သတင်းနှင့် လှုပ်ရှားမှုများ

           မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၊ ခရိုင်ဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ်၊အောက်တိုဘာလ(၁၈) ရက်နေ့၊ နံနက်(၉:၃၀)အချိန်တွင် ပခုက္ကူမြို့၊ အ.လ.က(၃)ကျောင်း၌ စားသုံးသူကာကွယ်ရေးအသိပညာပေးဟောပြောပွဲ ကျင်းပပြုလုပ်ခဲ့ပါသည်။

          ဒုတိယဦးစီးမှူး ဒေါ်မြင့်မြင့်သန်းမှ ဆွေးနွေးရာတွင် ဌာန၏သမိုင်းကြောင်းနှင့်  လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ  စားသုံးသူကာကွယ်ရေးဥပဒေပါ အကြောင်းအရာများ၊ စားသုံးသူပြည်သူများအတွက် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချမှုရှိစေရေးတို့ကို ဆောင်ရွက်နေရုံ သာမက စားသုံးသူနစ်နာဆုံးရှုံးမှုများအတွက် စားသုံးသူသတင်း ပြန်ကြားရေးနှင့် တိုင်ကြားမှု လက်ခံဆောင်ရွက်ရေး စင်တာ(CICC) ဖွင့်လှစ်ထားရှိမှုအား Power Point ဖြင့် အသေးစိတ် ရှင်းလင်းဆွေးနွေးခဲ့ပြီး စားသုံးသူထိခိုက်နစ်နာမှုနှင့် စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စများ စုံစမ်းမေးမြန်းရန်အတွက် Consumer Call Center (၁၅၃၅) အား ဖွင့်လှစ်ထားကြောင်း အကျယ်တဝင့်ဆွေးနွေးခဲ့ပါသည်။

          စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ ဆွေးနွေးရာတွင် စားသုံးသူများတွင် အခွင့်အရေးများရှိ၍ သိရှိရန်လိုအပ်ကြောင်း၊ အခွင့်အရေးကို ရယူနိုင်မှသာလျှင် နစ်နာဆုံးရှုံးမှုများ မရှိဘဲ နောင်အနာဂတ်၌ ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ စားသုံးသူ၏ တာဝန်များလည်းရှိ၍ တိကျစွာလိုက်နာရန်လိုအပ်ကြောင်း၊ ကုန်စည်များဝယ်ယူ သုံးစွဲရာတွင် သတင်းအချက် အလက်များပြည့်စုံစွာရယူ၍  ဘေးအန္တရာယ်ကင်းရှင်းစွာအသုံးပြုနိုင်ပြီး စိတ်ကျေ နပ်မှုများရရှိစေလိုကြောင်း၊ အမှန်တကယ်နစ်နာဆုံးရှုံးမှုများဖြစ်ပေါ်ပါက မှန်ကန်ပြည့်စုံသော အထောက်အထားများနှင့်အတူ မိမိတို့ဌာနသို့ တိုင်ကြားစေခြင်းဖြင့် ကုစားခွင့်များရရှိမှာဖြစ်ကြောင်း ကျယ်ကျယ်ပြန့်ပြန့်ဆွေးနွေးခဲ့ပါသည်။

          ဒု-ဦးစီးမှူးဒေါ်ပပရွှေမှ ဆွေးနွေးရာတွင် စားသုံးသူများအနေဖြင့် ကုန်စည်များဝယ်ယူသုံးစွဲရာတွင် ရွေးချယ်ဝယ်ယူစားသောက်တတ်စေရန် ကုန်အညွှန်း အမှတ်အသားများနှင့် စပ်လျဉ်းသည့် သိရှိလိုက်နာရမည့်သတင်းအချက်အလက်များ၊  ထုတ်ကုန်လုံခြုံစိတ်ချရမှုရှိသောကုန်စည်များအား အသိတရား၊ သတိထား၍ ဝယ်ယူသုံးစွဲစေလိုကြောင်း၊ တချို့ကုန်စည်များတွင် ထုပ်ပိုးမှုသာလှပပြီး စားသုံးရန်မသင့်အစားအစာများကို သတိလက်လွတ် ဝယ်ယူသုံးစွဲမှုမပြုစေရန်နှင့် သေချာစွာစိစစ် ရွေးချယ်ပြီးမှသာ သုံးစွဲစေလိုကြောင်း အသေးစိတ်ရှင်းလင်း ဆွေးနွေးခဲ့ပြီး စားသုံးသူကာကွယ်ရေး အသိပညာပေးဟောပြောခဲ့ခြင်းနှင့် ပတ်သက်၍ မေးမြန်းခြင်းအပေါ် ဖြေဆိုနိုင်သော ကျောင်း သား/သူများအား ဆုချီးမြှင့်ခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များ ဖြန့်ဝေပေးခဲ့ပါသည်။

DOCA(မကွေး)

       ကချင်ပြည်နယ်၊စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှဦးဘောမ်ဇုန်း(ရုံးအုပ်)သည် ၁၈.၁၀.၂၀၂၂ ရက်နေ့တွင် ဝိုင်းမော်မြို့နယ်ရှိ အစေ့ထုတ်ပြောင်းစိုက်ပျိုးထုတ်လုပ်တင်ပို့‌ရောင်းချသူ လုပ်ငန်းရှင်များ နှင့် တွေ့ဆုံဆွေးနွေးခဲ့ပါသည်။

    ထိုသို့တွေ့ဆုံဆွေးနွေးရာတွင် ဦးဘောမ်ဇုန်း(ရုံးအုပ်)မှ ပြည်တွင်းကုန်သွယ်မှုဖွံ့ဖြိုးတိုးတက်စေရေးတို့အတွက် ပြည်တွင်း/ပြည်ပသို့ ကုန်သွယ်မှုအဆင့်ဆင့် လုပ်ကိုင်ဆောင်ရွက်မှုအခြေအနေများ အား ရုံးချုပ်၊ ပြည်တွင်းကုန်သွယ်မှုဖွံ့ဖြိုးရေးနှင့် သုတေသနဌာနခွဲသို့ တင်ပြလျက်ရှိကြောင်း ဆွေးနွေး ခဲ့ပြီး အစေ့ထုတ်ပြောင်းလုပ်ငန်းရှင်များမှ ယခုလက်ရှိဒေသတွင်း တောင်သူများရောင်းချနေသော အစေ့ထုတ်ပြောင်းတစ်ပိဿာ‌ဈေးနှုန်းမှာ၇၈၀ ကျပ်ရှိပြီး 30.75 ပိဿာ(50kg)ဝင် အစေ့ထုတ်ပြောင်း တစ်အိတ်လျှင်(၂၄၀၀) ကျပ်နှုန်း ပေါက်ဈေးရှိနေပါသည်။ တစ်အိတ်လျှင် ချိန်၊ ချုပ်၊ စီထပ်၊ တင်ခ/ချခ အလုပ်သမားခမှာ (၄၀၀)ကျပ် ကုန်ကျပြီး ဝိုင်းမော်မှမန္တလေးသို့ သယ်ယူပို့ဆောင်သည့် ကားခမှာ တစ်အိတ်လျှင် (၂၅၀၀)ကျပ်ရှိသဖြင့် တစ်အိတ်လျှင် စုစုပေါင်းကုန်ကျစရိတ် (၂၆၉၀၀)ကျပ်ရှိပါသည်။ ယခုလက်ရှိ မန္တလေးဈေးကွက်တွင် အစေ့ထုတ်ပြောင်းတစ်ပိဿာလျှင် (၉၈၀) ကျပ်ရှိ၍ တစ်အိတ် ဈေးနှုန်းမှာ (၃၀၁၃၅)ကျပ် ရရှိပြီး အကျိုးအမြတ်အနေဖြင့် တစ်အိတ်လျှင် (၃၂၃၅)ကျပ်နှင့် တစ်ပိဿာ လျှင် (၁၀၅)ကျပ်ခန့် ရရှိမှုအား ပြန်လည်ဆွေးနွေးခဲ့ကြောင်း သတင်းရရှိပါသည်။

DOCA(ကချင်)

     ဧရာ၀တီတိုင်းဒေသကြီး စားသုံးသူရေးရာဦးစီးဌာနမှ ဒုတိုင်းဦးစီးမှူး ဦးထွန်းထွန်းနှင့် အဖွဲ့သည် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) မြို့နယ်စည်ပင်သာယာရေး အဖွဲ့များနှင့် ပူးပေါင်း၍ အောက်တိုဘာလ (၁၈)ရက်နေ့ နံနက်ပိုင်းတွင် ပဲပြား၊ ပဲသွေးနှင့် မုန့်ဟင်းခါးဖတ်များ ရောင်းချလျှက်ရှိသော ပုသိမ်မြို့ပေါ် မြို့မစျေးအတွင်းရှိ ဆိုင် (၇)ဆိုင်နှင့် အောင်ဧရာစျေးအတွင်းရှိ ဆိုင်(၃)ဆိုင်သို့ သွားရောက်ပြီး ပြည်သူများ ၀ယ်ယူစားသုံးလျှက်ရှိ သော ကုန်စည်များတွင် တာရှည်ခံ ဓာတုဆေးဝါးများ ဖော်မလင်သုံးစွဲထားခြင်းရှိမရှိ ကွင်းဆင်း၍ စျေးကွက်နမူနာ ကောက်ယူခဲ့ပါသည်။

      စျေးကွက်အတွင်းမှ ကောက်ယူလာသော နမူနာများကို စားသုံးသူရေးရာဦးစီးဌာန တိုင်းဦးစီးမှူးရုံးတွင် ပူးပေါင်းအဖွဲ့မှ Tesk Kit ဖြင့် စစ်ဆေးခဲ့ရာ Red Liquid မတွေ့ရကြောင်း လု်ပငန်းရှင်များမှ စီးပွားရေး ကျင့်၀တ်များလိုက်နာမှု ရှိစေရန်နှင့် စားသုံးသူယဉ်ကျေးမှု အလေ့ အထများ ထွန်းကားလာစေရန်သာမက စားသုံးသူပြည်သူများ ကျန်းမာရေးနှင့် ညီညွတ်ပြီး ဘေးအန္တရာယ်ကင်းရှင်းသော ကုန်စည်များ ၀ယ်ယူစားသုံးနိုင်ရန် ရည်ရွယ်၍ ယခုလို စျေးကွက်အတွင်း ရောင်းချနေသော ကုန်စည်များအား စျေးကွက်စောင့်ကြည့်စစ်ဆေးခြင်းဖြစ် ကြောင်း ဒုတိုင်းဦးစီးမှူး ဦးထွန်းထွန်းက ဆိုင်ပိုင်ရှင်များအား စားသုံးသူ အသိပညာပေး ပြောကြားခဲ့ပါသည်။

DOCA(ဧရာဝတီ)

      မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၊ အစည်းအဝေးခန်းမ၌ စားသုံးသူအသိပညာပေးဆင့်ပွားသင်တန်းကို ၂၀.၁၀.၂၀၂၂ ရက်နေ့တွင် ဖွင့်လှစ်ခဲ့ရာ သင်တန်းသား၊ သင်တန်းသူ (၂၆)ဦး တက်ရောက်ခဲ့ကြောင်း သိရှိရပါသည်။

       အဆိုပါ သင်တန်းတွင် ပြည်နယ်ဦးစီးမှူးမှ အဖွင့်အမှာစကားပြောကြားရာတွင် ဝန်ထမ်းများအနေဖြင့် စွမ်းဆောင်ရည်ပြည့်ဝရန် လိုအပ်ကြောင်း၊ မိမိဘာသာရပ်များကို ကျွမ်းကျင်ရန် လိုအပ်ကြောင်း၊ စားသုံးသူကာကွယ်ရေးကဏ္ဍသာမက ပြည်တွင်းကုန်သွယ်ရေးဖွံ့ဖြိုးမှုကဏ္ဍကိုပါ ဝန်ထမ်းများ သိရှိထားရန် လိုအပ်ကြောင်း၊ ကွန်ပျူတာသင်တန်းနှင့် အင်္ဂလိပ်စာသင်တန်းများကို ဖွင့်လှစ်ရန် စီစဉ်ထားရှိကြောင်း ပြောကြားခဲ့ပါသည်။ ထို့နောက် ထုတ်ကုန်လုံခြုံစိတ်ချရမှုဆိုင်ရာ ဘာသာရပ်၊ အဂတိလိုက်စားမှုတားဆီးကာကွယ်ရေးအကြောင်းအရာများ၊ စားသုံးသူ သတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) နှင့် ပတ်သက်၍ သိကောင်းစရာများနှင့် လုပ်ငန်းဆောင်ရွက်မှုအခြေအနေများအား ဆွေးနွေးပို့ချခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးသည် ၁၉.၁၀.၂၀၂၂ ရက်နေ့တွင် မွန်ပြည်နယ်၊ နိုင်ငံစီးပွားမြှင့်တင်ရေးလုပ်ငန်းများ အရှိန်အဟုန်မပျက်ဆောင်ရွက်ရန်အတွက် မော်လမြိုင်ခရိုင်၊ မုဒုံမြို့နယ်ရှိ သမဝါယမဦးစီးဌာနမှ ပြန်လည်အပ်နှံထားသည့် တာပသွန်ကျေးရွာရှိ မြေနေရာတွင် Export အဆင့်မီ တန် (၆၀)ကျ ဆန်စက်တည်ဆောက်ရေးမြေနေရာရွေးချယ်စိစစ်ရေး ကော်မတီနှင့်ပူးပေါင်း၍ ကွင်းဆင်းဆောင်ရွက်ခဲ့ကြောင်း သိရှိရပါသည်။

    ထိုသို့ဆောင်ရွက်ရာတွင် လုံလောက်သော မြေဧရိယာပြည့်မီရန်၊ စက်ရုံမြေနေရာအား အရှုပ်အရှင်းကင်းရှင်းစေရန်၊ လျှပ်စစ်မီးသွယ်တန်းနိုင်ရေး၊ တန် (၆၀) ကျ ဆန်စက်တစ်ခုဖြစ်ပေါ်စေရေးအတွက် ပူးပေါင်းဆောင်ရွက်ခဲ့ပြီး အဆိုပါ ဆန်စက်တည်ဆောက်ပြီးစီးပါက အလုပ်အကိုင် အခွင့်အလန်းများဖန်တီးနိုင်ပြီး တောင်သူလယ်သမားများအတွက်လည်း များစွာအထောက်အကူ ရရှိမည်ဖြစ်ကြောင်း သိရှိရပါသည်။

DOCA(မွန်)