ဖြေရှင်းဆောင်ရွက်ပေးမှုများ

          ရန်ကုန်တိုင်းဒေသကြီး၊ မရမ်းကုန်းမြို့နယ်နေ တိုင်ကြားသူတစ်ဦးသည် Food  Panda   ဝန်ဆောင်မှုနှင့် ပတ်သက်၍ Mobile Banking ဖြင့်ငွေလွဲ၍ Order တင်ခဲ့ရာ Order Cancel ဖြစ်သွားသော်လည်း Account ထဲ့မှ ဖြတ်သွားသောငွေအား သတ်မှတ်ချိန်ကျော်လွန်သည်အထိ ပြန်လည်ပေးအပ်ခြင်းမရှိသောကြောင့် စားသုံးသူရေးရာဦးစီဌာန၊ ရန်ကုန်တိုင်းဒေသကြီးဦးစီးမှူးရုံးသို့ ဆက်သွယ်တိုင်ကြားလာပါသည်။

    အဆိုပါတိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများက Food Panda ဆိုင်သို့ မည်သို့ဆောင်ရွက်ပေးနိုင်ရေး ဖုန်းဖြင့်ဆက်သွယ်မေးမြန်းခဲ့ရာ ဆိုင်တာဝန်ခံမှ တိုင်ကြားသူ၏ Bank Account ထဲ့မှ ဖြတ်သွားသောငွေပမာဏအပြင် စောင့်ဆိုင်းကြန့်ကြာမှုအတွတ် အပိုဆောင်းငွေကိုပါ ပြန်လည်ပေးဆောင်ပြီးဖြစ်ကြောင်း အကြောင်းပြန်ကြားလာသဖြင့် ဌာနမှတိုင်ကြားသူထံ ဖုန်းဖြင့် ဆက်သွယ်မေးမြန်း အတည်ပြုရာတွင် Food  Panda  မှ ကျေနပ်အောင် ဖြေရှင်းပေးခဲ့သည့်အတွတ် တိုင်ကြားမှုအား ပိတ်သိမ်းလိုကြောင်း ပြန်လည်ဖြေကြားခဲ့သဖြင့် အမှုအား ပိတ်သိမ်းဆောင်ရွက်ခဲ့ပါသည်။ စားသုံးသူများအနေဖြင့်  မိမိတို့နစ်နာဆုံးရှုံးမှု  အမှန်တကယ် ဖြစ်ပေါ်ခဲ့ပါက ဆုံးရှုံးမှုများကို စားသုံးသူကာကွယ်ရေးဥပဒေနှင့်အညီ တိုင်ကြား၍ လမ်းကြောင်းမှန်ဖြင့် အချိန်တိုအတွင်း ထိထိရောက်ရောက် ဖြေရှင်းဆောင်ရွက်နိုင်သည့် တိုင်ကြားမှုသာဓက တစ်ခုအဖြစ် အသိပေးအပ် ပါသည်။

DOCA(ရန်ကုန်)
                                     

          (၁၆-၂-၂၀၂၂)ရက်နေ့၊ နံနက်(၁၀:၀၀)နာရီအချိန်၊ မန္တလေးတိုင်းဒေသကြီးဦးစီးမှူး ရုံးခန်းတွင် ဌာနရှိတာဝန်ရှိသူများမှ ညှော်နံ့များကြောင့် ပတ်ဝန်းကျင်အနှောင့်အယှက် ဖြစ်နေပါ၍ စားသုံးသူ များ၏တိုင်ကြားလိုမှုများနှင့် ပတ်သက်၍  တွေ့ဆုံပြီးရှင်းလင်း အသိပညာပေး ဆွေးနွေးခဲ့ပါသည်။ စားသုံးသူများအနေဖြင့် မန္တလေးမြို့၊ ပြည်ကြီးတံခွန်မြို့နယ် ဘီစကစ်စက်ရုံမှ နေ့/ည မပြတ် ညှော်နံ့များ၊ အပူနံ့များ၊ သီချင်းသံများကြောင့် ပတ်ဝန်းကျင်ရှိ လူနေအိမ်များ အနှောင့်အယှက်ဖြစ်နေ၍ တိုင်ကြားလိုကြောင်း ဆွေးနွေးခဲ့ပါသည်။  ဌာနအနေဖြင့် စားသုံးသူ ကာကွယ်ရေးဥပဒေနှင့် အညီ ဆောင်ရွက်ရပါကြောင်း၊ စားသုံးသူများအနေဖြင့် ကုန်စည်နှင့် ဝန်ဆောင်မှုများကို ကိုယ်တိုင်သုံးစွဲခြင်း၊ အခြားသူအတွက်ဝယ်ယူခြင်း၊ ကုန်စည်ကိုချေးငှားခြင်း၊ ပေးကမ်းထောက်ပံ့ခြင်းခံရသူများမှ နစ်နာဆုံးရှုံးမှုများဖြစ်ပေါ်လာပါက စားသုံးသူအခွင့်အရေး ရရှိရန်တိုင်ကြားနိုင်ပါကြောင်း၊ (Food Safety) အစားအသောက်များဘေးန္တရာယ် ကင်းရှင်းရေး နှင့် ထုတ်ကုန်များ လုံခြုံစိတ်ချရမှုရှိစေရေးအတွက် သတင်းပေးတိုင်ကြားလာပါက စစ်ဆေးပေး လျက်ရှိပါကြောင်း၊ ယခုဖြစ်စဉ်နှင့်ပတ်သက်၍ သက်ဆိုင်ရာ  ဌာနများသို့တိုင်ကြားရန်နှင့် မိမိတို့ဌာနအနေဖြင့် လိုအပ်ပါကပူးပေါင်း ပါဝင်ဆောင်ရွက်ပေးနိုင်ပါကြောင်း၊ စားသုံးသူ ကာကွယ်ရေးဥပဒေအရ စားသုံးသူ၏ အခွင့်အရေးနှင့်တာဝန်များ၊ ဦးစီးဌာန၏ လုပ်ပိုင်ခွင့်နှင့် လုပ်ငန်းတာဝန်များအား    အကျယ်တဝင့် ရှင်းလင်းခြင်း၊ တိုင်ကြားသူမှသိရှိလို၍ မေးမြန်းမှုများ ကို ဌာန၏တာဝန်ရှိသူများမှ ဖြေကြားခဲ့ပါသည်။

DOCA(မန္တလေး)

         စားသုံးသူရေးရာဦးစီးဌာနသို့ စားသုံးသူနစ်နာဆုံးရှုံးမှုများဖြစ်ပေါ်လာပါကတိုင်ကြားနိုင်ကြောင်း သိရသဖြင့် စစ်ကိုင်းတိုင်းဒေသကြီးအတွင်းနေထိုင်သူတစ်ဦးသည် မုံရွာခရိုင်စားသုံးသူသတင်းပြန်ကြား ရေးနှင့် တိုင်ကြားမှုလက်ခံဆောင်ရွက်ရေးစင်တာသို့ တိုင်ကြားလာပါသည်။ ဆန်အိတ်ဝယ်ယူပြီးနောက် အိမ်ရောက်သည့်အခါ နမူနာကြည့်ရှုဝယ်ယူခဲ့သည့် ဆန်အမျိုးအစားမဟုတ်ဘဲ ဈေးချိုသည့် ဆန်များ ဖြစ်နေသည့်အတွက် ဆန်ဆိုင်သို့ပြန်လဲပေးရန်ပြောသော်လည်း ဝယ်ပြီးပစ္စည်း ပြန်လဲမပေးကြောင်း ပြောကြားသည့်အတွက် တိုင်ကြားခြင်းဖြစ်ပါသည်။

        စားသုံးသူရေးရာဦးစီးဌာန ဦးစီးမှူးရုံးသည် တိုင်ကြားမှုနှင့်ပတ်သက်၍ မှန်ကန်မှုရှိမရှိ စစ်ဆေးရန်အတွက် တိုင်ကြားသူအား တိုင်ကြားမှုပုံစံ ဖြည့်သွင်းစေခဲ့ပြီး လိပ်စာ၊ ဆက်သွယ်ရန် ဖုန်းအမှတ်၊ မျက်မြင်သက်သေ၊ ဆန်နမူနာနှင့် ပြေစာအထောက်အထားများကို တောင်းခံစစ်ဆေး ခဲ့ပါသည်။ ပေးခဲ့ရသည့်ဈေးနှင့်ကိုက်ညီသည့် ဆန်အမျိုးအစား မဟုတ်ဘဲ တန်ဖိုးလျော့သည့်ဆန် ရရှိခြင်းသည် စိတ်ကျေနပ်မှုမရရှိသည့်အပြင် ငွေကြေးနစ်နာဆုံးရှုံးမှုဖြစ်ပါသည်။ ထို့ကြောင့်  တိုင်ကြား ခံရသည့်လုပ်ငန်းရှင်ကို ညှိနှိုင်းဖြေရှင်းရန်ခေါ်ယူခဲ့ပြီးနောက် စားသုံးသူကာကွယ်ရေးဆိုင်ရာကို သိရှိသော ကျွမ်းကျင်သူဖြစ်သည့် ဆန်လုပ်ငန်းရှင် ဆန်စက်ပိုင်ကို ဖိတ်ကြားကာ ၎င်း၏ရှေ့တွင် ဆွေးနွေးညှိနှိုင်းခဲ့ပါသည်။

          စားသုံးသူကာကွယ်ရေးဥပဒေပါ လုပ်ငန်းရှင်၏ တာဝန်များကို ရှင်းလင်းပြောကြားပြီး ကုန်စည်၏အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိစေရန်နှင့် နမူနာပစ္စည်းတွင် ဖော်ပြထားသည့်အတိုင်း တူညီစွာပါရှိစေရန် လုပ်ငန်းရှင်က အာမခံချက်ပေးရမည်ဖြစ်ကြောင်း အသိပေးဆွေးနွေးခဲ့ပါသည်။ ဆန်ဆိုင်မှ ဆန်အိတ်နေရာပြောသော်လည်း ဝယ်ယူသူကိုယ်တိုင် ဆန်အိတ်ချင်းမှား၍ သယ်ယူသွားခြင်းဖြစ်ကြောင်းသိရပါသည်။ ပေးချေခဲ့သည့်ဆန်တန်ဖိုးအောက် ဈေးနိမ့်သည့် ဆန်အမျိုးအစား မှားယွင်းသွားသည်မှာ မှန်ကန်သဖြင့် ဆန်ဆိုင်က ကွာခြားတန်ဖိုး ကျသင့်ငွေအား တိုင်ကြားသူထံသို့ ပြန်လည်ပေးအပ်ခဲ့ခြင်းဖြင့် စားသုံးသူတိုင်ကြားမှုကို ကျေနပ်အောင် ဖြေရှင်းဆောင်ရွက်ခဲ့ပါသည်။

DOCA(စစ်ကိုင်း)

          မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် ၂၀၂၁ခုနှစ် နိုဝင်ဘာလအတွင်း၌ စားသုံးသူတစ်ဦး၏ Wifi သုံးစွဲခြင်းနှင့်ပတ်သက်၍ တိုင်ကြားမှုတစ်ခုအား ဖြေရှင်းဆောင်ရွက်ပေးနိုင်ခဲ့ပါသည်။

         အဆိုပါဖြစ်စဉ်မှာ ကျောက်ပန်းတောင်းမြို့၊ ဈေးကွက်သစ်ရပ်နေ စားသုံးသူတစ်ဦးသည် ကျောက်ပန်းတောင်းမြို့နယ်တွင် ရုံးခန်းဖွင့်လှစ်၍ ဝန်ဆောင်မှုပေးနေသော  xxxxx မှWifi သုံးစွဲခြင်းကို ၂၀၂၁ ခုနှစ် ဇူလိုင်လအတွင်းတွင် (၆-လ)စာ ငွေ(၁၇၄၀၀ဝိ/-) ကျပ်အား အပြေအကျေပေးချေ၍ ဝယ်ယူသုံးစွဲခဲ့ရာမှ ၂၀၂၁ ခုနှစ်  နိုဝင်ဘာလ(၁၅)ရက်နေ့၊ နံနက်ပိုင်းတွင် Wifi သုံးစွဲ၍မရတော့ကြောင်း #### က ကျောက်ပန်းတောင်းရုံးအား အကြောင်းကြားခဲ့ရာတွင် (၄၈)နာရီ အတွင်းလာရောက်ပြင်ဆင် ပေးမည်ဟု ပြောဆိုခဲ့သော်လည်း (၂၄.၁၁.၂၀၂၁) နေ့ထိ လာရောက်ပြင်ဆင်ပေးခြင်းမရှိဘဲ (၄)ကြိမ် တိတိ ကတိပျက်ခြင်းတို့ကြောင့် စိတ်အနှောက်အယှက်ဖြစ်ရခြင်း၊ အချိန်ကုန်အလုပ်ပျက်ခြင်းနှင့် တယ်လီဖုန်းခ ကုန်ကျခြင်းများကြောင့် စားသုံးသူအနေဖြင့် နစ်နာဆုံးရှုံးမှု ဖြစ်ခဲ့၍ စားသုံးသူရေးရာဦးစီးဌာနသို့ ဖြေရှင်းဆောင်ရွက်ပေးပါရန် တင်ပြခဲ့မှုအပေါ် ၂၆.၁၁.၂၀၂၁ နေ့တွင် စားသုံးသူရေးရာဦးစီးဌာန၊ ကျောက်ပန်းတောင်း မြို့နယ်တာဝန်ခံရုံး၌ တွေ့ဆုံညှိနှိုင်း၍ စားသုံးသူကာကွယ်ရေး ဥပဒေပါ အချက်အလက်များအား ချပြရှင်းလင်းဖြေရှင်းပေးခဲ့ရာ xxxxx မှ တာဝန်ရှိသူမှ Wifi အသုံးပြုသူအား (၄၈)နာရီအတွင်းပြင်ဆင်ပေးမည်ဟုပြောဆိုခဲ့သော်လည်း မြို့တွင်း၌ Wifi ပြတ်တောက်မှုများ များပြားနေပါသဖြင့် ချက်ချင်း လာရောက်ပြင်ဆင်ပေးနိုင်ခြင်းမရှိခဲ့ပါကြောင်း၊ ယခုလိုနစ်နာဆုံးရှုံးမှုအတွက် မိမိတို့ဘက်မှ ရက်အစားထိုး(၁၀)ရက်အား ပြန်လည်အသုံးပြုခွင့် ပေးမည်ဖြစ်ပါကြောင်း၊ Wifi သုံးစွဲသူအနေဖြင့် စိတ်အနှောက်အယှက်ဖြစ်ပေါ်ခဲ့မှုအပေါ်လည်း တောင်းပန်ပါကြောင်း၊ နောက်နောင် တွင် အလားတူကိစ္စရပ်မျိုးမဖြစ် ပေါ်စေရန် ကတိပြုပါကြောင်းနှင့် တိုင်ကြားမှုကြောင့်ဖြစ်စေ၊စုံစမ်း စစ်ဆေး၍ဖြစ်စေ ဥပဒေနှင့်အညီ လိုက်နာဆောင်ရွက်ခြင်းမရှိပါက စားသုံးသူကာကွယ်ရေးဥပဒေအရ အပြစ်ပေးအရေးယူမှုအား ခံယူရမည်ကိုသိရှိရပါကြောင်းနှင့် ဥပဒေများနှင့်အညီ လိုက်နာဆောင်ရွက်သွားမည်ဖြစ်ပါကြောင်း ဝန်ခံကတိပြု လက်မှတ်ရေးထိုးစေ၍ ဖြေရှင်းဆောင်ရွက်ပေးခဲ့ရာ နစ်နာဆုံးရှုံးခဲ့သည့် Wifi ဝန်ဆောင်မှုအား သုံးစွဲသူ စားသုံးသူဘက်မှလည်း သဘောတူကျေနပ်ပါကြောင်းနှင့် ယခုကဲ့သို့ စားသုံးသူပြည်သူများ၏ နစ်နာဆုံးရှုံးမှုအား ဖြေရှင်းဆောင်ရွက်ပေးလျှက်ရှိသော စားသုံးသူရေးရာဦးစီးဌာနကိုလည်း အထူးပင် ကျေးဇူးတင်ရှိပါကြောင်း ပြန်လည်တင်ပြခဲ့မှုနှင့်ပတ်သက်၍ စားသုံသူများနစ်နာဆုံးရှုံးမှုများ ဖြေရှင်းဆောင်ရွက်ပေးနိုင်ခဲ့ကြောင်း သိရှိရပါသည်။            

စားသုံးသူရေးရာဦးစီးဌာန(မန္တလေးတိုင်းဒေသကြီး)

           မန္တလေးတိုင်းဒေသကြီးနေ တိုင်ကြားသူတစ်ဦးသည် xxxx လုပ်ငန်းနှင့်ပတ်သက်၍ ဆင့်ပွား ဈေးကွက်ဖြန့်ချိရေးလုပ်ငန်း (Multi Level Marketing ) ဆောင်ရွက်နေခြင်း ရှိ/မရှိ စစ်ဆေးပေးရန် မန္တလေးတိုင်းဒေသကြီးဦးစီးမှူးရုံးသို့ ၈-၁-၂၀၂၁ ရက်နေ့တွင် ဆက်သွယ်တိုင်ကြားလာပါသည်။

          အဆိုပါတိုင်ကြားမှုနှင့်ပတ်သက်၍ မန္တလေးတိုင်းဒေသကြီးဦးစီးမှူးရုံးမှ တာဝန်ရှိသူများက xxxx လုပ်ငန်း၏ ဈေးကွက်ရောင်းချမှု စနစ်ကိုကွင်းဆင်းစစ်ဆေးခဲ့ရာ xxxx ၏ ဈေးကွက်ဖြန့်ချိမှုပုံစံ မှာ ဆင့်ပွားဈေးကွက်ဖြန့်ချိပုံ၊ လုပ်ဆောင်ပုံများနှင့်တူညီမှုများရှိနေခြင်း၊ သုံးစွဲသူများက အရောင်း ကိုယ်စားလှယ်များထံမှ သတ်မှတ်တန်ဖိုး ၆၅၀၀ ကျပ်ဖြင့် ဝယ်ယူရပြီး CEO Level များကို ရောင်းချ ရာတွင် တစ်ဘူး ၂၉၀၀ ကျပ်ဖြင့် ရောင်းချနေခြင်း၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ ပေးအပ်သော အလှကုန်ပစ္စည်းမှတ်ပုံတင်လက်မှတ်ရရှိသည့် အလှကုန်ပစ္စည်းစာရင်းတွင် ပါဝင်မှုမရှိ ခြင်း၊ သက်ဆိုင်ရာအစိုးရဌာန၊ အစိုးရအဖွဲ့အစည်းများမှ ထုတ်ပြန်ထားသော စည်းကမ်းချက်များနှင့် အညီ မှတ်ပုံတင်ဆောင်ရွက်ထားမှုမရှိခြင်းတို့ တွေ့ရှိရသည့်အတွက် xxxx လုပ်ငန်းအား ဆက်လက် ထုတ်လုပ်ဖြန့်ဖြူးခြင်း မပြုရန် တားမြစ်ခဲ့ပြီးလုပ်ငန်းအား စောင့်ကြည့်စစ်ဆေးသွားမည်ဖြစ်ကြောင်း အသိပေးတားမြစ်ထားသော်လည်း လူမှုကွန်ရက်မှဖြစ်စေ မြေပြင်အခြေအနေတွင်ဖြစ်စေ ဆက်လက် ဆောင်ရွက်နေကြောင်း တွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေ၊ အခြားသက်ဆိုင်ရာ တည်ဆဲဥပဒေများနှင့် အရေးယူဆောင်ရွက်သွားမည်ဖြစ်ကြောင်းကို xxxx လုပ်ငန်းသို့ လိပ်မူပေးပို့ခဲ့ ပြီး ချမ်းမြသာစည်မြို့နယ်၊ အထွေထွေအုပ်ချုပ်ရေးဦးစီးမှူးရုံးနှင့် အောင်ပင်လယ်ရပ်ကွက် အုပ်ချုပ် ရေးမှူးရုံးများသို့ မိတ္တူပေးပို့အကြောင်းကြားဆောင်ရွက်ခဲ့ပြီး ၂၆-၄-၂၀၂၁ ရက်နေ့တွင်  အမှုပိတ်သိမ်း မှတ်တမ်းတင်ထားရှိပါသည်။