HighLight News

           ရှမ်းပြည်နယ်မြောက်ပိုင်းအတွင်းရှိ‌ ဆေးဆိုင်များသို့ ဆေးဝါးများအဓိက ဖြန့်ဖြူးရောင်းချ ပေးလျက်ရှိသော ဆေးဝါးကုမ္မဏီတစ်ခုဖြစ်သည့် AA  Medical Products Co.,Ltd (လားရှိုးရုံးခွဲ)မှ တာဝန်ရှိသူများသည်  စားသုံးသူရေးရာဦးစီးဌာန၊ အစားအသောက်ဆေးဝါးကွပ်ကဲရေးဦးစီးဌာနရှိတာဝန်ရှိသူများနှင့် ပူးပေါင်း၍ ရက်လွန်ဆေးဝါးများနှင့် ပျက်စီးဆေးဝါးများအား ၂၀၂၂ခုနှစ်၊ မေလ၊ ၁၆ ရက်နေ့ ညနေ(၃း၀၀)ခန့် အချိန်တွင် လားရှိုးမြို့၊ စည်ပင်သာယာအမှိုက်ပုံတွင် မီးရှို့ဖျက်ဆီးခဲ့ကြောင်း သိရှိရပါသည်။

          AA Medical Products Co.,Ltd အနေဖြင့် ရှမ်းပြည်နယ်မြောက်ပိုင်းအတွင်းတွင်လားရှိုး၊ သိန္နီ၊ ကွတ်ခိုင်၊ မူဆယ်၊ နမ့်ခမ်း၊ နောင်ချို၊ ကျောက်မဲ၊ သီပေါ၊ တန့်ယန်းနှင့်မိုင်ရယ်မြို့ကြီးများရှိ ဆေးဆိုင်များသို့ ဖြန့်ဖြူးရောင်းချပေးလျက်ရှိရာ  ဆေးဆိုင်ပေါင်း(၂၀၀)ကျော်ခန့်ရှိကြောင်း သိရှိရပါသည်။ အဆိုပါ ကုမ္မဏီအနေဖြင့် ၎င်းတို့ဖြန့်ဖြူးရောင်းချပေးထားသည့် ဆေးဝါးများအား ကုမ္မဏီမှစီစစ်၍ ပြန်လည်သိမ်းဆည်းထားခဲ့ပြီး  ယခုကဲ့သို့သက်ဆိုင်သည့် ဌာနများနှင့်ပူးပေါင်း၍ ဖျက်ဆီးခဲ့ကြောင်း သိရှိရပါသည်။  ဖျက်ဆီးခဲ့သည့် ဆေးဝါးအမျိုးအစားပေါင်း (၉၀)မျိုးခန့်ရှိပြီး ခန့်မှန်းတန်ဖိုးငွေ (၁၃297922.68) ကျပ်နှင့် ပထမဆုံးအကြိမ်ဖြစ်ကြောင်း သိရှိရပါသည်။    

DOCA(ရှမ်း)

            ပဲခူးတိုင်းဒေသကြီး စားသုံးသူရေးရာဦးစီးဌာန၊ ပဲခူးမြို့နယ်တာဝန်ခံ ဦးဗိုလ်မြတ်လင်း သည် ၂၀၂၂ ခုနှစ် ၊ မေလ ၁၈ ရက်၊ နံနက် ၁၀:၀၀ နာရီတွင်  ပဲခူးခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ Talk Show အစီအစဉ်ဖြင့်  စာသုံးသူအကာအကွယ်ပေး‌‌ရေးဆိုင်ရာ သိကောင်းစရာများကို အသိပညာပေးဆွေးနွေးပွဲ ကျင်းပပြုလုပ်ခဲ့ပါသည်။

          အဆိုပါ ဆွေးနွေးပွဲတွင် ပဲခူးမြို့နယ်တာဝန်ခံ ဦးဗိုလ်မြတ်လင်းမှ စားသုံးသူပြည်သူများအနေဖြင့် ကုန်စည်(သို့)ဝန်ဆောင်မှုများကို ဝယ်ယူသုံးစွဲရာတွင် ထိခိုက်နစ်နာမှုများ ကြုံတွေ့ရပါက စားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်ပါကြောင်း၊ ဆက်သွယ်တိုင်ကြားနိုင်သည့် နည်လမ်းများ၊ ဆက်သွယ်တိုင်ကြားနိုင်သည့် လိပ်စာများနှင့် တိုင်ကြားလာမှုများအပေါ် စားသုံးသူရေးရာဦးစီးဌာနအနေဖြင့် ပြန်လည်ဖြေရှင်း ဆောင်ရွက်ပေးမှုအခြေအနေများကို အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဝန်ထမ်းများသည် မေလ ၁၂ ရက်နေ့ နံနက်ပိုင်းက အုတ်တွင်းမြို့ပေါ်ရှိ စားသုံးဆီရောင်းချသော ဆိုင်ကြီးများသို့ သွားရောက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပြည်ပမှ တင်သွင်းလာသည့် စားအုန်းဆီများ ဖြန့်ဖြူးသယ်ယူပို့ဆောင်ရာတွင် ညွှန်ကြားချက်များကို လိုက်နာရေး၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ သည် သတ်မှတ်ကာလ ၆ လ ပြည့်တော့မည်ဖြစ်သဖြင့် လိုက်နာဆောင်ရွက်ရေးတို့ကို ရှင်းလင်းဆွေးနွေးခဲ့ပါသည်။

              မြို့နယ်တာဝန်ခံက စားသုံးသူများ ဘေးအန္တရာယ်ကင်းရှင်းစေရန်အတွက် မေလ ၁ ရက် နေ့မှ စတင်၍ ဆီကန်မှ ထုတ်ယူသော စားသုံးဆီများအား Food Grade အဆင့်ရှိ အဝါရောင်ပေပါ (သို့မဟုတ်) သန့်စင်ပြီး ပေပါအဟောင်း၊ စားသုံးဆီသီးသန့်သယ်ဆောင်သော ဘောက်ဆာယာဉ်များ နှင့် သန့်စင်ပြီး Food Grade Tank များသို့သာ ဆီဖြည့်ပေးမည်ဖြစ်ပြီး သတ်မှတ်ချက်နှင့် ကိုက်ညီမှု မရှိသည့် ပေပါများ၊ ဘောက်ဆာယာဉ်များအတွင်းသို့  ဆီဖြည့်ပေးမည်မဟုတ်ကြောင်း အသိပေး ကြေညာထားပါသဖြင့် မိမိမြို့နယ်အတွင်းရှိ ဆီကုန်သည်များအနေဖြင့် ရန်ကုန်မြို့ရှိ ဆီလှောင်ကန်များသို့ ဆီများသွားရောက်ထုတ်ယူရာတွင် ယင်းညွှန်ကြားချက်အတိုင်း လိုက်နာဆောင်ရွက်ရန် လို ပါကြောင်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် ညွှန်ကြားချက်အမှတ် ၁/၂၀၂၁ ဖြင့် ဈေးကွက်အတွင်း ဖြန့်ဖြူးရောင်းချသော ဆီအမျိုးအစားနှင့်ပတ်သက်၍ ကုန်အညွှန်းအမှတ်အသားဖော်ပြရာတွင် ပင်ရင်းပါဝင်ပစ္စည်းကိုအခြေခံသော ကုန်စည်အမျိုးအမည်ကို တိကျစွာ မြန်မာဘာသာဖြင့်ဖော်ပြရန်၊ ကုန်စည်အသားတင်ပမာဏနှင့် အရွယ်အစားတို့အား မြန်မာ့အလေးချိန် ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့်ဖော်ပြရန် ညွှန်ကြားထားပါကြောင်း၊ ယင်းညွှန်ကြားချက်သည် ဇွန်လ ၂၀ ရက်နေ့တွင် သတ်မှတ်ကာလပြည့်မီ၍ အာဏာတည်မည်ဖြစ်ပါဖြင့် လုပ်ငန်းရှင်များအနေဖြင့် အလေးထား လိုက်နာဆောင်ရွက်ကြရန် ဆွေးနွေးပြောကြားခဲ့ပါသည်။

              ထို့နောက် မြို့နယ်တာဝန်ခံနှင့်အဖွဲ့သည် ဈေးကွက်အတွင်း ရောင်းချနေသော စားသုံးဆီများတွင် ညွှန်ကြားချက်အမှတ် ၁/၂၀၂၁ ကို လိုက်နာဆောင်ရွက်ခြင်းရှိ၊ မရှိ ဈေးကွက်စောင့်ကြည့်စစ်ဆေးခြင်းကို ဆောင်ရွက်ခဲ့ပြီး စားအုန်းဆီများ ဖြန့်ဖြူးသယ်ယူပို့ဆောင်ခြင်းနှင့် ပတ်သက်သည့် အသိပေးကြေညာချက်ကို ဖြန့်ဝေခဲ့ကြောင်း သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်၊ ပန်းတောင်းမြို့နယ်တာဝန်ခံနှင့်အဖွဲ့သည် ပန်းတောင်းမြို့နယ်၊ တောင်ဘွေအုပ်စု၊ ပဲကြီးအင်းကျေးရွာသို့ (၂၈.၄.၂၀၂၂)ရက်နေ့ နံနက် (၉:၃၀) အချိန်တွင် မျိုးနေကြာစိုက်ပျိုးထုတ်လုပ်နေမှုအား ကွင်းဆင်းလေ့လာခဲ့ပါသည်။

        ပြည်တွင်းစားသုံးဆီဖူလှုံရေးအတွက် ပြည်ခရိုင်အနေဖြင့် ဆီထွက်သီးနှံဖြစ်သော နေကြာကို တိုးချဲ့စိုက်ပျိုးထုတ်လုပ်နိုင်ရေး လျာထားချက်များအတိုင်း တိုးချဲ့စိုက်ပျိုးထုတ်လုပ်နိုင်ရေး ဆောင်ရွက်လျှက်ရှိရာ ၂၀၂၂-၂၀၂၃ ခုနှစ်တွင် နေကြာစိုက်ပျိုးသည့် လျာထားဧကမှာ (၁၁၇၄၉)ရှိပြီး ပန်းတောင်း မြို့နယ်အနေဖြင့် ဧက (၁၀၀၀)ခန့်လျာထားပြီး ဖြစ်ပါသည်။ စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့်အဖွဲ့သည် ပန်းတောင်းမြို့နယ် တောင်ဘွေအုပ်စုရှိ၊ ပဲကြီးအင်းကျေးရွာသို့ သွားရောက်၍ ၂၀၂၂-၂၀၂၃ ခုနှစ် မျိုးနေကြာစိုက်ပျိုးထုတ်လုပ်သူ တောင်သူဦးမြင့်နိုင်ထွေး (အပါ) တောင်သူ (၁၆)ဦးနှင့် တွေ့ဆုံ၍ မေးမြန်းရာ မျိုးနေကြာစိုက်ပျိုးဧက (၂၁.၅၀) ဧကကို (၁၁.၄.၂၀၂၂)ရက်နေ့တွင် စတင်စိုက်ပျိုးထားပြီးဖြစ်ပါသည်။  နေကြာသက်တမ်းမှာ ရက်(၉၀)ခန့်သာရှိ၍ လာမည့် ဇူလိုင်လဆန်းတွင် စတင်ထွက်ပေါ်မည်ဖြစ်ကြောင်း၊ မျိုးနေကြာများထွက်ရှိလျှင် နေကြာစိုက်ပျိုးသူတောင်သူများအား ရောင်းချမည့်အပြင် နေကြာအစုအဖွဲ့များ ဖွဲ့စည်းပြီး ဆီစက်လုပ်ငန်းရှင်များကုန်သည်များထံသို့ ဒေသပေါက်ဈေးဖြင့် ရောင်းချမည်ဖြစ်ကြောင်း သိရပါသည်။

        နေကြာကို သီးထပ်/သီးညှပ်အဖြစ် စိုက်ပျိုးနိုင်ပြီး၊ စိုက်ပျိုးထုတ်လုပ်မှု ကုန်ကျစရိတ် နည်းပါးခြင်း၊ အပျက်အဆီးနည်းခြင်း၊ အထွက်နှုန်းကောင်းမွန်ခြင်းနှင့် ဆီထွက်နှုန်းကောင်းခြင်းတို့ကြောင့် ပြည်တွင်းစားသုံးဆီဖူလှုံရေးအတွက် အထောက်အကူပြုသောသီးနှံဖြစ်ပါသည်။ နေကြာ စိုက်ပျိုးသူများအနေဖြင့် ရာသီဥတု၊ ရေမြေသဘာဝနှင့် အထူးသင့်လျှော်ပြီး စိုက်ပျိုးရန် လွယ်ကူသည့် နေကြာသီးနှံကို တိုးချဲ့စိုက်ပျိုးခြင်းဖြင့် ပြည်တွင်းစားသုံးဆီဖူလှုံမှုကို အထောက်အကူပြုသည့်အပြင် ကျန်းမာရေးအတွက်လည်း ညီညွတ်သည့် စားသုံးဆီများရရှိနိုင်ရေးအတွက် နေကြာသီးနှံကို တိုးချဲ့စိုက်ပျိုးနိုင်ပါရန် တင်ပြအပ်ပါသည်။

DOCA(ပဲခူး)

           ပဲခူးတိုင်းဒေသကြီး၊ ပြည်ခရိုင်၊ ပြည်မြို့၊ မှော်ဇာကျေးရွာရှိ  ပျူမြို့ဟောင်း မှော်ဇာပြတိုက်တွင် ယခင်က ကမ္ဘာလှည့်ခရီးသွားများနှင့် ပြည်တွင်းခရီးသွားများဖြင့် စည်ကားလျှက်ရှိရာ  COVID-19 ရောဂါများဖြစ်ပွားချိန်တွင် ခရီးသွားဧည့်သည်များမရှိ၍ ယာယီပိတ်ထားလျှက်ရှိရာ ယခုအချိန်တွင် ရောဂါဖြစ်ပွားမှုများ လျော့ကျသွားသဖြင့် ခရီးသွားများလာရောက်လည်ပတ်သွားလာသဖြင့် ပျူမြို့ဟောင်း ပြတိုက်အား ၂၀၂၂ ခုနှစ် ဇန်နဝါရီလမှစ၍ ဖွင့်လှစ်လျှက်ရှိပါသည်။

          ပျူမြို့ဟောင်းပြတိုက်တွင် လေ့လာစရာများစုံလင်စွာရှိပြီး ပျူခေတ်လူတို့ အသုံးအဆောင်များ၊ မြေအိုး၊ မြေခွက်များ၊ ပျူမြို့ရိုးများဖြင့် ခင်းကျင်းပြသထားပြီး ပြည်တွင်းခရီးသွားများဖြင့် စည်ကားလျှက်ရှိပါသည်။ ပြတိုက်အား ဝင်ကြေးအနေဖြင့် ပြည်တွင်းခရီးသွားများအား အခမဲ့ ဝင်ရောက်လေ့လာကြည့်ရှုနိုင်ပြီး ၊ နိုင်ငံခြားခရီးသွားများအား တစ်ဦးလျှင် မြန်မာငွေ ၅၀၀၀ကျပ်ဖြင့် သတ်မှတ်ကောက်ခံပါသည်။ ပြတိုက်ဖွင့်လှစ်ချိန်မှာ နံနက် (၉:၀၀)နာရီမှ ညနေ(၄:၃၀) အထိဖြစ်ပြီး အပတ်စဉ် တနင်္လာနေ့နှင့် ပြန်တမ်းဝင်ရုံးပိတ်ရက်များမှအပ ကျန်ရက်များတွင် နေ့စဉ်သတ်မှတ်ချိန်အတွင်း ဖွင့်လှစ်ထားကြောင်း သိရှိရပါသည်။

DOCA(ပဲခူး)