ဖြေရှင်းဆောင်ရွက်ပေးမှုများ

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊  လပွတ္တာမြို့နယ် တာဝန်ခံဦးမြင့်ဌေးနှင့်ဝန်ထမ်းများ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ (၂၂.၁၀.၂၀၂၂) ရက်နေ့နံနက်(၁၀;၀၀)နာရီကလပွတ္တာမြို့ ၊ အမှတ်(၆)ရပ်ကွက်၊ ရွေးနဒီရေပေါ်ဈေး၊ ဈေးကော်မတီရုံး၌ကုန်မျိုးစုံရောင်းချသော စီးပွားရေးလုပ်ငန်းရှင်များအား   စားသုံးသူအသိပညာပေး ဟောပြောပွဲ ဆောင်ရွက်ခဲ့ပါသည်။

       ထိုသို့ဟောပြောဆွေးနွေးရာတွင် မြို့နယ်တာဝန်ခံမှ လပွတ္တာမြို့၊အမှတ်(၆)ရပ်ကွက်၊ ရွေးနဒီရေပေါ်ဈေးတွင် ကုန်မျိုးစုံရောင်းချနေသော စီးပွားရေးလုပ်ငန်းရှင်များအနေဖြင့် စားသုံးသူများဘေးအန္တရာယ်ကင်းရှင်းစေခြင်းအကျိုးငှာ စားသုံးသူကာကွယ်ရေးအသိပညာများတိုးပွားစေရန်အတွက် ဟောပြောရခြင်းဖြစ်ပါကြောင်း၊ မိမိတို့ဌာနအနေဖြင့် လစဉ်စီးပွားရေးလုပ်ငန်းရှင်များအား အလှည့်ကျပညာပေးလုပ်ငန်းများ ဆောင်ရွက်လျှက်ရှိပါကြောင်း၊ စီးပွားရေးနှင့်ကူးသန်းရောင်းဝယ် ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ၂၀၁၉ ပါပြဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁)ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသာဖော်ပြရာတွင် မြန်မာဘာသာဖြင့်ဖြစ်စေ၊ အခြားဘာသာတစ်ခု(သို့)တစ်ခုထက်ပို၍တွဲလျှက်ဖြစ်စေ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် စားသုံးသူများထိခိုက်နစ်နာမှုမရှိ စေရေးအလေးထားဆောင်ရွက်ရန်လိုအပ်ပါကြောင်း၊ ဌာနမှထုတ်ပြန်ထားသော ဥပဒေညွှန်ကြား ချက်များအတိုင်း လိုက်နာဆောင်ရွက်ကြရန်လိုအပ်ပါကြောင်း၊ လိုက်နာမှုမရှိပါကထုတ်ပြန်ထား သောဥအဒေများအတိုင်း ဆောင်ရွက်ရမည်ဖြစ်ပါကြောင်း ရှင်းလင်းဟောပြောခဲ့ပါသည်။

          ဟောပြောပွဲသို့ ကုန်မျိုးစုံရောင်းချသူလုပ်ငန်းရှင်(၁၀)ဦး တက်ရောက်ခဲ့ကြောင်း သိရှိရပါ သည်။

DOCA(ဧရာဝတီ)

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊  စစ်ကိုင်း ခရိုင်ဦးစီးမှူး  ဒေါ်သန်းသန်းတင် ဦးဆောင်သော ဝန်ထမ်းများသည် စစ်ကိုင်းခရိုင်အတွင်း ပို့ကုန်/သွင်းကုန်လုပ်ငန်းရှင် မှတ်ပုံတင်သက်တမ်း (၅)နှစ် နှင့်အောက်သက်တမ်းရှိသော ကုမ္ပဏီများအား မြေပြင်တွင် အမှန်တကယ်ရှိ/မရှိ စက်တင်ဘာလ (၁၄/၁၅/၁၆) ရက်နေ့များတွင် ကွင်းဆင်းစစ်ဆေးခဲ့ကြပါသည်။

      မြေပြင်ကွင်းဆင်းစစ်ဆေးရာတွင် စစ်ကိုင်းခရိုင်အတွင်းရှိ စစ်ကိုင်း၊ မြင်းမူနှင့် မြောင်မြို့နယ် များတွင် ပို့ကုန်/သွင်းကုန်လုပ်ငန်းရှင် မှတ်ပုံတင်သက်တမ်း (၅)နှစ် နှင့်အောက်သက်တမ်းရှိသော ကုမ္ပဏီ (၃၆) ခုရှိသည့်အနက် မြေပြင်တွင် အမှန်တကယ်မရှိသော ကုမ္ပဏီ (၁၃) ခု၊လုပ်ငန်းယာယီ ရပ်ဆိုင်းထားသောကုမ္ပဏီ (၁)ခု၊ နယ်မြေဒေသအခြေအနေအရ ကွင်းဆင်းနိုင်ခြင်းမရှိသောကုမ္ပဏီ (၁၂) ခု၊မြေပြင်တွင် လက်ရှိ လုပ်ကိုင်ဆောင်ရွက်လျက်ရှိသောကုမ္ပဏီ(၁၀)ခုတို့ကိုကွင်းဆင်း စိစစ် တွေ့ရှိခဲ့ပါသည်။

      မြေပြင်တွင် အမှန်တကယ်မရှိသော ကုမ္ပဏီများမှာ တရုတ်ဈေးကွက်သို့ နွားအရှင်တင်ပို့ သော ကုမ္ပဏီများဖြစ်ပြီး  Covid-19 ရောဂါ ဖြစ်ပွားမှုအခြေအနေများနှင့် နွားဈေးကွက် ပျောက်ဆုံးမှုအခြေအနေများကြောင့် နွား Export တင်ပို့သောကုမ္ပဏီလုပ်ငန်းများကို လုပ်ကိုင်ဆောင်ရွက်ခြင်း မရှိတော့ပါကြောင်း  သတင်းရရှိပါသည်။

DOCA(စစ်ကိုင်း)                                                                                                                                                                                                                                                                                                                                                                                                                                                                           

     ရန်ကုန်တိုင်းဒေသကြီးနေ     တိုင်ကြားသူ တစ်ဦးသည် ၎င်းပိုင်ဆိုင်သည့် Private Car မော်တော်ယာဉ်အမှတ် 5Q/4734 ကို “x x x” Insurance အာမခံကုမ္ပဏီတွင် အလုံးစုံ မော်တော်ယာဉ်အာမခံထားရှိခဲ့ပြီး ပရီမီယမ် ကြေးများ အချိန်မီ နှစ်စဉ်ပေးသွင်းခဲ့သော်လည်း ၂၅-၃-၂၀၂၂ ရက်နေ့ “x x x”  Insurance က ပေးပို့လာသော အာမခံသက်တမ်းကုန်ဆုံးမည့်ရက် အကြောင်းကြားစာတွင် Penalty ကြေး များထည့်သွင်းကောက်ခံနေသဖြင့်  တိုင်ကြားလာခြင်းအပေါ် တိုင်းဒေသကြီးဦးစီးမှူးရုံးမှ တာဝန်ရှိသူများမှ “x x x”  Insurance သို့ ဆက် သွယ်ဆောင်ရွက်ခဲ့ပါသည်။ “x x x”  Insurance  က စိစစ်ရာတွင် တိုင်ကြားသူသည်  ၎င်းပိုင်ဆိုင်သည့်  Private Car မော်တော်ယာဉ် အမှတ် 5Q/4734  ကို  ၄-၄-၂၀၁၉ ရက်နေ့မှ ၂၀၂၂ ခုနှစ်၊ ဧပြီလအထိ “x x x”  Insurance အာမခံ ကုမ္ပဏီတွင် အလုံးစုံအာမခံထားရှိခဲ့ကြောင်းတွေ့ရှိရပါသည်။ ကားအာမခံထား ရှိချိန်တွင် မြန်မာနိုင်ငံအာမခံဥပဒေနှင့်အညီ ကားအာမခံနှင့်ပတ်သက်သည့် Terms and Conditions များဖော်ပြထားသည့် Private Car Policy နှင့် အာမခံထားသူများလိုက်နာရမည့် အာမခံ ဆိုင်ရာ စည်းကမ်းချက်များကို  တိုင်ကြားသူအား ရှင်းလင်းပြီးမှသာလျှင် အာမခံရယူစေခဲ့ခြင်း ဖြစ်ပြီး အာမခံနှင့်ပတ်သက်သည့် စာရွက်စာတမ်းများကိုလည်း မိတ္တူပေးအပ်ခဲ့ပါသည်။ တိုင် ကြားသူအာမခံထားရှိသည့် မော်တော်ယာဉ်သည် အာမခံထားရှိခဲ့သည့်ကာလအတွင်း ၂၀၂၀ ခုနှစ်၌ ဆုံးရှုံးမှုဖြစ်ပေါ်ခဲ့သောကြောင့် လျော်ကြေးတောင်းခံမှု (၂) ကြိမ်နှင့်  ၂၀၂၁ ခုနှစ်၌ လည်း ဆုံးရှုံးမှုဖြစ်ပေါ်ခဲ့သောကြောင့် လျော်ကြေးတောင်းခံမှု (၂) ကြိမ် ပေးအပ်ခဲ့ပါသည်။ ဆုံးရှုံးခဲ့သည့် ပမာဏရာခိုင်နှုန်းအချိုး (Loss Ratio) ၄၅၃ % ဖြစ်ပေါ်ခဲ့ပါသည်။  မိမိတို့ ကုမ္ပဏီမှ သတ်မှတ်ထားသည့် အာမခံစည်းကမ်းချက် အပိုဒ် ၅ (၇) အရ လျော်ကြေး ဖြစ် ပေါ်ခဲ့သည့် အကြိမ်အရေအတွက်သည် အာမခံသက်တမ်းအတွင်း (၂) ကြိမ်နှင့်အထက် (သို့မဟုတ်) အာမခံသက်တမ်း (၂) နှစ်ဆက်တိုက် လျော်ကြေးပေါ် ပေါက်ခဲ့လျှင် Penalty ကြေးများကို ပရီမီယံကြေးတွင်ပေါင်းထည့်၍ ဖြည့်တင်းပရီမီယံကြေးအဖြစ် ကောက်ခံသွား မည်ကို ဖော်ပြသတ်မှတ်ထားပြီးဖြစ်ကြောင်း ဖော်ပြထားပြီးဖြစ်ပါသည်။ တိုင်ကြားသူအနေ ဖြင့် ၄-၄-၂၀၂၂ ရက်နေ့တွင် ပေးသွင်းရမည့် ပရီမီယံကြေးများကို ပေးဆောင်မှုမပြုတော့ဘဲ ကားအာမခံကို ဆက်လက်ရယူခြင်း မရှိပါကြောင်း “x x x”  Insurance အာမခံကုမ္ပဏီက ၆-၆-၂၀၂၂ ရက်နေ့တွင် စားသုံးသူရေးရာဦးစီးဌာနသို့ ရှင်းလင်းပြန်ကြားလာပါသည်။  တိုင်း ဒေသကြီးဦးစီးမှူးရုံးမှ တာဝန်ရှိသူများက မြန်မာနိုင်ငံအာမခံဥပဒေ၊ ကားအာမခံပေါ်လစီပါ Terms and Conditions များနှင့် အာမခံကုမ္ပဏီ ၏စည်းကမ်းချက်များအား နှိုင်းယှဉ်စစ်ဆေး ခဲ့ပါသည်။ ကားအလုံးစုံအာမခံနှင့် ဖြည့်သွင်းပရီမီယံကြေးများကို ဥပဒေ၊ လုပ်ထုံးလုပ်နည်း များ၊ အာမခံပေါ်လစီများနှင့်အညီ ဆောင်ရွက်ထားသည်ကို တွေ့ရှိရပါသည်။ တိုင်ကြားမှု ဖြစ်စဉ်သည် သက်ဆိုင်ရာဥပဒေနှင့်အညီ ဆောင်ရွက်ပြီးဖြစ်၍ စားသုံးသူကာကွယ်ရေးဥပဒေ အရ ဖြေရှင်းဆောင်ရွက်ပေး၍မရပါကြောင်းကို ၄-၈-၂၀၂၂ ရက်နေ့တွင် တိုင်ကြားသူထံသို့ အကြောင်းကြားခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

            ပဲခူးတိုင်းဒေသကြီး၊ ပြည်မြို့နေ တိုင်ကြားသူ တစ်ဦးက“x x x” ကိတ်ခြောက်ဆိုင်မှ“x x x”  အမှတ်တံဆိပ်ပါကိတ်ခြောက်မုန့်ကို ဝယ်ယူစားသုံးရာတွင် အနံ့အသက်ဆိုးရွား ပြီး အရ သာ ပျက်ယွင်းနေပါသဖြင့် တိုင်ကြားလာ ခြင်းအပေါ် ပြည်ခရိုင်ဦးစီးမှူးရုံးမှ တာဝန်ရှိ သူများသည် ၂၁.၇.၂၀၂၂ ရက်နေ့တွင် တိုင်ကြားခံရသော ပြည်မြို့၊ မြောက်ဘက် စောင်းတန်းလမ်းရှိ “ x  x x ”  မုန့်ဆိုင်သို့ ကွင်းဆင်းဆောင်ရွက်ခဲ့ပြီး နေ့လယ်ပိုင်းတွင် တိုင်ကြားသူနှင့် တိုင်ကြားခံရသူတို့အား ခေါ်ယူဆွေးနွေးညှိနိူင်းဆောင်ရွက်ခဲ့ရာ တိုင်ကြားသူ သည် မိမိနစ်နာမူများအတွက် ဆိုင်ရှင်အနေဖြင့် မိမိ၏မိသားစုဝင်များအား မုန့်ခြောက်ဝယ်ယူခဲ့သော “ x x x ”  မုန့်ဆိုင်တွင် ပြန်လည်တောင်းပန်ပေးမည်ဆိုပါက ကျေနပ်လက်ခံပေးမည် ဖြစ်ကြောင်း ပြောကြားသည့်အတွက် တိုင်ကြားခံရသူ “ x x x ” မုန့်ဆိုင်ပိုင်ရှင်မှလည်း တိုင်ကြားသူ မိသားစုကို ပြန်လည်တောင်းပန်မည်ဖြစ်ကြောင်းနှင့် ဝယ်ယူသွားသောမုန့်ထုတ် အားလည်း အသစ်ပြန်လည် လဲလှယ်ပေးသွားမည်ဖြစ်ပါကြောင်း ညှိနှိုင်းဆွေးနွေးပြီးနောက် ၂၁.၇.၂၀၂၂ ရက် နေ့တွင် မုန့်ဆိုင်ပိုင်ရှင်နှင့်မိသားစုဝင်(၃)ဦးက တိုင်ကြားသူ မိသားစုအား “ x x x ” မုန့်ဆိုင် တွင် ပြည်ခရိုင်ဦးစီးမှူးရုံးမှ တာဝန်ရှိသူ များရှေ့မှောက်တွင် တောင်းပန်ခဲ့ သဖြင့် နှစ်ဦးနှစ်ဘက် ပြေလည်မူရှိသောကြောင့် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။

Consumer Affairs

                စားသုံးသူရေးရာဦးစီးဌာန၊မိတ္ထီလာခရိုင်ရုံးအနေဖြင့်၂၀၂၂ခုနှစ်၊ ဇူလိုင်လအတွင်း ဆက်သွယ်ရေးဝန်ဆောင်မှုတစ်ခုအား စားသုံးသူပြည်သူတစ်ဦးမှတိုင်ကြားခဲ့မှုအား ဖြေရှင်းဆောင်ရွက်ပြီးစီးခဲ့ပါသည်။

        မန္တလေးတိုင်းဒေသကြီး၊ မိတ္ထီလာမြို့နေ၊ စားသုံးသူပြည်သူတစ်ဦးသည် ခဲအကုန်မခြစ်မိသော ငွေဖြည့်ကဒ်ကိုဖြေရှင်းဆောင်ရွက်ပေးပါရန် MPTသို့ အကြောင်းကြားသော်လည်း ဖြေရှင်းဆောင်ရွက်ပေးခြင်းမရှိ၍ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးသို့ Websiteမှတဆင့် ဆက်သွယ်တိုင်ကြားလာခဲ့ပါသည်။

          စားသုံးသူရေးရာဦးစီးဌာနမှတိုင်ကြားသူအား ဆက်သွယ်ခဲ့ရာ ၎င်းသည် ငွေဖြည့်ကဒ်ဝယ်၍ မရသော နေရာသို့ ရောက်ရှိနေခဲ့သဖြင့် ၎င်း၏သူငယ်ချင်းဖြစ်သူအား ဖုန်းငွေဖြည့်ကဒ်ဝယ်ယူ၍ Onlineမှ တဆင့် ဓာတ်ပုံရိုက်ပေးပို့ရန်အကူအညီတောင်းခဲ့ရာ သူငယ်ချင်းမှ ငွေဖြည့်ကဒ်အားဓာတ်ပုံ ရိုက်ကာပေးပို့ခဲ့ပြီး ၎င်းငွေဖြည့်ကဒ်များအား လွှင့်ပစ်ခဲ့ကြောင်းသိရှိရပါသည်။ စားသုံးသူမှချက်ချင်း မထည့်သေးဘဲ မိမိအားလပ်သောအချိန်တွင် ဘေလ်ဖြည့်ကြည့်ရာ နောက်ဂဏန်း(၃)လုံးခဲခြစ်ရန် လိုအပ်‌နေကြောင်း တွေ့ရှိရသဖြင့် မိမိတွင် ဖုန်းဘေလ်ကဒ်လက်ခံ မရှိသောကြောင့် Call Centre သို့ ဆက်သွယ်ခဲ့ရာဖြေရှင်းပေးခြင်းမရှိသောကြောင့် တိုင်ကြားရခြင်းဖြစ်ကြောင်းသိရှိရပါသည်။      

ဆက်သွယ်ရေးတာဝန်ခံရုံး (အော်တိုအိတ်ချိန်း)သို့ ဆက်သွယ်မေးမြန်းခဲ့ရာ ခရိုင်ဆက်သွယ်ရေး ရုံး၊တာဝန်ခံအင်ဂျင်နီယာမှ စားသုံးသူ၏ လက်ဝယ်တွင် ငွေဖြည့်ကဒ်လက်ခံရှိပါက ခဲခြစ်၍ ဘေလ်ဖြည့်နိုင်ကြောင်း၊ QRကုဒ်အား Scanဖတ်၍ ဖြည့်၍ရကြောင်းပြောကြားခဲ့ပါသည်။ စားသုံးသူ၏ လက်ဝယ်တွင် ငွေဖြည့်ကဒ်မရှိတော့သည့်အတွက် MPT Call Centre 106 သို့ ဆက်သွယ်၍ ၎င်းငွေဖြည့်ကဒ် နှင့်အချက်အလက်များအား စစ်ဆေး၍ စားသုံးသူမှအသုံးပြုပြီးခြင်း ရှိ/မရှိစိစစ်၍ ဖြေရှင်းဆောင်ရွက် ပေးမည်ဖြစ်ပါ‌ကြောင်း စားသုံးသူရေးရာဦးစီးဌာန ၊ ခရိုင်ဦးစီးမှူးနှင့် လာရောက်‌တွေ့ဆုံဖြေရှင်း ဆွေးနွေးခဲ့ပါသည်။

          ၎င်းနောက် Call Center သို့ ဆက်သွယ်ခဲ့ရာ တိုင်ကြားသူသည် လက်ရှိအချိန်ထိ ငွေဖြည့်ကဒ်ကို အသုံးပြုထားခြင်းမရှိ‌သေးကြောင်း စစ်ဆေးတွေ့ရှိရ၍ ဘေလ်(၂၀၀၀)ကျပ်အား စားသုံးသူ၏ ဖုန်းနံပါတ်သို့ ဖြည့်ပေးခဲ့ကြောင်း စားသုံးသူမှ ပြန်လည်တင်ပြလာခဲ့ပါသည်။ စားသုံးသူကာကွယ်ပေး ရေးဥပဒေတွင် စားသုံးသူအခွင့်အရေး (၈)ချက်ရှိသကဲ့သို့ စားသုံးသူများလိုက်နာရမည့် စားသုံးသူများ လိုက်နာရမည့် တာဝန်များကိုလည်း စားသုံးသူများမှလိုက်နာရန်လိုအပ်ကြောင်း လုပ်ငန်းရှင်များအနေ ဖြင့်လည်း မိမိတို့ဝန်ဆောင်မှုများကို အကောင်းဆုံးဖြည့်ဆည်းပေးခြင်းဖြင့် တာဝန်များ လေးစား လိုက်နာရန် လိုအပ်ပါကြောင်းကို ခရိုင်ဦးစီးမှူးမှ အကျယ်တဝင့်ဆွေးနွေး ပြောကြားခဲ့ကြောင်း သိရှိရပါသည်။

DOCA(မန္တလေး)