သတင်းနှင့် လှုပ်ရှားမှုများ

       ၂၀၂ဝ ပြည့်နှစ်၊ ဇန်နဝါရီလ(၂၁) ရက်နေ့၊ နံနက်(၉:၃၀)နာရီအချိန်တွင် မြိတ်မြို့၊ စားသုံးသူရေးရာဦးစီးဌာနမှ ဝန်ထမ်းများနှင့် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဝန်ထမ်းများ ပူးပေါင်း၍ မြိတ်မြို့၊ ကျွန်းစု မြို့နယ်၊ ပထက်ကမ်း အခြေခံပညာအထက်တန်းကျောင်း၌ စားသုံးသူကာကွယ်ရေးဆိုင်ရာအသိပညာပေးဟောပြောခြင်းနှင့် ကျောင်းမုန့်စျေးတန်း ကွင်းဆင်း စစ်ဆေးခြင်း ဆောင်ရွက်ခဲ့ကြပါသည်။

     အသိပညာပေးဟောပြောရာတွင် အခြေခံပညာအထက်တန်းကျောင်း ကျောင်းအုပ် ဆရာမကြီး မှ အဖွင့်အမှာစကားပြောကြားခြင်း၊ စားသုံးသူရေးရာဦးစီးဌာန၊ ခရိုင်ဦးစီးမှူးမှ ဌာနစတင်ဖြစ်ပေါ်လာပုံ၊ ဌာန၏ ရည်ရွယ်ချက်၊ ဌာနမှဆောင်ရွက်ပေးလျက်ရှိသော လုပ်ငန်းများ (ဟောပြော၊ ကွင်းဆင်း၊ တိုင်ကြားမှုများလက်ခံဖြေရှင်းပေးနေကြောင်း) တိုင်ကြားရာတွင် အစားအသောက် သာမက ကုန်စည် နှင့် ဝန်ဆောင်မှု ပါဝင်ကြောင်း၊ ရှင်းလင်းခြင်း၊ အစားသောက်နှင့် ဆေးဝါးကွပ်ကဲရေးဦးစီးဌာနမှ တာဝန်ရှိသူတစ်ဦး က စားသုံးရန်မသင့်သော ဓါတုဆိုးဆေးများ အကြောင်း၊ ဓါတုတာရှည်ခံဆေးများ အကြောင်း နှင့် အစားအစာချက်ပြုတ်ရာတွင် လိုအပ်သော အချက်များအကြာင်းရှင်းလင်းခြင်း၊  စားသုံးသူရေးရာဦးစီးဌာနမှ တာဝန်ရှိသူများက ပိုးသတ်ဆေး ပါဝင်နေသောဟင်းသီးဟင်းရွက်၊ သစ်သီးဝလံများအကြောင်း၊ ယင်မနားဆေးအကြောင်း၊အစားအစာ မစားသောက်မှီသိရှိရမည့် အချက် များနှင့် ရှောင်ရန် အချက်များအား ရှင်းလင်းခြင်း၊ ပလပ်စတစ်နှင့် ဖော့ဘူးများ အကြောင်း၊ အခြားနိုင်ငံများတွင်ပလပ်စတစ် အား အစားထိုးသုံးစွဲ နေပုံအကြောင်းကို ရှင်းလင်းခြင်းနှင့် အစားသောက်နှင့် ဆေးဝါးကွပ်ကဲ ရေးဦးစီးဌာနမှ တာဝန်ရှိသူမှ ဆေးဝါးများအကြောင်း အသေးစိတ် ရှင်းလင်း ပြောကြားခဲ့ပါသည်။

      ထိုနောက်ကျောင်းသား၊ ကျောင်းသူများ ဘေးအန္တရာယ်ကင်းရှင်းစွာစားသောက်နိုင်ရန် အလို့ငှာ ကျောင်းနှင့် ကျောင်းပတ်ဝန်းကျင် တွင် ရောင်းချနေသော မုန့်စျေးဆိုင်များအား ခွင့်မပြုတာရှည်ခံဆေး၊ ခွင့်မပြုဓါတုဆိုးဆေး၊ ကျန်မာရေးနှင့်မညီသော အစားသောက်များ ရောင်းချနေခြင်းရှိ/မရှိ ကွင်းဆင်းစစ်ဆေးခဲ့ပါသည်။

ကျော်ဝင်းနိုင်(မြိတ်)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ဒုတိယညွှန်ကြားရေးမှူးချုပ် ဦးမြင့်ချို ဦးဆောင်သောအဖွဲ့သည် Embasssy of Japan မှ Counsellor ဖြစ်သူ Mr. TAKIMI Kazuyuki ဦးဆောင်သော Myanmar Japan Joint Initiative Business Environment Working Group တာဝန်ရှိသူများအား (၂၈.၁.၂၀၂၀) နေ့တွင် စားသုံးသူရေးရာဦးစီးဌာန၊ ရုံးချုပ် အစည်းအဝေးခန်းမ၌ လက်ခံတွေ့ဆုံပါသည်။

              လက်ခံတွေ့ဆုံရာတွင် ဒုတိယညွှန်ကြားရေးမှူးချုပ် ဦးမြင့်ချိုက စားသုံးသူရေးရာဦးစီးဌာန ၏ ဖွဲ့စည်းပုံနှင့် လုပ်ငန်းဆောင်ရွက်နေမှု အခြေအနေများအား မိတ်ဆက်ရှင်းလင်း ဆွေးနွေးပါသည်။ ထို့နောက် ထုတ်ကုန်လုံခြုံစိတ်ချရမှုဌာနခွဲ ညွှန်ကြားရေးမှူး ဦးရဲထွဋ်နိုင်က စားသုံးသူကာကွယ်ရေးဥပေဒေ (၂၀၁၉) အခန်း (၁၈) အရ ကုန်စည်များတွင် ကုန်အညွှန်းအမှတ်အသားဖော်ပြခြင်းနှင့် ပတ်သက်၍လည်းကောင်း၊ စားသုံးသူရေးရာဌာနခွဲ ညွှန်ကြားရေးမှူး ဦးဆွေတင့်ကြူးက စားသုံးသူရေးရာဦးစီးဌာန၊ တိုင်းဒေသကြီး/ပြည်နယ် ဦးစီးမှူးရုံးများနှင့် ခရိုင်ဦးစီးမှူးရုံးများတွင် ဖွင့်လှစ်ထားသည့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ(CICC)များ နှင့်ပတ်သက်၍ စင်တာများဖွင့်လှစ်ဆောင်ရွက်ရခြင်း ရည်ရွယ်ချက်များ၊ စင်တာများက လုပ်ငန်းဆောင်ရွက်နေမှုအခြေအနေများနှင့်ပတ်သက်၍ လည်းကောင်း၊ သတင်းအချက်အလက်နည်းပညာနှင့်အရည်အသွေးစီမံခန့်ခွဲရေးဌာနခွဲ ညွှန်ကြားရေးမှူး ဦးမြင့်ဝေက အိမ်သုံးလျှပ်စစ်နှင့် အီလက်ထရောနစ်ပစ္စည်းများနှင့်ပတ်သက်၍ စားသုံးသူကာကွယ်ရေး(ဘေးအန္တရာယ်လုံခြုံစိတ်ချရမှုလိုအပ်ချက်)ဆိုင်ရာ စည်းမျဉ်းများ ထုတ်ပြန်နိုင်ရေး လုပ်ငန်းဆောင်ရွက်မှုအခြေနေများနှင့်ပတ်သက်၍လည်းကောင်း အသီးသီး ရှင်းလင်းဆွေးနွေးခဲ့ပါသည်။

              Myanmar Japan Joint Initiative Business Environment Working Group တာဝန်ရှိသူများက ၄င်းတို့သိရှိလိုသည်များကို ပြန်လည်မေးမြန်းဆွေးနွေးခဲ့ကြပြီး စားသုံးသူ ရေးရာဦးစီးဌာနက ရှေ့ဆက်ဆောင်ရွက်မည့် လုပ်ငန်းများနှင့်ပတ်သက်၍ ၄င်းတို့အပိုင်းမှ ပေါင်းစပ်ပါဝင်ဆောင်ရွက်နိုင်မည့် အခြေအနေများနှင့်ပတ်သက်ပြီး တင်ပြဆွေးနွေးခဲ့ကြောင်း သတင်းရရှိပါသည်။

         စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ တာဝန်ရှိသူများ ဦးဆောင်၍ ရွှေညောင်မြို့ပေါ်ရှိ ကုန်စုံဆိုင်များနှင့် ရွှေညောင်ဈေးအတွင်းရှိ ကုန်စုံဆိုင်များအား ၁၉-၁၂-၂၀၁၉ နှင့် ၁၀-၁-၂၀၂၀ ရက်နေ့များတွင် ကွင်းဆင်းစစ်ဆေးခဲ့ပါသည်။ ယင်းသို့ကွင်းဆင်း စစ်ဆေးရာမှ ကုန်အမှတ်တံဆိပ်တွင် ဖော်ပြရန်ပြဌာန်းချက်နှင့်ကိုက်ညီမှုမရှိသော စားသောက် ကုန်ပစ္စည်းများ ထုတ်လုပ်သည့် လုပ်ငန်းရှင်များအား (၂၁-၁-၂၀၂၀) ရက်နေ့၊( အင်္ဂါ ) နေ့၊ နံနက်(၁၀:၀၀) နာရီအချိန်တွင် ရှမ်းပြည်နယ်စားသုံးသူရေးရာဦးစီးမှူးရုံးရှိ CICCရုံးခန်းမှာ လုပ်ငန်းရှင်များနှင့်တွေ့ဆုံ၍ ကုန်အညွှန်းအမှတ်အားတံဆိပ်တွင်ဖော်ပြနိုင်ရန်အတွက် ၂၀၁၉ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းများအား ရှင်းလင်းဆွေးနွေးခဲ့ပါတယ်။ အမှတ်တံဆိပ်တွင် ကုန်အညွှန်းအမှတ်အသားများအား သတ်မှတ်ချက်များနှင့်အညီ ပြုလုပ်အသုံးပြုစေပြီး၊ မသေချာမရှင်းလင်းပါက စားသုံးသူရေးရာဦးစီးဌာနသို့ လာရောက်ဆွေးနွေးနိုင်ကြောင်းသတင်းရရှိပါသည်။

          ၂၀၂၀ ပြည့်နှစ် ဇန်နဝါရီလ (၁၆) ရက်နေ့ (၁၂:၀၀)နာရီအချိန်တွင် မကွေးမြို့၊ ကုန်သည်များနှင့် စက်မှုလက်မှုလုပ်ငန်းရှင်များအသင်း၊ မကွေးကုန်စည်ဒိုင်ခန်းမ၌ ကျင်းပပြုလုပ်သည့် မကွေးတိုင်းဒေသကြီး ဆီစက်ပိုင်ရှင်များအသင်း ပြန်လည်ဖွဲ့စည်းခြင်းနှင့် အလုပ်အမှုဆောင်အဖွဲ့ ပြန်လည်ရွေးချယ် တင်မြှောက်ပွဲ အခမ်းအနားသို့ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးနှင့် ဝန်ထမ်းများတက်ရောက်ခဲ့ပါသည်။

               အဆိုပါ အခမ်းအနားတွင် ဒုတိယပိုင်းအစီအစဉ်တွင် စားသုံးသူရေးရာဦးစီးဌာန၊ မကွေးတိုင်းဒေသကြီး ဦးစီးမှူးက တက်ရောက်လာသည့် ဆီစက်ပိုင်ရှင်များအား စားသုံးသူကာကွယ်ရေးဥပဒေ (၂၀၁၉) ပါ စီးပွားရေးလုပ်ငန်းရှင်များ၏ တာဝန်များ၊ လိုက်နာဆောင်ရွက်ရမည့် ပြဌာန်းချက်များနှင့် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြင်ဆင်ဆောင်ရွက်သွားရမည့် အချက်များအား အကျယ်တဝင့်ရှင်းလင်းဆွေးနွေးခဲ့ပါသည်။

ဝင်းထွန်း
ဒု-ဦးစီးမှူး

   စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများသည် ၁၇.၁.၂၀၂၀ ရက်နေ့၊ (၁၃:၀၀) နာရီအချိန်တွင် အင်းစိန်မြို့နယ်ရှိ မြန်မာနိုင်ငံမွေးမြူရေး လုပ်ငန်းအဖွဲ့နှင့် တိရိစ္ဆာန်ဆေးဝါး၊ လုပ်ငန်းသုံးပစ္စည်းကိရိယာထုတ်လုပ်ရောင်းချသူများအသင်း၌ စားသုံးသူကာကွယ်ရေးအသိပညာပေးဟောပြောဆွေးနွေးပွဲ ကျင်းပပြုလုပ်ခဲ့ရာ အသင်းမှ တာဝန်ရှိသူများ၊ အသင်းဝင်များနှင့် လုပ်ငန်းရှင်များ (၄၀)ဦးခန့် တက်ရောက်ခဲ့ပါသည်။

          အဆိုပါ ဟောပြောပွဲတွင် စားသုံးသူကာကွယ်ရေး ဥပဒေအခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့် ပတ်သက်၍ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံ နည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး (သို့မဟုတ်) ဓါတ်မတည့်ကြောင်း ဖော်ပြချက်နှင့် သတိပေးချက်များအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြချက်ပါရှိရမည် ဖြစ်ကြောင်းနှင့် ကုန်အညွှန်းအမှတ်အသားနှင့်ပတ်သက်၍ သိကောင်းစရာများ၊ ပြစ်မှုပြစ်ဒဏ်များအား အသေးစိတ် ရှင်းလင်းပြောကြားဆွေးနွေးခဲ့ပြီး အသင်းမှ တာဝန်ရှိသူများ၊ လုပ်ငန်းရှင်များမှလည်း ၎င်းတို့ သိရှိလိုသည့်ကိစ္စများအား ပြန်လည်မေးမြန်းဆွေးနွေး ခဲ့ကြောင်း သိရှိရပါသည်။

(နှင်းနွယ်)

YGN, DOCA