HighLight News

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများ၊  စီးပွားရေးလုပ်ငန်းရှင်များနှင့်တွေ့ဆုံပြီး ဥပဒေ၊ အမိန့်နှင့် ညွှန်ကြားချက်များအား ရှင်းလင်းဆွေးနွေးခြင်းများဆောင်ရွက်လျက်ရှိသည့်အပြင် ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိရာ ရွှေဘိုခရိုင်စားသုံးသူရေးရာဦးစီးဌာနမှ ဒု-ခရိုင်ဦးစီးမှူးဦးဆောင်၍  ရွှေဘိုမြို့နယ်တာဝန်ခံနှင့် စားသုံးသူရေးရာဌာနခွဲတာဝန်ခံတို့သည် မြို့နယ်ပြည်သူ့ကျန်းမာရေးဦးစီးဌာနနှင့်ပူးပေါင်း၍ (၆-၉-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုမြို့၊ အမှတ်(၄)ရပ်ကွက်နှင့်အမှတ်(၈)ရပ်ကွက်ရှိ ဆေးနှင့်ဆေးပစ္စည်းအရောင်းဆိုင်(၂)ဆိုင်ရှိ တိုင်းရင်းဆေးအမျိုးမျိုးအား ဈေးကွက်စောင့်ကြည့်စစ်ဆေးခဲ့ပါသည်။

         ထိုသို့စစ်ဆေးရာတွင် ဒု-ခရိုင်ဦးစီးမှူးက ဌာနအနေဖြင့် စားသုံးသူကာကွယ်ရေးလုပ်ငန်းများကို ဥပဒေ၊ အမိန့်၊ ညွှန်ကြားချက်များနှင့်အညီ ဆောင်ရွက်လျက်ရှိကြောင်း၊ ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်မရောက်မီကုန်စည်နှင့် ဈေးကွက်ရောက်ပြီးကုန်စည်များကို ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိကြောင်း၊  စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းများ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါ  တိုင်းရင်းဆေးအမျိုးမျိုးတွင် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဘေးထွက်ဆိုးကျိုးနှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ဖော်ပြပါရှိရမည်ဖြစ်ကြောင်းတို့ကို အသိပညာပေးဆွေးနွေးခဲ့ပြီး စားသုံးသူကာကွယ်ရေးအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ဒု-ခရိုင်ဦးစီးမှူး၊ ရွှေဘိုမြို့နယ်တာဝန်ခံနှင့် စားသုံးသူရေးရာဌာနခွဲတာဝန်ခံတို့သည်  မြို့နယ်ပြည်သူ့ကျန်းမာရေးဦးစီးဌာနနှင့်ပူးပေါင်း၍ (၅-၉-၂၀၂၄)ရက်နေ့၊ နံနက်(၁၁:၃၀)နာရီအချိန်တွင် ရွှေဘိုမြို့၊ အမှတ်(၇)ရပ်ကွက်၊ ချမ်းသာကြီးချမ်းသာရတိုက်တန်းရှိ ဆန်ရောင်းဝယ်ရေးဆိုင်(၂)ဆိုင်သို့သွားရောက်ကာ လုပ်ငန်းရှင်များအားတွေ့ဆုံခဲ့ပါသည်။

       ထိုသို့တွေ့ဆုံရာ၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက လစဉ်ထုတ်ပြန်ပေးလျက်ရှိသည့် ပြည်တွင်းဒေသထွက် စားသုံးဆန်များအား သင့်တင့်မျှတသော ဈေးကွက်ဈေးနှုန်းအမျိုးအစားအလိုက် (ဆန်ရည်ညွှန်းဈေးနှုန်းများ) စည်းကမ်းချက်များနှင့်အညီ ရောင်းချရန်၊ ဈေးနှုန်းမြှင့်တင်ရောင်းချခြင်း၊ အရည်အသွေးမမှန်မကန်ရောင်းချခြင်းမပြုရန် ဆန်စပါးသိုလှောင်ရုံနှင့် စက်တွဲသိုလှောင်ရုံများ myro တွင် မှတ်ပုံတင်ထားရန်နှင့် မှတ်ပုံတင်ထားသည့် လုပ်ငန်းရှင်များအနေဖြင့် လစဉ် ကုန်ရ/ ကုန်ထုတ်/ ကုန်လက်ကျန်စာရင်းများကို Update ပြုလုပ်ရန် အသိပညာပေးဆွေးနွေးခဲ့ပြီး ဆန်သိုလှောင်ထားရှိမှု၊ လက်ကျန်နှင့် ရောင်းချသည့်ဈေးနှုန်းဈေးကွက်အခြေအနေများကိုဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ကော့မှူး-ဒလ၊ ကော့မှူး-လှိုင်သာယာ ကားလမ်းမကြီးဘေးဝဲယာကျေးရွာများတွင် စက်သုံးဆီဖြန့်ဖြူးရောင်းချလျှက်ရှိသော စက်သုံးဆီအရောင်းဆိုင်များသို့ စက်တင်ဘာလ(၃)ရက်နေ့၊ နေ့လယ်(၁၁း၀၀)နာရီအချိန်တွင် စက်သုံးဆီများဖြန့်ဖြူးရောင်းချနေမှုအခြေအနေအား ကွင်းဆင်းစစ်ဆေးခဲ့ကြောင်း သိရှိရပါသည်။

   ထိုသို့ကွင်းဆင်းစစ်ဆေးခဲ့ရာတွင် ကော့မှူးမြို့နယ် အထွေထွေအုပ်ချုပ်ရေးဦးစီးဌာနမှ ဒုတိယ မြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်ရဲတပ်ဖွဲ့မှူးနှင့်တပ်ဖွဲ့ဝင်များ၊ မြို့နယ်မီးသတ်ဦးစီးဌာနမှမြို့နယ်ဦးစီးမှူး၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိ၊ မြို့နယ်လျှပ်စစ်ဦးစီး ဌာနမှမြို့နယ်ဦးစီးမှူးနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ကော့မှူးမြို့နယ်အတွင်းရှိ ကော့မှူး-ဒလ၊ ကော့မှူး-လှိုင်သာယာ ကားလမ်းမကြီးဘေးဝဲယာရှိ ဗိုလ်ချုပ်လမ်း၊ မကျီးကန်ကျေးရွာ၊ ရတနာစက်သုံးဆီဆိုင်၊ ဗိုလ်ချုပ်လမ်း၊ တလုပ်ကျေးရွာ၊ Max စက်သုံးဆီဆိုင်နှင့် ဗိုလ်ချုပ်လမ်း၊ အဖျောက်ကျေးရွာမှ ရွှေသရဖူစက်သုံးဆီဆိုင်တို့မှ ဆိုင်တာဝန်ခံတို့နှင့် တွေ့ဆုံ၍ ယာဉ်များစောင့်ဆိုင်းဝယ်ယူနေရမှုအခြေအနေ၊ စက်သုံးဆီအမျိုးအစားအလိုက် ခွဲတမ်းအချိုးကျစနစ်ဖြင့် ရောင်းချနေခြင်းရှိ/ မရှိ၊ အပြည့်အဝဖြန့်ဖြူးရောင်းချပေးနိုင်ခြင်းရှိ/ မရှိ တာဝန်ရှိသူများကမေးမြန်းခဲ့ရာတွင် ဆိုင်တာဝန်ခံများက မိမိတို့ဆိုင်များတွင် သတ်မှတ်ထားသည့် စက်သုံးဆီခွဲတမ်းများကို အပြည့်အဝအချိန်မှီထုတ်ယူရရှိနေပါသဖြင့် ယာဉ်များတန်းစီစောင့်ဆိုင်း ဝယ်ယူနေရခြင်းမရှိပါကြောင်း ဆီအမျိုးအစားအလိုက်အပြည့်အဝဖြန့်ဖြူးရောင်းချပေးလျှက်ရှိ‌ကြောင်း ပြန်လည်ဖြေကြားခဲ့ပြီး ကော့မှူးမြို့နယ်စက်သုံးဆီစိစစ်ရေးအဖွဲ့တာဝန်ရှိသူများက စက်သုံးဆီသိုလှောင်ကန်များ၏ ဆီလက်ကျန်အခြေအနေများ ဆီရောင်းချဖြန့်ဖြူးနေမှုအခြေအနေများအား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

         (၃-၉-၂၀၂၄)ရက်နေ့၊ နံနက်(၁၀:၀၀)နာရီအချိန်၌ စားသုံးသူရေးရာဦးစီးဌာနမှ ဝန်ထမ်းများသည် အထွေထွေအုပ်ချုပ်ရေးဦးစီးဌာနအစည်းအဝေးခန်းမတွင် ရပ်ကွက်ကျေးရွာအုပ်ချုပ်ရေးမှုး (၇၇)ဦးကို  အွန်လိုင်းမှတ်ပုံတင်ခြင်းနှင့်စပ်လျဥ်း၍ အသိပညာပေးဆွေးနွေးခြင်းပြုလုပ်ခဲ့ကြသည်။

         ထိုသို့ဆွေးနွေးရာတွင် ဒု-ခရိုင်ဦးစီးမှူး ဦးအောင်ဇော်ဦးက ရပ်ကျေးအုပ်ချုပ်ရေးမှူးများကို  စားသုံးသူနှင့် စီးပွားရေးလုပ်ငန်းရှင်အကြား စားသုံးသူအခွင့်အရေး ထိခိုက်နစ်နာမှုအတွက် ဥပဒေဖြင့် ကာကွယ်ဆောင်ရွက်မှုများကိုရှင်းလင်းခြင်း၊ အွန်လိုင်းမှ ကုန်စည်နှင့်ဝန်ဆောင်မှုများကိုရောင်းချသည့် မှတ်ပုံတင်ရန်အကျုံးဝင်သည့် လုပ်ငန်းရှင်များမှာ ပြည်တွင်း၌ အခြေပြုသည်ဖြစ်စေ၊ ပြည်ပ၌ အခြေပြုသည်ဖြစ်စေ မြန်မာနိုင်ငံအတွင်းနေထိုင်သူများကို ငွေကြေးဖြင့် အွန်လိုင်းမှတစ်ဆင့် ဦးတည်၍ ရောင်းချသောလုပ်ငန်းရှင်များပါဝင်ကြောင်း၊ ထို့နောက် ဆိုရှယ်မီဒီယာမှတစ်ဆင့် ငွေကြေးရယူဈေးရောင်းချသူအားလုံး၊ Website ပေါ်မှာ ဈေးရောင်းချသူများ အားလုံး၊ မိုဘိုင်း App တည်ထောင်၍ ထိုမိုဘိုင်း app ဖြင့် ဈေးရောင်းချသူအားလုံးအနေဖြင့်  မှတ်ပုံတင်ခြင်းဆောင်ရွက်ရမည်ဖြစ်ကြောင်း၊ အွန်လိုင်းရောင်းချမှုတွင် မှတ်ပုံတင်မရှိဘဲ ရောင်းချနေမှုကိုစစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်းဟောပြောခဲ့ပြီး တက်ရောက်လာသူ ရပ်ကျေးအုပ်ချုပ်ရေးမှူးများ၏ သိလိုသည်များမေးမြန်းမှုကို ပြန်လည်ဖြေရှင်းဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်ခင်စန်းအေးနှင့် ဝန်ထမ်းတို့သည် ၂၀၂၄ခုနှစ်၊ စက်တင်ဘာလ (၄)ရက်နေ့၊ နံနက် (၁၀:၃၀) နာရီအချိန်တွင် ဘိုကလေးမြို့ ၊ (၁) ရပ်ကွက်ရှိ “သုခ သုံးထောင့်မုန့်” လုပ်ငန်းသို့သွားရောက်၍ MSMEs နှင့် ထုတ်ကုန်လုံခြုံစိတ်ချရမှုရှိစေရေးတို့အတွက် ကွင်းဆင်းစိစစ်ခဲ့ကြပါသည်။

       ထိုသို့ကွင်းဆင်းစစ်ဆေးရာတွင် မြို့နယ်တာဝန်ခံ ဒေါ်ခင်စန်းအေးက “သုခ သုံးထောင့်မုန့်” ထုတ်လုပ်နေမှု၊ ဈေးနှုန်းဈေးကွက်နှင့် ဖြန့်ဖြူးမှုအခြေအနေတို့ကို မေးမြန်းခဲ့ရာ တစ်နေ့လျှင် ဘူးအရေအတွက် (၂၀၀) ခန့်ထုတ်လုပ်လျက်ရှိပြီး တစ်ဘူးလျှင် မုန့်အခုရေ (၅) ခုပါဝင်ပြီး ဈေးနှုန်းအနေဖြင့် တစ်ဘူးလျှင် (၃၀၀၀) ကျပ်ဖြင့်ရောင်းချနေကြောင်း၊ လုပ်သား (၃)ဦးဖြင့် လည်ပတ်လုပ်ကိုင်လျက်ရှိပါသည်။ ဈေးကွက်အနေဖြင့် ဖျာပုံ၊ ဘိုကလေး၊ ကျိုက်လတ်၊ ဒေးဒရဲမြို့နယ်များသို့ ရောင်းချနေကြောင်းသိရသည်။ ထို့နောက် မြို့နယ်တာဝန်ခံ ဒေါ်ခင်စန်းအေးက ထုတ်လုပ်နေသောမုန့်များ သန့်ရှင်းသပ်ရပ်ပြီး ကုန်အညွှန်းအမှတ်အသားများပြည့်စုံစွာပါဝင်မှုရှိ/မရှိတို့ကို MSMEs နှင့် ထုတ်ကုန်လုံခြုံစိတ်ချရမှုရှိစေရေးတို့အတွက် ကွင်းဆင်းစိစစ်ကြောင်း သတင်းရရှိပါသည်။

DOCA(ဧရာဝတီ)