HighLight News

     ၂၄.၅.၂၀၂၄ ရက်နေ့နှင့် ၂၅.၅.၂၀၂၄ ရက်နေ့တို့တွင် မော်လမြိုင်မြို့၊ ရတနာထွန်းပွဲရုံနယ်မြေသို့ ယာဉ်အမှတ်၊ 6B/3787 ဖြင့်တင်ဆောင်လာသော စားအုန်းဆီ တစ်ပေပါလျှင် ပိဿာ(၁၁၀)ပါရှိသည့် စားအုန်းဆီပေပါပေါင်း(၉၀)လုံးရောက်ရှိလာသဖြင့် စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံနှင့် တာဝန်ရှိသူများက သွားရောက်စစ်ဆေးခဲ့ကြောင်း သိရှိရသည်။

   အဆိုပါ စားအုန်းဆီပေပါ (၉၀)အား အထိုင်ရောင်းချနေသည့်စားအုန်းဆီလုပ်ငန်းရှင် (၃) ဦးတို့မှ သတ်မှတ်ရည်ညွှန်းဈေးအတိုင်း ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(မွန်)

   ၂၉-၅-၂၀၂၄ ရက်နေ့တွင် စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ ရေကြောင်းရဲတပ်ဖွဲ့၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာန၊ မီးသတ်တပ်ဖွဲ့ဝင်တို့ပါဝင်သော ပူးပေါင်းစစ်ဆေးရေးအဖွဲ့ဖြင့် မော်လမြိုင်မြို့နယ်အတွင်း စက်သုံးဆီလိုအပ်မှုအတွက် ရန်ကုန်တိုင်းဒေသကြီးမှထွက်ခွာလာပြီး မော်လမြိုင်မြို့၊ မုပွန်ကျောက်ချစခန်းသို့ ဝင်ရောက်လာသည့် MT Denko Princess ဆီတင်သင်္ဘောအားကွင်းဆင်းစစ်ဆေးခဲ့သည်။

    ပူးပေါင်းစစ်ဆေးရေးအဖွဲ့အနေဖြင့် စက်သုံးဆီတင်သင်္ဘောများတွင် တရားမဝင်စက်သုံးဆီများ ဝင်ရောက်မှုမရှိစေရေးအတွက် သက်ဆိုင်ရာကြီးကြပ်အဖွဲ့ဝင်ဌာနများနှင့် ပူးပေါင်းကွင်းဆင်းဆောင်ရွက်ခဲ့ကြောင်း သိရှိရပါသည်။

DOCA(မွန်)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည်(၂၈-၅-၂၀၂၄)ရက်နေ့ နေ့လယ်ပိုင်းက တောင်ငူခရိုင်အတွင်းရှိဘူးသွင်းစားသုံးဆီထုတ်လုပ်ဖြန့်ဖြူးရောင်းချသည့် လုပ်ငန်းရှင်များနှင့်တွေ့ဆုံ၍ မြန်မာနိုင်ငံအစားအသောက်နှင့် ဆေးဝါးအာဏာပိုင်အဖွဲ့မှထုတ်ပြန်သည့် အမိန့်အမှတ် ၂/ ၂၀၂၄နှင့်စပ်လျဉ်း၍ ရှင်းလင်းပြောကြားပါသည်။

  မြန်မာနိုင်ငံအစားအသောက်နှင့် ဆေးဝါးအာဏာပိုင်အဖွဲ့သည် ဟင်းသီးဟင်းရွက်ဆီများကိုရောနှောဆီအဖြစ်ရောစပ်ရာတွင် အမျိုးအစားနှစ်မျိုးကိုသာရောင်းချရန်၊ ဟင်းသီးဟင်းရွက်ဆီတစ်မျိုးသည် အနည်းဆုံး ၄၀ရာခိုင်နှုန်းဖြစ်စေရန်၊ မည်သည့်အနံ့မျှထည့်သွင်းခြင်းမပြုရန်၊ တိရစ္ဆာန်အဆီနှင့် ဝါစေ့ဆီကြမ်းတို့ကို ရောနှောဆီအဖြစ်အသုံးမပြုရန်၊ အမှတ်တံဆိပ်ကပ်နှိပ်ရာတွင် ရာခိုင်နှုန်းများသည့်ဆီအမျိုးအမည်ကိုဦးစားပေးဖော်ပြရန်၊ ရှေ့မြင်ကွင်းမျက်နှာပြင်ပေါ်တွင် ရောနှောဆီဆိုသည့်အမည်ကို မြင်သာသည့်နောက်ခံတွင်ဖတ်ရလွယ်ကူစေရန်နှင့်ကွဲပြားစွာဖော်ပြရန်အမိန့်ထုတ်ပြန်ထားခြင်းကို လုပ်ငန်းရှင်များအား အသိပေးရှင်းလင်းပြောကြားပါသည်။

   စားသုံးဆီထုတ်လုပ်သည့်လုပ်ငန်းရှင်များအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/ ၂၀၁၉နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/ ၂၀၂၁တို့ကို လိုက်နာဆောင်ရွက်ရမည့်အပြင် မြန်မာနိုင်ငံအစားသောက်နှင့် ဆေးဝါးအာဏာပိုင်အဖွဲ့၏ အမိန့်အမှတ် ၂/ ၂၀၂၄ တို့ကို လိုက်နာဆောင်ရွက်ရန်လိုအပ်ကြောင်း ရှင်းလင်းပြောကြားခဲ့ကြောင်းနှင့် တွေ့ဆုံပွဲသို့ လုပ်ငန်းရှင် ၁၆ ဦး တက်ရောက်ကြောင်း သိရှိရပါသည်။

DOCA(ပဲခူး)

        သီရိလင်္ကာကျွန်းနိုင်ငံမှ လက်ဖက်ခြောက်ထုတ်လုပ်သော လုပ်ငန်းရှင်များသည် အလုပ်သမားများအား လုပ်ခလစာ ၇၀ရာခိုင်နှုန်းတိုးမြှင့်ပေးရန် အစိုးရ၏ ထုတ်ပြန်ခဲ့သည့် အမိန့်ကို ၂၀၂၄ခုနှစ်၊ မေလ ၂၇ရက်‌နေ့ (တနင်္လာနေ့)က ရှုတ်ချခဲ့ပြီး ၎င်းတို့၏လက်ဖက်ခြောက်သည် တစ်ကမ္ဘာလုံးတွင် ယှဉ်ပြိုင်နိုင်စွမ်းမရှိသည့်အပြင် နိုင်ငံအတွက် ငွေကြေးအခက်အခဲများပေါ်ပေါက်လာစေရန် ဒေါ်လာငွေများလျော့နည်းသွားစေမည်ဟုပြောဆိုခဲ့သည်။

        သီရိလင်္ကာမှထုတ်လုပ်သော စီလွန်လက်ဖက်ခြောက်သည် နာမည်ကြီးလူကြိုက်များပြီး နှစ်စဉ်နိုင်ငံအတွင်းမှထုတ်လုပ်သော လက်ဖက်ခြောက်ကီလိုသန်း၂၅၀၏ ၉၅ရာခိုင်နှုန်းခန့် အား ပြည်ပသို့တင်ပို့ရောင်းချလျက်ရှိသည်။ နိုင်ငံအတွင်းရှိ လက်ဖက်ခြောက်လုပ်ငန်းများတွင် အလုပ်သမားအင်အား ၆၁၅၀၀၀ခန့်အပ်ထားရှိကာ လုပ်ငန်းများလည်ပတ်လျက်ရှိကြောင်းသိရသည်။

          အစိုးရသည် အလုပ်သမားများ၏ တစ်ရက်တာလုပ်ခများအား ၁၀၀၀ရူပီမှ ၁၇၀၀ရူပီသို့တိုးမြှင့်ပေးရန် အမိန့်ပေးခဲ့ခြင်းဖြစ်သည်။ “ဒါဟာ တရားမျှတမှုမရှိပါဘူး။ ဒီဆုံးဖြတ်ချက်ဟာ မည်သည့်တိုင်ပင်ဆွေးနွေးခြင်းမှမရှိဘဲ ချမှတ်ခဲ့တာဖြစ်ပြီး သီရိလင်္ကာရဲ့လက်ဖက်ခြောက်အရည်အသွေးကို ကျဆင်းလာစေနိုင်ပါတယ်” ဟု စီလွန်လက်ဖက်ခြောက်စိုက်ပျိုးရေးတောင်သူများအသင်းမှ ပြောရေးဆိုခွင့်ရှိသူ Roshan Rajaduria က သတင်းထောက်များအား ပြောကြားခဲ့သည်။

         လာမည့်လမှစတင်၍ လစာတိုးပေးရမည်ဟု သီရီလင်္ကာအလုပ်သမားဝန်ကြီးဌာနက ၂၆ရက်နေ့ (တနင်္ဂနွေ)တွင် ပြောကြားခဲ့ပြီး လိုက်နာရန်ငြင်းဆန်သည့် စိုက်ခင်းကုမ္ပဏီများကို အစိုးရက သိမ်းယူနိုင်ကြောင်း သတိပေးပြောကြားခဲ့သည်။ လုပ်ခလစာတိုးမြှင့်မှုကို အကောင်အထည်ဖော်ဆောင်ရွက်ပါက စိုက်ခင်းကုမ္ပဏီများအတွက် ရူပီ၃၅ဘီလီယံ ကုန်ကျမည်ဖြစ်ကြောင်း အဆိုပါအသင်းက ပြောကြားခဲ့သည်။

         သီရိလင်္ကာနိုင်ငံ၏ ဘဏ္ဍာရေးအကြပ်အတည်းများကြောင့် လူဦးရေ၏ ၄ပုံ ၁ပုံခန့်သည် ဆင်းရဲနွမ်းပါးလာခဲ့ပြီး ထိုပြဿနာအားဖြေရှင်းရန်အတွက် စိုက်ခင်းကုမ္ပဏီများနှင့် အလုပ်သမားသမဂ္ဂများသည် အလုပ်သမားများကိုလစာတိုးပေးရန် လအတော်ကြာညှိနှိုင်းမှုများပြုလုပ်ခဲ့ကြကြောင်းသိရှိရပါသည်။

Source: Channelnewsasia.com

DOCA(ရန်ကုန်)

      စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်ခိုင်ရွှေ၊ ဒုကြီးကြပ်ရေးမှူးပါ (၃)ဦးတို့သည် (၂၇-၅-၂၀၂၄)ရက်နေ့၊ နံနက်(၁၀:၃၀)နာရီအချိန်တွင် အင်းစိန်မြို့နယ်၊ မြို့နယ်ကျန်းမာရေးဦးစီးဌာနမှ ကျန်းမာရေးမှူး-၄ ဦးသန်းထိုက်ဇော်၊ အင်းစိန်ဈေးတာဝန်ခံ ဦးလှသူပါ(၂)ဦး၊ အင်းစိန်ဈေးအတွင်းရှိ ပြည့်ဝဆေးနှင့်ဆေးပစ္စည်းဆိုင်ပိုင်ရှင် ဒေါ်အိမာအား စားသုံးသူအသိပညာပေးဆွေးနွေးပြောကြားခဲ့ပါသည်။

        ထိုသို့ဆွေးနွေးပြောကြားရာတွင် စားသုံးပြည်သူများဘေးအန္တရာယ်ကင်းရှင်းစေရေးအတွက် ထုတ်ကုန်လုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသား၊ မြန်မာနိုင်ငံဆေးဝါးမှတ်ပုံတင်အမှတ်ပါရှိသည့် ဆေးဝါးများကိုသာရောင်းချရန်၊ စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာအမှတ်(၂၁/၂၀၂၀)ဖြင့် Covid-19 ကာကွယ်ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြုပစ္စည်းများ၊ ဆေးဝါးများ၊ စားသုံးကုန်ပစ္စည်းများအား ဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း (သို့မဟုတ်) ဈေးကစားရန်ရည်ရွယ်ချက်ဖြင့်သိုလှောင်ခြင်းကိုတားမြစ်သည့် အမိန့်ကြော်ငြာစာများကို ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ရန်ကုန်)