အင်ဒိုနီးရှားတွင် ရင်းနှီးမြှုပ်နှံမှုတိုးမြှင့်ရန် ကတိပြုခဲ့သည့် ယူအေအီးသမ္မတ
ယူအေအီး သမ္မတ Sheikh Mohammed bin Zayed Al Nahyan က အင်ဒိုနီးရှားနိုင်ငံတွင် ရင်းနှီးမြှုပ်နှံမှု တိုးမြှင့်လုပ်ဆောင်သွားရန် ကတိကဝတ်ပြုကြောင်း အင်ဒိုနီးရှား အစိုးရအဖွဲ့ အတွင်းရေးမှူး Teddy Indra Wijaya ပြောကြားခဲ့ပါသည်။ ယင်းကတိကဝတ်ကို အဘူဒါဘီရှိ Qasr Al Bahr နန်းတော်တွင် ဖေဖော်ဝါရီလ ၂၆ ရက်နေ့က ပြုလုပ်ခဲ့သည့် ယူအေအီး သမ္မတနှင့် အင်ဒိုနီးရှား သမ္မတ Prabowo Subianto တို့၏နှစ်နိုင်ငံဆိုင်ရာ တွေ့ဆုံဆွေးနွေးမှုအတွင်း ထုတ်ဖော်ပြောကြားခဲ့ခြင်းဖြစ်ကြောင်း Wijaya က ဖေဖော်ဝါရီလ ၂၇ ရက်နေ့တွင် ANTARA သို့ ပေးပို့သည့် ထုတ်ပြန်ချက်အရ သိရပါသည်။ တွေ့ဆုံမှုတွင် ရင်းနှီးမြှုပ်နှံမှု ပူးပေါင်းဆောင်ရွက် ရေးတိုးမြှင့်ရန် ဆွေးနွေးခဲ့ကြကြောင်း နှစ်နိုင်ငံဆက်ဆံရေးကို ပိုမိုမြှင့်တင်သွားမည်ဖြစ်ကြောင်းနှင့် ယူအေအီးသည် အင်ဒိုနီးရှားတွင် ရင်းနှီးမြှုပ်နှံမှု တိုးမြှင့်ရန်အလိုရှိကြောင်း အစိုးရအဖွဲ့ အတွင်းရေးမှူးက ပြောကြားခဲ့ပါသည်။ Wijaya ၏ ပြောကြားချက်အရ နှစ်နိုင်ငံခေါင်းဆောင်များသည် ရင်းနှီးမြှုပ်နှံမှုနှင့် စီးပွားရေးကဏ္ဍများတွင် မဟာဗျူဟာမြောက် မိတ်ဖက်ဆက်ဆံရေးကို ပိုမိုနက်ရှိုင်းစေရန် လက်တွေ့ကျသော အဆင့်များကို ဆွေးနွေးခဲ့ကြပြီး နှစ်နိုင်ငံဆက်ဆံ မှုခိုင်မာရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေး တိုးမြှင့်ရန် သဘောတူညီခဲ့ကြကြောင်း သိရပါသည်။ ထိုကဲ့သို့ပူးပေါင်းဆောင်ရွက်မှု မြှင့်တင်ခြင်းသည် နှစ်နိုင်ငံအကြား ရင်းနှီးနွေးထွေးပြီး အပြန်အလှန် အကျိုးဖြစ်ထွန်းစေသည့် ဆက်ဆံရေးကို ဆက်လက် ထင်ဟပ်ပြသနေခြင်းဖြစ်ကြောင်း သိရပါသည်။ အင်ဒိုနီးရှားကို ယူအေအီးဘက်မှ အရှေ့တောင်အာရှဒေသအတွင်း အရေးပါသည့် မဟာဗျူဟာမြောက် မိတ်ဖက်နိုင်ငံအဖြစ် ရှုမြင်ထားပြီး အထူးသဖြင့် စွမ်းအင်၊ အခြေခံအဆောက်အအုံနှင့် အနာဂတ်စီးပွားရေး ဖွံ့ဖြိုးတိုးတက်မှုကဏ္ဍများတွင်ဖြစ်ကြောင်း သိရပါသည်။ သမ္မတ Prabowo က ယူအေအီး၏ ကတိကဝတ်ကို ကြိုဆိုခဲ့ပြီး ရင်းနှီးမြှုပ်နှံမှုအတွက် သင့်တော်ကောင်းမွန်ပြီး တည်တံ့ခိုင်မြဲသည့် ရင်းနှီးမြှုပ်နှံမှုဝန်းကျင်ကို ဆက်လက်တည်ထောင်သွားရန် အင်ဒိုနီးရှားအနေဖြင့် အသင့်ရှိကြောင်းနှင့် ယူအေအီး ရင်းနှီးမြှုပ်နှံသူများအတွက် နိုင်ငံ၏ဦးစားပေးကဏ္ဍများအတွင်း ပိုမိုကျယ်ပြန့်သည့် ပူးပေါင်းဆောင်ရွက်မှု အခွင့်အလမ်းများကိုလည်း ဖွင့်လှစ်ထားကြောင်း ပြောကြားခဲ့ပါသည်။ Wijaya က Prabowo Subianto နှင့် Sheikh Mohammed bin Zayed Al Nahyan တို့၏ တွေ့ဆုံမှုသည် အင်ဒိုနီးရှား–ယူအေအီး နှစ်နိုင်ငံဆက်ဆံရေးကို ပိုမိုပြည့်စုံကျယ်ပြန့်ပြီး ရေရှည်တည်တံ့သည့် မဟာဗျူဟာမြောက် မိတ်ဖက်ဆက်ဆံရေးအဆင့်သို့ တိုးတက်လာစေကြောင်း ပြောကြားခဲ့ပါသည်။ အဆိုပါ တွေ့ဆုံမှုသည် ၂၀၂၆ ခုနှစ်တွင် အင်ဒိုနီးရှားနှင့် ယူအေအီးအကြား သံတမန်ဆက်ဆံရေး ၅၀ နှစ်ပြည့်မြောက်သည့် အခမ်းအနားနှင့် ကိုက်ညီကျင်းပနိုင်ခဲ့ခြင်းဖြစ်ကြောင်း သိရပါသည်။ နှစ်နိုင်ငံအကြား နှစ်ပေါင်း ၅၀ ကြာ ဆက်ဆံရေးသည် ယခုအခါ ရင်းနှီးမြှုပ်နှံမှု၊ စီးပွားရေးတိုးတက်မှုနှင့် အနာဂတ်ဦးတည် မိတ်ဖက်ပူးပေါင်းဆောင်ရွက်မှုများကို အလေးထားသည့် အဆင့်သစ် တစ်ခုသို့ ဝင်ရောက်လာပြီဖြစ်ကြောင်း ထုတ်ပြန်ချက်တွင် ဖော်ပြထားသည်ဟု သိရှိရပါသည်။
Antara News
DOCA (ရန်ကုန်)
