HighLight News

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေး၊ ချောက်ခရိုင်အတွင်းရှိဝန်ထမ်းများသည် ဌာန၏မျှော်မှန်းချက်ဖြစ်သော “ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်ရေးနှင့် စားသုံးသူ ကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများအပြင် စားသုံးသူကာကွယ်ရေးအသိပညာပေးဆွေးနွေးခြင်းနှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်းများကို လစဉ်လျာထားချက်ချမှတ် ဆောင်ရွက်လျက်ရှိပါသည်။

    မကွေး၊ ချောက်ခရိုင်အတွင်း၌ မြို့နယ်(၆)ခုရှိရာ ၂၀၂၄-ခုနှစ်၊ မေလအတွင်း စားသုံးသူကာကွယ်ရေးအသိပညာပေးဆွေး‌နွေးခြင်း (၁၁)ကြိမ်နှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်း (၂၃)ကြိမ် ဆောင်ရွက်နိုင်ခဲ့ပြီး  စားသုံးသူကာကွယ်‌ရေးဥပဒေပါ စားသုံးသူများရရှိနိုင်မည့် အခွင့်အရေးများ၊ လိုက်နာရမည့်တာဝန်များ၊ စီးပွားရေးလုပ်ငန်းရှင်တို့လိုက်နာရမည့်တာဝန်များ၊ တားမြစ်ချက်များ၊ ပြစ်မှု/ ပြစ်ဒဏ်များနှင့် စားသုံးသူများနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သူများ၊ တိုင်ကြားပုံနည်းလမ်းများအား အသေးစိတ်ရှင်းလင်းဆွေးနွေးခဲ့ကြကြောင်း သိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်တာဝန်ခံနှင့် ဝန်ထမ်းများသည် ၂၀၂၄ခုနှစ်၊ ဇွန်လ(၃)ရက်နေ့တွင် ခရမ်းမြို့နယ်အတွင်းရှိ ဆန်ဂိုဒေါင်နှင့်ဆန်ဆိုင်ကြီးများ၏ ဆန်ဖြန့်ဖြူးရောင်းချနေမှုအခြေအနေအားသိရှိနိုင်ရန်အတွက် ခရမ်းမြို့နယ်စည်ပင်သာယာရေးမြို့မဈေးအတွင်း/ အပြင်နှင့် ရပ်ကွက်၊ ကျေးရွာများ၌ ဝယ်ယူဖြန့်ဖြူးပြီး လက်လီ/ လက်ကားရောင်းချလျက်ရှိသော ဆန်ဂိုဒေါင်နှင့် ဆန်ဆိုင်ကြီးများသို့ ဌာနဆိုင်ရာများနှင့်ပူးပေါင်းကာ သွားရောက်ကွင်းဆင်းစစ်ဆေးခဲ့ကြောင်းသိရသည်။

        ထိုသို့ကွင်းဆင်းစစ်ဆေးခဲ့ရာတွင် ဆန်အပါအဝင် အခြေခံစားသောက်ကုန်ပစ္စည်းများပြတ်လပ်မှုမရှိစေရေး၊ ဈေးနှုန်းမြင့်တက်မှုမရှိစေရေးနှင့် ဈေးနှုန်းများတည်ငြိမ်မှုရှိစေရေးတို့အတွက် ခရမ်းမြို့နယ် (၂)ရပ်ကွက်၊ ကမ်းနားလမ်းရှိ ဒေါ်သောင်းသောင်းရှိန်ဆန်ဆိုင်နှင့် ခရမ်းမြို့နယ်စည်ပင်သာယာရေးမြို့မဈေး၌ ဝယ်ယူဖြန့်ဖြူးရောင်းချလျက်ရှိသော ကရင်ကန်ဆန်ဆိုင်တို့မှ လုပ်ငန်းရှင်များနှင့်သွားရောက်တွေ့ဆုံ၍ ဆန်ဝယ်ယူဖြန့်ဖြူးရောင်းချနေမှုအား မေးမြန်းစုံစမ်းခဲ့ရာ ဆန်ဆိုင်များအနေဖြင့် မြို့နယ်အတွင်းရှိ ဆန်စက်များနှင့် ဘုရင့်နောင်ပွဲရုံ၊ ပုဇွန်တောင်ဈေးပွဲရုံတို့မှ ဝယ်ယူဖြန့်ဖြူးရောင်းချပေးလျက်ရှိကြောင်း၊ အခြားဆန်ဆိုင်များအနေဖြင့် ဒေသထွက်စပါး ဧည့်မထအုပ်စုဖြစ်သော ဆင်သုခ၊ ရွှေမန်း၊ မနောသုခစပါးများကိုဝယ်ယူကြပြီး ဒေသတွင်းဆန်စက်များတွင် ကြိတ်ခွဲဖြန့်ဖြူးရောင်းချပေးလျက်ရှိကြောင်း ရှင်းလင်းဖြေကြားခဲ့ပြီး သက်ဆိုင်ရာတာဝန်ရှိသူများက ယခုအခါ ဆန်ဈေးနှုန်းများမြင့်တက်လျက်ရှိသည့်အတွက် ဈေးနှုန်းမြင့်တက်စေရန်ရည်ရွယ်ချက်ဖြင့် သိုလှောင်ခြင်းများ၊ ဖြန့်ဖြူးရောင်းချခြင်းများမဖြစ်ပေါ်စေရေးတို့အတွက် ယခုကဲ့သို့ မြေပြင်ကွင်းဆင်းစစ်ဆေးဆောင်ရွက်ရခြင်းဖြစ်ကြောင်း တွေ့ဆုံဆွေးနွေးအသိပညာပေးပြောကြားခဲ့မှုကိုသိရှိရပါသည်။

DOCA(ရန်ကုန်)                                                                                                                                                                                  

    ပြည်ထောင်စုဝန်ကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ တာဝန်ရှိဝန်ထမ်းများသည် တောင်ဒဂုံမြို့နယ်၊ အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာနတို့နှင့်ပူးပေါင်း၍ ၅-၆-၂၀၂၄ ရက်နေ့၊  နံနက် (၁၁:၃၀) နာရီအချိန်တွင်  အမှတ် (၉၅)၊ စည်ပင်လမ်း၊ တောင်ဒဂုံမြို့နယ်၊ကြည်စင်သစ်အထူးကုဆေးခန်းရှိ ဆေးကောင်တာမှဆေးဝါးများနှင့်   နေ့လယ် (၁၂း၃၀) နာရီအချိန်တွင် ‌တောင်ဒဂုံမြို့နယ်၊ ရတနာအထူးကုဆေးရုံရှိ ဆေးကောင်တာမှဆေးဝါးများကိုစစ်ဆေးရန် ဆိုင်တာဝန်ခံတို့နှင့်သွားရောက်တွေ့ဆုံ၍ ဆေးဆိုင်အတွင်းရှိ ဆေးဝါးများရောင်းချမှုအခြေအနေတို့ကို စစ်ဆေးမှုများပြုလုပ်ခဲ့ကြောင်းသိရှိရပါသည်။

     ထိုသို့စစ်ဆေးရာတွင် ကြယ်စင်သစ်အထူးကုဆေးခန်း၏ ဆေးကောင်တာအတွင်းရှိ ဆေးဝါးများကို Mankind,T.T.O  စသည့်ဆေးကုမ္ပဏီများမှ ဝယ်ယူရောင်းချကြောင်း၊ အစာအိမ်ဆေး၊ သံဓာတ်အားဆေး၊ အကိုက်အခဲပျောက်ဆေးများကို အများဆုံးသုံးရကြောင်းနှင့် ရတနာအထူးကုဆေးရုံ၏ ဆေးကောင်တာမှ ဆေးဝါးများကို AA, Pecific, DKSH, Mega  စသည့်ဆေးကုမ္ပဏီများမှ ဝယ်ယူရောင်းချကြောင်း၊ ဟော်မုန်းဆေး၊ ကိုယ်ဝန်ဆောင်အားဆေး၊ သွေးတိတ်ဆေး၊ အအန်ပျောက်ဆေး၊ သွေးကျဆေး၊ နှလုံးဆေး၊ အစာအိမ်ဆေး၊ သံဓာတ်အားဆေး၊ အကိုက်အခဲပျောက်ဆေးများကို အများဆုံးသုံးရကြောင်း၊   ပစ္စည်းပြတ်လပ်မှုမရှိကြောင်းဖြေကြားခဲ့ပြီး ဖြစ်သင့်ဖြစ်ထိုက်သည့်‌ဈေးနှုန်းထက် ဈေးနှုန်းမြှင့်တင်ရောင်းချမှုကိုစစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူခံရမည်ဖြစ်ကြောင်း အသိပညာပေးပြောကြားခဲ့မှုကိုသိရှိရပါသည်။

DOCA(ရန်ကုန်)

       တရုတ်နိုင်ငံ၏ ဒုတိယသမ္မတ Han Zhang နှင့် Foremost Group ၏ဥက္ကဋ္ဌ ဒေါက်တာ James S.C Chao  တို့သည် ၂၀၂၄ခုနှစ်၊ ဇွန်လ ၁ရက်နေ့ (တနင်္လာနေ့) တွင် တရုတ်နိုင်ငံ၊ ဘေဂျင်းမြို့တွင် တွေ့ဆုံခဲ့ကြသည်။

       တရုတ်-အမေရိကန်နှစ်နိုင်ငံဆက်ဆံရေးသည် ယနေ့ကမ္ဘာပေါ်တွင် အရေးကြီးဆုံးနှစ်နိုင်ငံဆက်ဆံရေးတစ်ခုဖြစ်ကြောင်းနှင့် တရုတ်နိုင်ငံနှင့် အမေရိကန်ပြည်ထောင်စုအတွက် လက်ရှိ အရေးကြီးဆုံးတာဝန်များမှာ နှစ်နိုင်ငံခေါင်းဆောင်များညှိနှိုင်းထားသော အရေးကြီးသည့်သဘောတူညီမှုများကို ပူးတွဲအကောင်အထည်ဖော်ရန်၊ ကူးလူးဆက်ဆံမှုနှင့် စီးပွားရေးဆိုင်ရာ ပူးပေါင်းဆောင်ရွက်မှုများခိုင်မာလာစေရန်၊ နှစ်နိုင်ငံကုန်သွယ်မှုနှင့်ယဥ်ကျေးမှုတို့ကိုတည်ငြိမ်လာစေရန်နှင့် ခိုင်လုံပြီး ရေရှည်တည်တံ့သော ဖွံ့ဖြိုးတိုးတက်ရေးလမ်းကြောင်းတစ်လျှောက် နှစ်နိုင်ငံဆက်ဆံရေးကို တွန်းအားပေးရန်တို့ဖြစ်ကြောင်း ဒုတိယသမ္မတHan Zhang ကပြောကြားခဲ့သည်။

         တရုတ်-အမေရိကန်ပူးပေါင်းဆောင်ရွက်မှုတွင် ပါဝင်သူ၊ သက်သေအဖြစ် ပံ့ပိုးကူညီသူဖြစ်သော Foremost Group သည် တရုတ်-အမေရိကန်ဆက်ဆံ‌ရေးဖွံ့ဖြိုးတိုးတက်ရေးနှင့် နှစ်နိုင်ငံချစ်ကြည်ရင်းနှီးမှုကိုမြှင့်တင်နိုင်ရန်အတွက် အပြုသဘောဆောင်သော ပံ့ပိုးကူညီမှုများအား ဆက်လက်လုပ်ဆောင်သွားနိုင်မည်ဟုမျှော်လင့်ကြောင်း Han က ဆက်လက်ပြေားကြားခဲ့သည်။

   တရုတ်နိုင်ငံ၏ စီးပွားရေးနှင့်လူမှုရေးဖွံ့ဖြိုးတိုးတက်မှုတွင်ရရှိခဲ့သည့် ကြီးကျယ်သောအောင်မြင်မှုများအကြောင်းကို အလေးအနက်ထားပြောကြားပြီးနောက် တရုတ်စျေးကွက်ကို ဆက်လက်၍ နက်နက်ရှိုင်းရှိုင်းစူးစမ်းလေ့လာပြီး အမေရိကန်-တရုတ်စီးပွား‌ရေးနှင့် ကုန်သွယ်မှုပူးပေါင်းဆောင်ရွက်ရေးတို့ကို တက်ကြွစွာမြင့်တင်နိုင်ရန် ဆောင်ရွက်သွားမည်ဖြစ်ကြောင်း Foremost Group ၏ ဥက္ကဋ္ဌကပြောကြားခဲ့ကြောင်းသိရှိရပါသည်။

DOCA(ရန်ကုန်)

      စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒုတိယဦးစီးမှူးပါ (၂)ဦး၊ မြန်မာနိုင်ငံဆန်စပါးအသင်းချုပ်မှ ဦးညီညီပိုင်ထက် (အလုပ်အမှုဆောင်)၊ ဘုရင့်နောင်ဈေးစည်ပင်ဌာနမှ ဦးဇော်လင်းထက်(နေ့စား)တို့ပူးပေါင်းပါဝင်လျက် ၅-၆-၂၀၂၄ ရက်နေ့၊ နံနက် (၁၀:၀၀) နာရီအချိန်၊ နံနက် (၁၀း၃၀) နာရီအချိန်နှင့် နံနက် (၁၁း၀၀) နာရီအချိန်တို့တွင် ဘုရင့်နောင်ဈေးအတွင်းရှိ ဆန်ဆိုင်နှင့်ဆန်သိုလှောင်ရုံများအား အဖွဲ့စုံဖြင့် ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

     ထိုသို့ဆောင်ရွက်ရခြင်းမှာ ဆန်စပါးအပါအဝင် အခြေခံစားသောက်ကုန်ပစ္စည်းများပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေးနှင့် ဈေးနှုန်းများတည်ငြိမ်ရေး ကြပ်မတ်ဆောင်ရွက်နိုင်စေရန်ဖြစ်ပြီး ဆန်ဆိုင်များအနေဖြင့် ဈေးနှုန်းမြှင့်တင်ရောင်းချခြင်း၊ သိုလှောင်ခြင်း၊ ဖြန့်ဖြူးခြင်းရှိ/မရှိကို ဘုရင့်နောင်ဈေးကြီးအတွင်းရှိ အောင်ချမ်းသာဆန်ဆိုင်၊ လွင်ပြည်ဆန်ဆိုင်နှင့် အောင်လံတော်ဆန်ဆိုင်တို့သို့သွားရောက်၍ ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ကြောင်းသိရှိရပါသည်။

DOCA(ရန်ကုန်)