HighLight News

            စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်း စားသုံးသူပြည်သူတို့အနေဖြင့် စားသုံးသူကာကွယ်ရေးနှင့်စပ်လျဉ်း၍ အသိပညာရှိမှု၊ စွမ်းဆောင်ရည် မည်မျှရှိသည်ကို သိရှိနိုင်စေရေးအတွက် စားသုံးသူစွမ်းဆောင်နိုင်မှု အညွှန်းကိန်း စစ်တမ်းများအား ကောက်ယူခြင်း ဆောင်ရွက်လျက်ရှိပါသည်။

          ယင်းသို့ စားသုံးသူအညွှန်းကိန်းစစ်တမ်းများကောက်ယူရာတွင် ပြည်ခရိုင်အတွင်းရှိ မြို့နယ် (၆)မြို့နယ်မှ မြို့နယ်တာဝန်ခံများအနေဖြင့် မိမိတာဝန်ကျရာမြို့နယ်များအတွင်း စားသုံးသူပြည်သူများအနေဖြင့် စားသုံးသူအသိပညာပေးမှုလုပ်ငန်းများ၊ စားသုံးသူထိခိုက်နစ်နာမှုနှင့် စပ်လျဉ်း၍ ကုစားမှုအစီအစဉ်များ၊ ကုန်အညွှန်းအမှတ်အသားရေးသားဖေါ်ပြမှုများနှင့် စပ်လျဉ်းသည့် စားသုံးသူများသိရှိရမည့် သတင်းအချက်အလက်များ၊ စားသုံးသူကာကွယ်ရေး ဉပဒေပါ စားသုံးသူအခွင့်အရေးများနှင့် ပြဌာန်းချက်များအပေါ် သိရှိနိုင်မှုအခြေအနေစသည့်အချက်များ ပါဝင်သော  စားသုံးသူစစ်တမ်းမေးခွန်းလွှာများအား မေလ ပထမပတ်မှ စတင်၍ ပြည်သူများသို့ တိုက်ရိုက်မေးမြန်းခြင်းနှင့် Onlineမှ မေးမြန်းခြင်းဖြင့် စားသုံးသူစွမ်းဆောင်နိုင်မှု အညွှန်းကိန်း စစ်တမ်းများ ကောက်ယူဆောင်ရွက်လျှက်ရှိကြောင်း သိရှိရပါသည်။

(DOCA)ပဲခူး

             ပဲခူးတိုင်းဒေသကြီးအတွင်း ကုန်စည် (သို့မဟုတ်) ဝန်ဆောင်မှုနှင့် ပတ်သက်ပြီး စားသုံးသူတွေရဲ့ အခွင့်အရေးနှင့် အကျိုးစီးပွားကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင်တို့အကြား အငြင်းပွားမှုများကို ညှိနှိုင်းဆောင်ရွက်ပေးနိုင်ရန်အတွက် စားသုံးသူရေးရာကော်မတီ (၂/၂၀၂၂) အစည်းအဝေးကို စားသုံးသူရေးရာဦးစီးဌာန၊ပဲခူးတိုင်းဒေသကြီး ဦးစီးမှူးရုံးတွင် (၁၇.၅.၂၀၂၂) ရက်နေ့၊ နေ့လည် (၁၄:၀၀) နာရီတွင် ပြုလုပ်ခဲ့ရာ ပဲခူးတိုင်းဒေသကြီး အစိုးရအဖွဲ့၊ စီးပွား‌ရေးရာဝန်ကြီး၊ စားသုံးသူရေးရာကော်မတီဉက္ကဋ္ဌ၊ အတွင်းရေးမှူး၊ အဖွဲ့ဝင် (၄)ဦး၊ တိုင်းဒေသကြီးဦးစီးမှူးရုံးမှ ဝန်ထမ်း (၆) ဦးတက်ရောက်ခဲ့ကြောင်း သိရှိရပါ သည်။

            အဆိုပါ လုပ်ငန်းညှိနှိုင်းအစည်းအဝေးတွင် တိုင်းဒေသကြီးစားသုံးသူရေးရာကော်မတီ ဉက္ကဋ္ဌ ဦးတင်ဦးမှ တိုင်းဒေသကြီးစားသုံးသူရေးရာကော်မတီ အစည်းအဝေး( ၁/၂၀၂၂) ကို ၂၀၂၂ ခုနှစ်၊ ဧပြီလတွင် ကျင်းပပြုလုပ်ခဲ့ကြောင်း၊ ထိုအစည်းအဝေးဆုံးဖြတ်ချက်များအရ တိုင်းဒေသကြီး စားသုံးသူရေးရာကော်မတီ ကို (၁) လတစ်ကြိမ် ကျင်းပသွားမည်ဖြစ်သည့်အတွက် အဖွဲ့ဝင်များအနေဖြင့် ပူးပေါင်းဆောင်ရွက်စေလိုကြောင်း၊ ၂၀၂၂ ခုနှစ် မေလအတွင်း ကောက်ယူလျက်ရှိသော စားသုံးသူစွမ်းဆောင်နိုင်မှု အညွှန်းကိန်း စစ်တမ်းကိုလည်း ကော်မတီအဖွဲ့ဝင်များ ၊ အစိုးရဌာနများ၊ အသင်းအဖွဲ့ များက အားလုံးပါဝင်နိုင်ရေး ဝိုင်းဝန်းဆောင်ရွက်စေလိုကြောင်း၊ ဟင်းသီးဟင်းရွက်ဆီနှင့် ပတ်သက်၍ ညွှန်ကြားချက်ထုတ်ပြန်ထားပြီးဖြစ်ရာ  အဆိုပါ အမိန့်နှင့်ပတ်သက်ပြီး စားသုံးဆီလုပ်ငန်းရှင်များအား အသိပညာပေးခြင်း လုပ်ငန်းများ၊ ဈေးကွက်စောင့်ကြည့် စစ်ဆေးခြင်းလုပ်ငန်းများလည်း ဆောင်ရွက်လျက်ရှိကြောင်း၊ စားအုန်းဆီများ ဖြန့်ဖြူးသယ်ဆောင်ရာတွင် လိုက်နာရမည့် လုပ်ငန်းစဉ်အား (၁.၅.၂၀၂၂) ရက်နေ့မှစပြီး လိုက်နာဆောင်ရွက်ရမည်ဖြစ်ကြောင်းနှင့် ကော်မတီအဖွဲ့ဝင်များအနေဖြင့် စားသုံးသူကာကွယ်ပေးရေးလုပ်ငန်းများ ဆောင်ရွက်ရာတွင် ကြုံတွေ့ရသည့်အခက်အခဲ၊ စိန်ခေါ်မှု၊ အားသာချက်၊ အားနည်းချက်ပေါ်မူတည်ပြီး ဆက်လက်ဆောင်ရွက်မည့် အစီအမံများနဲ့ ပတ်သက်ပြီး အကြုံပြုဆွေးနွေးရန် လမ်းညွှန်မှာကြားခဲ့ပါသည်။

              ဆက်လက်၍ ပဲခူးတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး စားသုံးသူရေးရာကော်မတီ အတွင်းရေးမှူးမှ လက်ရှိဆောင်ရွက်နေသည့် အသိပညာပေးလုပ်ငန်းများ ၊ ဈေးကွက်စောင့်ကြည့်ခြင်းလုပ်ငန်းများ၊ တိုင်ကြားမှုများနှင့်ပတ်သက်၍ ဖြေရှင်းဆောင်ရွက်မှုများ နှင့် ပတ်သက်ပြီး အမှာစာများ ရှင်းလင်းတင်ပြ၍ တက်ရောက်လာသော ကော်မတီအဖွဲ့ဝင်များက အတည်ပြုကြပြီး အစည်းအဝေးကို (၁၅:၄၅) တွင် ရုတ်သိမ်းခဲ့ကြောင်း သိရှိပါသည်။

DOCA(ပဲခူး)

             ရခိုင်ပြည်နယ်၊ စားသုံးသူရေးရာဦးစီးဌာန၊ စစ်တွေခရိုင်ဦးစီးမှူး ဦးမောင်လှဝင်းသည် ပူးပေါင်းမိတ်ဖက်ဌာနဖြစ်သည့် ပြည်နယ်FDA၊ မြို့နယ်ကျန်းမာရေး၊ မွေး/ ကု၊ ထွေ/အုပ်၊ စည်ပင်၊ မြန်မာနိုင်ငံရဲတပ်ဖွဲ့တာဝန်ရှိပုဂ္ဂိုလ်များနှင့်ပူးပေါင်း၍ (၁၉-၅-၂၀၂၂)ရက်နေ့ နံနက် (၁၀:၃၀)အချိန်တွင် စစ်တွေမြို့ပေါရှိ ဆေးဝါးရောင်းချသောဆိုင်များသို့ သွားရောက်၍ ဈေးကွက်အတွင်းရှိ သုံးစွဲရန်မသင့်သည့်ဆေးဝါးပစ္စည်းများရောင်းချခြင်းရှိမရှိ ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

              ရခိုင်ပြည်နယ်အစားအသောက်နှင့်ဆေးဝါးကွပ်ကဲရေးဦးစီးဌာနသည် ဆေးဝါးနှင့်ဆေးပစ္စည်းများအား လစဉ်ဈေးကွက်နမူနာများကောက်ယူပြီး နေပြည်တော်သို့ပေးပို့၍ ဓါတ်ခွဲစစ်ဆေးမှုများပြုလုပ်လျက်ရှိရာ ECOCANN I.V Cannula (Batch No. A1703033) နှင့် I.v.Flon ဆေးသွင်းအပ်(၂)မျိုး သည် Failed in Sterility Test ဖြစ်ကြောင်း ထုတ်ပြန်ချက်အရ ၎င်းဆေးဝါးပစ္စည်းများ ဈေးကွက်အတွင်း ရောင်းချမှု ရှိ/မရှိ သွားရောက်စစ်‌ဆေးရခြင်းဖြစ်ပါသည်။

             စစ်တွေမြို့ မောလိပ်ရပ်ကွက်ရှိ ဝင်းဆေးမျိုးစုံအရောင်းဆိုင်၊ လင်းလင်းဆေးဆိုင်နှင့်ကျေးပင်ကြီးရပ်ကွက်ရှိ Medi Health Co.Ltd ကုမ္ပဏီခွဲ ဆေးဝါးသိုလှောင်ဖြန့်ချီရောင်းချသည့်ဆိုင်များသို့ သွားရောက်စစ်ဆေးရာ ဈေးကွက်အတွင်းတွေ့ရှိသော ECOCANN I.V Cannula  သက်တမ်းလွန်ဆေးသွင်းအပ် (၇၅)ချောင်းအားအဖွဲ့ဖြင့် သိမ်းဆည်းခြင်းဆောင်ရွက်ခဲ့ပြီး စားသုံးသူကာကွယ်ရေး ဘေးအန္တရာယ်ကင်းရှင်းစေရေး ဆေးဝါး/ဆေးပစ္စည်းများအား Good Storage Practice (GSP) နှင့်အညီ ထားသိုရောင်းချရန်နှင့်စံမညီဆေးဝါး/ဆေးပစ္စည်းများ ကျန်းမာရေးဝန်ကြီးဌာနမှ သုံးစွဲရန်မသင့်ဟု အမိန့်ကြော်ငြာစာထုတ်ပြန်ထားသည့် အန္တရာယ်ရှိဆေးဝါးနှင့်ဆေးပစ္စည်းများကို ဝယ်ယူသိုလှောင်ဖြန့်ဖြူးရောင်းချခြင်းမပြုလုပ်ရေး ဝန်ခံကတိလက်မှတ်ရေးထိုးစေခြင်းနှင့် ဆေးဝါးများတင်သွင်းသယ်ယူကြရာတွင် ကုန်တင်ကားများ၌ စားသောက်ကုန်များနှင့်ဆေးဝါးများ ရောနှောသယ်ယူခြင်းကြောင့် ပိုးမွှားများကူးစက်စေခြင်း၊ ဆေးဝါးများအရည်အသွေးကျဆင်းစေခြင်းကြောင့် ၎င်းဆေးဝါး/ဆေးပစ္စည်းများအား ဆေးဝါးရောင်းချသူများ၊ ဆေးဆိုင်များ၊ ဆေးဝါးကုမ္ပဏီခွဲများအနေဖြင့် အစုအဖွဲ့၊ အသင်းအဖွဲ့ဖွဲ့စည်း၍ ပူးပေါင်းကာ ဆေးဝါးသယ်ယူကြရာ၌ ဆေးဝါးသီးသန့်တင်ပို့ကားများဖြင့် သယ်ယူတင်ပို့ဆောင်ရွက်သင့်ကြောင်း ပူးပေါင်းမိတ်ဖက်ဌာနဆိုင်ရာ တာဝန်ရှိသူများက အသိပညာပေးဆောင်ရွက်ခဲ့ပါကြောင်း သတင်းရရှိပါသည်။

(DOCA)ရခိုင်                     

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ ဖျာပုံမြို့နယ်ဦးစီးမှူးရုံးမှ စစ်ဆေးရေးမှူးဦးမင်းဇော် ဦးဆောင်၍ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ မီးသတ်တပ်ဖွဲ့မှ ဝန်ထမ်းတို့နှင့်အတူ မေလ(၁၉)ရက်နေ့ နံနက်(၀၈:၀၀)နာရီတွင် Bella  Plus  Plaster များအား ဖျာပုံမြို့နယ်ရှိ ဈေးကွက်များအတွင်းရောင်းချခြင်း ရှိ/မရှိ ကွင်းဆင်းစစ်ဆေးခဲ့ကြောင်း သိရသည်။

          အဆိုပါ Bella  Plus  Plaster များတွင် ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့်ကုမ္ပဏီ၊ ဆေးဝါးမှတ်ပုံတင်အမှတ်နှင့် Import  Registration No(IR)များဖော်ပြခြင်းမရှိဘဲ ဈေးကွက်အတွင်းရောင်းချလျက်ရှိသောကြောင့် တရားဝင်အခွန်အခများ ပေးသွင်း၍ ရောင်းချနေသူ အနေဖြင့် အကျိုးစီးပွား ထိခိုက်နစ်နာမှုမရှိစေရေးအတွက် ဆောင်ရွက်ရခြင်းဖြစ်ပြီး ဈေးကွက် အတွင်း ရောင်းချမှုရှိ/မရှိ အားစစ်ဆေးခဲ့ရာ ၎င်း Bella  Plus  Plaster များရောင်းချခြင်းမရှိသဖြင့် ဆိုင်ရှင်များအား  အလားတူ  အခြားတရားမဝင် ကုန်စည်များကိုလည်း ရောင်းချခြင်းမပြုရန်၊ တရားဝင် အခွန်အခပေးသွင်း၍ ရောင်းချနေသူများ ဆုံးရှုံးထိခိုက်နစ်နာမှု မရှိစေရန် ဝိုင်းပူးပေါင်းကူညီဆောင်ရွက်ပေးရန်၊ တရားမဝင်ကုန်စည်များ ရောင်းချပါက ဥပဒေနှင့်အညီအရေးယူဆောင်ရွက်သွားမည်ဖြစ်ကြောင်း အသိပညာပေးဆောင်ရွက်ခဲ့ပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊ ဖျာပုံခရိုင်၊ ကျိုက်လတ်မြို့နယ်ရှိ မြို့နယ်တာဝန်ခံဦးတင်စိန်သည် (၂၀.၅.၂၀၂၂) ရက်နေ့ ညနေ(၁၅:၀၀)နာရီအချိန်တွင် ကျိုက်လတ်မြို့နယ် ၊စားသုံးသူရေးရာဦးစီးဌာနရုံးတွင် ဆီလုပ်ငန်းရှင်များအား စားသုံးသူကာကွယ်ရေးဆိုင်ရာအသိပညာပေးဟောပြောခဲ့ပါသည်။

          အဆိုပါ အခမ်းအနားတွင် မြို့နယ်တာဝန်ခံက စီးပွားရေးလုပ်ငန်းရှင်များ လိုက်နာဆောင်ရွက်ရန် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ညွှန်ကြားချက်အမှတ်(၁/၂၀၂၁)ဖြင့်၂၀၂၁ခုနှစ်၊ ဒီဇင်ဘာလ(၂၂)ရက်နေ့ ထုတ်ပြန်ခဲ့ကြောင်း၊ အဆိုပါဖော်ပြချက်တွင် စားသုံးသူများ ထင်ယောင်ထင်မှားမဖြစ်စေရေးနှင့် အခြေခံလိုအပ်ချက်အပေါ် စိတ်ကျေနပ်မှုရှိစေရေးအတွက် သက်ဆိုင်ရာစီးပွားရေးလုပ်ငန်းရှင်များအနေဖြင့် ဈေးကွက်အတွင်းဖြန့်ဖြူးရောင်းချသည့် ဟင်းသီးဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် မြေပဲဆီ၊ နှမ်းဆီ ၊နေကြာဆီ၊ စားအုန်းဆီ၊ အဆင့်မြင့်စားအုန်းဆီစသည့်ဖြင့် အမျိုးအမည်ကို တိကျစွာ မြန်မာဘာသာဖြင့်ဖော်ပြရမည်ဖြစ်ကြောင်း၊ ကုန်စည်၏အသားတင်ပမာဏနှင့် အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ ကျပ်သားတို့ကို မြန်မာဘာဖြင့် ဖော်ပြရမည့်ဖြစ်ကြောင်းနှင့် လုပ်ငန်းရှင်များအနေဖြင့် စားဆီများဖြန့်ဖြူးသယ်ဆောင်ရာတွင် စားသုံးသူပြည်သူများ ဘေးဥပဒ်အန္တရာယ်ကင်းရှင်းစေရန်အတွက် မေလ(၁)ရက်နေ့မှစတင်ပြီး ဆီကန်မှထုတ်ယူသော စားဆီများအား Food Grade အဆင့်ရှိ အဝါရောင်ပေပါအသစ် (သို့မဟုတ်) သန့်စင်ပြီးပေပါအဟောင်း၊ စားသုံးဆီသီး သန့်သယ်ဆောင်သော ဘောက်ဆာယာဉ်များနှင့် ကိုက်ညီမှုမရှိသည့်ပေပါများ၊ဘောက်ဆာယာဉ်များ အတွင်းသို့ဆီဖြည့်သွင်းပေးမည်မဟုတ်ကြောင်း၊ဈေးကွက်အတွင်းဖြန့်ဖြူးရာ၌ ဓါတုဗေဒပစ္စည်းများ ထည့်သွင်းအသုံးပြုထားသည့် ပုံးများ ၊ပေပါများတွင် စားအုန်းဆီများ ထည့်သွင်းသုံးစွဲခြင်း မပြုဖို့လိုအပ်ကြောင်း၊ ဌာနအနေ့ဖြင့် ပြည်ပမှတင်သွင်းလာသည့်စားသုံးဆီများ အရည်အသွေးပြည့်မီရေး၊ပြည်သူများ ကျန်းမာရေးနှင့်ညီညွတ်ပြီး ဘေးအန္တရာယ်ကင်းရှင်းသည့်စားသုံးဆီများကို သုံးစွဲနိုင်ရေး၊ ဈေးကွက်အတွင်းဖြစ်သင့်ဖြစ်ထိုက်သည့်ဈေးနှုန်းဖြင့် ဝယ်ယူသုံးစွဲနိုင်ရေးအတွက် ပြည်ပမှစားသုံးဆီများတင် သွင်းခြင်း၊ သိုလှောင်ခြင်း၊ ဖြန့်ဖြူးခြင်းလုပ်ငန်းများကို ထိန်းကျောင်းကြပ်မတ်ဆောင်ရွက်လျက်ရှိပါကြောင်း လုပ်ငန်းရှင်များအနေဖြင့် ညွှန်ကြားချက်များကိုလိုက်နာဆောင်ရွက်ကြရန်နှင့် ဆောင်ရွက်ထားရှိမှုအခြေအနေများကိုလည်း ဌာနကကွင်းဆင်းစစ်ဆေးကြပ်မတ်ဆောင်ရွက်သွားမည်ဖြစ်ကြောင်း အသိပေးပြောကြားခဲ့ပါသည်။

          ထိုနောက် မြို့နယ်တာဝန်ခံက စားသုံးသူကာကွယ်ရေး အသိပညာပေးဟောပြောပွဲသို့ တက်ရောက်လာသော ဆီလုပ်ငန်းရှင်များမှ သိလိုသည်များမေးမြန်းမှုအပေါ် ပြန်လည်ရှင်းလင်းပြောကြားခဲကြောင်း သတင်းရရှိပါသည်။

DOCA(ဧရာဝတီ)