HighLight News

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ စားသုံးသူရေးရာဌာနခွဲမှ လက်ထောက်ညွှန်ကြားရေးမှူး ဦးကျော်စိုးရီနှင့်အဖွဲ့သည် (၁၂-၉-၂၀၂၄)ရက်နေ့၊ ‌နေ့လယ် (၁၃:၀၀)နာရီ အချိန်တွင် ပုသိမ်မြို့နယ်၊ အမှတ်(၄) အခြေခံပညာအထက်တန်းကျောင်း၌ ကျောင်းအုပ်ဆရာမကြီးအပါအဝင် ဆရာ/ဆရာမ (၄၀)ဦး၊ ကျောင်းသား/သူ (၁၉၆)ဦး၊ စုစုပေါင်း (၂၃၆)ဦးအား စားသုံးသူကာကွယ်ရေးဆိုင်ရာ အသိပညာပေးဟောပြောပွဲကျင်းပပြုလုပ်ခဲ့ပြီး၊ ကျောင်းမုန့်ဈေးတန်းအား ဈေးကွက်စောင့်ကြည့်စစ်ဆေးခြင်းပြုလုပ်ခဲ့ပါသည်။

          အဆိုပါဟောပြောပွဲတွင် စားသုံးသူရေးရာဦးစီးဌာန၊ စားသုံးသူရေးရာဌာနခွဲမှ လက်ထောက်ညွှန်ကြားရေးမှူး ဦးကျော်စိုးရီက မိတ်ဆက်စကားပြောကြားခဲ့ပြီး၊ စားသုံးသူရေးရာဌာနပေါ်ပေါက်လာပုံ၊ စားသုံးသူရေးရာဌာနခွဲ၏ မျှော်မှန်းချက်၊ ရည်မှန်းချက်၊ စားသုံးရန်မသင့်သော အစားအသောက်များအကြောင်းကို ရှင်းလင်းဟောပြောခဲ့ပါသည်။ ဆက်လက်၍ ထုတ်ကုန်လုံခြုံစိတ်ချရမှုဌာနခွဲမှ ဦးစီးမှူး ဒေါ်မိုးမိုးခိုင်က ထုတ်ကုန်လုံခြုံစိတ်ချရမှုဆိုင်ရာ သိကောင်းစရာများကိုဟောပြောခဲ့ပြီး၊ စားသုံးသူရေးရာဌာနခွဲမှ ဒု-ဦးစီးမှူး ဒေါ်စုသင်းအောင်က စားသုံးသူသတင်းလက်ခံဆောင်ရွက်ရေးစင်တာ (CICC) အကြောင်းသိကောင်းစရာများကိုဟောပြောခဲ့ပြီး ကျောင်းသား/သူများအား စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ပါသည်။

         ထို့နောက် ကျောင်းအုပ်ဆရာမကြီးက ကျေးဇူးတင်စကားပြန်လည်ပြောကြားခဲ့ပြီး ကျောင်းမုန့်ဈေးတန်းအား ဈေးကွက်စောင့်ကြည့်စစ်ဆေးခဲ့ပြီး အခမ်းအနားကို အောင်မြင်စွာ ကျင်းပပြုလုပ်ခဲ့ကြောင်းသိရှိရပါသည်။ 

DOCA(ဧရာဝတီ)      

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးသည် ၂၀၂၄ခုနှစ်၊ စက်တင်ဘာလ ၁၃ရက်နေ့၊ နံနက် ၁၁:၀၀ နာရီအချိန်တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဒေါ်အိမွန်ကျော် (အငယ်တန်းစာရေး) တို့သည် ကန့်ဘလူမြို့၊ အမှတ်(၃)ရပ်ကွက်ရှိ  ကုန်စုံဆိုင်များတွင်ရောင်းချနေသော စားသောက်ကုန်နှင့် လူသုံးကုန်ပစ္စည်းများအား ဈေးကွက်စောင့်ကြည့်စစ်ဆေးခဲ့ကြောင်းသိရသည်။

       ထိုသို့ကွင်းဆင်းစစ်ဆေးရာ စားသုံးသူများ နေ့စဉ်အသုံးပြုလျက်ရှိသော ကုန်စည်နှင့် ဝန်ဆောင်မှုများကို ဘေးအန္တရာယ်ကင်းရှင်းစွာအသုံးပြုနိုင်စေရန်ရည်ရွယ်၍ ဈေးကွက်အတွင်း ရောင်းချနေသည့် စားသောက်ကုန်နှင့် လူသုံးကုန်ပစ္စည်းများတွင် ကုန်အညွှန်အမှတ်အသားများကို (၂/၂၀၁၉)နှင့်အညီ မြန်မာဘာသာဖြင့်ဖော်ပြထားခြင်းရှိ/မရှိစစ်ဆေးခဲ့ကြောင်း၊ တာဝန်ခံက လုပ်ငန်းရှင်များအနေဖြင့် မိမိတို့ရောင်းချသည့်ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားသည့်ကုန်စည်များ၊ သက်ဆိုင်ရာဌာနများ၏ ထောက်ခံချက်များ စသည်တို့ပြည့်စုံစွာဖော်ပြထားသည့် ကုန်စည်များကိုရောင်းချရန်နှင့် မိမိတို့၏ကုန်စည်များကို အွန်လိုင်းစနစ်မှတစ်ဆင့် ရောင်းချမည်ဆိုပါက အွန်လိုင်းစနစ်ဖြင့် ရောင်းချခွင့်မှတ်ပုံတင်လက်မှတ်ရရှိပြီးမှသာ ရောင်းချခွင့်ရှိကြောင်း၊ မှတ်ပုံတင်လက်မှတ်မရှိဘဲ ရောင်းချပါက ဥပဒေအရ အရေးယူခံရနိုင်ကြောင်း အသိပညာပေးပြောကြားခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးအစည်းအဝေးခန်းမ၌  ၁၂-၉-၂၀၂၄ ရက်နေ့၊ နေ့လယ် (၁၄း၀၀) နာရီအချိန်တွင် ခေတ္တတိုင်းဒေသကြီးဦးစီးမှူးသည်   Monkeypox မျောက်ကျောက်ရောဂါသိကောင်းစရာနှင့် ရောဂါကာကွယ်ထိန်းချုပ်ရေး၊ ကုသရေးလုပ်ငန်းစဉ်များနှင့် ဆောင်ရွက်ထားရှိမှုများအကြောင်းကို ရှင်းလင်းဆွေးနွေးခဲ့ရာ အရာထမ်းများ၊ အမှုထမ်းများ၊ စုစုပေါင်း ( ၄၀ ) ဦးတက်ရောက်ခဲ့ကြောင်းသိရပါသည်။

          အဆိုပါအခမ်းအနားတွင် ခေတ္တတိုင်းဒေသကြီးဦးစီးမှူး ဒေါ်ရီလင်းထွဋ်က ဝန်ထမ်းများအား  မျောက်ကျောက်ရောဂါနှင့်ပတ်သက်၍ ရှင်းလင်းဆွေးနွေးခဲ့ရာ မျောက်ကျောက်ရောဂါသည် ဗိုင်းရပ်စ်ပိုးကြောင့်ဖြစ်ပွားသည့် ကူးစက်ရောဂါတစ်မျိုးဖြစ်ကြောင်း၊ မျောက်မှလူသို့ ကူးစက်မှုကို စတင်တွေ့ ရှိခဲ့ကြောင်းနှင့် မျောက်ကျောက်ရောဂါဖြစ်ပွားမှုရောဂါကူးစက်နည်းလမ်းများ၊ ရောဂါကူးစက်ခံရနိုင် ဘွယ်အခွင့်အလမ်းများသူများ၊ မျောက်ကျောက်ရောဂါဖြစ်ပွားခြင်းမှ ကာကွယ်နိုင်သောနည်းလမ်းများ၊ မျောက်ကျောက်ရောဂါလက္ခဏာများ၊ မျောက်ကျောက်ရောဂါကြောင့် သေဆုံးနိုင်မှုနှင့် ရောဂါကုသခြင်းအကြောင်းများ၊ ရောဂါကာကွယ်ထိန်းချုပ်ရေးနှင့် ကုသရေးလုပ်ငန်းစဉ်များအကြောင်းကို ရှင်းလင်းဆွေးနွေးခဲ့ပါသည်။

         ဆက်လက်၍ စစ်ကိုင်းတိုင်းဒေသကြီးမှ မျောက်ကျောက်ရောဂါကာကွယ်ထိန်းချုပ်ရေးနှင့် ကုသရေးဆောင်ရွက်ထားရှိမှုမှာ   ဒေသအာဏာပိုင်များနှင့် ဌာနဆိုင်ရာများအား အသိပေးဆွေးနွေးခြင်း၊  ပြည်သူလူထုအတွင်း ရောဂါကာကွယ်ရေးနည်းလမ်းများအး ကျန်းမာရေးအသိပညာပေးခြင်း၊ ရောဂါစောင့်ကြပ်ကြည့်ရှု့ခြင်း (အပြည်ပြည်ဆိုင်ရာလေဆိပ်၊ ဆိပ်ကမ်းနှင့်နယ်စပ်ဝင်/ ထွက်ပေါက်များ)နှင့် တုံ့ပြန်ဆောင်ရွက်ခြင်းတို့ကိုမြှင့်တင်လုပ်ဆောင်ခြင်း၊ ဝန်ကြီးဌာနများနှင့်ပူးပေါင်းဆောင်ရွက်ခြင်း၊ ဆေးရုံဆေးခန်းများတွင် သီးခြားလူနာဆောင်များ ပြင်ဆင်ထားရှိခြင်းနှင့် ရောဂါပိုးထိန်းချုပ်ရေးလုပ်ငန်းရပ်များကို စနစ်တကျလိုက်နာဆောင်ရွက်ခြင်း၊ လိုအပ်သောဆေးနှင့် ရောဂါကာကွယ်ရေးပစ္စည်းများစုဆောင်းပြင်ဆင်ထားရှိခြင်း၊ မိတ်ဖက်အဖွဲ့အစည်း/ လူမူရေးအသင်းများနှင် စည်းရုံးပူးပေါင်းဆောင်ရွက်ခြင်း၊ အချိန်နှင့်တပြေးညီ သတင်းပေးပို့ခြင်း၊ ရောဂါကာကွယ်ရေးနှင့် ကုသရေးလုပ်ငန်းများကို အဆင့်ဆင့်ကြီးကြပ်ခြင်းဆောင်ရွက်ထားလျက်ရှိကြောင်းသိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှမုံရွာမြို့နယ်တာဝန်ခံ ဒေါ်စန်းစန်းဝေသည် (၁၁-၉-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြု (Community Center) ခန်းမ၌ အွန်လိုင်းစနစ်ဖြင့်ရောင်းချခြင်း (Online Sale) လုပ်ငန်းများ မှတ်ပုံတင်လက်မှတ်လျှောက်ထားခြင်းနှင့်ပတ်သက်၍ သိကောင်းစရာများကို အသိပညာပေး Talk Show ကျင်းပပြုလုပ်ခဲ့ကြပါသည်။

        စားသုံးသူရေးရာဦးစီးဌာန၊ မုံရွာမြို့နယ်တာဝန်ခံ ဒေါ်စန်းစန်းဝေက အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်အကြောင်း၊ ကုန်စည်/ဝန်ဆောင်မှုကို Online ဖြင့် အရောင်းအဝယ်လုပ်ငန်းလုပ်ကိုင်နေကြသူမည်သူမဆို အွန်လိုင်းစနစ်ဖြင့်ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဖြစ်ကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းကို ဆောင်ရွက်လိုသူများအနေဖြင့် စီးပွားရေးနှင့်ကူးသန်းရောင်းဝယ်ရေးဦးစီးဌာန၊ ကုန်သွယ်ရေးဦးစီးဌာနက သတ်မှတ်ထားသော လျှောက်လွှာပုံစံများတွင်ဖြည့်သွင်းပြီး အွန်လိုင်းစနစ်နှင့် ဦးစီးဌာနသို့ လျှောက်ထားရမည်ဖြစ်ကြောင်း၊  Online မှတ်ပုံတင်လျှောက်ထားရာတွင် အမျိုးအစား (၂) မျိုးရှိပြီး မှတ်ပုံတင်လျှောက်ထားလျှင် ပေးသွင်းရမည့်မှတ်ပုံတင်ကြေးများ၊ သက်တမ်းတိုးကြေးများ၊ ပြင်ဆင်ချက်တစ်ချက်ပြင်ဆင်လိုလျှင် သတ်မှတ်ထားသည့်ပြင်ဆင်ကြေးများအကြောင်း၊ မှတ်ပုံတင်လက်မှတ်ရရှိပြီး ရောင်းချသူများအနေဖြင့် ရရှိနိုင်သည့်အခွင့်အရေးများအကြောင်းကို    ဆွေးနွေးပြောကြားခဲ့ကြောင်းသိရှိရပါသည်။

DOCA(စစ်ကိုင်း)

       စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ သာယာဝတီခရိုင်ဦးစီးမှူးရုံးရှိ ခရိုင်ဦးစီးမှူး၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ဝန်ထမ်းများသည် (၉-၉-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် မင်းလှမြို့အတွင်းရှိ အခြေခံလူသုံးကုန်ပစ္စည်းများနှင့် အိမ်သုံးဆေးဝါးများပြတ်လပ်မှုရှိ/မရှိ ကွင်းဆင်းစစ်ဆေးခြင်းပြုလုပ်ဆောင်ရွက်ခဲ့ကြောင်းသိရှိရသည်။

     ထိုသို့ကွင်းဆင်းဆောင်ရွက်ရာတွင် လူသုံးကုန်ပစ္စည်းများဖြစ်သော သွားတိုက်ဆေး၊ ကိုယ်တိုက်ဆပ်ပြာ၊ ဆပ်ပြာအမျိုးမျိုး၊ တစ်ကိုယ်ရည်သုံးသန့်ရှင်းရေးပစ္စည်းများ၊ အခြေခံစားသောက်ကုန် (၁၄)မျိုးဖြစ်သော ဆန်၊ ဆီ၊ ငရုတ်၊ ကြက်သွန်၊ အသားငါး၊ ကြက်ဥ၊ ဘဲဥ၊ ကုလားပဲ၊ အာလူး၊ အိမ်သုံးဆေးဝါးများဖြစ်သော အဖျားပျောက်ဆေး၊ နှာစေးပျောက်ဆေး၊ ပိုးသတ်ဆေး၊ အစာအိမ်ဆေး၊ ဓာတ်ဆား၊ လိမ်းဆေးအမျိုးမျိုးရောင်းချသော စတိုးဆိုင်များနှင့် အိမ်သုံးဆေးဝါးဆိုင်များသို့ သွားရောက်ကွင်းဆင်းကာ ပစ္စည်းများပြတ်လပ်မှုရှိ/ မရှိစစ်ဆေးရာ ပြတ်လပ်မှုမရှိကြောင်းနှင့် ပုံမှန်အတိုင်း အ‌ရောင်းအဝယ်ဖြစ်နေကြောင်းသိရှိရပါသည်။

DOCA(ပဲခူး)