HighLight News

       ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်၊ စားသုံးသူရေးရာဦးစီးဌာနရုံး၌  (၁၃-၁၁-၂၀၂၄) ရက်နေ့၊ နေ့လယ် (၁၃း၀၀) နာရီအချိန်တွင် မြို့နယ်တာဝန်ခံနှင့်ဝန်ထမ်းများသည် အုတ်ဖိုမြို့နယ်ရှိ ဆီလုပ်ငန်းရှင်များ၊ ဆီကုန်သည်အသင်းသူ/အသင်းသားများနှင့်တွေ့ဆုံ၍ မြို့နယ်အတွင်း   စားအုန်းဆီဖြန့်ဖြူးရောင်းချမှုအခြေအနေများအား ညှိနှိုင်းအစည်းအဝေးဆောင်ရွက်ခဲ့ပါ သည်။

      အဆိုပါညှိနှိုင်းဆွေးနွေးပွဲတွင် မြို့နယ်တာဝန်ခံ ဦးအေးဇော်ထိုက်က ဆီရောင်းချသည့်လုပ်ငန်းရှင်ကြီးများအား သတ်မှတ်ဈေးနှုန်းအတိုင်း အလေးချိန်မှန်မှန်ကန်ကန်ရောင်းချပေးရန် အလှည့်ကျကျေးရွာအုပ်စုရှိ အိမ်ထောင်စုများအားလုံးကို ဖြန့်ဖြူးရောင်းချပေးရန်၊ စာအုပ်စနစ်ဖြင့် စည်းကမ်းချက်နှင့်အညီရောင်းချကြရန် ပြောကြားဆွေးနွေးခဲ့သည်။

       ဆက်လက်၍ မြို့နယ်ဆီကုန်သည်အသင်းဥက္ကဋ္ဌကလည်း ဆီရောင်းချသည့်ကုန်သည်များအား စည်းကမ်းသတ်မှတ်ချက်များကိုရှင်းလင်းပြောကြားခဲ့ပြီး စည်းကမ်းမလိုက်နာပါက အရေးယူ   ဆောင်ရွက်သွားမည့် အစီအစဉ်များကိုပြောကြားခဲ့ကြောင်းသိရှိရပါသည်။

DOCA(ပဲခူး)

               ၁၃.၁၁.၂၀၂၄ ရက်နေ့ နံနက်(၁၀:၀၀)နာရီအချိန်တွင် မြောက်ပိုင်းခရိုင်ဦးစီးမှူးရုံးမှဝန်ထမ်းများသည် အင်းစိန်မြို့နယ်၊ သန့်စင်စတိုးသို့ အလှကုန်ပစ္စည်းအမျိုးမျိုး (၁၀)ဂရမ်နှင့် အထက်ရောင်းချနေမှုအား ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

               ထိုသို့ ဆောင်ရွက်ခဲ့ရာတွင် အမှတ်(၂၃)၊ လှိုင်မြစ်လမ်း၊ ကွက်သစ်ရပ်ကွက်၊ အင်းစိန်မြို့နယ်ရှိ သန့်စင်စတိုး၌ရောင်းချလျက်ရှိသော အလှကုန်ပစ္စည်း(၁၀)ဂရမ်နှင့် အထက်စစ်ဆေးခဲ့သည့် ကုန်ပစ္စည်းများမှာ HERALLINES၊ BELLA၊ CUTE PRESS၊ Misting၊ IODERN၊ Anytime၊ Blue Lady၊ ရွှေပြည်နန်း၊ တောင်ကြီးမောက်မယ်တို့တွင် အမျိုးအမည်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ပါရှိခြင်းရှိ/ မရှိစစ်ဆေးခဲ့ရာ အမှတ်တံဆိပ်ပြည့်စုံကြောင်း စစ်ဆေးတွေ့ရှိရပါသည်။

DOCA(ရန်ကုန်)

               ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ်ရှိရပ်ကွက်များတွင် အလှကုန်ပစ္စည်းအမျိုးမျိုးတို့အား ဖြန့်ဖြူးရောင်းချလျက်ရှိသောဆိုင်များသို့ နိုဝင်ဘာလ (၁၂) ရက်နေ့၊ နံနက်(၁၀း၀၀) နာရီအချိန်တွင် ကုန်အညွှန်းအမှတ်အသားဆိုင်ရာ ကွင်းဆင်းခဲ့ကြောင်းသိရသည်။

                ထိုသို့ ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာမြို့မဈေးတာဝန်ခံနှင့်စားသုံးသူရေးရာဦးစီးမှ မြို့နယ်တာဝန်ခံတို့သည် စားသုံးသူပြည်သူများအား စားသောက်ကုန်ပစ္စည်းများနှင့် လူသုံးကုန်ပစ္စည်းအမျိုးမျိုးတို့အား ဝယ်သူသုံးစွဲရာတွင် စားသုံးသူဘေးအန္တရာယ်ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန်အတွက် ဒလမြို့နယ်ရပ်ကွက်များရှိ အလှကုန်ပစ္စည်းအမျိုးမျိုး ရောင်းချနေသည့်ကုန်စုံဆိုင်များအား အလှကုန်ပစ္စည်းအမျိုးမျိုးတို့၌ သက်ဆိုင်ရာဌာနများဖြစ်သော အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ခွင့်ပြုချက်ပါရှိ/ မရှိ စားသုံးသူရေးရာဦးစီးဌာနမှထုတ်ပြန်ထားသော,ကုန်အညွှန်းအမှတ်အသားဖော်ပြခြင်းဆိုင်ရာအချက်များ ပြည့်စုံစွာဖော်ပြထားခြင်းရှိ/ မရှိတို့အား ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

               ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ် စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ နိုဝင်ဘာလ(၁၃)ရက်နေ့၊ နေ့လယ် (၁၁း၃၀) အချိန်တွင် အွန်လိုင်းရောင်းချမှုလုပ်ငန်းများနှင့် စပ်လျဉ်း၍ သိကောင်းစရာများအကြောင်း Talk Show ပြုလုပ်ခဲ့ကြောင်း သိရသည်။

                  အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ သုံးခွမြို့နယ်တာဝန်ခံဒေါ်စန်းစန်းမော်နှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိဒေါ်တင်တင်ဆွေတို့သည် အွန်လိုင်းရောင်းချမှုလုပ်ငန်းနှင့် စပ်လျဉ်း၍ စိစစ်သင့်သည့်အချက်အလက်များ၊ ကုန်စည်(သို့မဟုတ်) ဝန်ဆောင်မှုနှင့်စပ်လျဉ်း၍ စားသုံးသူများစိစစ်သင့်သည့်အချက်များ၊ အွန်လိုင်းစနစ်ဖြင့်ရောင်းချခြင်းလုပ်ငန်းနှင့် စပ်လျဉ်း၍ သက်ဆိုင်ရာဌာနများ၏ဆောင်ရွက်နေမှုများ၊ ကုန်စည်နှင့် ဝန်ဆောင်မှုများကိုဝယ်ယူရာ၌ နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နည်းလမ်းများအကြောင်း ဆွေးနွေးခဲ့သည်ဟုသိရှိရပါသည်။

DOCA(ရန်ကုန်)

                ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ စားသုံးသူရေးရာဦးစီးဌာန၊ မြို့နယ်တိုင်းရင်းဆေးဦးစီးဌာန၊ အားကစားနှင့် ကာယပညာဦးစီးဌာနနှင့် အခြေခံပညာဦးစီးဌာနတို့ပူးပေါင်း၍ လူငယ်ရေးရာအသိပညာပေးဟောပြောပွဲနှင့် စားသုံးသူကာကွယ်ရေးအသိပညာပေးဟောပြောပွဲကို နိုဝင်ဘာလ (၁၂) ရက်နေ့၊ နံနက်(၁၀း၃၀)နာရီအချိန်တွင် ခရမ်းမြို့နယ်၊ ညောင်ပင်ကွင်းကျေးရွာ အခြေခံပညာ အထက်တန်းကျောင်းတွင် ကျင်းပခဲ့ကြောင်းသိရသည်။

               အဆိုပါဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနက လူသားတို့ဘဝတွင် လူငယ်ဘဝသည်အရေးကြီးဆုံးဖြစ်၍ လူငယ်ဘဝကတည်းက နိုင်ငံကိုချစ်မြတ်နိုးစိတ်၊ တိုင်းရင်းသားအချင်းချင်းချစ်ကြည်ရင်းနှီးစွာနေထိုင်လိုစိတ်တို့ရှိနေရမည်ဖြစ်ကြောင်း အထူးသဖြင့် ပြည်ထောင်စုစိတ်ဓာတ်များလွှမ်းခြုံထားရမှာဖြစ်ပြီး ပြည်စုထောင်စုစိတ်ဓာတ်ရှိသည့် လူငယ်မောင်မယ်များသည် လူကြီးအရွယ်ရောက်သည့်အခါ နိုင်ငံတော်၏အနာဂတ်ကို လှပအောင်ဆောင်ရွက်နိုင်လိမ့်မည်ဖြစ်ကြောင်း အသိပညာပေးဟောပြောခဲ့ပြီး ကျောင်းအုပ်ဆရာမကြီးကနိုင်ငံတစ်နိုင်ငံဖွံ့ဖြိုးတိုးတက်မှု၏ အခြေခံအုတ်မြစ်သည် ပညာတတ်အရင်းအမြစ်များပေါများခြင်းပင်ဖြစ်ကြောင်း နိုင်ငံတော်အနေဖြင့် အသိပညာ၊ အတတ်ပညာပြည့်စုံပြီး ပညာတတ်များနှင့် သာယာဝပြောသည့် အနာဂတ်နိုင်ငံတော်ကြီးကို တည်ဆောက်ရန် ဦးတည်ဆောင်ရွက်ရာတွင် အရည်အသွေးပြည့်ဝသည့် ဘက်စုံပညာရေးစနစ်တိုးတက်ဖြစ်ပေါ်ရေးကိုလည်း ကြိုးပမ်းအကောင်အထည်ဖော်ဆောင်လျှက်ရှိကြောင်း အသိပညာပေးပြောကြားခဲ့ပြီး စားသုံးသူရေးရာဦးစီးဌာနမှ မြို့နယ်တာဝန်ခံက စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်များ၏တာဝန်များ၊ စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် ကုန်အညွှန်းအမှတ်အသားဖော်ပြခြင်းဆိုင်ရာအချက်များ၊ ကုန်စည်(သို့)ဝန်ဆောင်မှုများ ဝယ်ယူသုံးစွဲခြင်းမပြုမှီ သတိပြုရမည့်အချက်များအား အသိပညာပေးပြောကြားခဲ့ပြီး မြို့နယ်တိုင်းရင်းဆေးမှူးက တိုင်းရင်းဆေးအကြောင်းသိကောင်းစရာများ ဆွေးနွေးပြောကြားခဲ့ပြီး အားကစားနှင့်ကာယပညာဦးစီးဌာနကလည်း အားကစားကဏ္ဍမြင့်မားတိုးတက်စေရေးအား နိုင်ငံတော်အနေဖြင့် ကြိုးပမ်းလုပ်ဆောင်နေကြောင်း အခြေခံပညာကျောင်းများတွင် အားကစားထူးချွန်သူများပေါ်ထွန်းလာရေးကိုရည်ရွယ်လျှက် အားကစားကွင်းများအား အဆင့်မြင့်မြင့်တည်ဆောက်ပေးလျက်ရှိကြောင်း မည့်သည့်ဘာသာရပ်မဆို ထူးချွန်တတ်ကျွမ်းထားလျှင် အသက်မွေးဝမ်းကြောင်းအတွက် ခိုင်မာစွာရပ်တည်နိုင်မည်ဖြစ်ကြောင်း အသိပညာပေးပြောကြားခဲ့ကြောင်း သိရှိရပါသည်။

DOCA(ရန်ကုန်)