ဖြေရှင်းဆောင်ရွက်ပေးမှုများ

      မန္တလေးတိုင်းဒေသကြီး၊ ချမ်းအေးသာစံမြို့နယ်နေ xxxxxxx Internaltional School ကျောင်းသို့ ၁၆-၁-၂၀၂၀ ရက်နေ့တွင် ငွေကျပ်(၃,၆၀၀,၀၀ဝိ/-)ကျပ် ဖြင့်ကျောင်းအပ်နှံခဲ့ရာ Covid-19 ကာလအတွင်း ကျောင်းဖွင့်လှစ်နိုင်ခြင်း မရှိပါသဖြင့် ကြိုတင်ပေးသွင်းငွေများ ပြန်လည်တောင်းခံရာ ငွေပြန်အမ်းပေးခြင်း မရှိပါသဖြင့် မန္တလေးတိုင်းဒေသကြီးဦးစီးမှူးရုံးသို့ တိုင်ကြားလာပါသည်။

        တိုင်ကြားမှုနှင့်ပတ်သက်၍ xxxxxxx Internaltional School ကျောင်းမှ တာဝန်ရှိသူနှင့် တိုင်ကြားသူတို့အား ဌာန၏ ညှိနှိုင်းချက်အရ ကျန်ငွေကျပ် (၃၄) သိန်းအား ၃၁-၃-၂၀၂၀ ရက်နေ့တွင် အပြီးအပြတ် ပြန်လည်ပေးအပ်မည်ဖြစ်ကြောင်း၊ လူမှုကွန်ယက်များတွင် သတင်းရေးသားခြင်း၊ ဖြန့်ဝေခြင်းများမပြုလုပ်ရန် နှစ်ဦးသဘောတူ ဝန်ခံကတိပြုခဲ့ပြီး ၁-၄-၂၀၂၁ ရက်နေ့တွင် xxxxxxxxx Internaltional School ကျောင်းမှ သင်တန်းကြေး ကျန်ငွေကျပ် (၃၄) သိန်းအား တိုင်ကြားသူ သို့ ပြန်လည်ပေးအပ်ခဲ့သည့်အတွက် အမှုအား ပိတ်သိမ်း ဆောင်ရွက်ခဲ့ပါသည်။

      ရန်ကုန်တိုင်းဒေသကြီး၊ လှိုင်မြို့နယ်နေ တိုင်ကြားသူတစ်ဦးသည် xxx Company Limited မှ ကားအရစ်ကျဝယ်ယူရန် စရံငွေ (၃) သိန်းပေးခဲ့ကြောင်း၊ နောက်ပိုင်းတခြားကိစ္စနှင့် အဆင်မပြေပါသဖြင့် Cancel ပြန်လုပ်သည့်အချိန်တွင် Refund ငွေပြန်ပေးခြင်းမရှိသောကြောင့် ရန်ကုန်တိုင်းဒေသကြီးဦးစီးမှူးရုံးသို့ ဆက်သွယ်တိုင်ကြားလာပါသည်။  

        တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူက xxx  Car Showroom သို့ ဆက်သွယ်ဆောင်ရွက်ခဲ့သော်လည်း ပြန်လည်အကြောင်းကြားမှုမရှိသဖြင့် ၁၀-၁-၂၀၂၁ ရက်နေ့တွင် တိုင်ကြားသူထံဖုန်းဖြင့် ဆက်သွယ်မေးမြန်းခဲ့ရာ xxx  Car Showroom က တိုင်ကြားသူထံ Refund ငွေအား ပြန်လည်ပေးအပ်ခဲ့ပြီးဖြစ်ကြောင်း အကြောင်းပြန်ကြားမှုရရှိသဖြင့် ၃၁-၃-၂၀၂၁ ရက်နေ့တွင် အမှုအား ပိတ်သိမ်းဆောင်ရွက်ခဲ့ပါသည်။

      စားသုံးသူများအနေဖြင့် ၎င်းတို့၏ လိုအပ်ချက်အရ ကုန်စည် နှင့် ဝန်ဆောင်မှုများကို ဝယ်ယူရာတွင် အရည်အသွေးပြည့်ဝသည့် ကုန်စည်များရရှိရန်နှင့် ကျေနပ်မှုရှိစေသည့် ဝန်ဆောင်မှုများကို ရရှိရန်မှာ အခြေခံလိုအပ်ချက် ဖြစ်ပေသည်။ ယင်းလိုအပ်ချက်များကို အပြည့်အဝ ရရှိစေရန်အလို့ငှာ စားသုံးသူအသိပညာပေးရေးလုပ်ငန်းများသည် အရေးပါသော အခန်းကဏ္ဍအဖြစ် ပါဝင်လျက်ရှိသည်မှာ ထင်ရှားလှပေသည်။ အသိပညာပေးမှုအပိုင်းတွင် စားသုံးသူတို့ ယေဘုယျသိထားသည့်အချက်များမှာ ဘယ်လိုပစ္စည်း၊ ဘယ်လိုဝန်ဆောင်မှုမျိုးကို ရွေးချယ်ဝယ်ယူမလဲ၊ မည်သို့သော ကုန်စည်နှင့် ဝန်ဆောင်မှုများက စျေးနှုန်းနှင့် အရည်အသွေးကိုက်ညီမှုရှိသည်ဟု ဆင်ခြင်ဆုံးဖြတ်မလဲ၊ ကုန်စည် နှင့် ဝန်ဆောင်မှုတို့ တည်ရှိသည့်နေရာအပေါ် သုံးသပ်၍ ဘယ်လိုဝယ်ယူမလဲ၊ ကုန်စည်နှင့် ဝန်ဆောင်မှု တို့ကိုဝယ်ယူရာတွင် ရရှိသည့် သို့မဟုတ် ပါရှိသည့်သက်တမ်းကို အလေးထား၍ ဘယ်လို အသုံးချမလဲ၊ ကုန်စည်နှင့်ဝန်ဆောင်မှုတို့၏ အာမခံချက်ကို ဘယ်လိုအသုံးချမလဲ၊ အသုံးပြုပုံနှင့် ထားသိုပုံဆိုင်ရာ အချက်အလက်တို့ကို ဘယ်လိုစိစစ်မလဲတို့ ဖြစ်ပါသည်။ လက်ရှိတွင် စားသုံးသူများ ရင်ဆိုင်နေရသောပြဿနာအချို့မှာ ကုန်စည်၊ ဝန်ဆောင်မှုများ ဝယ်ယူရာတွင် စျေးနှုန်း ကွာဟခြင်း၊ ပစ္စည်းများရောနှောရောင်းချခြင်း၊ အရည်အသွေးပြည့်မီမှု မရှိခြင်း၊ အပြစ်အနာအဆာရှိသော ပစ္စည်းများရောင်းချခြင်း၊ မမှန်ကန်သော အချိန်အတွယ် အသုံးပြုခြင်း၊ လိမ်လည်လှည့်ဖြားသည့် ရောင်းဝယ်မှုအလေ့အကျင့်များ ဆောင်ရွက်ခြင်း၊ စားသုံးသူများအတွက် လမ်းညွှန်ချက်ပေးမှု အားနည်းခြင်း၊ စံချိန်စံညွှန်းနှင့်ကိုက်ညီမှု မရှိခြင်း အစရှိသဖြင့် အမျိုးမျိုးသော အခြေအနေတို့ဖြင့် ဝယ်ယူနေကြရသည်။ ယင်းသို့သောအခြေအနေများကို ကျော်ဖြတ်ရန် စားသုံးသူများအနေဖြင့် လိုအပ်သည့်အချက်များမှာ ၎င်းရရှိနိုင်သည့်အခွင့်အရေးနှင့် လိုက်နာရမည့်တာဝန်တို့ကို သိရှိလိုက်နာ ဆောင်ရွက်ရန်၊ ပြဌာန်းထားသည့် သက်ဆိုင်ရာ ဉပဒေများကို သိရှိလေ့လာထားရန်၊ ပြဿနာများကို ပူးပေါင်းဖြေရှင်းဆောင်ရွက်ရန်တို့ ဖြစ်ပါသည်။ ဖော်ပြပါ လိုအပ်ချက်များ၏ အရင်းအမြစ်သည် စားသုံးသူတို့ကို အသိပညာပေးခြင်းပင် ဖြစ်ပေသည်။ ထို့ကြောင့် စားသုံးသူ ပြည်သူများအနေဖြင့် ဝယ်ယူ စားသုံးမှုဆိုင်ရာ အသိပညာဗဟုသုတများ ရှိကြရမည် ဖြစ်သကဲ့သို့ လက်တွေ့ရင်ဆိုင်ကြုံတွေ့နေရသော နစ်နာဆုံးရှုံးနေရသည့် အခြေအနေများအတွက် သက်ဆိုင်ရာ အစိုးရဌာနများ၊ အသင်းအဖွဲ့များသို့ ဆက်သွယ်တိုင်ကြား၍ ဆုံးရှုံးနစ်နာမှုများ မရှိစေရန် ဆောင်ရွက်ကြရမည်ဖြစ်ပါသည်။

သက်ဆိုင်ရာ၏ထောက်ခံချက်မရှိဘဲ ရောင်းချနေကြောင်း တိုင်ကြားလာမှုနှင့်ပတ်သက်၍ ဖြေရှင်းဆောင်ရွက်မှု
မွန်ပြည်နယ်၊ မော်လမြိုင်မြို့နယ်နေ တိုင်ကြားသူတစ်ဦးသည် xxxအမှတ်တံဆိပ် ရှောက်သီးဆေးပြားသည် သက်ဆိုင်ရာ ထောက်ခံချက်မရှိဘဲ ရောင်းချနေကြောင်း တိုင်ကြားလာမှုနှင့်ပတ်သက်၍ ၁၄-၁၂-၂၀၂၀ ရက်နေ့တွင် xxxအမှတ်တံဆိပ် ရှောက်သီးဆေးပြားလုပ်ငန်းရှင်အား ခေါ်ယူ၍ ညှိနှိုင်းဖြေရှင်းရာ ထောက်ခံချက်မရှိဘဲ ဈေးကွက်အတွင်း ဖြန့်ဖြူးရောင်းချနေသော xxxအမှတ်တံဆိပ် ရှောက်သီးဆေးပြားအား မိမိတို့သဘောဆန္ဒအလျောက် ပြန်လည်သိမ်းဆည်းသွားမည်ဖြစ်ပြီး သိမ်းဆည်းဆောင်ရွက်ခြင်းကို ၁၄-၁၂-၂၀၂၀ ရက်နေ့မှ ၃၁-၁၂-၂၀၂၀ ရက်နေ့အထိ ပြီးစီးအောင် ဆောင်ရွက်သွားမည်ဖြစ်ကြောင်း ညှိနှိုင်းဖြေရှင်းခဲ့ပြီးဖြစ်ပါသည်။

ခရီးသွားလုပ်ငန်းဝန်ဆောင်မှုနှင့်ပတ်သက်၍ တိုင်ကြားလာမှုအပေါ် ဖြေရှင်းဆောင်ရွက်မှု

ရန်ကုန်တိုင်းဒေသကြီး၊ အင်းစိန်မြို့နယ် တိုင်ကြားသူတစ်ဦးသည် ၂၃.၁၀.၂၀၁၉ ရက်နေ့ တွင်  ခရီးသွားလုပ်ငန်းတစ်ခု၏ တာဝန်ရှိသူထံမှ ဘန်ကောက်သို့သွားမည့်ခရီးစဉ်အတွက် လေယာဉ် လက်မှတ်(၆) စောင်ကို မှာယူခဲ့ပြီး ကျသင့်ငွေ ၁၁,၄၈,၀၀၀/- ကျပ်တိတိကို အဆိုပါ တာဝန်ရှိသူ၏ဘဏ်အကောင့်သို့လွှဲပေးခဲ့ကြောင်း၊ ၂၃.၁၀.၂၀၁၉ ရက်နေ့တွင် အဆို ပါခရီးသွားလုပ်ငန်းက လက်မှတ်(၁)စောင်သာ ပေးပို့ခဲ့ပြီး ကျန် (၅) စောင်အား ပေးပို့ခြင်း မရှိပါကြောင်း၊ ၈.၁၁.၂၀၁၉ ရက်နေ့တွင် ကျန်လက်မှတ် (၅) စောင် မှာဝယ်ယူ၍မရကြောင်း ဆက်သွယ်ပြောကြားလာသဖြင့်  လေယာဉ်လက်မှတ်(၆)စောင်ကို အရေးပေါ်ဝယ်ယူခဲ့ရ ကြောင်း၊ ဟိုတယ်အခန်း ဘွတ်ကင်များ အား တစ်ရက်နောက်ဆုတ်ခဲ့ရသဖြင့် အဆိုပါ တစ်ရက်စာအတွက် လျော်ကြေးပေးချေခဲ့ရပါကြောင်း၊ ယင်းသို့သော အဆင်မပြေမှုများစွာအတွက် စုစုပေါင်းငွေကျပ် ၂၂,၂၂,၀၀၀/-ဆုံးရှုံး နစ်နာခဲ့ရပါ ကြောင်း၊ ခရီးသွားလုပ်ငန်းက မိမိ၏ ဆုံးရှုံးနစ်နာမှုအတွက် တာဝန်ယူဖြေရှင်းပေးမည်ဟု ကတိ ပြုခဲ့သော်လည်း ၁၃.၁၁.၂၀၁၉ ရက်နေ့တွင် ငွေကျပ် ၉၀၀,၀၀၀ အား ပေးအပ်ခဲ့ပြီး ကျန်ငွေ ၁,၃၂၂,၀၀၀/-ကျပ်ကို ၂၀.၁၁.၂၀၁၉ ရက်နေ့တွင် ပေးအပ်မည်ဟု ကတိပြုခဲ့သော်လည်း ဖြေရှင်း ဆောင်ရွက်ပေးခြင်းမရှိပါသဖြင့် ၁၀.၃.၂၀၂၀ ရက်နေ့တွင် စားသုံးသူရေးရာဦးစီးဌာနသို့ ဆက်သွယ်တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံး၌ နှစ်ဦးနှစ်ဖက် ခေါ် ယူတွေ့ဆုံညှိနှိုင်းခဲ့ရာ ခရီးသွားလုပ်ငန်းက လျော်ကြေးအနေဖြင့် တိုင်ကြားသူဘက်မှ တောင်းဆိုသည့် ပမာဏအတိုင်းပေးချေရန် အခက်အခဲရှိပါကြောင်း ပြောကြားလာ၍ ကုမ္ပဏီဘက်မှ တိုင်ကြားခံရသူအား ပေးရန်ကျန်ရှိသည့်ငွေများကို (၆) လအတွင်း ပေးအပ် သွားရန် ညှိနှိုင်းပေးခဲ့ရာ နှစ်ဦးနှစ်ဖက်သဘောတူလက်ခံခဲ့၍ ၁၈.၃.၂၀၂၀ ရက်နေ့တွင် ဝန်ခံကတိ လက်မှတ်ရေးထိုးခဲ့ပြီး အမှုအားပိတ်သိမ်းခဲ့ပါသည်။