သတင်းနှင့် လှုပ်ရှားမှုများ

     ကချင်ပြည်နယ်၊ စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ    ဦးကျော်မိုးလွင် (ဌာနခွဲစာရေး) သည် ၁၁.၁၁.၂၀၂၂ ရက်နေ့တွင် မိုးညှင်းမြို့နယ်၊ ဘီလူးမြို့ကျေးရွာအတွင်းရှိ စပါးအခြောက်ခံစက်လုပ်ငန်းရှင်နှင့်‌ တွေ့ဆုံဆွေးနွေးခဲ့ပါသည်။

       တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေ၏ အဓိပ္ပါယ်ဖော်ပြချက်မှ စီးပွားရေး လုပ်ငန်းရှင်ဆိုသည်မှာကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ပြည်တွင်းသို့တင်သွင်းခြင်း၊ ပြန်လည်ရောင်းချ ခြင်းကိုဖြစ်စေ၊ထောက်ပံ့ပေးခြင်းကိုဖြစ်စေ၊  ဝန်ဆောင်မှုပေးခြင်းကိုဖြစ်စေ၊ကြော်ငြာလုပ်ငန်းလုပ်ကိုင် ခြင်းကိုဖြစ်စေ တစ်ဦးခြင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကို ဆိုလိုကြောင်း၊ ဝန်ဆောင်မှုဆိုသည်မှာ လုပ်ငန်းသို့မဟုတ်ဝန်ဆောင်မှုအသွင်ဖြင့် စားသုံးသူ၏လိုအပ် ချက်ကို  တန်ဖိုးဖြင့်ဖြစ်စေ၊  တန်ဖိုးမပါဘဲဖြစ်စေ ဖြည့်ဆည်းပေးသည့်ဆောင်ရွက်မှုကို ဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သည့်ကုန်စည်သို့မဟုတ်ဝန်‌ဆောင်မှု၏ အာမခံချက်၊သတ်မှတ် ချက်များနှင့်စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း စားသုံးသူကိုခွဲခြားမှု မရှိဘဲ  ဖြောင့်မတ်မှန်ကန်စွာဆက်ဆံခြင်း၊ စီးပွား‌ရေးလုပ်ကိုင်ရာတွင် စီးပွား‌‌ရေးကျင့်ဝတ်၊ စည်းကမ်း နှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ ကုန်စည်သို့မဟုတ်ဝန်ဆောင်မှုနှင့်စပ်လျဉ်း၍ ထပ်မံ ပေးချေရမည့်တန်ဖိုးကို စားသုံးသူကဝယ်ယူအသုံးမပြုမီသိရှိစေရန် အတိအလင်းဖော်ပြပေးခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ဂတိပြုထားသော အာမခံချက်နှင့်ကိုက်ညီမှုမရှိပါက ဂတိပြုထားသည့်အတိုင်း တာဝန်ယူဆောင်ရွက်ပေးခြင်း၊ ဝန်ဆောင်မှုနှင့်စပ်လျဉ်း၍ အာမခံချက်များ တွင် ပါဝင်ရမည့်အချက်များမှာ မိမိဝန်ဆောင်မှုနှင့်စပ်လျဉ်း၍အချက်အလက်များကို စားသုံးသူသိရှိ စေရန်ကြိုတင်အသိပေးခြင်း၊ မှန်ကန်သောသတင်းအချက်အလက်နှင့်ပြည့်စုံသော ဝန်ဆောင်မှုအဆင့် အတန်းနှင့်အညီပြည့်ဝစွာပေးခြင်း၊ စားသုံးသူ၏လိုအပ်ချက်နှင့် ကိုက်ညီမှုရှိခြင်း၊ အာမခံထားသော အချိန်ကာလအတွင်း ပြီးမြောက်အောင်ဆောင်ရွက်ပေးခြင်း၊ စားသုံးသူနှင့် သဘောတူညီထားသည့် ဝန်ဆောင်မှုတန်ဖိုးအတိုင်းပေးအပ်စေခြင်းတို့ကို ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

         စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စက်သုံးဆီ တင်သွင်း၊ သိုလှောင်၊ ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ စက်သုံးဆီရည်ညွှန်းလက်ကားစျေးနှုန်းများအား နေ့စဉ်ထုတ်ပြန်ပေး လျှက်ရှိပါသည်။ စားသုံးသူရေးရာဦးစီးဌာန၊ မကွေး/ချောက်ခရိုင်အတွင်းရှိ ဝန်ထမ်းများသည် စက်သုံးဆီ ဆိုင်များအား စက်သုံးဆီ တင်သွင်း၊ သိုလှောင်၊ ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ ထုတ်ပြန်ထားသော စက်သုံးဆီ ရည်ညွှန်းစျေးနှုန်းများအတိုင်း ရောင်းချမှု ရှိ/မရှိ နေ့စဉ်စိစစ်ကြပ်မတ်လျှက်ရှိပါသည်။

              ‌‌ချောက်မြို့နယ်တာဝန်ခံ ဒေါ်ြမတ်မြတ်မိုးနှင့် ဒေါ်ချိုဝေလွင် (ဒု-ဦးစီးမှူး) တို့သည် (၉.၁၁.၂၀၂၂)ရက်နေ့ နံနက်(၀၉:၀၀)နာရီတွင် ‌ချောက်မြို့နယ် ဂွေးချိုကျေးရွာ၌ စက်သုံးဆီဆိုင် (၆)ဆိုင်အား ရှောင်တခင်ကွင်းဆင်း စစ်ဆေးခဲ့ပါသည်။ ချောက်မြို့နယ်တွင် စက်သုံးဆီဆိုင် (၁၈)ဆိုင်ရှိပြီး (၁၅)ဆိုင်မှာ ပုံမှန်ဖွင့်လှစ်ရောင်းချလျက်ရှိပါသည်။ (၉.၁၁.၂၀၂၂)ရက်နေ့တွင် ရောင်းချ နေသော စက်သုံးဆီစျေးနှုန်းများမှာ ဒီဇယ်(ရိုးရိုး) (၁)လီတာ ကျပ်(၂၆၉၀)၊ ဒီဇယ် (ပရီမီယံ) (၁)လီတာ ကျပ်(၂၇၇၀)၊ 92 (၁)လီတာ ကျပ်(၂၁၈၅)နှင့် 95 (၁)လီတာလျှင် ကျပ်(၂၃၀၀)ဖြစ်ရာ စက်သုံးဆီတင်သွင်း/ သိုလှောင်/ဖြန့်ဖြူးရေးလုပ်ငန်း ကြီးကြပ်မှုကော်မတီမှ ထုတ်ပြန်ထားသည့် ဈေးနှုန်းများအတိုင်း ဖြစ်ကြောင်းနှင့် သတ်မှတ်ထားသော အခြားစည်းကမ်းချက်များကိုလည်း လိုက်နာဆောင်ရွက်လျက်ရှိပါကြောင်းသိရှိရပါသည်။

DOCA(မကွေး)

       ဆန်ခေါက်ဆွဲသည် မြန်မာတိုင်းရင်းသားတို့နှစ်သက်စွာ စားသုံးကြသည့် အစားအစာတစ်မျိုးဖြစ်ပါသည်။ ရှေးယခင်ကပင် ဆန်ခေါက်ဆွဲကို လက်မှုပညာနှင့်ပြုလုပ်ကြပြီး တနိုင်တပိုင်ရောင်းချခဲ့ကြပါသည်။ နည်းပညာထွန်းကားလာမှုနှင့်အတူ မြန်မာ့ဆန်ခေါက်ဆွဲကို ခေတ်မီနည်းပညာ၊ ခေတ်မီ စက်ကရိယာများဖြင့် နည်းစနစ်တကျ၊ ရှေးမူမပျက်ထုတ်လုပ်လာကြပြီး ကြာရှည်အထားခံသည့် ဆန်ခေါက်ဆွဲခြောက်များ ထုတ်လုပ်လာကြပါသည်။ မြန်မာနိုင်ငံအနေဖြင့် ဂျုံခေါက်ဆွဲခြောက်နှင့် ဆန် ခေါက်ဆွဲခြောက်များကို ပြည်ပမှ တင်သွင်းနေရသည်ဖြစ်ရာ ဆန်ခေါက်ဆွဲခြောက်လုပ်ငန်းသည် သွင်းကုန်အစားထိုးလုပ်ငန်းတစ်ခုလည်း ဖြစ်ပါသည်။ ဆန်ခေါက်ဆွဲခြောက် ထုတ်လုပ်ရောင်းချမှု အခြေအနေများ၊ အခက်အခဲနှင့်စိန်ခေါ်မှုများကို သိရှိနိုင်ရန်အတွက် စားသုံးသူရေးရာဦးစီးဌာန၊ စစ်ကိုင်းတိုင်းဒေကြီးဦးစီးမှူးရုံးမှ ဒုတိယညွှန်ကြားရေးမှူး ဦးဝေဖြိုးထက်နှင့်အဖွဲ့သည် မုံရွာစက်မှုဇုန်ရှိ ရွှေလီခေါက်ဆွဲခြောက်လုပ်ငန်းရှင်ဦးဇော်ထွန်းထံသွားရောက်လေ့လာဆွေးနွေးခဲ့ရာ ရွှေလီခေါက်ဆွဲစက် ကို ၂၀၁၀ ခုနှစ်က စတင်တည်ထောင်ခဲ့တာဖြစ်ပါကြောင်း၊ စတင်ဆောင်ရွက်စဥ်ကတော့ ရင်းနှီးမြုပ်နှံမှုတန်ဖိုးအနေနဲ့ ကျပ်သိန်း၃၀ ဝန်းကျင်ပဲ ရှိခဲ့ပါကြောင်း၊ ခုချိန်မှာတော့ ခေတ်မီစက်တွေ ထပ်ဖြည့်ပြီး လုပ်ငန်းတိုးချဲ့ ဆောင်ရွက်လာတာဖြစ်တဲ့အတွက် ရင်းနှီးမြုပ်နှံမှု တန်ဖိုးအားဖြင့် ကျပ်သိန်း ၁၅၀၀ ကျော် ရှိပါကြောင်း၊ ဆန်ခေါက်ဆွဲခြောက်ထုတ်လုပ်ပါကြောင်း၊ ခေါက်ဆွဲခြောက်အကျိုးအကြေတွေ ကိုတော့ ဆန်ချောင်းကြော် အချိုနဲ့အစပ်အရသာ ထုတ်ကြောင်း၊ တစ်နှစ်ထုတ်လုပ်နိုင်မှု တန်ဖိုးအားဖြင့် ကျပ်သိန်းခြောက်ထောင်ကနေ ကျပ်သိန်းရှစ်ထောင် ဝန်းကျင်ခန့် ရှိပါကြောင်း၊ ဆန်ခေါက်ဆွဲခြောက်များကို  မုံရွာမြို့နယ်ဝန်းကျင်မှာ ရောင်းပါကြောင်း၊  ဆန်ချောင်းကြော်ကိုတော့ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ဧရာဝတီတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ် တို့မှာဖြန့်ပါကြောင်း၊ အဓိက ကုန်ကြမ်းများမှာ ဆန်လတ်(ဆန်ကွဲကြီး)နဲ့ ဆန်ဖြစ်ပါကြောင်း၊ ဒေသတွင်းမှာပင် လုံလုံ လောက်လောက် ဝယ်ယူရရှိပါကြောင်း၊ ဆန်လတ်လက်ရှိပေါက်စျေး လေးသောင်းကျပ်ဝန်းကျင် ရှိပါကြောင်း၊  ဆန်ကတော့ ငါးသောင်းကျပ်ဝန်းကျင်ရှိပါကြောင်း၊ ဆန်ချောင်းကြော်မှာသုံးတဲ့ အနံ့၊ အရသာမှုန့်ကိုတော့ အစားအသောက်နှင့်ဆေးဝါးကွပ်ကဲရေးဦးစီးဌာက ခွင့်ပြုတာတွေကိုပဲ သုံးပါကြောင်း၊ Myanmar Chemical Mark Co., Ltd. ကနေ ဝယ်ယူပါကြောင်း၊ ကျန်းမာရေးနဲ့ညီညွတ်ပြီး အာဟာရပြည့်ဝတဲ့ စားသောက်ကုန်တွေ ထုတ်လုပ်နိုင်ဖို့၊ အစားအသောက်ထုတ်လုပ်ရာမှာလည်း HACCP guideline များနဲ့ ထုတ်လုပ်ဖို့၊ စျေးကွက်ဝေစုများများရနိုင်ဖို့၊ လုပ်ငန်းရှင်၊ အလုပ်သမား၊ စားသုံးသူသုံးဦးလုံး ကောင်းကျိုးတွေကို မျှဝေခံစားရရှိနိုင်ဖို့ ရည်မှန်းချက်တွေထားပြီး ကြိုးစားဆောင်ရွက်လျှက်ရှိပါတယ်လို့ ပြောချင်ပါကြောင်း ပြောကြားခဲ့ပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ စားသုံးသူရေးရာဉီးစီးဌာန၊ မော်လိုက်မြို့နယ် ဒု-ခရိုင်ဦးစီးမှူး ဉီးကျော်ကျော်မိုးနှင့် ဝန်ထမ်းများသည် နိုဝင်ဘာလ ( ၉ ) ရက် နံနက် ( ၁၀:၀၀ ) နာရီအချိန်တွင် မော်လိုက်မြို့နယ်၊ ကျောင်းမြောက်ရပ်ကွက်ရှိ နုမ္မဒါသောက်ရေသန့် ထုတ်လုပ်ရောင်းချသည့် လုပ်ငန်းရှင် ဦးမြင့်စိုးနှင့် တွေ့ဆုံ ဆွေးနွေးခဲ့သည်။

         ရေသန့်လုပ်ငန်းရှင် ဦးမြင့်စိုးနှင့် တွေ့ဆုံဆွေးနွေးရာတွင် ဉီးကျော်ကျော်မိုး (ဒု-ခရိုင်ဉီးစီးမှူး) က စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များဖြစ်သည့် ကုန်စည် သို့မဟုတ်  ဝန်ဆောင်မှု၏ အာမခံချက်၊ သတ်မှတ်ချက်များနှင့် စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊ စီးပွားရေးလုပ်ကိုင်ရာတွင် စီးပွားရေးလုပ်ငန်းရှင်များ၏ကျင့်ဝတ်၊ စည်းကမ်းချက်များနှင့်အညီ ဖြောင့်မတ်မှန်ကန်စွာ လုပ်ကိုင်ဆောင်ရွက်ခြင်း၊ မိမိတို့လုပ်ငန်း လုပ်ဆောင်မှုနှင့် ပတ်သက်၍ သက်ဆိုင်ရာဌာနများ၏ လုပ်ငန်းသုံးလိုင်စင်များ ပြည့်စုံမှုရှိ/မရှိ၊ သောက်ရေသန့်ဗူးပေါ်တွင် မြန်မာဘာသာကုန်အညွှန်းအမှတ်အသားများ ပြည့်စုံစွာ  ရေးသားဖော်ပြထားရှိမှုများရှိ/မရှိ စားသုံးသူများ ဝယ်ယူသောက်သုံးရာတွင် ဘေးဥပါဒ်အန္တရာယ် ကင်းရှင်းစွာ  ထုတ်လုပ်ရောင်းချနေမှု လုပ်ငန်းစဉ်များနှင့် သက်ဆိုင်သည့် အချက်အလက်များအား ဆွေးနွေးပြောကြားခဲ့ပါသည်။ နုမ္မဒါသောက်ရေသန့်လုပ်ငန်းရှင်ဦးမြင့်စိုးမှ အထက်ပါ ဆွေးနွေးချက်များအား သိရှိလိုက်နာဆောင်ရွက်သွားမည်ဖြစ်ပါကြောင်း သိရှိရပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကလေးခရိုင်ဦးစီးမှူး  ဦးဆောင်၍ ( ၁၀.၁၁.၂၀၂၂ ) ရက်နေ့တွင်   ခရိုင် အစားအသောက်နှင့်ဆေးဝါးကွပ်ကဲရေးဦးစီးဌာနတာဝန်ရှိသူများ၊ ဆရာ/ဆရာမများ ပူးပေါင်း၍ ကလေးမြို့၊ အောင်မြေမာန်ရပ်ကွက်ရှိ အထက ( ၁ ) ကျောင်းဝင်း အတွင်းရောင်းချနေသည့် ကျောင်းမုန့်ဈေးတန်းအား သွားရောက်စစ်ဆေးခဲ့ကြပါသည်။

         ထိုသို့စစ်ဆေးရာ ကျောင်းမုန့်ဈေးတန်း၌ ရောင်းချနေသောမုန့်များတွင် ကုန်ညွှန်းအမှတ် အသားများ ပြည့်စုံစွာပါဝင်ခြင်း ရှိ/ မရှိ၊ သက်ဆိုင်ရာဌာနများမှ ထုတ်ပြန်ထားသော စားသုံးရန်မသင့် အစားအသောက်များ ရောင်းချခြင်း ရှိ/မရှိ စစ်ဆေးခဲ့ပါသည်။

       ထို့နောက် ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာနမှ ဓါတ်ခွဲစစ်ဆေးခဲ့သော အစားအသောက်နမူနာများအနက်မှ စားသုံးရန်မသင့်ဟု ထုတ်ပြန်ထားသော စားသုံးရန်မသင့် အစားအသောက်များနှင့်ပတ်သက်၍ နမူနာပုံစံများနှင့်အတူ ရှင်းလင်းပြောကြားခဲ့ပြီး ရောင်းချရန် မသင့်သည့် အစားအသောက်များအား ဝယ်ယူရောင်းချခြင်းမပြုလုပ်ကြရန် ဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)