ပြည်ပကုန်သွယ်မှုသတင်းများ

          အိန္ဒိယပြည်တွင်းဈေးကွက်၌ သကြားဈေးနှုန်းများ ကျဆင်းလျက်ရှိနေချိန်တွင် သကြား စက်ရုံများအနေဖြင့် ပိုမိုကောင်းမွန်သည့် ဈေးနှုန်းများရရှိစေရန်အတွက် ပြည်ပသို့ သကြားတန်ချိန် ၁ သန်း တင်ပို့ရန် အစိုးရက ခွင့်ပြုထားသည်ဟု ကုန်သည်သတင်းအရင်းအမြစ်များအရ သိရှိရပါ သည်။

          သကြားစက်ရုံများမှ ကြံစိုက်တောင်သူများသို့ ငွေပေးချေမှုကို အထောက်အပံ့ဖြစ်စေရန် အတွက် သကြားတင်ပို့မှုကို ခွင့်ပြုပေးသင့်သည်ဟု အိန္ဒိယသကြားနှင့်ဇီဝစွမ်းအင်ထုတ်လုပ်သူများ အသင်း (ISMA) နှင့် သကြားစက်ရုံလုပ်ငန်းများသမဝါယမအသင်းချုပ်တို့က တောင်းဆိုထားခဲ့ကြ ပါသည်။ ISMA အသင်းက သကြားတန်ချိန် ၂ သန်း တင်ပို့ခွင့်ပြုရန် တောင်းဆိုခဲ့သော်လည်း အစိုးရ အနေဖြင့် ပြည်တွင်းစားသုံးမှု ဖူလုံရေးနှင့် ပိုလျှံမှုရှိပါက အီသနောလောင်စာအဖြစ် ပြောင်းလဲ သုံးစွဲရေးတို့ကို ဦးစားပေး ဆောင်ရွက်မည်ဖြစ်ပြီး အမှန်တကယ်ပိုလျှံမှုအပေါ် အခြေခံ၍သာ မည်မျှတင်ပို့ခွင့်ပြုမည်ကို ဆုံးဖြတ်မည်ဖြစ်သည်ဟု စားနပ်ရိက္ခာ အတွင်းဝန် Sanjeev Chopra က ၂၀၂၄ ခုနှစ် ဒီဇင်ဘာလ ၁၉ ရက်နေ့၌ ပြောကြားထားခဲ့သည်။

          အစိုးရ၏ ခန့်မှန်းချက်များအရ ၂၀၂၄ ခုနှစ် အောက်တိုဘာ ၁ ရက်နေ့မှ စတင်ခဲ့သည့် ယခုနှစ် ဈေးကွက်ရာသီတွင် သကြားတန်ချိန် ၃၂ သန်း ထွက်ရှိမည်ဟုခန့်မှန်းထားပြီး၊ ပြည်တွင်း စားသုံးမှုသည် တန်ချိန် ၂၈.၅ သန်းမှ ၂၉ သန်း ကြားရှိနိုင်ကြောင်း၊ တန်ချိန် ၄ သန်းကို အီသနော ထုတ်လုပ်ရာတွင် အသုံးပြုမည်ဖြစ်ကြောင်း၊ ယခင်နှစ် ဈေးကွက်ရာသီမှ လက်ကျန်တန်ချိန် ၇.၉ သန်းကို ထည့်သွင်းတွက်ချက်ပါက ယခုနှစ် ဈေးကွက်ရာသီပိတ်သိမ်းချိန် ၂၀၂၅ ခုနှစ် စက်တင်ဘာ လကုန်တွင် လက်ကျန်တန်ချိန် ၆.၉ သန်းရှိမည်ဖြစ်ကြောင်း သိရှိရပါသည်။

          ပြည်တွင်း၌ သကြားစားသုံးမှုကို တစ်လလျှင် တန်ချိန် ၂.၄ သန်းနှုန်းဖြင့် နှစ်လခွဲကာလ အတွက် တန်ချိန် ၆ သန်းခန့်ကို ကြံကြိတ်ဝါးသည့် ရာသီအစကာလ၌ အရန်ရိက္ခာထားရှိရန် အစိုးရ က ရည်ရွယ်ထားရှိရာ အဆိုပါတွက်ချက်မှုအရ တန်ချိန် ၁ သန်းခန့်သာ ပြည်ပသို့ တင်ပို့နိုင်မည်ဖြစ် ပါသည်။

          အိန္ဒိယနိုင်ငံ၌ သကြားတင်ပို့မှုကို တားမြစ်ထားခြင်းမရှိသော်လည်း ပြည်ပသို့သကြားတင်ပို့ လိုပါက  စားနပ်ရိက္ခာဝန်ကြီးဌာန၏ ခွင့်ပြုချက်ကို ရယူရမည်ဟု ကူးသန်းရောင်းဝယ်ရေးဝန်ကြီး ဌာနက စည်းကမ်းသတ်မှတ် ထုတ်ပြန်ထားသည်။ စားနပ်ရိက္ခာ ဝန်ကြီးဌာနသည် လွန်ခဲ့သော ဈေး ကွက်ရာသီအတွင်း သံတမန်လမ်းကြောင်းမှတစ်ဆင့် မေတ္တာရပ်ခံသည့် သကြားတင်ပို့ခွင့် ကိစ္စရပ် များမှအပ မည်သည့်ခွင့်ပြုမိန့်ကိုမျှ ထုတ်ပေးခဲ့ခြင်းမရှိသဖြင့် သကြားတင်ပို့မှုမှာ ထိရောက်စွာ ထိန်းချုပ်ထားသည့် အခြေအနေ ဖြစ်ပေါ်လျက်ရှိသည်။ 

          အိန္ဒိယသကြားဇီဝစွမ်းအင်ဖိုရမ်၏ တွဲဖက်ဥက္ကဋ္ဌဖြစ်သူ Samarth SSK ကုမ္ပဏီမှ အုပ်ချုပ်မှု ဒါရိုက်တာ Dilip Patil က ပြည်တွင်း၌ သကြားထုတ်လုပ်မှုမှာ ကျဆင်းလျက်ရှိပြီး အစိုးရ၏ လုပ်ဆောင်မှုက ထုတ်လုပ်မှုအဆင့်များအပေါ် သက်ရောက်မှုမရှိစေရန် သေချာခိုင်မာကြောင်းနှင့် ယခု တင်ပို့ခွင့်ပြုခြင်းသည် ပြည်တွင်းထုတ်လုပ်မှု ဆက်လက်တည်ငြိမ်စေခြင်းနှင့်အတူ ဈေးကွက် အတွင်း ယုံကြည်မှုကို မြှင့်တင်နိုင်မည်ဖြစ်ကြောင်း ပြောကြားထားပါသည်။

          အိန္ဒိယသကြားစက်ရုံပိုင်ရှင်များအနေဖြင့် ပြည်တွင်းဈေးကွက်၌ ‌လျော့ဈေးဖြင့် ရောင်းချ နေသည့် S-grade အဆင့်သကြားသည် ကမ္ဘာ့ဈေးကွက်တွင် သိသာထင်ရှားသည့် အရည်အသွေး မြင့် ရောင်းတန်းဝင် သကြားအမျိုးအစားအဖြစ် ရောက်ရှိလာမည်ကို မကြာမီသိရှိလာလိမ့်မည်ဖြစ် ကြောင်း The Hindu Business Line သတင်းဌာနက ဖော်ပြထားပါသည်။

Source : The Hindu Business Line, January 19, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          အိန္ဒိယနိုင်ငံ၌ တောင်ပိုင်းရှိ တဲလန်ဂါနာပြည်နယ်မှ အမှတ် ၁၀၁၀ ဆန်နှင့် ၁၀၆၄ ဆန် အမျိုးအစား စုစုပေါင်း တန်ချိန် ၁၀၀၀၀၀ ကို ဖိလစ်ပိုင်နိုင်ငံသို့ တင်ပို့ရန်အတွက် အဆိုပါပြည်နယ် အစိုးရက စာချုပ်ချုပ်ဆိုခဲ့ကြောင်း သိရှိရသည်။

          တဲလန်ဂါနာပြည်နယ်၊ Nalgonda ခရိုင်အတွင်း Haliya ဒေသရှိ Vajrateja Rice Cluster ပုဂ္ဂလိကလီမိတက်သို့ ဖိလစ်ပိုင်နိုင်ငံမှ အရည်အသွေးထိန်းချုပ်မှုဆိုင်ရာ အရာရှိများ လာရောက် သည့် ခရီးစဉ်အတွင်း ထိုကဲ့သို့ သဘောတူညီချက်ကို ရေးထိုးနိုင်ခဲ့ခြင်းဖြစ်ကြောင်း၊ ဖိလစ်ပိုင် ကိုယ်စားလှယ်အဖွဲ့သည် စပါးစမ်းသပ်ကြိတ်ခွဲခြင်း၊ ပို့ကုန် အရည်အသွေး စံချိန်စံညွှန်းများနှင့် ကိုက်ညီမှု ရှိ/မရှိ စစ်ဆေးခြင်းတို့ကို ဆောင်ရွက်ခဲ့ကြကြောင်း၊ ဆန်၏အရသာ အကဲဖြတ်ခြင်းကို လည်း လုပ်ဆောင်ခဲ့ပြီး ၎င်းတို့လိုအပ်သော အရည်အသွေးနှင့် ကိုက်ညီမှုရှိသည်ဟု အတည်ပြုခဲ့ ကြောင်း၊ ထို့အပြင် ဆန်များ သင်္ဘောတင်ပို့မှုနှင့် စပ်လျဉ်း၍ မည်သို့ဆောင်ရွက်ရမည်ကို ဒေသ အာဏာပိုင်များသို့ အကြံပြုဆွေးနွေးခြင်းကိုလည်း လုပ်ဆောင်ခဲ့ကြကြောင်းဖြင့် ဟိုက်ဒရာဘတ် မြို့ အခြေစိုက် The Siasat Daily သတင်းဌာနက ဖော်ပြထားသည်။

          သို့ရာတွင် ဆန်၏ အရည်အသွေးဆိုင်ရာပြဋ္ဌာန်းချက်နှင့် ပတ်သက်၍ စိုးရိမ်ဖွယ်အကြောင်း ဖြစ်ပေါ်လျက်ရှိကြောင်း၊ အနိမ့်ဆုံးအဆင့်ထားရှိရမည့် ဆန်ကြိတ်ခွဲမှုဆိုင်ရာ လမ်းညွှန်ချက်များ အရ ဒေသတွင်းစားသုံးရန်အတွက် ဖြန့်ဖြူးသည့်ဆန်သည် ဆန်ကွဲ ၂၅ ရာခိုင်နှုန်းအဆင့် ဖြစ်သော် လည်း ဖိလစ်ပိုင်သို့ တင်ပို့ရန်အတွက်မူ ဆန်ကွဲ ၅ ရာခိုင်နှုန်းအဆင့်ကိုသာ ခွင့်ပြုထားကြောင်း၊ ဆန်စက်လုပ်ငန်းရှင်များအနေဖြင့် ထိုကဲ့သို့ခြားနားချက်အပေါ် နစ်နာကြေးပေးအပ်ရန် ပြည်နယ် အစိုးရသို့ တောင်းဆိုလျက်ရှိပြီး အပြီးသတ် ဆုံးဖြတ်ချက် တစ်စုံတစ်ရာမျှ ချမှတ်နိုင်ခြင်း မရှိသေး ကြောင်း သိရှိရသည်။

          တဲလန်ဂါနာပြည်နယ် ဆန်စက်လုပ်ငန်းရှင်များအသင်း၏ ဥက္ကဋ္ဌ Gampa Nagender က ၎င်းတို့အနေဖြင့် ကနဦးအဆင့်၌ ဆန်တန်ချိန် ၄၀၀၀၀ ကို တင်ပို့ရန် စီစဉ်ထားပြီး ကျန်ရှိသော တန်ချိန် ၆၀၀၀၀ ကို နောက်ပိုင်းကျမှသာ သင်္ဘောတင်ပို့ရန် ဆောင်ရွက်မည်ဖြစ်သည်ဟု ပြော ကြားခဲ့သည်။

Source: The Siasat Daily, 19 January 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          အိန္ဒိယနိုင်ငံတွင် ပဲစင်းငုံများအား အကောက်ခွန်လွတ်တင်သွင်းခွင့်ကို ယခင်က ၂၀၂၅ ခုနှစ် မတ်လ ၃၁ ရက်အထိ ခွင့်ပြုထားရာမှ ယခုအခါ ၂၀၂၆ ခုနှစ် မတ်လ ၃၁ ရက်နေ့အထိ နောက်ထပ် တစ်နှစ် သက်တမ်းတိုးမြှင့်လိုက်ကြောင်း ပြည်ပကုန်သွယ်ရေးညွှန်ကြားမှုဦးစီးဌာန (DGFT) က ဇန်နဝါရီ ၂၀ ရက်နေ့၌ အမိန့်ကြော်ငြာစာထုတ်ပြန် ဖော်ပြခဲ့သည်။

          အိန္ဒိယပြည်တွင်း၌ ပဲစင်းငုံ အဓိကစိုက်ပျိုးရာ ပြည်နယ်များဖြစ်သော ကာနာတကာနှင့် မဟာရဋ္ဌ တို့တွင် လက်ရှိအချိန်ကာလအထိ ရိတ်သိမ်းမှုလုပ်ငန်းများ ဆောင်ရွက်နေဆဲဖြစ်သည်။ သီးနှံအသစ်များ ဈေးကွက်ဝင်ရောက်လာမှုနှင့်အတူ ကုန်အဝယ်ဒိုင်များ၌ ပဲစင်းငုံဈေးနှုန်းများမှာ ကျဆင်းလျက်ရှိပြီး ၂၀၂၄ ခုနှစ် မိုးသီးနှံများ ဈေးကွက်တင်ရောင်းဝယ်မှု ရာသီအတွက် အစိုးရက ထုတ်ပြန်ထားသည့် အနိမ့်ဆုံးအခြေခံရည်ညွှန်းဈေးနှုန်း သတ်မှတ်ချက် ၁ ကွင်တယ် (၁၀၀ ကီလို ဂရမ်) လျှင် ရူပီး ၇၅၅၀ နှုန်းအောက်၌ အရောင်းအဝယ်ဖြစ်ပေါ်လျက်ရှိသည်။

          အစိုးရ၏ ပထမအကြိမ် ကနဦးခန့်မှန်းချက်အရ ယခုသီးနှံရာသီ၌ ပဲစင်းငုံထုတ်လုပ်မှုမှာ ယခင်နှစ်ထွက်ရှိခဲ့သော တန်ချိန် ၃၄.၁၇ သိန်းထက် ၂.၅ ရာခိုင်နှုန်းပိုမိုလျက် တန်ချိန် ၃၅.၀၂ သိန်း ခန့် ထွက်ရှိနိုင်ကြောင်း သိရှိရသည်။

          ယခင်နှစ်တွင် ပဲစင်းငုံ၊ မတ်ပဲနှင့် ကုလားပဲတို့ ကဲ့သို့သော ပဲမျိုးများ ထုတ်လုပ်မှုကျဆင်းခဲ့ ခြင်းကြောင့် ဈေးနှုန်းများမြင့်တက်မှု ဖြစ်ပေါ်ခဲ့သည်။ ပြည်တွင်း၌ ကုန်စည်ရရှိရန်လွယ်ကူမှုကို မြှင့်တင်ရန်အတွက် အစိုးရသည် ပဲစင်းငုံ၊ မတ်ပဲနှင့် ပဲနီလေးတို့အား အကောက်ခွန်ကင်းလွတ် လျက် တင်သွင်းခွင့်ကို ၂၀၂၅ ခုနှစ် မတ်လ ၃၁ ရက်အထိ ခွင့်ပြုထားခဲ့သည်။ ပဲစင်းငုံ တင်သွင်းခွင့် မူဝါဒအား ယခုနောက်ဆုံးအကြိမ် ပြင်ဆင်မှုက ပြည်တွင်းဈေးကွက်အတွင်း ကုန်စည်ပေးသွင်းမှု ကို ပိုမိုတိုးတက်စေမည်ဖြစ်သည်။

          အစိုးရအနေဖြင့် ပဲမျိုးစုံဈေးနှုန်းများ မြင့်တက်ခဲ့မှုအပေါ် အနီးကပ်စောင့်ကြည့်ကြပ်မတ် လျက် စားသုံးသူများ ဈေးနှုန်းသက်သာစွာဖြင့်ဝယ်ယူနိုင်ရေးနှင့် ဈေးနှုန်းများတည်ငြိမ်မှုထိန်းသိမ်း ရေးတို့ကို ဆောင်ရွက်လျက်ရှိသည်။ ရာသီဥတုကောင်းမွန်မှုနှင့် စိုက်ပျိုးရန် သင့်လျော်သည့် မြေ အစိုဓာတ်ရရှိမှုတို့အရ ကုလားပဲနှင့် ပဲနီလေးတို့အား စိုက်ပျိုးထားရှိမှုမှာ ကောင်းမွန်သည့် အနေ အထားရှိပြီး  အထွက်တိုးတက်မည်ဟု မျှော်လင့်ရကြောင်း အိန္ဒိယ စားနပ်ရိက္ခာရေးရာဝန်ကြီးဌာန က မကြာသေးမီ၌ ပြောကြားထားသည်။

          အစိုးရက ခွင့်ပြုထားသည့် စားတော်ပဲဝါများ အကောက်ခွန်လွတ် တင်သွင်းခွင့်ကာလသည် ၂၀၂၅ ခုနှစ် ဖေဖော်ဝါရီလ ၂၀ ရက်နေ့တွင် ကုန်ဆုံးမည်ဖြစ်ပြီး ကုလားပဲအား အကောက်ခွန်လွတ် တင်သွင်းခွင့်မှာမူ ၂၀၂၅ ခုနှစ် မတ်လ ၃၁ ရက်နေ့၌ ပြီးဆုံးမည်ဖြစ်သည်။

          လက်လီဈေးကွက်အတွင်း ပဲခွဲခြမ်းများ၏ ဈေးနှုန်းများအပေါ် တိုက်ရိုက်သက်ရောက်မှု ရှိစေရေးအတွက် အစိုးရသည် ဘာရတ်အမှတ်တံဆိပ် (Bharat brand) ဖြင့် ကုလားပဲ၊ ပဲတီစိမ်းနှင့် ပဲနီလေးတို့အား ရောင်းချပေးခြင်းကို ဆက်လက်လုပ်ဆောင်လျက်ရှိပြီး အိန္ဒိယ လက်လီရောင်းချ သူများအသင်း၊ လက်လီအရောင်းကွင်းဆက်လုပ်ကိုင်သူများနှင့် ပုံမှန်တွေ့ဆုံဆွေးနွေးမှုများကို ဆောင်ရွက်လျက်ရှိသည်။ ထိုကဲ့သို့ စီမံဆောင်ရွက်မှုများ လုပ်ဆောင်ခဲ့ခြင်းကြောင့် ပဲမျိုးစုံ၏ စားသုံးသူဈေးဆနှုန်းကိန်း ဖောင်းပွမှုသည် ၂၀၂၄ ခုနှစ် ဇန်နဝါရီလ၌ ၁၉.၅၄ ရာခိုင်နှုန်းရှိရာမှ ၂၀၂၄ ခုနှစ် ဒီဇင်ဘာလတွင် ၃.၈၃ ရာခိုင်နှုန်းသို့ ကျဆင်းလာခဲ့သည်ဟု အစိုးရက မကြာသေးမီ ကာလ၌ ထုတ်ဖော်ပြောကြားထားခဲ့သည်။

Source: The Hindu Business Line, 21 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ၂၀၂၄ ခုနှစ်တွင် ဗီယက်နမ်၏ စင်ကာပူသို့ ဆန်တင်ပို့မှုမှာ သိသာစွာ စံချိန်တင်မြင့်တက် ခဲ့ပြီး တတိယအကြီးမားဆုံး တင်ပို့သူအဖြစ် ရပ်တည်နိုင်ခဲ့ကြောင်း စင်ကာပူနိုင်ငံရှိ ဗီယက်နမ် ကုန်သွယ်ရေးရုံး၏ အဆိုအရသိရပါသည်။ ဗီယက်နမ်သည် ၂၀၂၄ ခုနှစ်တွင် စင်ကာပူဒေါ်လာ ၁၂၈.၉ သန်းတန်ဖိုးရှိသော ဆန်များကို စင်ကာပူသို့တင်ပို့ခဲ့ပြီး ဈေးကွက်ဝေစု၏ ၂၈.၂၅ ရာခိုင်နှုန်း ရှိကာ ၂၀၂၃ ခုနှစ်နှင့်နှိုင်းယှဉ်ပါက ၂၈.၄၅ ရာခိုင်နှုန်း မြင့်တက်ခဲ့ကြောင်း သိရပါသည်။ ထိပ်ဆုံးတွင် ရပ်တည်နေသည့်နှစ်နိုင်ငံမှာ စင်ကာပူဒေါ်လာ ၁၄၈.၁၉ သန်း တန်ဖိုးတင်ပို့ခဲ့သည့် အိန္ဒိယနိုင်ငံနှင့် စင်ကာပူဒေါ်လာ ၁၃၇.၇၅ သန်း တန်ဖိုးတင်ပို့ခဲ့သည့် ထိုင်းနိုင်ငံ တို့ဖြစ်ကြောင်း သိရပါသည်။ ငွေစာရင်းနှင့်ကော်ပိုရိတ်အာဏာပိုင်အဖွဲ့ထံမှ အချက်အလက်များအရ ၂၀၂၄ ခုနှစ် တွင် စင်ကာပူ၏ ဆန်တင်သွင်းမှုမှာ စင်ကာပူဒေါ်လာ ၄၅၆.၂ သန်းတန်ဖိုးရှိခဲ့ပြီး ၂၀၂၃ ခုနှစ်က ထက် ၁၀.၇၃ ရာခိုင်နှုန်း မြင့်တက်ခဲ့ကြောင်း သိရပါသည်။ ဗီယက်နမ်သည် ဆန်အမျိုးအစား ၃ ခု ဖြစ်သည့် ဆန်ဖြူ(၄၂.၂၃ ရာခိုင်နှုန်း)၊ ပေါင်းဆန်( ၆၅.၇၃ ရာခိုင်နှုန်း)နှင့် ဆန်စေး (၇၇.၀၂ ရာခိုင်နှုန်း) တို့တွင် ဈေးကွက်ဝေစုကို လွှမ်းမိုးထားကြောင်း သိရပါသည်။ ဗီယက်နမ်သည် ၂၀၂၄ ခုနှစ်၏ ပထမနှစ်ဝက်တွင် အားကောင်းသောစွမ်းဆောင်ရည်ကို ပြသခဲ့သော်လည်း အဓိကတင်ပို့ သည့်ဆန်ဖြူ တင်ပို့မှုမှာကြီးထွားမှု အားနည်းသောကြောင့် နှစ်ကုန်သောအခါ စင်ကာပူဈေးကွက် တွင် ထိပ်ဆုံး၌ ဦးဆောင်နေသည့် ၎င်းတို့၏နေရာကို အိန္ဒိယနှင့် ထိုင်းတို့က ရယူသွားကြောင်း သိရပါသည်။ စင်ကာပူနိုင်ငံရှိ ဗီယက်နမ်ကုန်သွယ်ရေးရုံး၏ အကြီးအကဲနှင့် ကုန်သွယ်ရေး အတိုင်ပင်ခံပုဂ္ဂိုလ်ဖြစ်သူ Cao Xuan Thang က ဆန်ဖြူတင်ပို့မှုသင့်ရုံမျှသာရှိခြင်းသည် ဗီယက်နမ် စီးပွားရေးလုပ်ငန်းများနှင့် ဆန်အသင်းများမှ ကြေညာမြှင့်တင်ရန်အားထုတ်မှု မလုံလောက်သောကြောင့်ဖြစ်ကြောင်း ပြောကြားခဲ့ပါသည်။ ထို့ပြင် ထိုင်း၊ အိန္ဒိယနှင့် ဂျပန် အစရှိသည့် ယှဉ်ပြိုင်ဖက်များသည် ၎င်းတို့အမှတ်တံဆိပ်များ ကြေညာမြှင့်တင်ရန် တင်သွင်းသူ များနှင့် မိတ်ဖက်ဖွဲ့ခြင်း၊ ဈေးကွက်တင်ရောင်းချခြင်းတို့တွင် ကြီးမားစွာရင်းနှီးမြှုပ်နှံလျှက် ရှိကြောင်း သိရပါသည်။ Thang က စင်ကာပူဈေးကွက်တွင် ဗီယက်နမ်၏ ယှဉ်ပြိုင်နိုင်စွမ်း အရှိန်မြှင့်တင်ရန်အတွက် ဈေးကွက်တင်ရောင်းချမှုမဟာဗျူဟာမြှင့်တင်ခြင်းနှင့် ရေရှည်စီမံချက် ချမှတ်ခြင်းတို့ လိုအပ်ကြောင်းပြောကြားခဲ့ပါသည်။

DOCA(ရန်ကုန်)

          ထိုင်းနိုင်ငံသည် အမေရိကန်နိုင်ငံ၏ အကောက်ခွန်မူဝါဒများ၏ အဓိကရည်ရွယ်ချက် မဟုတ်သောကြောင့် အမေရိကန်၏ အကောက်ခွန်နှုန်းထား တိုးမြှင့်မှုများသည် နိုင်ငံ၏ ပို့ကုန် များ အပေါ် သက်ရောက်မှုနည်းပါးမည်ဟု Citibank Thailand က မျှော်လင့်ကြောင်း သိရပါ သည်။ ဘဏ်၏ စီးပွားရေးပညာရှင်ဖြစ်သူ Nalin Chutchotitham က ထိုင်းနိုင်ငံသည် ဒေါ်နယ်ထရမ့်အုပ်ချုပ်ရေးအဖွဲ့အောက်တွင် အမေရိကန်အကောက်ခွန်များကို သွယ်ဝိုက်သော နည်းဖြင့် သက်ရောက်မှုခံစားရနိုင်ကြောင်း၊ သို့သော် အမေရိကန်၏ တရုတ်အပေါ် အလား အလာရှိသော အကောက်ခွန်မြှင့်တင်မှုသတိပေးချက်အပေါ် စောင့်ကြည့်ရန်လိုကြောင်းနှင့် တရုတ်နှင့် ထိုင်းနိုင်ငံအကြား ကုန်သွယ်ရေးချိတ်ဆက်မှုများကြောင့် အမေရိကန်၏ တရုတ် အပေါ် အကောက်ခွန်သည် ထိုင်းနိုင်ငံ၏ ပို့ကုန််များကို သွယ်ဝိုက်သက်ရောက်စေနိုင်ကြောင်း ပြောကြားခဲ့ပါသည်။ အမေရိကန်၏မူဝါဒများသည် ကမ္ဘာလုံးဆိုင်ရာ စီးပွားရေးမသေချာ မရေရာ မှုများကို မြင့်တက်စေနိုင်ပြီး ထိုင်းနိုင်ငံ၏ ကုန်သွယ်‌ရေးမိတ်ဖက်များအား ကုန်သွယ်ရေးဖိအား နှင့် ဝယ်လိုအားနည်းပါးမှု ဖြစ်ပေါ်စေရန် မျှော်မှန်းရကြောင်း သိရပါသည်။ အကောင်းဘက် ကရှုမြင်ပါက ဘဏ်သည် ထိုင်းနိုင်ငံ၏ GDP တိုးတက်နှုန်းကို ၂၀၂၄ ခုနှစ်တွင် ၂.၇ ရာခိုင်နှုန်းမှ ၂၀၂၅ ခုနှစ်တွင် ၃.၂ ရာခိုင်နှုန်းထိ မြင့်တက်သတ်မှတ်ထားကြောင်း သိရပါသည်။ ပြည်တွင်း ရင်းနှီးမြှုပ်နှံမှုများ ကြောင့် စီးပွားရေးနာလံထူရန် မျှော်လင့်ရကြောင်း သိရပါသည်။ ထိုင်းနိုင်ငံ ရင်းနှီးမြှုပ်နှံမှုဘုတ် အဖွဲ့ ခွင့်ပြုထားသည့်စီမံကိန်းများ အထူးသဖြင့် လျှပ်စစ်မော်တော်ယာဉ် များ၊ ဒေတာစင်တာများ နှင့် အစားအစာပြုပြင်ထုတ်လုပ်သည့်လုပ်ငန်းများကြောင့် ပုဂ္ဂလိက ရင်းနှီးမြှုပ်နှံမှုများ အရှိန် မြင့်တက်လာရန် မျှော်လင့်ရကြောင်း သိရပါသည်။ Ms Nalin က ခရီးသွားကဏ္ဍသည် ယခုနှစ်တွင် ထိုင်းနိုင်ငံ၏ စီးပွားရေးကြီးထွားမှုအတွက် အဓိက မောင်းနှင် အား နေရာတွင် ဆက်လက် ရပ်တည်နေမည်ဟု ပြောကြားခဲ့ပါသည်။ Citi က၂၀၂၅ ခုနှစ်တွင် ပြည်ပခရီးသွား ၃၉.၈ သန်း လာရောက်လည်ပတ်ပြီး တစ်ဦးလျှင် ၁၂၉၈ အမေရိကန်ဒေါ်လာ သုံးစွဲရန် မျှော်မှန်းထားကြောင်း သိရပါသည်။ ခရီးသွားကဏ္ဍမှ ဝင်ငွေရရှိမှုသည် GDP ၏ ၉.၃ ရာခိုင်နှုန်းရှိမည် ဟုခန့်မှန်းထား ကြောင်း သိရပါသည်။ Citi Group ၏ ထွန်းသစ်စ ဈေးကွက် စီးပွားရေးအကြီးအကဲနှင့် အာရှ စီးပွားရေးပညာရှင်အကြီးအကဲ ဖြစ်သူ Johanna Chua က ဘဏ်သည် အမေရိကန်မှ တရုတ် အပေါ် အကောက်ခွန်မြှင့်တင်မှုကို ဈေးကွက်ခန့်မှန်းကြသည့် ၆၀ ရာခိုင်နှုန်းထက်နည်းပါးကာ ပျမ်းမျှ ၁၅ ရာခိုင်နှုန်း မြှင့်တင်ရန် မျှော်လင့်ကြောင်းနှင့် အကောက်ခွန်သည် အမေရိကန်နှင့် ဗျူဟာမြောက်ပစ်မှတ်ထားသည့် နိုင်ငံများကြား ဆွေးနွေးရန်အကြောင်းကိစ္စဖြစ်ကြောင်း ပြောကြားခဲ့ပါသည်။ Citi သည် တရုတ်နိုင်ငံ၏ စီးပွားရေးကျဆင်းမှုကြောင့် အာရှ၏စီးပွားရေး ကြီးထွားမှုကို ၂၀၂၄ ခုနှစ်တွင် ၄.၈ ရာခိုင်နှုန်းမှ ၂၀၂၅ ခုနှစ်တွင် ၄.၃ ရာခိုင်နှုန်း ထိလျှော့ကျ ခန့်မှန်းထားကြောင်း သိရပါသည်။ တရုတ်နိုင်ငံ၏ စီးပွားရေးကြီးထွားမှုမှာ ၂၀၂၄ ခုနှစ်တွင် ၅ ရာခိုင်နှုန်း မှ ၂၀၂၅ ခုနှစ်တွင် ၄.၂ ရာခိုင်နှုန်းသို့ ကျဆင်းရန် မျှော်မှန်းရကြောင်း သိရပါသည်။

Bangkok Post                                              

DOCA(ရန်ကုန်)