ပြည်ပကုန်သွယ်မှုသတင်းများ

          ဖေဖော်ဝါရီလတွင် ဗီယက်နမ်သည် စိုက်ပျိုးမွေးမြူရေး-သစ်တော-ရေထွက်ကုန် တင်ပို့မှုမှတစ်ဆင့် ဝင်ငွေအမေရိကန်‌ဒေါ်လာ ၄.၄ ဘီလီယံ ရရှိခဲ့ပြီး ၂၀၂၄ ခုနှစ် ဖေဖော်ဝါရီ လထက် ၃၇.၂ ရာခိုင်နှုန်း မြင့်တက်ခဲ့ကာ ယခုနှစ်၏ပထမနှစ်လတွင် ထိုကဏ္ဍမှတစ်ဆင့် စုစုပေါင်း ဝင်ငွေ အမေရိကန်ဒေါ်လာ ၉.၃၈ ဘီလီယံ ရရှိခဲ့ပြီး ၂၀၂၄ ခုနှစ် ပထမနှစ်လထက် ၈.၃ ရာခိုင်နှုန်းမြင့်တက်ခဲ့ကြောင်း စိုက်ပျိုးမွေးမြူရေးနှင့် သဘာဝပတ်ဝန်းကျင်ဝန်ကြီးဌာန (MoAE)၏ အဆိုအရ သိရပါသည်။ ထိုစုစုပေါင်းပမာဏထဲမှ ယခုနှစ်၏ ပထမနှစ်လတွင် စိုက်ပျိုးမွေးမြူရေးထုတ်ကုန်တင်ပို့မှုမှဝင်ငွေ အမေရိကန်ဒေါ်လာ ၄.၈၉ ဘီလီယံ ရရှိခဲ့ပြီး ၄.၅ ရာခိုင်နှုန်းမြင့်တက်ခဲ့ကြောင်း သိရပါသည်။ တိရိစ္ဆာန်မွေးမြူရေးလုပ်ငန်းမှဝင်ငွေ အမေရိကန်ဒေါ်လာ ၇၂.၂ သန်း၊ ရေထွက်ကုန်တင်ပို့မှုမှဝင်ငွေ အမေရိကန်ဒေါ်လာ ၁.၄၂ ဘီလီယံနှင့် သစ်တောထွက် ကုန်တင်ပို့မှုမှဝင်ငွေ အမေရိကန်ဒေါ်လာ ၂.၆၈ ဘီလီယံ ရရှိခဲ့ ကြောင်း သိရပါသည်။ ဆားတင်ပို့မှုမှာ ဝင်ငွေ ၁.၄ သန်းဖြင့် သိသာစွာမြင့်တက်ခဲ့ကြောင်း သိရပါသည်။ အာရှသည် ဗီယက်နမ်၏ စိုက်ပျိုးမွေးမြူရေး-သစ်တော-ရေထွက်ကုန်တင်ပို့ရာ အကြီးမားဆုံးဈေးကွက်ဖြစ်ပြီး စုစုပေါင်းတင်ပို့မှုတန်ဖိုး၏ ၄၂.၂ ရာခိုင်နှုန်းရှိကြောင်း သိရပါ သည်။ ၎င်း၏နောက်တွင် အမေရိကနှင့်ဥရောပက စုစုပေါင်းတင်ပို့မှုတန်ဖိုး၏ ၂၄.၂ ရာခိုင်နှုန်းနှင့် ၁၅.၅ ရာခိုင်နှုန်း အသီးသီးရှိကြောင်း သိရပါသည်။ အာဖရိကနှင့် သမုဒ္ဒရာပိုင်း ဒေသသို့ တင်ပို့မှုမှာ ၂.၉ ရာခိုင်နှုန်းနှင့် ၁.၄ ရာခိုင်နှုန်း အသီးသီး ရှိကြောင်း သိရပါသည်။ အဓိကစိုက်ပျိုးမွေးမြူရေး ထုတ်ကုန်များတွင် ကော်ဖီတင်ပို့မှုမှာ တန်ချိန် ၂၈၄၀၀၀ ဖြင့် အမေ ရိကန်ဒေါ်လာ ၁.၅၈ ဘီလီယံ ရရှိခဲ့ကြောင်း သိရပါသည်။ ဂျာမနီ၊ အီတလီနှင့်ဂျပန်တို့သည် ဗီယက်နမ်ကော်ဖီအတွက် အကြီးမားဆုံး ဈေးကွက်များဖြစ်ကြောင်း သိရပါသည်။ ငရုတ်ကောင်း တင်ပို့မှုမှာ အပေါင်းလက္ခဏာဆောင်ခဲ့ပြီး တန်ချိန် ၂၈၀၀၀ တင်ပို့ရာမှ ဝင်ငွေ အမေရိကန်ဒေါ်လာ ၁၈၈.၇ သန်းရရှိခဲ့ကြောင်း သိရပါသည်။ တစ်ချိန်တည်း မှာပင် ဆန်တန်ချိန် ၁.၁ သန်းတင်ပို့ရာမှ ဝင်ငွေ အမေရိကန်ဒေါ်လာ ၆၁၃ သန်းရရှိခဲ့ကြောင်း သိရ ပါသည်။ သစ်သီးနှင့် ဟင်းသီးဟင်းရွက်တင်ပို့မှုမှ ဝင်‌ငွေ အမေရိကန်ဒေါ်လာ ၇၂၄.၅ သန်း ရရှိခဲ့ကြောင်း သိရပါသည်။ တရုတ်နိုင်ငံသည် ဗီယက်နမ်သစ်သီးနှင့် ဟင်းသီးဟင်းရွက် တင်ပို့ရာအကြီးမားဆုံး ဈေးကွက်အဖြစ်ရပ်တည်နေပြီး ၎င်းတို့နောက်တွင် အမေရိကန်နှင့် ထိုင်းနိုင်ငံတို့က ရပ်တည်နေကြောင်း သိရပါသည်။

DOCA(ရန်ကုန်)

ပါကစ္စတန် ဝန်ကြီးချုပ် Shehbaz Sharif သည် လာမည့် ငါးနှစ်အတွင်း နိုင်ငံ၏ ပို့ကုန် အမေရိကန်ဒေါ်လာ ဘီလီယံ ၆၀ အထိ တိုးမြှင့်ရန် ကျယ်ကျယ်ပြန့်ပြန့် မဟာဗျူဟာ ရေးဆွဲရန် ညွှန်ကြားခဲ့ကြောင်း တာဝန်ရှိသူများက ပြောကြားခဲ့သည်။ အစ္စလမ်မာဘတ်မြို့တွင် အဆင့်မြင့် အစည်းအဝေးကို သဘာပတိအဖြစ် ဆောင်ရွက်နေသူ Sharif သည် စီးပွားရေးတိုးတက်မှုကို အရှိန်မြှင့်ရန်၊ စက်မှုဖွံ့ဖြိုးတိုးတက်ရေးနှင့် ပို့ကုန်မြှင့်တင်ရန် ရေရှည်တည်တံ့သော အခွန်အကောက် ဆိုင်ရာ ပြုပြင်ပြောင်းလဲမှုများ ပြုလုပ်ရန် လိုအပ်ကြောင်း အလေးပေးပြောကြားခဲ့ကြောင်း ဝန်ကြီး ချုပ်ရုံးက ကြာသပတေးနေ့တွင် ထုတ်ပြန်ခဲ့သည်။ ပို့ကုန်ဦးဆောင်သော စီးပွားရေးတိုးတက်မှု အတွက် အစိုးရ၏ မျှော်မှန်းချက်တစ်စိတ်တစ်ပိုင်းအနေဖြင့် ဝန်ဆောင်မှုများ၊ သတင်းအချက်အလက် နည်းပညာနှင့် စိုက်ပျိုးရေးအပါအဝင် အဓိကကဏ္ဍများကို ဦးစားပေးလုပ်ဆောင်ရန်အရေးကြီး ကြောင်း ၎င်းကအလေးပေးပြောကြားခဲ့ကြောင်း ထုတ်ပြန်ချက်တွင် ဖော်ပြထားသည်။ ပို့ကုန် လုပ်ငန်းများ အဆင်ပြေချောမွေ့စေရန် ဝန်ကြီးချုပ်က ပို့ကုန်ဖွံ့ဖြိုးတိုးတက်ရေးရန်ပုံငွေတွင် အုပ်ချုပ်မှုပြုပြင်ပြောင်းလဲမှုများကို ညွှန်ကြားခဲ့ပြီး မဟာဗျူဟာကုန်သွယ်မှုမူဝါဒမူဘောင် ၂၀၂၅-၂၀၃၀ ဆိုင်ရာ ညှိနှိုင်းဆွေးနွေးမှုများ ပြုလုပ်ရန် တောင်းဆိုခဲ့သည်။ ပါကစ္စတန်၏ ပို့ကုန်များကို မြှင့်တင်ရန် ရည်ရွယ်၍ နှစ်စဉ် အကောက်ခွန် လျှော့ချရေးနှင့် နိုင်ငံတကာ ပြပွဲများ အကြောင်းကို တာဝန်ရှိသူများက ရှင်းလင်း ပြောကြားခဲ့ပါသည်။ နိုင်ငံ၏ e-commerce ပေါ်လစီသည် ၎င်း၏ နောက်ဆုံးအဆင့် ဆွေးနွေးညှိနှိုင်းမှုအဆင့်တွင် ရှိနေကြောင်းနှင့် လာမည့်လတွင် အစိုးရအဖွဲ့ထံ တင်ပြမည်ဖြစ်ကြောင်း အဆိုပါ အစည်းအဝေးတွင် အသိပေးခဲ့သည်။ တစ်ချိန်တည်းတွင် အသစ် ဖွဲ့စည်းထားသော National Compliance Center သည် ပါကစ္စတန်ထုတ်ကုန်များအားလေ့ကျင့်ရေး နှင့် စွမ်းရည်မြှင့်တင်ရေးအစီအစဉ်များမှတစ်ဆင့် ကမ္ဘာ့စံချိန်စံညွှန်းများနှင့် ချိန်ညှိရန်ကူညီပေးမည် ဖြစ်ကြောင်း ထုတ်ပြန်ချက်တွင် ဖော်ပြထားသည်။ 

DOCA(ရန်ကုန်)

ယူကရိန်းဝန်ကြီးချုပ် Denys Shmyhal က ၎င်း၏အစိုးရသည် အမေရိကန်နှင့်သတ္တုတွင်း ထွက်ဆိုင်ရာ မိတ်ဖက်သဘောတူစာချုပ်ကို လက်မှတ်ရေးထိုးရန်အတွက် လိုအပ်သည့် အစီအမံများ ကို ချမှတ်ခဲ့ကြောင်း ဖေဖော်ဝါရီ ၂၆ ရက် (ဆင်ဟွာ) သတင်းဌာနက ဖော်ပြချက်အရသိရသည်။

သဘောတူညီချက်အရ ယူကရိန်းနှင့် အမေရိကန်တို့သည် နှစ်နိုင်ငံအစိုးရမှ ပူးတွဲပိုင်ဆိုင်ပြီး ပူးတွဲ စီမံခန့်ခွဲမည့် ပူးတွဲရင်းနှီးမြှုပ်နှံမှုရန်ပုံငွေကိုထူထောင်ရန် စီစဉ်ထားသည်ဟု Shmyhal က ပြောကြားခဲ့သည်။

ယူကရိန်းဓာတ်သတ္တုအရင်းအမြစ်များသည် ယူကရိန်းပိုင်အဖြစ် ဆက်လက်တည်ရှိနေမည် ဖြစ်ပြီး အမေရိကန်၏ ပိုင်ဆိုင်မှုကို လွှဲပြောင်းပေးမည်မဟုတ်ကြောင်း ၎င်းက အလေးပေးပြောကြား ခဲ့သည်။

အဆိုပါ သဘောတူညီချက်အရ ယူကရိန်းသည် ၎င်း၏ သဘာဝအရင်းအမြစ်များမှ ရရှိသည့် ဘဏ္ဍာငွေ၏ ၅၀ ရာခိုင်နှုန်းကို ရန်ပုံငွေသို့ လှူဒါန်းမည်ဖြစ်ပြီး၊ ယူကရိန်း၏ ပြန်လည်ထူထောင်ရေး အတွက် အမေရိကန်ကရန်ပုံငွေ ထောက်ပံ့ပေးမည်ဖြစ်သည်။

DOCA(ရန်ကုန်)

          Emirates သည် Dubai၊ UAE နှင့် ကမ္ဘောဒီးယားနိုင်ငံ  Siem Reap ပြည်နယ်တို့အကြား ပျံသန်းမှု လမ်းကြောင်းအသစ်ကို မိတ်ဆက်မည်ဖြစ်ကြောင်း ၃-၃-၂၀၂၅ ရက်နေ့က ကြေညာခဲ့သည်။ ထိုအစီအစဉ် သည် နှစ်နိုင်ငံအကြား ခရီးသွားလာရေးနှင့် ကုန်သွယ်မှုမြှင့်တင်ရန် ရည်ရွယ်ထားသည်။ ၃-၆-၂၀၂၅ ရက်နေ့မှ စတင်၍ Emirates သည် အပတ်စဉ် အင်္ဂါ၊ ကြာသာပတေးနှင့် စနေနေ့များတွင် ထိုင်းနိုင်ငံ၊ ဘန်ကောက်မြို့တွင် ရပ်နားပြီး Dubai မှ Siem Reap ပြည်နယ်သို့ အပတ်စဉ်ပျံသန်းမှု (၃) ကြိမ်ဖြင့် စတင်မည်ဖြစ်သည်။ လက်ရှိတွင် Emirates သည် စင်္ကာပူမှတဆင့် Dubai-ကမ္ဘောဒီးယားနိုင်ငံ၊ ဖနွမ်းပင်မြို့သို့ နေ့စဉ်အသွားအပြန်လေးကြောင်း ခရီးစဉ်များကို လည်းကမ်းလှမ်းထားသည်။ ၂၀၂၄ ခုနှစ်တွင် ကမ္ဘောဒီးယားနိုင်ငံတကာလေဆိပ် (၃) ခုသည် စုစုပေါင်းလေကြောင်းခရီးသည် ၅.၆၅ သန်း ကို ဝန်ဆောင်မှုပေးခဲ့ပြီး ၂၀၂၃ ခုနှစ်က ၄.၀၄ သန်းထက် ၃၈.၉ ရာခို်ငနှုန်းတိုးလာခဲ့ကြောင်း နိုင်ငံပိုင် လေကြောင်းရုံးမှ ထုတ်ပြန်ထားသည်။ ပြည်တွင်းလေကြောင်းလိုင်း ၃၀ ကျော်သည် အရှေ့တောင်အာရှ နိုင်ငံများအသင်း (ASEAN)၊ တရုတ်၊ တောင်ကိုရီးယား၊ အိန္ဒိယ၊ ကာတာနှင့် အာရပ်စော်ဘွားများ ပြည်ထောင်စု(UAE) အပါအဝင် နိုင်ငံတကာနှင့် ကမ္ဘောဒီးယားနိုင်ငံသို့ ချိတ်ဆက်ဝန်ဆောင်မှုများ ဆောင်ရွက်နေကြသည်။

DOCA(ရန်ကုန်)

          သစ်သီးဝလံနှင့် ဟင်းသီးဟင်းရွက်လုပ်ငန်းများအတွက် အခွင့်အလမ်းအသစ်များဆိုင်ရာ အလုပ်ရုံ ဆွေးနွေးပွဲကို Siem Reap ပြည်နယ်တွင် သစ်သီးဝလံနှင့် ဟင်းသီးဟင်းရွက်ထုတ်ကုန်များ ပါဝင်သည့် ပြည်တွင်းထုတ်လုပ်သူများနှင့် စီးပွားရေးလုပ်ငန်းများအတွက် ဈေးကွက်ချဲ့ထွင်ရန်ရည်ရွယ်ချက်ဖြင့် ၂၈-၂-၂၀၂၅ ရက်နေ့က ကျင်းပပြုလုပ်ခဲ့သည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ အတွင်းရေးမှူး Samheng Bora သည် Siem Reap ပြည်နယ်မှ ကိုယ်စားလှယ်များ၊ သက်ဆိုင်ရာပြည်နယ်များမှ ဌာနဆိုင်ရာတာဝန်ရှိသူများ အထူးသဖြင့် စိုက်ပျိုးရေးနယ်ပယ်မှ ကျွမ်းကျင်ပညာရှင်များ၊ ခြံပိုင်ရှင်များ၊ သစ်သီးဝလံနှင့် ဟင်းသီးဟင်းရွက်စိုက်ပျိုးသူများ၊ ဖြန့်ဖြူးရောင်းချသူများနှင့် Siem Reap ပြည်နယ်ရှိ သစ်သီးဝလံနှင့် ဟင်းသီးဟင်းရွက်ကဏ္ဍမှ သက်ဆိုင်သူများ အဆိုပါအလုပ်ရုံဆွေးနွေးပွဲသို့ တက်ရောက်ခဲ့ ကြသည်။ အဆိုပါ ဆွေးနွေးပွဲတွင်  ကမ္ဘောဒီးယားနိုင်ငံ၏ အလားအလာရှိသော ထုတ်ကုန်များ တင်ပို့ နိုင်ရေးဗျူဟာများ၊ Siem Reap ပြည်နယ်ရှိ ဟင်းသီးဟင်းရွက်ထုတ်လုပ်မှု အလားအလာ၊ ကမ္ဘောဒီးယား နိုင်ငံမှ ထုတ်ကုန်များကို Super Markets များသို ဖြန့်ဖြူးရောင်းချခြင်းဆိုင်ရာ လုပ်ထုံးလုပ်နည်းများနှင့် သစ်သီဝလံနှင့် ဟင်းသီးဟင်းရွက်ကဏ္ဍတွင် စီးပွားရေးပူးပေါင်းဆောင်ရွက်မှုများ ဖွံဖြိုးတိုးတက်မှု ဆောင်ရွက်ရေးတို့ကို ဆွေးနွေးခဲ့ကြသည်။

DOCA(ရန်ကုန်)