ပြည်ပကုန်သွယ်မှုသတင်းများ

         အိန္ဒိယ၏ နိုင်ငံခြားငွေ အရန်ငွေသည် အောက်တိုဘာ ၃ ရက် နောက်ဆုံးပတ်အတွင်း အမေရိကန်ဒေါ်လာ ၂၇၆ သန်းမှ ၆၉၉.၉၆ ဘီလီယံသို့ ကျဆင်းခဲ့ကြောင်း နိုင်ငံ၏ ဗဟိုဘဏ်ဖြစ်သော အိန္ဒိယဗဟိုဘဏ် (RBI) မှ အောက်တိုဘာလ ၁၁ ရက်နေ့က ထုတ်ပြန်သော အပတ်စဉ် အချက်အလက်များအရ သိရသည်။

        နိုင်ငံ၏ နိုင်ငံခြားငွေ အရန်ငွေများ ကျဆင်းသွားသည့် တတိယပတ် ဆက်တိုက်ဖြစ်သည်။ နောက်ဆုံးရ RBI အချက်အလက်များအရ နိုင်ငံခြားငွေပိုင်ဆိုင်မှုများသည် ဒေါ်လာ ၄.၀၅ ဘီလီယံမှ ၅၇၇.၇၁ ဘီလီယံဒေါ်လာသို့ကျဆင်းသွားခဲ့ပြီး Gold Reserves သည် ၃.၇၅ ဘီလီယံဒေါ်လာမှ ၉၈.၇၇ ဘီလီယံအထိတိုးလာခဲ့သည်။

        အထူးဆွဲပိုင်ခွင့်များသည် ဒေါ်လာ ၂၅ သန်းမှ ၁၈.၈၁ ဘီလီယံအထိ တိုးလာပြီး နိုင်ငံတကာ ငွေကြေးရန်ပုံငွေအဖွဲ့၏ အရန်နေရာသည် ဒေါ်လာ ၄ သန်းမှ ၄.၆၇ ဘီလီယံသို့ ကျဆင်းသွားခဲ့ကြောင်း သိရှိရပါသည်။

Source : Xinhua                                                                                  

DOCA(ရန်ကုန်)

         သီရိလင်္ကာသမ္မတ Anura Kumara Dissanayake က နိုင်ငံတွင်းဝင်ရောက်လာမည့် ရင်းနှီးမြှုပ်နှံသူများနှင့် ရင်းနှီးမြှုပ်နှံမှုများ၏ လုံခြုံရေးကို လက်ရှိအစိုးရလက်ထက်တွင် အာမခံပေးမည်ဖြစ်ကြောင်း အောက်တိုဘာလ ၁၁ ရက်နေ့တွင် ပြောကြားခဲ့သည်။

         သီရိလင်္ကာနိုင်ငံ၏ ရင်းနှီးမြှုပ်နှံမှု အခွင့်အလမ်းများ၊ စီးပွားရေးပတ်ဝန်းကျင်နှင့် ဥပဒေ မူဘောင်များကိုလေ့လာရန် သီရိလင်္ကာနိုင်ငံသို့ လာရောက်လည်ပတ်သည့် နိုင်ငံခြားစီးပွားရေး ကိုယ်စားလှယ်အဖွဲ့နှင့် သမ္မတရုံး၌ တွေ့ဆုံရာတွင် ၎င်းက အမှာစကားပြောကြားခဲ့သည်။ သီရိလင်္ကာတွင် ရင်းနှီးမြှုပ်နှံမှုများအတွက် လုံခြုံသောပတ်ဝန်းကျင်ကို ထူထောင်ထားပြီးဖြစ်ကြောင်းနှင့် လက်ရှိအစိုးရသည် ရင်းနှီးမြှုပ်နှံမှုလုပ်ငန်းစဉ်တွင် ပွင့်လင်းမြင်သာမှုနှင့် တည်ငြိမ်မှုရှိစေရန် ဥပဒေအသစ်များ ရေးဆွဲနေကြောင်း သမ္မတက ပြောကြားခဲ့သည်။

        နိုင်ငံခြားရင်းနှီးမြှုပ်နှံမှုများကို ဆွဲဆောင်ခြင်းသည် အစိုးရ၏ ထိပ်တန်းဦးစားပေးအဖြစ် ဆက်လက်တည်ရှိနေကြောင်း အလေးပေးပြောကြားခဲ့ပြီး ရင်းနှီးမြုပ်နှံသူအား အကာအကွယ်ပေးရေး၊ ရင်းနှီးမြှုပ်နှံမှု အခွင့်အလမ်းများတိုးချဲ့ရန်နှင့် ရင်းနှီးမြှုပ်နှံသူများ၏ လုပ်ငန်းဆောင်ရွက်မှုများကို လွယ်ကူချောမွေ့စေရန် ဆောင်ရွက်လျက်ရှိသည်ဟု Dissanayake က ပြောကြားခဲ့သည်။ အစိုးရက ရင်းနှီးမြှုပ်နှံမှု အကာအကွယ်ပေးရေး အက်ဥပဒေကိုလည်း မိတ်ဆက်သွားမည်ဖြစ်ကြောင်း ၎င်းက ဆက်လက်ပြောကြောင်း သိရှိရပါသည်။

Source : Xinhua                                                                                  

DOCA(ရန်ကုန်)

             စက်တင်ဘာလတွင် ဟွန်ဒါဗီယက်နမ်သည် မော်တော်ဆိုင်ကယ်နှင့် ကားရောင်းချမှု ၂ ခု စလုံးတွင် ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၁၁.၄ ရာခိုင်နှုန်းနှင့် ၅၂.၈ ရာခိုင်နှုန်း ကျဆင်းခဲ့ကြောင်း သိရပါသည်။ ဟွန်ဒါဗီယက်နမ်၏ စီးပွားရေးအစီရင်ခံစာအရ စက်တင်ဘာလတွင် မော်တော်ဆိုင်ကယ်လက်လီရောင်းချမှုသည် အစီးရေ ၁၆၃၇၈၇ စီးရှိခဲ့ပြီး ၂၀၂၄ ခုနှစ် စက်တင်ဘာလနှင့်နှိုင်းယှဉ်ပါက ၁၁.၄ ရာခိုင်နှုန်းကျဆင်းခဲ့ကြောင်း သိရပါသည်။ ၂၀၂၅ ခုနှစ် ဧပြီ လမှ စက်တင်ဘာလအထိဘဏ္ဍာနှစ်တွင် စုစုပေါင်းမော်တော်ဆိုင်ကယ်ရောင်းချရမှုမှာ အစီးရေ ၁၀၂၈၁၈၃ စီးရှိခဲ့ပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၀.၂ ရာခိုင်နှုန်းကျဆင်းခဲ့ကြောင်း သိရပါသည်။ ပြည်တွင်းရောင်းချမှုအပြင် ဟွန်ဒါဗီယက်နမ်သည် အပြည့်အဝတပ်ဆင်ထားသည့် မော်တော်ဆိုင်ကယ် အစီးရေ ၁၇၀၆၆ စီးကို ပြည်ပသို့တင်ပို့ခဲ့ကြောင်း သိရပါသည်။ ကုမ္ပဏီက စုစုပေါင်းကျဆင်းမှုများဖြစ်ပေါ်နေသော်လည်း Vision ၊ Wave Alpha ၊ Air Blade နှင့် SH Mode တို့ပါဝင်သည့် ရောင်းအားအကောင်းဆုံးမော်ဒယ်များမှာ ၎င်းတို့၏ ဒီဇိုင်း၊ လောင်စာသက်သာမှုနှင့် တည်ငြိမ်သည့်အရည်အသွေးတို့ကြောင့် စားသုံးသူများကို ဆွဲဆောင်နိုင်ခဲ့ကြောင်း သိရပါသည်။ စက်တင်ဘာလတွင် ဟွန်ဒါဗီယက်နမ်သည် ကားအစီးရေ ၁၇၀၄ စီးရောင်းချခဲ့ရပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၅၂.၈ ရာခိုင်နှုန်းကျဆင်းခဲ့ကြောင်း သိရပါသည်။ သို့သော် ၂၀၂၅ ဘဏ္ဍာနှစ်အတွက် စုစုပေါင်းကားရောင်းချရမှုမှာ အစီးရေ ၁၁၇၄၅ စီးထိရောက်ရှိခဲ့ပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၁.၈ ရာခိုင်နှုန်းမြင့်တက်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          ဗီယက်နမ်-ကမ္ဘောဒီးယားစီးပွားရေးဖိုရမ် ၂၀၂၅ ကို ဟိုချီမင်းမြို့တော်တွင် အောက်တိုဘာလ ၁၁ ရက်နေ့က ကျင်းပပြုလုပ်ခဲ့ပြီး နှစ်နိုင်ငံစလုံးမှစီးပွားရေးလုပ်ငန်းများအကြား စီးပွားရေးချိတ်ဆက်မှုများအရှိန်မြှင့်တင်ရန်နှင့် ရင်းနှီးမြှုပ်နှံမှုအခွင့်အလမ်းများတိုးချဲ့ရန် ရည်ရွယ်ကြောင်း သိရပါသည်။ အခမ်းအနားကို ဗီယက်နမ်-ကမ္ဘောဒီးယားချစ်ကြည်ရေးအသင်းနှင့် ဗီယက်နမ်နှင့် ကမ္ဘောဒီးယားအေဂျင်စီများက ပူးတွဲကျင်းပခြင်းဖြစ်ကြောင်း သိရပါသည်။ အခမ်းအနားတွင်  အမျိုးသားညီလာခံ ဒုတိယဥက္ကဌနှင့် ဗီယက်နမ်-ကမ္ဘောဒီးယားချစ်ကြည်ရေးအသင်း၏ ဥက္ကဌ ဖြစ်သူ Nguyen Thi Thanh က နှစ်နိုင်ငံဆက်ဆံရေးသည် လတ်တလောနှစ်များအတွင်း ဘက်ပေါင်းစုံအားကောင်းစွာ ဆက်လက်တိုးတက်ခဲ့ပြီး အထူးသဖြင့်စီးပွားရေး၊ကုန်သွယ်ရေးနှင့် ရင်းနှီးမြှုပ်နှံမှုတို့ဖွံ့ဖြိုးတိုးတက်ခဲ့ကြောင်း၊ သို့သော် နှစ်နိုင်ငံ၏အလားအလာနှင့်နှိုင်းယှဉ်ပါက အပြန်အလှန်ပူးပေါင်းဆောင်ရွက်မှုသည် သင့်ရုံမျှသာရှိသေးပြီး အထူးသဖြင့် အစိမ်းရောင်စီးပွား ရေး၊ ပြည့်ဖြိုးမြဲစွမ်းအင်၊ နည်းပညာမြင့်စိုက်ပျိုးမွေးမြူရေး၊ ခရီးသွားကဏ္ဍနှင့် ကုန်သွယ်ရေးတို့တွင်ဖြစ်ကြောင်းနှင့် ဗီယက်နမ်သည် ကမ္ဘောဒီးယားစီးပွားရေးလုပ်ငန်းများ ရင်းနှီးမြှုပ်နှံရန်နှင့် ထိရောက်စွာလည်ပတ်နိုင်ရန် သင့်လျော်ကောင်းမွန်သောအခြေအနေများကို ဖန်တီးပေးထားပြီး ကမ္ဘောဒီးယားအစိုးရသည်လည်း အပြန်အလှန်အကျိုးရှိသောဖွံ့ဖြိုးတိုးတက်ရေးအတွက် ကမ္ဘောဒီးယားတွင် ရင်းနှီးမြှုပ်နှံနေသည့် ဗီယက်နမ်လုပ်ငန်းများအား ဆက်လက်ပံ့ပိုးပေးရန် မျှော်လင့်ကြောင်း ပြောကြားခဲ့ပါသည်။ ဖိုရမ်သည် နှစ်နိုင်ငံစလုံးမှ စီးပွားရေးလုပ်ငန်းများအတွက် တွေ့ဆုံဆွေးနွေးရန်၊ အတွေ့အကြုံဝေမျှရန်နှင့် ပူးပေါင်းဆောင်ရွက်မှုအခွင့်အလမ်းသစ်များ ရှာဖွေရန် စင်မြင့်တစ်ခုဖြစ်ခဲ့ကြောင်း သိရပါသည်။ ကမ္ဘောဒီးယားနိုင်ငံကုန်သည်များအသင်း၏ ဒုတိယ ဥက္ကဌ Neak Oknha Lav Kang က ဖိုရမ်သည်လုပ်ငန်းရှင်များနှင့် ရင်းနှီးမြှုပ်နှံသူများက ကုန်စည်နှင့် ဝန်ဆောင်မှုများ ကုန်သွယ်မှုမြှင့်တင်ရန်နှင့် အလားအလာရှိသော ပူးပေါင်းဆောင်ရွက်မှုအတွက် အထူးအခွင့်အလမ်းဖြစ်ကြောင်းနှင့် ၂၀၂၅ ခုနှစ်တွင် အပြန်အလှန်ကုန်သွယ်ရေးကို အမေရိကန်ဒေါ်လာ ၂၀ ဘီလီယံထိမြှင့်တင်လိုကြောင်း ပြောကြားခဲ့ပါသည်။ ဖိုရမ်တွင် ကိုယ်စားလှယ်များသည် နှစ်နိုင်ငံကြားလတ်တလော ရင်းနှီးမြှုပ်နှံမှုနှင့်ကုန်သွယ်ရေးပူးပေါင်း ဆောင်ရွက်မှု အထူးသဖြင့် စိုက်ပျိုးမွေးမြူရေးထုတ်ကုန်တင်ပို့မှု၊ အစားအစာပြုပြင်ထုတ်လုပ်မှု၊ ခရီးသွာကဏ္ဍ၊ အခြေခံအဆောက်အအုံနှင့် နည်းပညာတို့နှင့် ပတ်သတ်၍ ဆွေးနွေးခဲ့ကြကြောင်း သိရပါသည်။ ဖိုရမ်တွင် ဗီယက်နမ်၏ Visan ကုမ္ပဏီနှင့် ကမ္ဘောဒီးယား၏ Degrand Group တို့ကြား ကုန်ထုတ်လုပ်မှုနှင့် ဖြန့်ဖြူးမှုတို့တွင် ပူးပေါင်းဆောင်ရွက်ရန်အတွက် MoU လက်မှတ်ရေးထိုးခဲ့ကြောင်း သိရပါသည်။ ၂၀၂၄ ခုနှစ်တွင် ၂ နိုင်ငံအပြန်အလှန်ကုန်သွယ်မှုတန်ဖိုးမှာ အမေရိကန် ဒေါ်လာ ၁၀.၁ ဘီလီယံရှိခဲ့ပြီး ၂၀၂၃ ခုနှစ်နှင့်နှိုင်းယှဉ်ပါက ၁၇.၅ ရာခိုင်နှုန်းမြင့်တက်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          လွန်ခဲ့သည့်နှစ်ထက်တန်ဖိုး ၄၀ ရာခိုင်နှုန်းကျဆင်းသော်လည်း ယခုနှစ်တွင် ထိုင်းနိုင်ငံ၏ ဆန်တင်ပို့မှုသည် ရည်မှန်းချက်ဖြစ်သည့် တန်ချိန် ၇.၅ သန်း ပြည့်မီနိုင်သည့်လမ်းကြောင်းပေါ်တွင် ရှိနေကြောင်း ထိုင်းနိုင်ငံဆန်တင်ပို့သူများအသင်းက ပြောကြားခဲ့ပါသည်။ အသင်း၏ဂုဏ်ထူး ဆောင်ဥက္ကဌဖြစ်သူ Chookiat Ophaswongse က ယခုနှစ်၏ ပထမ ၉ လတွင် နိုင်ငံသည် ဆန်တန်ချိန် ၅.၉ သန်းတင်ပို့ခဲ့ပြီး နှစ်စဉ်ပို့ကုန်ရည်မှန်းချက်ပြည့်မီရန် ယခုနှစ်၏ စတုတ္ထ ၃ လ ပတ်ကာလတွင် တစ်လလျှင်ပျမ်းမျှ တန်ချိန် ၅၀၀၀၀၀ ကျော်တင်ပို့ရန်လိုအပ်ကြောင်း ပြောကြား ခဲ့ပါသည်။ အကယ်၍ထိုင်းသည် ထိုကာလအတွင်း တစ်လလျှင်တန်ချိန် ၆၀၀၀၀၀ တင်ပို့နိုင်ပါက စုစုပေါင်းတင်ပို့မှုမှာ တန်ချိန် ၈ သန်းအထိရောက်ရှိနိုင်ကြောင်း သိရပါသည်။ သို့သော် ရောင်းလို အားများပြားသော်လည်း ဝယ်လိုအားကျဆင်းမှုကြောင့် ယခုနှစ်ကမ္ဘာ့ဆန်ဈေးကွက်သည် ၂၀၂၄ ခုနှစ်ကထက်ဆိုးရွားနိုင်ကြောင်း သိရပါသည်။ ဒေသတွင်းအဓိကဆန်တင်သွင်းသူများဖြစ်သည့် အင်ဒိုနီးရှားနှင့် ဖိလစ်ပိုင်တို့သည် ပြည်တွင်းထုတ်လုပ်မှုလုံလောက်မှုနှင့် ပြည်တွင်းဆန်ဈေးကွက် များတည်ငြိမ်ရန်လိုအပ်သောကြောင့် ၎င်းတို့၏တင်သွင်းမှုများကို ရပ်တန့်ထားကြောင်း သိရပါသည်။ ဖိလစ်ပိုင်သည် ၂၀၂၆ ခုနှစ် ဇန်နဝါရီလတွင် ဆန်တန်ချိန် ၃၀၀၀၀၀ တင်သွင်းရန်စီစဉ်ခဲ့သော်လည်း ယခုအခါဖေဖော်ဝါရီလမှ ဧပြီလထိ ၃ လတင်သွင်းမှုပိတ်ပင်ခဲ့ကြောင်း သိရပါသည်။ ထိုအချက်များသည် ကမ္ဘာ့ဈေးကွက်တွင် ဆန်ဈေးနှုန်းများကျဆင်းမှုကိုဖြစ်ပေါ်စေခဲ့ကြောင်း သိရပါသည်။ ထိုင်းနိုင်ငံ၏ ၅% ဆန်ဖြူသည် တစ်တန်လျှင် အမေရိကန်ဒေါ်လာ ၃၄၀၊ မြန်မာဆန်က အမေရိကန်ဒေါ်လာ ၃၁၀၊ ပါကစ္စတန်ဆန်က အမေရိကန်ဒေါ်လာ ၃၃၀၊ အိန္ဒိယဆန်က အမေရိ ကန်ဒေါ်လာ ၃၃၀ နှင့် ဗီယက်နမ်ဆန်က အမေရိကန်ဒေါ်လာ ၃၆၀ ဈေးနှုန်းရှိကြောင်း သိရပါသည်။ ယခုနှစ်၏ ပထမ ၉ လတွင် ဗီယက်နမ်သည်ဆန်တန်ချိန် ၆.၈ သန်းတင်ပို့ခဲ့ပြီး အိန္ဒိယက တန်ချိန် ၁၈ သန်းတင်ပို့ခဲ့ကြောင်း သိရပါသည်။ အိန္ဒိယနိုင်ငံသည် ယခုနှစ်တွင် တန်ချိန် ၂၂-၂၃ သန်းနှင့် ဗီယက်နမ်သည် တန်ချိန် ၈.၅ သန်းတင်ပို့ရန် မျှော်မှန်းရကြောင်း သိရပါသည်။ ထိုင်းဆန်သည် ၂၀၂၄ ခုနှစ်တွင် တစ်တန်လျှင် ပျမ်းမျှအမေရိကန်‌ဒေါ်လာ ၅၀၀ မှ ယခုနှစ်တွင် အမေရိကန် ‌ဒေါ်လာ ၃၄၀ ပတ်လည်အထိကျဆင်းခဲ့ကြောင်း သိရပါသည်။ Mr Chookiat က ထိုင်း hom mali ဆန်နှင့် ပေါင်းဆန်တို့သည် ယခုနှစ်တွင် စွမ်းရည်ကောင်းနေကြောင်း ပြောကြားခဲ့ပါသည်။ အမေရိကန်ဈေးကွက်တွင် ထိုင်း hom mali ဆန်အတွက် ဝယ်လိုအားကောင်းနေပြီး ဝယ်ယူသူများသည် ထရမ့်အကောက်ခွန်သက်ရောက်မှုအလားအလာကိုစိုးရိမ်မှုကြောင့် ဝယ်ယူစုဆောင်းနေကြောင်း သိရပါသည်။ အမေရိကန်သည် နှစ်စဉ်ထိုင်းနိုင်ငံထံမှ ဆန်တန်ချိန် ၈၃၀၀၀၀ တင်သွင်းပြီး ထိုပမာဏထဲမှ တန်ချိန် ၆၅၀၀၀၀ သည် hom mali ဆန်ဖြစ်ကြောင်း သိရပါသည်။ ၂၀၂၄ ခုနှစ်တွင် ထိုင်းနိုင်ငံသည် ဆန်တန်ချိန် ၉.၉၅ သန်းတင်ပို့ရာမှ ဝင်ငွေ အမေရိကန်‌ဒေါ်လာ၆.၄၃ သန်း ရရှိခဲ့ကြောင်း သိရှိရပါသည်။

Bangkok Post 

DOCA (ရန်ကုန်)