ကမ္ဘောဒီးယားနိုင်ငံ၊ စက်မှု၊ သိပ္ပံ၊ နည်းပညာနှင့်တီထွင်ဆန်းသစ်မှုဝန်ကြီး Hem Vanndy သည် ကမ္ဘောဒီးယားနိုင်ငံ၏ ရေရှည်တည်တံ့သော စက်မှုဖွံ့ဖြိုးတိုးတက်မှုကို ပံ့ပိုးရန်အတွက် ဂျပန်နိုင်ငံ၏ ဆယ်စုနှစ်ပေါင်းများစွာအတွေ့အကြုံနှင့် စက်မှုစီမံခန့်ခွဲမှုဆိုင်ရာကျွမ်းကျင်မှုများ ကို မည်သို့မည်ပုံအသုံးချမည်ကိုဆွေးနွေးရန်အတွက် ဂျပန်နိုင်ငံ၊ စီးပွားရေး၊ ကုန်သွယ်ရေးနှင့် စက်မှုဝန်ကြီးဌာန(METI)နှင့် Japan Environmental Management Association for Industry (JEMAI) မှကိုယ်စားလှယ်အဖွဲ့အား ၁၁-၃-၂၀၂၅ ရက်နေ့က လက်ခံတွေ့ဆုံခဲ့သည်။ METI ၏ သဘာဝပတ်ဝန်းကျင်စီမံခန့်ခွဲမှုမြှင့်တင်ရေးရုံး၊ ဒါရိုက်တာ HAMASAKA Takashi မှ ၁၉၅၀ ခုနှစ်မှ ၁၉၆၀ ခုနှစ်များအတွင်း ဂျပန်နိုင်ငံ၏ လျင်မြန်သော စက်မှုထွန်းကားလာမှုကို အလေးပေးပြောကြားခဲ့ပြီး ဂျပန်အစိုးရသည် လေထုညစ်ညမ်းမှုထိန်းချုပ်ရေးနည်းပညာများ ဖွံ့ဖြိုးတိုးတက်စေရန်နှင့် ရေရှည်တည်တံ့သောစက်မှုလုပ်ငန်းဖွံ့ဖြိုးတိုးတက်ရေးကို မြှင့်တင်ရာ တွင် စည်မျဥ်းစည်းကမ်းများကို အကောင်အထည်ဖော်ရန်အတွက် ပုဂ္ဂလိကကဏ္ဍနှင့် တက်ကြွ စွာပူးပေါင်းဆောင်ရွက်ခဲ့ကြောင်း ဆက်လက်ပြောကြားခဲ့သည်။ ဂျပန်နိုင်ငံတွင် ၁၉၇၁ ခုနှစ် က တည်းက စက်ရုံများတွင် သီးသန့်ညစ်ညမ်းမှုစီမံခန့်ခွဲရေးစနစ်များတည်ဆောက်ခြင်းများ ကို ကိုးကားပြီး က‌မ္ဘောဒီးယားနိုင်ငံ၏ လုပ်ငန်းများကို ရေရှည်တည်တံ့မှုစံနှုန်းများနှင့်အညီ ပေါင်းစည်းရန်အရေးကြီးကြောင်း ထပ်လောင်းပြောကြားခဲ့သည်။ Hem Vanndy က အခွင့် အလမ်းများနှင့် သဘာဝပတ်ဝန်းကျင်ဆိုင်ရာ စိန်ခေါ်မှုများကို တင်ပြနိုင်သည့် ကမ္ဘောဒီးယား နိုင်ငံ၏ စီးပွားရေးတိုးတက်မှုနှင့် မြို့ပြအသွင်ကူးပြောင်းမှုလမ်းကြောင်းများကို သတိပြုမိပြီး ဂျပန်နိုင်ငံ၏ ထိုးထွင်းသိမြင်မှုများကိုကြိုဆိုကြောင်း ပြောကြားခဲ့သည်။ သဘာဝပတ်ဝန်းကျင်၊ လူမှုရေးနှင့် အုပ်ချုပ်မှု(ESG) အကာအကွယ်များအားကောင်းလာချိန်တွင် ရင်းနှီးမြှုပ်နှံမှုများ ဆွဲဆောင်ရန် အစိုးရ၏ ရည်မှန်းချက်များကို ထပ်မံပြောကြားခဲ့သည်။ HAMASAKA Takashi က JEMAI သည် ကမ္ဘောဒီးယားနိုင်ငံ၏ လေထုညစ်ညမ်းမှုစီမံခန့်ခွဲရေးဆိုင်ရာကြိုးပမ်းအားထုတ်မှု များကို စဥ်ဆက်မပြတ်ဖွံ့ဖြိုးတိုးတက်ရေးပန်းတိုင်များနှင့် လိုက်လျောညီထွေဖြစ်စေမည့် စက်မှု ကဏ္ဍ ကို မြှင့်တင်ပေးမည်ဟု ကတိကဝတ်ပြုခဲ့သည်။

DOCA(ရန်ကုန်)

          ကမ္ဘောဒီးယားနိုင်ငံ၊ ရင်းနှီးမြှုပ်နှံမှု ဘုတ်အဖွဲ(CIB) ၏ ဒုတိယထွေထွေအတွင်းရေးမှူး Suon Sophal သည် ၁၀-၃-၂၀၂၅  ရက်နေ့က တရုတ်နိုင်ငံ၊ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ စီးပွားရေးပူးပေါင်းဆောင်ရွက်မှုနှင့် ပြည်ပရင်းနှီးမြှုပ်နှံမှုဦးစီးဌာန၊ ညွှန်ကြား ရေးမှူးချုပ် Li Yongjun နှင့် ရင်းနှီးမြှုပ်နှံမှုပူးပေါင်းဆောင်ရွက်ရေးနှင့် ကမ္ဘောဒီးယား-တရုတ် အထူးစီးပွားရေးဇုန် ဖွံ့ဖြိုးတိုးတက်ရေးတို့အတွက်ဆွေးနွေးမှုများ ပြုလုပ်ခဲ့ကြသည်။ Suon Sophal က ကမ္ဘောဒီးယားနိုင်ငံ၊  Preah Sihanouk ပြည်နယ်တွင် အထူးစီးပွားရေးဇုန်နှင့် ကမ္ဘောဒီးယား-တရုတ်ရင်းနှီးမြှုပ်နှံမှုပူးပေါင်းဆောင်ရွက်ချက်များ အားကောင်းစေရန်အတွက် ကမ္ဘောဒီးယားနိုင်ငံသို့ တရုတ်ရင်းနှီးမြှုပ်နှံမှုများ အားကောင်းစေရေးအတွက် ပူးပေါင်း ဆောင်ရွက်ရန်အတွက် ကမ္ဘောဒီးယားနိုင်ငံသို့ ကိုယ်တိုင်ကိုယ်ကျလာရောက်လေ့လာခဲ့ခြင်း ကြောင့် Li Yongjun အားကျေးဇူးတင်ရှိကြောင်းပြောကြားခဲ့သည်။ မိတ်ဖက်အဖွဲ့အစည်းများ၏ ပံ့ပိုးကူညီမှုများဖြင့် Preah Sihanouk Special Economic Zone သည် အလားအလာရှိသော ရင်းနှီးမြှုပ်နှံမှုများအတွက် ဆွဲဆောင်ရာနေရာတစ်ခုဖြစ်လာပြီး ကုန်သွယ်မှုပမာဏတိုးမြင့် လာကာ ရင်းနှီးမြှုပ်နှံမှု စီမံကိန်းများကို ဖန်တီးကာအလုပ်အကိုင်များစွာ ဖန်တီးပေးခြင်းဖြင့် ကမ္ဘောဒီးယားနိုင်ငံသို့ ရင်းနှီးမြှုပ်နှံမှုများ ဝင်ရောက်လာစေရန်မြှင့်တင်ပေးနေကြောင်း Suon Sophal က ဆက်လက်ပြောကြားခဲ့သည်။ ဆက်လက်ပြီး ကမ္ဘောဒီးယားနိုင်ငံ၏ လူမှုဘဝဖွံ့ဖြိုး တိုးတက်ရေးနှင့် အရည်အသွေးမြင့် နှစ်နိုင်ငံစီးပွားရေးနှင့် ကုန်သွယ်မှုဆက်ဆံရေးတိုးတက် ကောင်းမွန်လာစေရန်ရည်ရွယ်ချက်ဖြင့်နားလည်မှုစာချွန်လွှာလက်မှတ်ရေးထိုးနိုင်ရေးဆွေးနွေးမှု များပြုလုပ်ခဲ့ကြသည်။

DOCA(ရန်ကုန်)

ဘရူနိုင်းနိုင်ငံ၏ လူဝင်မှုကြီးကြပ်ရေးဌာနသည် မတ်လ ၈ ရက်မှ စတင်ကာ သာမန်နိုင်ငံ ကူးလက်မှတ်ကိုင်ဆောင်ထားသော တရုတ်နိုင်ငံသားများ ဘရူနိုင်းနိုင်ငံသို့ ဗီဇာကင်းလွတ်ခွင့်ဖြင့် ဝင်ရောက်ခွင့်ရမည်ဖြစ်ကြောင်း ကြာသပတေးနေ့တွင် ထုတ်ပြန်ခဲ့သည်။ အဆိုပါဌာန၏ အဆိုအရ အနည်းဆုံး သက်တမ်းခြောက်လရှိသော တရားဝင်နိုင်ငံကူးလက်မှတ် ကိုင်ဆောင်ထားသည့် နိုင်ငံ သားများသည် သတ်မှတ်ထားသော ဝင်ခွင့်အမှတ်မှတစ်ဆင့် ဝင်ရောက်နိုင်ပြီး ၁၄ ရက်ခန့် ဗီဇာမလို ဘဲ ဘရူနိုင်းနိုင်ငံတွင် နေထိုင်နိုင်မည်ဖြစ်သည်။

အပြန်အလှန်နားလည်မှုနှင့် ပြည်သူချင်းဆက်ဆံရေး ပိုမိုခိုင်မာစေမည့် တရုတ်ခရီးသွား ဧည့်သည်များ တိုးပွားလာမှုကို ကြိုဆိုရန် ဘရူနိုင်းနိုင်ငံမှ မျှော်လင့်ထားကြောင်း ၂၀၂၅ ခုနှစ် ဖေဖော်ဝါရီလတွင် ထုတ်ပြန်ခဲ့သော နှစ်နိုင်ငံပူးတွဲထုတ်ပြန်ချက်တွင် ဖော်ပြထားသည်။

ဘရူနိုင်းနိုင်ငံသည် ဘော်နီယိုကျွန်း၏ မြောက်ဘက်ပိုင်းတွင် တည်ရှိသော အရှေ့တောင်အာရှ နိုင်ငံတစ်ခုဖြစ်ပြီး သဘာဝအရင်းအမြစ်များပေါကြွယ်ဝပြီး လှပသော သဘာဝရှုခင်းများလည်းရှိသော နိုင်ငံတစ်နိုင်ငံဖြစ်သည်။

DOCA(ရန်ကုန်)

ဇင်ဘာဘွေနိုင်ငံရှိ တရုတ်သံရုံးသည် ဇင်ဘာဘွေတွင် တရုတ်ဆေးအဖွဲ့ရောက်ရှိခြင်း နှစ် ၄၀ ပြည့် အထိမ်းအမှတ် ဧည့်ခံပွဲကို ကြာသပတေးနေ့တွင် ပြုလုပ်ခဲ့သည်။ အခမ်းအနားတွင် နိုင်ငံ အတွက် ရည်စူး၍ ၎င်းတို့၏ စေတနာ့ဝန်ထမ်းအား အသိအမှတ်ပြု ဂုဏ်ပြုသည့်အနေဖြင့် ဆုတံဆိပ် များ ချီးမြှင့်ခြင်းခံရသော တရုတ်ဆေးအဖွဲ့ ၂၁ သင်းအား နှုတ်ဆက်ပွဲနှင့် 22th batch တို့အား ကြိုဆို ဂုဏ်ပြုသည့် အခမ်းအနားလည်းဖြစ်သည်။ ဇင်ဘာဘွေကျန်းမာရေးနှင့် ကလေးစောင့်ရှောက်ရေး လက်ထောက်ဝန်ကြီး Sleiman Kwidini က ကျန်းမာရေးကဏ္ဍတွင် ဇင်ဘာဘွေနှင့် တရုတ်နိုင်ငံတို့ကြား ပူးပေါင်းဆောင်ရွက်မှုသည် အပြန်အလှန်လေးစားမှုနှင့် ချစ်ကြည်ရင်းနှီးမှုဖြင့် အတူတကွ လုပ်ဆောင်သောအခါ အောင်မြင်နိုင်သည့် ထင်ရှားသော ဥပမာတစ်ခုဖြစ်ကြောင်း ပြောကြားခဲ့သည်။ ဇင်ဘာဘွေနိုင်ငံဆိုင်ရာ တရုတ်သံရုံးမှ တာဝန်ခံ Cheng Yan က အဆိုပါ သမိုင်းမှတ်တိုင်သည် တရုတ်ဆေးဘက်ဆိုင်ရာအဖွဲ့များ ဇင်ဘာဘွေနိုင်ငံအတွက် ဆယ်စုနှစ် လေးခုကြာ မယိမ်းမယိုင် အပ်နှံခြင်း နှင့် ဝန်ဆောင်မှုပေးရုံသာမက နှစ်နိုင်ငံကြား ချစ်ကြည်ရင်းနှီးမှုကို သက်သေပြခြင်းလည်း ဖြစ်သည်။ တရုတ်နှင့် ဇင်ဘာဘွေ ဆေးဘက်ဆိုင်ရာ ပုဂ္ဂိုလ်ရေး လေ့ကျင့်ရေးများတွင် အနီးကပ် ဖလှယ်မှုများ ဆက်လက်ထားရှိကာ ဇင်ဘာဘွေ ဆေးရုံဝန်ထမ်းများနှင့် ဆေးဘက်ဆိုင်ရာ အရာရှိ ၆၀ ကျော်ကို ယခုနှစ်အတွင်း တရုတ်နိုင်ငံသို့ လာရောက်ရန် ဖိတ်ကြားမည်ဖြစ်ကြောင်း ချန်းက ပြောကြားခဲ့သည်။ ပြီးခဲ့သောနှစ်တွင်၊ တရုတ်ဆေးဘက်ဆိုင်ရာအဖွဲ့၏ 21st batch သည်လူနာပေါင်း ၁၄၀၀၀ ကျော်ကိုကုသပေးခဲ့ပြီး ဒေသခံကျန်းမာရေးလုပ်သား ၁၀၀၀ ကျော်ကိုလေ့ကျင့်သင်ကြားပေး ပြီး အရေးကြီးသောကျန်းမာရေး အဆောက်အဦများတည်ထောင်ခဲ့‌ကြောင်းသိရသည်။

DOCA(ရန်ကုန်)

          ဗီယက်နမ်နိုင်ငံသည် ၂၀၂၅ ခုနှစ်၏ ပထမနှစ်လတွင် သစ်နှင့် သစ်ထုတ်ကုန်များ တင်ပို့မှုမှတစ်ဆင့် ဝင်ငွေ အမေရိကန်ဒေါ်လာ ၂.၅ ဘီလီယံ ရရှိခဲ့ကြောင်း စိုက်ပျိုးမွေးမြူရေး နှင့် ကျေးလက်ဒေသဖွံ့ဖြိုးတိုးတက်ရေးဝန်ကြီးဌာနထုတ်ပြန်ချက်အရ သိရပါသည်။ ထိုတန်ဖိုးသည် ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက အမေရိကန်ဒေါ်လာ သန်း ၂၈၀ နှင့်ညီမျှသော ၁၂.၄ ရာခိုင်နှုန်းမြင့်တက်ခဲ့ကြောင်း သိရပါသည်။ အမေရိကန်သည် ထိုကာလအတွင်း ဗီယက်နမ်၏ သစ်နှင့်သစ်ထုတ်ကုန်တင်ပို့ရာအကြီးမားဆုံးဈေးကွက် ဖြစ်ပြီး စုစုပေါင်းတင်ပို့မှုတန်ဖိုး၏ ၅၅ ရာခိုင်နှုန်းရှိကြောင်း သိရပါသည်။  ထိုဈေးကွက်ထံမှ တင်သွင်းရန်မှာယူမှုများ တည်ငြိမ်စွာမြင့်တက်ရှိပြီး များစွာသောစီးပွားရေးလုပ်ငန်းများမှာ နှစ်ကုန်ပိုင်းအထိ မှာယူမှုများ ရရှိထားကြောင်း သိရပါသည်။ ဒုတိယနှင့် တတိယ အကြီးမားဆုံးဈေးကွက်များမှာ ဂျပန်နှင့် တရုတ်တို့ဖြစ်ပြီး စုစုပေါင်းတင်ပို့မှုတန်ဖိုး၏ ၁၁.၇ ရာခိုင်နှုန်းနှင့် ၉.၈ ရာခိုင်နှုန်းအသီးသီးရှိကြောင်း သိရပါသည်။ ထိုသို့အပေါင်းလက္ခဏာ ဆောင်သည့်အချက်များရှိနေသော်လည်း တင်သွင်းသည့်ဈေးကွက်များမှ သစ်အပေါ် စည်းမျဉ်းများတင်းကျပ်မှုကြောင့် ဗီယက်နမ်သစ်လုပ်ငန်းအတွက် စိန်ခေါ်မှုများစောင့်ကြို နေကြောင်း ကျွမ်းကျင်သူများက ပြောကြားခဲ့ပါသည်။ သစ်ထုတ်လုပ်သူများအနေဖြင့် ၎င်းတို့၏ထုတ်လုပ်မှုသည် တရားဝင်ကြောင်း၊ သစ်တောပြုန်းတီးမှုလျှော့ပါးကြောင်း၊ အစိမ်းရောင်ထုတ်လုပ်မှုမြှင့်တင်ကြောင်းနှင့် ဖန်လုံအိမ်ဓာတ်ငွေ့ထုတ်လွှင့်မှု လျှော့ချ ကြောင်း သက်သေပြသရန်လိုအပ်ကြောင်း သိရပါသည်။ သဘာဝပတ်ဝန်းကျင်နှင့် သစ်အ‌ပေါ် စည်းမျဉ်းနှင့်စံနှုန်းများ လိုက်နာရခြင်းအပြင် စဉ်ဆက်မပြတ်ဖွံ့ဖြိုးတိုးတက်ရေး အတွက် သစ်လုပ်ငန်းနယ်ပယ်သည် ဒီဇိုင်းတွင်ရင်းနှီးမြှုပ်နှံရန်၊ ဖန်တီးနိုင်စွမ်းရှိရန်နှင့် ထုတ်ကုန်အရည်အသွေး တိုးမြှင့်ရန် လိုအပ်ကြောင်း သိရပါသည်။ ဗီယက်နမ်၏ သစ်နှင့် သစ်ထုတ်ကုန်များသည် လတ်တလောတွင် နိုင်ငံနှင့် ဒေသပေါင်း ၁၆၀ ကျော်သို့ တင်ပို့ခဲ့ပြီး ဖြစ်ကြောင်း သိရပါသည်။ လွန်ခဲ့သည့် ဆယ်နှစ်ကျော်အတွင်း ဗီယက်နမ်သစ်လုပ်ငန်းသည် ကမ္ဘာ့ခုနှစ်ခုမြောက်အကြီးမားဆုံး သစ်နှင့် သစ်ထုတ်ကုန်ထုတ်လုပ်သူနှင့် ဒုတိယအကြီးဆုံး သစ်တင်ပို့သူအဖြစ်သို့ လျှင်မြန်စွာကြီးထွားခဲ့ကြောင်း သိရပါသည်။

DOCA(ရန်ကုန်)