HighLight News

      စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်း၊ မြို့နယ်စည်ပင်သာယာရေးအဖွဲ့မှ ဦးစီးအရာရှိ ဦးအောင်ကိုကိုတို့နှင့်အတူ (၁၅-၅-၂၀၂၄)ရက်နေ့၊ နံနက်ပိုင်းတွင် တောင်ငူမြို့ပေါ်ရှိ ဆန်ဂိုဒေါင်များနှင့် ဆန်အရောင်းဆိုင်များသို့သွားရောက်၍ ဆန်စပါးသိုလှောင်ထားရှိမှုနှင့် ဈေးနှုန်းဈေးကွက်အခြေအနေများကို ကွင်းဆင်းစစ်ဆေးခဲ့ပါသည်။

         ပူးပေါင်းအဖွဲ့သည် တောင်ငူမြို့ပေါ်ရှိ အောင်ဟေမာန်ဆန်စက်၊ ကောင်းပြည့်ဆန်စက်၊ လမင်းဆန်စက်၊ အေးမေတ္တာဆန်စက်နှင့် အိုးတက်ဆန်ပွဲရုံများသို့ သွားရောက်စစ်ဆေးရာ ဆန်စက်များအနေဖြင့် မိုးစပါး တင်း၁၀၀လျှင် ၂၄၀၀၀၀၀ကျပ်ဖြင့်ဝယ်ယူရပြီး ကြိတ်ခွဲထွက်ရှိသည့်ဆန်များကို တစ်အိတ်လျှင် ၈၈၀၀၀ကျပ်မှ ၉၀၀၀၀ကျပ်အထိရောင်းချရကြောင်း၊ နွေစပါး တင်း၁၀၀လျှင် ၁၉၅၀၀၀၀ကျပ်မှ ၂၀၀၀၀၀၀ကျပ်အထိဝယ်ယူရပြီး ကြိတ်ခွဲထွက်ရှိသည့် ဆန် များကို တစ်အိတ်လျှင် ၇၂၀၀၀ကျပ်မှ ၇၃၀၀၀ကျပ်အထိရောင်းချရကြောင်း၊ လျှပ်စစ်မီးပုံမှန်ရရှိမှုမရှိခြင်းကြောင့် ပုံမှန်ကြိတ်ခွဲနိုင်မှုမရှိသဖြင့် ဆန်မြောက်များစွာသိုလှောင်ထားခြင်းမရှိကြောင်း၊ လက်ကျန်ဆန်များကို ဈေးကွက်သို့ ပုံမှန်ဖြန့်ဖြူးပေးလျက်ရှိကြောင်းသိရှိရပါသည်။

        စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးသည် ကွင်းဆင်းစစ်ဆေးစဉ် သက်ဆိုင်ရာလုပ်ငန်းရှင်များအား မိမိခရိုင်အတွင်း ဆန်ပြတ်လပ်မှုမရှိစေရေး၊ ဆန်ဈေးနှုန်းကြီးမြင့်မှုမရှိစေရေးတို့အတွက် ဆန်များကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့်သိုလှောင်ခြင်းများမပြုရန် အသိပေးဆွေးနွေးခဲ့ကြောင်းသိရှိရပါသည်။

DOCA(ပဲခူး)

      စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် တောင်ငူမြို့နယ်၊ စည်ပင်သာယာရေးအဖွဲ့မှ ဦးစီးအရာရှိ ဦးအောင်ကိုကိုနှင့်အတူ ၂၀၂၄ခုနှစ်၊ မေလ ၁၅ရက်နေ့၊ နံနက်ပိုင်းတွင် တောင်ငူမြို့ပေါ်ရှိ ဆန်သိုလှောင်ရုံများနှင့် ဆန်အရောင်းဆိုင်များသို့လည်းကောင်း၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ရေတာရှည်မြို့ပေါ်ရှိ ဆန်သိုလှောင်ရုံများနှင့် ဆန်အရောင်းဆိုင်များသို့လည်းကောင်း သွားရောက်၍ ဆန်သိုလှောင်ထားရှိမှုနှင့် ရောင်းချဖြန့်ဖြူးမှုအခြေအနေများကို ကွင်းဆင်းစစ်ဆေးခဲ့ကြပါသည်။

       တောင်ငူခရိုင်အတွင်း ဆန်ပြတ်လပ်မှုနှင့် ဆန်ဈေးနှုန်းကြီးမြင့်မှုမဖြစ်ပေါ်စေရေးအတွက် စားသုံးသူရေးရာဦးစီးဌာနမှ တာဝန်ရှိသူများသည် သက်ဆိုင်ရာဌာနဆိုင်ရာများနှင့်ပူးပေါင်း၍ ခရိုင်အတွင်းရှိ ဆန်သိုလှောင်ရုံနှင့် ဆန်အရောင်းဆိုင်များအား ကွင်းဆင်းစစ်ဆေးခဲ့ကြပြီး ဈေးနှုန်းမြှင့်တင်ရောင်းချဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းများမပြုရန် သက်ဆိုင် ရာလုပ်ငန်းရှင်များအား အသိပညာပေးဆွေးနွေးခဲ့ပါသည်။

       တောင်ငူခရိုင်အတွင်းရှိ ဆန်ရောင်းချမှုမှာ ပုံမှန်အနေအထားအတိုင်းရှိကြောင်း၊ ဆန်စက်များအနေဖြင့် လျှပ်စစ်မီးပုံမှန်ရရှိခြင်းမရှိခြင်းကြောင့် ပုံမှန်ကြိတ်ခွဲနိုင်မှုမရှိသဖြင့် သိုလှောင်ရုံများတွင် ဆန်မြောက်များစွာသိုလှောင်ထားမှုမရှိကြောင်း၊ လက်ကျန်ဆန်များကို ဈေးကွက်သို့ ပုံမှန်ဖြန့်ဖြူးပေးလျက်ရှိကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်းသည် ၂၀၂၄ခုနှစ်၊ မေလ ၁၄ရက်နေ့၊ နံနက်ပိုင်းတွင် တောင်ငူခရိုင်၊ ရေတာရှည်မြို့နယ်၊ မြို့လှမြို့ရှိ Light House (အလင်းအိမ်) ကော်ဖီလုပ်ငန်းသို့ လာရောက်ကြည့်ရှုစစ်ဆေးခဲ့ပြီး လုပ်ငန်းပိုမိုတိုးတက်အောင်မြင်ရေးအတွက် လိုအပ်သည်များကို သက်ဆိုင်ရာဌာနဆိုင်ရာများနှင့် ညှိနှိုင်းဆောင်ရွက်ပေးခဲ့ပါသည်။

       ရှေးဦးစွာ လုပ်ငန်းရှင် ဦးဇေယျာမင်းက လုပ်ငန်းဆောင်ရွက်မှုအခြေအနေများ၊ နိုင်ငံ့စီးပွားမြှင့်တင်ရေးရန်ပုံငွေမှ ချေးငွေရရှိသဖြင့် ကော်ဖီလှော်စက်ဝယ်ယူနိုင်မှုနှင့် လုပ်ငန်းတိုးချဲ့နိုင်မှုအခြေအနေများကိုလည်းကောင်း၊ ရန်ကုန်-မန္တလေးလမ်းမကြီးမှ ၎င်း၏ကော်ဖီလုပ်ငန်းသို့ ဝင်ရောက်နိုင်မည့်လမ်းအား အဆင့်မြှင့်ပြုပြင်ဆောင်ရွက်ရာတွင် ပံ့ပိုးကူညီဆောင်ရွက်ပေးစေလိုသည်များကိုလည်းကောင်း ရှင်းလင်းတင်ပြခဲ့ပါသည်။

     ၎င်းနောက် တိုင်းဒေသကြီးဝန်ကြီးချုပ်က ခေတ်မီသေသပ်လှပသည့် ထုပ်ပိုးပစ္စည်းများဖြင့် နိုင်ငံတကာဈေးကွက်သို့ ပိုမိုထိုးဖောက်နိုင်ရေးကိုဆောင်ရွက်ရန်၊ အောင်မြင်ဖြစ်ထွန်းနေသည့် လုပ်ငန်းဖြစ်သဖြင့် ကိုယ်ပိုင်ကော်ဖီစိုက်ဧကတိုးချဲ့နိုင်ရေးဆောင်ရွက်ရန် လမ်းညွှန်မှာကြားခဲ့ပြီး လုပ်ငန်းအတွက်လိုအပ်သော ချေးငွေများရရှိရေး၊ စက်ရုံအဝင်လမ်း အဆင့်မြှင့်ပြုပြင်ရေးအတွက် သက်ဆိုင်ရာဌာနဆိုင်ရာများနှင့် ညှိနှိုင်းဆောင်ရွက်ပေးခဲ့ပါသည်။ 

       Light House ကော်ဖီလုပ်ငန်းသည် မကွေးတိုင်းဒေသကြီး၊ မင်းတုန်းမြို့နယ်တွင် ကိုယ်ပိုင်ခြံဖြင့် ကော်ဖီများကိုစိုက်ပျိုးပြီး ၎င်းကော်ဖီခြံမှထွက်ရှိသော ကော်ဖီစေ့များကို ပဲခူးတိုင်းဒေသကြီး၊ တောင်ငူခရိုင်၊ ရေတာရှည်မြို့နယ်၊ မြို့လှမြို့တွင် အခြောက်လှန်း၍ ကိုယ်ပိုင်ကော်ဖီလှော်စက်၊ ကော်ဖီမှုန့်ကြိတ်စက်များဖြင့် ထုတ်လုပ်ဖြန့်ဖြူးရောင်းချသည့် လုပ်ငန်းဖြစ်ကြောင်း၊ လက်ရှိပြည်တွင်းဈေးကွက်အနေဖြင့် ရန်ကုန်၊ ပဲခူး၊ ပြည်၊ တောင်ငူ၊ နေပြည်တော်မြို့များသို့ ဖြန့်ဖြူးလျက်ရှိပြီး ပြည်ပဈေးကွက်အနေဖြင့် ထိုင်းနိုင်ငံမှလည်း မှာယူမှုရှိကြောင်းသိရှိရပါသည်။

DOCA(ပဲခူး)

      စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးမှ တာဝန်ရှိသူများနှင့် ပဲခူးမြို့နယ်တာဝန်ခံတို့သည် (၁၅-၅-၂၀၂၄) ရက်နေ့တွင် ပဲခူးမြို့အတွင်းရှိ ခွဲတမ်းရရှိသော စားအုန်းဆီရောင်းချမှုပြုလုပ်နေသည့် ကုန်စုံဆိုင်များသို့သွားရောက်၍ ကွင်းဆင်းစစ်ဆေးမှုများပြုလုပ်ခဲ့ပါသည်။

     အဆိုပါကွင်းဆင်းစစ်ဆေးရာတွင် ခွဲတမ်းရရှိသောစားအုန်းဆီများကို ပြည်သူများလက်ဝယ်သို့ရောက်ရှိရန် ရောင်းချနိုင်ရေး၊ သတ်မှတ်ရည်ညွှန်းဈေးအတိုင်းရောင်းချနိုင်ရေးနှင့် ရောင်းချမည့်သတ်မှတ်ဈေးနှုန်းများကို ဗီနိုင်းဖြင့် မြင်သာအောင် ချိတ်ဆွဲရောင်းချနိုင်ရေးတို့ကို ခွဲတမ်းရရှိသည့် စားအုန်းဆီရောင်းချနေသော ကုန်စုံဆိုင်ပိုင်ရှင်များအား အသိပညာပေးပြောကြားခဲ့ကြောင်းသိရှိရပါသည်။

DOCA(ပဲခူး)

        ကုန်ဈေးနှုန်းတည်ငြိမ်စေရေးနှင့် ကုန်စည်စီးဆင်းမှုမှန်ကန်မြန်ဆန်စေရေးအတွက် ဦးဆောင်ကော်မတီ၏ ကြီးကြပ်မှုဖြင့် ပဲခူးတိုင်းဒေသကြီး၊ ပဲခူးခရိုင်၊ ပဲခူးမြို့ပေါ်ရှိ အိမ်သုံးဆေး‌‌ရောင်းချသောဆိုင်များနှင့် ဆေးကုမ္ပဏီများသို့ (၁၄-၅-၂၀၂၄) ရက်နေ့တွင် အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့၊ စားသုံးသူရေးရာဦးစီးဌာနတို့ပါဝင်သော ပူးပေါင်းအဖွဲ့တို့သွားရောက်၍ မြေပြင်ကွင်းဆင်းကာ ဆေးပစ္စည်းများ၏ဈေးနှုန်းများ ဖြစ်သင့်ဖြစ်ထိုက်သည်ထက် ကြီးမြင့်မှုမရှိစေရေး၊ ဆေးဝါးပြတ်လပ်မှုမရှိစေရေးနှင့် ဆေးဝါးဝယ်ယူရောင်းချမှုအခြေအနေများအားသိရှိနိုင်ရန် မြေပြင်ကွင်းဆင်းစစ်ဆေးဆောင်ရွက်ခဲ့ကြကြောင်းသိရှိရပါသည်။

DOCA(ပဲခူး)