သတင်းနှင့် လှုပ်ရှားမှုများ

         နေပြည်တော်ကောင်စီနှင့် စားသုံးသူရေးရာဦးစီးဌာနတို့ ပူးပေါင်းလျက် ဇွန်လ  ၂၀ ရက် နံနက်(၁၀း၀၀)နာရီတွင် ပြည်ထောင်စုနယ်မြေ၊ နေပြည်တော်တရားမဝင်ကုန်သွယ်မှုတိုက်ဖျက်ရေး ဆင့်ပွားသင်တန်းအမှတ်စဉ်(၁/၂၀၂၂)ဖွင့်ပွဲအခမ်းအနားကို နေပြည်တော်ကောင်စီ၊ အစည်းအဝေး ခန်းမ (၂)၌ ကျင်းပပြုလုပ်ခဲ့ပါသည်။

       သင်တန်းဖွင့်ပွဲတွင် နေပြည်တော်ကောင်စီအဖွဲ့ဝင်(၁)ဗိုလ်မှူးကြီး ဦးမင်းနောင်က အဖွင့်အမှာစကားပြောကြားရာ၌ တရားမဝင်ကုန်သွယ်မှုတိုက်ဖျက်ရေးလုပ်ငန်းတွေမှာ ပါဝင်နေသည့်ဌာနများမှ ဝန်ထမ်းများအနေဖြင့် ဆက်စပ်ဌာနများ၏ ဥပဒေနှင့်လုပ်ထုံးလုပ်နည်းများကို ပိုမိုကျေညက်စွာ သိရှိစေရန်နှင့် တရားမဝင်ကုန်သွယ်မှုတိုက်ဖျက်ရေးလုပ်ငန်းတွေကို ယခုထက်ပိုမိုပြီး ထိထိရောက်ရောက်ဆောင်ရွက်နိုင်ရန် ရည်ရွယ်ဖွင့်လှစ်ရခြင်း ဖြစ်ပါကြောင်း၊  တရားမဝင်ကုန်သွယ်မှုသည် တိုင်းပြည်ဖွံ့ဖြိုးတိုးတက်ရေးအတွက် ကြီးမားသောအဟန့်အတားဖြစ်စေနိုင်သဖြင့် မှောင်ခိုလောက ကြီးမားလာလေ မှန်မှန်ကန်ကန်လုပ်ဆောင်နေသည့် တိုင်းရင်းသားလုပ်ငန်းရှင်များအတွက် ထိခိုက်လေဖြစ်ပြီး နိုင်ငံတော်အတွက် ရသင့်ရထိုက်တဲ့အခွန်ဘဏ္ဍာများ ဆုံးရှုံးနေမည် ဖြစ်ပါကြောင်းနှင့် တရားမဝင်ကုန်သွယ်မှုကို အမျိုးသားရေးတာဝန်တစ်ရပ်အနေနဲ့ ထိထိရောက်ရောက် တားဆီးအရေးယူသွားရမှာ ဖြစ်ပါကြောင်း၊ မြန်မာနိုင်ငံသည် တရုတ်၊ ထိုင်း၊ အိန္ဒိယ၊ဘင်္ဂလားဒေ့ရှ်နိုင်ငံများနှင့် နယ်နမိတ်ထိစပ်နေပြီး ၎င်းနယ်စပ်လမ်းကြောင်းများမှ တရားမဝင်ကုန်စည်များဝင်/ထွက်လျက်ရှိသဖြင့် တရားမဝင်ကုန်သွယ်မှုလုပ်ငန်းများကို တရားဝင်လမ်းကြောင်းပေါ်ရောက်ရှိအောင် ဆောင်ရွက်ခြင်းဖြင့် နိုင်ငံတော်အတွက် ရသင့်ရထိုက်သည့်အခွန်အခများ ရရှိနိုင်သည့်အပြင် ပြည်သူများအနေဖြင့်လည်း ကျန်းမာရေးနှင့်ညီညွတ်ပြီး လုံခြုံစိတ်ချရသည့်ကုန်စည်များကို အသုံးပြုနိုင်မှာ ဖြစ်ပါကြောင်း၊ သင်တန်းသားများအနေဖြင့် သင်တန်းမှပို့ချချက်များကို အလေးအနက်ထားသင်ယူပြီး လက်တွေ့နယ်ပယ်တွင်လည်း းထိထိရောက်ရောက် အသုံးချဆောင်ရွက်သွားရန် လိုအပ်ပါကြောင်း ပြောကြားခဲ့ပါသည်။

        သင်တန်းဖွင့်ပွဲအခမ်းအနားသို့ နေပြည်တော်ကောင်စီအဖွဲ့ဝင်(၁)၊ နေပြည်တော်ကောင်စီအဖွဲ့ဝင် (၂)၊ အထွေထွေအုပ်ချုပ်ရေးဦးစီးဌာန၊ နေပြည်တော်တိုင်းရဲတပ်ဖွဲ့၊ အကောက်ခွန်ဦးစီးဌာန၊ ပြည်တွင်းအခွန်ဦးစီးဌာန၊ သစ်တောဦးစီးဌာန၊ စိုက်ပျိုးရေးဦးစီးဌာန၊ စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူများနှင့် သင်တန်းသား(၁၆)ဦး တက်ရောက်ခဲ့ပါသည်။

           အဆိုပါသင်တန်းတွင် တရားမဝင်ကုန်သွယ်မှုတိုက်ဖျက်ရေးကော်မတီဖွဲ့စည်းမှုနှင့် လုပ်ငန်းဆောင်ရွက်နေမှုများ၊ အမြဲတမ်းစစ်ဆေးရေးစခန်းများနှင့် OSS များ၌ စစ်ဆေးမှုလုပ်ငန်းစဉ်များ၊ တားဆီးဖမ်းဆီးစစ်ဆေးခြင်း၊ တင်သွင်း/တင်သွင်းခြင်းလုပ်ငန်းစဉ်များ၊ အကောက်အခွန်ဦးစီးဌာန ၏ မူဝါဒ၊ ဖွဲ့စည်းပုံနှင့်တာဝန်များ၊ သစ်တောဥပဒေနှင့် လုပ်ထုံးလုပ်နည်းဆိုင်ရာ တောရိုင်းတိရိစ္ဆာန်များ တရားမဝင်ကုန်သွယ်မှုတိုက်ဖျက်ရေးလုပ်ငန်းများဆောင်ရွက်နေမှု ဘာသာရပ်၊ အစားအသောက်နှင့် ဆေးဝါးကွပ်ကဲရေးဆိုင်ရာဘာသာရပ်များ၊ စားသုံးသူအကာအကွယ်ပေးရေး ဥပဒေဘာသာရပ်များ သင်ကြားပို့ချမည်ဖြစ်ပြီး သင်တန်းကာလမှာ ဇွန်လ (၂၀)ရက်မှ (၂၂)ရက်နေ့ထိ ဖွင့်လှစ်ပို့ချမည်ဖြစ်ကြောင်း သိရသည်။

DOCA(နေပြည်တော်)

                  စီးပွားရေးနှင့်းကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ရွှေဘိုခရိုင်ဦးစီးမှူးရုံးအနေဖြင့် ဘေးအန္တရာယ်ရှိသည်ဟု ထင်မြင်ယူဆရသော ကုန်စည်(သို့မဟုတ်) ဝန်ဆောင်မှုများကို ဈေးကွက်စောင့်ကြည့်စစ်ဆေးနိုင်ရန်နှင့် ဈေးကွက်အတွင်းမှ ပပျောက်စေရန်အလို့ဌာ ဈေးကွက်စောင့်ကြည့်စစ်ဆေးခြင်းလုပ်ငန်းများကို စီမံချက်များ ချမှတ်ဆောင်ရွက်လျှက်ရှိပါသည်။

                  ဇွန်လ(၂၁)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း(၃)ဦးတို့သည် ရွှေဘိုမြို့၊ အမှတ်(၄)ရပ်ကွက်ရှိ ကုန်မျိုးစုံ ရောင်းဝယ်ရေးဆိုင်များကို စစ်ကိုင်းတိုင်းဒေသကြီး စားသုံးသူရေးရာကော်မတီ၏(၂/၂၀၂၂)ကြိမ် မြောက်အစည်းအဝေးဆုံးဖြတ်ချက်အရ စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ ဥပဒေနှင့်အညီ လိုက်နာဆောင်ရွက်စေရေး၊ အရည်အသွေးနှင့် အလေးချိန် အချင်အတွယ်မှန်ကန်စေရေး၊ ဥပဒေညွှန်ကြားချက်များနှင့် ညီညွတ်မှုမရှိပါက အရေးယူနိုင်ရေးအတွက် သတ်မှတ်ခဲ့သည့် ဦးစားပေးဆောင်ရွက်သွားမည့် ကုန်စည်အမျိုးအစား(၇)မျိုးအား အဓိကထား၍ ဈေးကွက်စောင့်ကြည့် စစ်ဆေးခဲ့ပါသည်။

                အဆိုပါကုန်မျိုးစုံရောင်းဝယ်ရေးဆိုင်များရှိ ဆပ်ပြာခဲ(၂)မျိုးနှင့် သွားတိုက်ဆေး(၅)မျိုးအား ဈေးကွက်စောင့်ကြည့်စစ်ဆေးရာ ပြည့်စုံမှုရှိသော်လည်း ထုတ်လုပ်ဖြန့်ဖြူးရောင်းချသည့် စီးပွားရေး လုပ်ငန်းရှင်များအသိပညာရရှိနိုင်စေရန်နှင့် ကုန်စည်နှင့်ဝန်ဆောင်မှုအပါ် တာဝန်ရှိမှုကို သိရှိနိုင်စေရန် စားသုံးသူကာကွယ်ရေးဥပဒေ၊ အခန်း(၁၈)ပါ ကုန်အညွန်းအမှတ်အသား ဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာ ထည့်သွင်းဖော်ပြ၍ ထုတ်လုပ်ဖြန့်ဖြူးရောင်းချကြရန်၊ ကုန်အညွှန်းအမှတ်အသားနှင့်ပတ်သက်၍ ဌာန၏အတည်ပြုချက်ရယူနိုင်ရေး ဆောင်ရွက်ကြရန်၊ ဥပဒေပါ စားသုံးသူ၏အခွင့်အရေးနှင့် တာဝန် များ၊ စီးပွားရေးလုပ်ငန်းရှင်၏တာဝန်များ၊ ကုန်စည်နှင့်စပ်လျဉ်း၍ အာမခံချက်ပေးခြင်းနှင့် အားမခံ ပေးထားမှုအပါ် စားသုံးသူကတောင်းဆိုနိုင်သည့်အခွင့်အရေး၊ ဝန်ဆောင်မှုနှင့်စပ်လျဉ်း၍ အာမခံချက် ပေးခြင်းနှင့် အာမခံချက်နှင့်စပ်လျဉ်း၍ စားသုံးသူကတောင်းဆိုနိုင်သော အခွင့်အရေး၊ ကုန်စည်နှင့် ဝန်ဆောင်မှုအပေါ်တာဝန်ရှိမှု၊ တားမြစ်ချက်များ၊ ပြစ်မှုနှင့် ပြစ်ဒဏ်များ၊ ကုန်စည်နှင့်ဝန်ဆောင်မှုကြောင့် စားသုံးသူအခွင့်အရေးဆုံးရှုံမှုဖြစ်ပါက တိုင်ကြားနိုင်ကြောင်း၊ စီးပွားရေးလုပ်ငန်းရှင်မှ အာမခံမှုနှင့်အညီ တာဝန်ယူဆောင်ရွက်ပေးရမည်ဖြစ်ကြောင်းတို့ကို အကျယ်တဝင့်ရှင်းလင်းဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့် အသိပညာပေးလက်ကမ်းစာစောင်များဖြန့်ဝေခဲ့ပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

           စားသုံးသူရေးရာဦးစီးဌာန၊ ကရင်ပြည်နယ်၊ ပြည်နယ်ဦးစီးမှူးနှင့်ဝန်ထမ်းများသည် ကရင်ပြည်နယ် ဆီစက်လုပ်ငန်းရှင်များအသင်းမှ တာဝန်ရှိသူများနှင့်အတူ  ကရင်ပြည်နယ်အတွင်း စားသုံးဆီထုတ်ကုန်များပိုမိုတိုးမြှင့်ထုတ်လုပ်နိုင်ရေး အထောက်အကူဖြစ်စေရေးအတွက် စားသုံးဆီစက်ရုံတည်ဆောက်မည့် ဘားအံစက်မှုဇုန်ရှိ ဦးမြင့်ဦးပိုင်ဆိုင်သော မြေနေရာသို့ ၁၉-၆-၂၀၂၂ ရက်နေ့ (၁၀:၀၀) အချိန်တွင် ကွင်းဆင်းစစ်ဆေးဆောင်ရွက်ခဲ့ကြောင်း သိရသည်။

          ထိုသို့ ကွင်းဆင်းစစ်ဆေးဆောင်ရွက်ခဲ့ရာတွင် ပြည်နယ်ဦးစီးမှူး ဦးသန်းဦးက စားသုံးဆီစက်ရုံတည်ဆောက်မည့်မြေနေရာပတ်ဝန်းကျင်အနေအထားများကို လေ့လာကြည့်ရှုခဲ့ပြီး၊ စားသုံးဆီစက်ရုံတည်ဆောက်ပြီးစီး၍ စားသုံးဆီများထုတ်လုပ်ပါက ထုတ်ကုန်များလုံခြုံစိတ်ချရမှုရှိစေရေး ဆောင်ရွက်ရမည့်အချက်များနှင့် စားသုံးဆီသိုလှောင်ဖြန့်ဖြူးရောင်းချပါက မိမိတို့စားသုံးသူရေးရာဦးစီးဌာနက ထုတ်ပြန်ကြေညာထားသော Grade Food Can အဝါရောင်ဆီပေပါနှင့်ပုံးအခွံများကို အသုံးပြုဆောင်ရွက်ရမည့်အခြေအနေများကိုလည်းကောင်း၊ စားသုံးဆီကုန်အမှတ်တံဆိပ်များတွင် မြန်မာလိုပါရှိရမည့်အချက်များ အသေးစိတ်ဖော်ပြရမည့် ကုန်အညွှန်းအမှတ်အသားများကိုလည်းကောင်း၊ ရှင်းလင်းပြောကြားခဲ့ပါသည်။

         ဦးမြင့်ဦး တည်ဆောက်မည့် စားသုံးဆီစက်ရုံသည် ဘားအံမြို့စက်မှုဇုန် အကွက်(၃)တွင် မြေနေရာလျာထားပြီး အဆောက်အဦပုံစံနှင့် ထုတ်လုပ်မှုလုပ်ငန်းစဉ်များကို အစားအသောက်နှင့်ဆေးဝါးကွပ်ကဲရေးဦးစီးဌာန၏ သက်မှတ်ထားသောစံချိန်စံညွှန်းလုပ်ထုံးလုပ်နည်းများအတိုင်း သတ်မှတ်ချက်နှင့်အညီ တည်ဆောက်မည်ဖြစ်ပြီး၊ လိုအပ်သောကုန်ကြမ်းများကို ဒေသအတွင်းမှ ထွက်ရှိလာသောကုန်ကြမ်းများအသုံးပြုမည်ဖြစ်ကာ ဆီထွက်သီးနှံများဖြစ် မြေပဲ၊ နှမ်း၊ နေကြာ၊ ပဲပုတ်နှင့်အခြားသီးနှံများကို အဝယ်ဒိုင်များဖွင့်လှစ်ပြီး သင့်တင့်မျှတသောဈေးနှုန်းဖြင့် ဝယ်ယူရန် လိုအပ်ကြောင်းနှင့် ဈေးနှုန်း/ဈေးကွက်တည်ငြိမ်စေရေးအတွက် ကရင်ပြည်နယ် စားသုံးဆီကုန်သည်ကြီးများ၊ ဆီလုပ်ငန်းရှင်များနှင့် ပူးပေါင်းဆောင်ရွက်သွားမည်ဖြစ်၍ ဒေသတွင်းစားသုံးသူပြည်သူများအနေဖြင့် ထုတ်ကုန်လုံခြုံစိတ်ချရမှု၊ မျှတသောဈေးနှုန်းဖြင့် ဝယ်ယူစားသုံးနိုင်မည်ဖြစ်ကြောင်း သိရသည်။

          စားသုံးသူရေးရာဦးစီးဌာန၊ ကရင်ပြည်နယ်၊ ပြည်နယ်ဦးစီးမှူးရုံးသည် စားသုံးသူကာကွယ်ရေးဆိုင်ရာကိစ္စရပ်များဖြစ်သော ကုန်အညွှန်းအမှတ်အသား၊ ပြည့်စုံမှန်ကန်စွာဖော်ပြနိုင်ရေး၊ ထုတ်ကုန်များလုံခြုံစိတ်ချရမှုရှိစေရေးကို အလေးပေးဆောင်ရွက်နေသကဲ့သို့ ပြည်တွင်းကုန်သွယ်မှုဖွံ့ဖြိုးရေးနှင့် ဒေသတွင်း စားသုံးဆီဖူလုံပိုလျှံစေရေးအတွက် စိုက်ပျိုး၊ ထုတ်လုပ်၊ ကြိတ်ခွဲ၊ တင်ပို့ရောင်းချသူများကို သီးနှံဆိုင်ရာဈေးနှုန်း/ဈေးကွက်ဆိုင်ရာ သတင်းအချက်အလက်များကို မျှဝေ၍ တွန်းအားပေးဆောင်ရွက်လျက်ရှိပါကြောင်း သတင်းရရှိပါသည်။

DOCA(ကရင်)

             ကရင်ပြည်နယ်အတွင်း စားသုံးဆီဖူလုံပိုလျှံထုတ်လုပ်နိုင်ရေးအတွက် ကရင်ပြည်နယ် စားသုံးဆီဖူလုံရေးကော်မတီဥက္ကဋ္ဌ၊ ကရင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဦးစောမြင့်ဦးနှင့် ပြည်နယ်အစိုးရအဖွဲ့ဝန်ကြီးများ၊ ပြည်နယ်အဆင့်ဌာနဆိုင်ရာများသည် (၁၆-၆-၂၀၂၂) ရက်နေ့ (၁၄:၀၀) နာရီအချိန်တွင် ကရင်ပြည်နယ်အစိုးရအဖွဲ့ အစည်းအဝေးခန်းမ၌ ကရင်ပြည်နယ်ကုန်သည်ကြီးများနှင့်စားသုံးဆီလုပ်ငန်းရှင်များ၊ သက်ဆိုင်ရာအသင်းအဖွဲ့များ၊ ဆီထွက်သီးနှံစိုက်ပျိုးထုတ်လုပ်သူများနှင့် တွေ့ဆုံဆွေးနွေးခဲ့ကြောင်း သိရှိရပါသည်။

           တွေ့ဆုံပွဲအခမ်းအနားတွင် ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစောမြင့်ဦးက အမှာစကားပြောကြားရာတွင် ကရင်ပြည်နယ်အတွင်း စားသုံးဆီဖူလုံရုံသာမက ပိုလျှံထုတ်လုပ်နိုင်စေရေးအတွက် Supply Chain တစ်ခုလုံးတွင် ပါဝင်သောအသင်းအဖွဲ့များ၊ စိုက်ပျိုးထုတ်လုပ်သောတောင်သူများ၊ ဆီကြိတ်ခွဲထုတ်လုပ်တင်ပို့ရောင်းချသူများ သက်ဆိုင်ရာကဏ္ဍအသီးသီးမှပါဝင်သူများအနေဖြင့် ဝိုင်းဝန်းကြိုးပမ်းဆောင်ရွက်စေလိုပါကြောင်း၊ မိမိတို့ဒေသတွင်း စားသုံးဆီဖူလုံစေရေးအတွက် ဆီနှင့်ဆီထွက်သီးနှံများဖြစ်သော မြေပဲ၊ နှမ်း၊ ပဲပုတ်နှင့်နေကြာများကို တိုးချဲ့စိုက်ပျိုးခြင်း၊ ထွက်ရှိလာသောကုန်ကြမ်းကို ဆီကြိတ်ခွဲထုတ်လုပ်နိုင်ရေးအတွက် လိုအပ်သည့်ဆီစက်များ ထပ်မံတည်ဆောက်ခြင်း၊ ဈေးနှုန်း/ဈေးကွက်တည်ငြိမ်စေရေးအတွက် ကုန်စည်ဒိုင်များဖွင့်လှစ်နိုင်ရေး၊ မျှတသည့်ဈေးနှုန်းနှင့် ဖြန့်ဖြူးမည့်ဈေးကွက်ဖြစ်ပေါ်လာရေးအတွက်လည်း အားလုံးဝိုင်းဝန်းကြိုးပမ်းဆောင်ရွက်ရမည်ဖြစ်ပါကြောင်း၊ ဆီနှင့်ဆီထွက်သီးနှံများကို တိုးချဲ့စိုက်ပျိုး၍ စားသုံးဆီပိုမိုထုတ်လုပ်ခြင်းအားဖြင့် ပုဂ္ဂလိကကဏ္ဍဖွံ့ဖြိုးတိုးတတ်လာမည်ဖြစ်ပြီး၊ ဒေသတွင်း အလုပ်အကိုင်အခွင့်အလမ်းများဖြစ်ပေါ်လာကာ ကရင်ပြည်နယ်အတွင်း စားသုံးဆီဖူလုံရုံသာမက ပိုလျှံထုတ်လုပ်နိုင်လာမည် ဖြစ်ပါကြောင်း၊ သို့ပါ၍ သက်ဆိုင်ရာဌာနများမှ စိုက်ပျိုးနည်းပညာ၊ ဈေးနှုန်း/ဈေးကွက် သတင်းအချက်အလက်နှင့် လိုအပ်သည်များ ဝိုင်းဝန်းကူညီဆောင်ရွက်ပေးကြရန် ဖြစ်ပါကြောင်း၊ တက်ရောက်လာသောဌာနဆိုင်ရာများနှင့် လုပ်ငန်းရှင်များမှ လိုအပ်သည်များကို ပွင့်ပွင့်လင်းလင်း တင်ပြဆွေးနွေးပေးရန်ဖြစ်ပါကြောင်း ပြောကြားပါသည်။  

          ဆက်လက်၍ စားသုံးသူရေးရာဦးစီးဌာန၊ ကရင်ပြည်နယ် ပြည်နယ်ဦးစီးမှူး ဦးသန်းဦးက ကရင်ပြည်နယ်အတွင်း စားသုံးဆီလိုအပ်ချက်နှင့် စားသုံးပိုလျှံအခြေအနေများကိုလည်းကောင်း၊ ဈေးနှုန်း/ဈေးကွက်အခြေအနေများကိုလည်းကောင်း၊ ပဲမျိုးစုံ၊ ဆီထွက်သီးနှံနှင့် စားဆီတို့အား ပြည်ပ သို့တင်ပို့ရာတွင် ပို့ကုန်လိုင်စင်လျှောက်ထားရန်လိုအပ်သော ကုန်စည်လိုင်းများအဖြစ် ကုန်သွယ်ရေးဦးစီးဌာနမှ ထုတ်ပြန်ကြေညာထားသောသတင်းလွှာအားလည်းကောင်း၊ ကရင်ပြည်နယ်အတွင်း ဆီကုန်သည်များနှင့် ဆီလုပ်ငန်းရှင်များဖွဲ့စည်းထားရှိမှုနှင့် အသင်းဖြစ်ပေါ်တိုးတတ်မှုအခြေအနေများကိုလည်းကောင်း၊ အကျယ်တဝင့် ရှင်းလင်းဆွေးနွေး တင်ပြခဲ့ပါသည်။

          ထို့နောက် တက်ရောက်လာကြသော ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဋ္ဌ၊ အတွင်းရေးမှူး၊ ဆီလုပ်ငန်းရှင်များအသင်း ဥက္ကဋ္ဌ၊ အတွင်းရေးမှူး၊ စိုက်ပျိုးတောင်သူများက လက်တွေ့မြေပြင်ဆောင်ရွက်မှုအခြေအနေများနှင့် လိုအပ်သည့် အခက်အခဲအခြေအနေများကို တင်ပြခဲ့ရာ ပြည်နယ်ဝန်ကြီးချုပ်က လိုအပ်သည့်အခြေအနေများ ပေါင်းစပ်ဖြည့်ဆည်းဆောင်ရွက်ပေးခဲ့ပါသည်။ အခမ်းအနားတွင် ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ ဌာနဆိုင်ရာများ၊ ကုန်သည်အသင်းအဖွဲ့များ၊ စိုက်ပျိုးထုတ်လုပ်သူများ၊ ဖိတ်ကြားထားသောလုပ်ငန်းရှင်များ စုစုပေါင်း လူဦးရေ (၃၅) ယောက် တက်ရောက်၍ အခမ်းအနားကို (၁၆:၃၀) အချိန်တွင် ရုပ်သိမ်းခဲ့ကြောင်း သိရှိရပါသည်။

DOCA(ကရင်)

            ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့၊ စားသုံးသူရေးရာဦးစီးဌာန၊ မြို့နယ်တာဝန်ခံသည် ဇွန်လ ၁၇ ရက်နေ့ နံနက်(၀၉:၀၀)နာရီအချိန်၌ လေးမျက်နှာ-ငါးသိုင်းချောင်း ကားလမ်းဘေးရှိ “ထွန်းသစ်စ” စက်သုံးဆီအရောင်းဆိုင်သို့ ကွင်းဆင်းစစ်ဆေးခဲ့ပါသည်။

          ၎င်းစက်သုံဆီဆိုင်တွင် စက်သုံးဆီများကို ရန်ကုန်မှ စက်သုံးဆီယာဉ်များဖြင့် ပုံမှန်ဝင်ရောက်လျက်ရှိပြီး၊ စက်သုံးဆီပြတ်လပ်မှုမရှိစေရေးနှင့် စက်သုံးဆီများကို ရည်ညွှန်းဈေးနှုန်းအတိုင်း ရောင်းချနေကြောင်း၊ ကုန်စည်၏အရည်အသွေး၊ အချိန်အတွယ် ပမာဏနှင့် အလေးချိန်မှန်ကန်မှု ရှိ/မရှိခြင်းတို့ကို စစ်ဆေးခဲ့ပြီး၊ စီးပွားရေးလုပ်ငန်းရှင်များအနေဖြင့် ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် စားသုံးသူဥပဒေပါ စီးပွားရေးလုပ်ငန်းရှင်၏ တာဝန်များအကြောင်း အသိပညာ ပေးဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)