ပြည်ပကုန်သွယ်မှုသတင်းများ

          သတ္တုတူးဖော်ရေးနှင့် စွမ်းအင်ဝန်ကြီး Keo Rattanak နှင့် ကမ္ဘောဒီးယားနိုင်ငံဆိုင်ရာ ဩစတြေးလျ သံအမတ်ကြီး  Derek Yip တို့သည် စွမ်းအင်၊ သတ္တုတူးဖော်ခြင်းနှင့် ရင်းနှီးမြှုပ်နှံမှု ကဏ္ဍများအတွက် ၁၇-၃-၂၀၂၅ ရက်နေ့က တွေ့ဆုံဆွေးနွေးမှုများ ပြုလုပ်ခဲ့ကြသည်။ လွန်ခဲ့သည့်နှစ်ပေါင်း ၇၀ ကျော်အတွင်း ကမ္ဘောဒီးယားနှင့်ဩစတြေးလျနိုင်ငံတို့သည် ငြိမ်းချမ်းရေးကို ထိန်းသိမ်းခြင်းမှ စီးပွားရေးတိုးတက်မှုကိုမြှင့်တင်ပေးသည့် မိတ်ဖက် ဆက်ဆံရေးတစ်ရပ်ကိုဖော်ဆောင်ခဲ့ခြင်းဖြစ်သည်။ ဤပူးပေါင်းဆောင်ရွက်မှုသည် အနာဂါတ် တွင် ပိုမိုကြီးမားသော အခွင့်အလမ်းများကို ဆက်လက်ပေးဆောင်ရန် ရည်ရွယ်ထားသည်။   တွေ့ဆုံစဉ် ကမ္ဘောဒီးယားနှင့် ဩစတြေးလျနိုင်ငံတို့သည် စွမ်းအင်ကဏ္ဍ၊ သတ္တုတူးဖော်ရေးနှင့် ကမ္ဘောဒီးယားနိုင်ငံ၏အနာဂါတ်တွင် ရင်းနှီးမြှုပ်နှံရေးတို့ကို ဆွေးနွေးခဲ့ကြသည်။ ထို သံတမန် ဆက်ဆံရေးသည် အပြန်အလှန်လေးစားမှုနှင့် တူညီသောပန်းတိုင်များပေါ်တွင် တည်ဆောက် ထားခြင်းဖြစ်ကြောင်းနှင့် ကမ္ဘောဒီးယားနိုင်ငံသည် ဤပူးပေါင်းဆောင်ရွက်မှုကို တန်ဖိုးထားကာ အနာဂါတ်မျိုးဆက်သစ်များအတွက် ဆက်လက်ဆောင်ရွက်သွားမည်ဖြစ်ကြောင်း Keo Rattanak က ပြောကြားခဲ့သည်။ ဩစတြေးလျနိုင်ငံသည် ရေရှည်တည်တံ့ခိုင်မြဲသော ဖွံ့ဖြိုး တိုးတက်ရေးအတွက် တန်ဖိုးရှိသောမိတ်ဖက်နိုင်ငံအဖြစ် ဆက်လက်ရပ်တည်မည်ဖြစ်ကြောင်း သံအမတ်ကြီး Derek Yip  ကတိပြုခဲ့သည်။

DOCA(ရန်ကုန်)

          ကမ္ဘောဒီးယားနိုင်ငံနှင့်အိန္ဒိယနိုင်ငံတို့အကြားကုန်သွယ်မှုတိုးမြင့်လာသော်လည်း နှစ်နိုင်ငံ စီးပွားရေးအလားအလာနည်းပါးနေသေးကြောင်း အထက်လွှတ်တော်ဥက္ကဋ္ဌ Hun Sen က ၅-၃-၂၀၂၅ ရက်နေ့တွင်ပြောကြားခဲ့သည်။ အသစ်ခန့်အပ်ထားသော အိန္ဒိယသမ္မတနိုင်ငံဆိုင်ရာ ကမ္ဘောဒီးယားသံအမတ်ကြီး Vanlalvawna Bawitlung အား Senate နန်းတော်၌ Hun Sen က ကြိုဆိုခဲ့ပြီး နှစ်နိုင်ငံလက်ရှိအလားအလာနှင့်အညီ ကုန်သွယ်မှုနှင့်ရင်းနှီးမြှုပ်နှံမှုဆက်ဆံရေးများ ပိုမိုတိုးတက်ကောင်းမွန်လာစေရန်တောင်းဆိုခဲ့သည်။ စီးပွားရေး၊ ကုန်သွယ်မှုနှင့် ရင်းနှီးမြှုပ်နှံမှုများ အားကောင်းလာစေရန် အိန္ဒိယနှင့်ကမ္ဘောဒီးယားတို့အတွက် အရေးကြီးကြောင်း သံအမတ်ကြီး Vanlalvawna Bawitlung ကပြောကြားခဲ့သည်။ နှစ်နိုင်ငံအကြား ဆက်ဆံရေးတိုးတက် ကောင်းမွန်လာစေရန် အိန္ဒိယနိုင်ငံသားများအား ကမ္ဘောဒီးယားနိုင်ငံသို့ ပိုမိုလာရောက် လည်ပတ်ရန် တိုက်တွန်းသွားမည်ဖြစ်ကြောင်း သံအမတ်ကြီးက ဆက်လက်ပြောကြားခဲ့သည်။ အထက်လွှတ်တော်မှ ပြောရေးဆိုခွင့်ရှိသူ Chea Thyrith ၏ပြောကြားချက်အရ Hun Sen သည် ယခင်နှစ်ကနှစ်နိုင်ငံအကြား ဆက်ဆံရေးကောင်းမွန်သည့်အတွက် ကျေနပ်မှုရှိသော်လည်း ဥပဒေပြုမှုနှင့်အုပ်ချုပ်မှုဘောင်တွင် ပိုမိုမြင့်မားသောဆက်ဆံရေးကို လိုအပ်ကြောင်းနှင့် နှစ်နိုင်ငံ ခေါင်းဆောင်များအကြား အပြန်အလှန် လည်ပတ်မှုပိုမိုဖလှယ်ရန်လည်း တိုက်တွန်းခဲ့ကြောင်း ပြောကြားခဲ့သည်။ လက်ရှိတွင် ကမ္ဘောဒီးယားနိုင်ငံနှင့်အိန္ဒိယနိုင်ငံတို့အကြားကုန်သွယ်မှုသည် အမေရိကန်ဒေါ်လာသန်း ၃၄၀ ကျော်ခဲ့သည်။ ထို့ကြောင့် နှစ်နိုင်ငံလက်ရှိအလားအလာနှင့်အညီ ကုန်သွယ်မှုနှင့် ရင်းနှီးမြှုပ်နှံမှုဆက်ဆံရေးတွင် မြင်တွေ့လိုကြောင်း Chea Thyrith က ထပ်လောင်းပြောကြားခဲ့သည်။ Hun Sen ၏တောင်းဆိုချက်ကို တုံ့ပြန်သည့်အနေဖြင့် သံအမတ်ကြီး Vanlalvawna Bawitlung က နှစ်နိုင်ငံအကြား ကုန်သွယ်မှုတိုးမြှင့်ရေး၊ အထူးသဖြင့် ကမ္ဘောဒီးယားနိုင်ငံတွင် အိန္ဒိယရင်းနှီးမြှုပ်နှံသူများကိုဆွဲဆောင်ပြီး အိန္ဒိယ နိုင်ငံသားများ ကမ္ဘောဒီးယားနိုင်ငံသို့ ပိုမိုလာရောက်လည်ပတ်စေဖြင့် နှစ်နိုင်ငံအစိုးရအကြား ခိုင်မာသောပူးပေါင်းဆောင်ရွက်မှုမြှင့်တင်ရန်ကတိပြုခဲ့သည်။ စီးပွားရေး၊ ကုန်သွယ်မှု၊ ရင်းနှီး မြှုပ်နှံမှု၊ နိုင်ငံတော်ကာကွယ်ရေးနှင့်လုံခြုံရေး၊ ခရီးသွားလုပ်ငန်းနှင့် ယဉ်ကျေးမှု၊ အိန္ဒိယနှင့် ကမ္ဘောဒီးယားနိုင်ငံတို့အကြား တိုက်ရိုက်လေကြောင်းပျံသန်းမှုမြှင့်တင်လာနိုင်ရေး၊ ပြည်သူများနှင့် စီးပွားရေးချိတ်ဆက်မှုမြှင့်တင်ရေးအပါအဝင် နယ်ပယ်များစွာတွင် ပူးပေါင်းဆောင်ရွက်ရေး အလားအလာများကို ဆက်လက်ဆွေးနွေးခဲ့ကြသည်။

DOCA(ရန်ကုန်)

          ဗီယက်နမ်ကော်ဖီတင်ပို့မှုတန်ဖိုးသည် ၂၀၂၅ ခုနှစ် ပထမနှစ်လတွင် ၂၆.၂ ရာခိုင်နှုန်း မြင့်တက် ခဲ့ပြီး ပို့ကုန်ပမာဏ ၂၈.၄ ရာခိုင်နှုန်း ကျဆင်းသွားကြောင်း ဗီယက်နမ် သတင်း အေဂျင်စီက မတ်လ ၁၀ ရက်နေ့တွင်ပြောကြားခဲ့သည်။ ကိုးကားဖော်ပြသည့်ကာလ အတွင်း ဗီယက်နမ်နိုင်ငံသည် ကော်ဖီ တန်ချိန် ၂၈၄၀၀၀ တင်ပို့ခဲ့ပြီး ဝင်ငွေအမေရိကန် ဒေါ်လာ ၁.၅၈ ဘီလီယံ ရရှိခဲ့ကြောင်း ဝန်ကြီးဌာန ပြောကြားချက်အရ သိရသည်။ ကော်ဖီလုပ်ငန်းကို ထူးထူးခြားခြား ရလဒ်များရရှိအောင်ကူညီပေး သည့် အဓိကအကြောင်းအရင်းတစ်ခုမှာ ပို့ကုန်စျေးနှုန်းများ မြင့်တက်လာခြင်းပင်ဖြစ်သည်။ ဇန်နဝါရီ နှင့်ဖေဖော်ဝါရီလတွင် ပျမ်းမျှ ကော်ဖီစျေး သည် တစ်တန်လျှင် ၅၅၇၄.၅ ဒေါ်လာအထိ ‌ရောက်ရှိခဲ့ပြီး ၂၀၂၄ ခုနှစ် အလားတူ ကာလနှင့် နှိုင်းယှဥ်ပါက ၇၆.၃ ရာခိုင်နှုန်းမြင့်တက်ခဲ့သည်။ ဗီယက်နမ်သည် ယခုနှစ်တွင် ကော်ဖီတင်ပို့မှု ဒေါ်လာ ၆ ဘီလီယံအထိရည်မှန်းထားကြောင်းဝန်ကြီးဌာနက ပြောကြားခဲ့သည်။

DOCA(ရန်ကုန်)

ဗီယက်နမ်၏ မော်တော်ယာဥ်ဈေးကွက်သည် ဖေဖော်ဝါရီလတွင် အရှိန်အဟုန်ဖြင့် တိုးတက်မှု ကို မှတ်တမ်းတင်နိုင်ခဲ့ပြီး စုစုပေါင်း မော်တော်ကားရောင်းချရမှုမှာ အစီးရေ ၂၁,၆၀၆ စီးရှိကာ တစ်နှစ် ထက်တစ်နှစ် ၈၆ ရာခိုင်နှုန်း မြင့်တက်လာခဲ့ကြောင်း နိုင်ငံပိုင် ဗီယက်နမ်သတင်းအေဂျင်စီက မတ်လ ၁၃ ရက်နေ့တွင် ဖော်ပြခဲ့သည်။ ပြည်တွင်း၌ တပ်ဆင် မော်တော် ယာဉ်များ တင်သွင်းမှုထက် သာလွန် ခဲ့ပြီး ပြည်တွင်းထုတ် ကားများ ရောင်းအား လစဉ် အစီးရေ ၁၁၀၆၇ စီး မှ ၂၁ ရာခိုင်နှုန်း တိုးလာကာ တင်သွင်းသည့် မော်တော်ယာဉ်များရောင်းအားမှာ ၈ ရာခိုင်နှုန်း မှ ၁၀၅၃၉ စီးအထိ တိုးလာကြောင်း ဗီယက်နမ်မော်တော်ယဉ်လုပ်ငန်းရှင်များအသင်း မှ ထုတ်ပြန်သောအချက်အလက် များကို ကိုးကား၍ အစီရင်ခံစာ တွင် ဖော်ပြထားသည်။ ဖေဖော်ဝါရီလတွင် ဟိုက်ဘရစ်နှင့် လျှပ်စစ် ကား အစီးရေ ၇၅၆ စီးအထိ ရောင်းချနိုင်ခဲ့ပြီး ဆီစားသက်သာသည့် မော်တော်ကားများဆီသို့ သိသာ ထင်ရှားသော အပြောင်းအလဲကို သတိပြုမိခဲ့ကြောင်း အသင်းက မှတ်ချက်ပြုခဲ့သည်။

DOCA(ရန်ကုန်)

ထုတ်လုပ်မှု ရင်းနှီးမြှုပ်နှံမှု ဝယ်လိုအား နည်းပါးခြင်းကြောင့် တောင်ကိုရီးယား၏ ပြည်ပ တိုက်ရိုက် ရင်းနှီးမြှုပ်နှံမှုသည် ၂၀၂၄ခုနှစ်တွင် ကျဆင်းသွားကြောင်း အစိုးရအချက်အလက်များ က သောကြာနေ့တွင် ဖော်ပြခဲ့သည်။ နိုင်ငံခြား အစုရှယ်ယာများ ဝယ်ယူခြင်းနှင့် နိုင်ငံခြား ရုံးခန်းများ တည်ထောင်ခြင်းမှ တစ်ဆင့် ပြည်ပရင်းနှီးမြှုပ်နှံမှုသည် ၂၀၂၄ ခုနှစ်တွင် အမေရိကန် ဒေါ်လာ ၆၃.၉၅ ဘီလီယံ ရှိပြီး ယခင်နှစ်နှင့် နှိုင်းယှဉ်ပါက ၁.၈ ရာခိုင်နှုန်း ကျဆင်းခဲ့ကြောင်း စီးပွားရေးနှင့် ဘဏ္ဍာရေး ဝန်ကြီးဌာန၏ထုတ်ပြန်ချက်အရ သိရသည်။ ကုန်ထုတ်လုပ်မှုလုပ်ငန်း တွင် ပြည်ပရင်းနှီးမြုပ်နှံမှု ၂၁.၆ ရာခိုင်နှုန်းမှ ၁၆.၁၇ ဘီလီယံဒေါ်လာသို့ ကျဆင်းသွား သော်လည်း အိမ်ခြံမြေ၊ သတ္တုတူးဖော်ရေးနှင့် သတင်းအချက်အလက်နှင့် ဆက်သွယ်ရေး ကဏ္ဍများတွင် ဂဏန်းနှစ်လုံးဖြင့် ဒေါ်လာ ၅.၆၀ ဘီလီယံ၊ ၃.၉၀ ဘီလီယံနှင့် ဒေါ်လာ ၃.၀၆ ဘီလီယံအထိ အသီးသီး တိုးလာခဲ့သည်။ ဘဏ္ဍာရေးနှင့် အာမခံ လုပ်ငန်းတွင် ရင်းနှီးမြှုပ်နှံမှု ၁.၈ ရာခိုင်နှုန်း တိုးလာကာ ၂၇.၃၉ ဘီလီယံဒေါ်လာရှိသည်။ မြောက်အမေရိကတွင် တိုက်ရိုက် ရင်းနှီးမြုပ်နှံမှုသည် ၂၀၂၄ ခုနှစ်တွင် ဒေါ်လာ ၂၅.၈၈ ဘီလီယံအထိ တစ်နှစ်ထက် ၁၈.၁ ရာခိုင်နှုန်း ကျဆင်းသွားသည်။ ဥရောပတွင် ရင်းနှီးမြှုပ်နှံမှုသည် ၂၅.၅ ရာခိုင်နှုန်း တိုးမြင့်လာပြီး ၁၃.၈၇ ဘီလီယံ ဒေါ်လာနှင့် အာရှတွင် ရင်းနှီးမြှုပ်နှံမှု ၉.၇ ရာခိုင်နှုန်းမှ ၁၂.၄၅ ဘီလီယံအထိ တိုးလာခဲ့သည်။

DOCA(ရန်ကုန်)