သတင်းနှင့် လှုပ်ရှားမှုများ

           ပဲခူးတိုင်းဒေသကြီး ၊ စားသုံးသူရေးရာဦးစီးဌာနမှ ခရိုင်ဦးစီးမှူး ဦးအောင်သိန်း၊ မြို့နယ်တာဝန်ခံနှင့် ဝန်ထမ်းများသည် (၁၇.၆.၂၀၂၂) ရက်နေ့တွင် သာယာဝတီခရိုင် ၊ နတ်တလင်းမြို့နယ် စည်ပင်အပြင်ဘက် ရန်ကုန်-ပြည် ကားလမ်းဘေးရှိ စက်သုံးဆီဖြန့်ဖြူးရောင်းချသည့် အရောင်းဆိုင်များဖြစ်သော လပ်တီးဇုန်၊ ယွန်းယွန်း၊ ဖြိုးမောက်ပြည့်စုံဆီအရောင်းဆိုင်တို့အား ဈေးကွက်စောင့်ကြည့် စစ်ဆေးခြင်း လုပ်ငန်းများကို လုပ်ဆောင်ခဲ့ပါသည်။

          ၎င်းစက်သုံးဆီအရောင်းဆိုင်များအား ရည်ညွှန်းဈေးနှုန်းထက် (လျော့နည်း/ပိုမို) ရောင်းချခြင်း  ရှိ/မရှိ ၊ စက်သုံးဆီအမျိုးအစားအလိုက် ရောင်းချသည့် ဈေးနှုန်းများ ၊ အကန့်အသတ်ဖြင့် ရောင်းချမှု ရှိ/မရှိ ၊ နေ့စဉ် ပုံမှန်ရောင်းချခြင်း ရှိ/မရှိ ၊ သတ်မှတ်ထားသော ဈေးနှုန်းဖြင့် ရောင်းချပေးခြင်း ရှိ/မရှိ ၊ စက်သုံးဆီ ဘောက်ဆာယာဉ်များ ရောက်ရှိမှု ရှိ/မရှိ တို့ကို ဆီဆိုင်လုပ်ငန်းရှင်များနှင့် တွေ့ဆုံမေးမြန်း ဆောင်ရွက်ခဲ့ပါသည်။

DOCA(ပဲခူး)

      ရှမ်းပြည်နယ်(အရှေ့ပိုင်း) စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးများနှင့်တာဝန်ရှိသူများသည် ၂၀၂၂ ခုနှစ်၊ ဇွန်လ (၂၀) ရက်နေ့၊ နံနက် (၁၀:၀၀) နာရီအချိန်တွင် ကျိုင်းတုံမြို့၊ ရပ်ကွက် (၁/၂/၃) အတွင်းရှိကုန်စုံဆိုင်များအား ကုန်အညွှန်းအမှတ်အသားနှင့် ပတ်သက်၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          စစ်ဆေးရေးမှူးများနှင့်တာဝန်ရှိသူများသည် ကုန်စုံဆိုင်ပိုင်ရှင်များအား သက်တမ်းလွန်ကုန်ပစ္စည်းများနှင့် သက်ဆိုင်ရာဌာနများမှ တားမြစ်ပိတ်ပင်ထားသောကုန်ပစ္စည်းများကို ရောင်းချခြင်းမပြုရန်၊ စားသုံးသူကာကွယ်ရေးဥပဒေအခန်း (၉) ပါ “စားသုံးသူ၏အခွင့်အရေးနှင့်တာဝန်များ”၊ အခန်း (၁၀) ပါ “စီးပွားရေးလုပ်ငန်းရှင်၏တာဝန်များ”နှင့် အခန်း (၁၈) ပါ “ကုန်အညွှန်းအမှတ်အသားဖော်ပြခြင်း”များအား သိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခြင်းများနှင့် စားသုံးသူအသိပညာပေး လက်ကမ်းစာစောင်ဖြန့်ဝေပေးခြင်များ ဆောင်ရွက်ခဲ့ပါသည်။

DOCA(ရှမ်း)

         နေ့စဉ်ကြော်လှော်ချက်ပြုတ်သော မီးဖိုချောင်အခြေခံစားသောက်ကုန်များထဲတွင် ဆီသည်မပါမဖြစ်သောကုန်စည်ဖြစ်သည့်အလျောက် ဈေးကွက်အတွင်း၌ ဆီအမျိုးမျိုးကို အလေးချိန်များချင်တွယ်၍ လည်းကောင်း၊ ပုလင်း/ဘူးများတွင်သွပ်သွင်း၍ လည်းကောင်း ပုံစံအမျိုးမျိုးဖြင့် ရောင်းချကြပါသည်။ ဈေးကွက်အတွင်းရောင်းချမှုအများဆုံးဆီများမှာ မြေပဲဆီ၊ နှမ်းဆီ၊ သံလွင်ဆီ ၊ နေကြာဆီနှင့် စားအုန်းဆီများဖြစ်ပြီး ဖွဲနုဆီ၊ ဝါစေ့ဆီ၊ ပြောင်းဆီနှင့် ပဲနှမ်းဆီများကိုလည်း ရောင်းချခြင်းများရှိပါသည်။  ယင်းဆီများထဲတွင် စားအုန်းဆီသည် စားသောက်ဆိုင်များ၊ အကြော်ဆိုင်များတွင်အသုံးပြုမှုများပြားသောကြောင့် ဈေးကွက်တွင်ကျယ်လျက်ရှိသည်။  

       ဈေးကွက်အတွင်း ကုန်အမှတ်တံဆိပ်အမျိုးမျိုးဖြင့် ထုတ်လုပ်ဖြန့်ဖြူးရောင်းချလျက်ရှိရာ အချို့သောစားသုံးဆီများသည် ဟင်းသီးဟင်းရွက်ဆီ ( Vegetable Oil , Cooking Oil ) ဟုသာ ဖော်ပြထားခြင်းများရှိသည်။ ယင်းဖော်ပြချက်သည် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များအရ ကုန်စည်တစ်ခုခု၏အမျိုးအမည်မဟုတ်ပဲ ယေဘုယျဆန်သည့်အမျိုးအမည်သာဖြစ်သောကြောင့် စားသုံးသူများထင်ယောင်ထင်မှားမဖြစ်စေရန်အတွက် ကုန်စည်အမျိုးအမည်နှင့် အသားတင်ပမာဏနှင့်အရွယ်အစား (မြန်မာ့အလေးချိန်ယူနစ် ဖြစ်သော ပိဿာ ၊ ကျပ်သားဖြင့်)တို့အား  မြန်မာဘာသာဖြင့် ဖော်ပြရမည်ဖြစ်ကြောင်း၊ ဟင်းသီးဟင်းရွက်ဆီ (Vegetable Oil , Cooking Oil ) များ၌  ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များကိုလည်း စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနက ၂၀၂၁ ခုနှစ်၊ ဒီဇင်ဘာလ ၂၀ ရက်နေ့တွင် ညွှန်ကြားချက်အမှတ် (၁/၂၀၂၁) ဖြင့် ထုတ်ပြန်ခဲ့ပြီးဖြစ်ရာ  ညွှန်ကြားချက်ထုတ်ပြန်သည့်နေ့မှ (၆)လ ပြည့်မြောက်သည့် ၂၀၂၂ ခုနှစ်၊ ဇွန်လ ၂၁ ရက် အာဏာသက်ရောက်သည့်နေ့မှစတင်၍ စားသုံးသူကာကွယ်ရေးဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း ညွှန်ကြားချက်တွင်ဖော်ပြထားသည်ကို ဖတ်ရှုရပါသည်။ လက္ကားပင်ရင်းဒိုင်ကြီးများအနေဖြင့် ယင်းညွှန်ကြားချက်များအား သိရှိလိုက်နာဆောင်ရွက်ရန်လိုအပ်သကဲ့သို့ တစ်ဆင့်ပြန်လည်ဖြန့်ဖြူးရောင်းချသောဆိုင်ငယ်များ ၊ ရပ်ကွက်လက်လီဆိုင်များအနေဖြင့်လည်း မိမိတို့ရောင်းချသောကုန်စည်၏ သတင်းအချက်အလက်များကိုသိရှိရန် လိုအပ်လှပေသည်။ သတင်းအချက်အလက်များကိုမသိရှိခြင်းကြောင့် ညွှန်ကြားချက်နှင့်မညီသောကုန်စည်များကို ရောင်းဝယ်ဖောက်ကားမှုများ ပြုလုပ်မိပါက ကုန်စည်လက်ဝယ်တွင်ရှိသောသူများသာ နစ်နာဆုံးရှုံးရသည်ဖြစ်သောကြောင့် ကုန်စည်ရောင်းချသူများအနေဖြင့် မိမိတို့ရောင်းချသော ကုန်စည်နှင့်ပတ်သက်သော ကုန်အညွှန်းအမှတ်အသားဆိုင်ရာ သတင်းအချက်အလက်များကိုသိရှိရန်နှင့် ထုတ်ပြန်ထားသောညွှန်ကြားချက်များနှင့်အညီ လိုက်နာဆောင်ရွက်ရန် လိုအပ်ကြောင်း အသိပေးရေးသားဖော်ပြလိုက်ပါသည်။

DOCA(ရှမ်း)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ လက်ထောက်ညွှန်ကြားရေးမှူး ဦးခွန်ကျော်ဌေးဦးဆောင်သော ဝန်ထမ်းများသည် (၂၁.၆.၂၀၂၂)ရက်နေ့၊ (၁၀:၀၀)နာရီအချိန်တွင် တောင်ကြီးမြို့ပေါ်ရှိ စက်သုံးဆီအရောင်းဆိုင်များသို့ စက်သုံးဆီရောင်းချမှုအခြေအနေ၊ စက်သုံးဆီအချင်အတွယ်မှန်ကန်မှု ရှိ/မရှိ၊ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ အချိန်နှင့်တပြေးညီ ထုတ်ပြန်လျက်ရှိသော သတ်မှတ်ရည်ညွှန်ဈေးနှုန်းဖြင့် ရောင်းချခြင်း ရှိ/မရှိ သွားရောက်စစ်ဆေးခြင်းများ ဆောင်ရွက်ခဲ့ပါသည်။

             ထိုသို့ကွင်းဆင်းစစ်ဆေးရာတွင် စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ (၂၁.၆.၂၀၂၂)ရက်နေ့ သတ်မှတ်ရည်ညွှန်းဈေးနှုန်းဖြစ်သည့် (92- 2230,  95- 2330, HSD-2675, PD-2700) ကျပ်ဖြင့် ရောင်းချလျက်ရှိကြောင်းနှင့် စက်သုံးဆီများရောင်းချရာတွင် အချိန်အတွယ်မှန်ကန်မှု ရှိ/မရှိ စစ်ဆေးရာ မှန်ကန်ကြောင်း စစ်ဆေးတွေ့ရှိခဲ့ပါသည်။ယင်းနေ့တွင် တောင်ကြီးမြို့ပေါ်ရှိ စက်သုံးဆိုင်ပေါင်း (၁၂) ဆိုင်ကို ကွင်းဆင်းစစ်ဆေးခဲ့ကြောင်း သတင်းရရှိပါသည်။

DOCA(ရှမ်း)

          ကရင်ပြည်နယ်အစိုးရအဖွဲ့ အတွင်းရေးမှူးဦးဆောင်၍  ကရင်ပြည်နယ် ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ ပြည်နယ်ဦးစီးမှူး၊ ကရင်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူး နှင့် ဝန်ထမ်း များသည် (၁၈-၆-၂၀၂၂) ရက်နေ့ နေ့လယ် (၁၃:၃၀)နာရီအချိန်တွင် ဘားအံမြို့ DENKO(ဘားအံ-၂) စက်သုံးဆီအရောင်းဆိုင်၊ ညောင်ရိပ်(၂)  စက်သုံးဆီအရောင်းဆိုင်နှင့် ရှမ်းလေးစက်သုံးဆီအရောင်းဆိုင်များသို့ သွားရောက်၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

       ထိုသို့စစ်ဆေးရာတွင် စက်သုံးဆီအရောင်းဆိုင်များအား စက်သုံးဆီအမျိုးအစားအလိုက် သတ်မှတ်ရည်ညွှန်းဈေးအတိုင်း ရောင်းချမှုရှိစေရေး၊ စက်သုံးဆီများ အချင်အတွယ်ပြည့်ဝ မှန်ကန်မှုရှိစေရေး၊ ကား/ ဆိုင်ကယ်စီတန်းမှုအခြေအနေများ၊ စက်သုံးဆီ ဘောက်ဆာယာဉ်များရောက်ရှိမှုအခြေအနေနှင့် စက်သုံးဆီလက်ကျန် အခြေအနေများ မေးမြန်းခဲ့ပြီး အချင်အတွယ်မှန်ကန်မှုရှိ/မရှိအား (၂၀)လီတာဝင် စံခွက်ဖြင့် ချိန်တွယ်စစ်ဆေးခဲ့ကြပါသည်။

           ကရင်ပြည်နယ် စက်သုံးဆီကြီးကြပ်ရေးကော်မတီ အဖွဲ့ဝင်များဖြစ်သော ရေနံထွက် ပစ္စည်းကြီးကြပ်ရေးဌာနနှင့် စားသုံးသူရေးရာဦးစီးဌာနတို့သည် ကရင်ပြည်နယ်အတွင်းရှိ စက်သုံးဆီဆိုင်များတွင် စက်သုံးဆီအမျိုးအစားအလိုက် ရည်ညွှန်းဈေးဖြင့် ရောင်းချမှုရှိ/မရှိနှင့် ရန်ကုန်မြို့မှ စက်သုံးဆီသယ်ဆောင်လာသော Bowser ယာဉ်များ ရောက်ရှိမှု အခြေအနေများကို စိစစ်ကြပ်မတ် စာရင်းကောက်ယူလျက်ရှိပြီး ကုန်သွယ်မှုမြန်ဆန်စေရေးနှင့် ကုန်စည်စီးဆင်းမှု မှန်ကန်မြန်ဆန်စေရေးကော်မတီသို့ နေ့စဉ်တင်ပြဆောင်ရွက်လျက်ရှိကြောင်း သိရသည်။

DOCA(ကရင်)