သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးအောင်တင်စိုး၊ ခရိုင်ဦးစီးမှူးပါ (၃)ဦး၊ ဘုရင့်နောင်ဈေးစည်ပင်ဌာနမှ ဦးမင်းထူး(ပုံသေ)၊ မြန်မာနိုင်ငံဆန်စပါးအသင်းချုပ်မှ ဦးညီညီပိုင်ထက်(အလုပ်အမှုဆောင်)တို့ပူးပေါင်းပါဝင်လျက် ၉.၅.၂၀၂၄ ရက်နေ့၊ နံနက် (၁၀:၅၀)နာရီအချိန်မှစ၍ ဘုရင့်နောင်ဈေးကြီးအတွင်းရှိ ဆန်ဆိုင်များ၊ ဆန်သိုလှောင်ရုံများသို့သွားရောက်ကာ ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

          ထိုသို့ဆောင်ရွက်ရခြင်းမှာ ဆန်အပါအဝင် အခြေခံစားသောက်ကုန်ပစ္စည်းများပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေးနှင့် ဈေးနှုန်းများတည်ငြိမ်စေရေးအတွက် ကြပ်မတ် ဆောင်ရွက်စေရန်အတွက် ဆန်ဆိုင်များအနေဖြင့် ဈေးနှုန်းမြှင့်တင်ရောင်းချခြင်း၊ သိုလှောင်ခြင်း၊ ဖြန့်ဖြူးရောင်းချခြင်းရှိ/မရှိ ဘုရင့်နောင်ဈေးကြီးအတွင်းရှိ ဆန်သိုလှောင်ရုံနှင့်ဆန်ဆိုင်ကြီးများဖြစ်သော သီရိပွဲရုံ၊ ချမ်းသာအောင်ပွဲရုံ၊ ငွေပဒေသာဆန်ဆိုင်၊ ဦးဝင်းနိုင်ဆန်ဆိုင်၊ ကမ္ဘာကျော်ပွဲရုံနှင့် အောင်မြတ်ကျော်ပွဲရုံတို့ကို ကွင်းဆင်းစစ်ဆေးခဲ့ကြောင်းသိပါသည်။

DOCA(ရန်ကုန်)

    မွန်ပြည်နယ်၊ ကျိုက်မရောမြို့နယ်အတွင်း ဆန်များ ဈေးနှုန်းမြှင့်တင်ရောင်းချမှုမရှိရေးနှင့် ဈေးနှုန်းတည်ငြိမ်ရေးအတွက် စားသုံးသူရေးရာဦးစီးဌာနနှင့် ပူးပေါင်းအဖွဲ့တို့မှ ၁၀.၅.၂၀၂၄ ရက်နေ့တွင် မြို့နယ်အတွင်းရှိ ဆန်ဂို‌ဒေါင်များ၊ ဆန်အရောင်းများအား လိုက်လံကွင်းဆင်းစစ်‌ဆေးခဲ့ကြောင်း သိရှိရပါသည်။

     လိုက်လံစစ်ဆေးရာတွင် ကျိုက်မရောမြို့နယ် စားသုံးသူရေးရာဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများပူးပေါင်းကာ ကျိုက်မရောမြို့မဈေးရှိ ဒေါ်ဇင်မာဆန်ဆိုင်၊ ဒေါ်မိုးမိုးကြည်ဆန်ဆိုင်နှင့် မဖြူဖြူအေးဆန်ဆိုင်တို့သို့ သွားရောက်ကာ ဆန်အမျိုးအစားအလိုက် ဈေးနှုန်းမြှင့်တင် ရောင်းချခြင်းအလို့ငှာ သို‌လှောင်ထားခြင်း ရှိ/မရှိ ကိုလိုက်လံစစ်ဆေးရာ သိုလှောင်ထားရှိခြင်းမရှိကြောင်း တွေ့ရှိရပြီး ဈေးနှုန်းမြှင့်တင် ရောင်းချမှုမပြုကြရေး အသိပညာပေး ဆောင်ရွက်ခဲ့ကြကြောင်း သိရသည်။

DOCA(မွန်)

    မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့နယ်တာဝန်ခံသည် ၁၀.၅.၂၀၂၄ ရက်နေ့တွင် ကျိုက်မရောမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ကျိုက်မရောမြို့နယ် စားသုံးသူရေးရာဦးစီးဌာနတို့ပူးပေါင်း၍ “အွန်လိုင်းစနစ်ဖြင့် ရောင်းချခြင်း လုပ်ငန်းမှတ်ပုံတင်ခြင်းဆိုင်ရာ အသိပညာပေး” Talk Show ဆွေးနွေးပွဲကို ကျင်းပပြုလုပ်ခဲ့ကြောင်း သိရှိရသည်။

   အဆိုပါ ဆွေးနွေးပွဲတွင် ကျိုက်မရောမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ချိုမြတ်မြတ်ထွေးမှ Talk Show အစီအစဉ်ကျင်းပရခြင်း၏ ရည်ရွယ်ချက်ကို ရှင်းလင်းပြောကြားခဲ့ပြီး စားသုံးသူရေးရာဦးစီးဌာန ကျိုက်မရောမြို့နယ် တာဝန်ခံမှ အွန်လိုင်းစနစ်ဖြင့်ရောင်းချခြင်း၊ အွန်လိုင်းမှတ်ပုံတင်ခြင်းနှင့် ပတ်သက်သည့် လိုအပ်သော စာရွက်စာတမ်းများပြင်ဆင်ပုံ အဆင့်ဆင့်ကို အကျယ်တဝင့်ဆွေးနွေးခဲ့ကြောင်း သိရှိရပါသည်။

DOCA(မွန်)

       စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ချောင်းဦးမြို့နယ်တာဝန်ခံသည် စားသုံးသူကာကွယ်ပေးရေး၊ အသိပညာများတိုးပွားရရှိစေရေး အသိပညာပေးဟောပြောပွဲအခမ်းအနားကို ၂၀၂၄ခုနှစ်၊ မေလ ၉ရက်နေ့၊ နံနက် (၁၀:၀၀) နာရီအချိန်တွင်ပြုလုပ်ခဲ့ရာ မုံရွာမြို့၊ အ.ထ.က -၂ တွင်ကျင်းပပြုလုပ်သည့် အလယ်အလတ်အဆင့် မွန်းမံသင်တန်း၌ တက်ရာက်လျက်ရှိသော ဆရာ/ ဆရာမစုစုပေါင်း (၁၀၅) ဦးတက်ရောက်ခဲ့ကြကြောင်းသိရှိရပါသည်။

       အခမ်းအနားတွင် စားသုံးသူရေးရာဦးစီးဌာန၊ ချောင်းဦးမြို့နယ်တာဝန်ခံက သင်တန်းသူများ အသိပညာများတိုးပွားရရှိစေရေးအတွက် အသိပညာပေးဟောပြောပွဲများဆောင်ရွက်ရခြင်းနှင့် ပတ်သက်၍ မိမိတို့ဝန်ကြီးဌာန၊ ဦးစီးဌာန၏ လုပ်ငန်းဆောင်ရွက်ချက်များကို မိတ်ဆက်စကားပြောကြားခဲ့ပြီး စားသုံးသူများရသင့်ရထိုက်သော အခွင့်အရေးများ၊ လိုက်နာရမည့်တာဝန်များ၊ စီးပွားရေးလုပ်ငန်းရှင်များလိုက်နာရမည့်တာဝန်များ၊ ကုန်စည်/ဝန်ဆောင်မှုများနှင့်ပတ်သက်၍ တောင်းဆိုနိုင်သည့်အခွင့်အရေးများ၊ အာမခံပေးရမည့်အချက်များ၊ ကုန်စည်များကို ထုတ်လုပ်ရောင်းချရာတွင် ကုန်အညွှန်းအမှတ်အသားပြည့်စုံစွာထည့်သွင်းဖော်ပြကြရန်နှင့် စားသုံးသူများကလည်း ဝယ်ယူသုံးစွဲရာတွင်   ကုန်အညွှန်းအမှတ်အသားကို အလေးထားကြည့်ရှုပြီး ပြည့်စုံမှန်ကန်မှသာဝယ်ယူကြရန် စသည့်အကြောင်းအရာများ၊ နစ်နာဆုံးရှုံးမှုများဖြစ်ပေါ်လာပါက တိုင်ကြားရမည့်နည်းလမ်းများနှင့် တိုင်ကြားမှုများအပေါ် ဌာန၏ ဖြေရှင်းဆောင်ရွက်ခဲ့သည့် အမှုတွဲများအကြောင်း ဟောပြောဆွေးနွေးခဲ့မှုကိုသိရှိရပါသည်။

DOCA(စစ်ကိုင်း)

     ဧရာဝတီတိုင်းဒေကြီး၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးရုံးမှ ဒုတိုင်းဦးစီးမှူး ဦးထွန်းထွန်း၊ ဌာနခွဲမှူးနှင့် ဝန်ထမ်းများသည် မေလ ၁၁ ရက်နေ့ နံနက်ပိုင်း ပုသိမ်မြို့ပေါ်ရှိ စားသောက်ကုန်၊ လူသုံးကုန်စည်နှင့် အလှကုန်ပစ္စည်းမျိုးစုံရောင်းချလျက်ရှိသော Z-Mall Mini Mart သို့ သွားရောက်၍ ထုတ်ကုန်လုံခြုံစိတ်ချရမှုရှိစေရေး ကွင်းဆင်းစစ်ဆေးခဲ့ပါသည်၊၊

    ထိုသို့ ကွင်းဆင်းစစ်ဆေးခဲ့ရာတွင် Z-Mall Mini Mart ဆိုင်ပိုင်ရှင်/တာဝန်ခံတို့အား ကုန်အညွှန်းအမှတ်သားဖော်ပြခြင်းနှင့် စပ်လျဉ်း၍ ပြည့်စုံမှန်ကန်စွာ ဖော်ပြနိုင်ရေး အများပြည်သူစားသုံးရန် မသင့်သောအစားအသောက်များ ရောင်းချခြင်းမပြုရန်နှင့် သတ်မှတ်ချက်နှင့်ညီသော ကုန်ပစ္စည်းများ ဖြန့်ဖြူး ရောင်းချရန် တားမြစ်ကုန်ပစ္စည်းများ ၊ သက်တမ်းလွန်ပစ္စည်းများ၊ အချက်အလက် မပြည့်စုံသော ကုန်ပစ္စည်းများ ရောင်းချခြင်းမပြုရန် သက်ဆိုင်ရာဌာနများမှတရားဝင်သတ်မှတ်ထားသော အလှကုန်နှင့် ဆေးပစ္စည်းများ သက်တမ်းလွန်ပစ္စည်းများ ရောင်းချခြင်းမပြုရန် စားသုံးသူကာကွယ်ရေး ဥပဒေအခန်း(၁၈)ပုဒ်မ (၄၁) အရ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည်အမျိုး အစားအလိုက် သတ်မှတ်ချက်များနှင့်အညီ ရောင်းချရေး ကွင်းဆင်းအသိပညာပေး ဆောင်ရွက်ခဲ့ပါသည်၊၊

DOCA(ဧရာဝတီ)