ပြည်ပကုန်သွယ်မှုသတင်းများ

          အရှေ့တောင်အာရှ၊ အိန္ဒိယနှင့် ရုရှား အစရှိသည့် တိုးတက်လာသည့် ဈေးကွက်များ ကြောင့် ထိုင်းနိုင်ငံခရီးသွားအာဏာပိုင်အဖွဲ့ (TAT) သည် ယခုနှစ်တွင် ခရီးသွားကဏ္ဍမှတစ်ဆင့် ဝင်ငွေ ဘတ် ၃ ထရီလီယံ ရရှိရန်ခန့်မှန်းထားကြောင်း သိရပါသည်။  TAT ၏ အုပ်ချုပ်ရေးမှူး Thapanee Kiatphaibool က ဘတ် ၂ ထရီလီယံကို ပြည်ပခရီးသွား ၃၉-၄၀ သန်းထံမှ ရရှိပြီး ဘတ် ၁ ထရီ လီယံအား ပြည်တွင်းခရီးစဉ် ၂၀၀-၂၂၀ သန်းထံမှ ရရှိရန် မျှော်လင့်ရကြောင်း ပြောကြားခဲ့ပါသည်။ အေဂျင်စီသည် အဓိကဈေးကွက်များ၏ ကြီးထွားနှုန်းကို ၁၀ ရာခိုင်နှုန်း၌ ဆက်လက်ထိန်းသိမ်း ထားရန် စီစဉ်ထားကြောင်း သိရပါသည်။ ထိုအလားအလာရှိသည့် ဈေးကွက်များတွင် စုစုပေါင်း လည်ပတ်မှု၏ ၃၀ ရာခိုင်နှုန်းရှိသည့် အရှေ့တောင်အာရှ အထူးသဖြင့် မလေးရှားနှင့် အင်ဒိုနီးရှား တို့ ပါဝင်ကြောင်း သိရပါသည်။ ၂၀၂၄ ခုနှစ်တွင် ထိုင်းနိုင်ငံသည် မလေးရှားခရီးသွား စံချိန်တင် ၄.၉ သန်း ရရှိခဲ့ကြောင်း သိရပါသည်။ ၂၀၂၅ ခုနှစ်တွင် TAT သည် မလေးရှားနှင့် ထိုင်းနိုင်ငံ တို့အား လေယာဉ်နှင့် ကားလမ်းခရီးဖြင့် လာရောက်သည့် နည်းလမ်းအပြင် ရထားနှင့် သင်္ဘောတို့ဖြင့် ခရီး သွားလာမှုကို မြှင့်တင်ရန် စီစဉ်နေကြောင်း သိရပါသည်။ Bangkok-Johor Bahru  အစရှိသည့် တိုက်ရိုက်လေကြောင်း လိုင်းသစ်များသည် မလေးရှားဈေးကွက်အား ပိုမိုအားကောင်းစေနိုင်ကြောင်း Ms Thapanee ကပြောကြားခဲ့ပါသည်။ အင်ဒိုနီးရှားသည်လည်း ၎င်းတို့၏ များပြားသည့် လူဦးရေ သန်း ၂၇၀ ကြောင့် အလားအလာရှိသည့် အခြားဈေးကွက်တစ်ခုဖြစ်ကြောင်း သိရပါသည်။ အခြားသိသာ ထင်ရှားသည့်ဈေးကွက်များတွင် ၂၀၂၄ ခုနှစ်က ပထမဆုံးအနေဖြင့် လာရောက်လည်ပတ်မှု ၁ သန်းကျော်ခဲ့သည့် ထိုင်ဝမ်နှင့် ၂၀၂၄ ခုနှစ်က လည်ပတ်မှု ၁.၈ သန်း ကျော်ခဲ့ပြီး ယခုနှစ်တွင် ၂ သန်းကျော်လာရောက်လည်ပတ် နိုင်သည့် တောင်ကိုရီးယားနိုင်ငံတို့ ပါဝင်ကြောင်း သိရပါသည်။ အေဂျင်စီသည် နှစ်နိုင်ငံကြား လေကြောင်းလိုင်းများ များပြားလာမှုကြောင့် အိန္ဒိယနိုင်ငံထံမှ ခရီးသွား ၂.၃-၂.၅ သန်း လာရောက် လည်ပတ်ရန် ရည်မှန်းထားကြောင်းလည်း သိရပါသည်။ ၂၀၂၄ ခုနှစ်က လည်ပတ်မှု ၁.၇ သန်း ရှိခဲ့သည့် ရုရှားမှာ ဥရောပမှ အဓိကထိပ်တန်း ဈေးကွက် တစ်ခုဖြစ်ပြီး ယခုနှစ်တွင် ၁၀ ရာခိုင်နှုန်း မြင့်တက်ရန် မျှော်လင့်ရကြောင်း သိရပါသည်။ ၂၀ ရာခိုင်နှုန်းကျော်ထိ ကြီးထွားလာနိုင်သည့် အခြားဈေးကွက်များမှာ အရှေ့အလယ်ပိုင်းနှင့် ကာဇတ်စတန်နိုင်ငံတို့ဖြစ်ကြောင်း သိရပါသည်။ သို့သော် သဘာဝဘေးအန္တရာယ်များနှင့် ပထဝီနိုင်ငံရေးကိစ္စရပ်များ ပါဝင်သည့် ထိန်းချုပ်၍ မရသည့်အကြောင်းအရာများနှင့် စိန်ခေါ်မှု များ ရှိနေသေးကြောင်း သိရပါသည်။ TAT သည် မတ်လ တွင် ဥ‌ရောပ၏အကြီးဆုံး ခရီးသွား ပြပွဲများထဲမှ တစ်ခုဖြစ်သည့် ITB Berlin 2025 တွင် ပါဝင်ရန် စီစဉ်ထားကြောင်း သိရပါသည်။ ယခုနှစ်တွင် TAT သည် ဥရောပဈေးကွက်မထိုးဖောက်ဘူးသည့် ခရီးသွားလုပ်ငန်းရှင် ၂၀ ကို ဈေးကွက်မဟာဗျူဟာများ လေ့ကျင့်သင်ကြားပေးကာ ITB တွင် Booth ငှားခပေးစရာမလိုပဲ ပထမဆုံးအနေနှင့် ပါဝင်ဆင်နွဲရန် ဖိတ်ခေါ်ရန် အလိုရှိကြောင်း သိရ ပါသည်။

DOCA(ရန်ကုန်)

          ကမ္ဘောဒီယားနိုင်ငံမှ ဒီဇယ်လောင်စာဆီ၊ ရေနံနှင့် သဘာဝဓာတ်ငွေ့တင်သွင်းမှုသည် ၂၀၂၄ ခုနှစ်တွင် ၁၂% လာကြောင်းကမ္ဘောဒီးယားစီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ဇန်နဝါရီ ၂၁ ရက်နေ့က ထုတ်ပြန်ချက်အရသိရသည်။ ဒီဇယ်လောင်စာ၊ ရေနံဆီနှင့် သဘာဝဓာတ်ငွေ့ တင်သွင်းမှုတန်ဖိုးသည် ၂၀၂၄ ခုနှစ်က အမေရိကန်ဒေါ်လာ ၂.၆၉ ဘီလီယံရှိပြီး ၂၀၂၃ ခုနှစ်၏ ၂.၄ ဘီလီယံထက် ၁၂% တိုးလာကြောင်းအစီအရင်စာကဆိုသည်။ ကမ္ဘောဒီယားနိုနိုင်ငံသည် ၂၀၂၄ ခုနှစ် တွင် ဒီဇယ်လောင်စာအတွက် ဒေါ်လာ ၁.၄၁ ဘီလီယံ၊ ရေနံဆီအတွက် ‌ဒေါ်လာ ၉၄၆ သန်းနှင့်ရေနံ ဓာတ်ငွေ့တွင်ဒေါ်လာ ၃၃၄ သန်းသုံးစွဲခဲ့ပြီး တစ်နှစ်ထက်တစ်နှစ် ၇%၊ ၁၁% နှင့် ၄၂% တို့ အသီးသီး တိုးတက်လာခဲ့ကြောင်း အစီအရင်ခံစာ အရ သိရသည်။ လက်ရှိတွင်ကမ္ဘောဒီးယားသည် ရေနံနှင့် သဘာဝဓာတ်ငွေ့တင်သွင်းမှုအပေါ် လုံးဝမှီခိုနေရသည်။ သတ္တုနှင့်စွမ်းအင်ဝန်ကြီးဌာနမှ ကမ္ဘောဒီးယားနိုင်ငံရှိ‌ ရေနံထွက်ကုန်များ ဝယ်လိုအားသည် ၂၀၂၀ ခုနှစ်၏ တန်ချိန် ၂.၈ သန်းမှ ၂၀၃၀ ခုနှစ်တွင်တန်ချိန် ၄.၈ သန်းအထိ တိုးလာမည်ဟု ခန့်မှန်းထားကြသည်။ ဇန်နဝါရီလ ၂၁ ရက်နေ့က စက်သုံးဆီဆိုင်များ ရှိဆီ‌စျေးနှုန်းမှာ တစ်လီတာလျှင် ၄၀၅၀ riels ရှိကြောင်းသိရသည်။ ကမ္ဘောဒီးယား စီးပွား‌ရေးနှင့်ကူးသန်းရောင်းဝယ်ရေးဝန်ကြီးဌာန၏ အစီအရင်ခံစာအရ ကမ္ဘောဒီးယားနိုင်ငံ သည် ၂၀၂၄ ခုနှစ်တွင် စုစုပေါင်းဒေါ်လာ ၁ ဘီလီယံတန်ဖိုးရှိ မော်တော်ယာဉ် အမျိုးအစား များစွာကို တင်သွင်းခဲ့ပြီး တစ်နှစ်ထက်တစ်နှစ် ၁၁.၆% တိုးတက်လာခဲ့ကြောင်းသိရသည်။

DOCA(ရန်ကုန်)

အမေရိကန်နိုင်ငံတွင် ဥာဏ်ရည်တု (AI) အခြေခံအဆောက်အအုံဆိုင်ရာ OpenAI၊ SoftBank နှင့် Oracle တို့မှ အမေရိကန်ဒေါ်လာ ဘီလီယံ ၅၀၀ ရင်းနှီးမြုပ်နှံရန် အမေရိကန်သမ္မတ Donald Trump ကကြေညာခဲ့သည်။ ဇန်နဝါရီလ ၁ ရက်နေ့မွန်းလွဲပိုင်းတွင် အိမ်ဖြူတော်တွင်ကျင်းပ‌သောပွဲ တစ်ခု၌ ကုမ္ပဏီသုံးခုသည် AI အခြေခံအဆောက်အအုံသစ် Stargate ဟုခေါ်သော AI အခြေခံ အဆောက်အအုံနှင့် လက်တွဲလုပ်ဆောင်ရန် စီစဉ်ထားကြောင်း ပြောကြားခဲ့ပြီး ယင်းတွင် AI မျိုးဆက် သစ်များအတွက် ဒေတာစင်တာများအပါအဝင် ရုပ်ပိုင်းဆိုင်ရာနှင့် virtual အခြေခံအဆောက်အအုံ များကို တည်ဆောက်သွားမည်ဖြစ်ကြောင်း ပြောကြားခဲ့သည်။ ကုမ္ပဏီများသည် လာမည့် လေးနှစ် အတွင်း ပရောဂျက်တွင် ဒေါ်လာ ဘီလီယံ ၅၀၀ အထိ ရင်းနှီးမြှုပ်နှံရန် စီစဉ်ထားပြီး ဒေါ်လာ ၁၀၀ ဘီလီယံ ရင်းနှီးမြုပ်နှံမှုဖြင့် စတင်မည်ဖြစ်သည်။ နည်းပညာကုမ္ပဏီသုံးခုစလုံး၏ CEO များသည် ကြေငြာချက်အတွက် အိမ်ဖြူတော်တွင် သမ္မတထံ လာရောက်ပူးပေါင်းခဲ့ကြသည်။ ဇန်နဝါရီလအစော ပိုင်းတွင် Trump သည် အမေရိကန်ပြည်ထောင်စုတစ်ဝှမ်းရှိ ဒေတာစင်တာများတည်ဆောက်ရန် အတွက် Emirati developer မှဒေါ်လာ ၂၀ ဘီလီယံရင်းနှီးမြှုပ်နှံမည်ဟုကြေငြာခဲ့သည်။

DOCA(ရန်ကုန်)

          ကမ္ဘောဒီးယားနိုင်ငံ၏ ဒေသတွင်း ဘက်စုံစီးပွားရေးပူးပေါင်းဆောင်ရွက်မှု (RCEP) အဖွဲ့ဝင်နိုင်ငံများနှင့် ကုန်သွယ်မှုသည် ၂၀၂၄ ခုနှစ်တွင် ကန်ဒေါ်လာ ၃၄.၅၂ ဘီလီယံ အထိ ရောက်ရှိခဲ့ပြီး ၂၀၂၃ နှစ်မှ ကန်ဒေါ်လာ ၂၉.၃၂ ဘီလီယံထက် ၁၇.၇ ရာခိုင်နှုန်းတိုးလာကြောင်း ၂၀-၁-၂၀၂၅ ရက်နေ့က ထုတ်ပြန်ခဲ့သော တရားဝင်အစီရင်ခံစာအရသိရသည်။ RCEP အဖွဲ့ဝင်နိုင်ငံများသို့ ကမ္ဘောဒီးယား၏ ပို့ကုန်တန်ဖိုးမှာ ၂၀၂၄ ခုနှစ်တွင် ကန်ဒေါ်လာ ၉.၀၆ ဘီလီယံရှိခဲ့ပြီး ၂၀၂၃ ခုနှစ်က ကန်ဒေါ်လာ ၈.၀၄ ဘီလီယံထက် ၁၃ ရာခိုင်နှုန်းနီးပါး မြင့်တက် လာခဲ့ကြောင်း အကောက်ခွန်နှင့်အခွန်ကြီးကြပ်မှုဦးစီးဌာန (GDCE) ၏ အစီရင်ခံစာအရ သိရ သည်။ RCEP အဖွဲ့ဝင်နိုင်ငံများမှ ကမ္ဘောဒီးယားနိုင်ငံသို့ သွင်းကုန်စုစုပေါင်းသည် ကန်ဒေါ်လာ ၂၅.၄၆ ဘီလီယံရှိပြီး ၂၀၂၃ ခုနှစ်က ကန်ဒေါ်လာ ၂၁.၂၈ ဘီလီယံမှ ၁၉.၆ ရာခိုင်နှုန်း တိုးလာ ကြောင်း အစီရင်ခံစာတွင်ဖော်ပြထားသည်။ RCEP အဖွဲ့ဝင်နိုင်ငံများအနက် တရုတ်၊ ဗီယက်နမ်၊ ထိုင်း၊ ဂျပန်နှင့် စင်္ကာပူနိုင်ငံတို့သည် ကမ္ဘောဒီးယားနိုင်ငံ၏ အဓိကကုန်သွယ်ဖက်နိုင်ငံများ ဖြစ်ကြသည်။ ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန (MoC) မှ ပြောရေးဆိုခွင့်ရှိသူ Penn Sovicheat က RCEP သည် ရေရှည်ပို့ကုန်တိုးတက်မှုအတွက် အထောက်အကူဖြစ်စေပြီး နိုင်ငံတော်အတွင်နိုင်ငံခြားတိုက်ရိုက်ရင်းနှီးမြှုပ်နှံမှု(FDI) များ ပိုမို ရရှိရန် အဓိကအားထားရာဖြစ်ကြောင်း ပြောကြားခဲ့သည်။

DOCA(ရန်ကုန်)

          ကမ္ဘောဒီးယားနိုင်ငံသည် အထည်လိပ်၊ ဖိနပ်နှင့်ခရီးသွားကုန်ပစ္စည်းများကို ၂၀၂၄ ခုနှစ် တွင် ကန်ဒေါ်လာ ၁၃.၉၂ ဘီလီယံတန်ဖိုးတင်ပို့ခဲ့ပြီး ၂၀၂၃ ခုနှစ်ထက် ၂၃ ရာခိုင်နှုန်း တိုးတက် လာခဲ့ကြောင်း ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန (MoC)မှ ၂၁-၁-၂၀၂၅ ရက်နေ့တွင်အစီရင်ခံစာထုတ်ပြန်ခဲ့သည်။ ၂၀၂၄ ခုနှစ်တွင် အထည်လိပ်တင်ပို့မှုမှ ကန်ဒေါ်လာ ၉.၇၉ ဘီလီယံရရှိခဲ့ပြီး ၂၀၂၃ နှစ်ထက် ၂၄ ရာခိုင်နှုန်းတိုးလာသည်ဟု အစီရင်ခံစာ တွင် ဖော်ပြထားသည်။ တန်ဖိုးအမေရိကန်ဒေါ်လာ ၄၉၉ သန်းတန်ဖိုးရှိသော အထည်လိပ်များကို နိုင်ငံတကာဈေးကွက်သို့တင်ပို့ခဲပြီး ၁၇ ရာခိုင်နှုန်းတိုးတက်လာခဲ့သည်။ ဖိနပ်တင်ပို့မှုမှ ကန် ဒေါ်လာ ၁.၆၈ ဘီလီယံရရှိခဲ့ပြီး ၂၀၂၃ နှစ်ထက် ၂၃ ရာခိုင်နှုန်းတိုးလာခဲ့ပြီး ခရီးသွားကုန်ပစ္စည်း တင်ပို့မှုမှ ကန်ဒေါ်လာ ၁.၉၅ ဘီလီယံရရှိခဲ့ပြီး ၂၀၂၃ နှစ်ထက် ၁၉.၆ ရာခိုင်နှုန်းတိုးလာခဲ့သည်။  ASEAN+3 Macroeconomic Research Office (AMRO) မှ စီးပွားရေးပညာရှင် Hoe EeKhor က အထည်လိပ်၊ ဖိနပ်နှင့် ခရီးသွားကုန်ပစ္စည်းကဏ္ဍသည် ကမ္ဘောဒီးယားနိုင်ငံ၏ စီးပွားရေး တိုးတက်မှုအတွက် အဓိကကဏ္ဍမှ ပါဝင်ကြောင်းပြောကြားခဲ့သည်။ အဆိုပါစက်မှု လုပ်ငန်းများ သည် ကမ္ဘောဒီးယားနိုင်ငံအတွက် နိုင်ငံခြားဝင်ငွေအများဆုံး ရရှိသည့်လုပ်ငန်းများ ဖြစ်သည်။ အဆိုပါကဏ္ဍတွင် စက်ရုံခွဲပေါင်း ၁,၅၃၈ ခန့်ရှိပြီး လုပ်သား ၉၁၃,၀၀၀ ခန့်ရှိကြောင်း အလုပ်သမားနှင့်အသက်မွေးဝမ်းကြောင်းလေ့ကျင့်ရေးဝန်ကြီးဌာန၏ အစီရင်ခံစာတွင် ဖော်ပြ ထားသည်။

DOCA(ရန်ကုန်)