သတင်းနှင့် လှုပ်ရှားမှုများ

         မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်း/ခရိုင်ဦးစီးမှူးတို့၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံ ဦးဇော်နေလင်းသည် စားသုံးသူကာကွယ်ရေးဥပဒေပါ စီးပွားရေးကျင့်ဝတ်နှင့်အညီ လုပ်ကိုင်ဆောင်ရွက်ပြီး တာဝန်ယူမှု၊ တာဝန်ခံမှုရှိသော စီးပွားရေးလုပ်ငန်းရှင်များ ဖြစ်လာစေရန် ရည်ရွယ်၍ နိုဝင်ဘာလ(၁၄)ရက်နေ့ ၊ နံနက်(၁၀:၀၀) အချိန်တွင် ဆိပ်ဖြူမြို့ အလယ်ပိုင်းရပ်ကွက်ရှိ ဦးနှင်းလွင် ပဲကြော်လုပ်ငန်းနှင့် ပဲလွှာဝင့်ပဲကြော်လုပ်ငန်း ဖြန့်ဖြူးရောင်းချသော လုပ်ငန်းရှင်များဆီသို့ မိမိတို့ထုတ်လုပ် ရောင်းချသော ကုန်စည်ပေါ်တွင် ကုန်အညွှန်းအမှတ်အသားများ ပြည့်စုံစွာပါဝင်စေရေးအတွက် သွားရောက်၍ အသိပညာပေးဆွေးနွေးခဲ့ပါသည်။

          ဆိပ်ဖြူမြို့နယ်တာဝန်ခံ ဦးဇော်နေလင်းမှ ဆွေးနွေးခဲ့ရာတွင် စီးပွားရေးလုပ်ငန်းရှင်များ အနေဖြင့် စားသုံးသူကာကွယ်ရေးဉပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းဖြင့် ဈေးကွက်အတွင်းရှိ မိမိတို့ထုတ်ကုန်များမှာ စားသုံးသူများအား ဘေးအန္တရာယ် ကင်းရှင်း စေခြင်း၊ အာမခံချက်ပေးခြင်း၊ သတင်းအချက်အလက်များ ပြည့်စုံမှန်ကန်စွာ ထည့်သွင်းခြင်းတို့ကြောင့် စားသုံးသူများအနေဖြင့် စီးပွားရေးလုပ်ငန်းရှင်များအပေါ် ယုံကြည်မှုများ ရရှိလာပြီး အကျိုးစီးပွားများ ပိုမိုရရှိလာမည်ဖြစ်ကြောင်းနှင့် မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက် (၂/၂၀၁၉)ပါ ကုန်စည်အုပ်စု(က) အစားအသောက်တွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း သိရှိလိုက်နာစေရန် ဆွေးနွေးခဲ့ပြီး စီးပွားရေးလုပ်ငန်းရှင်များသည် ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့ တင်ပြစိစစ်လျှောက်ထားနိုင်ပါကြောင်း၊ ကုန်အမှတ်တံဆိပ် စိစစ်ခွင့်ပြုချက် များအား ပြုလုပ်ဆောင်ရွက်ထားစေလိုကြောင်း၊ ကုန်အညွှန်းအမှတ်အသားများ ပြည့်စုံမှုမရှိသည့် ကုန်စည်များတွေ့ရှိလာပါက  ဥပဒေအရအရေးယူဆောင်ရွက်သွားမည်ဖြစ်သဖြင့် လုပ်ငန်းရှင်များ လိုက်နာဆောင်ရွက်စေလိုကြောင်း အသေးစိတ်ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

        ၂၀၂၂-၂၀၂၃ ခုနှစ် ပဲစိုက်ပျိုးရာသီတွင် ဥရောပသမဂ္ဂနိုင်ငံများသို ပဲပင်ပေါက်ဖောက်ရန်အတွက် မြန်မာပဲတီစိမ်းများ တင်ပို့နိုင်ရန် မြန်မာပဲများတင်ပို့နိုင်ရေးလုပ်ငန်းကြီးကြပ်ရေးအဖွဲ့ အစည်းအဝေးအား ၂၀၂၂ ခုနှစ်၊ နိုဝင်ဘာလ (၅)ရက်၊ နေ့လယ် (၁၄:၀၀)နာရီတွင် စားသုံးသူရေးရာ ဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၊ အစည်းအဝေးခန်းမ(ဒုတိယထပ်) ၌ ကျင်းပပြုလုပ် ခဲ့ရာ အစည်းအဝေးသို့ မြန်မာပဲများတင်ပို့နိုင်ရေး လုပ်ငန်းကြီးကြပ်ရေးအဖွဲ့ ဥက္ကဌနှင့် အဖွဲ့ဝင်များ၊ စိုက်ပျိုးရေး ဦးစီးဌာနမှ တာဝန်ရှိသူများ၊ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်း ဥက္ကဌ၊ ဘုရင့်နောင်ကုန်စည်ဒိုင်၊ ဥက္ကဌ၊ ပဲတင်ပို့ရန် အဆိုပြုကုမ္ပဏီများနှင့် တာဝန်ရှိသူများ တက်ရောက် ကြကြောင်း သတင်းရရှိသည်။

      အစည်းအဝေးတွင် မြန်မာပဲများတင်ပို့နိုင်ရေးလုပ်ငန်းကြီးကြပ်ရေးအဖွဲ့၊ ဥက္ကဌ၊ စီးပွားရေး နှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချိုမှ ဥရောပသမဂ္ဂနိုင်ငံများသို့ ပဲပင်ပေါက်ဖောက်ရန်အတွက် မြန်မာပဲတီစိမ်းများတင်ပို့နိုင်ရေးကို ပုံမှန် ဆောင်ရွက်နိုင်ရန်စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ၂.၁၁.၂၀၂၂ ရက်နေ့တွင် မြန်မာ့ပဲများတင်ပို့နိုင်ရေး လုပ်ငန်းကြီးကြပ်ရေးအဖွဲ့အားအဖွဲ့ဝင် (၁၅)ဦးဖြင့် ဖွဲ့စည်းတာဝန် ပေးအပ်ခဲ့ပါကြောင်း၊ ဝန်ကြီးဌာနအနေဖြင့် အဆင့်မြင့်ဈေးကွက်သို့ တရားဝင်ထိုးဖောက်နိုင်သည့် ထုတ်ကုန် ဖြစ်ရန်နှင့်ဈေးကွက်ချဲ့ထွင်းနိုင်ရန်အတွက်ဖွဲ့စည်းတာဝန်ပေးအပ်ခဲ့ခြင်းဖြစ်ကြောင်း၊ ဥရောပသမဂ္ဂနိုင်ငံများသို့ ပဲပင်ပေါက်ဖောက်ရန်အတွက် မြန်မာ့ပဲများ တင်ပို့နိုင်ရေးကို ၂၀၁၄ ခုနှစ်မှစတင်ပြီး စီမံကိန်းကို အကောင်အထည်ဖော်ဆောင်ရွက်ခဲ့ပါကြောင်း၊ ဥရောပသမဂ္ဂ နိုင်ငံများသို့ အိမ်နီးချင်းနိုင်ငံများမှ ပဲများတင်ပို့ခဲ့သော်လည်း မြန်မာပဲများကိုသာ ကြိုက်နှစ်သက်သည်ကို သိရှိခဲ့ရပါကြောင်း၊ ဥရောပသမဂ္ဂနိုင်ငံများ၏ အစားအစာဘေးကင်း လုံခြုံမှုဆိုင်ရာ စည်းမျဉ်းစည်းကမ်းနှင့်အညီ ဆောင်ရွက်ပေးရန် ကမ်းလှမ်းလာချက်များအတိုင်း မြန်မာနိုင်ငံဘက်မှ စဉ်ဆက်မပြတ်ဆောင်ရွက်ပေးရန် စိုက်ပျိုးသည့် တောင်သူအပိုင်း၊ စုဆောင်းသူ အဝယ်တော်အပိုင်းနှင့် လုပ်ငန်းစဉ်ဆောင်ရွက်သည့် စက်ရုံအပိုင်းများကို ဆောင်ရွက်ပေးခဲ့ရပါကြောင်း၊ စိုက်ပျိုးသည့် တောင်သူအပိုင်းတွင် ကောင်းမွန်သော စိုက်ပျိုးရေးစနစ်များဖြင့် စိုက်ပျိုးနိုင်ရန်အတွက် တောင်သူများအား ကြိုတင်အသိပညာပေး ဆောင်ရွက်ရန်၊ စုဆောင်းသူ အဝယ်တော်ပိုင်းတွင်လည်း သိုလှောင်မှု၊ ပို့ဆောင်မှုအား မှတ်တမ်းထားရှိ ဆောင်ရွက်ရန်၊  လုပ်ငန်းစဉ်ဆောင်ရွက်သည့် စက်ရုံပိုင်းတွင် ကျန်းမာရေးနှင့် ညီညွတ်သည့် အလေ့အကျင့်နှင့် ညီအောင် တာဝန်ရှိသူများက စိစစ်ဆောင်ရွက်ရမည်ဖြစ်ကြောင်း၊ ယခုနှစ်တွင် အဆိုပြုထားရှိသည့် ကုမ္ပဏီများအနေနဲ့ ဆောင်ရွက်ရမည့်လုပ်ငန်းစဉ်များအား အချိန်နှင့်တပြေးညီ ဆောင်ရွက်နိုင်ရန် လိုအပ်ပါကြောင်း၊ တင်ပို့သည့် အရေတွက်နည်းသော်လည်း အာမခံချက်ရှိသော ဈေးကွက်သို့ တင်ပို့နိုင်အောင် ဆောင်ရွက်ရမည်ဖြစ်၍ အားလုံးဝိုင်းဝန်းပူးပေါင်း ဆောင်ရွက် ပေးရန်ဖြစ်ကြောင်း ပြောကြားခဲ့ပါသည်။

    ထို့နောက် ကြီးကြပ်ရေးအဖွဲ့ ဒုတိယဥက္ကဌများဖြစ်ကြသော မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်း၊ ဥက္ကဌ ဦးထွန်းလွင်၊ ဘုရင့်နောင်ကုန်စည်ဒိုင်၊ ဥက္ကဌ ဒေါက်တာမျိုးလွင်နှင့် တက်ရောက်လာကြသူများက မြန်မာပဲတီစိမ်းများ တင်ပို့နိုင်ရေးအတွက် ၂၀၂၂-၂၀၂၃ ခုနှစ် ပဲရာသီတွင် ကုမ္ပဏီများ အဆိုပြုထားမှု၊ အစုအဖွဲ့ ဖွဲ့စည်းထားရှိမှု၊ တောင်သူ၊ စုဆောင်းသူ အဝယ်တော်များ အသိပညာပေး ဆောင်ရွက်မည့် အစီအစဉ်အား ညှိနှိုင်းထားရှိမှု၊ သင်တန်း အထောက်အကူပြုပစ္စည်းများ စီစဉ်ဆောင်ရွက်ထားရှိမှုနှင့် သင်တန်းကြီးကြပ်ရေးအဖွဲ့အား ပြင်ဆင် ဖွဲ့စည်းသွားမည့်အခြေအနေ၊ တောင်သူပညာပေးခြင်းနှင့် စုဆောင်းသူ အဝယ်တော် သင်တန်းပေးခြင်း ပြုလုပ်မည့်ကာလကို သတ်မှတ်ခြင်းနှင့် တောင်သူပညာပေးသင်တန်းကို ကိုဗစ်-၁၉ စည်းမျဉ်းစည်းကမ်းများနှင့်အညီ ဖွင့်လှစ်ပို့ချနိုင်ရေး ဆွေးနွေးခဲ့ကြကြောင်း သိရှိရပါသည်။

DOCA(ရန်ကုန်)

      စစ်ကိုင်းတိုင်းဒေသကြီး၊ ရွှေဘိုခရိုင်၊ ဝက်လက်မြို့၊ အမှတ်(၂)၊ အခြေခံပညာအလယ်တန်းကျောင်းတွင် ၂၀၂၂ခုနှစ်၊ နိုဝင်ဘာလ (၁၆)ရက်နေ့၌ မြို့နယ်တာဝန်ခံဦးမျိုးအောင်သည် ကျောင်း သား/ကျောင်းသူ (၄၀)ဦးနှင့် ဆရာ/ဆရာမ(၅)ဦးအား စားသုံးသူကာကွယ်ရေးအသိပညာပေး ဟော ပြောပွဲ ဆောင်ရွက်ခဲ့ပါသည်။

        အဆိုပါ ဟောပြောပွဲတွင် ဝက်လက်မြို့နယ် တာဝန်ခံဦးမျိုးအောင်မှ စားသုံးသူရေးရာဦးစီး ဌာနပေါ်ပေါက်လာပုံ၊ စားသုံးသူရေးရာဦးစီးဌာန၏ Vision၊ Missionများ၊ ပြည်သူတိုင်းသည် စားသုံးသူဖြစ်ကြောင်း၊ စားသုံးသူတိုင်းတွင် စားသုံးသူအခွင့်အရေးများရှိကြောင်း၊ စားသုံးသူ၏ အခွင့်အရေးများကို အပြည့်အဝကာကွယ်နိုင်ရန်အတွက် စားသုံးသူကာကွယ်ရေး ဥပဒေကိုပြဌာန်းထားကြောင်း၊ စားသုံးသူ၏ အဓိပ္ပာယ်ဖွင့်ဆိုချက်များ၊ စားသုံးသူကာကွယ်ရေးဉပဒေပါ စားသုံးသူ၏ အခွင့်အရေး များ၊ မိမိတို့ မုန့်များဝယ်ယူစားသောက်ရာတွင် ကုန်စည်၏ တံဆိပ် အမှတ်အသား၊ အမျိုးအမည်၊ အရေအတွက်၊ အသားတင်ပမာဏ၊ ထားသိုသိမ်းဆည်းပုံအညွှန်း၊ သုံးစွဲပုံနည်းလမ်း၊ ထုတ်လုပ်သည့် ရက်စွဲနှင့် သက်တမ်းကုန်ဆုံးသည့်ရက်စွဲ ၊ ကျန်းမာရေးဆိုင်ရာ ဘေးထွက်ဆိုးကျိုးနှင့် ဓါတ်မတည့် ကြောင်း ဖော်ပြချက်နှင့် ကြိုတင်သတိပေးချက်တို့အား သေချာစွာဖတ်ရှု့ရမည့်ဖြစ်ကြောင်း၊ သက်တမ်းလွန်သည့်မုန့်များနှင့် ဆိုးဆေးများပါဝင်သည့်အစားအစာများအား မစားသုံးသင့်ကြောင်း၊  ကျန်းမာရေးကောင်းခြင်း/မကောင်းခြင်းသည် အစားအသောက်နှင့်သက်ဆိုင်ကြောင်း၊ မိမိ၏ အသိဖြင့် ဝယ်ယူစားသောက်ကြရမည်ဖြစ်ကြောင်း ဟောပြောဆွေးနွေးခဲ့ပြီး လက်ကမ်းစာစောင် (၄၅) စောင် ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

          ဖျာပုံခရိုင်၊ဘိုကလေးမြို့နယ်၊ တရားမဝင်ကုန်သွယ်မှု တိုက်ဖျက်ရေးအဖွဲ့များဖြစ်သော မြို့နယ် ထွေ/အုပ်၊ စားသုံးသူရေးရာ၊ မြန်မာနိုင်ငံရဲတပ်ဖွဲ့၊ ပြည်တွင်းအခွန်၊ စိုက်ပျိုးရေး၊ မြို့နယ်စည်ပင်သာယာ ရေး၊ဌာနတို့ပူး၍ ၂၀၂၂ခုနှစ်၊ နိုဝင်ဘာလ(၁၁)ရက်နေ့၊ နံနက်(၁၀:၀၀)နာရီအချိန်တွင် ဘိုကလေးမြို့ပေါ် ရပ်ကွက်နှင့် မြို့မဈေးအပြင်တန်းရှိ ဆေးဆိုင်များသို့ ကွင်းဆင်းစစ်ဆေးခဲ့ကြပါသည်။

          ထိုသို့စစ်ဆေးဆောင်ရွက်ရာတွင် ဘိုကလေးမြို့ပေါ်ရပ်ကွက်နှင့် မြို့မဈေးအပြင်တန်းရှိမုန့်မျိုးစုံ၊ ကုန်မျိုးစုံဆိုင်များတွင် ရောင်းချနေသောကုန်စည်များနှင့် ပတ်သက်ပြီး တရားမဝင်ကုန်စည်များတင် သွင်ဖြန့်ဖြူးရောင်းချခြင်းမရှိစေရေး တို့အတွက် Geno အမှတ်တံဆိပ်ပါ 3 in 1 ကော်ဖီနှင့်သွားတိုက်ဆေး၊ ဖြည့်စွက် အစားအစာများရောင်းချခြင်းရှိ/မရှိစစ်ဆေးခြင်း FDA မှတားမြစ်ထားသော “မိခင်နို့အစား ထိုးအသုံးပြုနိုင်ကြောင်း” ကလေးအဟာရဖြည့်စွပ်စာအမျိုးမျိုးတို့တွင်ရေးသားဖော်ပြထားခြင်းရှိ/မရှိ နှင့် အခြားကုန်စည်များတွင်လည်းကုန်အညွှန်းအမှတ်အသားဖော်ပြချက်များ ပါဝင်မှုရှိ/မရှိစစ်ဆေးခဲ့ပြီ။ ပိုးသတ်ဆေးနှင့် ဓာတ်မြေသြဇာဆိုင်များသို့စစ်ဆေးရာတွင်လည်း သက်ဆိုင်ရာဌာနမှ တရားဝင်မှတ်ပုံ တင်လိုင်စင်များလည်းရှိပါကြောင်း ကုန်စည်များအားတရားဝင်ကုမ္ပဏီများမှ တစ်ဆင့်ဝယ်ယူဖြန့်ဖြူး ရောင်းချလျက်ရှိကြောင်း၊ အမိုနီယမ်နိုက်ထရိတ်ပါဝင်သော ဓာတ်မြေသြဇာများရောင်းချခြင်းမရှိ ကြောင်းနှင့် ဘေးအန္တရာယ်ရှိသည့် တရားမဝင်ကုန်စည်များရောင်းချခြင်းမရှိကြောင်းအဖွဲ့နှင့် ကွင်းဆင်းစစ်ဆေးမှုအား သတင်းရှိပါသည်။

DOCA(ဧရာဝတီ)

            သာယာဝတီခရိုင် သာယာဝတီမြို့နယ်ရှိ စိုက်ပျိုးရေးသင်တန်းကျောင်းသို့  ၁၅.၁၁.၂၀၂၂ ရက်နေ့ ၊ နေ့လယ် ၁: ၀၀ နာရီ အချိန်တွင် သာယာဝတီမြို့နယ် စိုက်ပျိုးရေးသိပ္ပံ လုပ်ငန်းခွင်အကြိုလယ်ယာသုံး စက်ကိရိယာများ မောင်းနှင်ထိန်းသိမ်းနည်း သင်တန်းဆင်းပွဲအခမ်းအနားသို့  စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်အေးသန္တာထွန်း၊ စက်မှုလယ်ယာဦးစီးဌာနမှ ခရိုင်ဦးစီးမှူး၊ မြို့နယ်ဦးစီးမှူးနှင့် ဝန်ထမ်းများတက်ရောက်ခဲ့ကြပါသည်။

         သင်တန်းဆင်းပွဲတွင် စားသုံးသူရေးရာဦးစီးဌာန မြို့နယ်တာဝန်ခံ ဒေါ်အေးသန္တာထွန်းမှ စားသုံးသူရေးရာဦးစီးဌာနအကြောင်း၊ စားသုံးသူကာကွယ်ရေးဥပဒေ၊ ကုန်အညွှန်းအမှတ်အသားနှင့် ပတ်သက်၍ သိကောင်းစရာအချက်များကို အသိပညာပေးဆွေးနွေးခဲ့ရာ အခမ်းအနားသို့ စက်မှု လယ်ယာဌာနမှ ခရိုင်ဦးစီးမှူးနှင့် ဝန်ထမ်းများ၊ သင်တန်းဆင်းကျောင်းသား/ ကျောင်းသူများ၊ တက်ရောက်လာသူစုစုပေါင်း  ၁၅၀ ဦးအား ဟောပြောခဲ့ပြီး   လက်ကမ်းစာစောင်များ ဖြန့်ဝေပေးခဲ့ပါကြောင်း သိရှိရပါသည်။

DOCA(ပဲခူး)