HighLight News

   ပဲခူးတိုင်းဒေသကြီး၊ ညောင်းလေးပင်ခရိုင်၊ ညောင်းလေးပင်မြို့တွင် (၂၄-၇-၀၂၃) ရက်နေ့၊ နေ့လယ် (၁၃:၀၀) နာရီအချိန်၌ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူရေးရာ ဦးစီးဌာနတို့ပူးပေါင်း၍ ညောင်လေးပင်မြို့၊ အ-လ-က (ခွဲ) ဖအောင်ဝဲကျေးရွာကျောင်းသို့သွားရောက်၍ ဟောပြောပွဲကျင်းပပြုလုပ်ခဲ့ပါသည်။

     အ-လ-က (ခွဲ) ဖအောင်ဝဲကျောင်း၌ ဆရာ/ဆရာမ (၁၅) ဦး၊ ကျောင်းသား/ကျောင်းသူ (၁၅၀) ဦးတက်ရောက်ခဲ့ကြပြီး ပထမဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒေါ်နီနီဝင်း (ဦးစီးအရာရှိ) က တက်ရောက်လာသူများအား မိတ်ဆက်စကားပြောကြားကာ စာပေနှင့်ပတ်သက်သော အသိပညာဗဟုသုတတို့ကို အကျယ်တဝင့်ဟောပြောခဲ့ပါသည်။

    ထို့နောက် စားသုံးသူရေးရာဦးစီးဌာနမှ ဒေါ်ယဉ်ယဉ်ထွေး (ဒု-ဦးစီးမှူး) က မိတ်ဆက်စကားပြောကြားပြီးနောက် စားသုံးသူအခွင့်အရေးများ၊ တာဝန်များနှင့် စားသုံးသူများနစ်နာဆုံးရှုံးမှုရှိပါက တိုင်ကြားနိုင်သည့်အကြောင်းအရာများကို အကျယ်တဝင့်ရှင်းလင်းဟောကြားခဲ့ကြောင်း သိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် (၂၇-၇-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ ပြည်နယ်ဦးစီးမှူး (ကိုယ်စား)၊ ဦးစီးအရာရှိ ဦးမျိုးဝင်းနိုင်ကဦးဆောင်၍ ပြည်နယ်ရုံးရှိဌာနခွဲတာဝန်ခံများ၊ ဝန်ထမ်းများနှင့်အတူ ဝန်ထမ်းစွမ်းဆောင်ရည်မြင့်တင်ရေးအထောက်အကူပြု (Thursdays Talk) ဆွေးနွေးပွဲကျင်းပပြုလုပ်ခဲ့ကြောင်းသိရသည်။

      အခမ်းအနားတွင် ဦးစီးအရာရှိ ဦးမျိုးဝင်းနိုင်က စားသုံးသူရေးရာဦးစီးဌာန၏ ဌာနခွဲအလိုက် အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ်သတ်မှတ်သည့် အမိန့်နှင့်ပတ်သတ်၍လည်းကောင်း၊ ရှေ့ဆက်လုပ်ဆောင်မည့်လုပ်ငန်းစဉ်များနှင့်ပတ်သက်၍လည်းကောင်း၊ မီဒီယအသုံးပြု၍ သတင်းမှတ်တမ်း၊ Corporate Video File ပြုစုထိန်းသိမ်းရေးပြုစုနည်းဆောင်ရွက်ရန်ကိစ္စကိုလည်းကောင်း အကျယ်တဝင့်ရှင်းလင်းဆွေးနွေးခဲ့ပြီးနောက် ဦးစီးမှူး ဒေါ်ဇာခြည်အောင်က စားသုံးသူရေးရာဌာန၏နောက်ခံသမိုင်းကြောင်းများ၊ စားသုံးသူရေးရာ၏မျှော်မှန်းချက်များ၊ ရည်မှန်းချက်များအကြောင်းကိုလည်းကောင်း၊ စားသုံးသူရေးရာဦးစီးဌာနအနေဖြင့် ကရင်ပြည်နယ်အတွင်း ပြည်နယ်အဆင့်အသင်းအဖွဲ့များဖွဲ့စည်းထားရှိမှုအခြေအနေများကိုလည်းကောင်း၊ မူဝါဒလေ့လာရေးနှင့်စီမံကိန်းစာရင်းအင်းဌာနခွဲ၊ ပြည်တွင်းကုန်သွယ်ရေးဖွံ့ဖြိုးမှုနှင့်သုတေသနဌာနခွဲ၏ လုပ်ငန်းအဖြာဖြာဆွေးနွေးတင်ပြမှုတို့ကိုလည်းကောင်း  အကျယ်တဝင့်ရှင်းလင်းဆွေးနွေးခဲ့၍ အခမ်းအနားသို့  ဝန်ထမ်းစုစုပေါင်း (၁၃) ဦးတက်ရောက်ခဲ့ကြကြောင်းနှင့် အဆိုပါအခမ်းအနားကို နေ့လယ် (၁၅:၀၀) နာရီအချိန်တွင်ရုပ်သိမ်းခဲ့ကြောင်း သတင်းရရှိပါသည်။

DOCA(ကရင်)

    Coca-Cola Pinya Beverages Myanmar (CCPBM) ကုမ္ပဏီသည် မြန်မာနိုင်ငံတွင် ၂၀၁၃ခုနှစ်မှစတင်၍ အချိုရည်များကို ပြည်တွင်း၌စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြဋ္ဌာန်းချက်များနှင့်အညီ ထုတ်လုပ်ဖြန့်ဖြူးရောင်းချလျက်ရှိပါကြောင်း၊ ယခုအခါ ဈေးကွက်အတွင်း ယင်းကုမ္ပဏီမှထုတ်လုပ်သည့် အမှတ်တံဆိပ်အချိုရည်နှင့်ပုံစံတူ၍ ကုန်အညွှန်းအမှတ်အသားအား ထိုင်းဘာသာဖြင့်ဖော်ပြထားသည့်အပြင် မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာန (FDA) တွင် မှတ်ပုံတင်ထားခြင်းမရှိသော Sprite® အချိုရည်များရောင်းချနေသည့်အတွက် သက်ဆိုင်ရာဌာနများနှင့်ပူးပေါင်း၍ ဈေးကွက်စောင့်ကြည့်စစ်ဆေးရန်နှင့် ကုန်စည်အတုများကိုဈေးကွက်အတွင်းမှ ဖယ်ရှားရှင်းလင်းအရေးယူဆောင်ရွက်နိုင်ရေးအတွက် သက်ဆိုင်ရာ စားသုံးသူရေးရာကော်မတီဥက္ကဋ္ဌထံကြိုတင်တင်ပြ၍ ခွင့်ပြုချက်ရယူပြီးနောက် ၂၀၂၃ခုနှစ်၊ ဇူလိုင်လ (၂၄) ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့ပေါ်ရှိ ကုန်ပစ္စည်းမျိုးစုံရောင်းချနေသောကုန်စုံဆိုင်များသို့ မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာန ( FDA ) တွင် မှတ်ပုံတင်ထားခြင်းမရှိဘဲ ထိုင်းဘာသာဖြင့်ဖော်ပြထားသော Sprite® အချိုရည်များ ဈေးကွက်အတွင်းရောင်းချခြင်းရှိ/မရှိကို သက်ဆိုင်ရာစားသုံးရေးရာကော်မတီအဖွဲ့ဝင်များဖြင့် ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

    လွိုင်ကော်မြို့ပေါ်ရှိ ကုန်ပစ္စည်းမျိုးစုံရောင်းချနေသောကုန်စုံဆိုင်များတွင် Coca-Cola Pinya Beverages Myanmar (CCPBM) ကုမ္ပဏီ၏ ကုန်အမှတ်တံဆိပ်နှင့်ပုံစံတူ ထိုင်းဘာသာဖြင့်ဖော်ပြထားသော Sprite® အချိုရည်များရောင်းချနေခြင်းမရှိကြောင်းနှင့် မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်ပုံတင်ထားသော Sprite® အချိုရည်များသာရောင်းချလျက်ရှိကြောင်းတို့ကိုစစ်ဆေးတွေ့ရှိရပြီး ကုန်ပစ္စည်းမျိုးစုံရောင်းချနေသည့်အရောင်းဆိုင်များအနေဖြင့် ကုန်အညွှန်းအမှတ်အသားသတ်မှတ်ချက်များနှင့်ကိုက်ညီမှုမရှိသည့်ကုန်စည်များနှင့် တရားမဝင်တင်သွင်းလာသည့်ကုန်စည်များကိုရောင်းချဖြန့်ဖြူးခြင်းမပြုကြရန်လိုအပ်ကြောင်း၊ ဈေးကွက်အတွင်းရောင်းချဖြန့်ဖြူးခြင်းများစစ်ဆေးတွေ့ရှိရပါက စားသုံးသူကာကွယ်ရေးဥပဒေပုဒ်မ ၇၃အရ နှစ်နှစ်ထက်မပိုသောထောင်ဒဏ်ဖြစ်စေ၊ ကျပ်သိန်းနှစ်ရာထက်မပိုသောငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ပြစ်မှုပြစ်ဒဏ်များခံရမည်ဖြစ်ကြောင်း ကုန်ပစ္စည်းမျိုးစုံရောင်းချသည့်ကုန်စုံဆိုင် (၁၀) ဆိုင်တို့အား အသိပညာပေးစစ်ဆေးဆောင်ရွက်ခဲ့ကြကြောင်းသိရှိရပါသည်။

DOCA(ကယား)

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးမျိုးဝင်းနိုင်(ဦးစီးအရာရှိ)နှင့်ဝန်ထမ်းများသည် (၂၈-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် အမှတ် (၇) ရပ်ကွက်၊ အခြေခံပညာမူလတန်းကျောင်း (အ-မ-က) ရွှေကင်းကျောင်းရှိ ကျောင်းသား/ကျောင်းသူများကို စားသုံးသူကာကွယ်ရေးဆိုင်ရာ အသိပညာပေးဟောပြောပွဲကျင်းပပေးခဲ့ကြောင်းသိရှိရပါသည်။

   အဆိုပါဟောပြောပွဲတွင် သက်ဆိုင်ရာမိတ်ဖက်ဌာနများက သက်ဆိုင်သည့်ဌာနအလိုက် အကြောင်းအရာများကိုဟောပြောခဲ့ပြီးနောက် စားသုံးသူရေးရာဦးစီးဌာနမှ ဦးမျိုးဝင်းနိုင် (ဦးစီးအရာရှိ) က စားသုံးသူရေးရာဦးစီးဌာန၏မျှော်မှန်းချက်၊ ရည်မှန်းချက်များအကြောင်း၊ စားသုံးသူ၏အခွင့်အရေးအကြောင်း၊ ထုတ်ကုန်လုံခြုံစိတ်ချရမှုရှိသော အစားအသောက်နှင့်ကုန်စည်များကို စနစ်တကျရွေးချယ်ဝယ်ယူစားသောက်သုံးစွဲတတ်စေရန်အတွက် ကုန်အညွှန်အမှတ်အသားအကြောင်းအား လွယ်ကူစွာသိရှိနိုင်စေရန် ဥပမာ- မုန့်မျိုးစုံဖြင့် လက်တွေ့ရှင်းလင်းပြောကြားခဲ့ကာ ဆရာ/ဆရာမ၊ ကျောင်းသား/ကျောင်းသူများ၊ စုစုပေါင်း (၉၆) ဦးတက်ရောက်ခဲ့ကြကြောင်း သတင်းရရှိပါသည်။

DOCA(ကရင်)

   မွန်ပြည်နယ်၊ မော်လမြိုင်ခရိုင်ဦးစီးမှူးသည် (၂၅-၇-၂၀၂၃) ရက်နေ့တွင် မော်လမြိုင်ခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ ငွေကြေးဝန်ဆောင်မှုနှင့် Online Shopping ဝန်ဆောင်မှုလုပ်ငန်းနှင့်စပ်လျဉ်းသည့် စားသုံးသူကာကွယ်ရေးအသိပညာပေး (Talk Show) ဆောင်ရွက်ခဲ့ကြောင်းသိရှိရပါသည်။

     အဆိုပါဆွေးနွေးပွဲတွင် မော်လမြိုင်မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ခင်စန်းမြင့်က အွန်လိုင်းရောင်းဝယ်မှုဆိုင်ရာ စားသုံးသူအသိပညာပေးအကြောင်းနှင့်ပတ်သက်၍ သိလိုသည်များကိုမေးမြန်းခဲ့ရာတွင် မော်လမြိုင်ခရိုင်ဦးစီးမှူး၊ ဦးစီးအရာရှိ ဒေါ်ဝါဝါမြိုင်က စားသုံးသူရေးရာဦးစီးဌာနအနေဖြင့် စားသုံးသူအသိပညာပေးလုပ်ငန်းများကို ကျယ်ကျယ်ပြန့်ပြန့် ဆောင်ရွက်လျက်ရှိကြောင်း၊ စားသုံးသူအနေဖြင့် ကုန်စည် (သို့မဟုတ်) ဝန်ဆောင်မှုများကိုဝယ်ယူသုံးစွဲရာတွင် နစ်နာဆုံးရှုံးမှုမရှိစေရေးနှင့် နစ်နာဆုံးရှုံးမှုရှိလာပါက ရှင်းလင်းတင်ပြခွင့်၊ တိုင်ကြားခွင့်နှင့် ကုစားခွင့်နည်းလမ်းများရှိစေရေးတို့ကိုပြောကြားခဲ့ပြီးနောက် ယခုအခါတွင် စားသုံးသူများသည် ကုန်စည်နှင့်ဝန်ဆောင်မှုများကို Internet၊ website၊ Application (သို့မဟုတ်) Social Media များတွင် ဝယ်ယူသုံးစွဲနေသည်ကိုတွေ့ရှိရပြီး စားသုံးသူများဝယ်ယူသုံးစွဲရာတွင် ထိခိုက်နစ်နာမှုမရှိစေရေးအတွက် Online Shopping မှတ်ပုံတင်စနစ်ပြုလုပ်နိုင်ရန်အတွက် အကောင်အထည်ဖော်ဆောင်ရွက်လျက်ရှိကြောင်းနှင့် e-commerce guide line နှင့် e-commerce ဥပဒေ အမြန်ဆုံးထွက်ရှိနိုင်ရန် ဌာနကစီစဉ်ဆောင်ရွက်လျက်ရှိကြောင်းတို့ကိုဆွေးနွေးခဲ့ပြီးနောက်  Online Shopping နှင့်ပတ်သက်၍ ဝယ်ယူခြင်းမပြုမီ သတိပြုရမည့်အချက် (၇) ချက်နှင့် စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများကိုဝယ်ယူသုံးစွဲခြင်းကြောင့် ထိခိုက်နစ်နာမှုဖြစ်ပေါ်လာပါက တိုင်ကြားနိုင်သည့်နည်းလမ်း (၅) ခုတို့ကိုရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(မွန်)