HighLight News

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြမြို့နယ်ဦးစီးမှူး ဦးလှထွဋ်ဦးနှင့် ဝန်ထမ်းများသည် အလုပ်သမားဝန်ကြီးဌာနလက်အောက်ရှိ အလုပ်သမားညွှန်ကြားရေးဦးစီးဌာန၊ လူမှုဖူလုံရေးအဖွဲ့အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာန၊ အလုပ်သမားရေးရာ ဆက်ဆံရေးဦးစီးဌာနတို့နှင့်ပူးပေါင်း၍ (၁၁-၆-၂၀၂၄) ရက်နေ့၊ နံနက်(၀၉:၀၀)နာရီအချိန်တွင် မြို့နယ်ဆန်စက်ပိုင်ရှင်အသင်းရုံး၌  စက်ပိုင်ကိုယ်စားလှယ်နှင့် အလုပ်သမားများအား စားသုံးသူအသိပညာပေးဟောပြောပွဲပြုလုပ်ဆောင်ရွက်ခဲ့ပါသည်။

      ထိုသို့ဆွေးနွေးရာတွင် စားသုံးသူရေးရာဦးစီးဌာန၊ မြို့နယ်ဦးစီးမှူးသည် တက်ရောက်လာသော စက်ပိုင်ကိုယ်စားလှယ်နှင့် အလုပ်သမားများအား  မိတ်ဆက်စကားပြောကြားခဲ့ပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များအနက် စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ညွှန်ကြားချက်များအား အသေးစိတ်ရှင်းလင်းခဲ့ပြီး၊  ဆန်စပါးလုပ်ငန်းနှင့်ပတ်သက်၍ ဆန်စပါးသိုလှောင်ရုံလုပ်ငန်းများ၏ သိုလှောင်မှုအခြေအနေနှင့် သိုလှောင်ရုံများကို ဒီဂျစ်တယ်နည်းလမ်းဖြင့် စနစ်တကျမှတ်ပုံတင်နိုင်သည့် မြန်မာ့ဆန်စပါး (အွန်လိုင်း) (Myanmar  Rice  Online – MyRO ) ကို အစိုးရ၊ ပုဂ္ဂလိက ပူးပေါင်းဆောင်ရွက်မှုပုံစံဖြင့် အကောင်အထည်ဖော်ဆောင်ရွက်လျက်ရှိပါသည်၊ ဆန်စက်ပိုင်ရှင်များအနေဖြင့် MyRO တွင် သိုလှောင်ရုံများအား Online  စနစ်ဖြင့် မှတ်ပုံတင်နိုင်ရေးအတွက် တွန်းအားပေးဆောင်ရွက်နိုင်ရန် ဆွေးနွေးမှာကြားခဲ့ပါသည်။ ထို့နောက် တက်ရောက်လာသူများ၏ သိရှိလိုသည့်မေးမြန်းဆွေးနွေးချက်များအား ပြန်လည်ရှင်းလင်းဆွေးနွေးခဲ့ပါသည်။  ဆွေးနွေးပွဲသို့ ဌာနဆိုင်ရာမှ (၆)ဦး၊ စက်ပိုင်ကိုယ်စားလှယ်နှင့် အလုပ်သမား (၅၇)ဦး၊ စုစုပေါင်း (၆၃)ဦးတက်ရောက်ခဲ့ကြောင်းသိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ သာပေါင်းမြို့နယ်၊ မြို့နယ်တာဝန်ခံနှင့် ဝန်ထမ်းများသည် ၂၀၂၄ခုနှစ်၊ ဇွန်လ (၇)ရက်နေ့၊  နံနက် (၁၀:၀၀) နာရီအချိန်တွင် သာပေါင်းမြို့နယ်ရှိ စာအုန်းဆီလက်လီအရောင်းဆိုင်လုပ်ငန်းရှင်များအားခေါ်ယူ၍ တွေ့ဆုံဆွေးနွေးခဲ့ပါသည်။

  ထိုသို့လုပ်ငန်းရှင်တွေ့ဆုံဆွေးနွေးရာတွင် မြို့နယ်တာဝန်ခံသည် စားအုန်းဆီလက်လီအရောင်းဆိုင်လုပ်ငန်းရှင်များအား စားအုန်းဆီများကို သတ်မှတ်ရည်ညွှန်းဈေးနှုန်းဖြင့်ရောင်းချရန်နှင့် ဈေးနှုန်းကြီးမြင့်စွာရောင်းချပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်းသိရှိရပါသည်။

DOCA(ဧရာဝတီ)

     ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စည်ပင်သာယာမြို့မဈေးအတွင်း/အပြင်နှင့် ရပ်ကွက်များတွင် ဆေးနှင့်ဆေးပစ္စည်းများရောင်းချလျက်ရှိသော ဆေးဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်ချက်နှင့်အညီ ဈေးကွက်အတွင်း ဆေးနှင့်ဆေးပစ္စည်းများပြတ်လပ်မှုမရှိစေရေး၊ ဖြစ်သင့်ဖြစ်ထိုက်သည့်ဈေးနှုန်းထက် ဈေးနှုန်းမြှင့်တင်ရောင်းချနေမှုများမဖြစ်ပေါ်စေရေန် ရည်ရွယ်၍ ၂၀၂၄ခုနှစ်၊ ဇွန်လ(၇)ရက်နေ့၊ နံနက်(၁၀း၃၀)နာရီအချိန်တွင် ဌာနဆိုင်ရာတာဝန်ရှိသူများပူးပေါင်း၍ အဖွဲ့စုံဖြင့် သွားရောက်ကွင်းဆင်းစစ်ဆေးခဲ့ကြောင်းသိရသည်။

    ထိုသို့ကွင်းဆင်းစစ်ဆေးခဲ့ရာတွင် မြို့နယ်ပြည်သူ့ကျန်းမာရေးဦးစီးဌာနမှ တာဝန်ရှိသူနှင့်ဝန်ထမ်းများ၊ မြို့နယ်စည်ပင်သာယာရေးအဖွဲ့မှ တာဝန်ရှိသူနှင့်ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းများသည် စည်ပင်သာယာမြို့မဈေးအပြင်တန်း ဆိုင်အမှတ်(၈) အပြင် (၂၇၊ ၂၈) ရှိ အောင်ဆေးဆိုင်၊ အမှတ်(၆၆/၃) အောင်ဇေယျလမ်း၊ (၄)ရပ်ကွက်ရှိ စူပါဆေးဆိုင်၊ အမှတ်(၆၈/၅) နေခြည်ဆေးဆိုင်၊ ကောင်းမွန်ဆေးဆိုင်နှင့် ဟောင်ကောင်ဆေးဆိုင်များတွင် ဆေးနှင့်ဆေးပစ္စည်းများပြတ်လပ်မှုရှိ/မရှိနှင့် ဈေးနှုန်းမြှင့်တင်ရောင်းချနေမှုရှိ/မရှိ၊ ဈေးကစားရန် ရည်ရွယ်ချက်ဖြင့် သိုလှောင်ထားခြင်းရှိ/မရှိ ကွင်းဆင်းစစ်ဆေးခဲ့ကြောင်းသိရသည်။

       အဆိုပါဆေးဆိုင်များတွင် ဆေးအမျိုးပေါင်း(၁၀၀)ကျော်ရှိပြီး ဆီးချို၊ သွေးချိုကျဆေး၊ သွေးကျဆေး၊ အာရုံကြောဆေး၊ အသည်းဆေး၊ နှလုံးဆေး၊ ယားနာဆေး၊ အားဆေး၊ အကိုက်ခဲပျောက်ဆေးများမှာ ရောင်းအားအကောင်းဆုံးသောဆေးများဖြစ်ပြီး AA၊ Mega၊ DKSH၊ Zifan စသည့်ကုမ္မဏီများမှ ဝယ်ယူဖြန့်ဖြူးသည့် ဈေးနှုန်းများအပေါ် (၈)ရာခိုင်နှုန်းအထိသာ အမြတ်တင်ဖြန့်ဖြူးရောင်းချနေခြင်းဖြစ်ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ အနောက်ပိုင်းခရိုင်ဦးစီးမှူးရုံးမှ စစ်ဆေးရေးမှူးပါ (၂) ဦးတို့သည် ၁၀-၆-၂၀၂၄ ရက်နေ့၊ နေ့လယ် (၁၃:၀၀) နာရီအချိန်တွင် လှိုင်မြို့နယ်၊ ပါရမီလမ်းမပေါ်ရှိ စိန်ဂေဟာသို့သွားရောက်၍ ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

    ထိုသို့ ကလေးကစားစရာအရုပ်အမျိုးမျိုးအား ကွင်းဆင်းစစ်ဆေးခဲ့ရာတွင် Robot၊ Super Race၊ Fire Department၊ Magic Cube၊ Block Set၊ Co Go၊ Frozen Fever၊ RC(ဘတ္ထရီပစ္စည်း)၊ Hight Speet Sport Car (ဓာတ်ခဲထည့်၍သုံးရသောကား) များတွင် ကုန်ပစ္စည်းအမျိုးအမည်၊ အရွယ်အစား၊ သုံးစွဲပုံနည်းလမ်းနှင့် သတိပေးချက်ပါဝင်ကြောင်း စစ်ဆေးတွေ့ရှိရပါသည်။ မိမိတို့ဌာနအနေဖြင့်လည်း ကုန်အညွှန်းအမှတ်အသားနှင့် ပတ်သက်၍ ဆိုင်တာဝန်ခံအား အမှတ်တံဆိပ်ပြည့်စုံသော ပစ္စည်းများကိုသာအဓိကရွေးချယ်၍ရောင်းချပေးရန်နှင့် မိမိဆိုင်သို့လာရောက်၍ ပစ္စည်းတင်သွင်းသူများကိုလည်း ကုန်အညွှန်းအမှတ်အသားမပြည့်စုံသော ပစ္စည်းများကိုလက်ခံခြင်းမပြုရန် ပြောကြားခဲ့ကြောင်းသိရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဗိုလ်ချုပ်လမ်းမကြီးဘေး ဝဲယာရပ်ကွက်ကျေးရွာများတွင် ရောင်းချပေးလျက်ရှိသော စက်သုံးဆီအရောင်းဆိုင်များသို့ စက်သုံးဆီရောင်းချနေမှုအခြေအနေအား ၂၀၂၄ခုနှစ်၊ ဇွန်လ(၅)ရက်နေ့၊ နံနက်(၁၀း၃၀)နာရီအချိန်တွင် သွားရောက်၍ ကွင်းဆင်းစစ်ဆေးခဲ့ကြောင်းသိရသည်။

      ထိုသို့ကွင်းဆင်းစစ်ဆေးခဲ့ရာတွင် ကော့မှူးမြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး၊ မြို့နယ်မီးသတ်ဦးစီးဌာနမှမြို့နယ်ဦးစီးမှူး၊ မြန်မာနိုင်ငံရဲတပ်ဖွဲ့မှ ခေတ္တမြို့နယ်မှူးနှင့်တပ်ဖွဲ့ဝင်များ၊ မြို့နယ်လျှပ်စစ်ဦးစီးဌာနမှ မြို့နယ်မန်နေဂျာ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့သည် ဗိုလ်ချုပ်လမ်းမကြီးဘေး ဝဲယာမြို့သစ်ရပ်ကွက်များ၌ ရောင်းချလျှက်ရှိသော Apex စက်သုံးဆီဆိုင်၊ ဇလုပ်ကြီးကျေးရွာရှိ Max ဆီဆိုင်နှင့် အဖျောက်ကျေးရွာရှိ ရွှေသရဖူဆီဆိုင်များ၌ ယာဉ်တန်းစီစောင့်ဆိုင်းဝယ်ယူနေရခြင်းရှိ/မရှိ၊ မိုးစပါးစိုက်ပျိုးရာသီဖြစ်နေသောကြောင့် လယ်ထွန်ယက်စိုက်ပျိုးမည့် တောင်သူများအပေါ် အပြည့်အဝဖြန့်ဖြူးပေးနိုင်ခြင်း ရှိ/မရှိတို့ကိုမေးမြန်းစုံစမ်းခဲ့ရာ စက်သုံးဆီအရောင်းဆိုင်များမှ တာဝန်ရှိသူ ဆီဆိုင်မန်နေဂျာတို့က မိမိတို့၏ဆီဆိုင်များတွင် သတ်မှတ်ထားသည့်ခွဲတမ်းများကို အချိန်မီထုတ်ယူရရှိနေပါသဖြင့် မည်သည့်စက်သုံးဆီအမျိုးအစားကိုမဆို ဖြန့်ဖြူးရောင်းချပေးလျက်ရှိကြောင်းနှင့် ယာဉ်တန်းစီးတိုး၍ ဝယ်ယူနေရသည့်အခြေအနေများမရှိပါကြောင်း ပြန်လည်ဖြေကြားခဲ့ပြီး မြို့နယ်စက်သုံးဆီစိစစ်ရေးအဖွဲ့က ဌာနဆိုင်ရာတာဝန်ရှိသူများအနေဖြင့် မိမိတို့၏စက်သုံးဆီသိုလှောင်ကန်များတွင် စက်သုံးဆီရှိပါလျက် ဆီဖြန့်ဖြူးရောင်းချပေးခြင်းများမရှိပါက ဥပဒေနှင့်အညီ အရေးယူခံရမည်ဖြစ်ကြောင်း အသိပညာပေးကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)