HighLight News

ပြည်ခရိုင်အထွေထွေအုပ်ချုပ်ရေးဉီးစီးဌာန၏ လမ်းညွှန်မှုဖြင့် ဝါ၊ စိမ်း၊ နီ၊ ပြာ အမှိုက်ပုံးများ ထားရှိရေး သန့်ရှင်းသောရေများ ရရှိရေးညှိနှိုင်း အစည်းအဝေးကို ပဲခူးတိုင်းဒေသကြီး၊ ပြည်ခရိုင်၊ စားသုံးသူရေးရာဦးစီးဌာနတွင် ဝန်ထမ်းများဖြင့် ကျင်းပပြုလုပ်ခဲ့ပါသည်။ အစည်းအဝေးတွင် စားသုံးသူရေးရာဦးစီးဌာန၊ ပြည်ခရိုင်ဦးစီးမှူးက ရေနှင့်ပတ်ဝန်းကျင် သန့်ရှင်းမှုဆိုင်ရာ လုပ်ငန်းအစီအမံများ၊ သန့်ရှင်းသော ရေရရှိရေး ရေအရင်းအမြစ်များနှင့် စားသုံးသူပြည်သူများ ကျန်းမာစေရေး၊ ရုံးရှိ ဝန်ထမ်းများ အမှိုက်များကို စနစ်တကျစွန့်ပစ်ရေး၊ အမှိုက်ပုံးများကို ဝါ၊ စိမ်း၊ နီ၊ ပြာစနစ်တကျထားရှိရေး၊ အမှိုက်ပုံးအဝါဆိုလျှင် အမှိုက်ခြောက် ထည့်ရန်၊ အမှိုက်ပုံး အစိမ်းဆိုလျှင် အမှိုက်စိုထည့်ရန်၊ အမှိုက်ပုံး အပြာဆိုလျှင် ပလပ်စတစ် အမှိုက်ထည့်ရန်နှင့် အမှိုက်ပုံး အနီဆိုလျှင် ဘေးအန္တရာယ်ရှိ အမှိုက်ထည့်ရန်၊ ဝန်ထမ်းများက ပူးပေါင်း ဆောင်ရွက်ရမည်ဖြစ်ကြောင်း ပြောကြားခဲ့ပါသည်။ DOCA(ပဲခူး)

ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ဝန်ထမ်းများသည် ၂၀၂၅ခုနှစ် ၊ ဇွန်လ (၂၇) ရက်နေ့၊ နံနက် (၁၀:၀၀)နာရီ အချိန်တွင် နမ့်စန်မြို့နယ်၊ နမ့်မော်ခေါက်ဆင့် ကျေးရွာ၌ စားသုံးသူကာကွယ်ရေးဆိုင်ရာ အသိပညာပေးဟောပြောပွဲနှင့် ကုန်အညွှန်းအမှတ်အသား ဖော်ပြခြင်းဆိုင်ရာ အသိပညာပေးဟောပြောပွဲကို ကျင်းပခဲ့ပါသည်။ ထိုဟောပြောပွဲသို့ ရပ်ကွက်သူ ရပ်ကွက်သားများ (၂၀)ဦး တက်ရောက်ခဲ့ပါသည်။ အဆိုပါဟောပြောပွဲတွင် စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ဦးသန်းတိုး (ဦးစီးအရာရှိ)သည် စားသုံးသူကာကွယ်ရေးနှင့် ပတ်သက်၍ အသိပညာပေးဟောပြောခဲ့ပါသည်။ စားသုံးသူကာကွယ်ရေးနှင့်ပတ်သက်၍ စားသုံးသူကာကွယ်ရေးဥပဒေပြဌာန်းချက်ပါ စားသုံးသူအခွင့်အရေးနှင့် တာဝန်များ၊ ကုန်စည်တစ်ခုကိုဝယ်ယူမည်ဆိုပါက စစ်ဆေးကြည့်ရှုရမည့်အချက်များ၊ ဘေးအန္တရာယ်ဖြစ်စေနိုင်သည့် အစားအစာများနှင့် စားသုံးရန်သင့်/ မသင့် သိရှိသင့်သည့် ကုန်အညွှန်းအမှတ်အသားပါ အချက်အလက်များကို ရှင်းလင်းပြောကြားခဲ့ကြောင်း သိရှိရပါသည်။ DOCA(ရှမ်း)