သတင်းနှင့် လှုပ်ရှားမှုများ

          ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ တာဝန်ရှိဝန်ထမ်းများသည် ၇.၆.၂၀၂၂ ရက်နေ့ နံနက် (၁၀:၃၀) အချိန်တွင် မင်္ဂလာတောင်ညွှန့်မြို့နယ်၊ ရွှေပြည့်စုံဈေးရှိ ဆေးဆိုင်များနှင့်အလှကုန်ဆိုင်များသို့ Bella Plus Plastes များရောင်းချခြင်း ရှိ/မရှိ ကွင်းဆင်းစိစစ်ခဲ့ကြောင်း သိရပါ သည်။

          အဆိုပါကွင်းဆင်းဆောင်ရွက်ရာတွင် Bella Plus Plastes သည် ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့် ကုမ္ပဏီဆေးဝါးမှတ်ပုံတင်အမှတ်နှင့် သွင်းကုန်လိုင်စင်များ ဖော်ပြထားခြင်း ရှိ/မရှိတို့ကို စစ်ဆေးကြပ်မတ်ဆောင်ရွက်ခြင်းနှင့် စစ်ဆေးတွေ့ရှိပါက သက်ဆိုင်ရာဌာနများ၏ ဥပဒေများနှင့်အညီ အရေးယူဆောင်ရွက်ခြင်းကိုခံရမည်ဖြစ်ကြောင်း အသိပညာပေးခြင်းများဆောင်ရွက်ခဲ့ကြောင်း သိရပါသည်။

DOCA(ရန်ကုန်)

          ပုသိမ်မြို့၊ ဧရာရွှေဝါခန်းမတွင် ဧရာ၀တီတိုင်းဒေသကြီး၊း တရားမ၀င်ကုန်သွယ်မှ တိုက်ဖျက်ရေးအထူးအဖွဲ့မှ ဦးဆောင်ကျင်းပပြုလုပ်သော တရားမ၀င်ကုန်သွယ်မှုတိုက်ဖျက်ရေးဆင့်ပွားသင်တန်း အမှတ်စဉ် ၁/၂၀၂၂ ဖွင့်ပွဲအခမ်းအနားကို ဇွန်လ (၁၀) ရက်နေ့ (၀၉:၀၀) နာရီတွင် ကျင်းပပြုလုပ်ရာ ဧရာ၀တီတိုင်းဒေသကြီး၊း အစိုးရအဖွဲ့၀န်ကြီးချုပ် ဦးတင်မောင်၀င် နှင့် အစိုးရအဖွဲ့၀င်၀န်ကြီးများ၊ သက်ဆိုင်ရာတိုင်းအဆင့်ဌာနဆိုင်ရာများ၊ တိုင်းဒေသကြီးတရားမ၀င်ကုန်သွယ်မှုတိုက်ဖျက်ရေးအထူးအဖွဲ့၀င် (၁၂)ဦး၊ ခရိုင်တရားမ၀င်ကုန်သွယ်မှုတိုက်ဖျက်ရေးအထူးအဖွဲ့၀င်ဥက္ကဋ္ဌနှင့် အတွင်းရေးမှူး (၁၂)ဦး၊ သင်တန်း သား/သင်တန်းသူ (၂၅)ဦး စုစုပေါင်း (၆၆)ဦး တက်ရောက်ခဲ့ပါသည်။

          ဧရာ၀တီတိုင်းဒေသကြီး၊ အစိုးရအဖွဲ့၀န်ကြီးချုပ် ဦးတင်မောင်၀င်းက သင်တန်းဖွင့်လှစ်ရခြင်း ရည်ရွယ်ချက်အား အဖွင့်အမှာစကားပြောကြားခဲ့ပြီး သင်တန်းပထမနေ့တွင် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ အကောက်ခွန်ဦးစီးဌာန၊ ပြည်တွင်းအခွန်များဦးစီးဌာန၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ သစ်တောဦးစီးဌာနမှ မိမိတို့ ဌာနများ၏ လုပ်ထုံးလုပ်နည်းဥပဒေများ သင်ကြားပို့ချပေးခဲ့ပါသည်။

          သင်တန်းကို ဇွန်လ (၁၀) ရက်နှင့် (၁၁) ရက်၊ (၂) ရက်ဖွင့်လှစ်ပေးခဲ့ပြီး သင်တန်းဒုတိယနေ့တွင် အထွေထွေအုပ်ချုပ်ရေးဦးစီးဌာနမှ လုပ်ငန်းဆိုင်ရာကိစ္စများ မြန်မာနိုင်ငံရဲတပ်ဖွဲ့မှ မူးယစ်ဝါးကိစ္စ၊ လူကုန်ကူးမှုကိစ္စ၊ တိရိစ္ဆာန်များ တရားမ၀င်သယ်ဆောင်မှုနှင့် ရဲတပ်ဖွဲ့မှ အရေးယူဆောင်ရွက်မည့် ဥပဒေရပ်များ၊ စိုက်ပျိုးရေးဦးစီးဌာနမှ  ပိုးသတ်ဆေးဥပဒေ၊ မှတ်ပုံတင်ခြင်းကိစ္စရပ်များ၊ လက်လီ/လက္ကားရောင်းချခွင့်လိုင်စင်ရသူ၏ တာ၀န်လုပ်ပိုင်ခွင့်နှင့်ပြစ်မှုပြစ်ဒဏ်များ၊ မွေးမြူရေးနှင့်ကုသရေးဦးစီးဌာနမှ တိရိစ္ဆာန်၊ ကျွဲ၊ နွားများ တရားမ၀င်သယ်ဆောင်ပါက ဥပဒေအရ အရေးယူဆောင်ရွက်မှုများ၊ ကုန်းလမ်းပို့ဆောင်ရေးနှင့်ညွှန်ကြားမှုဦးစီးဌာနမှ မော်တော်ကား၊ ဆိုင်ကယ်၊ ထော်လာဂျီ၊ သုံးဘီးဆိုင်ကယ်များ လိုင်စင်မရှိလျှင် ဖမ်းဆီးအရေးယူမည့် ဥပဒေများ၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ ဌာန၏ လုပ်ထုံးလုပ်နည်းဥပဒေများနှင့် စားသုံးသူရေးရာဦးစီးဌာန၊ တိုင်းဦးစီးမှူး ဦးစိုးအောင်က တရား၀င်ကုန်သွယ်မှုပြုနိုင်ရန် သွင်းကုန်လိုင်စင်လျှောက်ထားခြင်း၊ သွင်းကုန်လိုင်စင်ပြင်ဆင်ခြင်း၊ မိတ္တူထုတ်ပေးခြင်း၊ ကုန်သွယ်မှုဆိုင်ရာဥပဒေ၊ မူဝါဒ၊ လုပ်ထုံးလုပ်နည်းများအကြောင်း ဆွေးနွေးပို့ချပေးခဲ့ပြီး မြန်မာ့ဆိပ်ကမ်း အာဏာပိုင်မှ ဌာန၏လုပ်ငန်းစဉ်များအကြောင်း၊ ရေကြောင်းပို့ဆောင်ရေးညွှန်ကြားမှုဦးစီးဌာနမှ မိမိတို့ဌာန၏ လုပ်ထုံးလုပ်နည်းဥပဒေများနှင့် မြန်မာနိုင်ငံရဲတပ်ဖွဲ့မှ တရားမ၀င် WY မူးယစ်ဆေးဝါးများ သယ်ဆောင်လာပါက ဥပဒေအရ အရေးယူဆောင်ရွက်မည့် လုပ်ထုံးလုပ်နည်းဥပဒေများအား ရှင်းလင်းပို့ချပေးခဲ့ပါသည်။

          သင်တန်းပို့ချမှုအပြီး ဧရာ၀တီတိုင်းဒေသကြီး၊ အစိုးရအဖွဲ့ တိုင်းရင်းသားရေးရာ၀န်ကြီး ဦးစောလင်းခယ်မှ သင်တန်းဆင်းအမှာစကားပြောကြားခဲ့ပြီး တရားမ၀င်ကုန်သွယ်မှုတိုက်ဖျက်ရေးဆင့်ပွားသင်တန်း ၁/၂၀၂၂ သို့ တက်ရောက်လာသော သင်တန်းသား/သင်တန်းသူ (၂၅)ဦးတို့အား သင်တန်းဆင်းလက်မှတ်များ ပေးအပ်ခဲ့ကြောင်း သိရသည်။

DOCA(ဧရာဝတီ)

          မြန်မာနိုင်ငံဆန်စက်လုပ်ငန်းရှင်များအသင်းခွဲ (ဧရာ၀တီတိုင်းဒေသကြီး)၏ ၂၀၂၂-၂၀၂၅ သက်တမ်းကာလ အလုပ်အမှုဆောင်ရွေးချယ်တင်မြှောက်ခြင်းအခမ်းအနားကို ၁၂-၆-၂၀၂၂ ရက်နေ့ နံနက် ၁၀:၀၀ နာရီတွင် ဧရာ၀တီတိုင်းဒေသကြီး၊း စားသုံးသူရေးရာဦးစီးဌာန၊ တိုင်းဒေသကြီ ဦးစီးမှူးရုံး၊ အစည်းအဝေးခန်းမတွင် ကျင်းပပြုလုပ်ရာ မြန်မာနိုင်ငံဆန်စက်လုပ်ငန်းရှင်များအသင်းချုပ်(ဗဟို)မှ ဥက္ကဋ္ဌ ဦးကျော်၀င်းနှင့်အဖွဲ့၀င်များ၊ဧရာ၀တီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးစိုးအောင်နှင့် ဒုတိယတိုင်းဒေသကြီးဦးစီးမှူး ဦးစိုးဦး၊ ဧရာ၀တီတိုင်းဒေသကြီး၊ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဋ္ဌ ဦး၀င်းမြင့်လှိုင်၊ မြန်မာနိုင်ငံဆန်စက်လုပ်ငန်းရှင်များအသင်းခွဲ (ဧရာ၀တီတိုင်းဒေသကြီး) ဥက္ကဋ္ဌနှင့် အတွင်းရေးမှူး၊ မြို့နယ်ဆန်စက်လုပ်ငန်းရှင်များအသင်း ဥက္ကဋ္ဌနှင့်အဖွဲ့၀င်များ စုစုပေါင်း (၆၂) ဦး တက်ရောက်ခဲ့ပါသည်။

          အခမ်းအနားတွင် ဧရာ၀တီတိုင်းဒေသကြီ၊း စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးစိုးအောင်က အဖွင့်အမှာစကားပြောကြားရာ၌ ယနေ့ရွေးချယ်တင်မြှောက်ပွဲသို့ မိမိတို့ဌာနအနေဖြင့် စားသုံးသူအကာအကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုတိုတက်ရေး၊ ပြည်ပပို့ကုန်တိုးမြှင့်တင်ပို့နိုင်ရေးအတွက်လည်း ကူညီဆောင်ရွက်ပေးလျှက်ရှိကြောင်း၊ မိမိတို့၀န်ကြီးဌာနအနေဖြင့် အသင်းအဖွဲ့များဖွဲ့စည်းရေးနှင့်ပူးပေါင်းဆောင်ရွက်ရေးကို အားပေးကူညီရန်လည်း ညွှန်ကြားထားပြီး ယနေ့ရွေးချယ်လိုက်သည့် ဥက္ကဋ္ဌများ၊ CEC များအနေဖြင့်လည်း Export ကဏ္ဍတိုးတက်မြင့်မားအောင်တင်ပို့နိုင်ရေး၊ ဆန်စက်တွေ ခေတ်မီဖွံ့ဖြိုးတိုးတက်စေရေးအတွက် အသစ်ဖွဲ့စည်းလိုက်သောအဖွဲ့မှ အားကြိုးမာန်တက်ဆောင်ရွက်နိုင်ရေးနှင့် မိမိတို့အနေဖြင့်လည်း တစ်ဖက်တစ်လမ်းမှ ပါ၀င်ကူညီဆောင်ရွက်ပေးသွားမှာဖြစ်ကြောင်း တက်ရောက်ပြောကြားခဲ့ပါသည်။

         မြန်မာနိုင်ငံဆန်စက်လုပ်ငန်းရှင်များအသင်းချုပ် ဥက္ကဋ္ဌ ဦးကျော်၀င်းက မိမိတို့မြန်မာနိုင်ငံဆန်စက်လုပ်ငန်းရှင်များအသင်းသည် ဆန်စပါးစိုက်ပျိုးထုတ်လုပ်မှုအတွက် အရေးကြီးသော အစုအဖွဲ့ဖြစ်ပြီး၊ မိမိတို့ဆန်စက်လုပ်ငန်းရှင်များအသင်းသည် အင်မတန်အင်အားကြီးမားသော အသင်းဖြစ်ကြောင်း၊ အသင်းသူအသင်းသားများသာမက မိမိတို့တိုင်းဒေသကြီးအတွင်းရှိ ဆန်စပါးလုပ်ငန်းများ ပိုမိုဖွံ့ဖြိုးတိုးတက်အောင်ဆောင်ရွက်ရန် လိုအပ်ကြောင်း ပြောကြားခဲ့ပါသည်။

         အမှုဆောင်ရွေးချယ်ရေးအတွက် ရွေးချယ်ရေးကော်မတီ မြန်မာနိုင်ငံဆန်စက်လုပ်ငန်းရှင်များအသင်းချုပ် (ဗဟို)မှ အတွင်းရေးမှူး ဦးနေလင်းဇင်က ဥက္ကဋ္ဌအဖြစ်လည်းကောင်း၊ ဧရာ၀တီတိုင်းဒေသကြီး၊ စားသုံးသူရေးရာဦးစီးဌာန၊ ညွှန်ကြားရေးမှူး ဦးစိုးအောင်က အဖွဲ့၀င်အဖြစ် လည်းကောင်း၊ မြန်မာနိုင်ငံဆန်စက်လုပ်ငန်းရှင်များအသင်းခွဲ(ဧရာ၀တီတိုင်းဒေသကြီး) ဥက္ကဋ္ဌမှ တာ၀န်ပေးသူ ဦးထွန်းအောင်က အဖွဲ့၀င်အဖြစ်လည်းကောင်း ဖွဲ့စည်းခဲ့ပြီး ရွေးချယ်ရေးကော်မတီဥက္ကဋ္ဌမှ ဦးဆောင်၍ အဆိုပြုတင်သွင်းချက်များအပေါ် ထောက်ခံမှုအရ စီမံခန့်ခွဲရေးကော်မတီနှင့် အမှုဆောင်များအား ရွေးချယ်ခဲ့ရာ ဥက္ကဌ (၁)ဦး၊ အတွင်းရေးမှူး (၁)ဦး၊ ဒု-ဥက္ကဌ (၅)ဦး၊ တွဲဖက်အတွင်းရေးမှူး (၅)ဦး၊ ဘဏ္ဍာရေးမှူး (၁)ဦး၊ တွဲဖက် ဘဏ္ဍာရေးမှူး (၄)ဦး၊ စာရင်းစစ် (၁)ဦး၊ တွဲဖက်စာရင်းစစ် (၃)ဦး စုစုပေါင်း စီမံခန့်ခွဲရေး ကော်မတီ၀င် (၂၁)ဦးအား ရွေးချယ်ကြောင်း ကြေငြာခဲ့ပြီး မိမိတို့ (ဗဟို)အသင်းမှ အလုပ်အမှုဆောင် (CEC) အစည်းအဝေးကို ရက်ပေါင်း (၆၀)လျှင် (၁)ကြိမ်နှင့် (EC) အစည်းအဝေးကို ရက် (၁၂၀) (၄)လလျှင် (၁)ကြိမ်ကျင်းပမည်ဖြစ်ကြောင်းနှင့် လိုအပ်ပါက Zoom ဖြင့် ဆွေးနွေးမည်ဖြစ်ကြောင်း၊ ၂၀၂၂-၂၀၂၅ အမှုဆောင်သစ်ရွေးချယ်ပွဲတွင် တိုင်းအမှုဆောင် (၃၁)ဦးနှင့် စီမံခန့်ခွဲရေးကော်မတီ (၂၁)ဦးတို့ကို ရွေးချယ်ပြီးဖြစ်ကြောင်း ဆန်စက်လုပ်ငန်းရှင်များအသင်း၏ အခန်းကဏ္ဍအနေဖြင့် စိန်ခေါ်မှုအခက်အခဲများနဲ့ တွေ့ကြုံရမှာဖြစ်ပြီး နိုင်ငံတော်အစိုးရနှင့်လုပ်ငန်းရှင်များအား တိုင်းဒေသကြီးအစိုးရအဖွဲ့နှင့်လည်း ပူးပေါင်းဆောင်ရွက်ရန် လိုအပ်ကြောင်း ပြောကြားခဲ့ပါသည်။

         ဆက်လက်၍ ရွေးချယ်ရေးကော်မတီအဖွဲ့၀င် စားသုံးသူရေးရာဦးစီးဌာန၊ တိုင်းဦးစီးမှူး ဦးစိုးအောင်က ရွေးချယ်ခံရသည့် အမှုဆောင်များ၏အမည်စာရင်းကို ဖတ်ကြားပြီး ဥက္ကဋ္ဌအသစ် ဦးစိုး၀င်း (ပုသိမ်)က ယနေ့ရွေးချယ်ပေးပါသော မြို့နယ်စုံမှ စီမံခန့်ခွဲမှုကော်မတီ (၂၁)ဦး၊ အမှုဆောင် (၃၁)ဦးပါ၀င်ပြီး မိမိတို့အသင်းအတွက်လည်း ရွေးချယ်ခံရသူများက အားကြိုးမာန်တက်ဆောင်ရွက်ပေးပါရန်နှင့် အားလုံးတက်ညီလက်ညီချိတ်ဆက်ဆောင်ရွက်သွားရန်လိုအပ်ကြောင်း၊ မိမိအနေဖြင့်လည်း ဒေသတွင်းရှိ ဆန်စက်များ၏ဖွံ့ဖြိုးရေးကို ဦးစားပေးဆောင်ရွက်သွားမည် ဖြစ်ကြောင်း နိဂုံးချုပ်ပြောကြား၍ အစည်းအဝေးကို (၁၂:၃၀) ခန့်တွင် ရုတ်သိမ်းခဲ့ပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ ရခိုင်ပြည်နယ်၊ ကျောက်ဖြူခရိုင်ဦးစီးမှူးရုံးမှ ဝန်ထမ်းများသည် Pacific Co.,Ltd မှ ဝန်ထမ်းများနှင့်ပူးပေါင်း၍ (၁၃-၆-၂၀၂၂)ရက်နေ့ နံနက် (၁၀:၀၀)ခန့်အချိန်တွင် ကျောက်ဖြူခရိုင် ကျောက်ဖြူမြို့ မြို့မဈေးကြီးရှိ ဈေးဆိုင်များသို့ သွားရောက်၍ ‌အလေးချိန်လျော့နည်းသော PARIS ဆပ်ပြာခဲများ ပြန်လည်သိမ်းဆည်း လဲလှယ်ပေးခြင်းဆောင်ရွက်ခဲ့ပါသည်။

        ထိုကဲ့သို့ဆောင်ရွက်ရာတွင် ကျောက်ဖြူမြို့မဈေးကွက်အတွင်း/အပြင်ရှိ ဈေးဆိုင်(၁၁)၌ ဆိုင်တင်ရောင်းချနေသောသတ်မှတ်အလေးချိန်မပြည့်မီသော PARIS ဆပ်ပြာခဲများအား ပြန်လည် သိမ်းဆည်းပြီး  ကုန်အညွှန်းအမှတ်အသားဖော်ပြချက်ပါ အသားတင်အလေးချိန်နှင့်ကိုက်ညီသည့် PARIS ဆပ်ပြာခဲများဖြင့် အစားထိုးလဲလှယ်ခြင်းကို  ဆောင်ရွက်ခဲ့ပါကြောင်းသတင်းရရှိပါသည်။

DOCA(ရခိုင်)

            စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် မကွေးခရိုင်ဦးစီးမှူးရုံးမှ ဝန်ထမ်းများအဖွဲ့သည် ဈေးတာဝန်ခံနှင့်ပူးပေါင်းပြီး မကွေးမြို့၊ ရန်ပယ်စျေးရှိ စားသုံးဆီရောင်းချသည့် လုပ်ငန်းများအား (၁၀.၆.၂၀၂၂) နေ့ နံနက်(၀၉:၀၀) မှ (၁၀:၀၀) နာရီထိ ဟင်းသီးဟင်းရွက်ဆီများတွင် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြလာရေး ကွင်းဆင်းစစ်ဆေး အသိပညာပေးဆွေးနွေးခဲ့ပါသည်။

            ဦးအောင်ဖြိုးဝေ(ဒု-ဦးစီးမှူး)မှ လုပ်ငန်းရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ညွှန်ကြားချက်အမှတ်(၁/၂၀၂၂)အရ ဟင်းသီးဟင်းရွက်ဆီ(Vegetable Oil,Cooking Oil)နှင့် စပ်လျဉ်း၍ ကုန်အညွှန်းအမှတ်အသားဖော်ပြရာတွင် ပင်ရင်းပါဝင်ပစ္စည်းကို အခြေခံသော ကုန်စည်၏အမျိုးအစားကို တိကျစွာမြန်မာဘာသာဖြင့် ဖော်ပြရန် (ဥပမာ- ဟင်းသီးဟင်းရွက်ဆီ၊ စားအုန်းဆီ)၊ ဟင်းသီးဟင်းရွက်ဆီ (အဆင့်မြင့် စားအုန်းဆီ)အပြင် ကုန်စည်၏ အသားတင်ပမာဏနှင့် အရွယ်အစားတို့အား မြန်မာအလေးချိန်ယူနစ်ဖြစ်သော ပိဿာ၊ ကျပ်သားဖြင့် ဖော်ပြရန်ညွှန်ကြားချက်ကို (၂၀.၁၂.၂၀၂၁) တွင် ထုတ်ပြန် ခဲ့ပြီးဖြစ်ရာ(၆)လ ပြည့်မြောက်သည့်နေ့မှစ၍ အ‌ရေးယူဆောင်ရွက်မည်ဖြစ်သောကြောင့် ပြည့်စုံစွာ ထည့်သွင်းဖော်ပြရန် လိုအပ်ကြောင်း၊ အခြင်အတွယ်ဖြင့် ‌ရောင်းချသော ဆီဆိုင်များအနေဖြင့်လည်း အလေးချိန်များ မှန်ကန်စွာရောင်းချစေလိုကြောင်း၊ စားအုန်းဆီနှင့် အခြားဆီများ ရောစပ်ရောင်းချနေလျှင် လည်းရောနှောမှုအချိုးအဆကို ပွင့်လင်းမြင်သာစွာ ရောင်းချစေလိုကြောင်း ကျယ်ကျယ်ပြန့်ပြန့်ဆွေးနွေး ခဲ့ပါသည်။

            ဒေါ်ခင်စုစုမွန်(ဒု-ဦးစီးမှူး)မှ စားသုံးသူကာကွယ်ရေးဥပဒေ-၂၀၁၉ပါ စီးပွားရေးလုပ်ငန်းရှင်၏ တာဝန်များ၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်(၂/၂၀၁၉)ပါ ကုန်စည်အုပ်စု (က)ရှိ စားသုံးဆီအမျိုးမျိုးတွင် မြန်မာဘာသာဖြင့် ထည့်သွင်းဖော်ပြရမည့် အချက်များ ကုန်အညွှန်းအမှတ် အသားဖော်ပြခြင်းနှင့် ပတ်သက်သည့် ဥပဒေပြဌာန်းချက်များ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များနှင့် ပြစ်မှု/ပြစ်ဒဏ်များအကြောင်း ဆွေးနွေးခဲ့ပြီး လုပ်ငန်းရှင်များအား (၂၀.၁၂.၂၀၂၁) ရက်နေ့ ထုတ်ပြန်ခဲ့သည့် ညွှန်ကြားချက်အမှတ်(၁/၂၀၂၁)နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်သည့် ညွှန်ကြားချက်အမှတ်(၂/၂၀၁၉) လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(မကွေး)