ပြည်ပကုန်သွယ်မှုသတင်းများ

          အိန္ဒိယနိုင်ငံသည် ပြိုင်ဆိုင်မှုကဏ္ဍတွင်အထောက်အကူပြုနိုင်ရန်အတွက် အခွန်ကင်းလွတ်ခွင့်ပေးရန် အထည်အလိပ်လုပ်ငန်းစု၏ တောင်းဆိုမှုကြောင့် သြဂုတ်လ ၁၉ ရက်နေ့မှ စက်တင်ဘာလ ၃၀ ရက်နေ့အထိ ချည်ထည်တင်ပို့မှုတွင် အကောက်ခွန်များ ကင်းလွတ်ခွင့်ပြုလိုက်ကြောင်း သိရပါသည်။ အဆိုပါ ချည်ထည်တင်သွင်းမှုအပေါ် ယာယီအခွန် ရက်ဆိုင်းခြင်း သည် အမေရိကန်နိုင်ငံ၏ အခွန် ၅၀ ရာခိုင်နှုန်းကောက်ခံမှုကြောင့် အကြပ်အတည်းများနှင့် ရင်ဆိုင်နေရသည့် အိန္ဒိယနိုင်ငံ၏ အထည်အလိပ်လုပ်ငန်းစုအတွက် သက်သာရာရစေ‌ကြောင်း သိရပါသည်။ အမေရိကန်နိုင်ငံသည် အိန္ဒိယနိုင်ငံအား ရရှားနိုင်ငံမှ လောင်စာဆီဝယ်ယူမှုကြောင့် ပြစ်ဒဏ်အနေဖြင့် အခွန် ၅၀ ရာခိုင်နှုန်း တိုးမြင့်လိုက်ခြင်းဖြစ်ကြောင်း သိရပါသည်။ အိန္ဒိယနိုင်ငံ အထည်အလိပ်အဖွဲ့အစည်း (CITI) သည် အစိုးရအား ပြိုင်ဆိုင်မှုကဏ္ဍတွင် အထောက်အကူပြုစေရန် ချည်ထည်တင်ပို့မှုတွင် အခွန်ကောက်ခံမှု ဖျက်သိမ်းပေးရန် တိုက်တွန်းခဲ့ကြောင်း သိရပါသည်။ အခွန်လွတ်ကင်းခွင့်မပေးမှီတွင် ချည်ထည်တင်ပို့မှုအပေါ် အခွန် ၁၁ ရာခိုင်နှုန်းကောက်ခံလျက်ရှိ ပါသည်။ လုပ်ငန်းရှင်များသည် အစိုးရအား စက်တင်ဘာလအလွန်တွင်လည်း ချည်ထည်များအပေါ် အခွန်ကင်းလွတ်ခွင့်ကို ထပ်မံချဲ့ပေးရန် မျှော်မှန်းနေကြောင်း သိရပါသည်။ အိန္ဒိယနိုင်ငံ အထည်အလိပ်လုပ်ငန်းများသည် အလုပ်သမားအကြပ်အတည်းများ၊ ထုတ်လုပ်မှုကန့်သတ်ခြင်းများနှင့် ရင်ဆိုင်နေရကြောင်း သိရပါသည်။ အိန္ဒိယနိုင်ငံသည် ၂၀၃၀ ခုနှစ်တွင် အထည်အလိပ် တင်ပို့မှုကို ဒေါ်လာ ၁၀၀ ဘီလီယံ အထိမြှင့်တင်ရန် ရည်မှန်းထားကြောင်း သိရပါသည်။ အမေရိကန်နိုင်ငံမှ အခွန်တိုးမြှင့်ကောက်ခံခြင်းသည် အိန္ဒိယနိုင်ငံမှ အမေရိကန်အထည်အလိပ် ဝယ်ယူသူများသို့ အခွန်တိုးမြှင့်ကောက်ခံမှုအပြီးတွင်ဖြစ်ပေါ်လာခြင်းဖြစ်ပြီး ဘင်္ဂလားဒေ့ရှ်နိုင်ငံသည် နိုင်ငံရေးမတည်ငြိမ်မှုများအပြင် ၎င်းနိုင်ငံမှ ကုမ္ပဏီများသည်လည်း ထောက်ပို့မှုအကြပ် အတည်းများနှင့် ရင်ဆိုင်နေရကြောင်း သိရပါသည်။

Source: The Daily Star

DOCA (ရန်ကုန်)                                                              

          ကမ္ဘောဒီးယားနိုင်ငံမှ ထုတ်ပိုးထားသော ဒူးရင်းသီးများကို တရုတ်နိုင်ငံသို့ မကြာသေးမီ ရက်သတ္တပတ်များအတွင်းတင်ပို့ခဲ့ပြီး အဆိုပါတင်ပို့မှုသည် နှစ်နိုင်ငံကြား လတ်ဆတ်သော အသီးအနှံများကို လေကြောင်းကုန်သွယ်မှုဖြင့် ပထမဆုံးတင်ပို့ခြင်းဖြစ်ကြောင်း သိရပါသည်။ အလေးချိန် တန်ချိန် ၂ တန်ခန့်ရှိသော အဆိုပါ ဒူးရင်းသီးများကို လေအေးပေးစနစ်ထောက်ပို့မှုဖြင့် ၄ နာရီ အတွင်းတရုတ်နိုင်ငံသို့ တင်ပို့ခဲ့ပြီး တရုတ်နိုင်ငံသားများအနေဖြင့် လတ်ဆတ်သောဒူးရင်းသီးများကို သုံးဆောင်မှုများရရှိခဲ့ကြောင်း တရုတ်နိုင်ငံသံရုံး၏ ထုတ်ပြန်ချက်အရ သိရပါသည်။ ဒူးရင်းသီးသည် လက်ရှိတွင် ငှက်ပျောသီး၊ သရက်သီး၊ ကြက်မောက်သီး၊ အုန်းသီးပြီးလျှင် ကမ္ဘောဒီးယားနိုင်ငံမှ တရုတ်နိုင်ငံသို့ တရားဝင်တင်သွင်းခွင့်ရှိသော ပဥ္စမ‌မြောက်အသီးအနှံဖြစ် ကြောင်း သိရပါသည်။ ကမ္ဘောဒီးယားနိုင်ငံတွင် ဒူးရင်းသီးများကို ဟက်တာဧက ၁၁၀၀၀ ကျော် တွင် စိုက်ပျိုးလျက်ရှိပြီး နှစ်စဥ်တန်ချိန် ၁၂၀၀၀၀ ကျော်ခန့် ထုတ်လုပ်လျက်ရှိကြောင်း ကမ္ဘောဒီးယားနိုင်ငံ စိုက်ပျိုးရေးဝန်ကြီးဌာန၏ ထုတ်ပြန်ချက်အရ သိရပါသည်။ ကမ္ဘောဒီးယားနိုင်ငံတွင် တရုတ်နိုင်ငံအခွန်ရုံးမှ အသိမှတ်ပြုလက်မှတ်ရရှိထားသော စိုက်ပျိုးခြံ ၁၁၃ ခြံနှင့် ထုတ်လုပ်ရေးလုပ်ငန်းပေါင်း ၃၀ ခုရှိကြောင်း သိရပါသည်။ ၂၀၀၂ ခုနှစ်မှစ၍ တရုတ်နိုင်ငံသည် တစ်ခြားနိုင်ငံများမှ ဒူးရင်းတင်ပို့မှုစျေးကွက်ဝင်ရောက်ခွင့်ကို ချဲ့ထွင်ခဲ့ကြောင်း သိရပါသည်။ တရုတ်နိုင်ငံသည် ကမ္ဘာ့အကြီးဆုံး စားသုံးသူစျေးကွက်ဖြစ်ပြီး ယခင်နှစ်တွင် ဒေါ်လာ ၇ ဘီလီယံတန်ကြေးရှိသော အသီးအနှံများကို တင်သွင်းခဲ့ကြောင်း သိရပါသည်။ ထိုင်းနိုင်ငံသည် တရုတ်နိုင်ငံသို့ ဒေါ်လာ ၄ ဘီလီယံ တန်ကြေးရှိသော အသီးအနှံများကို တင်ပို့ခဲ့ပြီး ဗီယက်နမ်နိုင်ငံ သည်လည်း ဒေါ်လာ ၂.၉ ဘီလီယံ တန်ကြေးရှိသော အသီးအနှံများကို တင်ပို့ခဲ့ကြောင်း သိရပါသည်။ တရုတ်နိုင်ငံသည် ယခင်နှစ်တွင် ဒူးရင်းသီးတင်ပို့မှုများ ကျဆင်းခဲ့ပါသည်။ ယခုနှစ် ပထမနှစ်ဝက်တွင် တရုတ်နိုင်ငံသည် ဒူးရင်းသီး တန်ချိန် ၇၀၈၁၉၀ ခန့်တင်သွင်းခဲ့ပြီး ယခင်နှစ် ထက် ၁၅ ရာခိုင်နှုန်းကျဆင်းခဲ့ကြောင်း သိရှိရပါသည်။

Source: VN Express 

DOCA (ရန်ကုန်)                                                                  

          ဖိလစ်ပိုင်အစိုးရသည် စီးပွားရေးတိုးတက်ကောင်းမွန်မှုများနှင့် ဘဏ္ဍာရေးအခြေအနေ ခိုင်မာလာခြင်းတို့ကြောင့် ၂၀၃၀ ခုနှစ်တွင် ပီဆို ၇ ထရီလီယံအထိ ရရှိရန်မျှော်မှန်းထားကြောင်း ဘဏ္ဍာရေးဝန်ကြီးဌာန  (DOF) ၏ ထုတ်ပြန်ချက်အရ သိရပါသည်။ သြဂုတ်လ ၂၀ ရက်နေ့တွင် ဘဏ္ဍာရေးမှူးဆိုသူ Ralph Recto က အစိုးရသည် ၂၀၃၀ ခုနှစ်တွင် ဝင်ငွေ ၇.၁၃ ထရီလီယံ ရရှိရန် စီမံကိန်းများရေးဆွဲနေပြီး ပိုမိုသန်မာကောင်းမန်သော ဘဏ္ဍာနှစ်ကို ဦးတည်နေကြောင်း ပြောကြားခဲ့ပါသည်။ ၎င်းက ပြည်တွင်းဝင်ငွေဗျူရို (BIR) သည် ပီဆို ၅.၅၁ ထရီလီယံ ထောက်ပံ့ ပေးမည်ဖြစ်ပြီး အခွန်ဗျူရို (BOC) သည် ပီဆို ၁.၂၈ ထရီလီယံ ထုတ်ပေးမည်ဖြစ်ကြောင်း ပြောကြားခဲ့ပါသည်။ Recto ၏ အဆိုအရ အဆိုပါဝင်ငွေအလားအလာခန့်မှန်းခြေသည် အစိုးရ ဝင်ငွေထုတ်လုပ်မှုလမ်းကြောင်းကို အရှိန်အဟုန်မြှင့်ရန်ရည်ရွယ်၍ အသစ်ထုတ်ပြန်လိုက်သည့် မြို့ပြစျေးကွက်အကျိုးဖြစ်ထွန်းမှုမြှင့်တင်ခြင်းဥပဒေနှင့် ဒစ်ဂျစ်တယ်ဝန်ဆောင်မှုများတွင် အခွန် ပေးဆောင်ရခြင်းစသည့် ဥပဒေသစ်များထုတ်ပြန်လိုက်ခြင်း၏ အကျိုးသက်ရောက်မှုကြောင့် ဖြစ်ကြောင်း သိရပါသည်။ ယခုနှစ်တွင် အစိုးရ၏ အသုံးစရိတ် ပီဆို ၆.၀၈ ထရီလီယံသည် အခွန်ဝင်ငွေ ပီဆို ၄.၅၂ ထရီလီယံနှင့် အခွန်မဟုတ်သောဝင်ငွေ ပီဆို ၃၀၆.၅ ဘီလီယံ တို့ထက် ကျော်လွန်၍ ထုတ်ပေးရခြင်းကြောင့် ဘဏ္ဍာရေးလိုငွေ ပီဆို ၁.၅၆ ထရီလီယံ ရှိခဲ့ကြောင်း သိရှိရပါသည်။

Source: Philstar 

DOCA (ရန်ကုန်)                                                                       

           စီးပွားရေးဝန်ကြီးဌာနသည် လုံလောက်သော ထောက်ပံ့မှုများကို ထိန်းသိမ်းရန် စားနပ်ရိက္ခာဖူလုံမှု မြှင့်တင်ရန်၊ တောင်သူများ အကျိုးအမြတ် ရရှိစေရန် ပဲပုပ်နှင့် အုန်းသီးများ ဈေးကွက်ဖွင့်လှစ်ပြီး တင်သွင်းနိုင်ရန် စီစဉ်နေပါသည်။

       စီးပွားရေးဝန်ကြီး Jatuporn Buruspat သည် ယခုနှစ်ပထမဆုံးအကြိမ် ကျင်းပသော ဆီထွက်သီးနှံနှင့် ဟင်းသီးဟင်းရွက်ဆီ ကော်မတီအစည်းအဝေးတွင် သဘာပတိအဖြစ် ဆောင်ရွက်ခဲ့ပါသည်။ ပဲပုပ်နှင့် အုန်းဆီများကို မှီခိုနေသော စက်ရုံများအတွက် ကုန်ကြမ်းများ လုံလောက်စွာရရှိစေရန်နှင့် ဒေသခံလယ်သမားများကို ဆက်လက်ကာကွယ်ပေးရန် ကိစ္စရပ်များကို ထည့်သွင်းစဉ်းစား အတည်ပြုခဲ့ပါသည်။

        သီးနှံဈေးနှုန်းကို တည်ငြိမ်အောင်ထိန်းသိမ်းရန်နှင့် စက်မှုလုပ်ငန်းသုံးအတွက် လုံလောက်သော ကုန်ကြမ်းထောက်ပံ့ပေးနိုင်ရန် ရည်မှန်းထားကြောင်း ပြောကြားခဲ့ပါသည်။

          နောက်ထပ်ရည်မှန်းချက်တစ်ခုမှာ ၂၀၂၆- ၂၀၂၈ ခုနှစ်မှ စ၍ ပဲပုပ်ဆီနှင့် ၄င်း၏ အစိတ် အပိုင်းများ၊ အုန်းသီး၊ အုန်းသီးခြောက်နှင့် အုန်းဆီတို့ကို ထိုင်းနိုင်ငံ၏ ကမ္ဘာ့ကုန်သွယ်ရေး အဖွဲ့ (WTO)၏  လယ်ယာစိုက်ပျိုးရေး သဘောတူညီချက်နှင့် လွတ်လပ်သော ကုန်သွယ်ရေး သဘောတူ ညီချက်များ (FTAs) အရ ကတိပြုထားသည့်အတိုင်း ဈေးကွက်ဖွင့်လှစ်ခြင်းနှင့် တင်သွင်းခြင်းကို စီမံခန့်ခွဲရန်ဖြစ်ပါသည်။ တင်သွင်းမှုများသည် ပြင်တွင်းဈေးကွက်အပေါ် အခြေခံမည်ဖြစ်ကြောင်း သိရပါသည်။

          မစ္စတာ Jatuporn က အစည်းအဝေး၏ ရည်ရွယ်ချက်မှာ ဆီထွက်သီးနှံနှင့် ဟင်းသီးဟင်းရွက်ဆီ ထုတ်ကုန်များအတွက် ထိရောက်သော စီမံခန့်ခွဲမှုကို ထူထောင်ရန်နှင့် ထိုင်းတောင်သူများ၏ အကျိုးစီးပွားကို  ဦးစားပေးရန်ဖြစ်ကြောင်း ပြောကြားခဲ့ပါသည်။

           တောင်သူများအတွက် မျှတသောဈေးနှုန်းများ ရရှိစေရန်နှင့် စက်မှုလုပ်ငန်းများ လိုအပ်သောကုန်ကြမ်းများ ရရှိစေရန် အစိုးရနှင့် ပုဂ္ဂလိကကဏ္ဍများအကြား ပူးပေါင်းဆောင်ရွက်ရန် အရေးကြီးကြောင်း ပြောကြားခဲ့ပါသည်။

Source: Bangkok Post 

DOCA (ရန်ကုန်)                                                                        

                 ထိုင်းဆန် ဈေးနှုန်းများမှာ ၁၀၀ မှတ် ဘီဂရိတ် ဆန်တစ်တန်လျှင် အမေရိကန်ဒေါ်လာ ၃၉၁ ဖြင့်လည်းကောင်း၊ ၂၅ မှတ် ဆန်တစ်တန်လျှင် အမေရိကန်ဒေါ်လာ ၃၆၃ ဖြင့်လည်းကောင်း ပေါင်းဆန်ဈေးနှုန်းမှာ အမေရိကန်ဒေါ်လာ ၃၈၈ ဖြင့် ဈေးနှုန်း အနည်းငယ်ကျဆင်းလျက်ရှိကြောင်း သိရှိရသည်။

                ဗီယက်နမ်ဆန်ဈေးနှုန်းများမှာ ၅ မှတ်ဆန်တစ်တန်လျှင် အမေရိကန်ဒေါ်လာ ၄၀၃ ဖြင့် ဈေးနှုန်း အနည်းငယ်မြင့် တက်လျက်ရှိပြီး၂၅ မှတ် ဆန်တစ်တန်လျှင် အမေရိကန်ဒေါ်လာ ၃၇၂ ဖြင့် ဈေးနှုန်း  အနည်းငယ်ကျဆင်းလျက်ရှိကြောင်း သိရှိရသည်။ ဆန်ကွဲဈေးနှုန်း ဖော်ပြထားခြင်း မရှိပါ။

                အိန္ဒိယ ဆန်ဈေးနှုန်းများမှာ ၅ မှတ်ဆန်တစ်တန်လျှင် အမေရိကန်ဒေါ်လာ ၃၈၀ ဖြင့်  ဈေးနှုန်း အနည်းငယ်မြင့် တက်လျက်ရှိပြီး ၂၅ မှတ် ဆန်တစ်တန်လျှင် အမေရိကန်ဒေါ်လာ  ၃၆၄ ဖြင့် ဈေးနှုန်း တည်ငြိမ်လျက်ရှိကြောင်း သိရှိရသည်။ ပေါင်းဆန်တစ်တန်လျှင် အမေရိကန်ဒေါ်လာ ၃၇၀ ဖြင့် ဈေးနှုန်း အနည်းငယ်ကျဆင်းလျက်ရှိ ကြောင်းသိရှိရသည်။

                ပါကစ္စတန် ဆန်ဈေးနှုန်းများမှာ ၅ မှတ်ဆန်တစ်တန်လျှင် အမေရိကန်ဒေါ်လာ ၃၅၉ ဖြင့် လည်းကောင်း၊ ၂၅ မှတ် ဆန်တစ်တန်လျှင် အမေရိကန်ဒေါ်လာ ၃၄၁ ဖြင့် ဈေးနှုန်းအနည်းငယ် ကျဆင်းလျက်ရှိကြောင်း သိရှိရသည်။ ပေါင်းဆန် တစ်တန်လျှင် အမေရိကန်ဒေါ်လာ ၃၈၄ ဖြင့် ဈေးနှုန်းအနည်းငယ် မြင့်တက်လျက်ရှိပြီး ဆန်ကွဲဈေးနှုန်း ဖော်ပြထားခြင်းမရှိကြောင်းသိရှိရပါသည်။

Source  : Thai Rice Exporter

DOCA(ရန်ကုန်)