သတင်းနှင့် လှုပ်ရှားမှုများ

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးရှိ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု Wednesday Talk နှင့် စာပေစကားဝိုင်း ဆွေးနွေးပွဲကို ၂၀၂၄ ခုနှစ်၊ ၁၅.၅.၂၀၂၄  ရက်နေ့၊ နေ့လယ်  (၁၄:၀၀) နာရီအချိန်တွင် တိုင်းဒေသကြီး ဦးစီးမှူးရုံး၊ အစည်းအဝေးခန်းမ၌ တိုင်းဒေသကြီးဦးစီးမှူး၏ လမ်းညွှန်မှုဖြင့် ပထမပိုင်း၊ ဒုတိယပိုင်း ဟူ၍ နှစ်ပိုင်းခွဲကာ ကျင်းပပြုလုပ်ဆောင်ရွက်ခဲ့ပါသည်။ ထိုသို့ပြုလုပ် ဆောင်ရွက်ခြင်းသည် ဝန်ထမ်းများအား ဝန်ထမ်းစွမ်းဆောင်ရည်မြင့်မားပြီး လုပ်ငန်းဆောင်ရွက်ချက်များကို အောင်မြင်စွာ လုပ်ကိုင်ဆောင်ရွက်တတ်စေရန်ရည်ရွယ်၍ ပြုလုပ်ဆောင်ရွက်ခြင်းဖြစ်ကြောင်း သိရှိရပြီး အရာထမ်းများ၊ အမှုထမ်းများ စုစုပေါင်း (၃၆) ဦးတက်ရောက်ခဲ့ကြကြောင်း သိရှိရပါသည်။

     ပထမပိုင်းတွင် တိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲမှ ဦးစီးအရာရှိ ဒေါ်ခိုင်မို့မို့က ကုန်ပစ္စည်းအမှတ်တံဆိပ်မှန်ကန်စေရေးနှင့် ပတ်သက်၍  သိကောင်းစရာများအကြောင်း ရှင်းလင်းဆွေးနွေးခဲ့ပြီး ငွေစာရင်းဌာနခွဲမှ ရုံးအကူမှူး ဦးကျော်သီဟက စာရေးဆရာဆလိုင်း အောင်မင်းလှိုင်၏ သင့်ရဲ့ ကျောက်ဆူးက ဘယ်သူလဲ စာအုပ်ကြောင်း ရှင်းလင်းဆွေးနွေးခဲ့ပါသည်။            

    ဒုတိယပိုင်းတွင် တိုင်းဒေသကြီးဦးစီးမှူးနှင့် ဒု-တိုင်းဒေသကြီးဦးစီးမှူးက တိုင်းဒေသကြီး ဦးစီးမှူးရုံးနှင့် ခရိုင်ဦးစီးမှူးရုံးများမှ သတင်းဆောင်းပါးရေးသားသည့် ဝန်ထမ်းများအား သတင်း၊ ဆောင်းပါးရေးသားရာတွင် ပါဝင်သင့်သည့် အချက်များ၊ ရှောင်ကြဉ်ရမည့်အချက်များ၊ သတိပြုရမည့်အချက်များ၊ သတင်းခေါင်းစဉ်ရေးသားရာတွင် ဂရုစိုက်ရမည့်အချက်များ၊ ဌာနခွဲအလိုက် ရေးသားပေးပို့နိုင်သည့် သတင်း၊ဆောင်းပါးအမျိုးအစားများ ရှင်းလင်းဆွေးနွေးခဲ့ပြီး  တိုင်း/ခရိုင်မှ သတင်းဆောင်းပါးရေးသားသူ(၂၄)ဦးအား ဆုငွေများချီးမြှင့်ပေးခဲ့ပြီး အရှိန်အဟုန်မပျက် ဆက်လက်ရေးသားကြရန် ပြောကြားခဲ့ကြောင်း သိရှိရပါသည်။  

DOCA(စစ်ကိုင်း)

     စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့် ]ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြမှုရှိစေရေးရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ မေလ (၁)ရက်နေ့မှ (၁၅)ရက်နေ့အတွင်း ပြည်မြို့၊ မြို့သစ်(၁၃) လမ်းနေ၊ ဦးရဲနောင်မြင့်၏ စန်းကမ္ဘာ ဆန်ရောင်းဝယ်ရေးလုပ်ငန်းသို့လည်းကောင်း၊  ရွှေတောင်မြို့ တွင် ဆည်ကြီးကုန်းအုပ်စု၊ ညောင်ဝိုင်းရွာ၊ ဦးပိုင်စိုးကျော်၏ AK သောက်ရေသန့်လုပ်ငန်းနှင့် သရက်တောရပ်ကွက်၊ ယုဇနလမ်းရှိ ဦမျိုးမင်းနိုင်၏ ကံ့ကော်အောင် ရှောက်အစာကြေဆေးလုပ်ငန်းသို့လည်းကောင်း၊ ပန်းတောင်းမြို့တွင် ဥသျှစ်ပင်လမ်းမတော်ရှိ ဒေါ်စိုးရီဦး၏ ပင်ရွှေဦး ဆန်ရောင်းဝယ်ရေးလုပ်ငန်း၊ ဒေါ်ကြည်ကြည်လှိုင်၏ ထက်အောင်ဆန်ရောင်းဝယ်ရေးလုပ်ငန်း၊ ဦးဝင်းထက်၏ ဘရဏီ စက်သုံးဆီဆိုင်သို့လည်းကောင်း၊ ဥသျှစ်ပင်ဈေးရှေ့ရှိ ဦးအောင်နိုင်ဖြူ၏ ဆန်ရောင်းဝယ်ရေးလုပ်ငန်းနှင့် ဦးနေလင်းထွန်း၏ ဆန်ရောင်းဝယ်ရေးလုပ်ငန်းသို့လည်းကောင်း၊ ပေါက်ခေါင်းမြို့၊ အမှတ်(၁)ရပ်ကွက်ရှိ ဦးအေးကျော်၏ အောင်စုရည် မျှစ်လုပ်ငန်းသို့ လည်းကောင်း၊ အမှတ်(၅)ရပ်ကွက်ရှိ ဦးခင်ဇော်၏ ပွိုင့် ဘိလပ်မြေရောင်းဝယ်ရေးလုပ်ငန်းသို့လည်းကောင်း သက်ဆိုင်ရာမြို့နယ်တာဝန်ခံများနှင့် ဝန်ထမ်းများသွားရောက်၍ မိမိတို့ဖြန့်ဖြူးရောင်းချလျက်ရှိသော ကုန်စည်များတွင် အရည်အသွေး၊ အလေးချိန်၊ အချင်အတွယ်၊ ပမာဏနှင့် အမျိုးအစားများ မှန်ကန်စွာ ဖြန့်ဖြူးရောင်းချမှုရှိစေရေး၊ ဖေါ်ပြရမည့်ကုန်အညွှန်းအမှတ်အသားများ၊ ပြည့်စုံမှန်ကန်စွာဖော်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများပြုလုပ်ဆောင်ရွက်သွားမည်ဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန်လိုအပ်ကြောင်း ရှင်းလင်းဆွေးနွေးပြောကြားခဲ့ကြောင်း သတင်းရရှိပါသည်။

DOCA(ပဲခူး)

      စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဒုတိယခရိုင်ဦးစီးမှူးနှင့် စစ်ဆေးရေးမှူးများ၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ဦးစီးမှူးရုံးမှ လက်ထောက်ကြီးကြပ်ရေးမှူး ဦးငြိမ်းမင်းအောင်တို့နှင့်အတူ ၂၀၂၄ခုနှစ်၊ မေလ ၁၄ရက်နေ့၊ နံနက်ပိုင်းတွင် တောင်ငူမြို့ရှိ ဆေးဆိုင်ကြီးများသို့သွားရောက်၍ ဆရာဝန်ညွှန်ကြားချက်မလိုသော အိမ်သုံးဆေးဝါးများ၌ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းရှိ/မရှိကို ကြည့်ရှုစစ်ဆေးပြီး အိမ်သုံးဆေးဝါးများ၏ ဈေးနှုန်းဈေးကွက်အခြေအနေများကို မေးမြန်းခဲ့ပါသည်။

        ခရိုင်ဦးစီးမှူးက စားသုံးသူကာကွယ်ရေးဥပဒေအရ ကုန်စည်များတွင် ကုန်အညွှန်းအမှတ်အသားများကို မြန်မာဘာသာဖြင့်ဖော်ပြရမည့် အချက်အလက်များကိုပြဋ္ဌာန်းထားရှိရာ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းမရှိသည့် ဆေးဝါးများကိုရောင်းချခြင်းမပြုရန်၊ ဈေးကွက်အတွင်း ဆေးဝါးပြတ်လပ်မှုနှင့် ဈေးနှုန်းအဆမတန်ကြီးမြင့်မှုများမဖြစ်ပေါ်စေရေးအတွက် ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းများမပြုရန် ဆိုင်ပိုင်ရှင်များနှင့်ကိုယ်စားလှယ်များအား အသိပေးပြောကြားခဲ့ပါသည်။

         တောင်ငူမြို့ပေါ်ရှိ ဆေးဆိုင်များ၌ ဆေးဝါးတချို့မှာ ယခင်လထက် ဈေးနှုန်းအနည်းငယ်မြင့်တက်လာခဲ့ပြီး တချို့မှာ ယခင်လအတိုင်း ဈေးနှုန်းတည်ငြိမ်နေသည်ကိုတွေ့ရပါသည်။ မဖြစ်မနေသုံးစွဲရန် လိုအပ်သည့်ဆေးဝါးများမှာ ပုံမှန်အတိုင်း အရောင်းအဝယ်ဖြစ်နေသော်လည်း အားဆေးများမှာ ယခင်ကာလများကဲ့သို့ ရောင်းအားမကောင်းကြောင်းသိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ ​မော်လမြိုင်မြို့နယ် တာဝန်ခံသည် ၁၇.၅.၂၀၂၄ ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကြီးကြပ်ကွပ်ကဲရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍  ​မော်လမြိုင်မြို့နယ်၊ ရတနာထွန်းပွဲရုံတန်းရှိ ကုန်စုံဆိုင်ကြီးများအား ဦးစား​ပေးကုန်စည်ဖြစ်​သော ​အသင့်စား​ခေါက်ဆွဲခြောက်ထုပ်များအား ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။

     ထိုသို့ ဈေးကွက်စောင့်ကြည့်စစ်ဆေးရာ အသင့်စားခေါက်ဆွဲထုပ်များတွင် စားသုံးသူကာကွယ်ရေးဥပဒေ(၂၀၁၉)ပါ ကုန်အညွှန်းအမှတ်အသားဖော်ပြခြင်းဆိုင်ရာ သတ်မှတ်ချက်များနှင့်ကိုက်ညီမှု ရှိ/မရှိ၊ သက်ဆိုင်ရာဌာနများ၏ ထောက်ခံချက်ရှိ/မရှိ စစ်ဆေးခြင်းများဆောင်ရွက်ခဲ့ပြီး ကုန်အညွှန်းအမှတ်အသားများ ပြည့်စုံစွာဖော်ပြထားသည်ကို တွေ့ရှိရကြောင်း၊ ရောင်းချသူဆိုင်ရှင်များအား  ကုန်ပစ္စည်းများရောင်းချရာတွင် ကုန်အညွှန်းအမှတ်အသား ပြည့်စုံစွာဖော်ပြပါရှိသည့် ကုန်ပစ္စည်းများကိုသာရောင်းချရန်နှင့် သက်တမ်းလွန်စားသောက်ကုန်များ ရောင်းချခြင်းမပြုကြရန် အသိပညာပေးဆွေးနွေးခြင်းများပြုလုပ်ခဲ့ကြောင်း သိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်း၊ မြို့နယ်စည်ပင်သာယာရေးအဖွဲ့မှ ဦးစီးအရာရှိ ဦးအောင်ကိုကိုတို့နှင့်အတူ (၁၅-၅-၂၀၂၄)ရက်နေ့၊ နံနက်ပိုင်းတွင် တောင်ငူမြို့ပေါ်ရှိ ဆန်ဂိုဒေါင်များနှင့် ဆန်အရောင်းဆိုင်များသို့သွားရောက်၍ ဆန်စပါးသိုလှောင်ထားရှိမှုနှင့် ဈေးနှုန်းဈေးကွက်အခြေအနေများကို ကွင်းဆင်းစစ်ဆေးခဲ့ပါသည်။

         ပူးပေါင်းအဖွဲ့သည် တောင်ငူမြို့ပေါ်ရှိ အောင်ဟေမာန်ဆန်စက်၊ ကောင်းပြည့်ဆန်စက်၊ လမင်းဆန်စက်၊ အေးမေတ္တာဆန်စက်နှင့် အိုးတက်ဆန်ပွဲရုံများသို့ သွားရောက်စစ်ဆေးရာ ဆန်စက်များအနေဖြင့် မိုးစပါး တင်း၁၀၀လျှင် ၂၄၀၀၀၀၀ကျပ်ဖြင့်ဝယ်ယူရပြီး ကြိတ်ခွဲထွက်ရှိသည့်ဆန်များကို တစ်အိတ်လျှင် ၈၈၀၀၀ကျပ်မှ ၉၀၀၀၀ကျပ်အထိရောင်းချရကြောင်း၊ နွေစပါး တင်း၁၀၀လျှင် ၁၉၅၀၀၀၀ကျပ်မှ ၂၀၀၀၀၀၀ကျပ်အထိဝယ်ယူရပြီး ကြိတ်ခွဲထွက်ရှိသည့် ဆန် များကို တစ်အိတ်လျှင် ၇၂၀၀၀ကျပ်မှ ၇၃၀၀၀ကျပ်အထိရောင်းချရကြောင်း၊ လျှပ်စစ်မီးပုံမှန်ရရှိမှုမရှိခြင်းကြောင့် ပုံမှန်ကြိတ်ခွဲနိုင်မှုမရှိသဖြင့် ဆန်မြောက်များစွာသိုလှောင်ထားခြင်းမရှိကြောင်း၊ လက်ကျန်ဆန်များကို ဈေးကွက်သို့ ပုံမှန်ဖြန့်ဖြူးပေးလျက်ရှိကြောင်းသိရှိရပါသည်။

        စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးသည် ကွင်းဆင်းစစ်ဆေးစဉ် သက်ဆိုင်ရာလုပ်ငန်းရှင်များအား မိမိခရိုင်အတွင်း ဆန်ပြတ်လပ်မှုမရှိစေရေး၊ ဆန်ဈေးနှုန်းကြီးမြင့်မှုမရှိစေရေးတို့အတွက် ဆန်များကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့်သိုလှောင်ခြင်းများမပြုရန် အသိပေးဆွေးနွေးခဲ့ကြောင်းသိရှိရပါသည်။

DOCA(ပဲခူး)