ပြည်ပကုန်သွယ်မှုသတင်းများ

  ကမ္ဘောဒီးယားနိုင်ငံ၊ စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန (MAFF) သည် လယ်ယာထွက်ကုန်ဈေးကွက်များ ဖွင့်လှစ်ရေး၊ စားနပ်ရိက္ခာဖူလုံမှုခိုင်မာရေးနှင့် ကမ္ဘောဒီးယားနှင့် ဖိလစ်ပိုင်နိုင်ငံတို့အကြား လယ်ယာကုန်သွယ်မှု မြှင့်တင်ရေး အထူးသဖြင့် ကမ္ဘောဒီးယားနိုင်ငံမှ အရည်အသွေးမြင့် ဆန်မွှေးတင်ပို့မှု မြှင့်တင်ခြင်းဖြင့် ပူးပေါင်း ဆောင်ရွက်ရန် ဆန္ဒရှိကြောင်း ၉-၉-၂၀၂၅ ရက်နေ့ကထုတ်ဖော်ပြောကြားခဲ့သည်။ စိုက်ပျိုးရေး၊ သစ်တောနှင့် ရေလုပ်ငန်းဝန်ကြီး Dith Tina သည် ဖနွမ်းပင်တွင် ဖိလစ်ပိုင်သမ္မတနိုင်ငံ စိုက်ပျိုးရေးဝန်ကြီး Francisco P. Tiu Laurel Jr. နှင့် တွေ့ဆုံစဉ် ယင်းအမှာစကား ပြောကြားခဲ့ခြင်းဖြစ်သည်။ Laurel Jr. က စိုက်ပျိုးရေးဈေးကွက်များဖွင့်လှစ်ရေး၊ စားနပ်ရိက္ခာ ဖူလုံခိုင်မာရေးနှင့် ကမ္ဘောဒီးယားနှင့် ဖိလစ်ပိုင်နိုင်ငံကြား လယ်ယာကုန်သွယ်မှုမြှင့်တင်ရေး တို့တွင် ပူးပေါင်းဆောင်ရွက်မှုကို ကြိုဆိုကြောင်း ပြောကြားခဲ့ပြီး ကမ္ဘောဒီးယား လယ်ယာထွက် ကုန်များ တင်ပို့မှု အားကောင်းလာစေရန် အကောင်းမြင်ကြောင်း ပြောကြားခဲ့သည်။  MAFF ၏ ထုတ်ပြန်ချက်တွင် ကမ္ဘောဒီးယားနိုင်ငံသည် အရည်အသွေးမြင့် ဆန်နှင့် အရသာကောင်းမွန်သော သီးနှံအများအပြားကို စိုက်ပျိုးထုတ်လုပ်ကြောင်း ဖော်ပြထားသည်။ ဖိလစ်ပိုင် စိုက်ပျိုးရေး ဝန်ကြီးက ဆန်၊ ငါး၊ အသားနှင့် ဟင်းသီးဟင်းရွက်များ အပါအဝင် ၎င်း၏ လူဦးရေကို ထောက်ပံ့ပေးရန် ဖိလစ်ပိုင်၏ စိုက်ပျိုးရေးထွက်ကုန် လိုအပ်ချက် တိုးလာနေမှုကို ရှင်းလင်းပြောကြားခဲ့သည်။ နှစ်နိုင်ငံ ကိုယ်စားလှယ်အဖွဲ့များသည် ပူးပေါင်းဆောင်ရွက်မှု အားကောင်းစေရေး၊ စားနပ်ရိက္ခာဖူလုံရေး နှင့် နှစ်နိုင်ငံအကြား လယ်ယာကုန်သွယ်မှု မြှင့်တင်ရေး ကတိကဝတ်များကို ထပ်မံအတည်ပြုခဲ့ကြသည်။ ကုန်သွယ်ရေးမူဘောင်အတွင်း ကမ္ဘောဒီးယားနှင့် ဖိလစ်ပိုင်နှစ်နိုင်ငံလုံးသည် ကမ္ဘာ့ကုန်သွယ်ရေးအဖွဲ့ (WTO)၊ အာဆီယံနှင့် ဒေသတွင်း ဘက်စုံစီးပွားရေးပူးပေါင်းဆောင်ရွက်မှု (RCEP) ၏ အဖွဲ့ဝင်များဖြစ်ကြောင်း အလေးပေးပြောကြားခဲ့ပါသည်။ ဖိလစ်ပိုင်နိုင်ငံအနေဖြင့် ၎င်း၏ပြည်တွင်းဈေးကွက်သို့ ဖူလုံရန်အတွက် ဆန်စပါးလုပ်ငန်းနှင့် အခြားလယ်ယာထွက်ကုန်များ ရင်းနှီးမြုပ်နှံမှုဆိုင်ရာ အခွင့်အလမ်းများကို စူးစမ်းလေ့လာနိုင်မည်ဖြစ်ကြောင်း Tina  က ပြောကြားခဲ့သည်။

DOCA(ရန်ကုန်)

  Apsara National Authority (ANA) သည် Korea Heritage Agency (KHA) နှင့် ပူးပေါင်း၍ Siem Reap ပြည်နယ်ရှိ ခရီးသွားလုပ်ငန်း၏ အရည်အသွေးကို မြှင့်တင်ရန်အမျိုးသား အမွေအနှစ် ခရီးသွားလုပ်ငန်းဆိုင်ရာ သင်တန်းကို ဖွင့်လှစ်ခဲ့သည်။ ၂၀၂၅ ခုနှစ်၊ စက်တင်ဘာ ၈ ရက်မှ ၁၁ ရက်အထိ ကျင်းပသည့် အဆိုပါသင်တန်းသည် အမွေအနှစ် ခရီးသွားလုပ်ငန်း အားကောင်းလာစေရန် ရည်ရွယ်၍ အမွေအနှစ်ထိန်းသိမ်းခြင်းအလေ့အကျင့်များနှင့် ယဉ်ကျေးမှု အမွေအနှစ်များ ရေရှည်တည်တံ့သော ခရီးသွားထုတ်ကုန်အဖြစ် ဖွံ့ဖြိုးတိုးတက်လာစေရန် ရည်ရွယ်ကြောင်း ANA မှ ထုတ်ပြန်ချက်အရသိရသည်။ သင်တန်းဖွင့်ပွဲအခမ်းအနားကို ANA မှ ဒုတိယညွှန်ကြားရေးမှူးချုပ် Long Kosal၊ KHA ကိုယ်စားလှယ် Kim Hyunsung နှင့် အဖွဲ့အစည်းနှစ်ခုလုံးမှ ခေါင်းဆောင်များနှင့် ကျွမ်းကျင်သူများ တက်ရောက်ခဲ့ကြသည်။ အခမ်းအနားတွင် Kosal မှ သင်တန်းသားများအား ကိုရီးယား ပညာရှင်များထံမှ အဖိုးတန်သော အသိပညာများနှင့် ဗဟုသတများ ပေးစွမ်းနိုင်မည်ဖြစ်ပြီး အထူးသဖြင့် Angkor ဒေသရှိ အမွေအနှစ်များနှင့် လူမှုအသိုက်အဝန်းများ၏ တန်ဖိုးများကို တင်ဆက်ပေးသွားမည် ဖြစ်ကြောင်းနှင့် Siem Reap ပြည်နယ်တွင်ရှိသာ ခရီးသွားလုပ်ငန်းများ၏ စွမ်းဆောင်ရည်နှင့် အရည်အသွေးတို့ကို အားကောင်းစေမည် ဖြစ်ကြောင်းပြောကြားခဲ့သည်။ Korea Heritage Agency ကိုယ်စားပြု Kim Hyunsung က ခရီးသွားလုပ်ငန်းပုံစံသစ်များ ဖော်ဆောင်ရာတွင် ယဉ်ကျေးမှုအမွေအနှစ်များ ထိန်းသိမ်းစောင့်ရှောက်ရန်အတွက် Apsara National Authority နှင့် ပူးပေါင်းဆောင်ရွက်သည့်အတွက် ဝမ်းမြောက်မိကြောင်း ပြောကြားခဲ့သည်။ လေ့ကျင့်ရေး အစီအစဉ်တွင် အမွေအနှစ်အခြေခံ ခရီးသွားထုတ်ကုန်များ မြှင့်တင်ရန်နှင့် ကမ္ဘောဒီးယားသို့ ခရီးသွားများ ပိုမိုဆွဲဆောင်နိုင်ရန် ရည်ရွယ်၍ ပူးတွဲလည်ပတ်မှုများနှင့် တင်ဆက်မှုများ ပါဝင်ကြောင်း ၎င်းက ရှင်းပြသည်။

DOCA(ရန်ကုန်)

    ကမ္ဘောဒီးယားနိုင်ငံသည် ၂၀၂၅ ခုနှစ် ပထမ ၈ လတွင် ကမ္ဘာ့နိုင်ငံပေါင်း ၈၄ နိုင်ငံသို့ လယ်ယာထွက်ကုန် တန်ချိန် ၁၀.၄ သန်းခန့် တင်ပို့ခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၃၅.၆၄ ရာခိုင်နှုန်း တိုးလာပြီး ဝင်ငွေ ကန်ဒေါ်လာ ၃.၆၂၁  ဘီလီယံ ရရှိခဲ့ကြောင်း ကမ္ဘောဒီးယားနိုင်ငံ၊ စိုက်ပျိုးရေး၊ သစ်တောနှင့် ရေလုပ်ငန်း ဝန်ကြီးဌာန (MAFF) ၏ စိုက်ပျိုးရေး အထွေထွေ ဦးစီးဌာနမှ ၁၀-၉-၂၀၂၅ ရက်နေ့က ထုတ်ပြန်သည့် ၂၀၂၅ ခုနှစ် ပထမ (၈) လတာ ကာလအတွင်း သီးနှံတင်ပို့မှု အခြေအနေအစီရင်ခံစာတွင် ဖော်ပြထားသည်။ National Phytosanitary Database တွင် မှတ်တမ်းတင်ထားသော စုစုပေါင်း တင်ပို့မှုမှာ ဆန်မဟုတ်သော သီးနှံတန်ချိန် ၅ သန်းနှင့် စပါးတန်ချိန် ၅.၃ သန်း (စပါးတန်ချိန် ၄.၈၅ သန်းနှင့် ဆန်တန်ချိန် ၄၉၃,၀၀၀ ခန့်) တင်ပို့နိုင်ခဲ့ပြီး ၂၀၂၄ ခုနှစ်ကာလတူထက် ဆန်တန်ချိန် ၈၄ ရာခိုင်နှုန်းအထိ ပိုမိုတင်ပို့နိုင်ခဲ့သည်။ MAFF စိုက်ပျိုးရေးဦးစီးဌာန လက်ထောက်ညွှန်ကြားရေးမှူးချုပ် Mak Seoun က ၂၀၂၅ ခုနှစ် ပထမ (၈) လအတွင်း ကမ္ဘောဒီးယားနိုင်ငံသည် ဆန်အပြင် အဓိကလယ်ယာထွက်ကုန်များစွာ တင်ပို့ခဲ့ကြောင်း အစီရင်ခံစာတွင် အလေးပေးဖော်ပြခဲ့သည်။

   ပီလောပီနံစိမ်း တန်ချိန် ၁.၉၅ သန်း၊ ပီလောပီနံခြောက် တန်ချိန် ၁.၃၆ သန်း၊ သီဟိုဠ်စေ့ တန်ချိန် ၆၁၈,၀၀၀ နီးပါး၊ သရက်သီးအချို တန်ချိန် ၁၈၄၀၀၀ ကျော်၊ ငှက်ပျောသီး အချို တန်ချိန် ၂၁၁,၀၀၀ နီးပါး၊ ပြောင်းဖူး တန်ချိန် ၁၄,၀၂ဝ ကျော်နှင့် အခြားသီးနှံထွက်ကုန် ၉၁ မျိုး စုစုပေါင်း တန်ချိန် ၅၅၃,၀၀၀ ကျော်တင်ပို့ခဲ့ပြီး စုစုပေါင်းဝင်ငွေက ဒေါ်လာ ၃.၆၂ ဘီလီယံ နီးပါးရရှိခဲ့ကြောင်း Mak Seoun က ပြောကြားခဲ့သည်။  စုစုပေါင်းပို့ကုန် ၃၅.၆၄ ရာခိုင်နှုန်း မြင့်တက်ခဲ့သော်လည်း အချို့သော ကုန်ပစ္စည်းများမှာ စံချိန်တင် ကျဆင်းခဲ့ကြောင်း Mak Seoun က  ဆက်လက်ပြောကြားခဲ့သည်။

DOCA(ရန်ကုန်)

  ကမ္ဘောဒီးယားနိုင်ငံသည် ၂၀၂၅ ခုနှစ် ပထမ (၈)လတွင် ကန်ဒေါ်လာ ၂၀.၁၈ ဘီလီယံ တန်ဖိုးရှိကုန်ပစ္စည်းများ တင်ပို့ခဲ့ပြီး ၂၀၂၄ ခုနှစ် အလားတူကာလ ကန်ဒေါ်လာ ၁၇.၅၈ ဘီလီယံမှ ၁၄.၈ ရာခိုင်နှုန်း တိုးလာသည်ဟု ၁၀-၉-၂၀၂၅ ရက်နေ့တွင် ထုတ်ပြန်ခဲ့သော တရားဝင် အစီရင်ခံစာတွင် ဖော်ပြထားသည်။ အဓိကတင်ပို့သည့် ကုန်စည်များတွင် အဝတ်အထည်၊ ဖိနပ်၊ ခရီးသွားကုန်စည်၊ စက်ဘီး၊ ကားတာယာ၊ ဆန်၊ ရော်ဘာ၊ ပီလောပီနံ၊ သီဟိုဠ်စေ့၊ ငှက်ပျောသီးနှင့် သရက်သီးစသည်တို့ပါဝင်ကြောင်း အကောက်ခွန်နှင့် ကုန်စည် စီးဆင်းမှုဦးစီးဌာနမှ ပြုစုထားသော အစီရင်ခံစာအရ သိရသည်။ နိုင်ငံတော်သည် ယခုနှစ် ဇန်နဝါရီမှ သြဂုတ်လအတွင်း စုစုပေါင်းသွင်းကုန် ဒေါ်လာ ၂၁.၉၆ ဘီလီယံကို မှတ်တမ်းတင်ခဲ့ပြီး ယမန်နှစ် အလားတူကာလထက် ကန်ဒေါ်လာ ၁၈.၉ ဘီလီယံမှ ၁၆.၂ ရာခိုင်နှုန်း တိုးလာသည်ဟု အစီရင်ခံစာတွင် ဖော်ပြထားသည်။ အဓိက တင်သွင်းသည့် ကုန်ပစ္စည်းများမှာ ရေနံနှင့် သဘာဝဓာတ်ငွေ့၊ အထည်ချုပ်၊ ဖိနပ်နှင့် ခရီးသွား ကုန်စည်အတွက် ကုန်ကြမ်းများ၊ မော်တော်ယာဉ်များ၊ စက်ယန္တရားများ၊ လျှပ်စစ်စ္စည်း အသုံးအဆောင်များ၊ ဆေးဝါးပစ္စည်းများနှင့် လူသုံးကုန်ပစ္စည်းများ စသည်တို့ ပါဝင်သည်။ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ နိုင်ငံခြားရေး ၀န်ကြီးနှင့် ပြောရေးဆိုခွင့်ရှိသူ Penn Sovicheat က ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု သဘောတူညီချက်နှင့် ကမ္ဘောဒီးယား-တရုတ် လွတ်လပ်သော ကုန်သွယ်မှုသဘောတူညီချက်သည် နိုင်ငံတော်၏ ကုန်သွယ်မှု တိုးတက်မှုကို မြှင့်တင်ပေးကြောင်း ပြောကြားခဲ့သည်။ 

DOCA(ရန်ကုန်)

        ဥရောပကော်မရှင်သည် စက်တင်လာလ ၃ ရက်နေ့တွင် ဥရောပသမဂ္ဂ၏ ကမ္ဘာလုံး ဆိုင်ရာ ကုန်သွယ်မှုကွန်ရက်ကို ချဲ့ထွင်ရန်ရည်ရွယ်ပြီး အတည်ပြုချက်ရရှိရန် အဓိက ကုန်သွယ်မှုသဘောတူညီချက်နှစ်ခုကို အဆိုပြုခဲ့ကြောင်း သိရသည်။ EU-Mercosur Partnership Agreement (EMPA) နှင့် EU-Mexico Modernized Global Agreement (MGA) တို့သည် ကုန်သွယ်မှုဆက်ဆံရေးကို ကွဲပြားစေရန်၊ အခွန်အခများ လျှော့ချရန်နှင့် ဥရောပစီးပွားရေး လုပ်ငန်းများအတွက် အခွင့်အလမ်းသစ်များ ဖန်တီးရန် ရည်ရွယ်ထားကြောင်း ကော်မရှင်က ထုတ်ပြန်ခဲ့သည်။ ကော်မရှင်၏ခန့်မှန်းချက်အရ EMPA သည် ဥရောပတစ်ဝှမ်းရှိ အလုပ်အကိုင်ပေါင်း ၄၄၀,၀၀၀ ကျော်ကို ပံ့ပိုးပေးသည့် ယူရို ၄၉ ဘီလီယံ (အမေရိကန်ဒေါ်လာ ၅၇ ဘီလီယံခန့်) အထိ Mercosur သို့ အီးယူနှစ်စဉ်တင်ပို့မှုကို တိုးမြှင့်နိုင်သည်။ အဆိုပါသဘော တူညီချက်တွင် ကားများ၊ စက်ယန္တရားများ၊ ဆေးဝါးများ၊ ဝိုင်၊ ချောကလက်နှင့် သံလွင်ဆီ အပါအဝင် အဓိကစက်မှုလုပ်ငန်းနှင့် စိုက်ပျိုးရေးထွက်ကုန်များအပေါ် အခွန်လျှော့ချမည်ဖြစ်သည်။ အဆိုပါ သဘောတူညီချက်များသည် အသက်မဝင်မီ ဥရောပပါလီမန်နှင့် EU အဖွဲ့ဝင်နိုင်ငံများ၏ အတည်ပြုချက် လိုအပ်သည်။ EU ကုန်သွယ်ရေး ကော်မရှင်နာ Maros Sefcovic က ကော်မရှင်သည် ယခုနှစ်ကုန်တွင် အတည်ပြုချက်လုပ်ငန်းစဉ်ကို အပြီးသတ်ရန် မျှော်လင့်ထားကြောင်း သတင်းစာရှင်းလင်းပွဲတွင် ပြောကြားခဲ့သည်။ Sefcovic က အဆိုပါသဘောတူညီချက်များသည် EU ကုမ္ပဏီများ၏ ယှဉ်ပြိုင်နိုင်စွမ်းကို မြှင့်တင်ပေးပြီး လက်တင်အမေရိကတွင် ပထမဆုံးသော အားသာချက်ကို ပေးဆောင်မည့် မဟာဗျူဟာမြောက် အုတ်မြစ်အဖြစ် ဖော်ပြခဲ့သည်။ Mercosur သဘောတူညီချက်သည် စိုက်ပျိုးရေး ရေရှည်တည်တံ့မှုကို ခြိမ်းခြောက်ပြီး EU ၏ အစိမ်းရောင်နှင့် အစားအစာ ဘေးကင်းရေးစံနှုန်းများကို ပျက်ပြားစေသည်ဟု ဥရောပလယ်သမားများထံမှ ပြင်းပြင်းထန်ထန် ဝေဖန်မှုများ ထွက်ပေါ်လာခဲ့သည်။ Farm Europe ဥက္ကဌ Yves Madre က သဘောတူညီချက်သည် အထူးသဖြင့် ၎င်း၏ စိုက်ပျိုးရေးကဏ္ဍတွင် မပြောင်းလဲဘဲ ဆက်လက်တည်ရှိနေသည်ဟု ဥရောပတောင်သူလယ်သမားသမဂ္ဂ COPA-COGECA က လယ်သမားများ၊ ကျေးလက်ဒေသခံများနှင့် စားသုံးသူများအတွက် စီးပွားရေးအရနှင့် နိုင်ငံရေးအရ ထိခိုက်စေသည်ဟု ပြောကြားခဲ့သည်။ လယ်သမားများသည် စာချုပ်ကို ဆန့်ကျင်ရန် မကြာသေးမီနှစ်များအတွင်း ဥရောပမြို့အများအပြားတွင် ဆန္ဒပြပွဲများ ပြုလုပ်ခဲ့ကြသည်။ စိုက်ပျိုးရေးနှင့် စားနပ်ရိက္ခာဆိုင်ရာ ဥရောပကော်မရှင်နာ Christophe Hansen က အဆိုပါ သဘောတူညီချက်သည် သွင်းကုန်များကို ကန့်သတ်ခြင်းနှင့် အရေးကြီးထုတ်ကုန်များအတွက် ခွဲတမ်းများကို နှစ်ပေါင်းများစွာ ဆိုင်းငံ့ထားခြင်းဖြင့် EU လယ်သမားများ၏ အကျိုးစီးပွားကို ကာကွယ်နိုင်မည်ဖြစ်ကြောင်း ပြောကြားခဲ့သည်ဟု သိရှိရပါသည်။

Source : Xinhua

DOCA(ရန်ကုန်)