ပြည်ပကုန်သွယ်မှုသတင်းများ

          တရုတ်နိုင်ငံသည် ၂၀၂၄ ခုနှစ်တွင် ဗီယက်နမ်၏ပီလောပီနံနှင့် ပီလောပီနံထုတ်ကုန်များ တင်ပို့ရာအကြီးမားဆုံးဈေးကွက်အဖြစ် ဆက်လက်ရပ်တည်ခဲ့ကြောင်း ဗီယက်နမ်နိုင်ငံ အကောက်ခွန် အထွေထွေဦးစီးဌာန၏ အချက်အလက်များအရ သိရပါသည်။ ၂၀၂၄ ခုနှစ်တွင် ဗီယက်နမ်သည် အမေရိကန်ဒေါ်လာ ၁.၁၅ ဘီလီယံတန်ဖိုးရှိသော ပီလောပီနံနှင့်ပီလောပီနံ ထုတ်ကုန် တန်ချိန် ၂.၆၂ သန်း ကိုတင်ပို့ခဲ့ပြီး ၂၀၂၃ ခုနှစ်နှင့် နှိုင်းယှဉ်ပါက ပမာဏတွင် ၁၁.၁ ရာခိုင်နှုန်းနှင့် တန်ဖိုးတွင် ၁၁.၄ ရာခိုင်နှုန်း အသီးသီး ကျဆင်းခဲ့ကြောင်း သိရပါသည်။ တရုတ် နိုင်ငံသည် အမေရိကန်ဒေါ်လာ ၁.၀၆ ဘီလီယံ တန်ဖိုးရှိသော တန်ချိန်စုစုပေါင်း ၂.၄၃ သန်း တင်သွင်းခဲ့သဖြင့် ဗီယက်နမ်၏ စုစုပေါင်းတင်ပို့မှုပမာဏ၏ ၉၂.၈၅ ရာခိုင်နှုန်းနှင့် တင်ပို့မှု တန်ဖိုး၏ ၉၁.၇၇ ရာခိုင်နှုန်း ရှိခဲ့ကြောင်း သိရပါသည်။ တရုတ်နိုင်ငံသို့ တင်ပို့သည့်ပျမ်းမျှ ဈေးနှုန်းသည် တစ်တန်လျှင် ၄၃၅.၃ အမေရိကန်ဒေါ်လာရှိပြီး ၂၀၂၃ ခုနှစ်ကထက် ၀.၈ ရာခိုင်နှုန်းကျဆင်း ခဲ့ကြောင်း သိရပါသည်။ ထိုသို့ကျဆင်းမှုများရှိနေသော်လည်း ပီလောပီနံနှင့် ပီလောပီနံထုတ်ကုန် များသည် နှစ်စဉ်အမေရိကန်ဒေါ်လာ ၁ ဘီလီယံကျော်ရရှိသည့် စိုက်ပျိုးရေးထုတ်ကုန်များထဲတွင် ပါဝင်နေကြောင်း သိရပါသည်။ ဗီယက်နမ်၏ ပီလောပီနံနှင့် ပီလောပီနံထုတ်ကုန်များ ပျမ်းမျှ တင်ပို့သည်ဈေးနှုန်းသည် တစ်တန်ကို ၄၄၀.၄ အမေရိကန် ဒေါ်လာရှိပြီး ၂၀၂၃ ခုနှစ်ကထက် ၀.၂ ရာခိုင်နှုန်း ကျဆင်းခဲ့ကြောင်း သိရပါသည်။ ထိုသို့ ကျဆင်းမှုသည် တရုတ်နိုင်ငံတွင် တိရိစ္ဆာန်အစာ အတွက် ဝယ်လိုအားကျဆင်းသောကြောင့် ဖြစ်ကြောင်း သိရပါသည်။ ဥ‌ရောပသမဂ္ဂ၊ တောင်ကိုရီးယား၊ ဂျပန်နှင့် အမေရိကန်အစရှိသည့် ဒေသများနှင့် လွတ်လပ်သောကုန်သွယ်ရေးသဘော တူညီချက်များရှိသော်လည်း ထိုဈေးကွက်များ သို့ ထိုးဖောက်နိုင်မှုအကန့်အသတ်သာရှိသဖြင့် ဗီယက်နမ်၏ပီလောပီနံတင်ပို့မှုများသည် တရုတ် ဈေးကွက်ကို အလွန်အမင်းမီခိုနေရကြောင်း သိရပါသည်။ အခြားဈေးကွက်များနှင့်နှိုင်းယှဉ်ပါက စွန့်စားရမှုနှင့် ထောက်ပံ့ပို့ဆောင်ရေးကုန်ကျစရိတ် နည်းပါးမှုနှင့် ဝယ်လိုအားမြင့်တက်လာမှု ကြောင့် ၂၀၂၅ ခုနှစ်တွင် တရုတ်နိုင်ငံသည် ဗီယက်နမ်၏ပီလောပီနံအတွက် အားအကောင်းဆုံး ဈေးကွက် အဖြစ်ဆက်လက်ရပ်တည်နိုင်မည်ဟု ဗီယက်နမ်နိုင်ငံစက်မှုနှင့် ကုန်သွယ်ရေး ဝန်ကြီးဌာနက မျှော်လင့်ထားကြောင်း သိရပါသည်။ ဗီယက်နမ်နိုင်ငံစိုက်ပျိုးမွေးမြူရေးနှင့် ကျေးလက်ဒေသဖွံ့ဖြိုးတိုးတက်ရေးဝန်ကြီးဌာန၏ အဆိုအရ လတ်တလောတွင် ဗီယက်နမ်နိုင်ငံ ၌ နှစ်စဉ်ပီလောပီနံ တန်ချိန် ၁၃.၄ သန်းနှင့် ပီလောပီနံ အမှုန့် တန်ချိန် ၉.၃ သန်းထုတ်လုပ် နိုင်စွမ်းရှိသည့် ပီလောပီနံပြုပြင်ထုတ်လုပ်သည့်စက်ရုံ ၁၄၀ ကျော် ရှိကြောင်း သိရှိရပါသည်။

Vietnam Plus

DOCA(ရန်ကုန်)

             ၂၀၂၄ ခုနှစ်တွင် ဗီယက်နမ်နိုင်ငံသည် ဥရောပသမဂ္ဂသို့ အမေရိကန်ဒေါ်လာ ၅၁.၇ ဘီလီယံ တန်ဖိုး တင်ပို့ခဲ့ပြီး ၂၀၂၃ ခုနှစ်ကထက် ၁၈.၅ ရာခိုင်နှုန်း မြင့်တက်ခဲ့ကြောင်း သိရပါသည်။ အဓိက ပို့ကုန်များဖြစ်သည့် ကွန်ပြူတာများ၊ အီလတ်ထရောနစ်ပစ္စည်းများနှင့် အစိတ်အပိုင်းများ တင်ပို့ မှုမှာအမေရိကန်ဒေါ်လာ ၁၀.၈ ဘီလီယံ နီးပါးရောက်ရှိခဲ့ပြီး ၂၀၂၃ ခုနှစ်ထက် ၆၆.၉ ရာခိုင်နှုန်း မြင့်တက်ခဲ့ကြောင်း သိရပါသည်။ စက်ပစ္စည်းများ၊ စက်အစိတ်အပိုင်းများနှင့် အပိုပစ္စည်းများ တင်ပို့မှုမှာ အမေရိကန်ဒေါ်လာ ၈.၇ ဘီလီယံရောက်ရှိခဲ့ပြီး ၂၀၂၃ ခုနှစ်ကထက် ၂၄.၉ ရာခိုင်နှုန်း မြင့်တက်ခဲ့ကြောင်း သိရပါသည်။ ဖုန်းနှင့်ဖုန်းအစိတ်အပိုင်းများ တင်ပို့မှုမှာ အမေရိကန်ဒေါ်လာ ၁.၁ ဘီလီယံဖြင့် ၁၃.၄ ရာခိုင်နှုန်း မြင့်တက်ခဲ့ကြောင်း သိရပါသည်။ တစ်ချိန်တည်းမှာပင် ၂၀၂၄ ခုနှစ်တွင် ဗီယက်နမ်သည် ဥရောပသမဂ္ဂထံမှ အမေရိကန်ဒေါ်လာ ၁၆.၇ ဘီလီယံ တန်ဖိုး တင်သွင်း ခဲ့ပြီး ၂၀၂၃ ခုနှစ်ကထက် ၁၂ ရာခိုင်နှုန်း မြင့်တက်ခဲ့ကြောင်း သိရပါသည်။ ကွန်ပြူတာများ၊ အီလတ်ထရောနစ်ထုတ်ကုန်များနှင့် အစိတ်အပိုင်းများ ပါဝင်သည့် အဓိကထုတ်ကုန်များ တင်သွင်းမှုမှာ အမေရိကန်ဒေါ်လာ ၃.၇ ဘီလီယံ ဖြင့်၂၀၂၃ ခုနှစ်ကထက် ၁၆.၄ ရာခိုင်နှုန်း မြင့်တက်ခဲ့ကြောင်း သိရပါသည်။ စက်ပစ္စည်းများ၊ စက်အစိတ်အပိုင်းများနှင့် အပိုပစ္စည်းများ တင်သွင်းမှုမှာ အမေရိကန်ဒေါ်လာ ၃.၄ ဘီလီယံဖြင့် ၆.၂ ရာခိုင်နှုန်း မြင့်တက်ခဲ့ကြောင်း သိရပါ သည်။ အပြန်အလှန်ကုန်သွယ်မှုပမာဏ အမေရိကန်ဒေါ်လာ ၆၈.၄ ဘီလီယံ ရှိခဲ့ခြင်းနှင့်အတူ ဗီယက်နမ်က ကုန်သွယ်ရေးပိုငွေ အမေရိကန်ဒေါ်လာ ၃၅ ဘီလီယံ ရရှိခဲ့ကြောင်း သိရပါသည်။ ဗီယက်နမ်၏ ထိုသို့ ဥရောပသမဂ္ဂနှင့် ကုန်သွယ်မှု အားကောင်းစွာကြီးထွားလာခြင်းသည် ဥရောပသမဂ္ဂ-ဗီယက်နမ် လွတ်လပ်သောကုန်သွယ်ရေးသဘောတူညီချက်ကြောင့် ဖြစ်ကြောင်း သိရပါသည်။ ထိုကုန်သွယ်ရေးသဘောတူညီချက် စတင်သက်ရောက်သည့် ဩဂုတ်လ ၂၀၂၀ ခုနှစ်မှစ၍ ဗီယက်နမ်၏ ဥရောပသမဂ္ဂသို့ တင်ပို့မှုများမှာ သိသာစွာကြီးထွားခဲ့ကြောင်း သိရပါ သည်။ ကုန်သွယ်ရေးသဘောတူညီချက်အောက်တွင် အကောက်ခွန်လျှော့ချပေးမှုကြောင့် ထိုသို့ တင်ပို့မှု ကြီးထွားမှုသည် အီလတ်ထရောနစ်ပစ္စည်းများ၊ အဝတ်အထည်၊ ဖိနပ်၊ စိုက်ပျိုးမွေးမြူရေး နှင့် ပင်လယ်စာတို့ပါဝင်သည့်ကဏ္ဍများတွင် သိသာထင်ရှားခဲ့ကြောင်း သိရပါသည်။ ဗီယက်နမ် နိုင်ငံ အကောက်ခွန်ဦးစီးဌာန၏အဆိုအရ ထိုလွတ်လပ်သောကုန်သွယ်ရေးသဘောတူညီချက် စတင်အကောင်အထည်ဖော်သည့်အချိန်မှစ၍ လေးနှစ်တာကာလပြီးမြောက်သောအခါ နိုင်ငံ၏ ဥရောပသမဂ္ဂသို့စုစုပေါင်းတင်ပို့မှုမှာ ခန့်မှန်းအမေရိကန်ဒေါ်လာ ၂၀၀ ဘီလီယံပတ်လည် ရောက်ရှိခဲ့ပြီဖြစ်ကြောင်း သိရပါသည်။ ထိုတန်ဖိုးပမာဏနှင့်အတူ ဗီယက်နမ်သည် အာဆီယံတွင် ဥရောပသမဂ္ဂ၏ ထိပ်တန်းကုန်သွယ်ရေးမိတ်ဖက်အဖြစ် ရပ်တည်နေကြောင်း သိရှိရပါသည်။

Vietnam Plus

DOCA(ရန်ကုန်)

           ဖိလစ်ပိုင်စိုက်ပျိုးရေးဌာန (DA) မှ တင်သွင်းလာသော ဆန်များအား အကြံပြုထားသော လက်လီစျေးနှုန်း (MSRP) ကို တစ်ကီလိုလျှင် ၅၈ ပီဆိုမှ ၅၅ ပီဆို  (၀.၉၄ ဒေါ်လာ) သို့  လျှော့ချရန် အစီအစဉ်ကို ၄.၂.၂၀၂၅ ရက်နေ့က ကြေညာခဲ့သည်။ စားနပ်ရိက္ခာ စျေးနှုန်းကြီးမြင့်မှုဖြင့်ရုန်းကန်နေ ရသော ဖိလစ်ပိုင်စားသုံးသူများအတွက်  သက်သာရာရစေရန် ဆောင်ရွက်မှုပင်ဖြစ်သည်။ စိုက်ပျိုးရေး ဝန်ကြီး Francisco Tiu Laurel သည် ဒေသတွင်းဆန်ဈေးနှုန်းများ ထူးထူးခြားခြား မြင့်တက်နေချိန် တွင် ဆန်အတွက် စားနပ်ရိက္ခာဖူလုံရေး အရေးပေါ်အခြေအနေ ကြေညာပြီးနောက် တစ်ရက်အကြာ တွင် အဆိုပါကြေညာချက် ထွက်ပေါ်လာခြင်းဖြစ်သည်။ မတ်လအစောပိုင်းတွင် တစ်ကီလိုဂရမ်လျှင် ပီဆို ၅၀ (၀.၈၆ ဒေါ်လာ) အောက်ဖြစ်နိုင်ပြီး လာမည့်သီတင်းပတ်များအတွင်း MSRP ၏နောက်ထပ် လျှော့ချရန်မျှော်လင့်ထားကြောင်း Laurel မှပြောကြားခဲ့သည်။ “ဖေဖော်ဝါရီလလယ်မှာ တစ်ကီလိုကို ၅၂ ပီဆို (၀.၈၉ ဒေါ်လာ) နဲ့ နောက် ၂ ပတ်အကြာမှာ တစ်ကီလိုဂရမ်ကို ၄၉ ပီဆို (၀.၈၄ ဒေါ်လာ) အထိ လျှော့ချဖို့ စီစဉ်ထားပါတယ်” ဟု Laurel ကဆိုသည်။ အဆိုပါ ဆုံးဖြတ်ချက်သည် ဆန်တင်သွင်း သူများနှင့် လက်လီရောင်းချသူများ အပါအဝင် ဆန်စက်လုပ်ငန်း သက်ဆိုင်သူများနှင့်ကျယ်ကျယ် ပြန့်ပြန့် ဆွေးနွေးပြီးနောက် ဈေးနှုန်းကျဆင်းခြင်းသည် စားသုံးသူများအတွက် ဆန်ထောက်ပံ့မှုကို မထိခိုက်စေဘဲအကျိုးရှိစေမည်ဖြစ်ကြောင်း DA မှ ပြောကြားခဲ့သည်။

Source : Xinhua

DOCA(ရန်ကုန်)

          ကမ္ဘောဒီးယားနိုင်ငံ၏ ဥရောပသမဂ္ဂ(EU) နှင့် ဗြိတိန်နိုင်ငံသို့ တင်ပို့မှုသည် ၂၀၂၄ ခုနှစ်တွင် တစ်နှစ်ထက်တစ်နှစ် ၂၀ ရာခိုင်နှုန်းအထိ မြင့်တက်ခဲ့ကြောင်း ကမ္ဘောဒီးယားအစိုးရ၏ နောက်ဆုံးရ  အချက်အလက်များအရသိရသည်။ (EU) သို့ ကမ္ဘောဒီးယားပို့ကုန်သည် ၂၀၂၃ ခုနှစ် တွင် ကန်ဒေါ်လာ ၃.၇ ဘီလီယံမှ ကန်ဒေါ်လာ ၄.၄ ဘီလီယံအထိ တိုးလာခဲ့ကြောင်း စီးပွားရေး နှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ခဲ့သည်။ (EU) မှသွင်းကုန်သည် ကန်ဒေါ်လာ ၉၄၉ သန်းမှ ၃.၃ ရာခိုင်နှုန်းအထိကျဆင်းသွားခဲ့သည်။ ဗြိတိန်သို့ ကမ္ဘောဒီးယားပို့ကုန်သည် ကန်ဒေါ်လာ ၇၉၆.၄ သန်းမှ ကန်ဒေါ်လာ ၉၅၈.၈ သန်းမှ ၂၀.၄ ရာခိုင်နှုန်းတိုးလာခဲ့ကြောင်း နှင့် ဗြိတိန်နိုင်ငံမှ ကုန်ပစ္စည်း ကန်ဒေါ်လာ ၅၃.၇ သန်းတင်သွင်းခဲ့ပြီး ၂၀၂၃ ခုနှစ်တွင် ကန်ဒေါ်လာ ၇၆.၈ သန်းထက် ၂၉.၉ ရာခိုင်နှုန်းကျဆင်းခဲ့ကြောင်း အကောက်ခွန်နှင့်အခွန်ကြီးကြပ်မှုဦးစီးဌာန (GDCE) မှ ပြောရေးဆိုခွင့်ရှိသူမှ ၂၉-၁-၂၀၂၄ ရက်နေ့တွင်ပြောကြားခဲ့သည်။ (EU) တွင် စပိန်နှင့် ဂျာမနီနိုင်ငံတို့သည် ကမ္ဘောဒီးယားနိုင်ငံ၏ အကြီးဆုံးကုန်သွယ်မှုမိတ်ဖက်နိုင်ငံများဖြစ်ကြပြီး နှစ်နိုင်ငံကုန်သွယ်မှုပမာဏသည် ကန်ဒေါ်လာ ၁ ဘီလီယံနှင့် ၉၁၁ သန်းအသီးသီးရှိကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ပြောရေးဆိုခွင့်ရှိသူ Penn Sovicheat က ပြောကြားခဲ့သည်။ ကမ္ဘောဒီးယားနိုင်ငံမှ (EU) နှင့် ဗြိတိန်နိုင်ငံများသို့ အဓိကတင်ပို့သည့် ပို့ကုန်များတွင် အထည်လိပ်၊ ဖိနပ်၊ စက်ဘီး၊ စားသောက်ကုန်၊ ဆန်နှင့် အခြားစိုက်ပျိုးရေး ထွက်ကုန်များတင်ပို့သည်။ ကမ္ဘောဒီးယားနိုင်ငံ၏ စုစုပေါင်းနိုင်ငံတကာကုန်သွယ်မှုသည် ၂၀၂၄ ခုနှစ်တွင် သိသိသာသာတိုးတက်လာပြီး ၂၀၂၃ ခုနှစ်တွင် ကန်ဒေါ်လာ ၄၆.၈ ဘီလီယံမှ ကန်ဒေါ်လာ ၅၄.၇ လီလီယံအထိ  ၁၆ ရာခိုင်နှုန်းတိုးလာခဲ့ကြောင်း GDCE မှ ထုတ်ပြန်ခဲ့သည်။ ကမ္ဘောဒီးယားနိုင်ငံသည် ၂၀၂၄ ခုနှစ်တွင် နိုင်ငံခြားဈေးကွက်များသို့ ကန်ဒေါ်လာ ၂၆.၁၉ ဘီလီယံဖိုးကုန်ပစ္စည်းများတင်ပို့ခဲ့ပြီး ယခင်နှစ်ထက် ၁၅.၇ ရာခိုင်နှုန်းမြင့်တက်ခဲ့သည်။ သွင်းကုန် တန်ဖိုးသည် ကန်ဒေါ်လာ ၂၈.၅၄ ဘီလီယံရှိခဲ့ပြီး  တစ်နှစ်ထက်တစ်နှစ် ၁၈ ရာခိုင်နှုန်းမြင့်တက်လာခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)

          အိုမန်နိုင်ငံ၏ ရေနံတင်ပို့မှုသည် ၂၀၂၄ ခုနှစ်တွင် စည်ပေါင်း ၃၀၈.၄၂ သန်းခန့်ရှိပြီးတစ်စည် လျှင်ပျမ်းမျှစျေးနှုန်း ၈၁.၂ ဒေါ်လာရှိကြောင်း အမျိုးသားစာရင်းအင်းနှင့် သတင်းအချက်အလက် ဗဟိုဌာန (NCSI) မှ ဖေဖော်ဝါရီ ၁ ရက်နေ့က ထုတ်ပြန်သည့်စာရင်းဇယားများအရသိရသည်။

          နိုင်ငံ၏စုစုပေါင်းရေနံထုတ်လုပ်မှုမှာစည်ပေါင်း ၃၆၃.၂၈ သန်းရှိပြီး ၎င်းစုစုပေါင်းမှ ၈၄.၉ ရာခိုင်နှုန်းအား တင်ပို့လျှက်ရှိသည်။ ရေနံစိမ်းထုတ်လုပ်မှုမှာ ခန့်မှန်းခြေစည် ၂၇၈.၁၉ သန်းမှ ၆.၅ ရာခိုင်နှုန်း ကျဆင်းခဲ့ပြီး ကွန်ဒန်ဆိတ်ထုတ်လုပ်မှုမှာ စည်ပေါင်း ၈၅.၂၆ သန်းအထိရှိခဲ့သည်။ ၂၀၂၄ ခုနှစ် ဒီဇင်ဘာလအထိနိုင်ငံ၏ ပျမ်းမျှနေ့စဥ်ရေနံထွက်ရှိမှုသည် စည်‌ပေါင်း ၉၉၂၆၀၀ ဖြစ်သည်။

          NCSI ၏ အဆိုအရတရုတ်နိုင်ငံသည် အိုမန်နိုင်ငံမှ ရေနံများအား အများဆုံးတင်သွင်းနေသော နိုင်ငံဖြစ်ပြီး ၂၀၂၄ ခုနှစ်တွင် စည်ပေါင်း ၂၈၉.၂၁ သန်းတင်သွင်းခဲ့ကာ ၂၀၂၃ ခုနှစ်ကတင်သွင်းသည် ထက် ၁.၃ ရာခိုင်နှုန်းတိုးလာခဲ့သည်။ ၎င်း၏နောက်တွင် တောင်ကိုရီးယားနိုင်ငံမှ စည်ပေါင်း ၅.၇၆ သန်း၊ ဂျပန်နိုင်ငံမှ ၅.၆၅ သန်းနှင့် အိန္ဒိယနိုင်ငံမှ ၃.၄၀ သန်း အသီးသီးတင်သွင်းခဲ့ကြကြောင်းသိရှိရပါသည်။

DOCA(ရန်ကုန်)