ဖြေရှင်းဆောင်ရွက်ပေးမှုများ

     မန္တလေးတိုင်းဒေသကြီး၊ ချမ်းမြသာစည်မြို့နယ်နေ တိုင်ကြားသူတစ်ဦးသည် အင်တာနက်ကုမ္ပဏီတစ်ခုထံမှ ISP Service Wifi ကို လစဉ်ကြေး(၃)လလျှင် ၁၀၀,၀၀၀/-ဖြင့် ၁၂-၁၂ -၂၀၂၃ ရက်နေ့မှ စ၍သုံးစွဲခဲ့ပြီး ၂၀၂၄ ခုနှစ်၊ ဇူလိုင်လကုန်ပိုင်းတွင် သက်တမ်းတိုးခဲ့သော်လည်း ဩဂုတ်လအတွင်း လိုင်းများမကြာခဏပြတ်တောက်နေသည့်အတွက် ဆက်လက်သုံးစွဲလိုခြင်းမရှိသောကြောင့် သက်တမ်းတိုးခဲ့သည့် (၂)လစာ လက်ကျန်သက်တမ်းများအတွက် Refund ပြန်လည်တောင်းဆိုရာတွင် ဆောင်ရွက်ပေးမှုမရှိသဖြင့် စားသုံးသူရေးရာဦးစီးဌာနသို့ ဆက်သွယ်တိုင်ကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ မန္တလေးတိုင်းဒေသကြီးဦးစီးမှူးရုံးမှ တာဝန်ရှိသူများက အင်တာနက်ကုမ္ပဏီမှ  တာဝန်ရှိသူများထံ အကြောင်းကြားဆောင်ရွက်ခဲ့ရာ အင်တာနက်ကုမ္ပဏီမှ တာဝန်ရှိသူများက တိုင်ကြားသူထံ ဆက်သွယ်မေးမြန်း၍ ဆက်လက်သုံးစွဲလို ခြင်းမရှိပါက Policy မရှိသော်လည်း အဆင်ပြေစေရန်အတွက် Refund ပြန်လည်ပေးမည်ဖြစ်ပါကြောင်း၊ ဆက်လက်သုံးစွဲမည်ဆိုပါက စက်ပျက်ခဲ့သည့် ရက်များအား (၁၅) ရက်အစားထိုးပေးမည် ဖြစ်ပါကြောင်း ညှိနှိုင်းပေးခဲ့ပါသည်။ တိုင်ကြားသူ၏ ဆန္ဒနှင့် ဆုံးဖြတ်ချက်အရ လက်ရှိဝယ်ယူ အသုံးပြုနေသော အင်တာနက် ဝန်ဆောင်မှုအား ဆက်လက်အသုံးပြုမည်ဖြစ်သောကြောင့် ကုမ္ပဏီဘက်မှလည်း အင်တာနက်လိုင်းဆွဲအား တိကျမှန်ကန်စေရန် လိုအပ်သောပြုပြင်ခြင်းများနှင့် ပေးသွင်းထားသည့် ဝန်ဆောင်မှုကုန်ဆုံးမည့်နေ့ရက်အပြင် (၁၅)ရက်တိတိ ထပ်မံဝန်ဆောင်မှု ပေးသွားမည်ဖြစ်ပါကြောင်း နှစ်ဦးနှစ်ဖက် သဘောတူညီချက်ဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

   ၂၀၂၄-၂၀၂၅ ဘဏ္ဍာနှစ်၊ ပထမခြောက်လပတ်(ဧပြီလမှစက်တင်ဘာလ)အတွင်း စားသုံးသူ‌ရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ Website Complain System မှတဆင့် တိုင်ကြား လာမှု(၉)မှုနှင့် Consumer Call Center မှတဆင့် တိုင်ကြားလာမှု(၃)မှု၊ စုစုပေါင်းတိုင်ကြားလာမှု (၁၂)မှုရှိပြီး တိုင်ကြားမှုများမှာ အီလက်ထရောနစ်ကူးသန်းရောင်းဝယ်ရေးဝန်ဆောင်မှုဖြင့် တိုင်ကြား လာမှု(၅)မှု၊ ဆက်သွယ်ရေးဝန်ဆောင်မှုနှင့် ပတ်သက်၍ တိုင်ကြားလာမှု(၃)မှု၊ ပို့ဆောင်ရေးဝန် ဆောင်မှုဖြင့်တိုင်ကြားလာမှု(၁)မှု၊ ငွေကြေးဝန်ဆောင်မှုဖြင့် တိုင်ကြားလာမှု(၂)မှု၊ ရောင်းချပြီးနောက် ဝန်ဆောင်မှုပေးအပ်ခြင်းဖြင့် တိုင်ကြားလာမှု(၁)မှုတို့ဖြစ်ပါသည်။ အဆိုပါတိုင်ကြားလာမှုများကို မိမိတို့ဌာနမှ စစ်ဆေးရေးအရာရှိက စားသုံးသူကာကွယ်ရေးဥပဒေနှင့်အညီ တိုင်ကြားလာသည့် ဆက်သွယ်ရေးကုမ္ပဏီများ၊ အီလက်ထ‌ရောနစ်ပစ္စည်းအရောင်းစင်တာ၊ ဖက်ရှင်စတိုးဆိုင်၊ ကားဂိတ်များထံသို့ ဆက်သွယ်အကြောင်းကြား ဖြေရှင်းဆောင်ရွက်ပေးခဲ့ရာ(၁၁)မှုမှာ ဖြေရှင်းဆောင်ရွက်ပေးနိုင်ခဲ့ပြီး (၁)မှုမှာ တိုင်ကြားခံရသူလုပ်ငန်းရှင်သည် အခြားတိုင်းဒေသကြီးမှ ဖြစ်သဖြင့် မိမိတို့စားသုံးသူရေးရာဦးစီးဌာန အချင်းချင်း ချိတ်ဆက်ညှိနှိုင်းဖြေရှင်း ဆောင်ရွက်နေဆဲဖြစ်ပါကြောင်း သိရှိရပါသည်။

DOCA(ပြည်ထောင်စုနယ်မြေ)

    ရန်ကုန်တိုင်းဒေသကြီးနေ တိုင်ကြားသူတစ်ဦးမှ ဆက်သွယ်ရေးကုမ္ပဏီတစ်ခု၏ ဝန်ဆောင်မှုနှင့်ပတ်သက်၍  မိမိရယူထားခြင်းမရှိသော ဝန်ဆောင်မှုအတွက် ဖုန်းဘေလ်များဖြတ်တောက်ခံနေရသောကြောင့်  စားသုံးသူရေးရာဦးစီးဌာန၏ Website Complaint System မှတစ်ဆင့် ဆက်သွယ်တိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက ဆက်သွယ်ရေးကုမ္ပဏီထံသို့ အကြောင်းကြားဆောင်ရွက်ခဲ့ရာ  ဆက်သွယ်ရေးကုမ္ပဏီမှ တာဝန်ရှိသူများက  တိုင်ကြားသူ၏ ဖုန်းနံပါတ် (၀၉-xxxxxxxxx) ထံ အကြိမ်ကြိမ်ခေါ်ဆိုခဲ့သော်လည်း ဖုန်းလက်ခံဖြေကြားခြင်းမရှိသဖြင့် ၎င်း၏ ဖုန်းနံပါတ်အား စစ်ဆေးခဲ့ရာ ဖုန်းဘေလ်ဖြတ်တောက်ခံရသည်ဟု ယူဆရသော ဝန်ဆောင်မှုများမှာ ဖုန်းဘေလ်ဖြတ်တောက်ခြင်းမရှိဘဲ သာမန်ဖုန်းသုံးစွဲမှုဖြင့်သာ ဘေလ် ဖြတ်တောက်ထားသည်ကို တွေ့ရှိပါကြောင်း၊ ထပ်မံ၍ တိုင်ကြားသူ၏ ဖုန်းနံပါတ် (၀၉-xxxxxxxxx) အား စစ်ဆေးမှုများပြုလုပ်ခဲ့ရာ ဝန်ဆောင်မှုတစ်ခုမှ ဖုန်းဘေလ်ဖြတ်တောက်ထားသည်ကို တွေ့ရှိခဲ့ရသဖြင့် ဖြတ်တောက်ထားသော ဖုန်းဘေလ်များကို ပြန်လည်ဖြည့်တင်းပေးခဲ့ပြီး ၎င်းဝန်ဆောင်မှုကိုလည်း ဖျက်သိမ်းပေးခဲ့သည့်အတွက် တိုင်ကြားသူမှလည်း သဘောတူကျေနပ်လက်ခံခဲ့ပါကြောင်း အကြောင်းပြန်ကြားလာခဲ့ပါသည်။ ဌာနမှတာဝန်ရှိသူက တိုင်ကြားသူထံ ဖုန်းဖြင့်ဆက်သွယ်မေးမြန်းခဲ့ရာ ကျေနပ်မှုရှိပါကြောင်း ပြန်လည်ပြောကြားခဲ့သဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

     ရန်ကုန်တိုင်းဒေသကြီး၊ မင်္ဂလာဒုံမြို့နယ်နေ တိုင်ကြားသူ တစ်ဦးသည် ငွေကျပ် (၁၅၀)သိန်း ရှိသော ၎င်း၏ဘဏ် အကောင့် ပိတ်သိမ်းခံရသဖြင့်  စားသုံးသူရေးရာဦးစီးဌာနသို့ အီးမေးလ်မှ တစ်ဆင့် ဆက်သွယ်တိုင်ကြားလာပါသည်။

       ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက  ဘဏ်မှ တာဝန်ရှိသူများထံသို့ အကြောင်းကြားဆောင်ရွက်ခဲ့ပါသည်။  ဘဏ်မှ တာဝန်ရှိသူများက တိုင်ကြားမှုအား စုံစမ်းခဲ့ရာတွင် ဘဏ်ဝန်ဆောင်မှု သုံးစွဲသူတစ်ဦးသည် ၎င်း၏ဘဏ် စာရင်းထဲမှ ငွေကျပ် ၄၇,၉၅၉,၆၅၉/- ပျောက်ဆုံးမှုဖြစ်စဉ်နှင့်ပတ်သက်၍ မန္တလေးတိုင်းဒေသကြီးရှိ အမှတ်(၃)နယ်မြေ ရဲစခန်းတွင် ဆက်သွယ်ရေးပုဒ်မ ၆၆(ဂ)ဖြင့် အမှုဖွင့်တိုင်ကြားခဲ့ပါကြောင်း၊ ရဲစခန်းမှစုံစမ်းစစ်ဆေးမှုအရ ၎င်း၏ ပျောက် ဆုံးနေသော ငွေကြေးများထဲမှ ငွေကျပ် ၁၅,၀၀၀,၀၀၀/-သည် 1st reciever ထံမှတစ်ဆင့် 2nd reciever ဖြစ်သော တိုင်ကြားသူ၏  Bank account သို့ စီးဝင်သွားသည်ကို  စစ်ဆေးပေါ် ပေါက်ခဲ့ပါကြောင်း၊ ထို့ကြောင့် သက်ဆိုင်ရာနယ်မြေရဲစခန်းမှ  ငွေကြေးမသမာစီးဆင်းသွားသည့်အကောင့်များအား ယာယီတားမြစ်ပေးပါရန် အကြောင်းကြားလာမှုအရ တိုင်ကြားသူ၏ ဘဏ်အကောင့်အား ယာယီတားမြစ်၍ ပိတ်သိမ်းထားခြင်းဖြစ်ပါကြောင်း စိစစ်တွေ့ရှိရသဖြင့် ရဲစခန်းသို့ ဆက်သွယ်မေးမြန်းရာတွင် အမှုဖြစ်စဉ်မှာ တိုးတက်မှုမရှိသည့်အတွက် ရဲစခန်းမှ တစ်စုံတစ်ရာ ထပ်မံညွှန်ကြားလာမှု မရမီအထိ ယာယီတားမြစ်ထားသည့် တိုင်ကြားသူ၏ ငွေစာရင်းအကောင့်အား ပြန်လည်ဖွင့်ပေးထားမည်ဖြစ်ပါကြောင်းကို  Bank မှ တာဝန်ရှိသူက  အကြောင်းပြန်ကြားလာခဲ့ပါသည်။  ဌာနမှတာဝန်ရှိသူက တိုင်ကြားသူထံ ဖုန်းဖြင့်ဆက်သွယ်၍ ရှင်းလင်းပြောကြားခဲ့ရာ ဖြေရှင်းဆောင်ရွက်ပေးမှုအပေါ် ကျေနပ်မှုရှိပါသောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

    မန္တလေးတိုင်းဒေသကြီး၊ ချမ်းအေးသာစံမြို့နယ်နေ တိုင်ကြားသူတစ်ဦးသည် အာမခံကုမ္ပဏီတစ်ခုထံတွင် ပရီမီ ယံကြေး ၃၄၃,၇၃၀/-ကျပ်ဖြင့် ကားအာမခံထားခဲ့ပြီး အသေး စားကားမတော်တဆမှု ဖြစ်ပွားသည့်အတွက် ပြုပြင် စရိတ် ၁၅၀,၀၀၀/-ကျပ်ကို အာမခံလျော်ကြေး ထုတ်ယူရာတွင် (၂)ပတ်အတွင်း ထုတ်ယူနိုင်ကြောင်း ကြော်ငြာထားသော်လည်း (၂)လကျော်ကြာမှ ရရှိသဖြင့် စားသုံးသူရေးရာဦးစီးဌာန၏  Website Complaint System မှတစ်ဆင့် ဆက်သွယ်တိုင်ကြားလာပါသည်။ 

    ဖြေရှင်းဆောင်ရွက်မှုအခြေအနေ။      တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက အာမခံကုမ္ပဏီသို့  အကြောင်းကြားဆောင်ရွက်ခဲ့ပါသည်။ ကုမ္ပဏီမှ မန္တလေးရုံးခွဲ၏ Viber သို့ Partner Channel မှတဆင့် ၂၇-၂-၂၀၂၄ ရက်နေ့တွင် တိုင်ကြားသူ ပေးပို့ထားသော ငွေကျပ် ၂၀၀,၀၀၀/- ပြေစာအား အင်တာနက်လိုင်းမကောင်းသဖြင့် မတွေ့ရှိခဲ့ကြောင်း၊  ၈-၄-၂၀၂၄ ရက်နေ့တွင် တိုင်ကြားသူက ဖုန်းဖြင့်ဆက်သွယ်လာချိန်မှသာ ပြေစာပေးပို့ထားကြောင်း သိရှိခဲ့ရပြီး သင်္ကြန်ရုံးပိတ်ရက်ရှည် များကြောင့် ၂၅-၄-၂၀၂၄ ရက်နေ့တွင် ရုံးချုပ် Claims Department သို့ လျော်ကြေးတင်ပြ ဆောင်ရွက်ပေးခဲ့ကြောင်း၊  ၃-၅-၂၀၂၄ ရက်နေ့တွင် လျော်ကြေးပေးလျော်ရန် ခွင့်ပြုချက်ရရှိခဲ့ပြီး မန္တလေးရုံး ခွဲမှ တိုင်ကြားသူထံသို့ ၅၀,၀၀၀/- ကျပ် ဖြတ်တောက်၍ ငွေကျပ် ၁၅၀,၀၀၀/- အား ပေးလျော်ခဲ့ပါကြောင်း ရှင်းလင်းတင်ပြလာခဲ့ပါသည်။ ဌာနမှ တာဝန်ရှိသူများက တိုင်ကြားသူထံ ဆက်သွယ်ရှင်းလင်းခဲ့ရာ တိုင်ကြားသူမှ ကျေနပ်မှုရှိသဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။