနှီးမြှုပ်နှံမှုပိုမိုပြုလုပ်ကြရန် အားပေးခဲ့ပြီး သစ်သားလုပ်ငန်းသည် သစ်သားပြားနှင့် အခြားပရိဘောဂထုတ်လုပ်ရေးစက်ရုံများကို ထောက်ပံ့ရန် မြင့်မားသော ဝယ်လိုအားရှိကြောင်း Vuthy ကပြောကြားခဲ့သည်။ တုံ့ပြန်သည့်အနေဖြင့် Park Joo Bong က ကမ္ဘောဒီးယားနိုင်ငံ၏ အလျင်အမြန်ဖွံ့ဖြိုးတိုးတက်မှုနှင့် အထူသဖြင့် စိုက်ပျိုးရေးကဏ္ဍနှင့် စက်မှုကဏ္ဍများတွင် ရင်းနှီးမြှုပ်နှံမှုအခွင့်အလမ်းများ အပေါ်စိတ်ဝင်စားကြောင်း ပြောကြားခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)

       အင်ဒိုနီးရှားသမ္မတ Prabowo Subianto က ပြင်သစ်–အင်ဒိုနီးရှား အဆင့်မြင့်စီးပွားရေးကောင်စီ (France-Indonesia High-Level Business Council) ဖွဲ့စည်းတည်ထောင်မှုကို နှစ်နိုင်ငံအကြား စီးပွားရေးနှင့် ရင်းနှီးမြှုပ်နှံမှုဆိုင်ရာဆက်ဆံရေးများ ပိုမိုခိုင်မာစေရန် ရည်ရွယ် သည့် မဟာဗျူဟာမြောက်ခြေလှမ်းတစ်ရပ်အဖြစ် ကြိုဆိုလိုက်ကြောင်း သိရပါသည်။ ပြင်သစ်နိုင်ငံ ပါရီမြို့၌ မေလ ၂၈ ရက်နေ့က ပြင်သစ်သမ္မတ Emmanuel Macron နှင့် ပူးတွဲသတင်းစာရှင်းလင်းပွဲပြုလုပ်စဉ် Prabowo က ထိုပူးပေါင်းဆောင်ရွက်မှုကို ပိုမိုတိုးချဲ့ပြီး နှစ်နိုင်ငံအကြား ရင်းနှီးမြှုပ်နှံမှုများ တိုးမြှင့်သွားလိုကြောင်းနှင့် ပြင်သစ်–အင်ဒိုနီးရှားအဆင့်မြင့်စီးပွားရေးကောင်စီ ဖွဲ့စည်းခြင်းကိုလည်း အထူးဝမ်းမြောက်စွာကြိုဆိုကြောင်း ပြောကြားခဲ့ပါသည်။ Prabowo ၏ အဆိုအရ အဆိုပါကောင်စီသည် အင်ဒိုနီးရှားနှင့် ပြင်သစ်စီးပွားရေးလုပ်ငန်းများအကြား ပိုမိုနီးကပ်သော ပူးပေါင်းဆောင်ရွက်မှုများကိုအားပေးမည့် အရေးပါသည့်ပလက်ဖောင်းတစ်ခုဖြစ်လာမည်ဖြစ်ပြီး နှစ်ဖက်အကျိုးရှိစေမည့် ရင်းနှီးမြှုပ်နှံမှုအခွင့်အလမ်းသစ်များကိုလည်း ဖော်ဆောင်ပေးနိုင်မည်ဖြစ်ကြောင်း သိရပါသည်။ Prabowo က ပြင်သစ်နိုင်ငံသည် ဥရောပ၏ အဓိက ဦးဆောင်နိုင်ငံတစ်နိုင်ငံဖြစ်သကဲ့သို့ အရှေ့တောင်အာရှဒေသနှင့် ဆက်ဆံရေးတွင်လည်း မဟာဗျူဟာမြောက် အခန်းကဏ္ဍတစ်ရပ်ရှိနေကြောင်း၊ ထို့ကြောင့် နှစ်နိုင်ငံစီးပွားရေးမိတ်ဖက်ဆက်ဆံရေးကို ပိုမိုခိုင်မာစေခြင်းသည် ဒေသတွင်းတည်ငြိမ်ရေးနှင့် စီးပွားရေးတိုးတက်မှုအတွက် သိသာထင်ရှားသည့် အကျိုးကျေးဇူးများရရှိစေမည်ဟု ယုံကြည်ကြောင်းနှင့် လက်ရှိတွင် အင်ဒိုနီးရှားနှင့် ပြင်သစ်တို့၏ ဆက်ဆံရေးသည် “ဘက်ပေါင်းစုံမဟာဗျူဟာမြောက် မိတ်ဖက်ဆက်ဆံရေး” (Comprehensive Strategic Partnership) အဆင့်သို့ ရောက်ရှိလာပြီဖြစ်ကြောင်း ပြောကြားခဲ့ပါသည်။ နှစ်နိုင်ငံခေါင်းဆောင်များ၏ တွေ့ဆုံဆွေးနွေးမှုအတွင်း ကာကွယ်ရေးဆိုင်ရာပူးပေါင်း ဆောင်ရွက်မှု၊ သန့်ရှင်းသောစွမ်းအင်ဖွံ့ဖြိုးတိုးတက်ရေး၊ ပညာရေးနှင့် သုတေသနကဏ္ဍများအပြင် အင်ဒိုနီးရှား–ဥရောပသမဂ္ဂ ဘက်ပေါင်းစုံစီးပွားရေးမိတ်ဖက်သဘောတူညီချက် (I-EU CEPA) အကောင်အထည်ဖော်ရေးတို့ကိုလည်း ဆွေးနွေးခဲ့ကြကြောင်း သိရပါသည်။ Prabowo က လက်ရှိဆောင်ရွက်နေသည့် သဘောတူညီချက်များနှင့် အစီအစဉ်များသည် အင်ဒိုနီးရှားနှင့် ပြင်သစ်အကြားဆက်ဆံရေးကို ပိုမိုခိုင်မာစေပြီး နှစ်နိုင်ငံလုံးအတွက် လက်တွေ့ကျသော အကျိုးကျေးဇူးများ ဖန်တီးပေးနိုင်မည်ဟု မျှော်လင့်ကြောင်း ပြောကြားခဲ့ပါသည်။ အစိုးရစာရင်းများအရ ၂၀၂၄ ခုနှစ်အတွင်း အင်ဒိုနီးရှားနှင့် ပြင်သစ်တို့၏ စုစုပေါင်း ကုန်သွယ်မှုတန်ဖိုးမှာ အမေရိကန် ဒေါ်လာ ၂.၄ ဘီလီယံရှိခဲ့ပြီး ပြီးခဲ့သည့် ငါးနှစ်အတွင်း အပြုသဘောဆောင်သည့် တိုးတက်မှုလမ်းကြောင်းကို ဆက်လက်ထိန်းသိမ်းထားနိုင်ခဲ့ကြောင်း သိရပါသည်။ သို့သော် ၂၀၂၄ ခုနှစ်တွင် အင်ဒိုနီးရှား၏ ပြင်သစ်နိုင်ငံနှင့် ကုန်သွယ်မှုတွင် ကုန်သွယ်ရေးလိုငွေ အမေရိကန်ဒေါ်လာ ၅၃၂ သန်း ပြခဲ့ကြောင်း သိရပါသည်။ ပြင်သစ်နိုင်ငံသည် အင်ဒိုနီးရှား၏ မဟာဗျူဟာမြောက်ရင်းနှီး မြှုပ်နှံမှု မိတ်ဖက်နိုင်ငံတစ်နိုင်ငံအဖြစ် ဆက်လက်ရပ်တည်လျက်ရှိကြောင်း သိရပါသည်။ ရင်းနှီးမြှုပ်နှံမှုနှင့် အဆင့်မြှင့်ထုတ်လုပ်ရေး ဝန်ကြီးဌာန၏ အချက်အလက်များအရ ၂၀၂၁ ခုနှစ်မှ ၂၀၂၆ ခုနှစ် ပထမသုံးလပတ်အထိ အင်ဒိုနီးရှားတွင် ပြင်သစ်နိုင်ငံ၏ ရင်းနှီးမြှုပ်နှံမှုတန်ဖိုးမှာ အမေရိကန်ဒေါ်လာ ၁.၆၉ ဘီလီယံရှိခဲ့ပြီး နှစ်စဉ်ပျမ်းမျှ တိုးတက်နှုန်း ၃၃.၇ ရာခိုင်နှုန်းရှိကာ ဒေသခံအလုပ်သမား ၃၇,၀၀၀ ကျော်အတွက် အလုပ်အကိုင် အခွင့်အလမ်းများ ဖန်တီးပေးခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)