HighLight News

    ပဲခူးတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးဌာနနှင့် နတ်တလင်းခရိုင်၊ စားသုံးသူရေးရာဦးစီးဌာနတို့ပူးပေါင်း၍ စားသောက်ကုန်လုပ်ငန်းရှင် (MSMEs) များအား ကောင်းမွန်သော ထုတ်လုပ်မှုကျင့်စဉ် (GMP)၊ ကောင်းမွန်သော သန့်ရှင်းမှုကျင့်စဉ် (GHP) နှင့် အစားအသောက်ထုတ်လုပ်ခြင်း၊ FDA၏ ထောက်ခံချက်လျှောက်ထားရန် လိုအပ်သည့်အချက်အလက်များနှင့် စားသုံးသူကာကွယ်ပေးရေးဥပဒေပါ ကုန်အညွှန်းအမှတ်အသားဆိုင်ရာကိစ္စရပ်များနှင့်စပ်လျဉ်းသော အသိပညာပေးဆွေးနွေးပွဲကို (၁၄-၆-၂၀၂၄)ရက်နေ့၊ နေ့လယ် (၁၃:၀၀)နာရီအချိန်တွင် နတ်တလင်းခရိုင်၊ နတ်တလင်းမြို့နယ်၊ အထွေထွေအုပ်ချုပ်ရေးဦးစီးဌာနအစည်းအဝေးခန်းမ၌ ကျင်းပပြုလုပ်ခဲ့ပါသည်။

         အဆိုပါဆွေးနွေးပွဲတွင် အစားအသောက်နှင့် ဆေးဝါးကွပ်ကဲရေးဦးစီးဌာန၊ တိုင်းဦးစီးမှူးက ကောင်းမွန်သောထုတ်လုပ်မှုကျင့်စဉ် (GMP)၊ ကောင်းမွန်သောသန့်ရှင်းမှုကျင့်စဉ် (GHP)နှင့် အစားအသောက်ထုတ်လုပ်ခြင်းဆိုင်ရာ ကိစ္စရပ်များအားလည်းကောင်း၊  ဦးစီးအရာရှိ ဒေါက်တာဖြူရတနာက FDA ၏ထောက်ခံချက်လျှောက်ထားရန် လိုအပ်သည့်အချက်အလက်များနှင့် Online ဆိုင်ရာလျှောက်ထားမှုကိစ္စရပ်များအားလည်းကောင်း၊ စားသုံးသူရေးရာဦးစီးဌာန၊ နတ်တလင်းခရိုင်တာဝန်ခံက စားသုံးသူကာကွယ်ပေးရေးဥပဒေပါ ကုန်အညွှန်းအမှတ်အသားဆိုင်ရာကိစ္စရပ်များအားလည်းကောင်း အသီးသီးအသိပညာပေးဆွေးနွေးဆောင်ရွက်ခဲ့ပါသည်။ ဆွေးနွေးပွဲသို့ စားသောက်ကုန်ထုတ်လုပ်သော လုပ်ငန်းရှင်  (၃၅)ဦးတက်ရောက်ခဲ့ကြောင်းသိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် ၁၄-၆-၂၀၂၄ ရက်နေ့တွင် ပူးပေါင်းအဖွဲ့များနှင့်အတူ ဆန်စက်လုပ်ငန်းရှင်များထံသို့ သွားရောက်တွေ့ဆုံခဲ့ပါသည်။

       စားသုံးသူရေးရာဦးစီးဌာနသည် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် အလေးထား၍ ဆောင်ရွက်လျက်ရှိရာ အုတ်ဖိုမြို့နယ်၊ စားသုံးသူရေးရာဦးစီးဌာန၊ မြို့နယ်စီမံအုပ်ချုပ်ရေးဌာန၊ မြို့နယ်စည်ပင်သာယာရေးဦးစီးဌာနတို့ပူးပေါင်းအဖွဲ့သည် အုတ်ဖိုမြို့၊ ဆန်စက်ကြိတ်ခွဲထုတ်လုပ်ရောင်းချနေသော ကွေ့ချောင်းရပ်ကွက်ရှိ ဝင်းနောင်ဆန်စက်၊ ကျောင်းကြီးတန်းရပ်ကွက်ရှိ ဦးဝင်းနိုင်၏ ရွှေမေတ္တာဆန်စက်တို့ထံသို့သွားရောက်၍ ကြိတ်ခွဲထုတ်လုပ်မှုအခြေအနေများနှင့် ဆန်သိုလှောင်မှုရောင်းချမှုများကိုဆွေးနွေးခဲ့ပါသည်။ ဆန်ဈေးနှုန်းများအနေဖြင့် ရက်၉၀ဆန်၊ ပခန်းဆန်၊  ငွေတိုးဆန်များမှာ ၁၀၈ဆန်တစ်အိတ်လျှင် ၈၇၀၀၀ကျပ်ခန့်ရှိပြီး မြို့နယ်အတွင်း ကြိတ်ခွဲသောစက်များက ဖြန့်ဖြူးရောင်းချကြပြီး ပေါ်ဆန်းမွှေးဆန်မှာ ၁၀၈ပေါင်ပါ တစ်အိတ်လျှင် ၁၆၆၀၀၀ကျပ်ခန့်ရှိပြီး ၎င်းကို ရန်ကုန်မှ မှာယူ‌‌ရောင်းချကြောင်းသိရှိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ သာယာဝတီခရိုင်၊ သာယာဝတီမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ (၁၇-၆-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ Community Center ၌ စားသုံးသူအသိပညာပေး Talk Show ကျင်းပဆောင်ရွက်ခဲ့ပါသည်။

      စားသုံး/ ထုတ်လုံတာဝန်ခံ ဒေါ်ခိုင်ခိုင်ရီက တက်ရောက်လာသူများအား  စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်များကိုဝယ်ယူအသုံးပြုရာတွင် ကုန်စည်၏အမျိုးအမည်၊ သုံးစွဲပုံနည်းလမ်း၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းပုံအညွှန်း၊ ကျန်းမာရေးဆိုင်ရာဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်များပါရှိရန်နှင့် ကုန်စည်နှင့်ဝန်ဆောင်မှုများဝယ်ယူအသုံးပြုရာတွင် နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နည်းလမ်းများအားပြောကြားကာ စားသုံးသူကာကွယ်ရေးဆိုင်ရာ အသိပညာများဆွေးနွေးဟောပြောခဲ့ကြောင်းသိရှိရပါသည်။

DOCA(ပဲခူး)

       တောင်ငူခရိုင်၊ ရေတာရှည်မြို့နယ်အတွင်းရှိ စားသုံးဆီဖြန့်ဖြူးရောင်းချသူများနှင့်တွေ့ဆုံ၍ ဥပဒေပါပြဋ္ဌာန်းချက်များ၊ အမိန့်ညွှန်ကြားချက်များနှင့်အညီ လိုက်နာဆောင်ရွက်ရေး ရှင်းလင်းဆွေးနွေးပွဲကို ၂၀၂၄ခုနှစ်၊ ဇွန်လ ၁၄ရက်နေ့ မွန်းလွဲပိုင်းတွင် စားသုံးသူရေးရာဦးစီးဌာန၊ ရေတာရှည်မြို့နယ်တာဝန်ခံရုံး၌ ကျင်းပပြုလုပ်ရာ စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က ရှင်းလင်းဆွေးနွေးခဲ့ပါသည်။

         အခမ်းအနားတွင် မြို့နယ်အထွေထွေအုပ်ချုပ်ရေးဦးစီးဌာန၊ ဒုတိယမြို့နယ်အုပ်ချုပ်ရေးမှူး ဦးထွန်းထွန်းလင်းနှင့် မြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးအေးကျော်တို့က အမှာစကားများပြောကြားခဲ့ပြီး စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က အမှတ်တံဆိပ်ပါ စားသုံးဆီများထုတ်လုပ်ရောင်းချရာတွင် စားသုံးသူကာကွယ်ရေးဥပဒေပါ ပြဋ္ဌာန်းချက်များ၊ အမိန့်၊ ညွှန်ကြားချက်များနှင့်အညီ လိုက်နာဆောင်ရွက်ရန်ကိုလည်းကောင်း၊ ရည်ညွှန်းဈေးဖြင့် ဝယ်ယူရရှိသောစားအုန်းဆီများအား သတ်မှတ်စည်းမျဉ်းစည်းကမ်းများနှင့်အညီ ရောင်းချရန်ကိုလည်းကောင်း ရှင်းလင်းပြောကြားခဲ့ပါသည်။

         ဆက်လက်၍ အစားအသောက်နှင့် ဆေးဝါးကွပ်ကဲရေးဦးစီးဌာနမှ ဒုတိယကြီးကြပ်ရေးမှူး ဒေါ်သူသူဟန်က ဌာနနှင့်သက်ဆိုင်သည့်ကိစ္စရပ်များကို ရှင်းလင်းပြောကြားခဲ့ပြီး တက်ရောက်လာသည့် လုပ်ငန်းရှင်များ၏ ဆွေးနွေးမေးမြန်းချက်များကို စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က ပြန်လည်ရှင်းလင်းဖြေကြားခဲ့ကြောင်းနှင့် အဆိုပါတွေ့ဆုံဆွေးနွေးပွဲသို့ စားသုံးဆီရောင်းချဖြန့်ဖြူးသူ ၃၃ဦးတက်ရောက်ခဲ့ကြောင်းသိရှိရပါသည်။

DOCA(ပဲခူး)

       ဧရာဝတီတိုင်းဒေသကြီး၊ မအူပင်ခရိုင်၊ အလုပ်သမားညွှန်ကြားမှုဦးစီးဌာန၊ စားသုံးသူရေးရာဦးစီးဌာနနှင့် စက်မှုကြီးကြပ်ရေးနှင့်စစ်ဆေးရေးဦးစီးဌာနတို့ပူးပေါင်း၍  မအူပင်မြို့၊ တိုးရွှေဝါခန်းမတွင် ၂၀၂၄ခုနှစ်၊ ဇွန်လ ၁၂ရက်နေ့၌ မအူပင်ခရိုင်အတွင်းရှိ ဆန်စက်လုပ်ငန်းရှင်များနှင့်တွေ့ဆုံရှင်းလင်းဆွေးနွေးပွဲပြုလုပ်ခဲ့ကြပါသည်။

        ဆွေးနွေးပွဲတွင် အလုပ်ရှင်/ အလုပ်ရှင်ကိုယ်စားလှယ်များ၊ အလုပ်သမားအလုပ်သမားဝန်ကြီးဌာနအောက်ရှိ ဦးစီးဌာနများ၏ စည်းကြပ်သည့်ဥပဒေနှင့် လုပ်ငန်းတာဝန်များကိုရှင်းလင်းခြင်း၊ အတတ်နိုင်ဆုံး အလုပ်သမားအခက်အခဲများအပေါ်ကိုဖြေရှင်းရန်လိုအပ်ကြောင်း ဆွေးနွေးပြောကြားခြင်း၊  မိမိတို့ဧရာဝတီတိုင်းသည် စိုက်ပျိုးရေးကိုအခြေခံ၍ ဆောင်ရွက်နေသောကြောင့် ဆန်စက်လုပ်သားကြီးများ အနေဖြင့် တိုင်း/ပြည်နယ်များအတွက်ပါ ဆန်စပါးရရှိရေး ဆောင်ရွက်ပေးနေရသည့်အတွက် ကျေးဇူးတင်ရှိကြောင်း အားပေးစကားပြောကြားခဲ့သည်။  

      ၎င်းနောက် စားသုံးသူရေးရာဦးစီးဌာနအနေဖြင့် အလုပ်သမားများ၏ရပိုင်ခွင့်နှင့် လုပ်ငန်းခွင်အလုပ်သမားများ ဘေးအန္တရာယ်ကင်းရှင်းရေး၊ အလုပ်သမားများသက်သာချောင်ချိရေးတို့အတွက် အလုပ် သမား၊ အလုပ်ရှင်များမှာ ကျွန်းကိုင်းမီ ကိုင်းကျွန်းမီ ဆောင်ရွက်စေလိုကြောင်း၊ လုပ်ငန်းရှင်အသိပညာပေးဟောပြောပွဲများတွင်လည်း ထည့်သွင်းဆွေးနွေးကြောင်း၊  အလုပ်ရှင်၊ အလုပ်သမားများအနေဖြင့် မိမိတို့၏ အခွင့်အရေးတာဝန်များကို သိရှိလိုက်နာဆောင်ရွက်ကြရန်နှင့် ဆန်စက်လုပ်ငန်းဖွံ့ဖြိုးတိုးတက်ရေးအတွက်လည်း အလေးပေးဆွေးနွေးခဲ့ပြီးနောက် ဆန်စက်လုပ်ငန်းရှင်များ၊ သိုလှောင်ရုံပိုင်ရှင်များအနေဖြင့် ဆန်စပါးသိုလှောင်ရုံများအတွက် မှတ်ပုံတင်ခြင်းလုပ်ငန်းကို စားသုံးသူရေးရာဦးစီးဌာန၏ သိုလှောင်ရုံမှတ်ပုံတင်ရာ Online နှင့်ချိတ်ထားသော Myanmar Rice Online (မြန်မာ့ဆန်စပါးအွန်လိုင်း) MyRo တွင် သတ်မှတ်ချက်များအတိုင်းဖြည့်စွက်၍ ထောက်ခံချက်များဖြင့် တင်ပြလျောက်ထားခြင်းလုပ်ငန်းဆောင်ရွက်လျက်ရှိပြီး၊ သိုလှောင်ရုံဆန်စက်ပိုင်ရှင်များအနေဖြင့် မှတ်ပုံတင်ခြင်းကိုလုပ်ဆောင်နိုင်ပြီးဖြစ်ကြောင်း၊ တချို့လုပ်ငန်းရှင်များအနေဖြင့် မှတ်ပုံတင်ပြီးဖြစ်သော်လည်း ကျန်ရှိသောလုပ်ငန်းရှင်များဆောင်ရွက်နိုင်ရန်အတွက် အကျယ်တဝင့်ရှင်းလင်းပြောကြားခဲ့ပြီး ဆွေးနွေးပွဲသို့ မအူပင်ခရိုင်၊ မြို့နယ်အသီးသီးမှ ဆန်စက်လုပ်ငန်းရှင် (၁၅၀) ဦးတက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)