တရုတ်နှစ်သစ်ကူးပွဲတော်တွင် မုန့်ဖုတ်ဆိုင်များ၊ ပီဇာဆိုင်များနှင့် အခြားအစားအစာ လက်လီရောင်းချသူအများအပြားတို့သည် နို့ထွက်ပစ္စည်းများအား သိုလှောင်ထားသောကြောင့် နယူးဇီလန် နို့ထွက်ပစ္စည်းများအတွက် ဝယ်လိုအားကို တွန်းအားပေးလျက်ရှိသည်။ တရုတ်နိုင်ငံရှိ စားသောက်ကုန်ဝန်ဆောင်မှုပါဝင်ပစ္စည်းများ ၀ယ်လိုအားသည် ဤကာလအတွင်း အားကောင်းခဲ့ပြီး တရုတ်နိုင်ငံတွင် Fonterra ၏ စားသောက်ကုန်ဝန်ဆောင်မှုရောင်းချမှုသည် လျင်မြန်စွာ ဆက်လက် ကြီးထွားလာရန် မျှော်လင့်ထားကြောင်း Dai က ပြောကြားပြီး ကမ္ဘာ့နို့ထွက်ပစ္စည်းဈေးနှုန်းများသည် ၂၀၂၄ ခုနှစ် အောက်တိုဘာလမှစပြီး ၅ ရာခိုင်နှုန်းနီးပါး မြင့်တက်လာခဲ့ကြောင်း Dai က ပြောကြားခဲ့ သည်။ နယူးဇီလန် နို့ထွက်ပစ္စည်း ကုမ္ပဏီကြီး Fonterra ၏ ဒုတိယ ဥက္ကဌ Justin Dai က ဇန်နဝါရီ ၂၈ ရက်နေ့က ပြောကြားခဲ့သည်။ ဥပမာအားဖြင့် စတော်ဘယ်ရီကိတ်မုန့်ကဲ့သို့သောမုန့်များတွင် နို့ထွက်ပစ္စည်းအသုံးချမှုများ ကြောင်း၊ အနီရောင်အပြင်အဆင်အစားအစာကိုနှစ်သက်ကြသောကြောင့် အနီရောင်သည် စည်းစိမ်ချမ်းသာနှင့် ကံကောင်းခြင်းများနှင့် ဆက်နွှယ်နေကြောင်း Dai က ပြောသည်။ တရုတ်နိုင်ငံ၏ အစားအသောက်ဝန်ဆောင်မှုလုပ်ငန်း၏အဓိကအစိတ်အပိုင်းဖြစ်သည့် နှစ်သစ်အတွက် ဟင်းပွဲအသစ်များနှင့် အရသာရှိသော ဟင်းပွဲများကို စားသောက်ဆိုင်များ တီထွင်ထုတ်လုပ်ခြင်းကြောင့် ဝယ်လိုအား တိုးလာရခြင်းဖြစ်‌ ကြောင်းသိရသည်။

Source : Xinhua

DOCA(ရန်ကုန်)

          အိန္ဒိယနိုင်ငံအနေဖြင့် ပြည်တွင်းလိုအပ်ချက်ကို ဖြည့်ဆည်းနိုင်ရန်အတွက် ပဲမျိုးစုံတင်သွင်း မှုကို မြှင့်တင်ခဲ့ရာ ၂၀၂၄ ပြက္ခဒိန်နှစ်အတွင်း စုစုပေါင်းတန်ချိန် ၆၆.၃၃ သိန်းခန့်ဖြင့် နှစ်ဆခန့်တိုး တက်လျက် စံချိန်တင်မြင့်တက်ခဲ့ကြောင်း The Hindu Business Line သတင်းဌာနက ဖော်ပြ ပါသည်။

          ပြည်တွင်း၌ ပဲမျိုးစုံစိုက်ပျိုးထွက်ရှိမှု ကျဆင်းခဲ့မှုအရ ဝယ်လိုအားအပိုင်းကို မြှင့်တင်လျက် ဈေးနှုန်းများတည်ငြိမ်အောင် ထိန်းသိမ်းနိုင်ရန်အတွက် အချို့သော ပဲမျိုးများ တင်သွင်းမှုအပေါ် အိန္ဒိယအစိုးရက အကောက်ခွန်ကင်းလွတ်ခွင့်ပြုခဲ့အပြီးတွင် ထိုကဲ့သို့ တင်သွင်းမှု မြင့်တက်လာ ခြင်းဖြစ်သည်။

          ၂၀၂၄ ခုနှစ်၌ ကုလားပဲထွက်ရှိမှု ကျဆင်းနိုင်ဖွယ်ရှိသည့် အခြေအနေအရ အစိုးရသည် ၂၀၂၃ ခုနှစ် ဒီဇင်ဘာလတွင် စားတော်ပဲသွင်းကုန်အပေါ် အကောက်ခွန်ကင်းလွတ်ခွင့်ပေးခဲ့သည်။ သို့ဖြစ်ရာ ၂၀၂၄ ခုနှစ်အတွက် ပဲမျိုးစုံတင်သွင်းမှုတွင် စားတော်ပဲသည် တန်ချိန် ၂၉.၆၈ သိန်းခန့် ဖြင့် အများဆုံးဖြစ်ပြီး ၎င်းနှစ်အတွင်း အကြိမ်ကြိမ် သက်တမ်းတိုးမြှင့်ပေးခဲ့သော စားတော်ပဲ အကောက်ခွန်လွတ်တင်သွင်းခွင့်သည် ၂၈-၂-၂၀၂၅ ရက်နေ့၌ ကုန်ဆုံးမည်ဖြစ်သည်။

          ၂၀၂၄ ခုနှစ်အတွင်း အိန္ဒိယ၏ ပဲမျိုးစုံတင်သွင်းမှုတွင် ပဲစင်းငုံ တန်ချိန် ၁၂.၃၃ သိန်းနှင့် မတ်ပဲ တန်ချိန် ၇.၆၅ သိန်းရှိမည်ဟု ခန့်မှန်းရကြောင်း၊ ပဲနီလေးတင်သွင်းမှုမှာ ၂၀၂၃ ခုနှစ်၌ တန်ချိန် ၁၆.၈၁ သိန်းရှိရာမှ ၂၀၂၄ ခုနှစ်တွင် တန်ချိန် ၁၀.၉၃ သိန်းခန့်သို့ ကျဆင်းခဲ့ကြောင်း၊ ကုလားပဲ တင်သွင်းမှုမှာမူ ၄ ဆ ခန့်မြင့်တက်ပြီး တန်ချိန် ၅.၇၄ သိန်းခန့်ရှိနိုင်ကြောင်း သိရှိရသည်။

          ယခင်ကာလများ၌ ပြက္ခဒိန်တစ်နှစ်အတွင်း ပဲတင်သွင်းမှုအများဆုံးအဖြစ် စံချိန်တင်ခဲ့မှုမှာ ၂၀၁၇ ခုနှစ်တွင် စားတော်ပဲတန်ချိန် ၃၁.၀၃ သိန်း အပါအဝင် ပဲမျိုးစုံ တန်ချိန် ၆၂.၇၄ သိန်း တင်သွင်းခဲ့ခြင်းဖြစ်သည်။

          IGrain India ကုမ္ပဏီမှ လုပ်ငန်းရှင် Rahul Chauhan က ၎င်းတို့အနေဖြင့် ၂၀၂၄ ပြက္ခဒိန် နှစ်အတွင်း ပဲမျိုးစုံကို စံချိန်တင် တင်သွင်းနိုင်ခဲ့ကြောင်း၊ အိန္ဒိယ၏ ပဲမျိုးစုံကို ပြည်ပမှတင်သွင်းရမှု အပေါ် မှီခိုနေရခြင်းသည် ပြည်တွင်းထုတ်လုပ်မှု ကျဆင်းသည့် နှစ်ကာလများ၌ ဖြစ်ပေါ်လေ့ရှိ ကြောင်း၊ ယခုအခါ ပြည်တွင်း၌ ပဲစားသုံးမှု လိုအပ်ချက်ဖြစ်သော ပဲမျိုးစုံတန်ချိန် သိန်း ၂၇၀ ခန့် အနက် ၂၄.၅၇ ရာခိုင်နှုန်း သို့မဟုတ် လေးပုံတစ်ပုံခန့်ကို ပြည်ပမှ တင်သွင်းရခြင်းဖြစ်ကြောင်း၊ ယခု တင်သွင်းခဲ့သော ပဲမျိုးစုံပမာဏသည် ၄ လတာ စားသုံးမှုနှင့် ညီမျှကြောင်း ပြောကြားခဲ့သည်။

Source: Source: The Hindu Business Line, 26 January, 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ကမ္ဘောဒီးယားနိုင်ငံ ပို့ကုန်မြှင့်တင်ရေးလုပ်ငန်းအဖွဲ့၏ ဥက္ကဋ္ဌဖြစ်သူ စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနမှ အတွင်းဝန် Samheng Bora ဦးဆောင်သော ကိုယ်စားလှယ်အဖွဲ့ သည် ဂျပန်ဈေးကွက်သို့ ကမ္ဘောဒီးယား ဆန်တင်ပို့မှု မြှင့်တင်နိုင်ရေးအတွက် ဇန်နဝါရီ ၂၃ ရက်မှ ၂၄ ရက်နေ့အထိ ဂျပန်နိုင်ငံ၏ ထိပ်တန်း ဆန်တင်သွင်းသူ (၃) ဦးနှင့် အဆင့်မြင့်အရာရှိ ဆွေးနွေးပွဲများပြုလုပ်ခဲ့ကြကြောင်း သိရပါသည်။

          အဆိုပါ ဆွေးနွေးပွဲများတွင် ကမ္ဘောဒီးယားအစိုးရ အနေဖြင့် ပို့ကုန်မြှင့်တင်ရေးလုပ်ငန်း အဖွဲ့မှတစ်ဆင့် လယ်ယာထွက်ကုန်များ တိုးချဲ့တင်ပို့နိုင်ရေးနှင့် ကမ္ဘောဒီးယားဆန်ကို နိုင်ငံတကာ အရည်အသွေး စံချိန်စံညွှန်းများနှင့် ကိုက်ညီစေရေး ကြိုးပမ်းဆောင်ရွက်လျက်ရှိကြောင်း၊ နှစ်နိုင်ငံ အကြား ကုန်သွယ်မှုဆက်ဆံရေးကို မြှင့်တင်ရန်နှင့် ပူးပေါင်းဆောင်ရွက်ရေး လမ်းကြောင်းသစ်များ ရှာဖွေရန်တို့ကို ရည်မှန်းချက်ချမှတ် လုပ်ဆောင်လျက်ရှိကြောင်း အတွင်းဝန် Samheng Bora က အလေးပေး ပြောကြားခဲ့ပါသည်။

          ဂျပန်ကုမ္ပဏီများ အနေဖြင့် ကမ္ဘောဒီးယား၏ ဆန်စပါးကဏ္ဍအပေါ် စိတ်ဝင်စားမှုကို အခိုင် အမာ ဖော်ပြခဲ့ကြပြီး အလားအလာရှိသောဈေးကွက်အဖြစ် အသိအမှတ်ပြုလျက် ကမ္ဘောဒီးယား ဆန်အား ထောက်ပံ့ရေးကွင်းဆက်သို့ မိတ်ဆက်ခြင်းအပေါ် စိတ်ဝင်စားမှုရှိကြောင်း ပြသခဲ့ကြ ပါသည်။

          နှစ်ဘက် ကိုယ်စားလှယ်များသည် အပြုသဘောဆောင်ပြီး ပူးပေါင်းဆောင်ရွက်သည့် အချက်များကို ထုတ်ဖော်ပြောကြားခဲ့ပြီး ဂျပန်နိုင်ငံတွင် ကမ္ဘောဒီးယားဆန်ကို ဈေးကွက်မြှင့်တင် ရန်နှင့် နှစ်နိုင်ငံ ကုန်သွယ်မှု ခိုင်မာစေမည့် ကတိကဝတ်များကို ထပ်လောင်းအတည်ပြုခဲ့ကြောင်း၊ ဂျပန်နိုင်ငံ၏ ထိပ်တန်းဆန်တင်သွင်းသူ (၃) ဦးသည် ဂျပန်ဈေးကွက်ဝေစု၏ ၈၀ ရာခိုင်နှုန်းကို စုပေါင်းရယူထားပြီး ၎င်းတို့အနက် ITOCHU ကော်ပိုရေးရှင်းသည် ဂျပန်နိုင်ငံ၏ အကြီးဆုံး ဆန် တင်သွင်းသူ ဖြစ်ကြောင်း သိရပါသည်။

Source: The Khmer Today, 26 Jan 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          အင်ဒိုနီးရှားနိုင်ငံအနေဖြင့် ၂၀၂၂ ခုနှစ် ရုရှား-ယူကရိန်း ပဋိပက္ခဖြစ်ပွားပြီးကတည်းက ဥရောပ၏ ကြီးမားသည့် ပိတ်ဆို့အရေးယူမှုကို ကြုံတွေ့နေရသော ရုရှားနိုင်ငံထံမှ ရေနံများ ဝယ်ယူ ရန် စဉ်းစားနေသည်ဟု ဗီယက်နမ်သတင်းဌာနက ဇန်နဝါရီလ ၂၆ ရက်နေ့တွင် ဖော်ပြထားသည်။

          ဘရာဇီး၊ ရှရှား၊ အိန္ဒိယ၊ တရုတ်နှင့် တောင်အာဖရိကနိုင်ငံများ ဦးဆောင်ပါဝင်သည့်  BRICS စီးပွားရေးမဟာမိတ်အဖွဲ့သို့ အင်ဒိုနီးရှား၏ အဖွဲ့ဝင်အဖြစ် ဝင်ရောက်မှုက နိုင်ငံတကာပိတ်ဆို့ အရေးယူမှုများကြောင့် ကမ္ဘာ့စံသတ်မှတ်ချက် ဈေးနှုန်းအောက် ကျဆင်းလျက်ရှိသော ရုရှားရေနံ ကို  တင်သွင်းနိုင်ရေးအတွက် အခွင့်အလမ်းများ ဖွင့်ပေးခဲ့ခြင်းဖြစ်ကြောင်း အင်ဒိုနီးရှား စွမ်းအင် ဝန်ကြီး Mr. Bahlil Lahadalia က မကြာသေးမီက ပြောကြားခဲ့သည်။

          သို့သော်လည်း ရုရှားရေနံအပေါ် အင်ဒိုနီးရှား၏ စိတ်ဝင်စားမှုသည် ရေနံအရောင်းအဝယ် သဘောတူညီချက်ပြုလုပ်ပါက အနောက်နိုင်ငံများနှင့် ဆက်ဆံရေး ထိခိုက်မှုရှိလာမည်ကို စိုးရိမ်မှု များဖြစ်ပေါ်စေခဲ့သည်။ ဥရောပသမဂ္ဂ သံတမန်တစ်ဦးကမူ ရုရှားထံမှဖြစ်စေ အခြားမည်သည့် နိုင်ငံမှဖြစ်စေ အင်ဒိုနီးရှား၏ ရေနံဝယ်ယူတင်သွင်းမှုအပေါ် ဥရောပသမဂ္ဂအနေဖြင့် အလေးထား လိမ့်မည်မဟုတ်ကြောင်း ထုတ်ဖော်ပြောကြားထားသည်။

          တစ်ချိန်တည်းမှာပင် အင်ဒိုနီးရှားနိုင်ငံဆိုင်ရာ ရုရှားသံအမတ်ကြီး Mr. Sergei Tolchenov က ရှရှားနိုင်ငံအနေဖြင့် ရေနံဝယ်ယူရေး စေ့စပ်ညှိနှိုင်းမှုများကို တံခါးဖွင့်ပေးထားကြောင်း၊ အင်ဒိုနီးရှားနှင့် ရေနံရောင်းဝယ်မှုဆိုင်ရာ ဆွေးနွေးပြောဆိုမှုများ လုပ်ဆောင်နိုင်ခဲ့ကြောင်း၊ ရှရှားနိုင်ငံသည် နိုင်ငံတကာဘဏ္ဍာရေးစနစ်တွင် အထီးကျန်ဖြစ်နေသောကြောင့် ဒေသတွင်း ငွေကြေးများ၊ ရူပီးယားနှင့် ရူဘယ်တို့ကို နှစ်နိုင်ငံအကြား ကုန်သွယ်မှုတွင် အသုံးပြုရန် ဆွေးနွေး ညှိနှိုင်းခဲ့ကြောင်း မှတ်ချက်ပြုပြောကြားခဲ့သည်။

          အင်ဒိုနီးရှားနိုင်ငံ အနေဖြင့် တစ်ရက်လျှင် ရေနံစည်ပေါင်း ၇၀၀၀၀၀ မှ ၈၀၀၀၀၀ အတွင်း သာ ထုတ်လုပ်နိုင်ပြီး နိုင်ငံ့ရေနံလိုအပ်ချက်၏ ထက်ဝက်သာထုတ်လုပ်နိုင်သည်။ အင်ဒိုနီးရှားသည် ရေနံကို အဓိကအားဖြင့် ရေနံတင်ပို့သူနိုင်ငံများအဖွဲ့ (OPEC) အဖွဲ့ဝင်နိုင်ငံများထံမှ တင်သွင်းပြီး ရေနံနှင့် သဘာဝ ဓာတ်ငွေ့တင်သွင်းမှုသည် ၂၀၂၄ ခုနှစ်တွင် စုစုပေါင်းအမေရိကန်ဒေါ်လာ ၃၆.၃ ဘီလီယံခန့်ရှိသည်ဟု အင်ဒိုနီးရှား ဗဟိုစာရင်းအင်းအေဂျင်စီ (BPS) က ဖော်ပြထားကြောင်း သတင်းရရှိပါသည်။

Source: Việt Nam News, Sunday, Jan 26, 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ထိုင်းနိုင်ငံသည် ဥရောပသမဂ္ဂအဖွဲ့ဝင်နိုင်ငံအားလုံးနှင့် လွတ်လပ်သောကုန်သွယ်ရေး သဘောတူညီချက်များ လက်မှတ်ရေးထိုးရန်စီစဉ်ထားကြောင်း ဝန်ကြီးချုပ် Paetongtarn Shinawatra က ဇန်နဝါရီလ ၂၅ ရက်နေ့က ပြောကြားခဲ့ပါသည်။ ဝန်ကြီးချုပ်သည် ထိုမှတ်ချက် ကိုဆွစ်ဇာလန်နိုင်ငံတွင် ကျင်းပခဲ့သည့် ၂၀၂၅ ကမ္ဘာ့စီးပွားရေးဖိုရမ်(WEF)တက်ရောက်ပြီး ပြန်လည် ရောက်ရှိချိန်တွင်‌ ပြောကြားခဲ့ခြင်းဖြစ်ကြောင်း သိရပါသည်။ Ms Paetongtarn သည် ဇန်နဝါရီလ ၂၃ ရက်‌နေ့၌ WEF တွင်သီးခြားအနေဖြင့် ထိုင်းနိုင်ငံနှင့် ဥ‌ရောပလွတ်လပ်သော ကုန်သွယ်ရေးအသင်း (EFTA) ကြား လွတ်လပ်သောကုန်သွယ်ရေးသဘောတူညီချက်(FTA) ကို လက်မှတ်ရေးထိုးခဲ့ကြောင်း သိရပါသည်။ EFTA တွင် ဆွစ်ဇာလန်၊ ‌နော်ဝေ၊ အိုက်စလန်နှင့် လတ်ချင်စတိန်းနိုင်ငံတို့ပါဝင်ကြောင်း သိရပါသည်။ ထိုသဘောတူညီချက်သည် လတ်တလော အစိုးရ၏ ပထမဆုံး FTA ဖြစ်ကြောင်း သိရပါသည်။ ထိုင်းနိုင်ငံနှင့် EFTA နိုင်ငံများအကြား စီးပွားရေးဆက်နွယ်မှုအားကောင်းစေမည့်အပြင် FTA သည် အဆင့်မြင့်နည်းပညာနှင့် ဆန်းသစ် တီထွင်မှု၊ လူသားအရင်းမြစ်ဖွံ့ဖြိုးတိုးတက်မှု၊ အသေးစာအလတ်စားလုပ်ငန်းများကြေညာ မြင့်တင်မှုနှင့် စဉ်ဆက်မပြတ်ဖွံ့ဖြိုးတိုးတက်မှု အစရှိသည့် ဧရိယာများတွင် အနီးကပ်ပူးပေါင်း ဆောင်ရွက်မှုကို မြှင့်တင်ပေးနိုင်မည်ဟု သိရပါသည်။ Ms Paetongtarn ကအစိုးရသည် ကျန်ရှိ နေသေးသည့် ဥရောပသမဂ္ဂအဖွဲ့ဝင်နိုင်ငံများနှင့် ယခုနှစ်ကုန်တွင် FTA များလက်မှတ်ရေးထိုး နိုင်ရန် ကြိုးပမ်းသွားမည်ဖြစ်ကြောင်းပြောကြားခဲ့ပါသည်။ ထိုအစည်းအဝေးအတွင်း ဝန်ကြီးချုပ် သည် ဆီမီးကွန်ဒတ်တာလုပ်ငန်း၊ ဒေတာစင်တာများနှင့် အစိမ်းရောင်စွမ်းအင်ပါဝင်သည့် အနာဂတ်လုပ်ငန်းများတွင် ရင်းနှီးမြှုပ်နှံမှုအခွင့်အလမ်းများကို ပြည်ပရင်းနှီးမြှုပ်နှံသူများနှင့် တွေ့ဆုံဆွေးနွေးခဲ့ကြောင်း သိရပါသည်။ ထို့ပြင် ဝန်ကြီးချုပ်သည် အကယ်၍ ထိုကုမ္ပဏီများက ထိုင်းနိုင်ငံတွင်ထုတ်လုပ်သည့်စက်ရုံများတည်ထောင်ရန်ဆုံးဖြတ်ခဲ့ပါက ထိုင်းလုပ်သားများအား အဆင့်မြင့်နည်းပညာများကို ကျွမ်းကျင်မှုရှိစေရေးအတွက် ကူညီပေးရန် တောင်းဆိုခဲ့ကြောင်း သိရပါသည်။ ဘတ် ၁ ထရီလီယံတန်ကြေးရှိသည့် Land Bridge စီမံကိန်းနှင့် ပတ်သတ်၍ ဝန်ကြီးချုပ်က ဒူဘိုင်းတွင်အခြေစိုက်သည့် ကမ္ဘာ့ထိပ်တန်း ထောက်ပံ့ပို့ဆောင်ရေးကုမ္ပဏီကြီး ဖြစ်သည့် DP World သည် ထိုစီမံကိန်း၏ အဓိကရင်းနှီးမြှုပ်နှံသူဖြစ်လာမည်ဟု မျှော်လင့်ရ ကြောင်း ပြောကြားခဲ့ပါသည်။  အစိုးရပြောခွင့်ရပုဂ္ဂိုလ်၏ ပြောကြားချက်အရ Ms Paetongtarn သည် ၅၅ ကြိမ်မြောက် ကမ္ဘာ့စီးပွားရေးဖိုရမ်တွင် ကမ္ဘာ့ထိပ်တန်းလုပ်ငန်းများမှ ထိပ်တန်း အလုပ်အမှုဆောင်အဖွဲ့ဝင်များနှင့် တွေ့ဆုံခဲ့ကြောင်းပြောကြားခဲ့ပါသည်။ ထိုလုပ်ငန်းများထဲမှ တစ်ခု သည် DP World ၏ CEO ဖြစ်သူ Sultan Ahmed Bin Sulayem ဖြစ်ကြောင်း သိရပါ သည်။ DP World သည်လည်း အာဆီယံနှင့် ကမ္ဘာ့ကုန်သွယ်ရေးကွန်ယက်ကိုချိတ်ဆက်ပေးမည့် Land Bridge စီမံကိန်းတွင်ရင်းနှီးမြှုပ်နှံမှုအလားအလာရှာဖွေရန်နှင့် Inland Container Depot (ICD) တိုးချဲ့ရေးပါဝင်သည့် ထိုင်းနိုင်ငံ၏ထောက်ပံ့ပို့ဆောင်ရေးစွမ်းရည်မြှင့်တင်ပေးရန်အတွက် အားကောင်းသောစိတ်ဝင်စားမှုကို ပြသခဲ့ကြောင်း သိရပါသည်။ Ms Paetongtarn က WEF သည် ထိုင်းနိုင်ငံ၏ အလားအလားနှင့် အခွင့်အလမ်းများကို ကမ္ဘာ့အသိုက်အဝန်းသို့ ပြသနိုင်ရန် ပံ့ပိုးပေး နိုင်ခဲ့ကြောင်း ပြောကြားခဲ့ပါသည်။

DOCA(ရန်ကုန်)