သတင်းနှင့် လှုပ်ရှားမှုများ

        တောင်ငူခရိုင်၊ အုတ်တွင်းမြို့နယ်၊ ဥယျာဉ်တော်ကျေးရွာရှိ အုန်းဆံတံမြက်စည်းလုပ်ငန်း မှ ထုတ်လုပ်ရောင်းချလျက်ရှိသော အုန်းဆံတံမြက်စည်းများသည် သုံးစွဲသူများပြားပြီး ဈေးကွက်ဝင်သည့် အတွက် ဒေသတွင်းဖြစ်သော ရေတာရှည်၊ တောင်ငူ၊ ဖြူး၊ ကျောက်တံခါး၊ ညောင်လေးပင် မြို့နယ်များအပြင် ရှမ်းပြည်နယ်အထိ ဈေးကွက်ထိုးဖောက်လျက်ရှိကြောင်း သိရှိရပါသည်။

          ဥယျာဉ်တော်ကျေးရွာတွင် တံမြက်စည်းလုပ်ငန်းလုပ်ကိုင်သူ ၁၅ ဦးခန့်ရှိပြီး အများစုမှာ တောင်သူလယ်သမားများဖြစ်ကြပါသည်။ တံမြက်စည်းလုပ်ငန်းကို လယ်ယာလုပ်ငန်းအားလပ်ချိန်တွင် တစ်ဖက်တစ်လမ်းမှ ဝင်ငွေရရှိစေရန် လုပ်ကိုင်ကြခြင်းဖြစ်ပါသည်။ လုပ်ငန်းတစ်ခုတွင် လုပ်သား ၇ ဦး ခန့်လုပ်ကိုင်ရပါသည်။ မိုးရာသီ လယ်ယာလုပ်ငန်းလုပ်ကိုင်ချိန်တွင် တံမြက်စည်းလုပ်ငန်းကို ရပ်နား ထားပြီး လယ်ယာလုပ်ငန်းမှ အားလပ်ချိန်ဖြစ်သော ဆောင်းရာသီနှင့် နွေရာသီတို့တွင် အဓိကထား လုပ်ကိုင်ကြပါသည်။

    အုန်းဆံကုန်ကြမ်းများကို ရန်ကုန်တိုင်းဒေသကြီးမှ မှာယူရပါသည်။ အုန်းဆံတံမြက်စည်း ပြုလုပ်ရာတွင် ပါဝင်သောပစ္စည်းများမှာ အုန်းဆံ၊ ဝါး၊ ပလပ်စတစ်ကြိုးခွေ၊ သစ်သားခုံ၊ တစ်လက်မခွဲသံ တို့ဖြစ်ပါသည်။ အုန်းဆံတံမြက်စည်းတစ်ချောင်း၏ ကုန်ကျစရိတ်မှာ ၂၃၀၀ ကျပ်ခန့်ရှိပြီး လက်ကား ဖြန့်ဖြူးသောဈေးနှုန်းမှာ ၂၇၀၀ ကျပ်မှ ၃၀၀၀ ကျပ်အထိ ဖြစ်ကြောင်း သိရှိရပါသည်။

DOCA(ပဲခူး)

      တောင်ငူခရိုင်၊ ရေတာရှည်မြို့နယ်၊ ဆွာချောင်းတံတားမြောက်ဘက်ရှိ ဆီဆုံကုန်းကျေးရွာသည် မိရိုးဖလာ လယ်ယာလုပ်ငန်းကို အဓိကထား လုပ်ကိုင်ကြသော်လည်း တစ်ဖက်တလမ်းမှ အပိုဝင်ငွေရရှိစေရန်အတွက် တပိုင်တနိုင်လုပ်ငန်းအဖြစ် ဝါးကုလားထိုင်လုပ်ငန်းကို လုပ်ကိုင်ကြပါသည်။ ဝါးကုလားထိုင်ပြုလုပ်ရန်အတွက် လိုအပ်သောကုန်ကြမ်းများမှာ ကြက်သောင်းဝါး၊ ဝါးကျစ်၊ ဝါးပျက်နှင့် သံတို့ဖြစ်ပါသည်။

          ဝါးကုလားထိုင် ပြုလုပ်ပုံမှာ ကြက်သောင်းဝါးကို လိုအပ်သောအတိုင်းအတာဖြတ်တောက်၍ အခင်းယက်လုပ်ခြင်း၊ ဝါးကျစ်အား အခင်းတိုင်ပြုလုပ်ခြင်း၊ ဝါးပျက်အား ချုပ်တန်းထည့် သံနှင့်ရိုက်ပြီးပါက အသင့်ထိုင်ကုလားထိုင်တစ်လုံးအားရရှိပြီ ဖြစ်ပါသည်။

        ဝါးကုလားထိုင် (၁)လုံးပြုလုပ်ရန်အတွက် ကုန်ကျစရိတ်စုစုပေါင်းအနေဖြင့် (၃၂၀၀) ကျပ်ခန့်ရှိပြီး ရောင်းတန်းဝင်ဝါးကုလားထိုင် (၁)လုံးလျှင် (၄၅၀၀) ကျပ်ခန့် ရောင်းရပါသည်။ တစ်နေ့လျှင် ဝါးကုလားထိုင် (၁၆) လုံးခန့်ပြီးစီးပြီး ရေတာရှည်၊ ဆွာ၊ သာဂရ၊ မြို့လှ၊ ရေနီမြို့နှင့် တောင်ငူမြို့များသို့ တင်ပို့ရောင်းချကြောင်း သိရှိရပါသည်။

DOCA(ပဲခူး)

         တောင်ငူခရိုင်၊ ရေတာရှည်မြို့နယ်ရှိ ဝက်အူချောင်း လုပ်ငန်းသည် အတော်အသင့် နာမည်ရနေသော လုပ်ငန်းတစ်ခုဖြစ်ပါသည်။ ဝက်အူချောင်း ပြုလုပ်ရာတွင် လိုအပ်သော ကုန်ကြမ်းများမှာ ဝက်သား၊ ဆိတ်အူ၊ သကြား၊ဆား၊ ယမ်းစိမ်း၊ အချိုမှုန့် နှင့် အခြောက်ခံမီးဖိုတို့ ဖြစ်ပါသည်။

        လိုအပ်သော ကုန်ကြမ်းများအား မန္တလေးမြို့နှင့် ဒေသတွင်း ရေတာရှည်မြို့နယ်တို့မှ ဝယ်ယူ ရရှိပါသည်။ ဝက်အူချောင်းပြုလုပ်ပုံအဆင့်ဆင့်မှာ ဝက်သားပိဿာချိန် (၂၀)ကို အရိုးများ ဖြတ်ထုတ်၍ ဓားဖြင့် နုတ်နုတ်စင်းပြီး ကြေမွသွားအောင် အသားကြိတ်စက်ဖြင့် ထပ်မံကြိတ်ရပါသည်။ ကြိတ်ပြီးသား ဝက်သားများကို အချိုမှုန့်၊ ဆား၊ သကြား၊ ယမ်းစိမ်းတို့ဖြင့် အချိုးကျ သမအောင်နယ်ပြီး ဆားရည် စိမ်ထားသော ဆိတ်အူထဲသို့ အသားညှစ်စက်ဖြင့် သွပ်သွင်း၍ အခြောက်ခံရန် အခြောက်ခံမီးဖိုထဲသို့ အပူပေးပြီးလျင် ရောင်းတန်းဝင် ဝက်အူချောင်းများ ရရှိပြီဖြစ်ပါသည်။

       ရောင်းတန်းဝင် ဝက်အူချောင်းများအား ပလတ်စတစ်အကြည် အထူစားဖြင့် ၁၀ ကျပ် သားနှင့် ၂၅ ကျပ်သားအထုပ်လေးများ ထုပ်၍ ဈေးကွက်အတွင်း ဖြန့်ဖြူးရောင်းချကြောင်း သိရှိရပါသည်။

     ဈေးနှုန်းအနေဖြင့် ဝက်အူချောင်း (၁၀) ကျပ်သား အထုပ်သေး (၁) ထုပ်လျှင် ၄၀၀၀ ကျပ်နှုန်းနှင့် (၂၅)ကျပ်သား အထုပ်ကြီး (၁)ထုပ်လျှင် (၁၀၀၀၀) ကျပ်နှုန်းဖြင့် ရောင်းချပါသည်။ ဒေသတွင်း တောင်ငူမြို့နယ်၊ ရေတာရှည်မြို့နယ်နှင့် အခြားတိုင်းဒေသများမှ လာရောက်လည်ပတ် ကြသော ဧည့်သည်များမှလည်းဝယ်ယူကြပါသည်။ ရေတာရှည်မြို့နယ်ရှိ ဝက်အူချောင်းမှာ နာမည်ကျော်ကြားသော ဝက်အူချောင်းဖြစ်သောကြောင့် ဒေသတွင်းစားသုံးသူများမှ မိမိတို့အမျိုးအဆွေများရှိရာ အခြားတိုင်းဒေသများသို့ သွားရောက်လည်ပတ်ရာတွင်လည်း လက်ဆောင်အဖြစ်ဝယ်ယူကြကြောင်း  သိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် မြို့နယ်စီမံအုပ်ချုပ်ရေးအဖွဲ့ဥက္ကဌ ဦးစောမင်းသူဦးဆောင်၍ မြို့နယ်အထွေထွေအုပ်ချုပ်ရေးဦးစီး ဌာန၊ မြို့နယ်ရဲတပ်ဖွဲ့မှူးရုံး၊ မြို့နယ်လူဝင်မှု ကြီးကြပ်ရေးနှင့်ပြည်သူ့အင်အားဦးစီးဌာန၊ မြို့နယ် စည်ပင်သာယာရေးအဖွဲ့၊ မြန်မာ့စီးပွားရေးဘဏ်တို့မှ တာဝန်ရှိသူများပါဝင်သော ပူးပေါင်းအဖွဲ့ နှင့်အတူ အောက်တိုဘာလအတွင်း ဖြူးမြို့ပေါ်ရှိ အသေးစားအိမ်တွင်းမှုလုပ်ငန်းများသို့ ကွင်းဆင်း လေ့လာ ရာတွင် ပူးပေါင်းပါဝင် ဆောင်ရွက်ခဲ့ပါ သည်။

       မြို့နယ်စီမံအုပ်ချုပ်ရေးအဖွဲ့ ဥက္ကဌ ဦးဆောင်သော ပူးပေါင်းအဖွဲ့သည် ဖြူးမြို့ ပဲခူးလမ်း တောင်ပိုင်းရှိ အေးအေးခိုင် ပဲချောင်းနှင့်မုန့်ကြိုးလိမ်လုပ်ငန်းသို့ သွားရောက်ကြည့်ရှု လေ့လာခဲ့ရာ လုပ်ငန်းရှင် ဒေါ်အေးအေးခိုင်က ပဲချောင်းနှင့် မုန့်ကြိုးလိမ်ထုတ်လုပ်ပုံ၊ ဖြန့်ဖြူး ရောင်းချမှု အခြေအနေများကို ရှင်းလင်းတင်ပြပါသည်။ အေးအေးခိုင်ပဲချောင်းနှင့် မုန့်ကြိုးလိမ် လုပ်ငန်းသည် ပုဂံ ညောင်ဦး ဒေသမှ ပဲချောင်းပြုလုပ်သည့်နည်းပညာဖြင့် ဖြူးမြို့တွင် လွန်ခဲ့သည့် ၁၀ နှစ်ခန့်က စတင် လုပ်ကိုင်ခဲ့ရာ ယခုအခါ ဒေသတွင်း အောင်မြင်နေသည့် လုပ်ငန်းတစ်ခုဖြစ်ပါသည်။

      ဆက်လက်၍ ပူးပေါင်းအဖွဲ့သည် ဖြူးမြို့၊ ထန်းကုန်းရပ်ကွက် လမ်း ၃၀ ရှိ ခြင်္သေ့မင်း မြေပဲယိုလုပ်ငန်းသို့သွားရောက်လေ့လာရာ လုပ်ငန်းရှင် ဒေါ်သောင်းကြည်က မြေပဲယို၊ သကြား မြေပဲယိုနှင့် နှမ်းယိုထုတ်လုပ်ဖြန့်ဖြူးရောင်းချမှု အခြေအနေများကို ရှင်းလင်းတင်ပြပါသည်။ ခြင်္သေ့ မင်း မြေပဲယိုလုပ်ငန်းသည် မိရိုးဖလာ လုပ်ကိုင်ခဲ့သည့် လုပ်ငန်းတစ်ခုဖြစ်ပြီး ဒေသတွင်း အောင်မြင်နေသည့် စားသောက်ကုန်ထုတ်လုပ်ငန်းဖြစ်ပါသည်။

       ထို့နောက် ပူးပေါင်းအဖွဲ့သည် ဖြူးမြို့နယ်၊ ရွာတန်းရှည်ကျေးရွာအုပ်စု၊ ခြံကြီးမြိုင်ရှိ ဦးစိုးလင်း၏ ဆံပင်ရောင်းဝယ်ရေးလုပ်ငန်းသို့‌ ရောက်ရှိလေ့လာရာ ပိုင်ရှင်ဦးစိုးလင်းက ရောင်းဝယ် ဖောက်ကားမှုအခြေအနေများကို ရှင်းလင်းတင်ပြပါသည်။ မြို့နယ်စီမံအုပ်ချုပ်ရေးအဖွဲ့ ဥက္ကဌနှင့် တာဝန်ရှိသူများသည် သက်ဆိုင်ရာလုပ်ငန်းရှင်များ၏ အခက်အခဲများကို မေးမြန်းဆွေးနွေးပြီး သက်ဆိုင်ရာဌာနများအလိုက် ကူညီဆောင်ရွက်ပေးနိုင်မည့် အခြေအနေများကို ပြောကြားခဲ့ကြောင်း သိရှိရ ပါသည်။

DOCA(ပဲခူး)

          စစ်ကိုင်းတိုင်းဒေသကြီး၊စားသုံးသူရေးရာဦးစီးဌာန ကန့်ဘလူခရိုင် အနေဖြင့် စားသုံးသူကာကွယ်ရေးအသိပညာပေးဟောပြောပွဲကို စက်တင်ဘာလ (၂၀)ရက်၊ နံနက် ( ၁၁ : ၀၀)နာရီတွင် ကန့်ဘလူခရိုင်စီမံကိန်းဦးစီးရုံး၌ ကျင်းပသည်။

        စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံ ဦးမျိုးဝင်းသန်းက စားသုံးသူရေးရာ ဦးစီးဌာန၏ မျှော်မှန်းချက်နှင့်ရည်မှန်းချက်များ၊ စားသုံးသူ၏အခွင့်အရေးများ ၊ စားသုံးသူကာကွယ်ရေးဥပဒေအခန်း(၁၈)ပါကုန်အညွှန်းအမှတ်အသားဖော်ပြခြင်းနှင့်စပ်လျဉ်းသည့် အသိပညာဗဟုသုတများနှင့် ဝန်ဆောင်မှုလုပ်ငန်းများအကြောင်းတို့အား ရှင်းလင်းဆွေးနွေး ဟောပြောခဲ့သည်။

          အဆိုပါအသိပညာပေးဟောပြောပွဲသို့ ခရိုင်စီမံကိန်းဦးစီးရုံးမှ ဝန်ထမ်း(၆)ဦး တက်ရောက်ခဲ့ပြီး တက်ရောက်လာသူများအား အသိပညာပေး လက်ကမ်းစာစောင်များ ဖြန့်ဝေခဲ့ကြောင်း သတင်းရ ရှိသည်။

DOCA(စစ်ကိုင်း)