HighLight News

              မွန်ပြည်နယ်အစိုးရအဖွဲ့၏ ကြီးကြပ်မှုဖြင့် “တန်ဆောင်တိုင်မီးထွန်းပွဲတော်နှင့် MSME ဈေးရောင်းပွဲတော်” ကို (၁၄.၁၁.၂၀၂၄) မှ (၁၆.၁၁.၂၀၂၄) ရက်နေ့ထိ  မော်လမြိုင်မြို့၊ မဟာမြတ်မုနိဘုရား၌ စည်ကားသိုက်မြိုက်စွာကျင်းပပြုလုပ်ခဲ့ရာ MSME ထုတ်ကုန်ပြခန်းများ၌ မွန်ပြည်နယ်၊ စားသုံးသူရေးရာဦးစီးဌာနမှ ပူးပေါင်းပါဝင်ပြသခဲ့ကြောင်း သိရှိရသည်။

               ၁၄.၁၁.၂၀၂၄ ရက်နေ့တွင် “တန်ဆောင်တိုင်မီးထွန်းပွဲတော်နှင့် MSME ဈေးရောင်း ပွဲတော်” ဖွင့်ပွဲအခမ်းအနားသို့ မွန်ပြည်နယ်ဝန်ကြီးချုပ်နှင့် ပြည်နယ်အစိုးရအဖွဲ့ဝင်ဝန်ကြီးများ၊ ဌာနဆိုင်ရာများ၊ စီးပွားရေးလုပ်ငန်းရှင်များတက်ရောက်ခဲ့ကြကြောင်း သိရှိရသည်။

                MSME ထုတ်ကုန်အရောင်းပြခန်းများတွင် ဒေသထွက်သစ်သီးဝလံများ၊ ရိုးရာအဝတ်အထည်များ၊ ဒေသထွက်အစားအစာများ၊ MSME ထုတ်ကုန်များဖြစ်သည့် သဘာဝမြေဩဇာများ၊ မြေပဲဆီများ၊ ဝါးနှင့်ပြုလုပ်သည့်အသုံးအဆောင်ပစ္စည်းများကို ခင်းကျင်းပြသရောင်းချခဲ့ရာ မီးထွန်းပွဲတော်သို့လာရောက်သူများ၊ ဈေးဝယ်သူများနှင့် စည်ကားလျက်ရှိကြောင်း သိရှိရသည်။ MSME ထုတ်ကုန်အရောင်းပြခန်းတွင် ဌာနဆိုင်ရာပြခန်းများ၊ ဒေသထွက်ကုန်များ MSME ထုတ်ကုန်များပြခန်းများ စုစုပေါင်း (၃၆) ခန်းပါဝင်ပြသခဲ့ကြောင်း သိရှိရပါသည်။

DOCA(မွန်)

       မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံနှင့်ဝန်ထမ်းသည် (၁၈-၁၁-၂၀၂၄)ရက်နေ့၊ နံနက်(၀၉:၀၀)နာရီအချိန်၌ စားသုံးသူများအသိပညာတိုးပွားစေရေး၊ စားသုံးသူပြည်သူများကို စားသုံးသူကာကွယ်ရေးအကြောင်းကို ကျယ်ကျယ်ပြန့်ပြန့်သိရှိစေနိုင်ရန်နှင့် ကုန်စည်၊ ဝန်ဆောင်မှုနှင့်စပ်လျဉ်း၍ နစ်နာဆုံးရှုံးမှုဖြစ်ပေါ်ပါက မိမိတို့၏ရပိုင်ခွင့်၊ တောင်းဆိုပိုင်ခွင့်၊ အခွင့်အရေးများကိုသိရှိနားလည်ပြီး တောင်းဆို၍ ကုစားခွင့်များရရှိစေရေး၊ ကျောင်းနေအရွယ်ကလေးများ ဘေးကင်းလုံခြုံမှုရှိသောကုန်စည်များကို ရွေးချယ်ဝယ်ယူစားသုံးတတ်စေရေးရည်ရွယ်၍ ဆိပ်ဖြူမြို့နယ်၊ ရွာသစ်ရပ်ကွက်၊ အခြေခံပညာမူလတန်းကျောင်းသို့ မြို့နယ်ကြက်ခြေနီအဖွဲ့နှင့်ပူးပေါင်း၍ ဆရာ/ ဆရာမ(၁၈)ဦး၊ ကျောင်းသား/ ကျောင်းသူ(၃၅၀)ဦးနှင့် မြို့နယ်ကြက်ခြေနီ(၁)ဦး၊ စုစုပေါင်း (၃၆၉)ဦးအား စားသုံးသူကာကွယ်ရေးအသိပညာပေးဟောပြောဆွေးနွေးခဲ့ကြောင်းသိရသည်။

       အဆိုပါအသိပညာပေးဟောပြောဆွေးနွေးပွဲတွင် ဆိပ်ဖြူမြို့နယ်တာဝန်ခံက ဌာန၏သမိုင်းအကြောင်းနှင့် လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ၊ ဌာန၏ လက်ရှိဆောင်ရွက်နေသည့်လုပ်ငန်းတာဝန်များ၊ စားသုံးကာကွယ်ရေးဥပဒေအဓိပ္ပါယ်ဖွင့်ဆိုချက်များ၊ ကမ္ဘာ့စားသုံးသူအခွင့်အရေးများနေ့ပေါ်ပေါက်လာပုံအကြောင်းအရာများနှင့် ဒု-ဦးစီးမှူး ဒေါ်တင်မာရီက စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များနှင့် ကုန်စည်ဝန်ဆောင်မှုနှင့်စပ်လျဉ်း၍ နစ်နာဆုံးရှုံးမှုများဖြစ်ပေါ်လာပါက ပြောရေးဆိုခွင့်၊ တိုင်ကြားခွင့်၊ ကုစားခွင့်နှင့် တိုင်ကြားနိုင်သည့်နေရာနှင့် တိုင်ကြားနိုင်သူများအကြောင်းကို အသေးစိတ်ရှင်းလင်းဆွေးနွေးခဲ့ပြီး မြို့နယ်ကြက်ခြေနီအဖွဲ့ဝင် ဦးမောင်မောင်ဝင်းက ကြက်ခြေနီအသင်းပေါ်ပေါက်လာပုံနှင့် လုပ်ဆောင်မှုအဆင့်ဆင့်ကို အသိပညာပေးရှင်းလင်းဆွေးနွေးခဲ့ပြီး ဟောပြောပွဲသို့တက်ရောက်ခဲ့သည့် ဆရာ/မများနှင့် ကျောင်းသား/သူများအား  စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရပါသည်။

DOCA(မကွေး)

               ၂၀၂၄ ခုနှစ်၊ နိုဝင်ဘာလ(၁၈)ရက်နေ့ နေ့လယ်(၁၂:၃၀)နာရီအချိန်တွင် မြန်အောင်မြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံသည် အမှတ်(၁)ရပ်ကွက်၊ ရုံးလမ်း၊ မြို့နယ်ထွေအုပ်ရုံး၌ စားသုံးသူပြည်သူများအနေဖြင့် Online မှဈေးဝယ်ယူရာတွင် လိမ်လည်လှည့်ဖြားခံရမှုမရှိစေရန်နှင့် နစ်နာဆုံးရှုံးမှုများမဖြစ်ပေါ်စေရန်ရည်ရွယ်လျက် အွန်လိုင်းစနစ်ဖြင့် ဈေးဝယ်ယူခြင်းနှင့်စပ်လျဉ်း၍ အသိပညာပေးဟောပြောပွဲဆောင်ရွက်ခဲ့ကြောင်း သတင်းရရှိပါသည်။

               ဟောပြောပွဲတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးမြင့်အောင်က စားသုံးသူပြည်သူများအနေဖြင့် အွန်လိုင်းမှဈေးဝယ်ယူမည်ဆိုလျှင် မိမိဝယ်ယူမည့် Page(သို့မဟုတ်) website သည် တရားဝင်မှတ်ပုံတင်ထားသောလုပ်ငန်းဟုတ်/ မဟုတ် စစ်ဆေးရမည်ဖြစ်ကြောင်း၊ စားသုံးသူများအကြားနာမည်ဂုဏ်သတင်းကောင်းမွန်ခြင်းရှိ/ မရှိ၊ Page၏လုပ်ငန်းစဉ်များအားအသေးစိတ်စိစစ်မေးမြန်းခြင်း၊ မိမိ၏ကိုယ်ရေးအချက်အလက်များနှင့် ငွေပေးချေမှုဆိုင်ရာအချက်အလက်များအား ကျိုးကြောင်းခိုင်လုံမှုရှိ/ မရှိ၊ ကုန်စည်ပို့ဆောင်မှုစနစ်နှင့် စပ်လျဉ်း၍ သေချာစွာစိစစ်ရမည်ဖြစ်ကြောင်း၊ သတင်းအချက်အလက်များပြည့်စုံမှန်ကန်စွာဖော်ပြထားမှုရှိ/မရှိ၊ Page တွင် ကြော်ငြာ ထားသောဝန်ဆောင်မှုနှင့် မိမိရရှိသောအချက်များကိုက်ညီမှုရှိ/ မရှိ၊ မိမိဝယ်ယူသုံးစွဲမည့်ကုန်စည်သည် သက်ဆိုင်ရာဌာနထောက်ခံချက်များ ပါဝင်မှုရှိ/ မရှိ စစ်ဆေးရမည်ဖြစ်ကြောင်း စသည့်အချက်များအား အသိပညာပေးဟောပြောခဲ့ပြီး ဆက်လက်၍ Online Sale ရောင်းချသူများမှ စားသုံးသူများအပေါ်ငွေကြေးလိမ်လည်ရယူခြင်း၊ ကုန်စည်/ ဝန်ဆောင်မှုအရည်အသွေးနှင့်စပ်လျဉ်း၍ လိမ်လည်မှုများလည်းရှိသဖြင့် စားသုံးသူပြည်သူများနစ်နာဆုံးရှုံးမှုမဖြစ်ပေါ်နိုင်စေရန် ရှောင်ကြဉ်ရမည့်အချက်များအား အသေးစိတ်ရှင်းလင်းဆွေးနွေးဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)

               စားသုံးသူရေးရာဦးစီးဌာန၊ ဇလွန်မြို့နယ်ဦးစီးမှူးသည် မိတ်ဖက်ဌာနဆိုင်ရာများနှင့် ပူးပေါင်း၍(၁၈.၁၁.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ဇလွန်မြို့နယ်၊ မြို့ပေါ်ရပ်ကွက်ရှိ စားသုံးဆီအရောင်းဆိုင်များအားဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ပါသည်။

              ထိုသို့ကွင်းဆင်းစစ်ဆေးခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြခြင်းရှိ/ မရှိတို့ကိုစစ်ဆေးခဲ့ပြီး၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်းကြားချက်အမှတ် (၂/ ၂၀၁၉) နှင့်အညီ မြန်မာဘာသာဖြင့် ပြည်စုံစွာဖော်ပြထားသော ကုန်စည်များကိုသာရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များနှင့် ပြစ်မှုပြစ်ဒဏ်များ၊ စားသုံးဆီရောင်းချသောလုပ်ငန်းရှင် များအနေဖြင့် ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်အတွင်း ဈေးနှုန်းမြှင့်တင်ရောင်းချခြင်းများတွေ့ရှိပါက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော  အရေးကြီးကုန်စည်နှင့် ဝန်ဆောင်မှုဥပဒေပါ ပြစ်မှုပြစ်ဒဏ်များအရ အရေးယူဆောင်ရွက်နိုင်သည့်အကြောင်း စသည်တို့ကို အသိပညာပေးပြောကြားခဲ့ပြီး၊ စားသုံးဆီအရောင်းဆိုင်(၅)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်းသိရှိရပါသည်။

DOCA(ဧရာဝတီ)

              စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် ဟင်္သာတမြို့နယ်၊ ရုံးကြီးရပ်ကွက်၊ ရွှေစေတီလမ်းရှိ မြို့နယ်ထွေအုပ်ရုံး၌ ပြည်သူ(၆၀)ဦးအား (၁၇.၁၁.၂၀၂၄)ရက်နေ့ နံနက် (၁၀:၀၀) နာရီအချိန်တွင် စားသုံးသူကာကွယ်ရေးအသိပညာပေးဟောပြောခြင်းများ ကိုဆောင်ရွက်ခဲ့ပါသည်။

               ဟောပြောပွဲတွင် မြို့နယ်ဦးစီးမှူး ဦးမိုးကျော်က စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စားသုံးသူများသည် ကုန်စည်ကိုရွေးချယ်ဝယ်ယူတတ်စေရန် ကုန်အညွှန်းအမှတ်အသားနှင့် စပ်လျဉ်း၍ ဖော်ပြပါရှိသည့်အချက်အလက်များကို သေချာစွာစိစစ်ဝယ်ယူနိုင်ရန်၊ အစားအသောက်နှင့် ကုန်စည်တွေပေါ်မှာဖော်ပြရမည့် ကုန်အညွှန်းအမှတ်အသားများအကြောင်း၊ ဝယ်ယူအသုံးပြုခဲ့သောကုန်စည်နှင့် ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက ပြောဆိုတင်ပြတိုင်ကြားခွင့်နှင့် ပြန်လည်ကုစားနိုင်ခွင့်များအကြောင်း၊  ပြစ်မှုနှင့် ပြစ်ဒဏ်များအကြောင်းနှင့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(Consumer Information and Complaint Center) CICC ဖွင့်လှစ်ထားရှိမှု အခြေအနေကိုလည်းကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက် လေ့လာနိုင်ကြောင်းနှင့် Consumer Call Center 1535 သို့ ဆက်သွယ်မေးမြန်းနိုင်ကြောင်းကိုလည်းကောင်း စသည်တို့ကို အသိပညာပေးဟောပြော ဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)