သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးအနေဖြင့် ဝန်ထမ်းများလူ့စွမ်းအားားအရင်းအမြစ်ဖွံ့ဖြိုးတိုးတက်လာစေရန်နှင့် ရုံးလုပ်ငန်းများကျွမ်းကျင်မှုရှိပြီး ဌာန၏လုပ်ငန်းများဆောင်ရွက်ရာတွင် အထောက်အကူဖြစ်စေရန်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်း အမှတ်စဉ်(၄/၂၀၂၂)ကို ပြည်နယ်ဦးစီးမှူးရုံးအစည်းအဝေးခန်းမ၌ ၂၀၂၂ ခုနှစ်၊ ဒီဇင်ဘာလ(၁၉)ရက်နေ့မှ(၂၁)ရက်နေ့အထိ နေ့စဉ် နံနက် (၁၀:၃၀)နာရီမှ နေ့လယ် (၁၂:၀၀) နာရီအထိလည်းကောင်း၊ နေ့လယ် (၁၄:၀၀) မှ ညနေ(၁၆:၀၀) နာရီအထိ (၃)ရက်တာ သင်တန်းဖွင့်လှစ်ဆောင်ရွက်ခဲ့ပြီး သင်တန်းသားဦးရေစုစုပေါင်း (၁၃)ဦး တက်ရောက်ခဲ့ပါသည်။

     အဆိုပါ သင်တန်းတွင် စားသုံးသူရေးရာဦးစီးဌာန၊ ကယားပြည်နယ်ဦးစီးမှူး ဦးမြင့်အောင်က အဖွင့်အမှာစကားပြောကြားရာတွင် ဝန်ထမ်းများအား မိမိတို့ဌာနမှဆောင်ရွက်နေသော စားသုံးသူကာကွယ်ပေးရေးလုပ်ငန်းစဉ်များ၊ ပြည်တွင်းကုန်သွယ်မှုဖွံ့ဖြိုးရေးလုပ်ငန်းစဉ်များ အကောင်အထည်ဖော်ဆောင်ရွက်ရာတွင်လည်းကောင်း၊ ဝန်ထမ်းများ အရည်အသွေးတိုးတက်စေပြီး လုပ်ငန်းများကျွမ်းကျင်မှုရှိစေရန်နှင့် ဌာန၏လုပ်ငန်းများ အောင်မြင်အောင်ဆောင်ရွက်နိုင်စေရန်အတွက် ဝန်ထမ်းစွမ်းဆောင်ရည်မြှင့်တင်ရေးသင်တန်းများကို သုံးလလျှင်(၁)ကြိမ် ဆောင်ရွက်သွားမည်ဖြစ်ကြောင်း၊ ဝန်ထမ်းစည်းမျဉ်း/စည်းကမ်းများနှင့်အညီနေထိုင်ကြရန်နှင့် ဝန်ထမ်းကောင်းများဖြစ်အောင် ကြိုးစားသင်ယူစေလိုကြောင်း ပြောကြားခဲ့ပါသည်။

     သင်တန်းတွင် ကယားပြည်နယ်ဦးစီးမှူးရုံးရှိ ပြည်နယ်ဦးစီးမှူး ဦးမြင့်အောင်က အဂတိလိုက်စားမှုတားဆီးကာကွယ်ရေးဘာသာရပ်၊ ဦးမိုးညွန့်ဦး (ဦးစီးအရာရှိ)မှ စီမံရေးရာဌာနခွဲဘာသာရပ်၊ ရုံးလုပ်ငန်းလက်စွဲပါအခန်းများ၊ သတင်းအချက်အလက်နည်းပညာနှင့်အရည်အသွေးစီမံခန့်ခွဲရေးဘာသာရပ်၊ နိုင်ငံ့ဝန်ထမ်းဥပဒေ၊ စာကြည့်တိုက်ဆိုင်ရာရေရှည်ဖွံ့ဖြိုးတိုးတက်ရေးဘာသာရပ်၊ ဒေါ်သစ္စာဖူး (ဦးစီးမှူး)မှ ငွေစာရင်းဌာနခွဲဘာသာရပ်၊ ပြည်တွင်းကုန်သွယ်ရေးဖွံ့ ဖြိုးမှုနှင့်သုတေသနဌာနခွဲဘာသာရပ်၊ မူဝါဒလေ့လာရေးနှင့်စီမံကိန်းစာရင်းအင်းဘာသာရပ်များ အသီးသီးပို့ချခဲ့ပြီး၊ အဆိုပါသင်တန်းမှ ဝန်ထမ်းများအနေဖြင့် ဌာနခွဲအလိုက် ပို့ချပြီးသောသင်ခန်းစာများမှ သိရှိလိုသည်များကို အပြန်အလှန်ဆွေးနွေးခြင်း၊ ဌာန၏လုပ်ငန်းများဆောင်ရွက်ရာတွင် အထောက်အကူပြုသည့် သင်ခန်းစာများရရှိကြောင်း၊ ဝန်ထမ်းစွမ်းဆောင်ရည်မြှင့်တင်ရေးသင်တန်းဆင်းပွဲအခမ်းအနားကို ဒီဇင်ဘာလ (၂၁)ရက်နေ့ နေ့လယ် (၁၄:၃၀) နာရီအချိန်တွင် အောင်မြင်စွာပြုလုပ်ဆောင်ရွက်နိုင်ခဲ့ကြောင်း သိရပါသည်။

DOCA(ကယား)

        ဧရာဝတီတိုင်းဒေသကြီး၊ ဖျာပုံခရိုင်၊ဒေးဒရဲမြို့နယ်၊စားသုံးသူရေးရာဦးစီးဌာန မြို့နယ်တာဝန်ခံသည် ၂၀၂၂ခုနှစ်ဒီဇင်ဘာလ(၂၁)ရက်နေ့၊နံက်(၁၀:၀၀)နာရီအချိန်တွင် ဆရာ/ဆရာမများနှင့် ကျောင်းသား/ကျောင်းသူများကို စားသုံးသူကာကွယ်ရေးအသိပညာပေးဟောပြောပွဲကို ဆောင်ရွက်ခဲ့ပါသည်။

          ဟောပြောပွဲတွင် ဒေးဒရဲမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်က စားသုံးသူကာကွယ်ရေးဥပဒေပါ စားသုံးသူတို့၏ အခွင့်အရေးနှင့်တာဝန်များ၊ တားမြစ်ကုန်စည်များနှင့် ကုန်အညွှန်းအမှတ်အသားဖော်ပြခြင်းဆိုင်ရာများ၊ စားသုံးသူများ နစ်နာဆုံးရှုံးမှုရှိလာပါက တိုင်ကြားနိုင်မှုအခြေအနေများ ရွေးချယ်စားသုံးသင့်သည့် အစားအစာများအကြောင်းတို့ကို အသိပညာပေးဟောပြောခဲ့ပြီး ကျောင်းအုပ်ဆရာမကြီးအား စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးအပ်ခဲ့ကြောင်း သိရှိရပါသည်။

DOCA (ဧရာဝတီ)

        ဧရာဝတီတိုင်းဒေသကြီး ၊ဖျာပုံခရိုင်၊ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံသည် ဒေးဒရဲမြို့ရပ်ကွက်အတွင်းရှိ မုန့်မျိုးစုံရောင်းချသူလုပ်ငန်းရှင်များအား (၂၂.၁၂.၂၀၂၂)ရက် နေ့၊ နေ့လယ် (၁၂:၀၀)နာရီအချိန်တွင် မြို့နယ်တာဝန်ခံရုံးတွင် စားသုံးသူကာကွယ်ရေးအသိပညာ ပေးဟောပြောပွဲကို ကျင်းပပြုလုပ်ခဲ့ပါသည်။

          အဆိုပါစားသုံးသူကာကွယ်ရေးအသိပညာပေးပြောပွဲတွင် မြို့နယ်တာဝန်ခံဦးသိန်းမောင်က စားသုံးသူကာကွယ်ရေးဥပဒေပါ လုပ်ငန်းရှင်များ၏တာဝန်များ၊ သတ်မှတ်ထားသောကုန်အညွှန်းအ မှတ်အသားများပြည့်စုံစွာဖော်ပြထားသည့် ကုန်စည်များကိုသာရောင်းချကြရန်၊ သက်ဆိုင်ရာဌာန များမှစားသုံးရန်မသင့်၍ ရောင်းချမှုမပြုကြရန်တားမြစ်ထားသောကုန်စည်များရောင်းချခြင်းမပြရန်၊ စားသုံးသူကာကွယ်ရေးဥပ‌ဒေပါ ပြဌာန်းချက်များကို လိုက်နာမှုမရှိပါက အ‌ရေးယူဆောင်ရွက်သွားမည်ဖြစ်ကြောင်း အသိပညာပေးပြောကြားခဲ့ပါသည်။

DOCA (ဧရာဝတီ)

            ဧရာဝတီတိုင်းဒေသကြီး၊       စားသုံးသူရေးရာဦးစီးဌာန၊ အိမ်မဲမြို့နယ်တာဝန်ခံ ဦးလေးလွင်သည် (၂၀.၁၂.၂၀၂၂)ရက်နေ့နံနက်(၁၁:၀၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနတို့နှင့်ပူးပေါင်းကာ စားသုံးသူပြည်သူများအား အိမ်မဲမြို့နယ်၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမတွင် စားသုံးသူအသိပညာပေး  Talk  Show  ပြုလုပ်ခဲ့ပါသည်။

          ထိုသို့ပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးမှ  စားသုံးသူအသိပညာပေး Talk Show ပြုလုပ်ရခြင်း၏ ရည်ရွယ်ချက်အား ရှင်းလင်းပြောကြားပြီး၊ စားသုံးသူရေးရာဦးစီးဌာန မြို့နယ်တာဝန်ခံမှ ဌာန၏မျှော်မှန်းချက်၊ ရည်မှန်းချက်များအား ရှင်းလင်းပြောကြားခဲ့ပြီး၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူ၏အခွင့်အရေးနှင့် တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များနှင့် ပြစ်မှုပြစ်ဒဏ်များ၊ တားမြစ်ချက်များ စားသုံးသူကာကွယ်ရေး ဥပဒေအခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ-၄၁ ပုဒ်မခွဲ(ခ) နှင့်(ဆ)တို့ပါ ကုန်အညွှန်း အမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျှက်ဖြစ်စေ၊ ရေးသားဖော်ပြရမည်ဖြစ်ပြီး၊ ကုန်စည်အမျိုးအစားအလိုက် သတ်မှတ်ထားသည့် ဥပဒေများနှင့်အညီလိုက်နာဆောင်ရွက်ကြရန် ဥပဒေတားမြစ်ချက်များအား လိုက်နာဆောင်ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များသိရှိလိုပါက မြို့နယ်စားသုံးသူ တာဝန်ခံရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca.gov.mm web site တွင် ဝင်ရောက်လေ့လာနိုင်ပါကြောင်း၊ စားသုံးသူများနစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

လိမ္မော်သီးကို လွန်ခဲ့သောနှစ်ပေါင်များစွာမှစ၍ ယနေ့အထိ စိုက်ပျိုးစားသုံးခဲ့ကြပါသည်။ လိမ္မော်အချိုမျိုးကို ရုက္ခဗေဒအလိုအရ စစ်ထရပ်ဆီနင်ဆစ်ဟုခေါ်၍ အခါးမျိုးကို စထရပ်အော်ရန်တီယမ်ဟုခေါ်ပါသည်။ တောင်တရုတ်ပင်လယ်နှင့်အင်ဒိုချိုင်းနားတို့သည် လိမ္မော်သီး မူလစိုက်ပျိုးရာဒေသများဖြစ်သည်။ ဆောင်းဦးကာလသည် လိမ္မော်သီးလှိုင်လှိုင်ပေါသောကာလလည်းဖြစ်ပါသည်။ အခြားဒေသများတွင်လည်း အောက်တိုဘာလမှမတ်လအထိသည် လိမ္မော်သီးဖြစ်ထွန်းပေါများသော ကာလဖြစ်ပါသည်။ လိမ္မော်သီးသည် အရောင်တောက် တောက်ဖြစ်ပြီး ပူပြင်းသောဒေသသို့ရောက်သောအခါ အနီရောင်ဘက်သို့ ပြောင်းတတ်ပါသည်။ သိပ္ပံပညာရှင်များက အာရှတိုက်အရှေ့ပိုင်းတွင်တည်ရှိသော အိန္ဒိယနိုင်ငံ (သို့မဟုတ်) တရုတ်နိုင်ငံတောင်ပိုင်းတို့သည် လိမ္မော်ပင်၏မူလပေါက်ရောက်ရာအရပ်ဒေသ ဖြစ်သည်ဟုသိပ္ပံပညာရှင်များကဆိုကြသည်။ လိမ္မော်ပင်စိုက်ပျိုးရာ၌ အရေးအကြီးဆုံးအချက်မှာ ရာသီဥတုဖြစ်သည်။ လိမ္မော်ပင်တို့သည် အသက်ပြင်းသောအပင်မျိုးဖြစ်သဖြင့် ပူအိုက်သောရာသီဥတုရှိသည့် တိုင်းပြည်တို့၌သော်လည်းကောင်း၊ ချမ်းအေးသောရာသီဥတုရှိသည့် တိုင်း ပြည်နယ်ပယ်တို့၌လည်းကောင်း ပေါက်ရောက်နိုင်သည်။ သို့သော် ပူအိုက်သည့်တိုင်းပြည်တို့မှရရှိသော လိမ္မော်သီးတို့မှာ အနံ့၊ အရသာ၊ အသွေးအရောင်မှစ၍ အနည်းငယ်ချွတ်ယွင်းပျက်ပြယ်တတ်၍ ချမ်းအေးသောရာသီဥတုရှိသည့်တိုင်းပြည်တို့သည် လိမ္မော်ပင်စိုက်ပျိုးရန် အသင့်လျော်ဆုံးဖြစ်သည်။ လိမ္မော်ပင်တစ်ပင်မှ တစ်နှစ်လျှင် လိမ္မော်သီးအလုံးရေ ၄ဝဝ မှ ၆ဝဝ အထိသာလျှင်သီးနိုင်ပါသည်။ သို့သော်အမေရိကတိုက်၊ ဒိုမီနီကန်ကျွန်း၌ မူရာသီဥတုနှင့်တကွ မြေဩဇာသည် လိမ္မော်ပင်နှင့်အထူးသင့်လျော်သော ကျွန်းဖြစ်သောကြောင့် သာမန်လိမ္မော်ပင်တစ်ပင်လျှင် လိမ္မော်သီးအလုံး ၈ဝဝဝ လုံးခန့်ကိုရရှိနိုင်သည်။ အရှေ့တောင်အာရှဒေသတွင်မူ လိမ္မော်ပင်တစ်ပင်မှ တစ်နှစ်လျှင် အသီး ၄ဝဝလုံးမျှရလျှင် တော်သင့်ပြီဟုမှတ်ယူရသည်။ မြန်မာနိုင်ငံတွင် မန္တလေးတိုင်း၊ ပြင်ဦးလွင်၊ ရှမ်းပြည်နယ်(မြောက်ပိုင်း) သီပေါမြို့နယ်နှင့်ရှမ်းပြည်နယ် (တောင်ပိုင်း)တွင် ရပ်စောက်၊ ရွာငံ၊ ပင်လောင်း၊ ကလောမြို့နယ် ပလောင်တောင်ကျေးရွာနှင့် ကျောက်တလုံးကြီးမြို့ ထီခေါင်းကျေးရွာ စသည်တို့တွင် လိမ္မော်ပင်များစိုက်ပျိုးကြပါသည်။ လိမ္မော်သီးအထွက်ကောင်းမွန်ရန်အတွက် သီးနှံကြီးထွားစဉ်ကာလတစ်လျှောက်လုံးတွင် ကောင်းမွန်သောအပူချိန်ကို ထိန်းသိမ်းရန်လိုအပ်ပြီး အပူချိန်မလုံလောက်လျှင် အသီးမချိုခြင်း၊ တာရှည်အပူချိန်မလုံလောက်လျှင် အသီးရင့်မှည့်မှု ပုံမှန်မဖြစ်နိုင်ခြင်း၊ တာရှည်စွာအပူချိန်များနေလျှင်လည်း အသီးမသီးနိုင်ခြင်း၊ ပူပြင်းခြောက်သွေ့ သောရာသီတွင် အသီးများနေလောင်တတ်ခြင်းတို့ဖြစ်တတ်ပါသည်။ မြန်မာနိုင်ငံမှထွက်သောလိမ္မော်သီးများသည် အငယ်စားမျိုးဖြစ်ပြီး လိမ္မော်သီးနှင့်ကမ္ဗလာသီးဟူ၍ နှစ်မျိုးနှစ်စားရှိပါသည်။ လိမ္မော်သီးတွင် ဗီတာမင် C နှင့် ဓါတ်တိုးဆန့်ကျင်ပစ္စည်းများပါဝင်သောကြောင့် ခန္ဓာကိုယ်အတွက် များစွာအထောက်အကူပြုသော အစားအသောက်တစ်ခုဖြစ်ပါသည်။ လိမ္မော်သီးတွင်ကယ်လ်လိုရီပါဝင်မှုနည်းပြီး အာဟာရဓာတ်လည် းအပြည့်အဝပါဝင်ပြီး သဘာဝအချိုဓါတ်ရရှိစေနိုင်သည့် သစ်သီးတစ်မျိုးလည်းဖြစ်ပါသည်။ လိမ္မော်သီးတွင် phytoc-
hemicals များပါဝင်သောကြောင့် အရေပြားကင်ဆာ၊ အဆုတ်ကင်ဆာ၊ ရင်သားကင်ဆာ၊ အစာအိမ်ကင်ဆာနဲ့ အူမကြီးကင်ဆာဝေဒနာများကိုကာကွယ်ပေးနိုင်ပါတယ်။ လိမ္မော်သီးတွင်ပါဝင်သောအမျှင်ဓါတ်သည် ပျော်ဝင်လွယ်သောအမျှင်ဓါတ်ဖြစ်သောကြောင့် သွေးတွင်းကိုလက်စထရောကျဆင်းအောင် အထောက်အကူပြုပေးနိုင်ပါသည်။ လိမ္မော်သီးတွင် carotenoid ဒြပ်ပေါင်း ကြွယ်ဝစွာပါဝင်သောကြောင့် အမြင်အာရုံထိခိုက်မှုမျိုးမဖြစ်စေရန်ကာကွယ်ပေးပါသည်။ လိမ္မော်သီးသည် ကျောက်ကပ်ရောဂါ ကိုလည်းကာကွယ်ပေးနိုင်ပါသည်။ လိမ္မော်သီးသည် ဆဲလ်များထိခိုက်ပျက်စီးခြင်းကို တားဆီးကာကွယ်ပေးနိုင်သော ဓါတ်တိုးဆန့်ကျင်ပစ္စည်းတစ်ခုဖြစ်သော beta-carotene ပါဝင်နေပါသည်။ အရွယ်မတိုင်ခင် အိုမင်းရင့်ရော်မှုကိုလည်း တားဆီးကာကွယ်ပေးပါသည်။ လိမ္မော်သီးတွင် ပါဝင်သည့် Choline သည် အိပ်ပျော်စေနိုင်ခြင်းနှင့်ကြွက်သားလှုပ်ရှားမှု၊ သင်ယူမှုနှင့်မှတ်ဉာဏ်စွမ်းရည်များကို ကောင်းမွန်စေပါသည်။ ထိုကြောင့် လိမ္မော်သီးကို ခန္ဓာကိုယ်အထောက်အကူပြု အာဟာရဖြစ်အသီးအနှံအဖြစ် မဖြစ်မနေပုံမှန်စားသုံးခြင်းဖြင့် ကျန်းမာရေးကို အထောက်အကူပြုနိုင်စေပါသည်။
DOCA(ကယား)