ဖြေရှင်းဆောင်ရွက်ပေးမှုများ

      ရန်ကုန်တိုင်းဒေသကြီး၊ ရန်ကင်းမြို့နယ်နေ တိုင်ကြား သူတစ်ဦးသည် စားသောက်ဆိုင် တစ်ဆိုင်တွင် သွားရောက် စားသောက်ခဲ့ရာ ၎င်း၏မော်တော်ယာဉ်အား ပါကင်ထိုးပေး ရန် စားသောက်ဆိုင်မှဝန်ထမ်းကို ကားသော့ပေး၍အပ်ခဲ့ပါ ကြောင်း၊ ည(၉း၅၀) အချိန်၌ ၎င်း၏ မော်တော်ယာဉ်ကို ပြန်လည်ယူဆောင်ပြီး ဆိုင်မှထွက်ခွာလာကြောင်း၊ နောက်နေ့တွင် မော်တော်ယာဉ်၏ နောက်မီးခွက် (ညာဘက်)တွင် ကွဲအက်နေကြောင်းတွေ့ရှိရသည့်အတွက် စားသောက်ဆိုင်သို့ သွားရောက်၍  CCTV ကို ကြည့်ရှုစစ်ဆေးခဲ့ရာ ဆိုင်သို့လာရောက်စဉ်တွင် ကားမီးခွက်တွင် ကွဲအက်ခြင်းမရှိဘဲ ဆိုင်မှထွက် လာမှသာ ကားမီးခွက်ကွဲအက်နေသည်ကို တွေ့ရှိရသောကြောင့် စားသောက်ဆိုင်မှ တာဝန်ရှိသူများ ထံ အကြောင်းကြားဆောင်ရွက်ခဲ့ရာ  နှစ်ဦးနှစ်ဖက် ပြေလည်မှုမရရှိသဖြင့် စားသုံးသူရေးရာဦးစီးဌာန သို့ ဆက်သွယ်တိုင်ကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ စားသုံးသူရေးရာဦးစီးဌာနမှ တာဝန် ရှိသူများက တိုင်ကြားသူနှင့် တိုင်ကြားခံရသည့် စားသောက်ဆိုင်မှ တာဝန်ရှိသူတို့အား ဌာနသို့ ခေါ်ယူတွေ့ဆုံ၍ ညှိနှိုင်းဆောင်ရွက်ပေးမှုအရ  စားသောက်ဆိုင်မှ တာဝန်ရှိသူက တိုင်ကြားသူအား ငွေကျပ် ၁,၂၅၀,၀၀၀/-ကို ဌာနမှတာဝန်ရှိသူများရှေ့မှောက်၌ ပေးလျော်ခဲ့ပြီး တိုင်ကြားသူမှလည်း ၎င်း၏ Facebook စာမျက်နှာတွင် တင်ထားသည့် စားသောက်ဆိုင်နှင့် စပ်လျဉ်းသည့် Post များအား ဖျက်သိမ်းပေးခဲ့သည့်အတွက် နှစ်ဦးနှစ်ဖက်ပြေလည်မှုရရှိသောကြောင့် ညှိနှိုင်းဖြေရှင်းပေးခြင်းဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

      ရန်ကုန်တိုင်းဒေသကြီးနေ တိုင်ကြားသူတစ်ဦးသည် Express လိုင်းတစ်ခုဖြင့် ၁-၁-၂၀၂၆ ရက်နေ့တွင် ရန်ကုန်-ညောင်ဦး ခရီးစဉ်သွား ရောက်ခဲ့ရာ ရန်ကုန်မှအထွက်ဂိတ် တွင် ဝန်ပိုနေသည်ဟုဆိုကာ မိမိအပါအဝင် ခရီးသည် (၁၁) ဦးအား ထိုင်ခုံမပါသည့် မီးသွေးတင်ကားပေါ်တွင် (၁)နာရီ ကျော်စီးခိုင်းခဲ့မှုအပါ် တစ်စုံတစ်ရာ ပြန်လည်ဖြေရှင်းပေးမှုမရှိခြင်းနှင့် အခြားဝန်ဆောင်မှုများ အဆင် မပြေခြင်းတို့ကြောင့် စားသုံးသူရေးရာဦးစီးဌာနသို့ ၁၂-၁-၂၀၂၆ ရက်နေ့တွင် စာဖြင့်ဆက်သွယ် တိုင်ကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက အောင်မင်္ဂ လာ ကားဝင်းရှိ YRTC ရုံးခန်း၌ ယာဉ်ကြီးကြပ်ရေးမှ ဒုတိယဌာနမှူးနှင့် Express တာဝန်ခံတို့အား ခေါ်ယူတွေ့ဆုံဆွေးနွေးခဲ့ရာ ယခင်က ၎င်းတို့ မော်တော်ယာဉ်ဂိတ်တွင် ချိန်တွယ်သည့်ကတ္တား မရှိ သောကြောင့် တစ်ခါတစ်ရံ ခရီးသည်နှင့်ကုန်တင်သည့်အခါ တန်ချိန်ပိုနေသည့်အတွက် အခြားကား ပေါ်ပြောင်းစီးပေးရန် မေတ္တာရပ်ခံခဲ့ခြင်းမျိုးသာရှိခဲ့ပါကြောင်း၊ ၁၅-၁-၂၀၂၆ ရက်နေ့မှစ၍ ခရီးသည် နှင့်ကုန်စည်များပါချိန်တွယ်၍ စတင်ပြေးဆွဲနေသည့်အတွက် တန်ချိန်ပိုသည့်ဖြစ်စဉ်မျိုး ထပ်မံဖြစ်ပွား ခြင်းမရှိတော့ပါကြောင်း တိုင်ကြားသူထံ ရှင်းလင်းပြောကြားခဲ့ပြီး တိုင်ကြားသူနစ်နာမှုအတွက် လက်မှတ်(၂)စောင်ဖိုး ငွေကျပ် ၅၆,၀၀၀/- အား Kpay ဖြင့် တိုင်ကြားသူထံ လွှဲပြောင်းပေးခဲ့သဖြင့် ညှိနှိုင်းဖြေရှင်းပေးမှုကို တိုင်ကြားသူမှလည်း ကျေနပ်မှုရှိပါသောကြောင့် တိုင်ကြားမှုကို ပိတ်သိမ်း ဆောင်ရွက်ခဲ့ပါသည်။

           ရန်ကုန်တိုင်းဒေသကြီး၊ စမ်းချောင်းမြို့နယ်၊ ပန်းလှိုင်လမ်း၌ ဖွင့်လှစ်ထားသော Active Bar Restaurant သို့ (၂၈.၁၀.၂၀၂၅) ရက်နေ့တွင် သွားရောက်စားသောက်ခဲ့ရာမှ မော်တော်ကား၏ ညာဖက် နောက်မီးခွက်ကွဲအက်သွားမှုနှင့် စပ်လျဉ်းသည့် ကိစ္စအား (၅.၁၁.၂၀၂၅) နေ့တွင် စားသုံးသူရေးရာဦးစီးဌာန၊ ရန်ကုန်တိုင်း‌ဒေသကြီးဦးစီးမှူးရုံးသို့ လာရောက်တိုင်ကြားခဲ့ပါသည်။

          ဖြစ်စဉ်မှာ ရန်ကင်းမြို့နယ်နေ ဦးဒန်ခုန်လမှ ၎င်းပိုင်မော်တော်ယာဉ် 5G/8229 Landcruiser (အဖြူရောင်) ဖြင့် (၂၈.၁၀.၂၀၂၅) ရက်နေ့ ညနေပိုင်အချိန်၌ စမ်းချောင်းမြို့နယ်၊ ပန်းလှိုင်လမ်း၌ ဖွင့်လှစ်ထားသော Active Bar Restaurant သို့ သွားရောက်ခဲ့ပြီး ကားပါကင်ထိုးရန်အတွက် ၎င်းဆိုင်မှ ဝန်ထမ်းတစ်ဦးအား ကားသော့ပေးအပ်ခဲ့ပြီး ဆိုင်တွင်စားသောက်ပြီးနောက် ည (၀၉:၅၀) နာရီအချိန်တွင် ၎င်း၏ မော်တော်ယာဉ်အား ပြန်လည်ယူဆောင်၍ ထွက်ခွာလာခဲ့ကြောင်း၊ (၃.၁၁.၂၀၂၅) ရက်နေ့ ညနေပိုင်း၌ ၎င်း၏ မော်တော်ယာဉ်ညာဖက် နောက်မီးခွက် အက်ကွဲနေသည်ကို တွေ့ရှိရ၍ ဆိုင်သို့ ဆက်သွယ်ပြောဆိုပြီး ဆိုင်မှ CCTV အား (၄.၁၁.၂၀၂၅) ရက်နေ့ နေ့လယ် (၁၃:၀၀) နာရီအချိန် တွင် သွားရောက်ကြည်ရှုခဲ့ရာ ဆိုင်သို့ဝင်ရောက်စဉ် ကားမီးခွက်အက်ကွဲခြင်းမရှိဘဲ ဆိုင်မှထွက်လာမှသာ ကားမီးခွက်အက်ကွဲနေသည်ကို သိရှိရ၍ ဆိုင်မှတာဝန်ယူ ဖြေရှင်းပေးရန် ပြောကြားခဲ့သော်လည်း ဖြေရှင်းဆောင်ရွက်ပေးခြင်း မရှိသောကြောင့် (၅.၁၁.၂၀၂၅) ရက်နေ့တွင် စားသုံးသူရေးရာဦးစီးဌာနသို့ လာရောက်၍ ဖြေရှင်းပေးပါရန် တိုင်ကြားလာခဲ့ခြင်း ဖြစ်ပါသည်။

          တိုင်းကြားမှုနှင့် စပ်လျဉ်း၍ စားသုံးသူရေးရာဦးစီးဌာန၊ တာဝန်ရှိသူများမှ Active Bar မှ တာဝန်ရှိသူများအား တိုင်ကြားသူနှင့် ဆက်သွယ်၍ အမြန်ဆုံးဖြေရှင်းဆောင်ရွက်ပါရန်နှင့်  ဖြေရှင်းပြီးစီးမှုအခြေနေအား ဌာနသို့ ပြန်လည်တင်ပြရန် အကြောင်းကြားခဲ့သော်လည်း ပြေလည်မှု မရရှိသောကြောင့် ၁၅.၁.၂၀၂၆ ရက်နေ့တွင် တိုင်ကြားသူနှင့် တိုင်ကြားခံရသူ နှစ်ဦးနှစ်ဖက်လုံးအား ဌာနသို့ လာရောက်ရန် ခေါ်ယူ၍ တွေ့ဆုံညှိ့နှိုင်းမှုများ ဆောင်ရွက်ပေးခဲ့ပါသည်၊ ထိုသို့ညှိ့နှိုင်း ဆောင်ရွက်ပေးမှုအရ (၂၃.၁.၂၀၂၆) ရက်နေ့၌ စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံးမှ တာဝန်ရှိသူများ၏ ရှေ့မှောက်မှာပင် Active Bar မှ တာဝန်ရှိသူ ဦးဆန်းဌေးကိုယ်တိုင် တိုင်ကြားသူ ဦးဒန်ခုန်လအား လျော်ကြေးငွေ (၁၂၅၀၀၀၀) ကျပ်အား ပေးအပ်ခဲ့ပြီး တိုင်ကြားသူ ဦးဒန်ခုန်လအား ၎င်း၏ Facebook စာမျက်နှာတွင် ဖော်ပြခဲ့သည့် Active Bar နှင့် ပတ်သက်သည့် Post အား ဖျက်ပေးခဲ့၍ နှစ်ဦးနှစ်ဖက် ပြေလည်မှုရရှိသွားကြောင်း သိရှိရပါသည်။

DOCA (ရန်ကုန်)

       မန္တလေးတိုင်းဒေသကြီး၊ ပြည်ကြီးတံခွန်မြို့နယ် နေတိုင်ကြားသူတစ်ဦးသည် ကုမ္ပဏီတစ်ခုထံမှ တန်ဖိုးငွေ ကျပ်(၅၃)သိန်း၊ ပစ္စည်းအလဲ (၃)နှစ်နှင့် လက်ခမဲ့ (၂)နှစ် အာမခံဖြင့် ဆိုလာတပ်ဆင်ခဲ့ရာ Error  မကြာခဏဖြစ်ပြီး Error  တစ်ကြိမ် ပြင်ဆင်ပေးရန် တစ်လအနည်းဆုံးကြာ ပါကြောင်း၊ လာရောက်ပြင်ဆင်ပေးရန် ကုမ္ပဏီသို့ ဆက်သွယ်ပြောကြားရာတွင် ပစ္စည်းမရှိ၊ ပစ္စည်း ပြတ်နေသည်ဟုပြောကာ ဆောင်ရွက်ပေးမှုမရှိသည့်အတွက်   စားသုံးသူရေးရာဦးစီးဌာနသို့ Call Center (1535)မှ ခေါ်ဆိုတိုင်ကြားလာပါသည်။

          ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက  စိစစ်ရာ တွင် တိုင်ကြားခံရသည့် စီးပွားရေးလုပ်ငန်းရှင်သည် ရန်ကုန်တိုင်းဒေသကြီးတွင် တည်ရှိသည့်အတွက် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးနှင့် ချိတ်ဆက်၍ ဖြေရှင်းဆောင်ရွက် ခဲ့ခြင်း၊ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ စီးပွားရေးလုပ်ငန်းရှင်နှင့် ဆက်သွယ်ညှိနှိုင်းမှုများ အကြိမ်ကြိမ်ပြုလုပ်ပေးခြင်းဖြင့် တိုင်ကြားသူ တောင်းဆိုခဲ့သည့်အတိုင်း   ဘက္ထရီ Error ဖြစ်ပေါ်မှုအပေါ် လုပ်ငန်းရှင်မှ တိုင်ကြားသူသို့  ငွေကျပ်သိန်း(၂၀)အား ပေးလျော်ခဲ့ပြီး တိုင်ကြားသူမှလည်း Error ဖြစ်ပေါ်နေသည့်ဘက္ထရီအား ကုမ္ပဏီသို့ ပြန်လည်ပေးအပ်ခဲ့ပြီး နှစ်ဦး နှစ်ဖက် ကျေနပ်မှုရှိသဖြင့် တိုင်ကြားမှုကို စားသုံးသူကာကွယ်ရေးဥပဒေအရ  ညှိနှိုင်းဖြေရှင်းပေးခြင်း နည်းလမ်းဖြင့် နစ်နာဆုံးရှုံးမှုနှင့်အညီ ငွေပြန်လည်ပေးအပ်စေခဲ့ပြီး ဖြေရှင်းဆောင်ရွက်ခဲ့ပါသည်။

   ပဲခူးတိုင်းဒေသကြီး၊ ပေါင်းတည်မြို့နယ်နေ တိုင်ကြားသူ တစ်ဦးသည် Online Shop  တစ်ခုထံမှ ဆိုလာစလိုက်(350W) ၃လုံးကို ပစ္စည်းရောက်ငွေချေစနစ်ဖြင့်  ဝယ်ယူခဲ့ရာ ပစ္စည်းပို့ပေး ရောက် ရှိလာသည့်အချိန်တွင် ဆိုလာစလိုက် 350 W အစား  50 W  ကိုပေးပို့လာသည့်အတွက်  စားသုံးသူရေးရာဦးစီးဌာနသို့ စာဖြင့် ပေးပို့ တိုင်ကြားလာပါသည်။

   ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက  Online Shop အကောင့်ပိုင်ရှင်ထံ ဆက်သွယ်၍ ညှိနှိုင်းဆောင်ရွက်ပေးခဲ့ရာ ဝယ်ယူသူထံသို့ ပစ္စည်းမှားပို့ခဲ့ သည့် ဆိုလာဆလိုက်(50 W)အစား (1500 W)ရှိ ဆိုလာဆလိုက်ကို အစားထိုး ပြန်လည် ပေးပို့ခဲ့သဖြင့် တိုင်ကြားသူမှကျေနပ်မှုရှိပါသောကြောင့် တိုင်ကြားမှုကို စားသုံးသူကာကွယ်ရေးဥပဒေအရ  စေ့စပ် ညှိနှိုင်းပေးသဖြင့် အစားထိုးပြန်လည်ပေးအပ်ခြင်းဖြင့် ဖြေရှင်းဆောင်ရွက်ခဲ့ပါသည်။