သတင်းနှင့် လှုပ်ရှားမှုများ

       ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊ မြန်အောင်ခရိုင်၊ အင်္ဂပူမြို့နယ်တာဝန်ခံသည် (၂၄.၁၀.၂၀၂၂)ရက်နေ့ ‌နေ့လယ် (၁၃:၃၀) အချိန်တွင် နောက်မီးကျေးရွာအုပ်စုရှိ အ-ထ-က ကျောင်းတွင် ကျောင်းသား၊ ကျောင်းသူများ၊ ဆရာ၊ ဆရာမများနှင့် ကျောင်းမုန့်ဈေးတန်းရှိ ဈေးဆိုင်ပိုင်ရှင်များ (၃၃၂)ဦးအား စားသုံးသူကာကွယ်ရေး အသိပညာပေးဟောပြော ဆောင်ရွက်ခဲ့ပါသည်။

        ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးဘိုဘိုမှ စားသုံးသူကာကွယ်ရေး ဥပဒေကို ၂၀၁၉ခုနှစ် မတ်လ(၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူအခွင့်အရေးနှင့်တာဝန်များအကြောင်း၊ အခန်း(၁၃) ပါ ဝန်ဆောင်မှုနှင့် စပ်လျဉ်း၍ အာမခံချက်ပေးခြင်းများအကြောင်း၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းအကြောင်း၊ စားသုံးသူဆိုသည်မှာ ကုန်စည်သို့မဟုတ် ဝန်ဆောင်မှုကို ကုန်သွယ်ရောင်းချခြင်းပြုရန် သို့မဟုတ် အသက်မွေးဝမ်းကျောင်းပြုရန် မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်းနှင့် ကျောင်းသား၊ ကျောင်းသူများအားအသင့်စားမုန့်အမျိုးမျိုးတို့ကို ဝယ်ယူစားသုံးရာတွင် ထုတ်လုပ်သည့် ရက်စွဲနှင့် သက်တမ်းကုန်ဆုံးသည့်ရက်စွဲများ အဓိကဖက်ရှု့ရမည်ဖြစ်ကြောင်း၊ ကျောင်းမုန့်ဈေးတန်း အတွင်းရောင်းချနေသော မုန့်ဆိုင်ပိုင်ရှင်များအနေဖြင့်လည်း မိမိတို့ရောင်းချနေသော အသင့်စားမုန့်များအား စားသုံးသူတို့အတွက်ဘေးအန္တရာယ်မဖြစ်စေရေးကို ဦးစားပေးသင့်ကြောင်းနှင့် စီးပွားရေးလုပ်ငန်းရှင်၏တာဝန်များအကြောင်း စသည်တို့ကို အသိပညာပေးဟောပြောခဲ့ပြီး စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်း သိရှိရပါသည်။

DOCA(ဧရာဝတီ)

         မွန်ပြည်နယ်၊ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံနှင့် ဝန်ထမ်းများသည် ၂၆.၁၀.၂၀၂၂ ရက်နေ့တွင် မုဒုံမြို့နယ်၊ အ.လ.က (သင်္ဘောဦး) ကျောင်း၌ စားသုံးသူကာကွယ်ရေး အသိပညာပေးဟောပြော ဆွေးနွေးခြင်း ကျင်းပပြုလုပ်ခဲ့ပါသည်။

        အဆိုပါဟောပြောပွဲတွင် အ.လ.က (သင်္ဘောဦး) ကျောင်းမှ ကျောင်းအုပ်ဆရာမကြီး ဒေါ်ယဉ်မင်းဆန်းမှ အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန၊ မုဒုံမြို့နယ် တာဝန်ခံ ဦးစိုးဝင်းက စားသုံးသူအခွင့်အရေးနှင့်တာဝန်များ၊ ကုန်စည်များဝယ်ယူရာတွင် ကုန်အညွှန်းအမှတ်အသားကို အဓိကထားဖတ်ရှု့သင့်ကြောင်း၊ ကုန်စည်/ဝန်ဆောင်မှုများ ရွေးချယ်ဝယ်ယူရာတွင် သတင်းအချက်အလက်များကို သေချာစွာစုံစမ်းရန်၊ ကုန်စည်/ဝန်ဆောင်မှု များကိုဝယ်ယူသုံးစွဲခြင်းကြောင့် စားသုံးသူထိခိုက်နစ်နာမှုပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့် အကြောင်းအရာများ၊ Consumer Call Center သို့ဖုန်းခေါ်ဆို၍လည်း တိုင်ကြားနိုင်ကြောင်း ဟောပြောဆွေးနွေးခဲ့ပါသည်။

       အဆိုပါဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၁၅၂) ဦး တက်ရောက်ခဲ့ကြောင်း သိရှိရပါသည်။

DOCA(မွန်)

      ရှမ်းပြည်နယ်(အရှေ့ပိုင်း) ၊ကျိုင်းတုံစားသုံးသူရေးရာ ဦးစီးဌာန၊ တာချီလိတ်ခရိုင် ဦးစီးမှူးရုံးမှ ဝန်ထမ်းများသည် ၂၀၂၂ခုနှစ်၊ အောက်တိုဘာလ(၂၆)ရက်နေ့၊ နံနက်(၁၀:၀၀)နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ ဝန်ထမ်းများနှင့် ပူးပေါင်း၍ တာချီလိတ်မြို့နယ်၊ ဖန်မင်ကျေးရွာအုပ်စု အတွင်းရှိ ဆေးဝါးပစ္စည်းအရောင်း ဆိုင်(၇)ဆိုင်အား ဆေးနှင့်ဆေးပစ္စည်းများ ပြတ်လပ်မှုမရှိစေရေးနှင့် ဈေးနှုန်းမြှင့်တင်ရောင်းချမှု ရှိ/မရှိ ဈေးကွက်စောင့်ကြည့်စစ်ဆေးခြင်း လုပ်ငန်းများ ဆောင်ရွက်ခဲ့ပါသည်။

    ထိုသို့ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် တာချီလိတ်မြို့နယ်အတွင်းရှိ ဆေးဆိုင်များတွင် ဆေးနှင့်ဆေးပစ္စည်းများပြတ်လပ်ခြင်းမရှိသည်ကို စစ်ဆေးတွေ့ရှိရပြီး ဈေးနှုန်း အနေနှင့် နိုင်ငံခြားငွေလဲလည်နှုန်းကြောင့် အနည်းငယ်မြှင့်တက်လာသည်ကို စစ်ဆေးတွေ့ရှိရပါ သည်။  စစ်ဆေးရေးမှူးနှင့်တာဝန်ရှိသူများသည် ဆေးဆိုင်ပိုင်ရှင်များအား သက်တမ်းလွန်ဆေးဝါး များနှင့် သက်ဆိုင်ရာဌာနများမှတားမြစ်ထားသော ဆေးပစ္စည်းများကို ဈေးကွက်အတွင်း ရောင်းချ ခြင်းမပြုရန်၊ ထုတ်လုပ်သည့်နိုင်ငံ၊ ထုတ်လုပ်/တင်သွင်းသည့်ကုမ္ပဏီ ဆေးဝါးမှတ်ပုံတင်အမှတ်၊ Import Resg-istration No.(IR) များဖော်ပြထားသော ဆေးနှင့်ဆေးပစ္စည်းများကိုသာ ရောင်းချရန်၊ စားသုံးသူကာကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏တာဝန်များ” ကို သိရှိလိုက်နာ ဆောင်ရွက်စေရန် အသိပညာပေးဆွေးနွေးခြင်းများ ဆောင်ရွက်ခဲ့ပါသည်။

 DOCA(ရှမ်း)

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ဒု-တိုင်းဒေသကြီးဦးစီးမှူးဦးဆောင်၍ တိုင်းဒေသကြီးဦးစီးမှူးရုံးမှ ဝန်ထမ်းများသည်  (၂၆.၁၀.၂၀၂၂)ရက်နေ့၊ နံနက် (၁၁:၀၀)နာရီ အချိန် မုံရွာမြို့နယ်၊ အလုံမြို့၊ အမှတ် (၂) အခြေခံပညာအထက်တန်းကျောင်းတွင် စားသုံးသူ ကာကွယ်ရေး အသိပညာပေးဟောပြောပွဲ ကျင်းပခဲ့ကြောင်း သိရသည်။

          အသိပညာပေးဟောပြောပွဲ၌ ဒု-တိုင်းဒေသကြီးဦးစီးမှူး၊ ဒုတိယ ညွှန်ကြားရေးမှူးက ဌာန၏လုပ်ငန်းဆောင်ရွက်မှု စားသုံးသူကာကွယ်ရေးဥပဒေပါ ကုန်အညွှန်းအမှတ်သားဆိုင်ရာ အချက်အလက်များကို အကျယ်တဝင့် ရှင်းလင်းဆွေးနွေးခြင်း၊ တိုင်းဒေသကြီးဦးစီးမှူးရုံး  စားသုံးသူ ရေးရာဌာနခွဲတာဝန်ခံ ဒေါ်ခိုင်မို့မို့(ဦးစီးအရာရှိ)က စားသုံးသူ ကာကွယ်ရေးဥပဒေပါ စားသုံးသူ အခွင့်အရေး (၈)ချက်အကြောင်း၊ စားသုံးသူများ နစ်နာမှုရှိပါက ဆက်သွယ်တိုင်ကြား နိုင်သည့် နည်းလမ်းများအကြောင်း၊ ဆွေးနွေးဟောပြောခြင်းများ ဆောင်ရွက်ပြီး ဌာန၏ပညာပေး လက်ကမ်းစာဆောင်များဖြန့်ဝေခြင်း၊ အစားအသောက်နှင့် ပတ်သက်၍ စားသုံးရန်မသင့် ကြေငြာထားသော ဗီနိုင်းပိုစတာကို ချိတ်ဆွဲနိုင်ရန်အတွက် ကျောင်းတာဝန်ခံ ဆရာမအား ပေးအပ်ခဲ့ကြောင်းသိရသည်။ အဆိုပါအခမ်းအနား၌ အမှတ် ( ၂ ) အခြေခံပညာအထက်တန်း ကျောင်းရှိ ဆရာ/မ (၂၀)ဦး၊ ကျောင်းသူ/သား (၄၈၀)ဦး စုစုပေါင်း (၅၀၀) ဦး တက်ရောက်ခဲ့ပြီး  နေ့လယ်( ၁၂း၀၀ )နာရီအချိန်တွင် အခမ်းအနားကို အောင်မြင်စွာ ပြီးစီးခဲ့ကြောင်း သတင်းရရှိပါသည်။

DOCA(စစ်ကိုင်း)

           ကသာခရိုင်၊ ကောလင်းခရိုင်များတွင် ၂၀၂၂-၂၀၂၃ခုနှစ် မိုးစပါးကောက်သစ်အား အောက်တိုဘာလ နောက်ဆုံးပတ်တွင် စတင်ရိတ်သိမ်းနေကြပြီဖြစ်သည်။ ယခုရိတ်သိမ်းသောစပါးမှာ ကောက်စော ဆင်းဧကရီ (၃) ခေါ် ဆင်း(၃)စပါးဖြစ်ပြီး စတင်ပေါ်ချိန် တစ်တင်း ၇၀၀၀ ကျပ်ဈေးဖွင့်ကြောင်း သိရသည်။

     ၂၀၂၂-၂၀၂၃ ခုနှစ် ကသာခရိုင် မိုးစပါးစိုက်ဧက (၁၇၃၆၀၈)ဧကနှင့် ကောလင်းခရိုင် စိုက်ဧက (၁၉၉၈၅၁)ဧက စိုက်ပျိုးကြောင်း သိရသည်။ စိုက်ပျိုးသောစပါးအမျိုးအစားမှာ ဆင်း-၃၊ ဧရာမင်း၊ မှော်ဘီ-၂၊ လုံးသွယ်မွှေး၊ ကောက်ညှင်းစပါးတို့ဖြစ်သည်။ ယခုနှစ် စပါးသစ်ပေါ်ချိန် ဆင်း-၃ စပါးမှာ တစ်တင်း ၇၀၀၀ ကျပ်ဈေးဖွင့်သောကြောင့် ယခင်နှစ်ကာလတူ ဖွင့်ဈေးထက် တစ်တင်း ၁၀၀၀ ကျပ် မြင့်တက်ကြောင်းသိရသည်။ ယခင်နှစ် စပါးဟောင်းဈေးနှုန်းများ မြင့်တက်နေမှုကြောင့် စပါးသစ်လည်း ၎င်းအရှိန်ဖြင့် မြင့်တက်ခြင်းဖြစ်ကြောင်း၊ သီးနှံလှိုင်လှိုင်ပေါ်ချိန်တွင် ပြန်ကျဆင်းသွားနိုင်ကြောင်း ဈေးကွက်မှသိရသည်။

      ဆန်စက်လုပ်ငန်းရှင်အများစုမှာ လမ်းပမ်းဆက်သွယ်ရေးကောင်းသော မြို့ပေါ်တွင်ရှိကြပြီး ကုန်ကြမ်းစပါးထွက်သောဒေသမှာ ကျေးလက်တောရွာများတွင် ရှိကြသည်။ ကျေးလက်ဒေသမှ မြို့ပေါ် ဆန်စက်ကြီးများသို့ စပါးတင်ပို့ရောင်းချရာတွင် နယ်မြေတည်ငြိမ်အေးချမ်းမှု မရှိခြင်းနှင့် လမ်းကြော ပိတ်ဆို့မှုများကြောင့် ကုန်စည်တင်ပို့ရောင်းချရာတွင် အဆင်ပြေချောမွေ့မှုမရှိကြောင်း ဆန်စက်လုပ်ငန်းရှင်များထံမှ သိရသည်။      

DOCA(စစ်ကိုင်း)